ইকায়খুম্নরবা সভাপতী জী,

ঐ মফমসিদা রাস্ত্রপতীগী ৱারোল থাগৎপগী মোসনসিদা ঐগী থাগৎ ৱাহৈ ফোঙদোকচনবা লাকচবনি‍।

ইকায়খুম্নরবা সভাপতী জী,

ঐখোয়গী ইকায়খুম্নরবা রাস্ত্রপতীনা মহাক্কী ৱারোলদা চাওখৎপা ভারত অমগী লম্বী তাকপিরম্মি‍। ইকায়খুম্নরবা রাস্ত্রপতীনা মরুওইবা ৱাফম কয়া পুখৎপিরম্মি‍। ঐনা ইকায়খুম্নরবা রাস্ত্রপতীবু ঐখোয় পুম্নমক অমদি লৈবাক্কী মফমদা লমজিং লমতাকপিরম্বগীদমক থম্মোয়নুংদগী থাগৎচবা ফোঙদোকচরি‍।

ইকায়খুম্নরবা সভাপতী জী,

ঙরাং অমসুং ঙসি, ইকায়খুম্নরবা লুপ্লোয় কয়ানা রাস্ত্রপতীগী ৱারোলদা মখোয়গী ৱাখল্লোনশিং ফোঙদোকপিখ্রে‍। অখন্ননবা অহান্বা ওইনা ঐখোয়গী ইরক্তা এম.পি. ওইনা তিন্বিরিবশিংগী মরক্তগী ইকায়খুম্নবদা মতিক চারবা মরুপ খরনা মখোয়গী ৱাখল্লোন ফোঙদোকপিখিবা মতমদা, পার্লিয়ামেন্তকী চৎন-কাঙলোন পুম্নমক ঙাক্না, মতিং লৈরবা এম.পি. অমগুম্না ফোঙদোকপিখি‍। মখোয়না অহান্বা ওইরবসু হাউসকী ইকায়খুম্নবা হেনগৎহনখি, মখোয়গী ৱাখল্লোনশিংনা দিবেত অসিবু হেন্না মরুওইবা ওইহনখি‍।

ইকায়খুম্নরবা সভাপতী জী,

লৈবাকসিনা মীখল মায় পাক্না পাঙথোক্তুনা মালেমগী মফমদা মালেমগী খ্বায়দগী চাউবা মীখল উবা ফংহনখ্রে‍। লৈবাক মীয়াম্না ঐখোয়বু মালেমগী খ্বায়দগী চাউবা মীখলদা থাগৎপিরকখিবনি‍।

অদুগা ইকায়খুম্নরবা সভাপতী জী,

হঞ্জিন হঞ্জিন ওইদবা ঙাঙলবসু মীয়ামগী ওইবা মীখলসিদা মখোয়না শাথিনা মায়থিবা নংখ্রবা মীওই খরদা ফাওরমগদবা চৈনা ঐ খঙবা ঙম্মি, ইকায়খুম্নরবা সভাপতী জী, মালেমগা খ্বায়দগী চাউবা মীখল অসিদা ভারত মীয়াম্না ঐখোয়বু অহুম্লক শুবা ওইনা লৈবাক্কী থৌগল তৌনবা তাঞ্জা পীবিরকপনি‍। মসিমক মীয়ামগী লৈঙাক্কী তাইবংপান্দা য়াম্না মরুওইবা থৌদোক অমনি, য়াম্না চাউথোকচনিংঙাই ওইবা থৌদোক অমনি‍।

ইকায়খুম্নরবা সভাপতী জী,

লৈবাকসিগী মীয়াম্না হীরম কয়াদা নৈনরবা মতুংদা মখোয়গী অপাম্বা খল্লকপনি‍। মীয়াম্না ঐখোয়গী চহি ১০গী ত্রেক রেকোর্দ উরি‍। ঐখোয়না মীয়ামগী থৌগলনা অথোইবা থৌগলনি হায়বা ৱাখল্লোন্দা লায়রবশিংগী য়াইফনবা কত্থোকপগা লোয়ননা তৌখিবা থবক থৌরমশিংনা চহি ১০সিদা মীওই করোর ২৫ লায়রবগী পনখৈদগী মপান্দা পুথোরকখিবা মীয়াম্না উরি‍। লৈবাক্কী নীংতম্লবা মতমগী তেনখ্রবা মতমসসিদা অসুক য়ামখ্রবা মীওইশিংবু লায়রবগী পনখৈগী মপান্দা পুথোরকপদুনা মীখলসিদা ঐখোয়বু থৌজানবিনবগী মরম ওইখি‍।

ইকায়খুম্নরবা সভাপতী জী,

ঐখোয়না ২০১৪দা অহান্বা ওইনা মায় পাক্লকখিবা মতমদা, মীখল কেম্পেন চত্থবদা ঐখোয়না শেঞ্জা থুমজা তৌবশিং লেম্না থারোই হায়খি‍। অদুগা ঙসি, ঐখোয়না শেঞ্জা থুমজা থেংনরিবা, শেল চাবনা লৈবাকসিগী মহি মচুম পুম্নমক চুপথোক্লম্লবা অসিবু থেংনদুনা, শেঞ্জা থুমজা তৌবশিং লেম্না থাদবগী থৌওং অসিনা ঐখোয়বু থৌজান্বিনবা মরম ওইখি‍।

ইকায়খুম্নরবা সভাপতী জী,

ঙসি মালেমগী থাক্তা ভারতকী ইকায়খুম্নবা হেনগৎলে‍। ঙসি, মালেমগী থাক্তী ভারতকী মীংচৎ হেনগৎলক্লি অমসুং মালেমসিনা ভারতকী মফমদা য়েংলিবা মীৎয়েঙদা ইকায়খুম্নবগী মীৎয়েঙ অমা উরিবা অসিদা ভারত মচা খুদিংংমক্না চাউথোকজবা ফাওরি‍।

ইকায়খুম্নরবা সভাপতী জী,

ঐখোয়গী অমত্তা ঙায়রবা পান্দমদি লৈবাক্না মাঙদা, ভারতনা অথোইবনি হায়বা মীয়াম্না উরি‍। ঐখোয়গী খুজিল থৌরাং খুদিং, ঐখোয়গী ফিরেপ খুদিং, ঐখোয়গী থবক থৌরম খুদিং ভারতনা মাঙদা হায়বা ৱাখল্লোনসিনা পরিং ওইরগা পাঙথোক্তুনা, ঐখোয়না লৈবাকসিদা পুরকপা মথৌ তাবা রিফোর্মশিং লেপ্পা লৈতনা পায়খৎলক্লি‍। চহি ১০সিদা ঐখোয়গী লৈঙাক্না ‘সবকা সাথ সবকা বিকাস’ হায়বা খোল্লাউসিগা লোয়ননা লৈবাক মীয়াম পুম্নমক্কী য়াইফনবগী লেপ্তনা হোৎনদুনা লাক্লি‍।

ইকায়খুম্নরবা সভাপতী জী,

ঐখোয়না ভারতকী সংবিধান্দা য়াওরিবা ফুরুপ-কাঙলুপ পুম্নমক চপ মান্ননা য়েংবা হায়বা ৱাখল্লোনদুদা কত্থোকপগা লোয়ননা লৈবাক্কী থৌগল তৌনবা হোৎনদুনা লাকখি‍।

ইকায়খুম্নরবা সভাপতী জী,

লৈবাকসিনা মতম হরাওহনবগী রাজনিতী উদুনা লাক্লে‍, লৈবাকসিনা মতম শাংনা হরাওহন্বগী মওংগী লৈঙাক্লোন উদুনা লাক্লে‍। লৈবাকসিনা অহান্বা ওইনা সেকুলরিজমবু মপুং ফানা ফংহন্নবা ঐখোয়না হোৎনখি অমসুং হরাওহন্বগী ৱাখল্লোন থাদোক্তুনা পেলহন্বগী থৌওং পায়খৎখি‍। ঐখোয়না পেলহন্বা হায়রিবসি, থৌরাং খুদিং মপুং ফানা পায়খৎপা, ঐখোয়গী লৈঙাক্লোনগী কান্নবা মীপুম খুদিং য়ৌহন্বদুনি‍। ঐখোয়না সেচুরেসনগী পরম য়েংলবদি, সেচুরেসন হায়বসি তশেংনা হায়রবদা খুন্নাইগী অচুম্বা ৱায়েলবুনি‍। সেচুরেসন হায়বসি তশেং তশেংবা সেকুলরিজম্নি অমসুং মসিনি‍ লৈবাকসিগী মীয়াম্না ঐখোয়বু অহুম্লক শুবা ওইনা লৈঙাক পায়হন্দুনা পুরকপা পাম্লিবা‍।

ইকায়খুম্নরবা সভাপতী জী,

হরাওহন্বগী থৌওংনা লৈবাকসিবু কাংখোং চাইহল্লে অমসুং মরম অসিনা ঐখোয়না পুম্নমক্কী অচুম্বা ৱায়েল ফংহন্বগী পরম্বা থবক পায়খৎলিবসি‍।

ইকায়খুম্নরবা সভাপতী জী,

ঐখোয়গী লৈঙাক্কী থৌওং চহি ১০ য়েংলবা অমসুং চাংয়েং তৌরবা মতুংদা, ভারতকী মীয়াম্না ঐখোয়বু শৌগৎলকপনি‍।

ইকায়খুম্নরবা সভাপতী জী,

ঐখোয়না অমুক্কা হন্না লৈবাকসিগী মীওই করোর ১৪০গী থৌগল তৌননবা তাঞ্জা ফংলে‍।

ইকায়খুম্নরবা সভাপতী জী,

মীখল অসিনা ভারতকী মীয়াম কয়া য়াম্না ৱাখল তারবগে, ভারতকী মীয়াম্না ৱাখল লৈনা অমসুং হৈ শিংনা অৱাংবা থাক্তা মখোয়গী ৱাখল শীজিন্নবগে হায়বা উৎলে‍। অদুগা মদুগী মহৈ ওইনা, ঙসি অহুম্লক শুবা ওইনা, ঐখোয়না অদোমগী মাঙদা, লৈবাক মীয়ামগী মাঙদা পুকচেল শেঙনা থৌগল তৌনবগীদমক লেপ্লি‍।

ইকায়খুম্নরবা সভাপতী জী,

লৈবাকসিগী মীয়াম্না ঐখোয়গী খুজিল থৌরাংশিং উখ্রে‍। ঐখোয়গী অনিংবা, ঐখোয়গী লৈবাক নিংবা মতৌনা লৈবাক মীয়াম্না ঐখোয়দা মখোয়গী থাজবা থম্লকপনি‍।

ইকায়খুম্নরবা সভাপতী জী,

মীখল অসিদা ঐখোয়না লৈবাক মীয়ামগী মফমদা মখোয়গী থৌজাল নিজনবা অচেৎপা ফিরেপকা লোয়ননা চৎখি‍। অদুগা ঐখোয়না চাওখৎপা ভারত অমগী ঐখোয়গী ফিরেপকীদমক থৌগল নিজখি‍। ঐখোয়না অফবা পুক্নিং ৱাখল, মীয়ামগী য়াইফনবা থবক তৌনবগী অপাম্বগা লোয়ননা চাওখৎপা ভারত অমা শেমগৎনবা খোঙফম অমগা লোয়ননা চৎখি‍। মীয়াম্না চাওখৎপা ভারত অমগী ফিরেপ্পু হেন্না মরা চেৎশিলহন্দুনা ঐখোয়বু অমুক হন্না মায় পাকহন্বিদুনা লৈবাক মীয়ামগী থৌগল তৌননবা তাঞ্জা পীবিরি‍।

ইকায়খুম্নরবা সভাপতী জী,

লৈবাক অসিনা চাওখৎলবা মতমদা, মীওই লাখ কয়াগী মঙলান মঙফাওনগদৌরিবনি‍। লৈবাকসিনা চাওখৎলবা মতমদা মীওই লাখ কয়াগী অপাম্বশিং ফংগদৌরিবনি‍।

ইকায়খুম্নরবা সভাপতী জী,

লৈবাক অমনা চাওখৎলকপদা, তুংগী মীরোলগী মঙলানশিং মঙফাওননবা অচেৎপা য়ুম্ফম অমা থোনগদৌরিবনি‍।

ইকায়খুম্নরবা সভাপতী জী,

চাওখৎপা ভারত ওইবদগী হকথেংননা ফংগদৌরিবা কান্নবশিংদুদি ঐখোয়গী মীয়ামগী ইকায়খুম্নবা, ঐখোয়গী মীয়ামগী পুন্সি মহিংগী ফীভম ফগৎলকপন‍ি‍। নীংতম্লকপদগী, লৈবাকসিগী মীচম মীয়াম্না হায়রিবশিং অসিবু পামদুনা লাকখিবনি‍।

ইকায়খুম্নরবা সভাপতী জী,

ভারতনা চাওখৎলবা মতমদা, ঐখোয়গী খুঙ্গংগী, ঐখোয়গী ময়োল্লমশিংগী ফীভম ফগৎলক্কদৌরিবনি‍। খুঙ্গংগী পুন্সিদা চাওখৎপগী চাউথোকচবা, ইকায়খুম্নবা অমসুং অনৌবা খুদোংচাবশিং ফংগদৌরিবনি‍। ঐখোয়গী ময়োল্লমশিং শেমগৎ শাগৎপনা চাওখৎপা ভারত্তা খুদোংচাবশিং পুরক্কদৌরিবনি অমদি ভারতকী ময়োল্লমশিংসু মালেমগী চাওখৎ লমজেলদা চপ মান্নবা ফিদা ফংহন্বা হায়বসিনা ঐখোয়গী মঙলান্নি‍।

