কেন্দ্রগী গৃহ মন্ত্রী অমসুং কোওপরেসন মন্ত্রী শ্রী অমিত শাহনা হরিয়ানাগী মহেন্দ্রগর্হদা ঙসি 'পিছদা ভর্গ সম্মান সমেলন'দা ৱা ঙাংখ্রে। হরিয়ানাগী মুখ্য মন্ত্রী শ্রী নায়ব সিংহ সাইনি, কেন্দ্রগী মন্ত্রীশিংগী মরক্তা শ্রী ধর্মেন্দ্র প্রধান, শ্রী রাও ইন্দর্জিত সিংহ অমসুং শ্রী কৃষ্ণন পাল গুর্জার য়াওনা অতৈ শক্নাইরবা মীওই কয়ানা থৌরম অদুদা শরুক য়াখি।

মহাক্কী ৱারোলদা শ্রী অমিত শাহনা হায়খি মদুদি হরিয়ানা হায়রিবা লম অসি ভারত্তা পোৎশক অহুমগীদমক মমিং চৎলি – আর্মীদা খ্বাইদগী জৱান মশীং য়াম্বা, শান্নরোই খ্বাইদগী মশীং য়াম্বা অমসুং চীঞ্জাক্কী পোথোক খ্বাইদগী য়াম্না পুথোকপা। মহাক্না হায়খি, হরিয়ানাগী মন্ত্রী মন্দল মীফমনা মরুওইবা ৱারেপ অহুম লৌখ্রে – অহানবদা সেলরী অমসুং লৌউশিংউগী চাগা খাইদোক্লগা ক্রিমী লেয়রগী লিমিত লুপা লাখ ৬তগী লুপা লাখ ৮দা হেনগৎপা, অনিশুবদা পঞ্চায়ত্তা অমসুং ম্যুনিসিপাল কোর্পোরেসন্দা গ্রুপ এদা ৮%গী রিজর্বেসন পীবা অমসুং গ্রুপ বিদা ৫% পীবা অসিনি। শ্রী শাহনা হায়খি মদুদি  হায়রিবা মীয়াম খক্তগী ওইবা ৱারেপশিং অসি প্রধান মন্ত্রী শ্রী নরেন্দ্র মোদীগী মীয়ামগী য়াইফনবগীদমক লৌখৎপা থৌশিলশিংগা তুননা চৎলি।

কেন্দ্রগী গৃহ মন্ত্রীনা হায়খি মদুদি ২০১৪দা, শ্রী নরেন্দ্র মোদীনা পার্লিয়ামেন্ততা প্রধান মন্ত্রী ওইনা মহাক্কী অহানবা ৱারোল পীবদা হায়খি মদুদি লাক্লিবা সরকার অসি দলিত, লাইরবশিং অমসুং বেকৱার্দশিংগীদমক্নি। গৃহ মন্ত্রীনা হায়খি মদুদি ঐখোয়গী দলনা লৈবাক অসিদা বেকৱার্দ ক্লাসতগী হৌরকপা মপাঙ্গল লৈরবা অহানবা প্রধান মন্ত্রী অমা খুদোল তমখ্রে। মহাক্না হায়খি, ঙসিদি প্রধান মন্ত্রী মোদীনা লুচিংলিবা কেন্দ্রগী মন্ত্রী মন্দলদা লৈবা মন্ত্রী ৭১গী মনুংদা ২৭ তি বেকৱার্দ ক্লাস্তগীনি, মসিদা হরিয়ানাদগী ২ য়াওরি। মহাক্না হায়খি, প্রধান মন্ত্রী শ্রী নরেন্দ্র মোদীজিনা লৈবাক অসিগী হরিয়ানা য়াওনা ও.বি.সি. কম্ম্যনিতী পুম্ববু ইকাইখুম্নবা উৎলি।

শ্রী অমিত শাহনা হায়খি ১৯৫৭দা ও.বি.সি.শিংগীদমক কাকা কালেল্কর কমিসন শেম্বা মতমদা মদু চহি কয়া অমা থবক ওইনা চলাইবা য়াহল্লমদে। মহাক্না হায়খি, ১৯৮০দা মতম অদুগী প্রধান মন্ত্রীনা মন্দল কমিসনবু মতম খরা লেপহনখি অদুগা ১৯৯০দা পুখৎলকপা মতমদা প্রধান মন্ত্রীনা মদুগী মাইয়োক্তা লৈখি। মহাক্না হায়খি, প্রধান মন্ত্রী মোদীনা ও.বি.সি. কম্মিসন্দা কন্সতিত্যুসনেল রিকগ্নিসন পীদুনা অপুনবা বেকৱার্দ ওইবা খুন্নাইদা সংবিধানগী হক পীনবা হোৎনরি। শ্রী শাহনা মখা তারদুনা হায়খি মদুদি ইহান হানবা ওইনা মোদীজিনা কেন্দ্রিয়া বিদ্যালয়, নবোদয়া বিদ্যালয়, সাইনিক স্কুল অমসুং নীত এগজামিনেসন্দা ও.বি.সি.গীদমক ২৭%গী কোতা পীখ্রে। মসিগা লোইননা প্রধান মন্ত্রী মোদীনা লৌউশিংউ অমসুং সেলরী চাগা খাইদোক্তুনা ক্রিমি লেয়রগী লিমিতসু হেনগৎহন্দুনা পুৱারীদা লৈহৌরগদবা ৱারেপ অমা লৌখ্রে।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি হরিয়ানা লৈঙাক্না বেকৱার্দ ক্লাসশিংবু নুংঙাই য়াফনবগীদমক তোঙান-তোঙানবা থৌশিল কয়া লিংখৎখ্রে। মহাক্না হায়খি হরিয়ানাদা, বেকৱার্দ ক্লাসতগী মীওই অমা মুখ্য মন্ত্রী ওইহনখ্রে অমসুং রাজ্য অসিনা শ্রী নায়ব সিংহ সাইনিজিগী লুচিং মখাদা মাঙজিল থানা চঙশিল্লগনি। শ্রী শাহনা হায়খি মদুদি মমাংদা লৈরম্বা লৈঙাক্না হরিয়ানাদা কাসিজম অমসুং শেঞ্জা থুমজা নত্তনা করিসু থম্লমদে। মহাক্না হায়খি মদুদি প্রধান মন্ত্রী শ্রী নরেন্দ্র মোদীগী লুচিং মখাদা, হরিয়ানাগী শক্তম অসি ইজ ওব দুইং করপসন্দগী ইজ ওব দুইং বিজিনেস লোমদা ফগৎলক্লে।

