নমস্কার!

সোসিএল জস্তিস মন্ত্রী, শ্রীমান বিরেন্দ্র কুমারজী, লৈবাক্কী মফম কয়াগা মরী লৈনবা সরকারগী তোঙান-তোঙানবা স্কিমশিংগী বেনেফিশরী, অমোৎ-অকায় শেংবগী শিনফমদা লৈরিবা ইচিল ইনাও, অতোপ্পা মীথুংলেন, ইবেম্মা অমসুং ইবুংঙোশিং, ঙসিগী থৌরমসিগা লৈবাক্কী চাউরাকপা জিলা ৪৭০গী মীওই লাক্ষ ৩না হকথেংননা মরী লৈনরি। ঐহাক্না মখোয়বুশু ইকায় খুম্নজরি।

মরুপশিং,

ঙসিদি মাইনোরিতী, অমসুং শোত্থরবা খুন্নাইগী য়াইফবগী মায়কৈদা লৈবাক্না অচৌবা থৌওং অমগী শাক্ষি ওইরি। শোত্থরবশিংগীদমক্তা মতৌ করম্না থবক পাংথোকপগে হায়বসি ঙসিগী থৌরমসিদা উবা ফংলে। ঙসিদি, শোত্থরবা খুন্নাইগা মরী লৈনবা বেনেফিশরী লাক্ষ ১গী একাউন্ততা লুপা করোর ৭২০গী শেনফম হকথেংননা হাপ্লে। হায়রিবা বেনেফিশরীশিং অসি জিলা ৫০০ হেনবদা লৈরি।

মফমসিদা বতন অমা নম্লগা লায়রবশিংগী একাউন্ততা শেল য়ৌবা হায়বসি মমাংগী সরকারনা খল্লমগদবা মান্দে। অদুবু, মোদী সরকারনা মসিগুম্বা থবক পাংথোক্লি। লায়রবশিংনা হক লৈনা ফংগদবা শেনফমশিং মখোয়গী একাউন্ততা য়ৌহল্লি। ঐহাক্না হৌজিক সুরজ পোর্তেলশু হৌদোক্লে। মসিগী মতেংদগী শোত্থরবা খুন্নাইগী মীওইশিংদা শেলগী তেংবাং হকথেংননা পীবা ঙম্লগনি। হায়বদি, ভারত সরকারগী অতোপ্পা স্কিমগুম্না অতোপ্পা স্কিম কয়াগী শেলশু অদোমগী একাউন্ততা হকথেংননা য়ৌরগনি। মরক্তা লৈবা মীওই, কম্মিসন পীবা নত্ত্রগা ৱানোম্বগী মথৌ তাররোই।

খুদোংচাদবা ফিভমদা থবক তৌবা ঐখোয়গী নালা অমসুং সেপ্তিক তেঙ্ক শেংবা মীওইশিংদা ঙসি পি.পি.আই. কিৎ অমসুং আয়ুশমান হেল্থ কার্দ পীরি। মখোয় অমসুং মখোয়গী ইমুংদা লুপা লাক্ষ ৫ ফাওবা লেম্না লাইয়েংবগী খুদোংচাবা পীরগনি। মসিগী কান্নরবা স্কিম অসিদি ঐখোয়গী সরকারনা চহি ১০দগী চলায়দুনা লাক্লিবা এস.সি.-এস.তি. অমসুং ও.বি.সি. অমদি অতোপ্পা শোত্থরবা কাঙলুপকী স্কিমশিংগী এক্সতেন্সন্নি। ঐহাক্না অদোম, লৈবাক্কী বেনেফিশরী খুদিংবু স্কিমশিং অসিগীদমক্তা থাগৎচরি।

মরুপশিং,

ঐহাক্না ঙৈহাক্কী মমাংদা বেনেফিশরী খরগা ৱারী শাবগী খুদোংচাবা ফংজখি। সরকারগী স্কিমশিংনা মাইনোরিতী, শোত্থবা অমসুং চাউখৎপা ৱাৎপা খুন্নাইদা মতৌ করম্না য়ৌরি, মখোয়গী পুন্সিদা মতৌ করম্না অহোংবা লাকহল্লি, মসিগুম্বা অহোংবনা মখোয়গা নুংঙাইবা ফাওহনবরা হায়বগী তাংদা ৱারী শাখি। মসিনা ঐহাকপু পুক্নিং নুংশিহল্লি। ঐহাকশু অদোমদগী তোঙানবা নত্তে, ঐহাক্না অদোমগী মফমদা ইশাগী ইমুং উরিবনি। মরম অদুনা, ওপোজিসনগী মীওইনা ঐহাকপু চৈবা, মোদীগী ইমুগ লৈতবনি হায়বা মতমদা ঐহাক্না অদোম হান্না নীংশিংই। অদোমগুম্বা ইচিল ইনাও লৈন-লৈনা ঐহাক্কী ইমুং লৈতে মতৌ করম্না মখোয়না হায়রিবনো। ঐহাক্কী ইফমদদি অদোমগুম্বা কয়াগী মওংদা মাইনোরিতী, শোত্থবা অমসুং লৈবাক মীয়াম করোর অমা লৈরি। অদোম্না “ঐখোয়দি মোদীগী ইমুং মনুংনি” হায়বদা ঐহাক্না অপেনবা ফাওরিবনি।

