આજે નવી દિલ્હીમાં લલિત કલા અકાદમી (એલકેએ)માં "વિભાજન વિભીષિકા સ્મૃતિ દિવસ" નિમિત્તે માહિતી અને પ્રસારણ મંત્રાલયના સેન્ટ્રલ બ્યુરો ઓફ કોમ્યુનિકેશન દ્વારા આયોજિત એક પ્રદર્શનનું  ઉદઘાટન કરવામાં આવ્યું હતું. આ પ્રદર્શન 14 ઓગસ્ટ, 2024થી 17 ઓગસ્ટ, 2024 સુધી એલકેએ (ગ્રાઉન્ડ ફ્લોર ગેલેરી), કોપર્નિકસ માર્ગ, નવી દિલ્હી ખાતે યોજાશે.

ઉદ્ઘાટન સમારોહમાં મોટી સંખ્યામાં શાળાના વિદ્યાર્થીઓ સાથે અન્ય મુલાકાતીઓ પણ જોવા મળ્યા  હતા.

આ પ્રદર્શનમાં વ્યક્તિગત વાર્તાઓ, અપાર પીડા અને અસંખ્ય જીવન પર 1947ના ભાગલાની કાયમી અસરને પ્રકાશમાં લાવવાનો પ્રયાસ કરવામાં આવ્યો છે. આ પ્રદર્શનનો હેતુ સહન કરનારાઓની યાદોનું સન્માન કરવાનો અને આ ઐતિહાસિક ઘટનાની જટિલતાઓ અને ચૂકવવી પડેલી માનવીય કિંમતની ઊંડી સમજને પ્રોત્સાહન આપવાનો છે. તે ઐતિહાસિક ફોટોગ્રાફ્સ, વીડિયો અને ઇન્ટરેક્ટિવ ડિસ્પ્લે પ્રદર્શિત કરે છે, જે થીમની માહિતી પ્રદાન કરે છે.

આ પ્રદર્શન માત્ર ભૂતકાળનું જ પ્રતિબિંબ નથી, પરંતુ ભવિષ્યની પેઢીઓ, ખાસ કરીને વિદ્યાર્થીઓ અને યુવાનો માટે સહાનુભૂતિ, સુલેહ અને એકતાના પાયા પર આધારિત ભવિષ્યનું નિર્માણ કેવી રીતે કરી શકીએ તે વિશે અર્થપૂર્ણ વાર્તાલાપમાં જોડાવાની તક પણ છે. તે શાળાના અભ્યાસક્રમ અને મૂલ્યો સાથે ગોઠવાયેલ મૂલ્યવાન શૈક્ષણિક અનુભવ પ્રદાન કરે છે. ઉદઘાટન દરમિયાન, સીબીસી કલાકારોએ વિવિધ દેશભક્તિના ગીતો રજૂ કર્યા હતા અને શ્રોતાઓને મંત્રમુગ્ધ કર્યા હતા.

AP/GP/JD

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com