ভারত সরকারগী হেল্থ অমসুং ফেমিলি ৱেলফিয়ারগী মখা লৈরিবা লৈবাক অসিগী মরুওইবা মহৈলোয়শঙ অমা ওইরিবা নেসনেল ইন্সতিতুৎ ওফ মেন্তেল হেল্থ এন্দ নিউরো সাইন্সেস(নিমহান্স)তা হকশেলগী থবক চাউখৎনবা থবক তৌবগীদমক ৱার্ল্দ হেল্থ ওর্গনাইজেসন(দব্লিউ.ঐচ.ও) না নেসনেল মন্দেলা এৱার্দ ২০২৪ পীরে।

২০১৯দা ৱার্ল্দ হেল্থ ওর্গনাইজেন্না লিংখৎখিবা হকশেলগী চাউখৎনবা থবক তৌবগী মনা নেলসন মন্দেলা এৱার্দ অসিনা হকশেলগী থবক চাউখৎনবা শিংথাবা য়ানা থবক তৌরিবা লনাই মীওইশিং, মহৈলোয়শঙশিং/ সরকারগী নত্ত্রগা এন.জি.ওশিং ইকায়খুম্নবা উৎলি।

মনা অসি পীরকপদা য়ুনিয়ন হেল্থ মিনিস্তর দোক্তর মনসুখ মন্দাবিয়ানা নিমহান্স থাগৎপা ফোঙদোকখ্রে। মহাক্না হায়খি মসি মীওই খুদিংমক অনা-লায়য়েংগী খুদোংচাবা ফংহন্নবা ভারতনা পায়খৎলিবা থবকশিং ইকায়খুম্নবা উৎপা অমনি।

ভারতনা পায়খৎলিবা থবকশিং অমসুং পুক্নিং-ৱাখলগী হকশেলগী লমদা মাংজিল থানবা থবক অসি ইকায়খুম্নবা উৎলকপদা য়ুনিয়ন হেল্থ সেক্রেতরি শ্রী অপুর্বা চন্দ্রনা মহাক্কী হরাওবা ফোঙদোকখি অমসুং মনা অসিগীদমক নিমহান্স থাগৎপা ফোঙদোকখি।

নিমহান্সকী দিরেক্তর দোক্তর প্রতিমা মুর্তিনা হায়খি ঐখোয়গী মহৈলোয়শঙ অসিগী খোঙচত্তা হকশেলগী থবক চাউখৎনবা থবক তৌবগীদমক লেমজনিঙাই ওইরবা নেলসন মন্দেলা মনা ফংলকপা অসি ঐখোয়গী য়াম্না চাউথোকচনিঙাইনি। মনা অসিগী ঐখোয়গী হৌখ্রবা অমসুং হৌজিক্কী মাইপাকপা খক ইকায়খুম্নবা উৎপা খক নত্তনা নিমহান্স হেক লিংখৎলকপদগী লমজিংদুনা লাক্লবা চৎনবীশিং অমসুং পান্দম অদু মশক খঙবনি। ঐখোয়গী সেবা তৌরিবা মীওইশিংগী পুন্সিদা মশক থোকপা অহোংবা অমা পুরক্নবা অমসুং পুক্নিং-ৱাখলগী হকশেলগী ফিবম চাউখৎহন্নবা ঐখোয়গী পান্দম মখা তানা চৎথনবা মনা অসিনা ঐখোয়গী ফিরেপ অমুক্কা হেন্না চেৎশিনহল্লে।

মনা পুক্নিং-ৱাখলগী হকশেলগী ফিবম ফনা থম্নবা নিমহান্সনা কৎথোকখিবা অমসুং শিংথাবা য়ানা পাংথোকখিবা থবকশিংগী খুদম অমনি। নিমহান্সনা পুক্নিং-ৱাখলগী হকশেল অমসুং নিউরোসাইন্সকী লমদা মাংজিল থারি, থিজিনবা, তাকপী-তম্বীবা অমসুং অনা-লায়য়েংগী লমদা অনৌবা থবকশিং পায়খৎপদা লমজিংলি। তোঙান-তোঙানবা মীওই কাংলুপশিংগী দরকার ওইবশিং ফংহন্নবা ঙম্নবা নিমহান্সনা অৱাংবা থাক্কী পুক্নিং-ৱাখলগী হকশেলগী থৌরম কয়া হৌদোক্লি অমসুং থবক ওইনা পায়খৎলি। মসিনা মীয়ামগী মহৌশাগী অনা-লায়য়েংগী থবকশিংগা পুক্নিং-ৱাখলগী অনা-লায়য়েংগী থবকশিংগা পুনশিনহল্লি, খুন্নাইদা য়ুম্ফম ওইবা লাল্লোং কয়া পায়খৎলি অমসুং দিজিতেল হেল্থগী থবকশিং মাংজিল থানবা পায়খৎলিবা থবকশিং মালেম্না শক খঙলে।

ইন্সতিতুৎ অসিনা চহি ৫০ মপুংফারকপা অমসুং মসিগী মমাঙদা লৈরম্বা ওল ইন্দিয়া ইন্সতিতুৎ ওফ মেন্তেল হেল্থগী চহি ৭০শুরকপা থৌরমদা মনা অসি পীরকপনি। নিমহান্সকী মাইপাকপা অনি ওইনা, মনা অসি মহৈলোয়শঙ অসিগী ইনাকখুল্লবা পুক্কৈ অমসুং পুক্নিং-ৱাখলগী হকশেল অমসুং নিউরোসাইন্সকী লমদা লেপ্তনা অওনবা পুরক্লিবা অসি মশক তাকপনি।

ভারতনা হৌখিবা চহি খর অসিদা পুক্নিং-ৱাখলগী হকশেলগী লমদা মরুওইবা থবক কয়া পায়খৎলে। নেসনেল হেল্থ মিসিনগী মখাদা ঙসি লৈবাক শীনবা থুংবগী জিলা খুদিংমক্তা মেন্তেল হেল্থ য়ুনিতশিং মতেং পাংলে। ওক্তোবর ১০,২০২২ দা হৌদোকখিবা ভারতকী তেলি মেন্তেল হেল্থ হেপ্ললাইন, তেলি মনাস হন্দক কোল লাখ ১০ ফংদুনা অচৌবা মাইপাকপা অমা পুরক্লে।

থৌরম অদুদা য়ুনিয়ন হেল্থ মিনিস্ত্রিগী এদিসনেল সেক্রেতরি হেকালি জিমোমি অমসুং য়ুনিয়ন হেল্থ মিনিস্ত্রিগী অতোপ্পা সেনিয়ার ওফিসিএলশিং শরুক য়াখি।

****