কেন্দ্রগী গৃহ অমসুং কোওপরেসন মন্ত্রী, শ্রী অমিত শাহনা ঙসি নই দিল্লীদা নেস্নেল দিজাজতর রেস্পোন্স ফোর্স (এন.দি.আর.এফ.)কী অনিশুবা মাউন্তেনিয়রিং এক্সপেদিসন ‘বিজয়’না ফীত 21,625 ৱাংবা মনিরাং চীংদোল মায় পাক্না লোম্লবা মতুংদা হল্লকপদা তরাম্না ওকখ্রে।

এন.দি.আর.এফ.কী মীওইশিংনা ওপরেসন্দা শিজিন্নবা স্তেত-ওফ-দি-আর্ত খুৎলায় অমসুং তেক্নোলোজীশিং উৎলিবা দিজাজতর মেনেজমেন্ত ইকুইপমেন্ত এন্ড ফোতো একজিবিসন্দশু গৃহ মন্ত্রীনা চৎখি। ভারত অমসুং তর্কীদা থোকখিবা দিজাজতর কয়াদা শরুক য়ারুরবা তীম লীদরনা ৱারোল খরশু থমখি। ঈশিং ইচাউদগী কনবা, চিং নীংখায়বা, স্ত্রকচর তেকপা, মী থীবা অমসুং অউন্সি কনবা, কেমিকেল বাইওলোজিকেল রেদিওলোজিকেল ন্যুক্লিয়র রেস্পোন্স মেকানিজম (সি.বি.আর.এন.), চিংকারোয় কনবা, বোরৱেল রেস্ক্যু, সাইক্লোন রেস্পোন্সনচিংবা এন.দি.আর.এফ.না পায়খৎখিবা মখল কয়াগী তেংবাংদা গৃহ মন্ত্রীনা থৱাই য়াম্না চঙখি। এন.দি.আর.এফ.কী মীওইশিংনা খুৎলায়শিংবু হেন্না শিজিন্নবা নুংঙাইহন্নবগীদমক্তা শেমদোকপগী থৌওং কয়াশু মহাক্কী মফমদা উৎখি। কেন্দ্রগী হোম সেক্রেতরী অমসুং এন.দি.আর.এফ.কী দাইরেক্তর য়াওনা তোঙান-তোঙানবা মীথুংলেন কয়াশু ঙসিগী থৌরমদা শরুক য়াখি।

শ্রী অমিৎ শাহনা এন.দি.আর.এফ.কী জৱানশিংনা ফীত 21,625 ৱাংবা মনিরাং চিংদোলগী মতোন মায় পাক্না লোমখিবগীদমক্তা থাগৎপা ফোংদোকখি। নম্থবা য়াদবা থৌনাগা লোয়ননা ঐখোয়গী জৱানশিংনা মসিগুম্বা অৱাংবা অসিবু কাবগী ৱারেপ লৌরিবা অসিনা মখোয় মশা অমসুং ফোর্সকী মথৌ তৌবা ঙম্বগী মতিক হেনগৎহল্লে হায়না মহাক্না হায়খি। মসিগুম্বা লুরবা কেম্পেনশিংনা পান্দম ফংদবা য়াদে, মায় পাকপা অমসুং পান্দম ফংনবগীদমক্তা ৱাখলনা লাম্বা ঙমদবা শিংনবা কয়া মাইয়োক্নবা ঙম্বগী হৈনবী লৈহল্লিবনি হায়না মহাক্না হায়খি।