ইকায়খুম্নরবা সভাপতী জী,

চাওখৎপা ভারত হায়বসি মীওই লাখ কয়াগী খুদোংচাবা লাখ কয়া হায়বনি‍। খুদোংচাবা মখল মখা কয়া ফংলগনি অমসুং মীয়াম্না মখোয়গী হৈ-শিংবা, মতিক ময়াই অমসুং মচাক মথুমশিংগী মতুং ইন্না চাওখৎপগী অনৌবা পন্দোলশিং তান্বা ঙমগদৌরিবনি‍।

ইকায়খুম্নরবা সভাপতী জী,

ইকায়খুম্নরবা সভাপতী জী,

ইকায়খুম্নরবা সভাপতী জী,

অদোমগী খুত্থাঙদা ঙসি ঐনা লৈবাক মীয়ামগী মফমদা থাজবা পীজরি মদুদি ঐখোয়না লৌখিবা চাওখৎপা ভারত অমগী ফিরেপ মপুং ফাহন্নবা ঐখোয়না হেক ঙম্বমখৈ হোৎনগনি, ঐখোয়না মদু ময়ামগীদমক খল্লগা তৌগনি, ঐখোয়না মদু পুকচেল শেংনা তৌগনি‍। ঐখোয়না ঐখোয়গী মতমগী মীৎকুপ খুদিং অমসুং ঐখোয়গী হকচাঙগী শরুক খুদিং লৈবাক মীয়ামগীদমক চাওখৎপা ভারত অমগী মঙলান মঙফাওনহন্বদা কত্থোক্কনি‍। ঐখোয়না মীয়ামদা ২০৪৭গীদমক ২৪/৭ থবক তৌগনি হায়খি‍। ঙসি ঐনা হাউসকী মফমদা অমুক হন্না থমজরি মদুদি ঐখোয়না হায়রিবা অসি শোয়দনা ফংহনগনি‍।

ইকায়খুম্নরবা সভাপতী জী,

২০১৪গী মতমশিংদু নীংশিংবিয়ু‍। করিগুম্বা অদোম্না ২০১৪গী মতমশিংদু নীংশিংবিরবদি, ঐখোয়গী লৈবাক্কী মীয়াম্না মখোয়গী থাজবা মাঙখিবা, লৈবাকসিনা নীংবা কায়বগী অমম্বা কোমদা পুত্থদুনা লৈখিবা ঐখোয়না নীংশিংলক্কনি‍। অসিগুম্বা ফীভম অমদা, লৈবাকসিনা ২০১৪গী মমাঙদা খ্বায়দগী চাউনা মাঙজখিবা, খ্বায়দগী চাউনা থাজবা মাঙখিবসি মীয়ামগী থাজবদুনি‍। অদুগা থাজবা মাঙলবা মতমদা, মীওই, খুন্নাই, লৈবাক অদুনা মরোমদোম লেপচবদা অৱাবা ওইরকই‍। মতমদুদা, মীচম মীয়ামগী মচিন্দগী থোরকখিবা ৱাফম অমখক্তি মহাক লৈবাকসিদা করিসু তৌবা ঙম্লরোই হায়বসিনি‍। মতমদুদা, ৱাহৈ খরা অসি মফম খুদিংদা তানখি‍। লৈবাকসিদা করিগুম্বা অমত্তা ওইথোকপা ঙম্লরোই‍। হায়রিবা ৱাহৈশিংসিনি তানখিবা‍। হায়রিবা ভারতকী নীংবা কায়বগী ৱাহৈশিংসিনা শক্তাক খুদম অমগুম ওইরকখি‍। মতমদুদা, ঐখোয়না নুমিৎ খুদিং পাউচে হাংদোক্লুবদা ঐখোয়না স্কেমশিংগী পাউখক্তমক পাবা ফংলম্মি‍। লুপা করোর কয়াগী স্কেমশিং, নুমিৎ খুদিং অনৌবা স্কেমশিং, স্কেম মশেল মরক্তা হিদান্নরকপা, স্কেম তৌবশিংগী স্কেম, মতমদুদা ওইখি‍। অদুগা ইকায়বা খঙদনা মীয়াম মাঙদা দিল্লীদগী লুপা ১ থোক্লকপদা পৈসা ১৫খক্তমক মীয়ামদা য়ৌই হায়না য়াজখি‍। লুপা অমদা পৈসা ৮৫দি স্কেম ওইরম্মি‍। অসিগুম্বা স্কান্দলশিংগী তাইবংসিনা লৈবাকসিবু নীংবা কায়বগী অমম্বা কোমদা চিংথখি‍। খুজিল থৌরাং চপ লেপ্লম্মি‍। নেপোতিজমসু কয়া য়াম্না লৈরম্বগে হায়ববু অচম্বা নহা অমনা মাগীদমক রিকম্মেন্দ তৌবিনবা কনাসু লৈত্রবদি মহাক্কী মঙলান কায়দুনা চুপ লুপ্তুনা লৈরম্মি‍। য়ুম অমা লৈনবগীদমক লায়রবা মীওই অমনা লুপা লীশিং কয়াগী শেল পীজবগী ফীভম লাকখি‍।

ইকায়খুম্নরবা সভাপতী জী,

গ্যাস কন্নেক্সনগীদমকসু, এম.পি.শিংনা কোয়চেন চেন্নরম্মি‍। মখোয় ফাওবা শেল তিংদনা গ্যাস কন্নেক্সন ফংবা ঙম্লমদে‍।

ইকায়খুম্নরবা সভাপতী জী,

চেঙ হৱায় লেম্না ফংহনবগী মতাঙদসু মথোঙ মরম খঙলমদে কৈথেলদা করম্বা মতমদা বোর্দ থেৎলক্কনি খঙনদে‍। ঐ রাসনগী মঙম ফংখিদে, ঐসু মদুগীদমক শেল পীজবা তারম্মি‍। ঐখোয়গী ইচিল ইনাও কয়া অমা কয়া য়াাম্না ফীভম চাদনা লৈখিবগে হায়ববু মখোয় মশানা মশাগী মরায়বকপু চৈদুনা লৈরম্মি‍।

ইকায়খুম্নরবা সভাপতী জী,

২০১৪ মমাঙগী মতমদুনি হায়রিবা ৱাহৈশিংদুনা ভারত মীয়ামগী পুক্নিংদা চুদুনা লৈখিবা মতমদু‍। মতমদু নীংবা কায়বগী অমম্বা কোমদা পুত্থদুনা লৈখিবা খুন্নাইনি‍। অদুদগী লৈবাক মীয়াম্না ঐখোয়বু থৌগল তৌনবা মীখলদা থাগৎলকখি অমসুং মীৎকুপ্তুদগী লৈবাক্কী অওন্বা মতম হৌরকখি‍। চহি ১০দা ঐগী লৈঙাক্কী মায় পাকপা, ফংবা ঙমখিবা কয়া লৈখ্রে হায়বা ৱাফম ঐ থমজগে‍। অদুবু ফংবা ঙমখিবা খুদিংদা মপাঙ্গল হাপখিবা মায় পাকখিবা অমা হায়রগদি লৈবাকসিনা নীংবা কায়বগী কোমদগী কাখৎলক্তুনা মঙলান অমসুং থাজবগা লোয়ননা লেপ্পা ঙমখিবদুনি‍। লৈবাকসিদা থাজবগী অনৌবা থাক অমা য়ৌখি অমসুং মদুনা মরম ওইরগা লৈবাকসিগী নহারোলশিংগী দিক্সনরীদগী থোরকপা হৌরক্লবা ৱাহৈশিংদু, তপ্না তপ্না লৈবাক মীয়ামগী ৱাখলগী পরৈনুংদা লোৎখি‍। ২০১৪গী মমাঙদা করিসু ওইথোক্লরোই হায়রম্বা মীওইশিংদুনা হৌজিক্তি লৈবাকসিদা খুদিংমক ওইথোক্লগনি হায়ররি‍। ঐখোয়না মসি থাজবা ফোঙদোক্নবা তৌখিবনি‍। অহান্বদা ঐখোয়না 5G হৌদোক্তুনা উৎখি‍। ঙসিদি, লৈবাকসিনা 5G থুনা য়াঙনা চৎনরকপসিদা লৈবাকসিদা চাওথোকচবগা লোয়ননা ভারতনা করিগুম্বা অমা হেক্তা তৌবা ঙমগনি হায়নরি‍।

ইকায়খুম্নরবা সভাপতী জী,

মতমদু অচৌ অশাংশিংগী মখুৎ কোইলাগী স্কেম্না মুশুক মুহনখিবা মতম্নি‍। ঙসিদি, কোইলা খ্বায়দগী ৱাংনা পুথোকপা খ্বায়দগী ৱাংনা লৌখৎপগী রেকোর্দ থম্লে‍। মসিননি লৈবাকসিনা হৌজিক ‘ভারতনা করিগুম্বা অমা হেক্তা তৌবা ঙম্লগনি’ হায়নরিবা‍।

ইকায়খুম্নরবা সভাপতী জী,

২০১৪ মমাঙগী মতমদুদা অচৌবা বেঙ্ক স্কেম কয়া ফোন বেঙ্কিংদা তৌনরম্বা মতম‍। বেঙ্ককী কৈ মরন্নাই লনথুমগুম্না পেক্নরম্মি‍।

ইকায়খুম্নরবা সভাপতী জী,

২০১৪গী মতুংদা, খুজিল থৌরাং হোংলকপা, ফিরেপ লৌবদা খোঙজেল য়াঙলকপা, অচুম্বদা পুক্নিং লুপ্পা কয়াসিগী মহৈনা ঙসি ভারতকী বেঙ্কশিংনা মালেমগী অফবা বেঙ্কশিংগী মনুংদা চল্লক্লিবা‍। ঙসিদি, ভারতকী বেঙ্কশিং খ্বায়দগী শেন্দোং লৈবা বেঙ্কশিং ওইরে‍ অমদি মীয়ামগী থৌগল তৌবা বেঙ্কশিং ওইরে‍।

ইকায়খুম্নরবা সভাপতী জী,

২০১৪ মমাঙদা, তেরোরিস্তশিংনা মখোয়না পাম্বা মতমদা, মখোয়না পাম্বা মফমদা হেক্তা লাকপা অমদি লান্দাবা ঙম্লম্মি, ২০১৪গী মতুংদদি মদু ওইখিদ্রে‍। ২০১৪গী মমাঙদা মীচম মীয়ামশিং হাৎলম্মি‍। লৈবাক্কী কাচিন কোয়া শিন্বা থুংনা লান্দারম্মি অমসুং লৈঙাক্না তুমিন ফমদুনা, মখোয়গী মচিন ফাওবা কাঙথোক্নিংদনা লৈরম্মি‍। ঙসিদি, ২০১৪ মতুংগী ভারতনা তেরোরিস্তশিংবু ময়ুমদা চঙদুনা হাৎলি, সর্জিকেল স্ত্রাইকশিং তৌরি, এয়র স্ক্রাইকশিং তৌরি অমসুং মাগী মতিক মথৌনা তেরোরিজমগী মাস্তরশিংগী মফমদা উৎলে‍।

ঙসি, ইকায়খুম্নরবা সভাপতী জী,

লৈবাক্কী মীপুম খুদিংনা খঙই মদুদি ভারতনা মাগী ঙাকশেলগীদমক খুদিংমক তৌবা ঙম্মি‍।

ইকায়খুম্নরবা সভাপতী জী,

আর্তিকল ৩৭০, মসিবু ভোত বেঙ্ক রাজনিতীগী খুৎলায় ওইনা লাৎলম্বা, মখোয়না জম্মু অমসুং কাস্মিরদা শেম্লম্বা আর্তিকল ৩৭০না মফমদুগী মীয়ামগী মঙম মত্তুনা থম্লম্মি, ভারতকী সংবিধান্না জম্মু অমসুং কাস্মিরগী ঙমখৈ লানশিন্বা ঙম্লমদে‍। মকোক্তা ভারতকী সংবিধান হাপ্তুনা শান্নরম্বা মীওইশিংদুনা জম্মু অমসুং কাস্মিরদা সংবিধান চৎনহন্বা ঙম্লমদে‍। আর্তিকল ৩৭০গী মতমদু বাবা সাহেব অম্বেদকরবু নোক্নবিরম্বা মতমদুনি‍। লান্মীশিংদা নুং থাজিল্লম্মি অমসুং মীয়াম্না নীংবা কায়না লৈরম্মি, হৌজিক্তি জম্মু কাস্মিরদা করিসু তৌবা ঙম্লরোই‍। ঙসিদি, আর্তিকল ৩৭০গী ফক্লাং থুগাইখ্রে, নুংনা থাবগী থৌওংসু লেপখ্রে, মীয়ামগী লৈঙাক মপাঙ্গল কন্না লৈরে অমদি ভীয়াম্না ভারতকী সংবিধান্দা থাজবা থমদুনা, ভারতকী মচু অহুমগী ফিরালদা থাজবা থমদুনা, ভারতকী মীয়ামগী লৈঙাক্তা থাজবা থমদুনা মীশিং হেন্না হেন্না থোরক্তুনা মীখলদা হেন্না শরুক য়াররি‍।

ইকায়খুম্নরবা সভাপতী জী,

লৈবাক মীয়াম করোর ১৪০গী থাজবা অমসুং মঙলান মীকপ থোরক্লবা মতমদা, মদুনা চাওখৎপবু থৌদুনা পুরিবা শাফু ওইরকই‍। থাজবা অসিনা চাওখৎপবু থৌদুনা পুরিবা শাফু ওইদুনা চৎলি‍।

