U Myntri Sorkar Pdeng ba dei khmih ia ki tnad Youth Affairs & Sports bad Labour & employment, Dr. Mansukh Mandaviya, u la plie paidbah ia ka bynta kaba ar jong ka prokram KIRTI (Khelo India Rising Talent Identification) ha Jawaharlal Nehru Stadium kaba don ha New Delhi mynta ka sngi. Ki dkhot ka Parliament kum u Manoj Tiwari bad Kamaljeet Sehrawat, ki nongialehkai ba pawnam, ki ophisar na ka tnad Youth Affairs and Sports bad Sports Authority of India (SAI) bad ki khynnah skul MCD ki la iadon lang ha kane ka sngi.

Ha ka jingai jingkren jong u, u Dr. Mandaviya u la ong “Ka India ka dei kaba bun bynta bad kaba bun ki lad ki lynti. Ym pat ju don ka jingduna ha ka jingstad, ka bor met lane ka sap ha India. Kane kam dei tang ha ki nongbah, tangba kane ka dei kaba ngi iohi ruh ha ki jaka kiba jngai kum ka thain shatei lammihngi, ki jaka khap duriaw, ki thain Himalaya bad ki thain rilum kiba don ia ki nongialehkai ba tbit. Ka KIRTI ka thmu ban lap ia kine ki nongialehkai ba tbit bad ban kyntiew ia ki sap jong ki.”

“U Myntri Rangbah duh Modiji jong ngi u la ban jur halor ka jingdonkam ia ka jingialehkai ha ka jingim. Da ka jingthmu ban pynkylla ia ka India sha ka ri kaba donbor ha ki kam ialehkai, ka Sorkar ka la shim ia ki sienjam ban ai jingkyrshan pura ia kine ki nongialehkai. Ka rukom treikam kaba pura jong ka Sorkar ka paw ha ka jingkiew ka jingjop takma jong ngi dang shen ha ki lympung ialehkai hapdeng ki ri ba kynthup ruh ia ka lympung Olympics. Ngi donkam ban bteng ia ka jingioh ia kine ki nongialehkai kiba tbit bad haba ka don ka KIRTI, ka don u maw jam sha ka jingialehbha ki nongialehkai,” la ong u Dr. Mandaviya.

Ha ka jingkren sha ki hajar ngut ki khynnah skul kiba la wan iashim bynta ha kane ka prokram, u Dr Mandaviya u la ong, “Khlem pep, don napdeng jong phi ki ban long ki lahduh ha ka lympung ialehkai Olympics.” Phewse ha kawei ka sngi, ynda phi la jop ia ka takma Olympics, phi bad ki kmie ki kpa jong phi phin kynmaw ia kane ka sngi ha ka JLN Stadium, la bynrap u Myntri Sorkar Pdeng.

U Dr. Mandaviya u la ong shuh shuh ba ka Sorkar ka la rai ban wad 1 lak ngut ki nongialehkai kiba dang sdang hapoh 100 sngi hapoh ka prokram KIRTI. U la ong shuh shuh ba hapoh ka prokram KIRTI, baroh kin ioh lad ban kyntiew ia ki sap jong ki la ki dei kiba sah ha ki jaka nongkyndong ne ki jaka sor, bad wat lada ki wan na ka longiing kaba duna jingioh ne kaba riewspah.

Ka prokram mynta ka sngi ka long kum ka dak jong ka jingwad ia ki nongialehkai ba don sap na kylleng ka ri ki ban long kum u maw jam ban pynkylla ia ka India sha kawei na ki 5 tylli ki ri kiba hakhmat tam ha ka lympung Olympic Games shuwa u snem 2047. Lah ban shu kdew hangne ban a ki 117 ngut ki nongialehkai kiba mihkhmat na ka India ha ka Paris Olympics mynta u snem, 28 ngut ki dei kiba la mih na ka kam Khelo India.

Ka rukom wad ia ki nongialehkai ba tbit hapoh ka KIRTI ka dei kaba la pynkhreh katkum ka jingstad science da kaba pyndonkam ia ki atiar IT bad ki rukom treikam ba biang tam ha ka pyrthei. Ka prokram KIRTI ka thmu ban pyndap ia ki jaka ba suda bad ialam lynti ia ki nongialehkai ba dang sdang ba kin jied ia ka jingim jong ki katkum ki sap jong ki.

Ka Project KIRTI kaba long kaba iar ka thmu ban pynurlong ia ki ar tylli ki thong – ka jingiashim bynta paidbah bad ka jingtbit ha ki kam ialehkai. Ka jingthmu ia ka prokram KIRTI ka dei ban pyndep haduh 1 lak tylli ki jingpeit hapoh ka 100 sngi ha 100 tylli ki jaka kaba pyni ia ka jingkut jingmut ban pynsted ia ka jingwad ia ki khynnah ba don sap, ka jingkyntiew ia ki bad ka jingpyniar ia ki kam ban pyndep haduh 20 lak tylli ki jingpeit hapoh ka shi snem.

Ha Delhi, ka Sports Authority of India ha ka jingiatreilang bad ka Municipal Corporation of Delhi (MCD) kan pynlong ia ka jingpeit KIRTI ia palat 25000 ngut ki khynnah pule MCD ha 12 tylli ki zone. Kine ki jingpeit kin bteng haduh 27 sngi ban peit ia ki 5 tylli ki jingialehkai kum ka Athletics, Football, Volleyball, Kabaddi bad Kho-Kho.

Ka Municipal Corporation of Delhi ha ka pilot project jong ka ha u 2022-23 ka la pynlong ia ki camp ialehkai bapher bapher ha kylleng ka Delhi na ka bynta ki khynnah pule MCD kiba hadpeng 6-10 snem ka rta ha ki jingialehkai kum ka football, volleyball, bad kiwei kiwei.

Ha ka bynta kaba 3, ka prokram KIRTI kan kynthup 20 jait ki jingialehkai jong ka skhim Khelo India hapoh ka KIRTI.

Ia ka bynta kaba nyngkong jong ka KIRTI la sdang ha Chandigarh ha ka 12 tarik u Lber mynta u snem.

Ban peit ia ka jingsdang ia ka bynta jong ka KIRTI Phase II, SHON HANGNE.

Ban pule ia ka jingbatai shaphang ka prokram KIRTI, SHON HANGNE.

*****