জৱান খরনা ঙসিদি মায় পাকপা অসি ফংলে, অদুবু তসেংবদি, মসিদি অপুনবা এন.দি.আর.এফ.কী মায় পাকপনি হায়না কেন্দ্রগী গৃহ মন্ত্রীনা হায়খি। জৱানশিং অসিনা মনিরাং চাইংদোলগী মতোল লোম্বখক নত্তে, মখোয়না অপুনবা ফোর্স অসিগী পুক্নিং থৌগৎলিবনি হায়না মহাক্না হায়খি। চিং কাবা হায়বসি স্কিল অমখক নত্তে মসিদি হিংবগী কলা অমা ওইবগা লোয়ননা কলা অসিবু মপুং ফানা হৈবতা নত্তনা পুন্সি চুপ্পগী মহৈ অমা তম্বগুম্বনি হায়না মহাক্না হায়খি। কেন্দ্রগী গৃহ মন্ত্রীনা মায় পাকপা অসিবু ফোর্স অসিগী মায় পাকপগী খুদম অমনি হায়রদুনা ওপরেসন বিজয়দা মায় পাকপা ফংখিবা মীওই 35 অমসুং এন.দি.আর.এফ.কী দাইরেক্তরবু থাগৎখি। জৱানশিং অসিনা ফীত 21,600 হেনবগী অৱাংবা মফমদা মচু অহুমগী ফিরাল পায়হনখিবা অদুমক অপুনবা ফোর্স অসিগী চাউরবা মায় পাকপা অমনি হায়না মখা তাখি। ঐখোয়না মায় পাকপগী খম থেংবা থাক য়ৌগে হায়রবদি ঐখোয়না পুন্সি চুপ্পগী ওইনা পান্দম অমগীদমক্তা লেপ্তনা হোৎনবা তাবনি, মদুগী মতুংদতা তসেংবা মায় পাকপা ফংগনি হায়না মহাক্না হায়খি।

ঐখোয়না দিজাজতর থোকপগী মতাংদা লৈরম্বা ৱাখল্লোন অসি তেংবাং পীবখক্তা ওইরম্মি, অদুবু, প্রধান মন্ত্রী শ্রী নরেন্দ্র মোদীগী লুচিং মখাদা হৌজিক্তি অশোক অপন অমত্তা নংহন্দবা হায়বা ৱাখল্লোন অমদা চঙশিল্লে হায়না শ্রী অমিত শাহনা হায়খি।

কেন্দ্রগী গৃহ অমসুং কোওপরেসন মন্ত্রীনা তুংগী মতমদা ক্লাইমেত চেঞ্জ, উন কিন্থবা, চিং নীংখায়বা, ঈশিং ইচাউ অমসুং নোংলৈ নুংশিৎনা থোকহনবা খুদোংথীবা কয়া মফম খুদিংদা হেনগৎলক্লগনি; পুম্নমক অসি নীংথিনা খঙদুনা ঐখোয়না বিজ্ঞানগী মতেং লৌদুনা অশোক অপন অমত্তা নংহন্দবা হায়বা থৌওং অসিগী মায়কৈদা খোঙফম চেৎনা চঙশিনগদবনি হায়না ফোংদোকখি। ঐখোয়না লাম্মৈ কন্না চাকপগুম্বা হীরম কয়াদা ঐখোয়গী ইফিসিএন্সী হেনগৎহন্নবা হোৎনদুনা মায় পাকপা পুরকফম থোক্লি হায়না মহাক্না হায়খি। লাম্মৈ চাকপা মতমদা মীওইবা অমগী পুন্সি কনবা হায়বসিনা ঐখোয়গী অমত্তা ঙাইরবা পান্দম ওইগদবা নত্তে, উমং করম্না কনগদগে হায়বগী মতাংদা মালেম পুম্বদা পাংথোক্লিবা এক্সপেরিমেন্তশিং পুরক্তুনা অমসুং মৈ মতৌ করম্না চাকহল্লোইদগে হায়বশু খঙবা তাবনি হায়না মহাক্না মখা তানা হায়খি। ক্লাউদবর্স্তনা মরম ওইরগা থোকহনবা ঈশিং ইচাউগা ঐখোয়না করম্না মাইয়োক্নগদগে হায়বগী মতাংদা ঐখোয়না নীংথিনা শেম শাদুনা লৈবগী মথৌ তারি হায়না শ্রী শাহনা হায়খি।