মরুপশিং,

ঐখোয়না ভারতপু ইং ২০৪৭ ফাওবদা চাউখৎপা লৈবাক ওইহনবগী ৱারেপ লৌখ্রে, পান্দম থমখ্রে। মতম কয়াদগী চাউখৎপগী মঙাল ফংদনা লাকপশিংবু চাউখৎহন্দনা ভারত চাউখৎপা ঙম্লোই। কংগ্রেস সরকারনা লৈবাক্কী শোত্থরবা কাঙলুপশিংগী চাউখৎ থৌরাংগী কান্নবা খঙখিদে। মখোয়না মিৎয়েং অমত্তা চঙখিদে। মখোয়গী মফমদা কংগ্রেসনা খুদোংচাবা অমত্তা পীবিখিদে। লৈবাক্কী মীওই করোর কয়াবু মশাগী মরাইবক্তা থাদোকপীখি। অৱাবা মরক্তা হিংবগী হৈনবী লৈবনা, মখোয়না সরকারগী মাইয়োক্তা ৱাকৎপগী ৱাখল্লোন ফাওবা লৈত্রে। ঐহাক্না মসিগুম্বা ৱাখল্লোন মাঙহন্দুনা অতোপ্পগী নাক্তা লৈবগুম্না, গ্যাস সিলিন্দর পীখি, বেঙ্ক একাউন্ত হাংদোকপীখি।

মরুপশিং,

কাঙলুপ অসিগী চারোন-শুরোন কয়াদি পুন্সিগী তঙাই ফদবা পোৎলম তানবতদা মপুন্সি লোইনখ্রবনি। ঐখোয়গী সরকারনা ইং ২০১৪দগী সবকা সাথ, সবকা বিকাসকী মিৎয়েংগা লোয়ননা থবক তৌবা হৌখি। থাজবা লৈত্রবা মীয়ামগী মফমদা ঐখোয়না য়ৌশিনখি অমসুং লৈবাক্কী চাউখৎ থৌরাংদা মখোয়বুশু শরুক য়াহনখি।

রাশন দুকান্দগী রাশন লৌবসি মমাংদা কয়া য়াম্না ৱারম্বগে হায়বা অমুক্তা নীংশিংবীয়ু। মসিগী খুদোংচাদবশিং কনানা মাইয়োক্নখি। ঐখোয়গী মাইনোরিতী, শোত্থরবা অমসুং ও.বি.সি.গী কাঙলুপকী মীওইশিংনা মসিগী অৱাবা মাইয়োক্নখি। ঐখোয়না ঙসি মীওই করোর ৮০দা লেম্না রাশন পীরি, মসিদা হায়রিবা কাঙলুপকী মীওইশিংনা খ্বাইদগী কান্নবা ফংনরি।

ঐখোয়না লুপা লাক্ষ ৫ ফাওবা লেম্না লাইয়েংবগী গেরেন্তী পীরি। মসিদা হয়রিবা কাঙলুপকী মীওইশিংনা খ্বাইদগী হেন্না কান্নবা ফংনরি। মমাংগী মতমদা মিৎয়েং চঙবীদবনা মরম ওইরগা মখোয়দি হৌজিক ফাওবা ঝোপ্রি, অমসুং অহাঙবদা লৈরিবনি।

মোদীনা লায়রবশিংগী পক্কা য়ুম শাবীরে, অমাংশঙ শাবীরে। করম্বা ইমুংগী ইচে-ইচল, ইমাশিংনা মপান্দা অমাঙবা তৌবগী তঙাই ফদবা লৈনবগে? হায়রিবা কাঙলুপকী মীওইশিং। ঙসিদি মখোয়গী নাক্তা ইজৎখর লৈরে, অমাংশঙ লৈরে। হান্না লৈরমদবা গ্যাস স্তোব, সিলিন্দর হৌজিক মখোয়গী মফমদা মোদীনা লেম্না ফংহল্লে।

কোইচৎ চত্তুনা লৈবা মীয়াম কাঙলুপকী য়াইফ য়ূম্বালগী স্কিম কয়াশু ঐখোয়গী সরকারনা শেম্লি। নমস্তে স্কিমগী খুত্থাংদগী অমোৎ অকায় শেংবা ইচিল ইনাওশিংগী পুন্সি মহিং নুংঙাইহল্লি। অরেম অখাক খুল্লগা চাবগী থৌওং লৈহন্দনবা অমসুং মসিগুম্বা মীওইশিংদা শেলগী তেংবাং পীবগী স্কিম ঐখোয়গী সরকারনা হৌদোক্লে। হৌজিক ফাওবদা চাউরাক্না মীওই লিশিং ৬০দা হায়রিবা খুদোংচাবা অসি ফংহনখ্রে।

