ভারত মাতা কী জয়!!!

ভারত মাতা কী জয়!!!

খোঞ্জেল অদু চীংগী ৱাংমদা তানবা হৌনা হায়গদবনি

ভারত মাতা কী জয়!!!

ভারত মাতা কী জয়!!!

লদাখকী লেফতেন্ত গভর্নর, বি.দি. মিশ্রাজী, কেন্দ্রগী মন্ত্রী সঞ্জয় সেথ, চীফ ওফ দিফেন্স স্তাফ, জেনরেল অনিল চৌহান,  আর্মী অহুমগী চীফস ওফ অর্মী স্তাফ, জেনরেল ভি.পি. মালিকজী, কারগিল লান মতমদা মতম অদুদা চীফ ওফ আর্মী স্তাফ ওইরম্বা হান্নগী আর্মী চীফ জেনরেল মনোজ পান্দেজী, গেলেন্ত্রী এৱার্দশিং ফংখ্রবা হৌজিক থবক তৌরিবা অমসুং থবক্তগী পোথাখ্রবা লান্মীশিং, কারগিল লানগী থৌনা ফবা অথৌবশিংগী মমাশিং, ভীর নারীশিং অমসুং মখোয়গী ইমুং মনুংশিং,

আর্মীগী থৌনা ফরবা লান্মীশিং, অমসুং ঐগী নুশিংজরবা ইরৈবাকচাশিং,

ঙসি লদাখকী অথোইবা লমদম অসিনা কারগিল বিজয়গী 25শুবা কুমওন পাঙথোকপা উবা ফংলি। কারগিল বিজয় দিবসনা ঐখোয়দা লৈবাক্কীদমক কত্থোকপা অসি অমরনি তাক্লি। নুমিৎ, থা, চহি, দিকেদ, চহিচা কয়া হৌখ্রে, পন্থাসু হোংলে অদুবু লৈবাক অসি ঙাকথোক্নবা মখোয়গী পুন্সি খুবাক্তা হাপখিবা মীওইশিংগী মমিংদি মুৎপা নাইদনা লৈরি। লৈবাক অসিনা ঐখোয়গী আর্মীগী থৌনা ফরবা অথৌবশিংগী লমন মতম চুপ্পদা তোল্লি। লৈবাক অসিনা মখোয়দা তৌবীমল খঙবা উৎচরি।

মরুপশিং,

কারগিল লান মনুংদা মীচপ প্রজা অমা ওইনা ঐখোয়গী লান্মীশিংগী মরক্তা য়াওবা ফংজবা ঐগী লাইবক ফবনি। ঙসি ঐহাক্না অমুক হন্না কারগিলগী লমদমদা লাকপা মতমদা ঐগী ৱাখলদা মতম অদু ঙরাং নাহনদা থোকপগুম্না মহৌশানা নীংশিংহল্লি। ঐখোয়গী লান্মীশিংনা অৱাংবা মফম অসিদা অৱাবা ৱার ওপরেসন করম্না পাঙথোকখিবগে হায়বা ঐনা নীংশিংলি। লৈবাক অসিবু লানঙম ফিরাল থেৎহনখিবা অদুগুম্বা থৌনা ফরবা লান্মী পুম্নমক্তা ঐহাক্না ইকাই খুম্নবা উৎচরি। ঐহাক্না কারগিলদা ইমা লৈবাকপু ঙাকশেন্নবা থৱায়না পোন্থা পীখিবা অথৌবশিংবুসু ইকাই খুম্নবা উৎচরি।

মরুপশিং,

কারগিলদা ঐখোয়না লান ঙম্বতা নত্তনা ঐখোয়না 'অচুম্বা, হনবা লৈতবা অমসুং পাঙ্গল'গী অফবা খুদম অমা উৎখি। অদোম্না খংবগুম্না, মতম অদুদা ভারতনা শান্তিগীদমক হোৎনখি। মসিগী মহুত্তা, পাকিস্তান্না অমুক্কা হন্না মহাক্কী ফত্তবা মশক অদু উৎখি। অদুবু অরানবা অমসুং তেররনা অচুম্বগী মায়োক্তা মাইথিখি।