ইকায়খুম্নরবা সভাপতী জী,

থাজবা অসি চাওখৎপা ভারতকী থাজবনি, ফিরেপ কয়ানা তান্বা ফংবগী থাজদুনি‍।

ইকায়খুম্নরবা সভাপতী জী,

নীংতম লান মনুংদা, লৈবাকসিদা লৈখিবা ৱাখল্লোন, পুক্নিং লুপ্পা, মথুম মরাং হৌবা, নীংতম্বা ফংলগনি হায়বগী নুংঙাইবা মতৌ অদু ঙসি লৈবাক মীয়ামদা উবা ফংলি, অমদি চাওখৎবা ভারত অমগী থাজবদুনা অচেৎপা য়ুম্ফম থোন্দুনা মীখল অসিগী পাম্বৈ ওইখি‍। নীংতম ইহৌ মতমদা লৈখিবা মীয়ামগী ৱাখল্লোন অদুমক চাওখৎপা ভারত অমা ওইরকপগী মঙলান মঙফাওনরগনি হায়বসিদা ফাওনরি‍।

ইকায়খুম্নরবা সভাপতী জী,

ঙসি ভারতকী পান্দম য়াম্না চাউই অমসুং ঙসি ভারতনা চহি ১০সিদা কাখৎলক্লিবা মফম অসি ঐখোয় ইশানা তৌখিবনি, ঐখোয়না ঐখোয়গী অরিবা রেকোর্দশিং থুগাইবা তাখি অমসুং ঐখোয়না ঐখোয়গী চাওখৎ খোঙজেল মথঙগী থাক্তা থাঙ্গৎপা তাখি‍। চহি ১০সিদা ভারতনা য়ৌবা ঙম্লিবা চাওখৎপগী পন্দোল অসিনা ঐখোয়গী হিদান্নবগী, মার্কর অমা, পনখৈ অঅমা ওইরে‍। হৌখিবা চহি ১০সিদা ঐখোয়না তানখিবা খোঙজেল, হৌজিক্তি ঐখোয়না তানগদৌরিবা অসি হায়রিবা খোঙজেল অসি হেন্না য়াঙখৎহন্বনি অমসুং ঐখোয়না লৈবাক্কী অপাম্বা হায়রিবা খোঙজেলদুদা ফংহন্বা ঙমগনি হায়না ঐনা চপ চানা থাজৈ‍।

ইকায়খুম্নরবা সভাপতী জী,

ঐখোয়না মায় পাকপা খুদিং, সেক্তর খুদিং মথঙগী থাক্তা পুখৎকনি‍।

ইকায়খুম্নরবা সভাপতী জী,

চহি ১০সিদা, ঐখোয়না ভারতকী শেন্মিৎলোন্বু, তেনখ্রবা চহি ১০গী মনুংসিদা ১০শুবদগী ৫ শুবদা পুখৎলক্লি‍। হৌজিক খোঙজেল অসিগা লোয়ননা ঐখোয়না মথঙগী থাক্তা কাখৎনবা খোঙ থাংলক্লি, ঐখোয়না হৌজিক লৈবাক্কী শেন্মিৎলোন্বু ৩শুবা মফমদা পুখৎকনি‍।

ইকায়খুম্নরবা সভাপতী জী,

চহি ১০দা, ঐখোয়না ভারতপু মোবাইল ফোনগী অচৌবা মেনুফেকচরর অমা ওইহল্লে‍। ভারতপু মোবাইল ফোনগী অচৌবা এক্সপোর্তর অমা ওইহল্লে‍। হৌজিক মসিমক ঐখোয়না সেমিকন্দক্তর অমসুং অতৈ সেক্তরদা ঐখোয়গী লৈঙাক মনুংদা তৌগনি‍। মালেমগী মরুওইবা থবকশিংদা শীজিন্নগদৌরিবা চিপশিং ঐগী ভারতকী লৈমায়দা শারগনি‍। মসি ঐগী ভারতকী নহাশিংগী হৈথোই শিংথোইবগী মহৈনা ওইরক্কদৌরিবনি‍। ঐগী ভারতকী নহাশিংগী হোৎনবা কন্বনা মসি ওইরক্কদৌরিবনি হায়বসিদা ঐগী পুক্নিংনা চেৎনা থাজৈ‍।

ইকায়খুম্নরবা সভাপতী জী,

ঐখোয়না অনৌবা ভারতকী মায়কৈদসু খোঙ থাংজিল্লি‍। ঐখোয়না চাওখৎপগী অনৌবা পন্দোলশিং লোমগনি, অদুবু ঐখোয়গী খোঙফমদি লৈমায়গা শম্নদুনা লৈগনি, ঐখোয়গী খোঙফম লৈবাক মীয়ামগী পুন্সিগা শম্নদুনা লৈগনি, অমসুং ঐখোয়না লায়রবা মীওই করোর ৪গী য়ুম শাখ্রে‍। লাক্কদৌরিবা তর্ম অসিদা খোঙজেল য়াঙনা য়ুম করোর ৩ শাদুনা লৈবাকসিগী মীওই অমত্তা ময়ুম লৈতবা ওইহল্লোই‍।

ইকায়খুম্নরবা সভাপতী জী,

চহি তরাসিদা নুপীগী সেল্ফ হেল্প গ্রুপশিংদা লৈবা লৈবাকসিগী ইচল ইচে লাখ কয়া ওন্ত্রপ্রিন্যুরসিপকী লমদা মায় পাকপা পুরক্তুনা ঐখোয়না মাঙদা চঙশিল্লি‍। হৌজিক ঐখোয়না মসি মথঙগী থাক্তা পুখৎখিগনি‍। হৌজিক ঐখোয়গী নুপী সেল্ফ হেল্প গ্রুপশিংদা থবক তৌরিবা ইচল ইচেশিংগী শেন্মিৎলোনগী থবক থৌরমশিং হেনগৎহন্বা পাম্মি, মসি পাকথোক চাউথোকহন্দুনা তেল্লবা মতমগী মনুংদা ইচল ইচে করোর ৩ লাখপতী ওইহল্লগনি‍।

ইকায়খুম্নরবা সভাপতী জী,

ঐনা মসি মমাঙদসু হায়খ্রে, অমদি ঐনা ঙসি অমুকসু হন্না হায়জরি – ঐখোয়গী অহুমশুবা তর্মসিদা ঐখোয়না খোঙজেল অহুম হেন্না য়াঙনা থবক তৌগনি‍। ঐখোয়গী অহুমসুবা তর্মদা ঐখোয়না শক্তি শরুক অহুম হেন্না শীজিন্নগনি‍। ঐখোয়গী অহুমশুবা তর্মদা ঐখোয়না মীয়ামগী মহৈ শরুক অহুম থোক্না পুরক্কনি‍।

ইকায়খুম্নরবা সভাপতী জী,

এন.দি.এ.গী লৈঙাক চুপ্লি পায়বগী অহুমশুবা তর্ম অসি পুৱারী ওইবা তর্মনি‍। অসিগুম্বা তাঞ্জা অসি নীংতম্লবা মতুংদা লৈবাকসিদা অনিরকশুবা ওইনা লাকপনি‍। অদুগা চহি ৬০গী তুংদা, ওইরক্লিবনি, মসিনা তাক্লিবদি অসিগুম্বা ফীভম অসি পুরকপদা কয়া য়াম্না কন্না হোৎনরমগনি হায়বদুনি‍। মসি রাজনিতীগী মশান্নদগী ওইরকপা নত্তে‍। মসি মীয়ামগী থৌগল তৌরুবদগী ফংলকপা থৌজালনি‍।

ইকায়খুম্নরবা সভাপতী জী,

মীয়াম্না ঐখোয়দা মরে চেৎপা অমসুং মখা শমথনবগী অয়াবা পীরকপনি‍। ইকায়খুম্নরবা সভাপতী জী, লোক সভা মীখল মনুংদা মীয়ামগী মীৎয়েঙদগী তাম্না লৈখিবা অমনা, লোক সভা মীখলগা ইরোয়ননা, ঐখোয়গী লৈবাকসিদা স্তেতকী মীখল মরিসু পাঙথোকখি‍। ইকায়খুম্নরবা সভাপতী জী, হায়রিবা মীখল মরিমক্তা এন.দি.এ.না হান্না পানরুদবা চাংদা মায় পাকখি‍। ঐখোয়না মায় ফজনা পাকখি‍। প্রভু জগন্নাথকী লমদম ওইরিবা ওরিসানা ঐখোয়দা থৌজাল মরাঙ কায়না পীনবিরকখি‍।

ইকায়খুম্নরবা সভাপতী জী,

অন্ধ্র প্রদেশ এন.দি.এ.না শিৎনা মায় পাকখি‍। মখোয়দি মাইক্রোস্কোপ থাদুনা য়েংলবসু উবা ফংখিদ্রে‍।

ইকায়খুম্নরবা সভাপতী জী,

অরুনাচল প্রদেশতসু ঐখোয়না অমুক হন্না লৈঙাক শেম্লগনি‍। থা ৬কী মমাঙদসু এন.দি.এ.না সিক্কিমদা লৈঙাক শেমখি‍। ইকায়খুম্নরবা সভাপতী জী, ঐখোয়না অদোমগী স্তেত রাজস্থান, মধ্য প্রদেশ অমসুং ছত্তিসগরদসু চাউনা মায় পাকখি‍।

ইকায়খুম্নরবা সভাপতী জী,

ঐখোয়না অনৌবা মফমশিংদা মীয়ামগী মীনুংশি ফংলি, ঐখোয়না মীয়ামগী থৌজাল ফংলি‍।

ইকায়খুম্নরবা সভাপতী জী,

হন্দক বি.জে.পি.না কেরলাদা একাউন্ত হাংলে অমসুং কেরলাদগী ঐখোয়গী এম.পি.শিং মখৌ পোঙনা ঐখোয়গী ইরক্তা ফম্লি‍। তামিল নাদুগী সীত কয়ামরুমদা বি.জে.পি. মপাঙ্গল কন্না লৈরি‍। কর্নাকতা, য়ু.পি. অমসুং রাজস্থান্দা, বি.জে.পি.গী ভোতকী পর্সেন্তেজ মমাঙগী মীখলগা চাংদম্নবদা হেনগৎলক্লে‍। ইকুই কুইদনা স্তেত অহুমগী মীখলসু লাক্কদৌরে‍। ঐনা হায়রিবসি মীখল পাঙথোক্কদৌরিবা মহারাস্ত্র, হরিয়ানা অমসুং ঝার্খন্দগী স্তেতশিংনি‍।

ইকায়খুম্নরবা সভাপতী জী,

মমাঙগী এসেমব্লীদা হায়রিবা স্তেত অহুমসিদা ঐখোয়না ফংখিবা ভোত অদুদগী হেন্না হন্দক্কী লোক সভা মীখলদা ঐখোয়না ভোত ফংখি‍।

ইকায়খুম্নরবা সভাপতী জী,

ঐখোয়না পঞ্জাবতসু অঙকপা ফংনা ফজবা পর্ফোর্মেন্স লৈখি অমসুং কান্নবা ফংখি‍। মীয়ামগী য়াম্লবা থৌজাল ঐখোয়গী নাক্তা লৈরি‍।

ইকায়খুম্নরবা সভাপতী জী,

লৈবাক মীয়াম্না ২০২৪ মীখলদা কংগ্রেসতা মখোয়গী মেন্দেত পীখ্রে অমদি মেন্দেত অদুননি অদোম্না মফমদুদা ফম্লিবা, ওপোজিসন্দা ফম্লিবা অমসুং করিগুম্বা মরৈ য়েৎনবা লোয়রবদি লাউদুনা লৈবিয়ু, অদুমক লাউবিয়ু‍।

ইকায়খুম্নরবা সভাপতী জী,

অহুম্লক হন্না হঞ্জিন হঞ্জিন কংগ্রেসনা ১০০ য়ৌবা ঙমদবা কংগ্রেসকী পুৱারীদা অহান্বনি‍। মসি কংগ্রেসকী পুৱারীদা অহুমশুবা খ্বায়দগী মায়থিবনি‍। কংগ্রেসনা মখোয়গী মায়থিবদু য়াজরগা মীয়ামগী থৌদা কোক্তা থাঙ্গত্তুনা, কোক চিংশিন্নরবদি হেন্না ফগদবনি… অদুবু মখোয় থৌওং অমদা চঙশিন্দুনা কংগ্রেস অমসুং মাগী ইকোসিস্তেম্না মখোয়না ঐখোয়বু মায়থিবা পীরে হায়বা খলহন্নবা ভারতকী মীয়ামগী কোক্তা অহিং নুংথিল নাইদনা মৈ চুরি‍।

ইকায়খুম্নরবা সভাপতী জী,

মসি করিগীনো? ঐগী অচম্বা পুন্সিদা থেংনরকপদগী ৱাফম অমা ঐ হায়জগে‍। অপীকপা অঙাং খরা সাইকল তোংদুনা থোরকই অমসুং করিগুম্বা অঙাংদু তুরবদি, সাইকল লোংলবদি, কপ্পা হৌরকই, অচৌবা মীওই খরা লাকই অমসুং মনাক্তা চঙলক্তুনা শিরিবা ককচেঙদু য়েংনবা, পাইরিবা উচেক্তু য়েংনবা হায়রম্মি‍। নহাক্না অফবা সাইকল অমা তোংলি, তুশিগনু… অসুম্না হায়দুনা মহাক্কী ৱাখল তাহন্নবা হোৎনরম্মি‍। মখোয়না অঙাংদুগী মপুক্নিং ফাথদুনা থৈদোক্নবা হোৎনরম্মি‍। অদুনা হৌজিক্তি অঙাংদুগী মপুক্নিং হরাওরম্মি‍ অমসুং কংগ্রেস অমসুং মখোয়গী ইকোসিস্তেম্না মখোয়গী মপুক্নিংদা মতৌ অসুম্না হরাওদুনা লৈরি‍।

