Ha ka World Sickle Cell Disease (SCD) Awareness Day ha ka 19 tarik u Jylliew, la pynlong ia ki prokram kiba bun ban ai jingtip shaphang kane ka jingpang bad ban tehlakam ia ka jingpur jong ka jingpang Sickle Cell.

Naduh ba la sdang ia ka National Sickle Cell Anaemia Elimination Mission (NSCAEM) ha une u snem ba la leit la dep upload 3,39,77,877 tylli ki jingtip shaphang ki screening ha ka rynsan haduh mynta bad ki jylla ki la dep sam haduh 1,12,01,612 tylli ki Sickle Cell Status ID card.

Ha ka Sickle Cell Day, la pynlong 44,751 tylli ki prokram hapoh ka NSCAEM ha kylleng ka ri ha 17 tylli ki jylla bad 343 tylli ki distrik kiba kham don jingma na kane ka jingpang. Kum shi bynta jong ki sienjam ba la shim ha kine ki prokram, la dep screen 6,15,806 ngut ki briew na ka bynta ka jingpang sickle cell bad la sam 2,59,193 tylli ki Sickle Cell ID card sha kito kiba la dep screen.

Kum ka jingban biang ia ka jingkut jingmut ka Sorkar Pdeng ban rat dyngkhong ia ka jingpang Sickle Cell, u Myntri Rangbah Duh, Narendra Modi u la ong ba ka Sorkar ka dang “trei ha ki bynta bapher bapher kum ka jingai jingmut, ka jingscreen ia baroh, ka jinglap dang kloi, bad ka jingai ia ka jingsumar kaba bha.” U la ong ba ka Sorkar ka pyndonkam ruh ia ka bor jong ka teknoloji ha kane ka kam.

U Myntri Sorkar Pdeng ba dei khmih ia ka tnat ka Koit ka Khiah, J P Nadda u la ban jur ba ia ka Sorkar la ialam lynti da ka jingngeit ha ka “Jingkyrmen lyngba ka jingiaid shaphrang: Ka jingkyntiew ia ka jingai jingsumar ia baroh na ka bynta ka jingpang Sickle Cell. U la ong ba ki sienjam jong ka Sorkar ki “Peit bniah ia ka jinglap dang kloi, jingpynthikna ia ka jingioh jingsumar, bad ka jingkyntiew ia ka jingbha jong ka jingsumar ia kito kiba don ia kane ka jingpang.”

Ki kam ai jingtip ba la sdang hynnin ka sngi kin bteng sa sha kine ki 15 sngi ban wan (19 tarik u Jylliew haduh 3 tarik u Naitung) ha baroh ki jaka ai jingsumar bad ruh ha ki 343 tylli ki distrik ha ki 17 tylli ki jylla ba kham don jingma na kane ka jingpang. Ka thong na ka bynta kine ki 15 sngi ban wan ka dei ban screen 10,00,000 ngut ki briew bad sam 3,00,000 tylli ki Sickle Cell Status ID card sha kito kiba la dep shah screen.

Ki prokram ai jingtip ba la pynlong da ka Subdivision Hospital, Maharajganj, Siwan ha Bihar ban pynkupor ia ki briew pyrshah ia ka jingpang Sickle Cell Disease.

Ki prokram ha ki distrik kin kynthup ia ka jingiasyllok ia kiba bun ki nongpang bad ka jingpynlong ia ki jingai jingtip ba iar. Ha ryngkat kane, yn pynkhlain ia ki sienjam ban iada na kane ka jingpang da kaba ai ia ki jingsumar bad ka jingbuddien ia ka koit ka khiah jong ki nongpang.

Ka jingkyrshan ia ka tnat Tribal Affairs ha ki kam ai jingtip ka dei kawei na ki thong ba kongsan jong kine ki prokram.

Kine harum ki long ki prokram ba la pynlong ha ki jylla ban pynurlong ia ki thong:

Madhya Pradesh: U Vice President ka India ha ryngkat u Lat, Myntri Rangbah bad u Symbud Myntri Rangbah jong ka Madhya Pradesh ki la wan iashim bynta ha ka prokram ba nyngkong ha Dindori distrik ha kaba la wan iashim bynta da 11,000 ngut ki briew.

Chhattisgarh: U Myntri Rangbah ka Chhattisgarh u la plie paidbah ia ka prokram ha ka Bhimrao Ambedkar Govt. Medical College ha Raipur distrik ha ryngkat bad u myntri ka thnat ka koit ka khiah bad u Myntri ki kam riewlum jong ka sorkar jylla.

