ಭಾರತದ ರಾಷ್ಟ್ರಪತಿ ಶ್ರೀಮತಿ ದ್ರೌಪದಿ ಮುರ್ಮು ಅವರು ಫಿಜಿ, ನ್ಯೂಜಿಲೆಂಡ್ ಮತ್ತು ಟಿಮೋರ್-ಲೆಸ್ಟೆಗೆ ತಮ್ಮ ಅಧಿಕೃತ ಭೇಟಿಯ ಮೊದಲ ಹಂತದಲ್ಲಿ ನಿನ್ನೆ ನಾಡಿ ನಗರಕ್ಕೆ ಬಂದಿಳಿದರು. ಅವರು ಇಂದು (ಆಗಸ್ಟ್ 6, 2024) ಫಿಜಿಯ ಸುವಾವನ್ನು ತಲುಪಿದರು. ಅವರನ್ನು ಫಿಜಿಯ ಪ್ರಧಾನ ಮಂತ್ರಿ ಸಿತಿವೇನಿ ರಬುಕಾ ಅವರು ವಿಮಾನ ನಿಲ್ದಾಣದಲ್ಲಿ ಬರಮಾಡಿಕೊಂಡರು ಮತ್ತು ವಿಧ್ಯುಕ್ತ ಸ್ವಾಗತವನ್ನು ನೀಡಿದರು. ಇದು ಫಿಜಿಗೆ ಭಾರತದ ಮುಖ್ಯಸ್ಥರ ಮೊದಲ ಭೇಟಿಯಾಗಿದೆ. ರಾಜ್ಯ ಸಚಿವರಾದ ಶ್ರೀ ಜಾರ್ಜ್ ಕುರಿಯನ್ ಮತ್ತು ಲೋಕಸಭಾ ಸಂಸದರಾದ ಶ್ರೀ ಸೌಮಿತ್ರಾ ಖಾನ್ ಮತ್ತು ಶ್ರೀ ಜುಗಲ್ ಕಿಶೋರ್ ಈ ಭೇಟಿಯಲ್ಲಿ ರಾಷ್ಟ್ರಪತಿ ಮುರ್ಮು ಅವರ ಜೊತೆಗಿದ್ದಾರೆ.

ಫಿಜಿ ಪ್ರಧಾನ ಮಂತ್ರಿಯವರ ಉಪಸ್ಥಿತಿಯಲ್ಲಿ ರಾಷ್ಟ್ರಪತಿ ಮುರ್ಮು ಅವರಿಗೆ ಸಾಂಪ್ರದಾಯಿಕ ಸ್ವಾಗತ ಸಮಾರಂಭವನ್ನು ಆಯೋಜಿಸಲಾಗಿತ್ತು. ತರುವಾಯ, ರಾಷ್ಟ್ರಪತಿಯವರು ಸ್ಟೇಟ್ ಹೌಸ್‌ ಗೆ ಭೇಟಿ ನೀಡಿದರು, ಅಲ್ಲಿ ಅವರನ್ನು ಫಿಜಿಯ ಅಧ್ಯಕ್ಷ ರತು ವಿಲಿಯಮ್ ಮೈವಲಿಲಿ ಕಟೋನಿವೆರೆ ಅವರು ಆತ್ಮೀಯವಾಗಿ ಬರಮಾಡಿಕೊಂಡರು. ಉಭಯ ನಾಯಕರು ಭಾರತ-ಫಿಜಿ ಬಾಂಧವ್ಯವನ್ನು ಇನ್ನಷ್ಟು ಗಾಢಗೊಳಿಸುವ ಬಗ್ಗೆ ಚರ್ಚಿಸಿದರು. ಫಿಜಿ ಪ್ರಮುಖ ಪಾಲುದಾರನಾಗಿರುವ ಫೆಸಿಫಿಕ್ ದ್ವೀಪ ರಾಷ್ಟ್ರಗಳೊಂದಿಗೆ (ಪಿಐಸಿ) ನಮ್ಮ ಸಂಬಂಧಗಳು ಮತ್ತು ಅಭಿವೃದ್ಧಿ ಪಾಲುದಾರಿಕೆಯನ್ನು ಬಲಪಡಿಸಲು ಭಾರತವು ಬದ್ಧವಾಗಿದೆ ಎಂದು ರಾಷ್ಟ್ರಪತಿ ಹೇಳಿದರು.