ইকায়খুম্নরবা সভাপতী জী,

১৯৮৪গী মীখল নীংশিংবিয়ু, মদুগী মতুংদা, লৈবাকসিদা লোক সভা মীখল ১০রক লৈখ্রে‍। লোক সভা মীখল ১০ পাঙথোকখ্রে‍। ১৯৮৪গী মতুংদা লোক সভা মীখল ১০ থোকখ্রবসু, কংগ্রেসনা ২৫০ য়ৌবা ঙমখিদ্রি‍। হন্দক্তি মখোয়না ৯৯দা পন্দুনা লৈখি‍।

ইকায়খুম্নরবা সভাপতী জী,

ঐ ৱারী অমগা নীংশিংলক্লে… মার্ক ৯৯ ফংলবা নুপামচা অমনা মখৌঔ পোংনা মহাক্না ফংলিবা মার্ক অদু উৎলদুনা চৎলম্মি, মরম অদুনা মীয়াম্না মহাকপু মার্ক ৯৯ ফংলে তাবদা থাগৎনরম্মি, মহাকপু পুক্নিং থৌগৎপিরম্মিই‍। অদুদগী মাগী ওজা লাক্তুনা মঙোন্দা হংলকই, “নহাক্না করিগীনো মিথাই য়েল্লিবদি?’ মানা মার্ক ১০০গী মনুংদা ৯৯ ফংলকপা নত্তে, মহাক্না ৫৪৩গী মনুংদা ফংলকপনি‍। হৌজিক্তি কনানা অঙাংদুদা মহাক্না মায় পাক্তবগী ৱর্ল্দ রেকোর্দ ফংলে হায়না তাকপিগনি‍। কংগ্রেস…

ইকায়খুম্নরবা সভাপতী জী,

কংগ্রেস লুচিংবগী ৱারোলদা য়াওরিবা করেম্নবগী ৱাহৈশিংসিদি সোলে ফিল্মদগী হেল্লে‍। ময়াম পুম্বা সোলে ফিল্মগী মৌসী জী নীংশিংবিরমগনি… অহুম্লক শুবা ওইনা মখোয়না মায়থিরি অদুবু মৌসী জীনা মখোয়গী ৱাখলগী মায় পাকপনি, চুমব্রা?

ইকায়খুম্নরবা সভাপতী জী,

স্তেত ১৩ দা সীত ০, মৌসী জী, স্তেত ১৩ দা সীত ০ ফংলগা হীরো অদুম ওইরিবরা?

ইকায়খুম্নরবা সভাপতী জী,

পার্তীগী লুৎ লুপখ্রবরা, মৌসী পার্তী হৌজিকসু নীংশা হোল্লিবরা‍। ঐনা কংগ্রেসকী মীওইশিংদা হায়জনিংবদি মীয়ামগী মেন্দেত অদুবু লান্না লৌদুনা মায় পাকপনি হায়না হরাওগনু‍। মেন্দেত অদুবু শেরান্নবা মায় পাকপগুম্না লৌগনি, মদুদা হরাওগনু‍। শেংনা হায়রবদা, লৈবাক মীয়ামগী মেন্দেত অদু খঙনবা হোৎনৌ অমসুং মদুবু য়াজৌ‍।

ইকায়খুম্নরবা সভাপতী জী,

কংগ্রেসকী খোঙবুশিংনা মীখল অসি নৈনখিবরা হায়বা ঐ খঙদে‍। মীখল অসি মখোয়গী খোঙবুশিংগীসু পাউজেল অমনি‍।

ইকায়খুম্নরবা সভাপতী জী,

হৌজিক্তি, কংগ্রেস পার্তী অসি ২০২৪দগী হৌরগা উতাংবী কংগ্রেস হায়না খঙনরগনি‍। ২০২৪দগী হৌনা কংগ্রেস অসি উতাংবী কংগ্রেস ওইরবনি অমদি উতাংবী হায়রিবসি মখোয়না চাথোকপা য়াবা পাম্বীদা নপ্লগা হিংবদুবুনি‍। কংগ্রেসনা মখোয়গী খোঙবু শেম্লিবা পার্তীশিংগী ভোতসু চাথোক্লি অমদি মখোয়গী খোঙবুদা শোকহন্দুনা কাখৎলক্লি‍। অসুম্না কংগ্রেসনা উতাংবী কংগ্রেস ওইরে‍। ঐনা উতাংবী হায়রিবসি অচুম্বা ৱাফমশিংদা য়ুম্ফম ওইরগা হায়বনি‍।

ইকায়খুম্নরবা সভাপতী জী,

ঐনা হাউস অসিদা অদোমগী মফমদা অমদি হাউস অসিগী খুত্থাঙদা লৈবাক্কী মফমদা স্তেতিস্তিক্স খরা থমজগে‍। কংগ্রেসনা মেজোরিতী ওইরগা মাগী খোঙবুশিংনা সীত ১-২-৩ লৈজবা মফম অমা হেক্তদা বি.জে.পি. অমসুং কংগ্রেসকী মরক্তা থেংনবা মতমদা, কংগ্রেসকী স্ত্রাইক রেত অসি শুপ্নতগী চাদা ২৬ খক্তনি‍। অদুবু মখোয়না অতোপ্পগী ফিজি পায়রগা লেপ্লম্বা মফমদদি, মখোয়না মখা থাদা খোঙবু ওইবা মফমদদি, পার্তী খরনা মখোয়দা খুদোংচাবা খরা পীবিবা স্তেতশিংদা কংগ্রেসকী স্ত্রাইক রেত চাদা ৫০ ওই‍। কংগ্রেসকী সীত ৯৯গী অয়াম্বদি মখোয়গী খোঙবুশিংনা ফংহন্বিবনি‍। অদুনা ঐনা মখোয়বু উতাংবী কংগ্রেস হায়বনি‍। কংগ্রেস মথন্তা মীখল থেংনবা স্তেত ১৬তা মখোয়গী ভোতর শেয়র মীখল অসিদা হন্থখ্রে‍।

ইকায়খুম্নরবা সভাপতী জী,

কংগ্রেস মথন্তা মীখল থেংনজবা স্তেত অহুম, গুজরাত, ছত্তিসগর অমসুং মধ্য প্রদেশতা অপুন্বা সীত ৬৪গী মনুংদা ২ খক ফংখি‍। মসিনা তশেংনা তাক্লে মদুদি কংগ্রেস অসি হন্দক্কী মীখলদা মপুং ফানা উতাংবী ওইরে‍। মখোয়না মখোয়গী খোঙবুশিংগী মরেংজুমদা তোংদুনা মখোয়গী সীত হেনগৎহন্বনি‍। করিগুম্বা কংগ্রেসনা মখোয়গী খোঙবুশিংগী ভোত চাথোক্লমদ্রবদি, মখোয়না লোক সভাদা অসুক য়াম্বা সীত ফংবদা ৱারমগদবনি‍।

ইকায়খুম্নরবা সভাপতী জী,

অসিগুম্বা মতমসিদা, খুদোংচাবা অমা লাক্লে‍। লৈবাক অসিনা চাওখৎপগী লম্বী খল্লি‍। লৈবাকসিনা চাওখৎপা ভারত অমগী মঙলান মঙফাওনহন্নবা ফিরেপ লৌরে‍। অদুনা ভারত লিংজেল মান্নবা তাই অমসুং নুংঙাই য়াইফবগী অনৌবা খোঙচৎ অমদা চৎপা তাই‍। অসিগুম্বা মতমসিদা, দেকেদ ৬ লৈঙাক পায়রম্বা কংগ্রেসনা চরাংনদুনা লৈবসি লাইবক থিবনি‍। মখোয়না খারোমদা চৎলগা অৱাংলোমগী মীয়ামগী মায়োক্তা ৱা ঙাংই, অদুগা মখোয়না অৱাংলোমদা চৎলগনা খারোমগী মীয়ামগী মায়োক্তা হু কামশিল্লি, মখোয়না নোংচুপ্লোমগী মীয়ামগী মায়োক্তা ৱা ঙাঙই, মখোয়না অচৌবা মীওইশিংগী মায়োক্তা ৱা ঙাংই‍। মখোয়না লোলদা য়ুম্ফম ওইরগা খাইবুং খাইবুং তানহন্নবা হন্না হন্না হোৎনৈ‍। কংগ্রেস পার্তীনা লঙজখিবা মরাল অমা ওইনা লৈবাকসিগী শরুক খরা ভারত্তগী তোখাই তাহন্নবা ৱা ঙাংবা লুচিংবা খরদা পার্লিয়ামেন্তরী তিকেৎ পীবা অসিমক ঐখোয়গী লাইবক থিবা অমনি‍। কংগ্রেসনা লেপ্পা নাইদনা নুমিৎ খুদিং ফুরুপ অমগা অমগা খৎনহন্নবা অনৌবা ৱারী কয়া পুথোকই‍। মখোয়না অনৌবা তোকঙা কয়া শন্দোক্লি‍।

ইকায়খুম্নরবা সভাপতী জী,

কংগ্রেস পার্তীনা লৈবাক্কী শরুক অমদগী মীওইশিংবু হন্থবা থাক্নি হায়না তাক্নবা ফাওবা হোৎনরি‍।

ইকায়খুম্নরবা সভাপতী জী,

কংগ্রেসনা লৈবাকসিদা শেন্মিৎলোনগী চরাংনবা শন্দোক্নবা থৌওইনা হোৎনরি‍। স্তেতশিংদা মীখল মনুংদা হায়খিবা ময়াম, মখোয়গী স্তেতশিংদা মখোয়না পায়খৎলিবা শেন্মিৎলোনগী খোঙথাংশিং অসি লৈবাকসিবু শেন্মিৎলোনগী চরাংনবা ফীভমদা চিংথগদৌরিবনি‍। মখোয়গী স্তেতশিং লৈবাকসিগী শেন্মিৎলোনগী পোৎলুম ওইহন্নবা থৌওইনা হোৎনরি‍। মখোয়গী পুক্নিংদা লৈরিবা মহৈদু ফংলমদ্রবদি লৈবাক অসি জুন ৪দা মৈ চাক্লমগদবনি‍। মী তিলহনগনি, চরাংনবা থোকহনগনি মসিনি মখোয়না তৌরম্লিবসি‍। মখোয়গী পান্দমদি চরাংনবা থোকহন্বনি‍। ভারতকী দিমোক্রেতিক থৌওংবু শিংনদুনা চরাংনবা থোকহন্নবা হোৎনখি‍। সি.এ.এ.গী মতাঙদা চরাংনবা শন্দোকখিবা, লৈবাক মীয়াম লান্না লমজিংবগী শান্নরিবা মশান্না, ইকো-সিস্তেম পুম্বা অসিনা মখোয়গী রাজনিতীগী পান্দম ফংননবা লেপ্তনা হোৎনদুনা লৈরি‍।

ইকায়খুম্নরবা সভাপতী জী,

লৈবাক পুম্বনা মীয়ামগী ইরাং থোকহন্নবা ইনশিন্বা কয়াসু উনখ্রে‍।

ইকায়খুম্নরবা সভাপতী জী,

হৌজিক মতমসিদা, মীয়ামগী মীনুংশি লৌনবা হোৎনবগী অনৌবা দ্রামাতাইজেসন অমা হৌরক্লি, অনৌবা মশান্ন অমা শান্নরি, ঐ ৱারী অমা লিগে‍। অঙাং অমা মহৈশঙদগী হল্লক্লগা কন্না কপ্পা হৌরক্লম্মি অমসুং মমাদু করি তৌরবনো হায়না পাখৎলম্মি, অঙাংদুনা কন্না কপ্পা হেঞ্জিল্লক্লম্মি অমসুং মমাদা হায়রকই ইমা ঙসি ঐ মহৈশঙদা ফুবিরক্লে, ঙসি মহৈশঙদা মখোয়না ঐবু ফুবিরক্লে অসুম্না হায়রগা মহাক্না কপ্পা হৌরক্লম্মি, মমাদু ৱাখল নুংঙাইরমদে‍। মহাক্না মচাদা করি তৌরুবগীনো হংলম্মি অদুবু অঙাংদুনা খঙদে মহাক্না ঐঙোন্দা করিসু হায়দনা ফুরকপনি হায়রম্মি‍। অঙাংদুনা মমাদা মহাক্না মহৈশঙদা অতোপ্পা অঙাং অমদা তাথি তাওইনা তৌরুরে হায়বদুদি হায়রমদে‍। মহাক্না অঙাং অতৈগী লাইরিক শেগাইরুরে হায়বদুদি হায়রমদে‍। মহাক্না ওজাদা হুরান্বনি হায়রুবদুদি হায়রমদে‍। মহাক্না অতোপ্পা অঙাংগী লঞ্চ হুরাল্লুরে হায়বদুদি হায়রমদে‍। ঐখোয় ঙরাং হাউসতা হায়রিবা অঙাংদুগী মওং মতৌদুগা চপ মান্নবা মতৌ উবা ফংখি‍। ঙরাং অঙাংগী ৱাখলগুম্বা অমনা লাউ খোংদুনা ঐঙোন্দা ফুবিরে, মসিনা ফুবিরে, মদুনা ফুবিরে হায়না তৌদুনা লৈরম্মি‍।