শ্রী অমিত শাহনা হায়খি মদুদি মোদী লৈঙাক অসিনা হরিয়ানাগীদমক চাউখৎপদা মায় ওনশিনবা লৈঙাক অমা পীখ্রে। মহাক্না হায়খি মদুদি ঙসিদি হরিয়ানানা লৈবাক অসিগী বাস্মতি চেঙ খ্বাইদগী য়াম্না পুথোক্লি, আর্মিগী জৱান তরাগী মনুংদা অমদি হরিয়ানাদগী ওইরি অমসুং এম.এস.পি.দা খ্বাইদগী য়াম্বা মহৈ মরোঙশিং হরিয়ানানা লৈরি। হরিয়ানানা লাল দোরাগী মখাদা খুঙ্গংদা লম মপু ওইহনবা ইহান হানবা রাজ্য ওইরে, খ্বাইদগী মহৈ মশিং হৈবা পঞ্চাওত লৈবা রাজ্য ওইরে, নুপী চাদা ৫০না শরুক য়ারি অমসুং হরিয়ানানা য়ুম্থোং খুদিংদা তোতি ঈশিং পীবা ইহা হানবা রাজ্য ওইরে। মহাক্না হায়খি মদুদি ইহান হানবা আয়ুশ য়ুনিভর্সিতী অদু হরিয়ানাদা শাখি, পর কেপিতা জি.এস.তি. কলেক্সন খ্বাইদগী ৱাংবসু হরিয়ানানা ওইরি। মসিগী মথক্তা, হরিয়ানানা শঙ্গোম পুথোকপদা অহুমশুবা মফমদা লৈরি, খ্বাইদগী য়াম্বা সোসিএল সেক্যুরিতী পেন্সন লৈ অমসুং হিংবগী থাক হেনগৎপগী মনা অহুমশুবা ফংখ্রে। মহাক্না হায়খি মদুদি মালেমগী ফোর্চুন কমপেনী ৪০০ সু হরিয়ানাদা লৈ।

কেন্দ্রগী গৃহ মন্ত্রীনা হায়খি মদুদি মমাংগী সরকারনা হরিয়ানাদা চাউখৎপগী মিংদা করিসু থাম্বীরমদে। মহাক্না হায়খি প্রধান মন্ত্রী শ্রী নরেন্দ্র মোদীগী লুচিং মখাদা, কেন্দ্রগী লৈঙাক অমসুং হরিয়ানা লৈঙাক্না পুন্না য়ুম, গ্যাস কন্নেক্সন, মৈ, তোইলেত, লাইরবা খুদিংমক্তা লেম্না হৱাই চেঙৱাই পীবগা লোইননা লুপা লাখ ৫ ফাওবগী লেম্না অনা লাইয়েং পীখ্রে। মহাক্না হায়খি মদুদি মমাংগী সরকারনা চহি ১০ পাল্লকপদা লুপা করোর ৪১,০০০ খক্তা হরিয়ানাদা পীখি, অদুবু প্রধান মন্ত্রী মোদীগী লৈঙাক্না চহি ১০দা লুপা করোর ২,৬৯,০০০গী থবক পীখ্রে। শ্রী শাহনা হায়খি মদুদি হৌখিবা চহি ১০ অসিদা, হরিয়ানাদা এক্সপ্রেসৱে ১২ শাখ্রে অমসুং রাজ্য অসিগী জিল্লা খুদিংমক হায়ৱেগা শম্নখ্রে। মেত্রো রেলসু গুরুগ্রাম-সিকন্দরপুর ফাওবা অমসুং বদরপুর-মুজেসর ফাওবগী হৌখ্রে অমসুং হিসারদা অহানবা এয়রপোর্ত শাখ্রে। মহাক্না হায়খি মোদী লৈঙাক্কী মখাদা, ফমুং ৭৫০ লৈবা এ.আই.আই.এম.এস. অমা শাখ্রে অমসুং আই.আই.তি. দিল্লীগী অনৌবা কেম্পস অমা ঝজারদা শাখ্রে অমসুং লুপা করোর ২০০০ চঙনা বদসা খুঙ্গংদা খ্বাইদগী চাউবা কেন্সর ইন্সতিত্যুত অমা শাখ্রে।     

***