প্ৰধানমন্ত্ৰী শ্ৰী নৰেন্দ্ৰ মোদীয়ে ১৮ আৰু ১৯ জুন, ২০২৪ ত উত্তৰ প্ৰদেশ আৰু বিহাৰ ভ্ৰমণ কৰিব।

১৮ জুনৰ সন্ধিয়া প্ৰায় ৫ বজাত প্ৰধানমন্ত্ৰীয়ে উত্তৰ প্ৰদেশৰ বাৰাণসীত ‘প্ৰধানমন্ত্ৰী কিষাণ সন্মান সন্মিলন’ত অংশগ্ৰহণ কৰিব। সন্ধিয়া প্ৰায় ৭ বজাত প্ৰধানমন্ত্ৰীয়ে ‘দশশ্বমেধ ঘাট’ত ‘গংগা আৰতি’ প্ৰত্যক্ষ কৰিব। তেওঁ নিশা প্ৰায় ৮ বজাত ‘কাশী বিশ্বনাথ মন্দিৰ’ত পূজা সম্পাদন কৰাৰ লগতে মন্দিৰ দৰ্শন কৰিব।

১৯ জুনৰ পুৱা প্ৰায় ৯.৪৫ বজাত প্ৰধানমন্ত্ৰীয়ে নালন্দাৰ ধ্বংসাৱশেষ পৰিদৰ্শন কৰিব। পুৱা প্ৰায় ১০.৩০ বজাত প্ৰধানমন্ত্ৰীয়ে বিহাৰৰ ৰাজগীৰত নালন্দা বিশ্ববিদ্যালয়ৰ চৌহদ উদ্বোধন কৰিব। প্ৰধানমন্ত্ৰীয়ে  অনুষ্ঠানটোত সমবেত লোকসকলক উদ্দেশি ভাষণো কৰিব।

উত্তৰ প্ৰদেশত প্ৰধানমন্ত্ৰী

তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰাৰ পিছত প্ৰধানমন্ত্ৰী নৰেন্দ্ৰ মোদীয়ে কৃষক কল্যাণৰ প্ৰতি চৰকাৰৰ প্ৰতিশ্ৰুতিবদ্ধতা প্ৰতিফলিত কৰি ‘প্ৰধানমন্ত্ৰী কিষাণ নিধি’ৰ ১৭ সংখ্যক কিস্তি মুকলি কৰাৰ বাবে তেওঁৰ প্ৰথমটো ফাইলত স্বাক্ষৰ প্ৰদান কৰিছিল। এই প্ৰতিশ্ৰুতি ৰক্ষা কৰি প্ৰধানমন্ত্ৰীয়ে প্ৰত্যক্ষ লাভ স্থানান্তৰণ ব্যৱস্থাৰ জৰিয়তে ‘প্ৰধানমন্ত্ৰী কিষাণ সন্মান নিধি’ (পিএম-কিষাণ)ৰ অধীনত প্ৰায় ৯.২৬ কোটি হিতাধিকাৰী কৃষকক ২০,০০০ কোটি টকাৰো অধিক পৰিমাণৰ ১৭ সংখ্যক কিস্তিটো মুকলি কৰি দিব। এতিয়ালৈকে ১১ কোটিৰো অধিক যোগ্য কৃষক পৰিয়ালে ‘পিএম-কিছান’-ৰ অধীনত ৩.০৪ লাখ কোটি টকাৰো অধিক ধন লাভ কৰিছে।

অনুষ্ঠানটোত প্ৰধানমন্ত্ৰীয়ে আত্ম-সহায়ক গোট (এছএইচজি)ৰ ৩০,০০০ ৰো অধিক মহিলাক ‘কৃষি সখী’ হিচাপে প্ৰমাণপত্ৰ প্ৰদান কৰিব।