ইকায়খুম্নরবা সভাপতী জী,

হায়রিবা অনৌবা দ্রামা অসি মীয়ামগী মীনুংশি ফংনবা শান্নখিবনি‍। অদুবু লৈবাকসিনা অচুম্বদুদি খঙই মদুদি মহাক লুপা করোর লিশিং কয়া লান্না শীজিন্নবগী কেসতগী বেলদা থোরক্লগা লৈরিবনি‍। মহাক ও.বি.সি. কাঙলুপকী মীওইশিংবু হুরান্বনি হায়রুবগী মরাল লৈরবা মীওইনি‍। মহাক্না লৈবাকসিগী খ্বায়দগী ৱাংবা ৱায়েলশঙদা মথোঙ মরম খঙদবা ৱাফম ফোঙদোক্লুবগী লাঞ্জরে হায়খ্রবনি‍। মহাক অথোইবা নীংতম লান্মী বীর সাবরকরগুম্বা মীওইশিংবু করেম্নবগী মরাল থেংনরিবা মীওইনি‍। মহাক লৈবাকসিগী খ্বায়দগী চাউবা পার্তীগী প্রেসিদেন্তপু মীহাৎপনি হায়রুবগী ৱায়েল মায়োক্নরিবনি‍। মহাক য়াম্লবা লুচিংবশিং, ওফিসিএলশিং অমসুং ইন্সতিত্যুসনশিংদা অরান্বা হায়রুবগী কেস চত্থরিবনি‍।

ইকায়খুম্নরবা সভাপতী জী,

অঙাংগী ৱাখলদা ৱা ঙাংনবগী অমদি ফজবা লমচৎকী মফম লৈতে‍। অদুগা হায়রিবা অঙাংগী ৱাখল চেন্বা মীওইশনা থোরকপা মতমদা হাউসতা মী খুদিংগী খৌরি চরম মেৎলকই‍। হায়রিবা অঙাংগী ৱাখল চেন্বা মীওইসিনা মহাক্কী ঙমখৈ লান্থোরক্তুনা হাউস মনুংদা ফম্লগা মীৎচি খৎচিল্লক্কনি‍। লৈবাক পুম্বনা হৌজিক্তি মসিগী অচুম্বদু খঙলে, ইকায়খুম্নরবা সভাপতী জী‍। অদুনা ঙসি লৈবাকসিনা মাগী মফমদা নহাক করিসু তৌবা ঙম্লরোই, নহাক্তি কৈসু ওইররোই হায়নরি‍।

ইকায়খুম্নরবা সভাপতী জী,

তুলসিদাসনা হায়খি, অখিলেস… তুলসিদাসনা অরান্বা লৌনবা অরান্বা পীনবা হায়রম্মি‍। অরান্বগী চাক্লেন চানবা‍। তুলসিদাসনা অরান্বা পীনবা অমসুং অরান্বা লৌনবা হায়রম্মি‍। কংগ্রেসনা অরান্ববু রাজনিতীগী খুৎলায় ওইনা শীজিন্নরি‍। শাহিং চাবা শাগী মচিন্দা ঈ তৈদুনা লৈবগুম কংগ্রেসকী মচিন্দা অরান্বা হায়বসি পক্তুনা লৈখ্রবনি‍। ঙরাং জুলাই ১দা লৈবাকসিনা মীনম্বিরম্বগী নুমিৎ পাঙথোকখি‍। জুলাই ১দা মীয়াম্না মখোয়গী বেঙ্ক একাউন্ততা লুপা ৮৫০০ চঙলক্লবরা নৎত্রগা চঙলকত্রিবরা হায়না য়েংনখি‍। কংগ্রেসনা শন্দোকপা অরান্বা ৱাফমসিনা লৈবাক মীয়ামদা পীরিবা অৱাবসি য়েংবিয়ু‍। ইমা অমদি ইচে ইচলশিংগী মফমদা থা খুদিংগী লুপা ৮৫০০ ফংহনগনি হায়বা অরান্বা ৱাফমসিনা ইমা অমদি ইচে ইচলশিংগী থম্মোয় কায়হল্লে‍।

ইকায়খুম্নরবা সভাপতী জী,

ই.ভি.এম.গী মরমদা মীনমখি, সংবিধানগী মরমদা মীনমখি, রিজর্বেসনগী মরমদা মীনমখি, মদুগী মমাঙদা রাফেলগী মরমদা মীনমখি, ঐচ.এ.এল.গী মরমদা মীনমখি, এল.আই.সি.গী মরমদা মীনমখি, বেঙ্কশিংগী মরমদা মীনমখি, শিন্মীশিং শাউহন্নবা ফাওবা হোৎনখি‍। মখোয়গী ৱাখলসি কয়া য়াম্না ৱাংখিবগে হায়ববু ঙরাং হাউসপু লান্না লমজিংনবা হোৎনখি‍। ঙরাং হাউসতা অগ্নিবীরগী মরমদা অরান্বা ৱাফম কয়া ফোঙদোকখি‍। ঙরাং, এম.এস.পি. পীদে হায়বগী অরান্বা ৱাফম কয়া মফমসিদা হায়খ্রে‍।

ইকায়খুম্নরবা সভাপতী জী,

সংবিধানগী ইকায়খুম্নবা মাঙহনখিবা হায়বসি হাউসকী য়াম্না লাইবক থিবনি অমসুং লোক সভাদা কয়ারক হন্না কারক্লবা মীওই অমনা হাউসকী ইকায়খুম্নবা মাঙহন্বা হায়বসি তৌফম থোক্তবন‍ি‍।

ইকায়খুম্নরবা সভাপতী জী,

পার্তী অসিনা মফমসিদা চহি হুম্ফু ফমদুনা লাক্লবনি মখোয়না লৈঙাক্কী থবক তৌবগী মওং খঙলবনি, মখোয়দা হৈ-শিংলবা লুচিংবশিং লৈরিবনি‍। মখোয়না চরাংনবগী লম্বীসিদা চৎলকপদা, মীনম্বগী লম্বীদা চৎলকপদা লৈবাকসিনা শাথিবা লাংফম অমগী মায়কৈদা চঙশিল্লক্কনি‍।

ইকায়খুম্নরবা সভাপতী জী,

হাউসকী ইকায়খুম্নববু শিংনবা হায়বসি সংবিধান শেম্বিরম্বশিংবু ইকায়বা পীবনি, লৈবাকসিগী অথোইবা মীওইশিংবু ইকায়বা পীবনি‍। মসি লৈবাক নীংতম্নবগীদমক থৱায় কৎখিবা অথৌবশিংবু ইকায়বা পীবনি‍।

অদুগা, ইকায়খুম্নরবা সভাপতী জী,

ময়াম য়াম্না পুকচেল চাউই, মীনুংশি লৈবা ৱাখল লৈ, অদোম্না মোমোন নোক্লগা লাংফমগী অৱাবা মতম ফাওবদা খাঙখিবা ঐ খঙই‍।

অদুবু ইকায়খুম্নরবা সভাপতী জী,

ঐখোয়না হৌজিক করি তৌরি, ঙরাং করি তৌখি হায়বা য়াম্না লুনা খঞ্জিল্লুদনা পার্লিয়ামেন্তরী দিমোক্রেসী ঙাক্তুনা থম্বা ঙম্লোই‍।

ইকায়খুম্নরবা সভাপতী জী,

মসি মখা তানা নাথৈদুনা থম্লরোই, অঙাংগী ৱাখলনি হায়না নাথৈররোই‍। ঐনা মসি হায়রিবসিগী মরমদি মসিগী মরুমদা লৈরিবা পান্দমসি অফবা নত্তে, পান্দমসি শাথিনা খুদোংথিনিংঙাইনা অমসুং ঐনা লৈবাক মীয়াম্বু মীৎকপ থোকহন্বা পাম্মি‍।

ইকায়খুম্নরবা সভাপতী জী,

হায়রিবা মীওইশিংসিগী মীনম্বা ৱাফমসিনা ঐখোয়গী লৈবাক মীয়ামগী ৱাখল লৌশিংদা চিংনবা পোকহল্লি‍। মহাক্কী মীনম্বা ৱাফমশিং অসি লৈবাকসিগী মীচম মীয়ামগী ৱাখলদা ইকায়বা খঙদনা খুপাক্না থাবগুম্বনি‍।

ইকায়খুম্নরবা সভাপতী জী,

হায়রিবা থৌওংশিং অসি লৈবাকসিগী অথোইবা চৎনবীগী মফমদা খুপাক্না থাবগুম্বনি‍।

ইকায়খুম্নরবা সভাপতী জী,

অদোমগী মফমদা হাউস অসিগী ইকায়খুম্নবা ঙাক্নবা অচৌবা থৌদাং লৈ‍। মহাক্না হাউস অসিদা হৌরকখিবা মীনম্বগী চৎনবী অসিগী মায়োক্তা অকন্বা থবক লৌখৎলক্কনি হায়বসি লৈবাক মীয়ামগী অমসুং হাউস অসিগী থাজবনি‍।

ইকায়খুম্নরবা সভাপতী জী,

কংগ্রেসনা মতম পুম্বদা সংবিধান অমসুং রিজর্বেসনগী মরমদা মীনমখি‍। ঙসি ঐনা অশেঙবদু লৈবাক মীয়াম করোর ১৪০গী মফমদা থমজগে, য়াম্না নোল্লুক্না থমজগে‍। অচুম্বশিং অদু লৈবাক মীয়াম্না খঙবা য়াম্না মরু ওই‍।

ইকায়খুম্নরবা সভাপতী জী,

হন্দক অসি ইমর্জেন্সীগী চহি ৫০ মপুং ফারকপনি‍। ইমর্জেন্সী অসি লৈবাকসিদা শুপ্নতগী শক্তি পায়নবগীদমক, নম্ফু লৈঙাক্কী ৱাখল্লোন্না মরম ওইরগা থমখিবা নম্ফু লৈঙাক্কী মতৌনি‍। কংগ্রেসনা তমথিবগী পনখৈ পুম্নমক কংগ্রেসনা লানখ্রে‍। মখোয়না লৈবাক মীয়ামদা তমথিবগী চৈথেং পীখি অমসুং লৈবাক্কী শক্তম শেগায়বগী মরাল অমা লংজখি‍।

ইকায়খুম্নরবা সভাপতী জী,

লৈঙাক থুগাইবা, মীদিয়াবু নমশিন্বা, হীরম খুদিং সংবিধানগী ৱাখল্লোনগী মায়োক্তনি, সংবিধানগী সেক্সনশিংগী মায়োক্তনি, সংবিধানগী ৱাহৈ খুদিংগী মায়োক্তনি‍। হৌরকপদগী হৌনা লৈবাকসিগী দলিত, শোত্থবা কাঙলুপকী মায়োক্তা শাথিবা অরান্বা থৌওং অমা তৌখিবা মীওইশিং য়াওরি‍।

ইকায়খুম্নরবা সভাপতী জী,

মরম অদুননি বাবা সাহেব অম্বেদকরনা নেহরুগী মন্ত্রী মন্দলদগী তোকখিবা, কংগ্রেসকী এন্তি-দলিত, এন্তি-বেকৱার্দ ৱাখল্লোন্ননি‍। মহাক্না নেহরুনা মতৌ করম্না দলিত, শোত্থরবা মীওই কাঙলুপশিংগী মফমদা চত্থখিবা অরান্বা থৌওংবু শবাক ফাকখি‍। বাবা সাহেব অম্বেদকরনা মন্ত্রী মন্দলদগী তোকখিবা মতমদা মহাক্না পীখিবা মরমশিংদুনা মাগী মওং মতৌ তাকই‍। বাবা সাহেব অম্বেদকরনা হায়খি লৈঙাক্না সিদ্যুল্দ কাস্তশিংবু নাথৈদুনা থম্বসিনা ঐগী থম্মোয়দা ফাওরক্লিবা অশাওবসি ঐ ফাজিন্দুনা থম্বা ঙমদ্রে, হায়বসি বাবা সাহেব অম্বেদকরগী ৱাহৈশিংনি‍। সিদ্যুল্দ কাস্তশিং নাথৈদুনা থম্বনা বাবা সাহেব অম্বেদকরবু শাউহনখি‍। বাবা সাহেবকী হকথেংননা এতেক তৌরকপসিনা মরম ওইরগা নেহরুনা বাবা সাহেব অম্বেদকরগী রাজনিতীগী করিয়র লোইশিন্নবা থৌরাং খুদিংমক পায়খৎখি‍

ইকায়খুম্নরবা সভাপতী জী,

অহান্বদা, বাবা সাহেব অম্বেদকরবু শরৌ শিন্নদুনা মীখলদা মায়থিবা পীখি‍।

ইকায়খুম্নরবা সভাপতী জী,

মায়থিবা পীবখক নত্তনা, মখোয়না বাবা সাহেব অম্বেদকর মায়থিখিববু হরাওবা ফোঙদোক্নখি‍।

ইকায়খুম্নরবা সভাপতী জী,

মসিগী মতাঙদা ইরকপা ফাওনচে অমদা, ইকায়খুম্নরবা সভাপতী জী, বাবা সাহেবকুম্না, দলিত লুচিংবা বাবা জগজিবন রামদসু মহাক্কী মঙম পীবিখিদে‍। ইমর্জেন্সী মতুংদা, জগজিবন রাম পি.এম. ওইরমগদৌরিবনি‍। ইন্দিরা গান্ধীনা জগজিবন রাম মওং অমত্তদা প্রধান মন্ত্রী ওইহন্দনবা হোৎনখি‍। লাইরিক অমদা জগজিবন রাম মওং অমত্তদা প্রধান মন্ত্রী ওইহন্দনবা ৱাফম হায়রি‍। করিগুম্বা মহাক্না ওইরক্লবদি মখোয় মপুন্সি চুপ্পগী ওইনা মফম লৌথোক্কনি হায়খি‍। মসি লাইরিক অসিদা য়াওবা ইন্দিরা গান্ধথীগী ৱাহৈনি‍। কংগ্রেসনা চৌধরী চরন সিংহবুসু চপ মান্নবা মওংদা তৌবিখি‍। হায়রিবা কংগ্রেস অসিনা শোত্থবা কাঙলুপকী লুচিংবশিং, বিহারগী মপারী সিতারাম কেসরী, কংগ্রেস পার্তীগী প্রেসিদেন্তপুসু ইকায়বা পীখি‍।