ಸ್ಟೇಟ್ ಹೌಸ್‌ ನಲ್ಲಿ, ಫಿಜಿಯ ಅಧ್ಯಕ್ಷರು ಫಿಜಿಯ ಅತ್ಯುನ್ನತ ನಾಗರಿಕ ಪ್ರಶಸ್ತಿಯನ್ನು - ಕಂಪ್ಯಾನಿಯನ್ ಆಫ್ ದಿ ಆರ್ಡರ್ ಆಫ್ ಫಿಜಿ - ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಗೆ ಪ್ರದಾನ ಮಾಡಿದರು. ಕಳೆದ ವರ್ಷ ಫೆಬ್ರವರಿಯಲ್ಲಿ ಉದ್ಘಾಟನೆಗೊಂಡ ಭಾರತೀಯ ಉಪಕ್ರಮವಾದ 'ರಾಜ್ಯಗಳ ಮುಖ್ಯಸ್ಥರ ನಿವಾಸಗಳ ಸೌರೀಕರಣ' ಯೋಜನೆಯ ಪ್ರಗತಿಯನ್ನು ರಾಷ್ಟ್ರಪತಿ ಮುರ್ಮು ವೀಕ್ಷಿಸಿದರು.

ನಂತರ ರಾಷ್ಟ್ರಪತಿಯವರು ಫಿಜಿಯ ಸಂಸತ್ತನ್ನು ಉದ್ದೇಶಿಸಿ ಮಾತನಾಡಿದರು. ನಮ್ಮ ಗಾತ್ರದಲ್ಲಿ ಅಪಾರ ವ್ಯತ್ಯಾಸವಿದ್ದರೂ, ಭಾರತ ಮತ್ತು ಫಿಜಿ ಎರಡಕ್ಕೂ ನಮ್ಮ ರೋಮಾಂಚಕ ಪ್ರಜಾಪ್ರಭುತ್ವಗಳು ಸೇರಿದಂತೆ ಹಲವು ಸಾಮ್ಯತೆಗಳಿವೆ ಎಂದು ಅವರು ಹೇಳಿದರು. ತಳಮಟ್ಟದಲ್ಲಿ ಪ್ರಜಾಪ್ರಭುತ್ವವನ್ನು ಬೆಳೆಸುವ ಶ್ರೀಮಂತ ಅನುಭವದೊಂದಿಗೆ ನಿಕಟ ಸ್ನೇಹಿತ ಮತ್ತು ಪಾಲುದಾರನಾಗಿ, ಭಾರತವು ಎಲ್ಲಾ ಸಂದರ್ಭದಲೂ ಫಿಜಿಯ ಪಾಲುದಾರಿಕೆಗೆ ಸಿದ್ಧವಾಗಿದೆ ಎಂದು ಅವರು ಫಿಜಿಯ ಸಂಸದರಿಗೆ ಭರವಸೆ ನೀಡಿದರು.

