Ka President jong ka ri, ka Droupadi Murmu ka la ai khublei ia ki nonghikai ha kylleng ka ri shi sngi shuwa ka jingrakhe ia ka sngi kyrpang ki nonghikai.

Ha ka jingkren, ka President ka la ong, “Ha ka jingrakhe ia ka Sngi Kyrpang jong ki Nonghikai, nga ai khublei ia baroh ki nonghikai ha ka ri jong ngi. Kane ka sngi kalong ka lyngkhuh sngi kha jong u nonghikai bad u riewshemphang bad u President barim jong ka India, Dr. Sarvepalli Radhakrishnan, uba long ka tyllong ba khraw jong ka jingai mynsiem ia ka ri baroh kawei. Nga ai ka jingsngewnguh ia u ha kane ka sngi.

Ki khynnah kilong ka lawei jong ka ri. Kum ki khynnah pule ki ioh jinghikai kiba iarap ia ka jingim bad ka nongrim kaba bha. Ki nonghikai, kum ki nongialam ki lah ban tei ia ki khynnah pule kum ki nongialam ha ki por ban wan ki ban tei ia ka lawei jong ka ri.

La bynshet ha ki nonghikai ia ka kam kaba kongsan ban tei ia ki jingmut jingpyrkhat jong ki pateng ban wan, ban ialam lynti ia ki sha ka bha ka miat. Ki nonghikai ki don ka kamram ban wanrah ha ki khynnah pule, ia ka nongrim kaba bha, ki sap pyrkhat ba kongsan, bad ka jingdon ka jingkitkhlieh ia ka imlang sahlang. Lyngba ki rukom ai jinghikai katkum ka juk mynta bad ka jingpyndonkam ia ka teknoloji, kumba la thmu ha ka National Education Policy 2020, ki nonghikai ki lah ban pynkupbor ia ki khynnah pule ban ioh ka jingim kaba seisoh bad ban tei ia ka ri kaba la kiew shaphrang.

Sa shisien nga ai khublei ia ki nonghikai baroh bad kitbok kitrwiang ia ki ba kin ioh ia ka jingjop ha ka jingtei ia ki samla pule kiba shai ka jingmut jingpyrkhat.ki ban ialam lynti ia ka India sha ki kyrdan kiba kham khraw.”

Sngewbha nion hangne ban ioh ia ka jingkren jong ka President -

***