ইকায়খুম্নরবা সভাপতী জী,

কংগ্রেস পার্তীনা হৌরকপদগী হৌনা রিজর্বেসনগী মায়োক্তা কন্না লেপ্তুনা লাকখি‍। নেহরুনা মুখ্য মন্ত্রীশিংদা ময়েক শেংনা রিজর্বেসনগী মায়োক্তা চে ইখি‍। কংগ্রেসকী প্রধান মন্ত্রী ওইখিবা ইন্দিরা গান্ধীনসু মন্দল কম্মিসন রিপোর্তপু নমশিন্দুনা থমখি‍।

ইকায়খুম্নরবা সভাপতী জী,

কংগ্রেস পার্তীগী অহুমশুবা প্রধান মন্ত্রী মিস্তর রাজিব গান্ধীনা, মহাক্না ওপোজিসন্দা লৈখিবা মতমদা মহাক্কী খ্বায়দগী শাংবা ৱারোল রিজর্বেসনগী মায়োক্তা ওইখি‍। মসি পার্লিয়ামেন্তকী রেকোর্দতা হৌজিকসু ফংলিবনি‍। অদুগা অমুকসু, ইকায়খুম্নরবা সভাপতী জী, ঐনা ঙসি লৈবাক্কী অরুবা ৱাফম অমদা অদোমগী পুক্নিং চিংশিঞ্জরি‍। লৈবাক মীয়াম লাখ কয়ানা ঙরাং থোকখিবদু লাক্কদৌরিবা চহিচা কয়া ঙাকপিবা ঙম্লোই‍।

ইকায়খুম্নরবা সভাপতী জী,

চহি ১৩১গী মমাঙদা স্বামী বিবেকানন্দনা চিকাগোদা হায়খি, ঐহাক মালেম পুম্বদা খাঙবা কন্বা অমসুং মালেম পুম্বনা য়ানবা ৱাফমশিং তম্বিরিবা লাইনিং অমদগী লাকপনি হায়বদা চাউথোকচবা পোকই‍। চহি ১৩১গী মমাঙদা বিবেকানন্দনা হিন্দুইজমগীদমক মালেমগী অচৌবা মীওইশিংগী মমাঙদা চিকাগো, য়ু.এস.এ.দা ৱা ঙাংখি‍।

ইকায়খুম্নরবা সভাপতী জী,

হিন্দু খাঙবা কল্লি, হিন্দু অসি মশাগী ওইবা মচত্তা হিংবা কাঙলুপ অমনি‍। মরম অসিননি ভারতকী দিমোক্রেসী, ভারতকী খেন্নবা মতৌ, মসিগী পাক চাউবনা ঙসি ফাওবদা মকা ফন্না লৈরিবসি‍।

ইকায়খুম্নরবা সভাপতী জী,

ঙসি হিন্দুশিংগী মফমদা অরান্বা মরাল শীজিন্নবা, য়াম্না শাথিবা শরৌ অমা শিল্লিবসি অরুবা ৱাফম অমনি‍। ইকায়খুম্নরবা সভাপতী জী, মহাক্না হিন্দুশিং মীহাৎ মীপুন তৌবা করঙলুপ্নি হায়খি, মসি নখোয়গী থৌওংনি, নখোয়গী লমচৎনি, মসি মখোয়গী ৱাখল্লোন্নি, মসি লৈবাক্কী হিন্দুশিংগী মায়োক্তা নখোয়গী তুক্কৎচবা মতৌনি‍।

ইকায়খুম্নরবা সভাপতী জী,

লৈবাক অসিনা ৱাফম অসি চহিচা কয়া কাউথোকপা ঙম্লোই‍। নুমিৎ খরনিগী মমাঙদা, হিন্দুশিংগী ৱাখলদা ফাওখিবা শক্তি থুগাইবগী ৱাফম লাউথোকখি‍। অদোম্না করম্বা শক্তিগী মরমদা ঙাংলিবনো? লৈবাক অসি শক্তিবু চহিচা কয়া লাৎচদুনা লাক্লিবনি‍। ঐখোয়গী বেঙ্গলনা ইমা দুর্গাবু লাৎলি, শক্তিবু লাৎলি‍। বেঙ্গলনা ইমা কালীবু পুক্নিং লুপচনা লাৎলি‍। অদোম্না হায়রিবা শক্তি অদুবু থুগাইনবা ৱাফম হায়রি‍। মখোয় অসি হিন্দুবু তেরোরিজম্নি হায়খিবা মীওইশিংনি‍। মখোয়গী খোঙবুশিংনা হিন্দুইজমবু দেঙ্গী, মেলরিয়াগা চাংদম্নৈ‍, অসিগুম্বা ৱাহৈশিংসিদা মখোয়গী মীওইশিংনা খুবাক খুখি, মসি লৈবাকসিনা কৈদৌঙৈদসু কাউরোই‍।

ইকায়খুম্নরবা সভাপতী জী,

থৌওইনা য়াৎপা লাল্লোং অমগী মখাদা, মখোয়গী ইকোসিস্তেম পুম্বনা হিন্দুগী চৎনবী, হিন্দু খুন্নাই, লৈবাকসিগী নাৎ, লৈবাকসিগী পারী পুরীগী লনবু হন্থনা য়েংই, তাথি তাওইনা তৌখি, ইকায়বা পীখি, হিন্দুশিংবু নোক্নবনা মখোয়গী মচৎ ওইরি, শৌগৎলি‍। অসিগুম্বা মীওইশিং অসিনা মখোয়গী রাজনিতীগী অপাম্বগীদমক করি করি তৌরি?

ইকায়খুম্নরবা সভাপতী জী,

ঐখোয়না অঙাং ওইরিঙৈদগী হৌনা তম্লকখি‍। অদোম খুঙ্গংদগী ওইরবসু নৎত্রগা ময়োল্লমদগী ওইরবসু, লায়রবা ওইরবসু নৎত্রগা ইনাক খুন্বা ওইরবসু, লৈববাকসিগী অঙাং খুদিংমক্না মসি খঙই‍। তাইবং মপুগী মওং খুদিংমক, ইকায়খুম্নরবা সভাপতী জী, তাইবং মপুগী মওং খুদিংমক ৱাংউলোনগীদমক্নি‍। তাইবং মপুগী মওং অমত্তা লনাই কান্নগী নত্তে, উহন্নবগীখক নত্তে‍। মসি উবা ঙম্বা মীওইনা অসুম্না তৌরোই‍।

ইকায়খুম্নরবা সভাপতী জী,

ঐখোয়গী লাইরেম্বা অমসুং লাইরেম্বীশিংবু ইকায়বা পীবা অসি লৈবাকসিগী মীওই করোর ১৪০গী থম্মোয় কায়হল্লি‍। অসুম্না তাইবং মপুগী শাইওনশিংবু মশাগী রাজনিতীগী খুদোংচানবগীদমক শান্নবসি, ইকায়খুম্নরবা সভাপতী জী, লৈবাকসিনা করম্না ঙাকপিগদৌরিবনো?

ইকায়খুম্নরবা সভাপতী জী,

ঙরাং হাউসতা ওইখিবা মতৌদু য়েংবিয়ু, হৌজিক্তি হিন্দু ফুরুপ্না ইকায়বা পীবগী ৱারোল অদু তান চানরুবগীরা নৎত্রগা চাংয়েং অমা তৌনবগী শেম শারিবরা হায়না খল্লগনি‍। হিন্দু ফুরুপ্না মসিগী মরমদা খন্বা মথৌ তাই‍।

ইকায়খুম্নরবা সভাপতী জী,

ঐখোয়গী লান্মীশিং লৈবাকসিগী চাউথোকচনিংঙাইনি‍। লৈবাক পুম্বনা ঐখোয়গী লান্মীশিংগী মথৌনা অমসুং মরিংজেলগীদমক চাউথোকচরি‍। অদুগা ঙসি লৈবাক পুম্বনা ঐখোয়গী লান্মীশিং, ঐখোয়গী দিফেন্স সেক্তরদা নীংতম্লবা মতুং চহি কয়া ওইখিদ্রিবা মওংগী রিফোর্ম তৌরকপা উরি‍। ঐখোয়গী লান্মীশিং মতমগা চুনহল্লি‍। ঐখোয়গী লৈবাক অঐসি ঙাক্নবগীদমক, থেংনবা শিংনবা খুদিং ঐখোয়গী লান্মীশিংনা মায়োক্নবা ঙম্নবগীদমক লান্মী মতিং লৈবা লান্মী লিংখৎনবা তৌবা য়াবা থৌরাং, রিফোর্ম অমসুং খোঙথাঙ খুদিংমক ঐখোয়না পায়খৎলি‍। হৌখিবা চহি খরসিদা অহোংবা কয়া লৈখ্রে‍। সি.দি.এস. পোস্ত অমা লৈরক্লবা মতুংদা পুনশিনবগী থৌওংসু  হেন্না মপাঙ্গল কনখৎলে‍।

ইকায়খুম্নরবা সভাপতী জী,

ঐখোয়গী লান্মী শঙলুপশিং পুনশিল্লকপগা লোয়ননা লানগী পুরানশিংগী নিসাদাসকী ৱাখল্লোন অমা ওইরিবা থিএতর কম্মান্দ অমা ভারত্তা মথৌ তারে‍। ঙসি ঐনা অপেন্বগা লোয়ননা হায়বা ঙম্মি মদুদি সি.দি.সি. সিস্তেম লৈখ্রবা মতুংদা লৈবাকসিগী ঙাকশেলগীদমক মথৌ তাবা থিএতর কম্মান্দ শেমগৎনবগী মায়কৈদা খোঙ থাংজিল্লি‍।

ইকায়খুম্নরবা সভাপতী জী,

মরোমদোম লেপচবা ভারতনা, ঐখোয়গী লান্মীবু মরোমদোম লেপচবা ঙমহন্বা হায়বসিদসু মরুওইনা শক্লোন লৌরি‍। ঐখোয়গী লৈবাক্কী লান্মীশিং নহা ওইহন্বা তাই‍। লান্মীশিং অসি য়েক্নবগী ময়া কুমহন্নবনি‍। ঐখোয়না ঐখোয়গী নহাশিংদা থাজবা থম্বা তাই‍। লান্মীদা নহাগী মশিং হেনগৎহনগদবনি অমদি মসিনা মরম ওইরগা ঐখোয়না লেপ্পা লৈতনা লানগীদমক মতিক চাবা লান্মী শেমগৎনবা রিফোর্ম তৌরি‍। ঐখোয়গী লান্মীশিং মতম চানা রিফোর্ম তৌদবনা মরম ওইরগা খুদোংচাদবা কয়া মায়োক্নখ্রে‍। অদুবু হায়রিবা ৱাফমশিং অসিদি মীয়ামগী মাঙদা হায়দোকপা য়াদবা মরম্না ঐ চিন কাঙথোকচররোই‍।

ইকায়খুম্নরবা সভাপতী জী,

লৈবাক্কী ঙাকশেল হায়বসি অরুবা ৱাফম অমনি‍। ইকায়খুম্নরবা সভাপতী জী, অসিগুম্বা রিফোর্মশিংগী পান্দমদি হৌজিক হোংলক্লিবা লানগী মওং মতৌ অসিনি‍। মচাক মথুমশিং হোংলক্লি, খুৎশু খুৎলায়শিং হোংলক্লি, তেক্নিকশিং হোংলক্লি‍। অসিগুম্বা ফীভমসিদা অসিগুম্বা শিংনবশিং থেংনবা ঙম্নবগীদমক ঐখোয়গী লান্মীশিংবু শেম শানবগী অচৌবা থৌদাং অমা ঐখোয়দা লৈ‍। ঐখোয়না হায়রিবা থৌদাং অসি য়াবা ঙম্নবগীদমক লান্না ইরাল শীবিরক্লবা ফাওবদা ঐখোয়গী চিন মেনশিন্দুনা থবক তৌরি‍। অসিগুম্বা মতমসিদা লৈবাকসিগী লান্মীশিং মতমগা চুনহন্নবা অমসুং মপাঙ্গল হাপ্নবা করি তৌরি? মখোয়না অরান্বা ৱাফমশিং শন্দোক্লি‍। মখোয়না দিফেন্স রিফোর্মগীদমক হোৎনরিবশিং নমথনবা শরৌ শিল্লি‍।