ಇಂದು, ಫಿಜಿಯು ಎರಡು ಪ್ರಮುಖ ಜಾಗತಿಕ ಸವಾಲುಗಳಾದ ಹವಾಮಾನ ಬದಲಾವಣೆ ಮತ್ತು ಮಾನವ ಸಂಘರ್ಷಗಳನ್ನು ಪರಿಹರಿಸುವುದರ ಮೇಲೆ ಕೇಂದ್ರೀಕರಿಸಿರುವ ನಮ್ಮ ಸಾಮಾನ್ಯ ಪ್ರಯತ್ನಗಳಿಗೆ ನೀಡುತ್ತಿರುವ ಕೊಡುಗೆಗಾಗಿ ಪ್ರಪಂಚದಾದ್ಯಂತ ಗುರುತಿಸಲ್ಪಟ್ಟಿದೆ. ಇದು ಹವಾಮಾನ ಬದಲಾವಣೆಯ ಕುರಿತು ಜಾಗತಿಕ ಸಂವಾದವನ್ನು ರೂಪಿಸುವುದಾಗಿರಲಿ ಅಥವಾ ಸಾಗರ-ರಾಷ್ಟ್ರಗಳ ಕಳವಳಗಳನ್ನು ವ್ಯಕ್ತಪಡಿಸುವುದಾಗಿರಲಿ, ಫಿಜಿ ಜಾಗತಿಕ ಒಳಿತಿಗೆ ಅಪಾರ ಕೊಡುಗೆ ನೀಡುತ್ತಿದೆ. ಪ್ರಪಂಚದಾದ್ಯಂತ ಫಿಜಿ ನಿರ್ವಹಿಸುತ್ತಿರುವ ಪ್ರಮುಖ ಪಾತ್ರವನ್ನು ಭಾರತವು ಬಹಳವಾಗಿ ಗೌರವಿಸುತ್ತದೆ ಮತ್ತು ಶ್ಲಾಘಿಸುತ್ತದೆ ಎಂದು ರಾಷ್ಟ್ರಪತಿ ಮುರ್ಮು ಅವರು ಹೇಳಿದರು.

ಶಾಂತ ಸ್ವಭಾವದ ಫಿಜಿಯನ್ನರ ಜೀವನ ವಿಧಾನ, ಸಂಪ್ರದಾಯಗಳು ಮತ್ತು ಪದ್ಧತಿಗಳ ಬಗ್ಗೆ ಇರುವ ಅಪಾರವಾದ ಗೌರವ ಹಾಗೂ ಮುಕ್ತ ಮತ್ತು ಬಹುಸಂಸ್ಕೃತಿಯ ವಾತಾವರಣ ಸೇರಿದಂತೆ ಪ್ರಪಂಚದ ಉಳಿದ ಭಾಗಗಳು ಫಿಜಿಯಿಂದ ಕಲಿಯಲು ಬಹಳಷ್ಟಿದೆ ಎಂದು ರಾಷ್ಟ್ರಪತಿಯವರು ಹೇಳಿದರು. ವಿವಿಧ ಕ್ಷೇತ್ರಗಳಲ್ಲಿ ಭಾರತ-ಫಿಜಿ ಸಹಕಾರವು ಮತ್ತಷ್ಟು ಬಲಗೊಳ್ಳುತ್ತಲೇ ಇರುವುದಕ್ಕೆ ಅವರು ಸಂತೋಷ ವ್ಯಕ್ತಪಡಿಸಿದರು. ಜಾಗತಿಕ ದಕ್ಷಿಣದ ಪ್ರಬಲ ಧ್ವನಿಯಾಗಿ, ಹವಾಮಾನ ನ್ಯಾಯಕ್ಕಾಗಿ ಭಾರತವು ಫಿಜಿ ಮತ್ತು ಇತರ ಸಾಗರ ರಾಷ್ಟ್ರಗಳೊಂದಿಗೆ ಹೆಗಲಿಗೆ ಹೆಗಲು ಕೊಟ್ಟು ನಿಲ್ಲುವುದನ್ನು ಮುಂದುವರಿಸುತ್ತದೆ ಎಂದು ರಾಷ್ಟ್ರಪತಿಯವರು ಹೇಳಿದರು.

