প্রধান মন্ত্রী, শ্রী নরেন্দ্র মোদীনা ভিএন্নাদা মহাকপু ইকাইখুম্নবা ওইনা মফম অদুদা লৈরিবা ভারত মচাশিংনা পাঙথোকখিবা থৌরম অমদা ভারতকী কম্ম্যুনিতীদা ৱা ঙাংখি। থুংলবা মতমদা, প্রধান মন্ত্রীবু অখন্নবা মওংদা কম্ম্যুনিতী অসিনা তরাম্না ওকখি। ওস্ত্রিয়ান ফেদরেল লেবর অমসুং একনোমী মন্ত্রী হিস এক্সিলেন্সী শ্রী মার্তিন কোচরসু থৌরম অদুদা শরুক য়াখি। থৌরম অদুনা মফম অদুদা লৈরিবা লৈবাক অসিগী কাচিন কোয়াদগী ভারত মচা কয়া তিনখি।

মহাক্কী ৱারোলদা প্রধান মন্ত্রীনা ইন্দিয়ন দাইস্পোরানা ভারত অমসুং ওস্ত্রিয়াগী মরক্তা লৈনরিবা লৈবাক অনিগী মরী হেন্না চেৎশিলহন্নবা হোৎনবদা লৌরিবা থৌদাংশিংগী মতাংদা মহাক্কী মোৎ ফোংদোকখি। মহাক্না পনখি মদুদি মহাক্কী লৈবাক অসিগী খোঙচৎ অসি মরুপ মপাং ওইনরিবা লৈবাক অনিনা দিপ্লোমেতিক্কী ওইবা মরীগী চহি ৭৫ ফারকপদা তাই, মসিনা য়াম্না অখন্নবা খোঙচৎ অমা ওইহল্লে হায়খি। মান্নবা গনতন্ত্রগী মগুনশিং অমসুং লৈবাক অনিগী প্লুরেলিস্তিক ওইবা ইথোশিং পল্লদুনা মহাক্না ভারতকী হন্দক্কী মীখলদা মায় পাকপগী মতাংদা ফোংদোকখি, মসিদা মহাকপু অহুমশুবা তার্মগীদমক ভারতকী মেয়াম্না মখা তানা লৈহন্নবা ভোত পীবীখি হায়খি।

প্রধান মন্ত্রীনা লৈবাক অসিদা চহি তরারোম অসিদা পুরক্লিবা অহোংবা কয়া অসিগী মতাংদসু পনখি অমসুং ভারতনা মতম খরগী তুংদাদ মালেমদা খ্বাইদগী চাউবা অহুমশুবা শেন্মিৎলোন ওইগনি অমসুং ২০৪৭ ফাওবদা ভিক্সিত ভারত হায়বদি চাউখৎলবা লৈবাক অমা ওইনবগী লম্বীদা চঙশিল্লি। মহাক্না ওস্ত্রিয়ান এক্সপর্তাইজশিংনা গ্রীন গ্রোথতা অমসুং ইন্নোভেসন্দা ভারতকা মপাং ওইবা য়াগনি, মসিনা চাউখৎপগী লম্বীদা অমসুং মালেম্না থাজরিবা স্তার্ত অপ ইকোসিস্তেম অসিগী খুদোংচাবা লৌবা য়াগনি হায়খি। মহাক্না ভারতপু 'ভিশ্ববন্ধু' অমা ওইনা অমসুং মালেমগী চাউখৎপা অমসুং নুংঙাই য়াইফবদা শরুক তম্লিবগী মতাংদা থমখি। মহাক্না কম্ম্যুনিতী অসিবু মখোয়গী ইমা লৈবাক্কী নাৎ অমসুং পুক্নিংগী মরীবু য়োকখৎনবা পুক্নিং চিংশিনখি। হীরম অসিগী মতাংদা, মহাক্না ওস্ত্রিয়াদা চহি চা কয়াদগী লৈরক্লবা ভারতকী ফিলোসোফী, লোল অমসুং ৱাখল্লোন্দা কুপ্না ইন্তেলেকচুএল ওইনা পাম্নবগী মতাংদসু পনখি। ওস্ত্রিয়া অসি ইন্দিয়ন দাইস্পোরা ৩১০০ রোমগী য়ুম ওইরি। ইন্দিয়ন দাইস্পোরা অসিদা মরুওইনা হকশেলগী লমদা অমসুং অতৈ সেক্তরশিং অমসুং মলতিলেতরেল য়ু.এন. বোদীশিংদা থবক তৌবনা য়াম্না য়াওরি। ওস্ত্রিয়াদা অৱাংবা থাক্কী মহৈ তম্লিবা ভারতকী মহৈরোই ৫০০ রোমসু লৈরি। 

***