ইকায়খুম্নরবা সভাপতী জী,

তশেংবদি, কংগ্রেসকী মীওইশিংনা ভারতকী লান্মীশিং মপাঙ্গল কনখৎলকপা য়েংবা ঙমদে‍। ইকায়খুম্নরবা সভাপতী জী, নেহরুগী মতমদা লৈবাকসিগী লান্মী কয়া য়াম্না মপাঙ্গল শোল্লমবগে হায়বা খঙদবা কনাবু লৈরি? ঐখোয়গী লান্মীশিংগী মতাঙদা কংগ্রেসনা চত্থরম্বা লুপা লাখ করোর কয়াগী স্কেমশিং অদুননি লৈবাকসিগী লান্মীশিংবু মপাঙ্গল শোন্থহল্লমখিবা‍। ঈশিং, কংফাল নৎত্রগা অতিয়াদা ওইরবসু, লান্মীগী মথৌ তাবা খুদিংদা, লৈবাকসিনা নীংতম্লবা মতুংদগী মখোয়না শেঞ্জা থুমজাগী চৎনবী অমা শেমগৎখি‍। জীপ স্কেম, সবমেরিন স্কেম, বোফোর স্কেম ওইরবসু, হায়রিবা স্কেম পুম্নমকসিনা লৈবাক্কী লান্মীগী মপাঙ্গল কনখৎহনবা ঙমখিদে‍। মতম অমা লৈরম্মি, ইকায়খুম্নরবা সভাপতী জী, কংগ্রেসকী মতমদা, ঐখোয়গী লান্মীশিং বুলেৎ প্রুফ জেকেৎ ফাওবা লৈরমদে‍। মখোয়না লৈঙাক পায়রিঙৈদা লৈবাকসিগী লান্মীশিং মাঙহন তাকহল্লম্বখক নত্তনা, মপাঙ্গলসু শোন্থহল্লম্মি, অদুগা হায়রিবা থৌওং অসি ওপোজিসন্দা লৈরবা ফাওবদা মখা চত্থরি‍। ওপোজিসন্দা লৈরবা ফাওবদা, লান্মীগী মপাঙ্গল শোন্থহন্নবা লেপ্পা লৈতনা হোৎনরি‍। কংগ্রেস লৈঙাক লৈরিঙৈদা, মখোয়না ফাইতর জেৎ লৈরমদে অদুগা ঐখোয়না লৈনবা হোৎনরকপদনা কংগ্রেসনা শরৌ মখল খুদিংমক শীজিন্নরক্লি‍। ফাইতর জেৎশিং নোংথক লান্মীগী মফম য়ৌহন্দনবা শরৌ কয়া শিনখি অমসুং, ইকায়খুম্নরবা সভাপতী জী, রাফেলগগী শান্নপোৎ মচা মচা শারগা মদুবু পাইদুনা লৈবাক্কী লান্মীবু করেম্নরিবা অঙাং মচা মান্বা থৌওংসি য়েংবিয়ু‍।

ইকায়খুম্নরবা সভাপতী জী,

কংগ্রেসনা খোঙথাং খুদিংদা য়েৎখি, ভারতকী লান্মীবু মপাঙ্গল কনখৎহনগদবা রিফোর্ম খুদিংদা য়েৎখি‍।

ইকায়খুম্নরবা সভাপতী জী,

ঐনা অদোমবু মতম শাংদোকপিবগীদমক পুকচেল শেংনা থাগৎচরি‍।

ইকায়খুম্নরবা সভাপতী জী,

হৌজিক্তি কংগ্রেসকী মীওইশিংনা ঐখোয়গী নহাশিংগী মতিক ময়াই খঙলেক্লে, ঐখোয়গী লান্মীশিংগী মরোমদোক লেপচবা মচৎনা মখোয়গী খ্বায়দগী চাউবা মপাঙ্গলনি হায়বা খঙলক্লে অমদি মখোয়না মসিদা লান্দারি অমদি অনৌবা রিক্রুইতমেন্ত মখল অমগী মরমদা অরান্বা ৱাফম কয়া শন্দোক্লি‍। মীয়াম্বু, লৈবাকসিগী নহাশিংবু লৈবাক ঙাক্নবগীদমক লান্মী ওইবা থিংননবা শরৌ অমা শিল্লি‍।

ইকায়খুম্নরবা সভাপতী জী,

কংগ্রেসনা করিগীদমক ঐখোয়গী লান্মীশিংবু মপাঙ্গল শোন্থহনবা পাম্লিবনো হায়বা ঐনা হাউস অসিগী খুত্থাঙদা খঙবা পাম্মি‍। কনাগী কান্ননবগীদমক কংগ্রেসকী মীওইশিংনা লান্মীগী মরমদা অরান্বা ৱাফম শন্দোক্লিবনো?

ইকায়খুম্নরবা সভাপতী জী,

ৱন রেঙ্ক ৱন পেন্সনগী মতাঙদা লৈবাকসিগী মথৌনা লৈরবা লান্মীশিংগী মমিত্তা উৎ চাইশিন্নবা হোৎনবসু লৈরি‍।

ইকায়খুম্নরবা সভাপতী জী,

ঐখোয়গী লৈবাকসিদা, শ্রীমতী ইন্দিরা গান্ধীনা ৱন রেঙ্ক ৱন পেন্সন সিস্তেম মুত্থৎলম্মি‍। দেকেদ কয়া কংগ্রেসনা ৱন রেঙ্ক ৱন পেন্সন চৎনহন্বা য়ারমদে অমদি মীখল মতম লাকপদা থবক্তগী পোত্থারবা লান্মী হীরোশিংবু লুপা করোর ৫০০ উত্তুনা অপঙবা শীনবা হোৎনখি‍।  অদুবু মখোয়না ৱন রেঙ্ক ৱন পেন্সন হেক ঙম্লিবমখৈ চৎনহন্দপা পামখি‍। এন.দি.এ. লৈঙাক্না ৱন রেঙ্ক ৱন পেন্সন চৎনহনখি অমদি ইকায়খুম্নরবা সভাপতী জী, ভারতকী মচাক মরল মরাঙ ফনা কায়দ্রবসু, কোরোনাগী অকন্বা লান্থেং মায়োক্নখ্রবসু, ঐখোয়গী থবক্তগী পোত্থারবা লান্মীশিংগী মফমদা ৱন রেঙ্ক ৱন পেন্সন ওইনা লুপা করোর ১২০,০০০ ফংহনখি‍।

ইকায়খুম্নরবা সভাপতী জী,

ইকায়খুম্নরবা রাস্ত্রপতীনা মহাক্কী ৱারোলদা পেপর লীক্কী মতাঙদা নুংনাংবা ফোঙদোকখি‍। ঐনা লৈবাকসিগী মহৈরোয় পুম্নমক্কী মফমদা, লৈবাক্কী নহা খুদিংগী মফমদা হায়জরি মদুদি লৈঙাক অসিনা অসিগুম্বা থৌওংশিং অমুক হন্না থোকহন্দনবা য়াম্না লুম্না লৌদুনা ঐখোয়গী থৌদাংশিং পাঙথোক্নবা লানগী মতৌগুম লৌদুনা খোঙথাং অমগী মথংদা অমা পায়খৎলি‍। নহাশিংগী তুংলমচৎপু তেমশিংনরিবা মীওইশিং অমত্তা লেম্না থারোই‍। নীতকী মতাঙদা লৈবাক শিন্বা থুংনা লেপ্পা লৈতনা মীওই কয়া ফাগৎলি‍। কেন্দ্র লৈঙাক্না হান্ননা অকন্বা চৎন-কাঙলোন চৎনহনখ্রে‍। চাংয়েং পাঙথোকপগী সিস্তেম পুম্বা হেন্না মপাঙ্গল কনখৎহন্নবা মথৌ তাবা খোঙথাংশিং পায়খৎলি‍‍।

ইকায়খুম্নরবা সভাপতী জী,

এন.দি.এ. লৈঙাক্না চাওখৎপা পুরকপবু হৌখিবা চহি ১০সিদা মাগী খ্বায়দগী চাউবা ফিরেপ ওইনা লৌরি‍। ঙসি, ঐখোয়না ভারতপু মালেমগী অহুমশুবা খ্বায়দগী চাউবা শেন্মিৎলোন ওইহন্নবা ফিরেপ লৌরি‍। ঙসি, নীংতম্লবা মতুং চহি কয়াগী তুংদা, ঐখোয়না য়ুমথোঙ খুদিংদা থক্নবা অরূবা ঈশিং ফংহন্নবা ফিরেপ লৌরি‍।

ইকায়খুম্নরবা সভাপতী জী,

লায়রবা মীওই খুদিংদা ময়ুম মকৈ শাবিবা হায়বসি ঐখোয়গী ফিরেপ্নি‍।

ইকায়খুম্নরবা সভাপতী জী,

ভারতকী মপাঙ্গল মালেমসিদা হেনগৎলকপগা লোয়ননা, ঐখোয়না ঐখোয়গী লান্মীবু মশানা মতিক চাবা ওইহন্নবা লেপ্লি‍।

ইকায়খুম্নরবা সভাপতী জী,

হৌজিক অসি অশঙবা চকনি‍। অশঙবা চক্কী মতমসিদা, ভারতনা মালেমগী ওইনা শাগৎলকপগী ফীভম থেংনরিবা অসিদা অচৌবা ইনোৎ অমা পীননবা থৌরাং পায়খৎলে‍। মায়কৈ অসিদা, ভারতপু রিনিউএবল ইনর্জীগী পৱার হাউস ওইহন্নবগী মায়কৈদা ঐখোয়না খোঙথাং অমগী মতুংদা অমা লৌখৎলে, অমদি মসি ফংনবগীদমক ঐখোয়না খোঙফম চেৎনা লেপ্লি‍।

ইকায়খুম্নরবা সভাপতী জী,

তুংলমচৎ অসি গ্রীন হায়দ্রোজেন, ই-ভেহিকলগা মরী লৈনৈ‍। ঐখোয়না ভারতপু গ্রীন হায়দ্রোজেন হব অমা ওইহন্নবা মপুং ফানা লেপ্লি‍।

ইকায়খুম্নরবা সভাপতী জী,

২১শুবা চহিচাগী ঙসিগী ভারত্তা ২১শুবা চহিচাসিবু ভারতকী চহিচা ওইহন্নবা ঐখোয়গী ফিরেপ্তা ইনফ্রাস্ত্রকচরনা মরুওইবা শক্লোন অমসু লৌরি‍। ঐখোয়না মতমগা চুনবা ইনফ্রাস্ত্রকচর শেমগৎপা তাই‍। ঐখোয়না মালেমগী বেঞ্চমার্ক পুম্নমক্কা থোং মান্ননা চৎমিন্নবা তাই‍।

ইকায়খুম্নরবা সভাপতী জী,

ভারত্তা ইনফ্রাস্ত্রকচরদা থাদরিবা শেনফম অমদি ঙসি লৈবাক মীয়ামদা পীরিবা কান্নবা অসি মমাঙদা অমুক্তা তৌখিদ্রি‍। লৈবাকসিনা থবক পীবগী অমসুং মশানা মশাবু থবক পীজবগী অচৌবা খুদোংচাবশিং শেমগৎলি, মসি হেনগৎলকখিগনি, অনৌবা শক্লোন লৌরকখিগনি, অনৌবা ভারতকী মথৌ তাবশিংগী মতুং ইন্না স্কিল দিভেলপমেন্ত তৌরি অমসুং মসিদা য়ুম্ফম ওইরগা, ভারতনা ইন্দস্ত্রী ৪.০দা লুচিংবা অমা ওইরক্কনি‍। অদুগা ঐখোয়না ঐখোয়গী নহাশিংগী তুংলমচৎ মরা চেৎনা থম্লম্নবগী মায়কৈদসু থবক পায়খৎলি‍।

ইকায়খুম্নরবা সভাপতী জী,

স্তদী অমা লৈ, হৌখিবা চহি ১৮সিদা… স্তদী অসি য়াম্না মরুওই‍। স্তদী অসিনা হায়রিবদি হৌখিবা চহি ১৮সিদা, ঙসসি লনাই সেক্তরদা থবক পীরিবা অসি চহি ১৮গী মনুংদা খ্বায়দগী চাওই‍।

ইকায়খুম্নরবা সভাপতী জী,

ঙসি, ভারতকী দিজিতেল পেমেন্ত সিস্তেম্না মালেম পুম্বদা খুদম অমা ওইররি‍। মালেমগী মীওইশিংনা, ঐনা G-20 কাঙলুপ্তা চৎলুবা খুদিং, মালেমগী ইনাক খুল্লবা লৈবাকশিংনা ফাওবা ভারতকী দিজিতেল ইন্দিয়া ইহৌ, দিজিতেল পেমেন্ততা অঙকপা পোক্নরি, অমদি লাংতক্নবা মতৌগা লোয়ননা ৱাহং কয়া ঐখোয়দা হংলকই‍। হায়রিবা ভারতকী মায় পাকপা অসি অচৌবা ৱাফম অমনি‍।

ইকায়খুম্নরবা সভাপতী জী,

ভারতনা মাঙদা চঙশিনবগা লোয়ননা মহৌশানা হিদান্নবগী চাংসু হেনগৎলক্লি অমদি শিংনবসু হেনগৎলক্লি‍। ভারতগী খোঙজেলবু পরৈ চেন্বা ৱাফম অমা ওইনা উরিবা, ভারতকী খোঙজেলবু শিংনবা অমা ওইনা উরিবা মীওইশিংনা অরান্বা পাম্বৈশিং শীজিন্নরি‍। হায়রিবা শাফুশিং অসিনা ভারতকী দিমোক্রেসী, দিমোগ্রাফী অমদি খেন্নবা মওং মতৌদা লান্দারক্লি অমদি মসি ঐখক্তনা খনবা নত্তে‍। মসি লৈঙাকখক্তগী কোক শাবা নত্তে, মসি ত্রেজরী বেঞ্চখক্তগী কোক শাবা নত্তে‍।

