ଆସନ୍ତାକାଲିଠାରୁ ଆରମ୍ଭ ହେବାକୁ ଥିବା ଦ୍ୱିତୀୟ ପର୍ଯ୍ୟାୟ ଲୋକସଭା ନିର୍ବାଚନ ପାଇଁ ନିର୍ବାଚନ ଆୟୋଗ ପ୍ରସ୍ତୁତି ଚୂଡ଼ାନ୍ତ କରିଛନ୍ତି । ମତଦାନ ଦିନ ପାଣିପାଗ ସ୍ୱାଭାବିକ ରହିବ ବୋଲି ପୂର୍ବାନୁମାନ କରାଯାଇଥିବାରୁ ଭୋଟରମାନେ ଆରାମରେ ଭୋଟ୍ ଦେଇପାରିବେ। ଭୋଟରଙ୍କ ସୁବିଧା ପାଇଁ ସମସ୍ତ ମତଦାନ କେନ୍ଦ୍ରରେ ଖରା ଓ ଗରମ ମୁକାବିଲା କରିବାର ସୁବିଧା ସମେତ ସମସ୍ତ ବ୍ୟାପକ ବ୍ୟବସ୍ଥା କରାଯାଇଛି।

୧୩ଟି ରାଜ୍ୟ/କେନ୍ଦ୍ରଶାସିତ ଅଞ୍ଚଳର ୮୮ଟି ଲୋକସଭା ଆସନପାଇଁ ମତଦାନ ହେବ। ସୂଚନାଯୋଗ୍ୟ, ବହୁଜନ ସମାଜ ପାର୍ଟିର ଜଣେ ପ୍ରାର୍ଥୀଙ୍କ ମୃତ୍ୟୁ ଯୋଗୁଁ ମଧ୍ୟପ୍ରଦେଶର ୨୯-ବେତୁଲ ଲୋକସଭା ଆସନ ପାଇଁ ତୃତୀୟ ପର୍ଯ୍ୟାୟରେ ମତଦାନ ସ୍ଥଗିତ ରଖାଯାଇଥିଲା। ଅବଶିଷ୍ଟ ୫ଟି ପର୍ଯ୍ୟାୟ ମତଦାନ ଜୁନ୍‌ ପହିଲା ପର୍ଯ୍ୟନ୍ତ ଚାଲିବ ଏବଂ ଜୁନ୍ ୪ତାରିଖରେ ଭୋଟ୍ ଗଣତି ହେବ। ଏପ୍ରିଲ ୧୯ ତାରିଖରେ ପ୍ରଥମ ପର୍ଯ୍ୟାୟର ୧୦୨ଟି ଆସନ ପାଇଁ ସୁରୁଖୁରୁରେ ଓ ଶାନ୍ତିପୂର୍ଣ୍ଣ ଢଙ୍ଗରେ ମତଦାନ ଶେଷ ହୋଇଥିଲା।

ମତଦାନ କେନ୍ଦ୍ରକୁ ଅଧିକ ସଂଖ୍ୟାରେ ଆସି ଦାୟିତ୍ୱ ଓ ଗର୍ବର ସହ ମତଦାନ କରିବାକୁ ନିର୍ବାଚନ ଆୟୋଗ ମତଦାତାଙ୍କୁ ଆହ୍ୱାନ ଦେଇଛନ୍ତି।

ଦ୍ୱିତୀୟ ପର୍ଯ୍ୟାୟ ତଥ୍ୟ

୨୦୨୪ ସାଧାରଣ ନିର୍ବାଚନର ଦ୍ୱିତୀୟ ପର୍ଯ୍ୟାୟ ଅର୍ଥାତ୍ ୨୬ ଏପ୍ରିଲ, ୨୦୨୪ରେ ୧୩ଟି ରାଜ୍ୟ/କେନ୍ଦ୍ରଶାସିତ ଅଞ୍ଚଳର ୮୮ଟି ସଂସଦୀୟ କ୍ଷେତ୍ର (ସାଧାରଣ- ୭୩; ଏସଟି- ୬; ଏସସି-୯) ପାଇଁ ମତଦାନ ହେବ। ସକାଳ ୭ଟାରୁ ମତଦାନ ଆରମ୍ଭ ହୋଇ ସନ୍ଧ୍ୟା ୬ଟାରେ ଶେଷ ହେବ (ନିର୍ବାଚନ ସମୟ ସଂସଦୀୟ କ୍ଷେତ୍ର ଅନୁଯାୟୀ ଭିନ୍ନ ହୋଇପାରେ)