মরুপশিং,

পাকিস্তান্না করিগুম্বা ফত্তবা থবক অমা তৌবা খুদিংগী মাবু মায়থিবা পীখি। অদুবু পাকিস্তান্না মাগী পুৱারীদগী করিগুম্বা অমত্তা তমখিদে। মানা তেরোরিজমগী মতেংগা লোয়ননা মশানা মশাবু মরু ওইহন্নবা হোৎনরি। অদুবু ঙসিদি, তেরোরিজমগী মাস্তরশিংনা ঐগী খোঞ্জেল হকথেংননা তাগদবা মফমদগী ঐনা ঙাংলিঙৈদা, তেরোরিজম থৌগৎপা মীওইশিং অসিদা ঐনা হায়জনীংবদি মখোয়গী ফত্তবা থৌরাংশিং অসি মাইপাকপা ঙম্লোই। ঐখোয়গী থৌনা ফরবা লান্মীশিংনা তেরোরিজমবু মপুং ফানা থুগায়রগনি, য়েক্নবদা মতিক চাবা পাউখুম পীগনি।

মরুপশিং,

লদাখ নত্ত্রগা জম্মু অমসুং কাশ্মির ওইরবসু ভারতনা চাউখৎ-থৌরাংগী লম্বেলদা লাকপা শীংনবা খুদিংমক মাইথীবা পীগনি। নুমিৎ খরনি লৈরগা ওগস্ত দা আর্তিকল 370 লৌথোকখিবা চহি 5 ফারগনি। ঙসি জম্মু অমসুং কাশ্মিরনা অনৌবা তুংলমচৎকী মরমদা ঙাংনরি,, অচৌবা মঙলানশিং থুংহন্নবা ঙাংনরি। জম্মু অমসুং কাশ্মির অসি G-20গুম্বা গ্লোবেল সম্মিৎশিংদা মরু ওইবা মীফমশিং পাঙথোকপগীদমক মশক খঙনখি। ইনফ্রাস্ত্রকচর চাউখৎহনবগা লোয়ননা তুরিজম সেক্তর অসি জম্মু অমসুং কাশ্মির-লেহ-লদাখতা খোঙজেল য়াংনা চাউখৎলি। দিকেদ অহুম মখাইগী মতুংদা অহানবা ওইনা শ্রীনগরদা তাজিয়া প্রোসেসন চৎখি। ঐখোয়গী হেভন ওন আর্থ অসি শান্তি অমসুং তংদু লৈতাবগী মাইকৈদা খোঙজেল য়াংনা চংশিল্লি।

মরুপশিং,

ঙসিদি, লদাখতা চাউখৎপগী অনৌবা খোঙজং অমা হৌরে, 'শিনকুন লা তনেল' শাবগী থবক হৌখ্রে। লদাখ অসি শিনকুন লা তনেলগী খুত্থাংদা চহি চুপ্পা লৈবাক অসিগা শম্নদুনা লৈগনি। তনেল অসিনা লদাখকী চাউখৎ-থৌরাং অমসুং অফবা তুংলমচৎকীদমক অনৌবা ওইথোকপা য়াবশিংগী অনৌবা লম্বী অমা হাংদোক্লগনি। ঐখোয়না পুম্নমক্না খঙই মদুদি লদাখকী মীয়াম্না নোংজু নুংশাগী ফিভম ফত্তবনা মরম ওইদুনা অৱাবা কয়া মায়োক্নরি। শিনকুন লা তনেল শাবা অসিনা অৱাবা অসিসু হন্থহল্লগনি। তনেল অসিগী থবক হৌরকপদা ঐহাক্না লদাখকী ঐহাক্কী ইচিল-ইনাওশিংবু অখন্ননা নুংঙাইবা ফোঙদোকচরি।

