ইকোনোমি সর্ভে ২০২৩-২৪ দা নুপীশিংদা শেন-থুমগী শক্তি পীবদগী লাইরিক তম্বা অমসুং স্কিল হেনগৎলকপা অমসুং লৈবাক্কী চাউখৎ-থৌরাংগী থবকশিংদা নু্পীশিং শরুক য়াবা হেনগৎলক্লিবা অসি উৎলে। ঙসি ফাইনান্স অমসুং কোর্পোরেত এফেয়ার্সগী য়ুনিয়ন মিনিস্তর শ্রীমতি নিরমালা সিতারমন্না সংসদতা ইকোনোমি সর্ভে ২০২৩-২৪ পুথোকখ্রে।

ভারতকী খুঙ্গংদা ফগৎলক্লিবা ফিবম অমগা লোয়ননা, ইকোনোমিক সর্ভে অসিদা ফিমেল লেবর ফোর্স পার্তিসিপেসন রেত(এল এফ পি আর) ২০১৭-১৮ দা চাদা ২৩.৩ ওইরম্বদগী ২২২-২৩ দা চাদা ৩৭ দা হেনগৎলকপা অদু উৎলে। প্রধান মন্ত্রী জন ধন য়োজনাদা বেঙ্ক একাউন্ত করোর ৫২.৩ হাংদোকপদা, অসিগী মে ২০২৪ ফাওবদা একাউন্ত হাংলিবশিংগী চাদা ৫৫.৬ নুপীশিং ওইখি।

সেল্ফ হেল্প গ্রুপ মিল্লিয়ন ৮.৩ শেমদুনা,দিনদয়াল অন্তয়োদয়া য়োজনা-এন আর এল এমনা নুপী মিল্লিয়ন ৮৯ কোনশিল্লে। নুপীশিংগী ফিবম ফগৎলে, খুন্নাইগী ফত্তবা থবকশিং হন্থরে অমসুং লাইরিক তম্বা অমসুং খুঙ্গংগী থবকশিংদা শরুক য়াবা হেনগৎলক্লে অমসুং সরকারগী স্কিমশিংগী কান্নবশিং হেন্না ফংলে হায়না ইকোনোমি সর্ভে ২০২৩-২৪ দা ফোঙদোক্লি।

স্তার্দ-অপ অমসুং স্তেন্দ-অপ ইন্দিয়ানা নুপীশিংগী ওন্ত্রেপ্রেনিউয়রসিপ পুক্নিং থৌগৎলি, প্রধান মন্ত্রী মুদ্রা য়োজনাগী মখাদা নুপী ওন্ত্রেপ্রেনিউয়রশিংদা লোন চাদা ৬৮ রোম পীখ্রে অমসুং মে ২০২৪ ফাওবদা, স্তেন্দ-অপ ইন্দিয়াগী মখাদা নুপী বেনিফিসরিশিং চাদা ৭৭.৭ য়ৌরে হায়না সর্ভে অসিদা পল্লি। দিজিতেল ইন্দিয়াগী পান্দমশিং থবক ওইনা পাংথোক্তুনা, জুলাই ২০২৩ ফাওবদা, প্রধান মন্ত্রী রুরেল দিজিতেল লিতেরসি কেম্পেনগী বেনিফিসরিশিংগী চাদা ৫৩ নুপীশিংনা ওইরি।

প্রধান মন্ত্রী অৱাস য়োজনাগী মখাদা শাখিবা য়ুমশিংগী মপু অসি নুপীশিংনা ওইবা অসিনা শিংথানিঙাই ওইনা নুপীশিংগী মরক্তা মপু ওইবা হেনগৎলকপা অদু ইকোনোমি সর্ভে অসিদা ফোঙদোক্লি।

****