ବିହାରର ବାଙ୍କା, ମାଧେପୁରା, ଖଗରିଆ ଓ ମୁଙ୍ଗେର ନିର୍ବାଚନ ମଣ୍ଡଳୀର ଅନେକ ମତଦାନ କେନ୍ଦ୍ରରେ ସନ୍ଧ୍ୟା ୬ଟା ପର୍ଯ୍ୟନ୍ତ ମତଦାନ ସମୟ ବୃଦ୍ଧି କରାଯାଇଛି। ଅଧିକ ବିବରଣୀ ପାଇଁ ନିମ୍ନ ଲିଙ୍କ ଦେଖନ୍ତୁ :

https://www.eci.gov.in/eci-backend/public/api/download?url=LMAhAK6sOPBp%2FNFF0iRfXbEB1EVSLT41NNLRjYNJJP1KivrUxbfqkDatmHy12e%2Fzye%2BFD1PRcKxhOuiYZ2Ra38yzz3o0TY4laMGELkYwTaffXNh1flPiunL2kQsXmpWxyKzGsKzKlbBW8rJeM%2FfYFA%3D%3D

୧.୬୭ ଲକ୍ଷ ମତଦାନ କେନ୍ଦ୍ରରେ ୧୫.୮୮ କୋଟିରୁ ଅଧିକ ଭୋଟରଙ୍କୁ ସ୍ୱାଗତ କରିବେ ୧୬ ଲକ୍ଷରୁ ଅଧିକ ମତଦାନ ଅଧିକାରୀ

ଭୋଟରଙ୍କ ମଧ୍ୟରେ ୮.୦୮ କୋଟି ପୁରୁଷ, ୭.୮ କୋଟି ମହିଳା ଓ ୫୯୨୯ ତୃତୀୟ ଲିଙ୍ଗୀ ଭୋଟର ରହିଛନ୍ତି।

ପ୍ରଥମ ଥର ପାଇଁ ୩୪.୮ ଲକ୍ଷ ଭୋଟର ମତଦାନ ପାଇଁ ପଞ୍ଜୀକୃତ ହୋଇଛନ୍ତି। ଏହାବ୍ୟତୀତ ୨୦ରୁ ୨୯ ବର୍ଷ ବୟସର ୩.୨୮କୋଟି ଯୁବ ଭୋଟର ଅଛନ୍ତି।

୧୨୦୨ ପ୍ରାର୍ଥୀ (ପୁରୁଷ - ୧୦୯୮; ମହିଳା-୧୦୨; ତୃତୀୟ ଲିଙ୍ଗୀ - ୦୨) ନିର୍ବାଚନ ମଇଦାନକୁ ଓହ୍ଲାଇଛନ୍ତି।

୮୫ ବର୍ଷରୁ ଅଧିକ ବୟସ୍କ ୧୪.୭୮ ଲକ୍ଷ ପଞ୍ଜୀକୃତ ମତଦାତା ଥିବା ବେଳେ ୧୦୦ ବର୍ଷରୁ ଅଧିକ ବୟସର ୪୨,୨୨୬ ଭୋଟର ଏବଂ ଦ୍ୱିତୀୟ ପର୍ଯ୍ୟାୟ ପାଇଁ ୧୪.୭ ଲକ୍ଷ ଦିବ୍ୟାଙ୍ଗ ଭୋଟର ଅଛନ୍ତି ଯେଉଁମାନଙ୍କୁ ଘରେ ବସି ଭୋଟ ଦେବାର ବିକଳ୍ପ ପ୍ରଦାନ କରାଯାଇଛି। ବିକଳ୍ପ ହୋମ୍ ଭୋଟିଂ ସୁବିଧାକୁ ପୂର୍ବରୁ ବହୁତ ପ୍ରଶଂସା ଏବଂ ପ୍ରତିକ୍ରିୟା ମିଳୁଛି ।

ମତଦାନ ଓ ସୁରକ୍ଷା କର୍ମୀଙ୍କୁ ଆଣିବା ପାଇଁ ୩ଟି ହେଲିକପ୍ଟର, ୪ଟି ସ୍ୱତନ୍ତ୍ର ଟ୍ରେନ୍ ଏବଂ ପ୍ରାୟ ୮୦ ହଜାର ଗାଡ଼ି ମୁତୟନ କରାଯାଇଛି।

