2023-2024 ఆర్థిక సర్వే మహిళల ఆర్థిక సాధికారతను ప్రముఖంగా చాటి చెప్పింది. విద్య , నైపుణ్యాభివృద్ధి అవకాశాలు పెంచడంతో పాటు మహిళా సాధికారత కోసం తీసుకున్న ఇతర చొరవలు దేశ అభివృద్ధి,  పురోగతిలో మహిళల భాగస్వామ్యాన్ని మరింత పెంచాయి. 2023-2024 ఆర్థిక సర్వేను కేంద్ర ఆర్థిక, కార్పొరేట్ వ్యవహారాల మంత్రి శ్రీమతి నిర్మలా సీతారామన్ ఈ రోజు పార్లమెంటులో ప్రవేశపెట్టారు.

2017-2018లో 23.3 శాతంగా ఉన్న మహిళా కార్మిక భాగస్వామ్య రేటు (ఎల్ఎఫ్ పిఆర్) 2022-2023లో 37 శాతానికి పెరిగిందని ఆర్థిక సర్వే పేర్కొంది.ప్రధాన మంత్రి జన్ ధన్ యోజన (పిఎంజెడివై) 52.3 కోట్ల బ్యాంకు ఖాతాలను తెరవడానికి వీలు కల్పించింది, ఇందులో 2024 మే నాటికి  55.6 శాతం మంది మహిళలు ఉన్నారు.

8.3 మిలియన్ల స్వయం సహాయక సంఘాల పరిధిలోని 89 మిలియన్లకు పైగా మహిళలను కవర్ చేసే స్వయం సహాయ సంఘాల (ఎస్ జి హెచ్ ఎస్) కార్యక్రమం -,దీన్ దయాళ్ అంత్యోదయ యోజన- ఎన్ఆర్ఎల్ఎం -మహిళా సాధికారత, ఆత్మగౌరవాన్ని పెంపొందించడం, వ్యక్తిత్వ వికాసం, తగ్గిన సామాజిక దురాచారాలు , మెరుగైన విద్య, గ్రామ సంస్థలలో అధిక భాగస్వామ్యం, ప్రభుత్వ పథకాలను మెరుగ్గా పొందడం వంటి వాటితో అనుభవపూర్వకంగా ముడిపడి ఉందని సర్వే పేర్కొంది.

స్టార్టప్, స్టాండప్ ఇండియా ద్వారా మహిళా పారిశ్రామికవేత్తలను ప్రోత్సహిస్తున్నారని గుర్తించిన సర్వే, 2024 మే నాటికి ప్రధాన మంత్రి ముద్ర యోజన (పిఎంఎంవై) కింద మహిళా పారిశ్రామికవేత్తలకు 68 శాతం రుణాలు మంజూరయ్యాయని, స్టాండప్ ఇండియా కింద లబ్ధిదారుల్లో 77.7 శాతం మంది మహిళలేనని పేర్కొంది. 

డిజిటల్ ఇండియా విజన్ ను సాకారం చేస్తూ, జూలై 2023 నాటికి, ప్రధాన మంత్రి గ్రామీణ డిజిటల్ అక్షరాస్యత ప్రచారం (పిఎంజిడిఐఎస్ హెచ్ఎ ) లబ్ధిదారులలో 53 శాతానికి పైగా మహిళలు ఉన్నారు.

మహిళలకు ఆస్తి యాజమాన్యం కల్పించడాన్ని ఆర్థిక సర్వే ప్రముఖంగా ప్రస్తావించింది. లింగ సమానత్వానికి ప్రేరణగా పిఎం అవాస్ యోజన కింద నిర్మించిన గృహాలలో మహిళా యాజమాన్యం ఆవశ్యకతను గుర్తించింది.

****