U Myntri Rangbah ka jylla Chhattisgarh u la plie paidbah ia ka prokram World Sickle Cell Awareness Day ha Raipur

Karnataka: U myntri ka tnat ka koit ka khiah jong ka jylla Karnataka u la plie paidbah ia ki prokram World Sickle Cell Day ha Mysore distrik.

Jharkhand: U myntri ba dei khmih ia ka tnat ka koit ka khiah jong ka sorkar Jharkhand u la plie paidbah ia ki prokram World Sickle Cell Day ha Ranchi distrik.

Ka Screening Camp na ka bynta ka Sickle Cell Anaemia ba la pynlong ha Jharkhand

Ha kiwei kiwei ki jylla, ki myntri bad ki kynrem ki lyndan ki la wan iashim bynta ha ki prokram.

Ka prokram World Sickle Cell Awareness Day ba la pynlong ha Gujarat

Ka Health Camp na ka bynta ka Sickle Cell Anemia Screening ba la pynlong ha Uttarakhand

Ka prokram ai jingtip shaphang ka jingpang Sickle Cell ba la pynlong na ka bynta ki nongtrei NREGS ha ki thain rilum jong ka Tirupathi Distrik, Tamil Nadu

Ka prokram ai jingtip shaphang ka jingpang Sickle Cell ba la pynlong ha Uttar Pradesh

Nongrim:

Ka jingpang Sickle cell disease (SCD) ka dei ka jingpang kaba iadei bad ka snam ha kaba don ki red blood cell kiba phylla kiba kylla sha ka dur crescent lane sickle. Kine ki jingkylla jong ki cell ki lah ban kylla sha ka jingset ha ka snam bad wanrah ia ki jingpang kiba bun. Kane ka jingpang ka ktah ia ki million ngut ki briew ha kylleng ka pyrthei hynrei ha India ka kham ktah ia ki riewlum.

Ban ialeh pyrshah ia kane ka jingpang ha India, la sdang ia ka National Sickle Cell Anemia Elimination Mission (NSCAEM) ha ka 1 tarik u Naitung 2023 ha Shahdol, Madhya Pradesh da u Myntri Rangbah Duh, Narendra Modi. Ka jingthmu jong kane ka mission ka dei ban pynbiang ia ki lad jingsumar ba jem dor, bap lie lad bad ba bha sha baroh ki nongpang Sickle Cell; pynduna ia ka jingdon kane ka jingpang ha ki briew, bad pynduh ia kane ka jingpang shuwa u 2047. Ka NSCAEM ka la ithuh 17 tylli ki jylla ba kham bun ka jingpang Sickle Cell kiba long ka Gujarat, Maharashtra, Rajasthan, Madhya Pradesh, Jharkhand, Chhattisgarh, West Bengal, Odisha, Tamil Nadu, Telangana, Andhra Pradesh, Karnataka, Assam, Uttar Pradesh, Kerala, Bihar bad Uttarakhand.

Ka mission ka peit bniah ia ka jingscreen bad jingai jingsumar ia ki briew kiba hapdeng 0-40 snem ka             rta. Ha ka jingthmu ban pynduna ka jingktah ka jingpang Sickle Cell ia ki briew bad ki longiing, kane ka mission ka ai ia ka jingkyrshan ba pura ha ryngkat ka jingiatreilang Baroh kawei ka Sorkar bad Baroh Kawei ka Imlang Shlang. Ban pynduh jait ia kane ka jingpang, ki sienjam ba la shim ki kynthup ia ka jingscreen ia baroh bad ka jinglap dang kloi ia ka jingpang, ka jingai jingtip bad ka jingiasyllonk shuwa ban shong kha, ka jingpeit bniah ia ka jingsumar ia kito kiba don ia kane ka jingpang.

Ia ki kam leh screening da ki jylla la peit bniah. La sdang ia ka dashboard bad rynsan jingpang sickle cell ban buh ia ka data da baroh ki jylla (https://sickle.nhm.gov.in/). Ha ryngkat ki rukom screen ba ju leh man ka por, la ai jingmynjur bad sakhi ka ICMR ia ki point-of-care test ba pyndonkam da ki jylla. Ka tnat Health and Family Welfare hapoh ka National Sickle Cell Anaemia Elimination Mission ka la pyllait ia ki mat treikam bad ki mar ai jinghikai ha ka: Operational Guideline for Prevention & Management of Sickle Cell Disease (https://sickle.nhm.gov.in/uploads/english/OperationalGuidelines.pdf), bad ki rukom ai jinghikai na ka bynta ka jingai jingsumar da ki Community Health Officer (CHO), Medical Officer, Multi-Purpose Worker (M/F)/ASHA bad ki Staff Nurse (https://sickle.nhm.gov.in/home/guidelines).

***