ইকায়খুম্নরবা সভাপতী জী,

লৈবাকসিগী মীয়াম অমদি ইকায়খুম্নরবা সুপ্রিম কোর্ত ফাওবনা মসিগী মরমদা নুংনাংবা ফোঙদোক্নরিবনি‍। ঐনা ঙসি হাউসকী মফমদা সুপ্রিম কোর্তনা করি হায়খিবগে হায়বদু থমজগে‍। সুপ্রিম কোর্তকী ৱাফম অসিনা কমদৌনা লৈবাকসিগী মীওই লাখ কয়াগী মফমদা লাংফম অমা থোক্লক্কদবগী লুমদুনা লৈরিবগে হায়বদু তাক্লি‍।

ইকায়খুম্নরবা সভাপতী জী,

সুপ্রিম কোর্তনা মাগী ৱায়েলদা য়াম্না লুনা হায়খি অমদি ঐনা ৱাফম অদু পাথোকচগে – অথোইবা লৈবাকসিগী খোঙজেলদা চিংনবা পোকহন্নবা থৌওং অমা চত্থবগুম তৌরি, মসিবু নমথনবা অমদি হীরম খুদিংদা শোন্থহন্নবা অকন্বা মওংদা হোৎনরি‍। ঐনা পাথোকচরিবসি সুপ্রিম কোর্তকী ৱাহৈশিংদুনি‍। সুপ্রিম কোর্তনা মখা তানা হায়রিবদি অসিগুম্বা থৌওংশিং অসি হৌরকপদা থিংহৌগদবনি‍। মসি লৈবাকসিগী সুপ্রিম কোর্তকী ৱাফম্নি‍।

ইকায়খুম্নরবা সভাপতী জী,

মথৌ তাবা অসিদা সুপ্রিম কোর্তনা ফোঙদোক্লিবা ৱাফম অসি মফমসিদা হাউসতা তিনবিরিবা ঐখোয় পুম্নমক্না, হাউসতা লাক্লবসু নৎত্রগা মপান্দা লৈবা ওইরবসু, লুনা লৌবা মথৌ তা‍ই‍।

ইকায়খুম্নরবা সভাপতী জী,

অসিগুম্বা শাফুশিং অসিদা মতেঙ পাংবা মীওই খরা লৈবাকসিদা লৈ‍। অদুনা লৈবাক মীয়াম্না অসিগুম্বা শাফুশিং অসিদগী মীকুপ নাহুম শিংনা লৈবা মথৌ তাই‍।

ইকায়খুম্নরবা সভাপতী জী,

২০১৪দা লৈঙাক পায়রক্লবা তুংদা, লৈবাকশিনা মায়োক্নখিবা খ্বায়দগী অচৌবা শিংনবশিংগী মনুংদা অমদি কংগ্রেস অমসুং মখোয়গী কাঙবুনি‍। হায়রিবা কাঙবু অসি চহি ৭০ চুপ্না কংগ্রেসকী মতেঙগা লোয়ননা লৈরকখিবনি‍। ঙসি ঐনা হায়রিবা কাঙবুসিগী মফমদা চেকশিনৱা থমজরি, সভাপতী জী, ঐনা হায়রিবা কাঙলুপসিগী মফমদা চেকশিনৱা থমজরি মদুদি মখোয়না লৈবাকসিগী চাওখৎ খোঙজেল পন্থহন্নবা তৌরিবা অসিনা লৈবাক্কী চাওখৎপা পুরকপদা শাথিনা অকায়বা পীরক্কনি‍। অদুগা মখোয়গী শরৌ খুদিংমক চপ চানা পাউখুম পীগনি হায়না কাঙলুপসিগী মফমদা ঐনা চেকশিনৱা থমজরি‍।

ইকায়খুম্নরবা সভাপতী জী,

হৌজিক অসি মালেমসিনা ভারতকী খোঙজেলবু য়াম্না লুম্না লৌদুনা ৱাফম খুদিং য়েংলিবা মতম্নি‍।

ইকায়খুম্নরবা সভাপতী জী,

হৌজিক্তি মীখল পাঙথোকখ্রে, লৈবাক মীয়াম করোর ১৪০না মখোয়গী চহি মঙাগী মেন্দেত পীখ্রে‍।‍। চাওখৎপা ভারত অমা শেমগৎনবগীদমক, হাউস অসিগী ইকায়খুম্নরবা মেম্বর পুম্নমক্না ফিরেপ অসিবু মায় পাকহন্বদা থৌদাং য়াফম থোকই‍। ঐনা মখোয় পুম্নমকপু চাওখৎপা ভারত অমগী মঙলান মঙফাওনহন্বদা থৌদাং য়াবিনবা হায়জরি‍। ঐখোয় লৈবাক্কী য়াইফনবগীদমক পুন্না চৎমিন্নসি, পুন্না থবক তৌমিন্নসি অমদি লৈবাক মীয়ামগী মঙলান অমসুং অনিংবা অপাম্বশিং ফংহনবদা অৱাৎপা অমত্তা লৈহল্লোইসি‍।

ইকায়খুম্নরবা সভাপতী জী,

ভারত্তা হৌজিক্কী মতমসিদা পোজিতিব ওইপা রাজনিতী য়াম্না মথৌ তাই‍। অমদি ঐনা ঐখোয়গী রাজনিতিৱালা মরুপশিংগী মফমদা, ইন্দি এলাইন্সকী মায়কৈদা লৈরিবা মীওইশিংগী মফমদা হায়জনিংবদি, অদোম থোকপিরকউ অমসুং মীয়ামলক্তা অফবা লৈঙাক্কী মরমদা হিদান্নবিরকউ‍। অদোমগী লৈঙাক লৈরিবা মফমশিংদুদা, মখোয়না অফবা লৈঙাক, মীয়ামদা চাকথুং ফংহন্বা, মীয়ামগী মঙলান মঙফাওনহন্বদা এন.দি.এ. লৈঙাক্কী হিদান্নবিয়ু‍। লৈবাকসিনা য়াইফরবদি অদোমসু য়াইফগদৌরিবনি‍।

ইকায়খুম্নরবা সভাপতী জী,

অদোম্না এন.দি.এ. লৈঙাক্কা অফবা থবক্তা হিদান্নবিয়ু, রিফোর্মগী মতাঙদা শিংনবিয়ু‍। অদোমোগী লৈঙাক লৈরিবা মফমশিংদুদা রিফোর্মগী খোঙথাঙশিং পায়খৎহন্বিয়ু অমসুং মখোয়দা মপান লমগী ইনভেস্তমেন্ত চিংশিন্বিয়ু‍। অদোম অদোমগী স্তেতশিংদা মপান লমগী ইনভেস্তমেন্ত হেন্না চিংশিন্নবা হোৎনবিয়ু‍। মখোয়গী লৈঙাক স্তেত খরদা লৈরিবা মরম্না মখোয়না মসি তৌননবা খুদোংচাবা লৈরিবনি‍। অদুগা মসিগীদমক মখোয়না বি.জে.পি. লৈঙাক্কা, এন.দি.এ. লৈঙাক্কা অফবা মওংদা অথোই অহেন তান্নগদবনি‍। মখোয়না মীয়ামগী থৌগল তৌনবা খুদোংচাবা ফংলিবা মফমশিংদুদা থবক পীবগী লমদা হিদান্নবা য়াই‍। মীয়ামলক্তা থোরক্তুনা করম্বা লৈ ঙাক্না হেন্না থবক পীবগে হায়বদুদা অফবা মওংদা হিদান্নসি‍।

ইকায়খুম্নরবা সভাপতী জী,

ঐখোয়গীসিদা হায়নবা অমা লৈ গহনা কর্মনোগতী: হায়বদি থবক থৌওংগী খোঙজেল য়াম্না কল্লি হায়বনি‍। মরম অদুনা, অসিগুম্বা মীনম-থানম্বা মরৈ য়েৎনবগী মহুত্তা মখোয়না থবক, হৈ-শিংবা, কত্থোকপা অমসুং থৌগলনা মীয়ামগী থম্মোয় খুদুম চন্নবা হোৎনগদবনি‍।

ইকায়খুম্নরবা সভাপতী জী,

হৌজিক খন্ন-নৈনরিঙৈ মরকসিদা পাউ অমা ফংলি, য়ু.পি.গী হাথ্রসতা মী নেৎখায়নবদা মীওই কয়া লৈখিদ্রে হায়না পাউ তাই‍। হায়রিবা লাইবক থিবা থৌদোক অসিদা লৈখিদ্রবা মীওইশিংগীদমক অৱাবা ফোঙদোকচরি‍। অশোক অপন নংলবা মীওইশিংগী মফমদা থুনা ফগৎলকপা ওইরসনু হায়না য়াইফরোল থমজরি‍। মফমদুগী এদমিনিস্ত্রেসন্না স্তেত লৈঙাক্কী মীৎয়েঙ মখাদা মী কন্বা অমসুং মতেঙ পাংবগী থবক চত্থরি‍। মকোক থোংবা লৈঙাক্কী ওফিসিএলশিং উত্তর প্রদেশ লৈঙাক্কা লেপ্তনা পাউ ফাওনরি‍। ভিক্তিমশিং অদু মওং খুদিংদা মতেঙ পাংগনি হায়না ঐনা হাউসকী খুত্থাঙদা ময়ামগী মফমদা থাজবা পীজরি‍।

ইকায়খুম্নরবা সভাপতী জী,

ঙসি অসি য়াম্না শাংনা খন্নরক্লে অমদি অদোমসু উবিরি, ঐনা ঙসিগী অসিগুম্বা ফীভম অহান্বা ওইনা লোক সভাদা প্রধান মন্ত্রী ওইনা থৌগল তৌনবা তাঞ্জা ফংখিবা মতমদসু থেংনখি‍। ২০১৯দা, ঐ মসিগুম্বা ফীভম মায়োক্নখি‍। ফীভম অসিমক ঐ রাজ্য সভাদা মায়োক্নখি, অদুগা হৌজিক্তি ঐসু পাঙ্গল কনখৎলক্লে‍। ঐগী ৱাখলো ঐগী খোঞ্জেল অমসুং ঐগী ফিরেপ মপাঙ্গল কল্লি‍।

ইকায়খুম্নরবা সভাপতী জী,

অদোম্না কয়ারক হন্না হায়জরবসু, ২০১৪৪দা ঐখোয়না রাজ্য সভাদা লাকখিবা মতমদা, ঐখোয়গী পাঙ্গল য়াম্না শোল্লম্মি অমদি চেয়রনা অতোপ্পা মায়কৈদা খরা মীচঙ চঙলম্মি‍। অদুবু ঐখোয়না লৈবাক্কী থৌগলগী ঐখোয়গী ফিরেপ হোংখিদে, থবক ফন্না লেপখি‍। ঐনা লৈবাক মীয়ামদা হায়জনিংবদি মোদী নৎত্রগা লৈঙাক অসিনা অদোম্না পন্বিরকপা খুরৌ অমত্তা, অদোম্না য়াথং তৌবিরকপা থৌদাং অমত্তবু কিবা লৈতে‍। ঐখোয়না লৌখিবা ফিরেপ ফংননবা ঐখোয়না লেপ্তনা হোৎনখিগনি‍।

ইকায়খুম্নরবা সভাপতী জী,

ঐনা নৌনা কারকপা এম.পি.শিংগী মফমদা য়াইফ-পাউজেল পীজরি‍।

ইকায়খুম্নরবা সভাপতী জী,

মখোয়না ৱাফম কয়া অমা তম্বা, খঙজিন্বা ঙমগনি অমদি লৈবাক্কী মীয়ামগী মীৎয়েঙগী ৱাংমদা লৈখিরোই হায়না ঐনা থাজৈ‍। তাইবং মপুনা মখোয়দা লৌশিং পীনবিগনি হায়না থাজজবগা লোয়ননা ইকায়খুম্নরবা রাস্ত্রপতীবু মহাক্কী ৱারোলগীদমক ঐনা থম্মোয়নুংদগী থাগৎচবা ফোঙদোকচরি‍। অদুগা সভাপতী জী, ঐঙোন্দা মতম পীবিবগীদমক, হায়নিংবা ৱাফমশিং হায়ননবা মতম শাংদোকপিবগীদমক অদোমবু থাগৎচরি‍। অদুগা কনামত্তগাঈ লাউ-খোংবনা অচুম্বগী খোঞ্জেলবু নমথবা ঙম্লোই, অচুম্ববু অসিগুম্বা থৌওংনা নমথবা ঙম্লোই, অদুগা অরান্বদি য়ুম্ফম লৈতে‍।

ইকায়খুম্নরবা সভাপতী জী,

অদুগা ৱা ঙাংনবা খুদোংচাবা পীবিদ্রিবা মীওইশিং অসিদি মখোয়গী পার্তীগী থৌদাংনি, তুংদা মখোয়না মখোয়গী এম.পি.শিংগীদমক খনবিগনি হায়না ঐনা থাজবা থমজরি‍।

ইকায়খুম্নরবা সভাপতী জী,

ঐনা হাউস অসিবুসু থাগৎচরি, ঙসিদি ঐ য়াম্না নুংঙাইখ্রে, ঐ য়াম্না নুংঙাই‍। ঐ ঙসি অচুম্বগী মতিক উবা ফংলে‍। মরমসিনা সভাপতী জী, ঐনা অদোমগী থম্মোয়নুংদগী থাগৎচবা ফোঙদোকচরি‍।

অদোম্বু হন্না হন্না থাগৎচরি!

দিসক্লেমর – মসি ওথোরাইজ তৌরবা পার্লিয়ামেন্ত রেকোর্দকা চাংদম্নরগা শীজিন্নগদবা পার্লিয়ামেন্ততা পীখিবা প্রধান মন্ত্রীগী ৱারোলগী চাউরাকপা ত্রান্সক্রিপ্তনি‍।

***