୫୦ ପ୍ରତିଶତରୁ ଅଧିକ ମତଦାନ କେନ୍ଦ୍ରରେ ୱେବକାଷ୍ଟିଂ କରାଯିବା ସହ ସମସ୍ତ ମତଦାନ କେନ୍ଦ୍ରରେ ମାଇକ୍ରୋ ଅବଜର୍ଭର ବା ପର୍ଯ୍ୟବେକ୍ଷକ ମୁତୟନ କରାଯିବ। ୧ ଲକ୍ଷରୁ ଅଧିକ ମତଦାନ କେନ୍ଦ୍ରରେ ୱେବକାଷ୍ଟିଂ କରାଯାଉଛି।

୨୫୧ ଜଣ ପର୍ଯ୍ୟବେକ୍ଷକ (୮୯ ଜଣ ସାଧାରଣ ପର୍ଯ୍ୟବେକ୍ଷକ, ୫୩ ଜଣ ପୁଲିସ ପର୍ଯ୍ୟବେକ୍ଷକ, ୧୦୯ ଜଣ ବ୍ୟୟ ପର୍ଯ୍ୟବେକ୍ଷକ) ନିର୍ବାଚନର କିଛି ଦିନ ପୂର୍ବରୁ ନିଜ ନିଜ ନିର୍ବାଚନ ମଣ୍ଡଳୀରେ ପହଞ୍ଚି ସାରିଛନ୍ତି। ଅତ୍ୟନ୍ତ ସତର୍କତା ଅବଲମ୍ବନ କରିବା ପାଇଁ ସେମାନେ କମିଶନଙ୍କ ଆଖି ଓ କାନ ଭାବରେ କାର୍ଯ୍ୟ କରିବେ । ଏଥିସହିତ କେତେକ ରାଜ୍ୟରେ ସ୍ୱତନ୍ତ୍ର ପର୍ଯ୍ୟବେକ୍ଷକଙ୍କୁ ମୁତୟନ କରାଯାଇଛି।

ମତଦାତାଙ୍କ ଯେକୌଣସି ପ୍ରକାର ପ୍ରଲୋଭନକୁ କଡ଼ାକଡ଼ି ଓ ତ୍ୱରାନ୍ୱିତ ଭାବେ ମୁକାବିଲା କରିବା ପାଇଁ ମୋଟ ୪୫୫୩ଟି ଫ୍ଲାଇଂ ସ୍କ୍ୱାଡ୍, ୫୭୩୧ଟି ଷ୍ଟାଟିକ୍ ସର୍ଭିଲେନ୍ସ ଟିମ୍, ୧୪୬୨ଟି ଭିଡିଓ ସର୍ଭିଲେନ୍ସ ଟିମ୍ ଓ ୮୪୪ଟି ଭିଡିଓ ଭ୍ୟୁଇଂ ଟିମ୍ ୨୪ ଘଣ୍ଟିଆ ନଜର ରଖିଛନ୍ତି।

୧୨୩୭ଟି ଆନ୍ତଃରାଜ୍ୟ ଓ ୨୬୩ଟି ଅନ୍ତର୍ଜାତୀୟ ସୀମା ଚେକ୍ ପୋଷ୍ଟ ମଦ, ନିଶାଦ୍ରବ୍ୟ, ନଗଦ ଟଙ୍କା ଓ ମାଗଣା ସାମଗ୍ରୀର ବେଆଇନ ପ୍ରବାହ ଉପରେ କଡ଼ା ନଜର ରଖିଛନ୍ତି। ସମୁଦ୍ର ଓ ଆକାଶମାର୍ଗରେ କଡ଼ା ନଜର ରଖାଯାଇଛି।

ଅଧିକ ମତଦାନ ପାଇଁ ଭୋଟର ସଚେତନତା ଓ ସୁବିଧା ବ୍ୟବସ୍ଥାକୁ ଆହୁରି ବ୍ୟାପକ କରାଯାଇଛି।

ବୟସ୍କ ଓ ଭିନ୍ନକ୍ଷମଙ୍କ ସମେତ ପ୍ରତ୍ୟେକ ଭୋଟର ଯେପରି ସହଜରେ ମତଦାନ କରିପାରିବେ ସେଥିପାଇଁ ପାଣି, ସାମିଆନା, ଶୌଚାଳୟ, ରାମ୍ପ, ସ୍ୱେଚ୍ଛାସେବୀ, ହ୍ୱିଲଚେୟାର ଓ ବିଜୁଳି ଭଳି ସର୍ବନିମ୍ନ ସୁବିଧା ରହିଛି। ଗରମ ପାଣିପାଗର ମୁକାବିଲା ପାଇଁ ପଦକ୍ଷେପ ଉପରେ ବିଶେଷ ଧ୍ୟାନ ଦିଆଯାଇଛି।