‘কৃষি সখী কনভাৰ্জেঞ্চ প্ৰগ্ৰাম’ (কেএছচিপি)ৰ লক্ষ্য হৈছে ‘কৃষি সখী’ হিচাপে গ্ৰাম্য মহিলা সৱলীকৰণৰ জৰিয়তে গ্ৰাম্য ভাৰতৰ পৰিৱৰ্তন সাধন কৰা, ‘কৃষি সখী’সকলক ‘পেৰা-এক্সটেনশ্যন শ্ৰমিক’ হিচাপে প্ৰশিক্ষণ আৰু প্ৰমাণপত্ৰ প্ৰদান কৰা। এই প্ৰমাণপত্ৰ পাঠ্যক্ৰমটো "লাখপতি দিদি" কাৰ্যসূচীৰ উদ্দেশ্যৰ সৈতেও সংগতি ৰাখি সম্পাদনৰ ব্যৱস্থা কৰা হৈছে।

বিহাৰত প্ৰধানমন্ত্ৰী

প্ৰধানমন্ত্ৰীয়ে বিহাৰৰ ৰাজগীৰত ‘নালন্দা বিশ্ববিদ্যালয়’ৰ নতুন চৌহদ উদ্বোধন কৰিব।

‘ভাৰত আৰু পূব এছিয়া শীৰ্ষ সন্মিলন’ (ইএএছ)ৰ অংশদাৰ দেশসমূহৰ মাজত এক যৌথ সহযোগিতাৰে বিশ্ববিদ্যালয়খনৰ ধাৰণা বিকশিত কৰা হৈছে। উদ্বোধনী অনুষ্ঠানত ১৭ খন দেশৰ ‘মিছন’সমূহৰ মুৰব্বীসকলকে ধৰি কেইবাগৰাকীও বিশিষ্ট ব্যক্তি উপস্থিত থাকিব।

চৌহদটোত দুটা বৌদ্ধিক খণ্ড আছে, য'ত ৪০টা শ্ৰেণীকোঠাত মুঠ আসন সামৰ্থ্য প্ৰায় ১৯০০। ইয়াত দুটা প্ৰেক্ষাগৃহ আছে য'ত প্ৰতিটোতে ৩০০খন আসনৰ সামৰ্থ্য আছে। ইয়াত প্ৰায় ৫৫০ গৰাকী শিক্ষাৰ্থী থাকিব পৰা এটা ছাত্ৰ ছাত্ৰাবাস আছে। চৌহদটোত ২০০০ গৰাকীলৈকে ব্যক্তি থাকিব পৰা আন্তৰ্জাতিক কেন্দ্ৰ, এম্ফিথিয়েটাৰ, ফেকাল্টি ক্লাব আৰু ক্ৰীড়া চৌহদকে ধৰি অন্যান্য বিভিন্ন সা-সুবিধাও সম্বলিত কৰা হৈছে।

চৌহদটোক এটা 'নেট জিৰো' সেউজ চৌহদ হিচাপে গঢ়ি তোলা হৈছে। এই চৌহদ সৌৰ প্ৰকল্প, ঘৰুৱা আৰু খোৱা পানী শোধন প্ৰকল্প, বৰ্জিত পানী পুনৰ ব্যৱহাৰৰ বাবে পানী পুনৰ্ব্যৱহাৰ প্ৰকল্প, ১০০ একৰ আয়তনৰ জলাশয়, আৰু আন বহুতো পৰিৱেশ অনুকূল সা-সুবিধাৰ সৈতে স্ব-বহনক্ষম।

বিশ্ববিদ্যালয়খনৰ ইতিহাসৰ সৈতে গভীৰ সম্পৰ্ক আছে। প্ৰায় ১৬০০ বছৰ আগতে স্থাপিত মূল ‘নালন্দা বিশ্ববিদ্যালয়’খন বিশ্বৰ প্ৰথম আৱাসিক বিশ্ববিদ্যালয়সমূহৰ ভিতৰত অন্যতম হিচাপে বিবেচিত হয়। ২০১৬ চনত নালন্দাৰ ধ্বংসাৱশেষক ‘ৰাষ্ট্ৰসংঘৰ ঐতিহ্যক্ষেত্ৰ’ হিচাপে ঘোষণা কৰা হৈছিল।

***

DS/SR/KB