مرکزی وزیر داخلہ اور تعاون کے وزیر جناب امت شاہ نے آج نئی دہلی میں شری امرناتھ جی یاترا کے لیے سیکورٹی اور  نقل و حرکت کے انتظامات کا جائزہ لینے کے لیے ایک اعلیٰ سطحی میٹنگ کی صدارت کی۔ میٹنگ میں قومی سلامتی کے مشیر جناب  اجیت ڈوبھال، جموں و کشمیر کے لیفٹیننٹ گورنر جناب منوج سنہا، مرکزی داخلہ سکریٹری، انٹیلی جنس بیورو کے ڈائریکٹر،اعلیٰ فوجی افسران بشمول  آرمی چیف جنرل منوج پانڈے اور چیف آف آرمی اسٹاف (ڈیزگنیٹ) لیفٹیننٹ جنرل اپیندر دویدی اور دیگر اعلیٰ افسران شامل تھے۔

جائزہ میٹنگ میں مرکزی وزیر داخلہ نے سیکورٹی ایجنسیوں کو چوکس رہنے اور امرناتھ یاترا کے لئے سیکورٹی اہلکاروں کی خاطر خواہ تعداد میں  تعیناتی کو یقینی بنانے کی ہدایت دی۔ انہوں نے مؤثر حفاظتی انتظامات کے لیے  ایجنسیوں کے ما بین بے نقص تال میل کو یقینی بنانے کے لئے کہا۔  جناب امت شاہ نے کہا کہ وزیر اعظم جناب نریندر مودی کی قیادت میں حکومت عقیدت مندوں کے لیے ایک آسان اور پریشانی سے پاک تجربہ کو یقینی بنانے اور شری امرناتھ یاترا کے انتظام میں ماحول دوست اقدامات کو اپنانے کے لیے پرعزم ہے۔ انہوں نے کہا کہ مودی سرکار کی ترجیح یہ یقینی بنانا ہے کہ شری امرناتھ یاترا کے عقیدت مند آسانی کے ساتھ مقدس درشن کر سکیں اور انہیں کسی مشکل کا سامنا نہ کرنا پڑے۔

مرکز ی زیر انتظام والے خطے جموں و کشمیر میں  امرناتھ یاترا کو یاتریوں  کے لیے محفوظ اور آرام دہ بنانے کے لیے اہم اقدامات کیے ہیں۔ پچھلے سال 4.5 لاکھ سے زیادہ عقیدت مندوں نے مقدس درشن کئے تھے۔ اس سال یاترا کا آغاز  29 جون کو ہوگا۔ جموں و کشمیر انتظامیہ نے یاترا کو آسان اور رکاوٹوں سے پاک بنانے کے لئے مناسب انتظامات کئے ہیں۔

***

ش ح۔ ع س۔ ک ا