মরুপশিং,

লদাখকী মীয়ামগী কান্নবা অসি মতম পুম্নমক্তা ঐখোয়গী মরুওইবা অমনি। ঐহাক্না নীংশিংলি, কোরোনাগী মতম অসিদা কারগিলগী ঐখোয়গী মীওই কয়া ইরানদা পন্দুনা লৈখি। মখোয়বু অমুক হন্না পুরক্নবা ঐহাক্না পর্সনেল ওইনা কন্না হোৎনখি। ইরানদগী মখোয়বু পুরক্লবা জয়সলমরদা থমখি অমসুং হকশেলগী ফিবম ফগৎলকপা মতমদা মপুং ফানা মতিক চাবা রিপোর্ত ফংলবা মতুংদা মখোয় পুম্নমকপু মখোয়গী য়ুমদা চৎহনখি। ঐখোয়না মীওই কয়াগী পুন্সি কনবা ঙমখিবদা ঐখোয়না নুংঙাইবা ফাওই। মফমসিগী মীওইশিং খুদোংচাবশিং হেনগৎহনবা, হিংবদা লাইবা হেনগৎহনবা, মসিগীদমক ভারত সরকারনা লেপ্পা লৈতনা হোৎনরি।

চহি 5দা ঐখোয়না লাদাখকী বজেৎ অসি লুপা করোর 1100দগী লুপা করোর 6000দা হেনগৎহনখ্রে। মসি য়ামদ্রবদা শরুক তরুক হেনগৎলকপনি! হায়রিবা শেনফম অসি লদাখকী মীয়ামগী চাউখৎ থৌরাংগীদমক, মফম অসিদা খুদোংচাবশিং হেনগৎহন্নবা শীজিন্নরি। লম্বী-থোং, মৈ, ঈশিং, মহৈ-মশিং, পাৱর সপ্লাই, থবক পীবা - লদাখকী ফিভম অসি মায়কৈ খুদিংমক্তা হোংলক্লি, লমদম অসিসু হোংলক্লি। অহানবা ওইনা, হোলিস্তিক প্লান্নিংগা লোয়ননা থবকশিং পায়খৎলি। জল জীবন মিসন্না মরম ওইদুনা, হৌজিক লদাখকী য়ুমশিংগী চাদা 90দগী হেনবনা পাইপকী থোংদা ঈশিং ফংহল্লে। লদাখকী নহারোলশিংনা ক্বালিতী লৈবা অৱাংবা থাক্কী মহৈ-মশিং তম্বা ফংহন্নবা সিন্ধু সেন্ত্রেল য়ুনিভর্সিতী অসি মফম অসিদা শেমগৎলি। লদাখকী মফম পুম্নমকপু 4G নেৎৱর্কনা শম্নহন্নবা থবক পায়খৎলি। কিলোমীতর 13 শাংবা জোজিলা তনেলগী থবকসু চত্থরি। মসি শাবগা লোয়ননা, নেস্নেল হায়ৱে নম্বর ৱানদসু মতম পুম্নমক্তা কনেক্তিবিতী লৈরগনি।

মরুপশিং,

ঐখোয়না লৈবাক অসিগী ঙমখৈগী লমশিংদা চাউখৎ-থৌরাংগীদমক্তা অখন্নবা পান্দমশিং থম্লি অমসুং শীংননিংঙাই ওইবা থবকশিং পায়খৎলি। বোর্দর রোদ ওর্গনাইজেসন (BRO)না হায়রিবা পান্দমশিং অসি ফংনবা মমাংদা অমুক্তা ওইখিদ্রিবা মওংদা থবক তৌরি। হৌখিবা চহি অহুম অসিদা BROনা ইনফ্রাস্ত্রকচর প্রোজেক্ত 330 হেন্না লোইশিনখ্রে। মসিগী মনুংদা লদাখতা চাউখৎ-থৌরাংগী থবকশিং অমসুং অৱাং-নোংপোক্কী সেলা তনেলগুম্বা প্রোজেক্তশিং য়াওরি। অরুবা লমদমশিংদা চাউখৎপগী খোঙজেল অসিনা অনৌবা ভারতকী ওইথোকপা য়াবা অমসুং মায়কৈ অনিমক উৎলি।