ನಂತರದ ಕಾರ್ಯಕ್ರಮದಲ್ಲಿ, ಫಿಜಿಯ ಪ್ರಧಾನ ಮಂತ್ರಿ ಸಿತಿವೇನಿ ರಬುಕಾ ಅವರು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿ ಮಾಡಿದರು. ಉಭಯ ನಾಯಕರು ವ್ಯಾಪಕ ಚರ್ಚೆಗಳನ್ನು ನಡೆಸಿದರು ಮತ್ತು ಐತಿಹಾಸಿಕ ಸಂಬಂಧಗಳನ್ನು ನಿರ್ಮಿಸಲು ಮತ್ತು ಉಭಯ ದೇಶಗಳ ನಡುವಿನ ಪಾಲುದಾರಿಕೆಯನ್ನು ಬಲಪಡಿಸಲು ಸಹಮತ ಬವ್ಯಕ್ತಪಡಿಸಿದರು. ಹವಾಮಾನ ಸ್ಥಿತಿಸ್ಥಾಪಕತ್ವವನ್ನು ನಿರ್ಮಿಸುವ ಮತ್ತು ಶುದ್ಧ ಮತ್ತು ನವೀಕರಿಸಬಹುದಾದ ಇಂಧನ ಅಭಿವೃದ್ಧಿಯ ಮೇಲೆ ಕೇಂದ್ರೀಕರಿಸುವ ಮೂಲಕ ಫಿಜಿಯೊಂದಿಗಿನ ತನ್ನ ಅಭಿವೃದ್ಧಿ ಪಾಲುದಾರಿಕೆಯನ್ನು ಆಳಗೊಳಿಸಲು ಭಾರತ ಬದ್ಧವಾಗಿದೆ ಎಂದು ರಾಷ್ಟ್ರಪತಿ ಹೇಳಿದರು.

ರಾಷ್ಟ್ರಪತಿ ದ್ರೌಪದಿ ಮುರ್ಮು ಮತ್ತು ಪ್ರಧಾನ ಮಂತ್ರಿ ಸಿತಿವೇಣಿ ರಬುಕಾ ಅವರು (i) ಭಾರತದ ಹೈ ಕಮಿಷನ್ ಆಫ್ ಇಂಡಿಯಾ ಚಾನ್ಸೆರಿ ಮತ್ತು ಇಂಡಿಯನ್ ಕಲ್ಚರಲ್ ಸೆಂಟರ್ ಕಾಂಪ್ಲೆಕ್ಸ್, ಸುವಾ ಮತ್ತು (ii) ಸುವಾದಲ್ಲಿ 100 ಹಾಸಿಗೆಗಳ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ ನಿರ್ಮಾಣಕ್ಕೆ ಯೋಜನಾ ಸ್ಥಳಗಳ ಹಂಚಿಕೆಗಾಗಿ ದಾಖಲೆಗಳನ್ನು ಹಸ್ತಾಂತರಿಸುವ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು.

ರಾಷ್ಟ್ರಪತಿಯವರು ಭಾರತೀಯ ಸಮುದಾಯದ ಉತ್ಸಾಹಭರಿತ ಸಭೆಯನ್ನು ಉದ್ದೇಶಿಸಿ ಮಾತನಾಡಿದರು. 145 ವರ್ಷಗಳ ಹಿಂದೆ ಫಿಜಿಗೆ ಬಂದ 'ಗಿರ್ಮಿಟಿಯಾ' ಒಪ್ಪಂದದ ಕಾರ್ಮಿಕರ ದೃಢತೆ ಮತ್ತು ಸ್ಥಿತಿಸ್ಥಾಪಕತ್ವವು ತಮ್ಮ ಹೊಸ ತಾಯ್ನಾಡಿನಲ್ಲಿ ಎಲ್ಲಾ ವಿಲಕ್ಷಣಗಳ ವಿರುದ್ಧ ಪ್ರವರ್ಧಮಾನಕ್ಕೆ ಬಂದಿದ್ದು, ಜಗತ್ತಿಗೆ ಉತ್ತಮ ಸ್ಫೂರ್ತಿಯ ಮೂಲವಾಗಿದೆ ಎಂದು ಅವರು ಹೇಳಿದರು.

