ঙসি প্রধান মন্ত্রী শ্রী নরেন্দ্র মোদীনা ৱারসোদা ভারতমচাশিংনা মহাক ইকায়খুম্নবা উৎতুনা শীনবা থৌরম অমদা মফম অদুদা লৈবা ভারতমচাশিংদা ৱা ঙাংখ্রে।

প্রধান মন্ত্রী লৈবাক অসিদা লৈরিবা ভারতমচাশিংনা হরাও-তয়াম্না ওকখি। মহাক্কী ৱারোলদা, প্রধান মন্ত্রীনা হায়খি চহি ৪৫গী মতুংদা ভারতকী প্রধান মন্ত্রী অমনা পোলেন্দা লাকপনি অমসুং ভারত-পোলেন্দ লৈবাক অনিগী মরীশিং হেন্না ফগৎহন্নবা রাস্ত্রপতি অন্দরজেজ দুদা অমসুং প্রধান মন্ত্রী দোনাল্দ তুসক উন্নবা মহাক্না খৌরাংনা ঙাইরি। ভারত গনতন্ত্রগী হৌরকফমনি অমসুং মসিগী গুনশিং পোলেন্দগা শরুক য়ামিন্নদুনা লৈবাক অনি হেন্না নকশিন্নহনগনি।

প্রধান মন্ত্রী মোদীনা হায়খি লৈবাক অনিগী মরক্তা লৈনরিবা মরীশিং হেন্না মপাঙ্গল কনখৎহন্নবা পোলেন্দা লৈরিবা ভারতমচাশিংনা শিংথানিঙাই ওইনা মতেং পাংলি। ওপরেসন গঙ্গা মাইপাক্না পাংথোকপদা মখোয়না লৌখিবা থৌদাং অদু থাগৎনিঙাইনি। ভারতমচাশিং অসি ভারতকী তুরিজমগী ব্রান্দ এম্বেসেদর অমা ওইগদবনি অমসুং মসি চাউখৎনবগী ৱারিগী শরুক অমা ওইগদবনি। কোলহাপুরগী বোব্রি মহারাজ অমসুং মোন্তে কেসিনো লানফমগী মেমোরিএলশিং অসি লৈবাক অনিগী মরক্তা মীগা-মীগা লৈনরিবা অফবা মরীশিংগী ময়েক লারবা খুদমশিংনি। মসিগী অখন্নবা মরী অসি হেন্না চেৎশীনহন্নবা, প্রধান মন্ত্রীনা জামসাহেব মেমোরিএল য়ুথ একচেঞ্জ প্রোগ্রাম অমা লাউথোকখি অমসুং থৌরম অসিগী মখাদা চহি অমদা পোলিস নহারোল ২০ ভারত্তা লাক্নবা চেবাউ পীগনি। গুজরাতকী য়ুহা হাবা মনুংদা পোলেন্দনা পীরকখিবা মতেং অদু প্রধান মন্ত্রীনা নিংশিংখি।

প্রধান মন্ত্রীনা হায়খি হৌখিবা চহি ১০ অসিদা ভারত্তা চাউখৎ-থৌরাংগী অওনবা কয়া পুরক্লে। চহি খরগী মনুংদা ভারত মালেমদা খ্বাইদগী চাউবা অহুমশুবা ইকোনোমি ওইরগনি। লৈবাক অসি ২০৪৭ দা চাউখৎলবা লৈবাক অমা ওইহন্নবা মহাক্কী পান্দমশিং লৈরি। অনৌবা তেক্নোলোজি অমসুং গ্রিন ইনর্জি অমসুং গ্রিন গ্রোথকী মতাংদা ভারত অমসুং পোলেন্দগী মরক্তা লৈনবা মরীশিং হেনগৎলক্লে।

প্রধান মন্ত্রীনা হায়খি ভারতনা “বসুধাইব কুতুম্বকম” হায়বদি মালেম অসি ইমুং অমনি হায়বা অসিদা থাজবা থম্লি অমসুং মসিনা মালেমগী য়াইফনবা থবক তৌনবা অমসুং মীওইবা খুন্নাইগী অৱাবা তারকপা মতমদা অহানবা ওইনা মতেং পাংবা লৈবাক অমা ওইনবা লৈবাক অসিদা ইথিল পীরি।

***