মরুপশিং,

ঙসিগী মালেমগী ফিভম অসি মমাংগীদগী খেন্নরে। মরম অদুনা, ঐখোয়গী ফোর্সশিং অসি খুৎলাই অমসুং ইক্বিপমেন্তকী লমদসু মোদর্ন ওইগদবনি। মরম অসিনা লৈবাক অসিনা দিফেন্স সেক্তরদা মরুওইবা রিফোর্মশিং পাংথোকপগী তঙাইফদবা অদু দিকেদ কয়াগী মমাংদগী লৈরক্লি। লান্মী মশামক্না চহি কয়াগী মমাংদগী হায়দুনা লাক্লি। অদুবু, লাইবক থিবদি, মমাংদা মসিদা মরুওইবা পীরমখিদে। হৌখিবা চহি 10দা ঐখোয়না দিফেন্স সেক্তরদা দিফেন্স রিফোর্মশিংবু খ্বাইদগী মরুওইবা ওইহনখ্রে। হায়রিবা রিফোর্মশিং অসিনা মরম ওইদুনা ঙসিদি ঐখোয়গী ফোর্সশিং অসি হেন্না মপাঙ্গল লৈরে, মশা-মউ ফনা লৈরে। ঙসিদি, দিফেন্স প্রোক্যুর্মেন্তগী অচৌবা শরুক অমা ভারতকী দিফেন্স ইন্দস্ত্রীদা পীরি। দিফেন্সকী রিসর্স অমসুং দিবেলপমেন্তকী বজেৎকী চাদা 25সু প্রাইবেৎ সেক্তরগীদমক থম্লি। অসিগুম্বা হোৎনরিবশিং অসিগী মহৈদি ভারতকী দিফেন্স প্রদক্সন হৌজিক লুপা করোর লাখ 1.25 হেনখ্রে। মতম অমদা ভারত অসি খুৎলাইশিং পুশিল্লকপা লৈবাক অমা ওইরম্মি। হৌজিক ভারতনা এক্সপোর্তর অমা ওইনা মশক তাক্লি। ঐহাক্না নুংঙাইবা ফাওই মদুদি ঐখোয়গী ফোর্সশিংনা খুৎলাই অমসুং মিলিতরী ইক্বিপমেন্ত 5000 হেনবগী লিস্ত অমা শেমখ্রে অমসুং হায়রিবা পোৎলম 5000 অসি মখা তানা পুশিল্লরোই হায়না ৱারেপ লৌখ্রে। মসিগীদমক্তা ঐনা লান্মীগী লুচিংবশিংদা নুংঙাইবা ফোংদোকচরি।

মরুপশিং,

দিফেন্স সেক্তরদা শেমদোক-শাদোকপশিংগীদমক ঐহাক্না ভারতকী আর্মদ ফোর্সেসপুসু থাগৎপা ফোংদোকচরি। ঐখোয়গী ফোর্সশিংনা হৌখিবা চহিশিংদা থৌনা ফবা ৱারেপ কয়া লৌখ্রে। অগ্নিপথ স্কিম অসিসু লান্মীনা পায়খৎলিবা মথৌ তাবা রিফোর্মশিংগী খুদম অমনি। চহী কয়াদগী পার্লিয়ামেন্ত অমসুং কম্মিতী কয়াদা আর্মীবু নহা ওইহন্নবগী মতাংদা খন্ন-নৈনদুনা লাক্লি। ভারতকী লান্মীশিংগী চহীগী চাংচৎ অসি মালেমগী চাংচত্তগী হেনগৎলকপা অসিনা ঐখোয় পুম্নমকপু শিংনবা পোকহল্লি। মরম অদুনা, হায়রিবা ৱাফম অসি চহি কয়াগী মমাংদগী কম্মিতী কয়াদা পুখৎলক্লি। অদুবু লৈবাক অসিগী সেক্যুরিতীগা মরী লৈনবা শীংনবশিং অসি কোকহন্নবগী অপাম্বা অদু মমাংদা উৎখিদে। অদুবু মীওই খরগী ৱাখল্লোন অদুদি লান্মী হায়বসিনা লুচিংবশিংবু ইকায় খুম্নবা উৎপীবা, পেরেদ তৌবা হায়বসিনি। ঐখোয়গীদমক্তদি, লান্মী হায়বসিনা লৈবাক অসিগী মীওই করোর 140গী থাজবা অদুনি। ঐখোয়গীদমক্তদি, লান্মী হায়বসিনা লৈবাক অসিগী মীওই করোর 140গী শান্তিগী গেরেন্তী অদুনি। ঐখোয়গীদমক্তদি, লান্মী হায়বসিনা লৈবাক অসিগী ঙমখৈদা ঙাকশেলগী গেরেন্তী অদুনি।