ನಮ್ಮ ಕನಸಿನ ಭಾರತವನ್ನು ನಿರ್ಮಿಸುವ ಪ್ರಯಾಣದಲ್ಲಿ ವಿಶ್ವದಾದ್ಯಂತದ ನಮ್ಮ ಸಾಗರೋತ್ತರ ಭಾರತೀಯ ಸಮುದಾಯವನ್ನು ಪ್ರಮುಖ ಪಾಲುದಾರರು ಮತ್ತು ಭಾಗೀದಾರರಾಗಿ ನಾವು ನೋಡುತ್ತೇವೆ ಎಂದು ರಾಷ್ಟ್ರಪತಿಯವರು ಹೇಳಿದರು.

ಸುವಾದಲ್ಲಿರುವ ಹುತಾತ್ಮ ಯೋಧರ ಸ್ಮರಣಾರ್ಥ ರಾಷ್ಟ್ರೀಯ ಯುದ್ಧ ಸ್ಮಾರಕಕ್ಕೂ ರಾಷ್ಟ್ರಪತಿಯವರು ಭೇಟಿ ನೀಡಿದರು. ಅವರು ಮಹಾತ್ಮಾ ಗಾಂಧಿ ಸ್ಮಾರಕ ಪ್ರೌಢಶಾಲೆಗೆ ಭೇಟಿ ನೀಡಿದರು, ಅಲ್ಲಿ ಅವರು ಮಹಾತ್ಮ ಗಾಂಧಿಯವರ ಪ್ರತಿಮೆಗೆ ಪುಷ್ಪ ನಮನ ಸಲ್ಲಿಸಿದರು.

ದಿನದ ಕೊನೆಯ ಅಧಿಕೃತ ಕಾರ್ಯಕ್ರಮವಾಗಿ, ಫಿಜಿಯ ಅಧ್ಯಕ್ಷ ರತು ವಿಲಿಯಮ್ ಮೈವಲಿಲಿ ಕಟೋನಿವೆರೆ ಅವರು ರಾಷ್ಟ್ರಪತಿಯವರ ಗೌರವಾರ್ಥವಾಗಿ ಸ್ಟೇಟ್ ಹೌಸ್‌ ನಲ್ಲಿ ಕಾರ್ಯಕ್ರಮವನ್ನು ಆಯೋಜಿಸಿದರು, ಎಲ್ಲಾ ವರ್ಗಗಳ ಪ್ರಖ್ಯಾತ ಫಿಜಿಯನ್ನರು ಅಲ್ಲಿ ನೆರೆದಿದ್ದರು. ಈ ಸಂದರ್ಭದಲ್ಲಿ ರಾಷ್ಟ್ರಪತಿಯವರು ತಮಗೆ ನೀಡಿದ ಆತ್ಮೀಯ ಸ್ವಾಗತಕ್ಕಾಗಿ ಅಧ್ಯಕ್ಷ ಕಟೋನಿವೆರೆ, ಪ್ರಧಾನ ಮಂತ್ರಿ ರಬುಕಾ ಮತ್ತು ಫಿಜಿ ಸರ್ಕಾರ ಮತ್ತು ಜನರಿಗೆ ಧನ್ಯವಾದಗಳನ್ನು ತಿಳಿಸಿದರು.

ಸುವಾದಲ್ಲಿ ಅಧಿಕೃತ ಕಾರ್ಯಕ್ರಮಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ ನಂತರ, ರಾಷ್ಟ್ರಪತಿಯವರು ನಾಡಿ ನಗರಕ್ಕೆ ತೆರಳಿದರು, ಅಲ್ಲಿಂದ ಅವರು ನಾಳೆ ನ್ಯೂಜಿಲೆಂಡ್‌ ನ ಆಕ್ಲೆಂಡ್‌ಗೆ ಪ್ರಯಾಣಿಸಲಿದ್ದಾರೆ.

Click here to ses President Address in Hindi

Click here to ses President Address in English

*****