এন.দি.আর.এফ. চাউখৎহন্নবা তঙাই ফদবা বজেৎ, ত্রেনিং অমসুং ফোর্স অসিগী মফমদা মতমগা চুনবা রিসোর্স পীবগী মতাংদা মোদী সরকারনা থবক অমত্তা চিত্থহনখিদে হায়না শ্রী অমিত শাহনা হায়খি। দিজাজতর মেনেজমেন্তকী মতাংদা লৈবাক পুম্বগী ওইবা  খ্বাইদগী অহানবদা লৈগদবা ফোর্স অমা ঐখোয়না শেমফম থোকই হায়না মহাক্না হায়খি। প্রধান মন্ত্রী শ্রী নরেন্দ্র মোদী মশমকশু দিজাজতর মেনেজমেন্তকী মতাংদা য়াম্না মুন্না খল্লি অমসুং হীরম অসিদা ভারতনা ঙসি ফংলিবা মায় পাকপা অসিমক মসিগী মরমদগীনি হায়না শ্রী শাহনা হায়খি। ইং 2004 অমসুং 2014গী মরক্কী চহি 10গী মনুংসিদা এস.দি.আর.এফ. অমসুং এন.দি.আর.এফ.কীদমক্তা পুন্না লুপা করোর 66,000গী বজেৎ অসি দিজাজতর রীলিফকীদমক্তা থাদখিবনি অমসুং ইং 2014দগী 2024 ফাওবগী চহি তরাগী মনুং অসিদা বজেৎ অসি লুপা করোর লাক্ষ অনিদা হেনগৎখ্রে হায়না মহাক্না হায়খি। ভারত সরকারনা দিজাজতরগীদমক্তা মতৌ করম্না শেম শাদুনা লৈবগে হায়বসি থৌওং অসিমক্না তাক্লি হায়না মহাক্না মখা তাখি। দাইল 112, মৌসম, দামীনি, মেঘদুৎ ওইরো, মসিগুম্বা মোবাইল এপ্লিকেসন নত্ত্রগা আর্লী ৱার্নিং সীস্তেম ওইরো, মোদী সরকারনা এন.দি.আর.এফ.তা বিজ্ঞানগী ওইবা মখল খুদিংগী তেংবাং পীরি হায়না শ্রী শাহনা মখা তানা পাউদমখি।

এন.দি.আর.এফ.কী মীওই 16,000না চাদা 40গী চাংদা রিস্ক অমসুং হার্দশিপ এলাৱেন্স ফংলগনি, মসিমক মখোয়না মতম শাংবদগী হৌনা হায়দুনা লাক্লবনি। প্রধান মন্ত্রী শ্রী নরেন্দ্র মোদীগী লুচিং মখাদা মখোয়গী অপাম্বা অসি ঙরাং  পীনবা য়াখ্রে হায়না কেন্দ্রগী গৃহ মন্ত্রীনা হায়খি। সেন্ত্রেল আর্ম্দ পুলিস ফোর্স (সি.এ.পি.এফ.)না হৌজিক্তি লৈবাক অমাউং মালেমগী থাক্তা লৈবা শান্ন খোৎনবগী চাংয়েংনবা খুদিংদা ইন্দোর অমসুং আউতদোরগী ওইনা শরুক য়াবা য়ারগনি হায়না মোদী সরকারনা ৱারেপ লৌখ্রে হায়না শ্রী শাহনা হায়খি। থৌওং অসিগী মপুং ওইবা থৌরাং য়াৎপা লোইখ্রে অমসুং ভারত সরকারনা মসিবু থবক্তা ওন্থোক্নবা মোদেল অমশু য়াম্না থুনা শেম্লগনি হায়না মহাক্না হায়খ্রে। সরকার অসিনা সি.এ.পি.এফ.তা শান্ন খোৎনববু মশক খঙহন্দুনা মখোয়গী চৎনবী ওইহনবা অমসুং মসিদা তংদু লৈতানা পাংথোকপা ঙমহনবা হায়বসি পাম্মি হায়না মহাক্না হায়খি।

***