অগ্নিপথ স্কিমগী খুত্থাংদা লৈবাক অসিনা মরুওইবা মংলান অসি মংফাওনহনখ্রে। অগ্নিপথকী পান্দমদি লান্মী অসিবু নহা ওইহনবা, অগ্নিপথকী পান্দমদি লান্মী অসিবু মতম চুপ্পদা লানগীদমক মপাঙ্গল লৈহনবা হায়বসিনি। নুংঙাইতবা ৱাফমদি, মীওই খরনা নেস্নেল সেক্যুরিতীগা মরী লৈনবা অসিগুম্লবা সেন্সিতিব ইসু অসি রাজনিতীগী ৱাফম অমা ওইহল্লি। মীওই খরনা লান্মীগী রিফোর্ম অসিদসু মখোয় মশাগী কান্নবা ফংনবগীদমক অরানবা রাজনীতি তৌরি। হায়রিবা মীওইশিং অসিমক্না ঐখোয়গী ফোর্সশিংদা লুপা করোর লিশিং কয়াগী স্কেম তৌদুনা ঐখোয়গী ফোর্সশিংবু মপাঙ্গল হন্থহনখি। মীওইশিং অসিমক্না এয়র ফোর্সতা মোদর্ন ফাইতর জেৎশিং ফংহন্দবা পাম্মি। মখোয় অসি তেজাস ফাইতর প্লেন অদু বোক্স মনুংদা থম্নবা শেম-শারিবা মীওইশিংনি।

মরুপশিং,

অগ্নিপথ য়োজনা অসিনা লৈবাক অসিগী মপাঙ্গল হেনগৎহনগনি অমসুং লৈবাক অসিগী হৈথোই-শিংথোইরবা নহাশিংসু মমা লৈবাক অসিগী শেবা তৌনবা মাং থানা থোরক্কনি। প্রাইবেৎ সেক্তর অমসুং পেরামিলিতরী ফোর্সশিংদা অগ্নিভিরশিংবু মরুওইবা পীননবা লাউথোকখ্রে। মীওই খরগী ৱাখল্লোনদা করি থোক্লক্কদগে হায়বসিদা ঐহাক্না হরাওবা ফাওই। মখোয়গী ৱাখল্লোনদা করি থোক্লবগে। সরকারনা পেন্সনগী শেনফম কন্নবা স্কিম অসি পুরক্লে হায়না মখোয়না অরানবা ৱাখল্লোন অমা শন্দোক্লি। অসিগুম্বা মীওইশিংগী ৱাখল্লোন অসিদা ঐনা লাজবা ফাওই অদুবু অসিগুম্বা মীওইশিং অসি হংগদবনি, কনাগুম্বা অমনা মোদীগী লৈঙাক্কী মখাদা ঙসি খল্লকপা মীওই অদু ঙসি পেনসন পীরক্কদৌরিবরা হায়বদু ঐঙোন্দা হায়বিয়ু। মহাকপু পেন্সন পীনবগী মতম অসি চহি 30গী মতুংদা লাক্কনি। অদুগী মনুংদা মোদীনা চহি 105 শুরগনি অমসুং মতম অদুদসু মোদীগী সরকার লৈগনি। মোদীনা চহি 105 শুরবা মতমদা, চহি 30গী মতুংদা পেন্সন ফংলবা মতমদা, মোদী অসি অসিগুম্বা রাজনিতীগী মীওই অমা ওইগদ্রা মদুগীদমক ঙসি অৱাবা ফংগদ্রা? অদোম্না করি তৌরি? অদুবু মরূপশিং, ঐগীদমক্তদি লৈবাক অসিনা খ্বাইদগী মরু ওই, পার্টি নত্তে। অমসুং মরূপশিং, ঙসি ঐহাক্না চাউথোকচবা পোকচৈ মদুদি ঐখোয়না আর্মদ ফোর্সশিংনা লৌখিবা ৱারেপ অদু ইকাই খুম্নখি। ঐহাক্না মমাংদা হায়খিবগুম্না, ঐখোয়না নেস্নেল পোলিসীগীদমক্তা থবক তৌই অমসুং পোলিসীগীদমক্তা নত্তে। ঐখোয়গীদমক্তদি নেস্নেল সেক্যুরিতী অসি খ্বাইদগী মরু ওই। ঐখোয়গীদমক্তদি, মীওই করোর 140গী শান্তি অসি খ্বাইদগী মরু ওই।