ସ୍ଥାନୀୟ ବିଷୟବସ୍ତୁକୁ ନେଇ ୮୮ଟି ନିର୍ବାଚନ ମଣ୍ଡଳୀରେ ପ୍ରାୟ ୪୧୯୫ଟି ଆଦର୍ଶ ମତଦାନ କେନ୍ଦ୍ର ସ୍ଥାପନ କରାଯାଉଛି। ସୁରକ୍ଷା କର୍ମୀଙ୍କ ସମେତ ୪୧୦୦ରୁ ଅଧିକ ମତଦାନ କେନ୍ଦ୍ରକୁ ମହିଳାମାନେ ସମ୍ପୂର୍ଣ୍ଣ ଭାବେ ପରିଚାଳନା କରିବେ ଏବଂ ଭିନ୍ନକ୍ଷମ (ପିଡବ୍ଲ୍ୟୁଡି)ଙ୍କ ଦ୍ୱାରା ୬୪୦ରୁ ଅଧିକ ମତଦାନ କେନ୍ଦ୍ର ପରିଚାଳନା କରାଯିବ।

ବିହାର ଏବଂ କେରଳ ବ୍ୟତୀତ ଅନ୍ୟ ସମସ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳର ମତଦାନ କେନ୍ଦ୍ରରେ ପ୍ରତି ମତଦାନ କେନ୍ଦ୍ରରେ ହାରାହାରି ୧୦୦୦ରୁ କମ୍ ଭୋଟର ଅଛନ୍ତି। ବିହାରରେ ଏହା ୧୦୦୮ ଏବଂ କେରଳରେ ପ୍ରତି ମତଦାନ କେନ୍ଦ୍ରରେ ୧୧୦୨ ଭୋଟର ଅଛନ୍ତି।

ସମସ୍ତ ପଞ୍ଜୀକୃତ ଭୋଟରଙ୍କୁ ଭୋଟର ସୂଚନା ସ୍ଲିପ ବଣ୍ଟନ କରାଯାଇଛି। ଏହି ସ୍ଲିପ୍ ଗୁଡ଼ିକ ଏକ ସୁବିଧା ପଦକ୍ଷେପ ଭାବରେ କାର୍ଯ୍ୟ କରିବ ଏବଂ ନିର୍ବାଚନ କମିସନଙ୍କ ନିମନ୍ତ୍ରଣ ଭାବରେ ମଧ୍ୟ କାର୍ଯ୍ୟ କରିବ ଏବଂ ଭୋଟ୍ ଦେବାକୁ ମଧ୍ୟ ସୁବିଧା ଯୋଗାଇବ।

https://electoralsearch.eci.gov.in/ ଏହି ଲିଙ୍କ୍ ଜରିଆରେ ଭୋଟରମାନେ ସେମାନଙ୍କ ମତଦାନ କେନ୍ଦ୍ରର ବିବରଣୀ ଏବଂ ମତଦାନ ତାରିଖ ଯାଞ୍ଚ କରିପାରିବେ 

ମତଦାନ କେନ୍ଦ୍ରରେ ପରିଚୟ ଯାଞ୍ଚ ପାଇଁ ଆୟୋଗ ଭୋଟର ପରିଚୟ ପତ୍ର (ଇପିଆଇସି) ବ୍ୟତୀତ ଅନ୍ୟ ୧୨ଟି ବିକଳ୍ପ କାଗଜପତ୍ର ପ୍ରଦାନ କରିଛନ୍ତି। ଯଦି କୌଣସି ମତଦାତା ଭୋଟର ତାଲିକାରେ ପଞ୍ଜୀକୃତ ହୁଅନ୍ତି, ତେବେ ସେଥିମଧ୍ୟରୁ ଯେକୌଣସି କାଗଜପତ୍ର ଦେଖାଇ ମତଦାନ କରାଯାଇପାରିବ। ବିକଳ୍ପ ପରିଚୟ ଦସ୍ତାବିଜ ପାଇଁ ଇସିଆଇ ଆଦେଶକୁ ଦେଖନ୍ତୁ ।

https://www.eci.gov.in/eci-backend/public/api/download?url=LMAhAK6sOPBp%2FNFF0iRfXbEB1EVSLT41NNLRjYNJJP1KivrUxbfqkDatmHy12e%2FzBiU51zPFZI5qMtjV1qgjFsi8N4zYcCRaQ2199MM81QYarA39BJWGAJqpL2w0Jta9CSv%2B1yJkuMeCkTzY9fhBvw%3D%3D

******

P.S/Swadhin/PIB Bhubaneswar