মরুপশিং,

লৈবাক অসিগী নহারোলশিংবু লান্না লমজিংলিবা মীওইশিংগী পুৱারীনা মখোয়না লান্মীশিংগীদমক করিসু তৌদে হায়বগী খুদম্নি। মখোয় অসি চপ মান্নবা রেঙ্ক অমা, চপ মান্নবা পেন্সনগী মতাংদা লুপা করোর 500গী শেনফম অমা উৎতুনা অরানবা ৱাফম ফোঙদোকখিবা মীওইশিংনি। ঐখোয়গী সরকার অসিনা ৱান রেঙ্ক ৱান পেন্সন চৎনহনখি অমসুং লুপা করোর লিশিং 2গী মথক্তা পীখি। এক্স-সর্বিসমেনশিংদা লুপা করোর লাখ 1.25 পীগনি। করম্বা মফমদা করোর 500 অমসুং করম্বা মফমদা করোর লাখ 1.25 লৈবগে! অসুম্না অরানবা কয়া অমসুং লৈবাক অসিগী লান্মীশিংগী মীৎতা উৎ চাইবগী পাপ কয়া তৌরি! অসিগুম্বা মীওইশিং অসিনা নীংতম্বা ফংলবা মতুং চহি তরাগী খুজিং তরেৎ মখায়রোম লৈরবসু, লান্মীগী দিমান্দ, থৌনা ফরবা লান্মীশিংগী ইমুং-মনুংগী দিমান্দগী মথক্তা, ঐখোয়গী অথৌবশিংগীদমক ৱার মেমোরিয়েল অমা শাখিদে, মতম লেপ্তনা শাখি, কম্মিতীশিং শেমখি, মেপশিং উৎখি। হায়রিবা মীওইশিং অসিদি ঙমখৈদা লৈরিবা ঐখোয়গী লান্মীশিংদা মতিক চাবা বুল্ত প্রুফ জেকেৎশিংসু পীখিদে। অমসুং মরুপশিং, হায়রিবা মীওইশিং অসি কারগিল বিজয় দিবসকী মতাংদসু পুক্নীং চিংশিনখিদে। লৈবাক অসিগী মীওই করোর কয়াগী য়াইফ-মঙ্গোলদগী ঐহাক্না অহুমশুবা ওইনা সরকার শেম্বা য়াবগী খুদোংচাবা ফংলে। মরম অসিনা ঙসি ঐখোয়না মরুওইবা পুৱারী ওইরবা থৌরম অসিবু নীংশিংলি।

মরুপশিং,

কারগিলগী মাইপাকপা অসি সরকার অমত্তগী মাইপাকপা নত্তে, কারগিলগী মাইপাকপা অসি পার্তী অমত্তগী মাইপাকপা নত্তে। মসিগী মাইপাকপা অসি লৈবাক অসিগীনি, মসিগী মাইপাকপা অসি লৈবাক অসিগী হেরিতেজনি। মসি লৈবাক অসিগী চাউথোকচবা অমসুং ইকাই খুম্নবগী কুম্মৈ অমনি। ঐহাক্না অমুক্কা হন্না লৈবাক অসিগী মীওই করোর 140গী মায়কৈদগী ঐহাক্কী থৌনা ফরবা লান্মীশিংদা ইকায় খুম্নবা উৎচরি। ঐহাক্না অমুক্কা হন্না লৈবাক মীয়াম পুম্নমকপু কারগিলগী মাইপাকপগী চহি 25 মপুং ফারকপদা য়াইফ-পাউজেল পীজরি। ঐগা লোয়ননা হায়বিয়ু - ভারত মাতা কী জয়! ভারত মাতা কী জয় অসি ঐহাক্কী থৌনা ফরবা অথৌবশিংগীদমক্তনি, ঐহাক্কী ভারতকী থৌনা ফরবা মচাশিংগীদমক্তনি।

ভারত মাতা কী জয়!!!

ভারত মাতা কী জয়!!!

ভারত মাতা কী জয়!!!

হন্না-হন্না থাগৎচরি।

*****