মরুপশিং,

ঐখোয়গী সরকারনা এস.সি.-এস.তি., ও.বি.সি. কাঙলুপকী মীওইশিংনা মাঙজিল থানা থোক্লকহন্নবা হোৎনরি। লুপ কয়াদগী মখোয়না ফংবা তেংবাংগী চাংশু ঐখোয়না হৌখিবা চহি ১০দা শরুক অনি ওইহনখ্রে। মখোয়গী য়াইফ য়ূম্বালগীদমক্তা ঐখোয়গী সরকারনা হন্দক্কী চহিদা চাউরাক্না কুপা করোর ১গা লিশিং ৬০ কাইথখি। মমাংগী সরকারগী মতমদা, লুপা করোর কয়াগী ৱাথোক্কী মতাংদা তাবা ফংনরম্মি, অদুবু হৌজিক ঐখোয়না মসিগুম্বা শেনফম অসি লৈবাক্কী চাউখৎ থৌরাংদা শিজিন্নরি।

এস.সি.-এস.তি., ও.বি.সি. কাঙলুপকী মহৈরোইশিংনা ফংবা স্কোলার্শিপকী শেনফম ঐখোয়না হেনগৎহনখ্রে। মেদিকেল সীত্তা ও.বি.সি.গী কোতাবু ঐখোয়না চাদা ২৭ ওইহল্লে। এন.ই.ই.তি. পরিক্ষাদা ও.বি.সি. মহৈরোইনা থাবগী লম্বী য়াৎলে। মীরম লৈবাক্তা চত্তুনা মাস্তর নত্ত্রগা পি.ঐচ.দি. তৌনীংবা হায়রিবা মহৈরোইশিংগী তেংবাং ওইনবা ঐখোয়না নেস্নেল ওভর্সীজ স্কোলার্শিপকী তেংবাং পীখি।

সাইন্সকা মরী লৈনবা সবজেক্তশিংদা পি.ঐচ.দি. তৌনীংবা মহৈরোই মশিং হেনগৎহন্নবা ঐখোয়না নেস্নেল স্কোলার্শিপকী শেনফম হেনগৎহনখি। ঐখোয়গী হোৎনজমন্দগী নেস্নেল কম্মিসন ওফ বেকৱার্দ ক্লাসনা সংবিধানগী থাক ফংবা অসিদশু ঐহাক্না নুংঙাইবা ফাওই। বাবাসাহেব অম্বেদকরগা মরী লৈনবা তীর্থ মঙা শেমগৎপগী থৌদাং ফংজবা অসি ঐহাক্কী লাইবক ফবনি খঞ্জৈ।

মরুপশিং,

শোত্থবা কাঙলুপকী নহাশিংদা থবক পীবা অমসুং মশানা মশাবু থবক পীজবা ঙমহন্নবা ঐখোয়গী সরকারনা অকনবা মিৎয়েং চঙলি। ঐখোয়গী সরকারনা মুদ্রা য়োজনাগী মখাদা লাইরবশিংদা চাউরাক্না করোর ৩০গী তেংবাং পীখ্রে। তেংবাং অসি ফংবা অয়াম্বা মীওইদি এস.সি., এস.তি. অমসুং ও.বি.সি.গী মীওইশিংনি। স্তেন্দঅপ ইন্দিয়া স্কিম্না মখোয়গী মরক্তা ওন্তোপ্রিনর ওইবগী ইথিল হাপখি। কাঙলুপশিং অসিনা ভেঞ্চর কেপিতেল ফন্দ স্কিমগী মেত্নগশু ফংলে। ঐখোয়গী সরকারনা মাইনোরিতীশিংগী মরক্তা ওন্তোপ্রিনর থোক্লকহন্নবা হায়দুনা অম্বেদকর সোসিএল ইন্নোভেসন অমসুং ইনক্যুবেসন মিস্ন হৌদোকখি।

মরুপশিং,

ঐখোয়গী সরকারনা লাইরবশিংগী য়াইফ য়ুম্বালগীদমক্তা হোৎনরিবা কয়া অসিদগী মাইনোরিতী, ত্রাইবেল, ও.বি.সি. নত্ত্রগা ঐখোয়গী মার্জিনেলাইজ ওইরবা শোত্থরবা মীওইশিংনা খ্বাইদগী হেনবা কান্নবা ফংলি। অদুবু মোদীনা মখোয়গী কান্নবা খরা তৌবদা, ইন্দি কোলিএসন কাঙবুনা য়াম্না নুংঙাইতবা ফাওরিবনি। মখোয়শিংবু চাউখৎহনবা হায়বসি কংগ্রেসনা পামদবা থৌওং ওইরিবনি।

অদোম্না স্কিম অমা হেক্তদা য়েংসি, অদোমগী অমাংশঙ শাবগী স্কিম্বু মখোয়না করেম্নৈ। জন ধন য়োজনা অমসুং উজ্বালা য়োজনাদা অয়েৎপা পী। মখোয়গী সরকার পানবা রাজ্যশিংদা স্কিম অসি হৌদোক্তে। মাইনোরিতী অমসুং শোত্থবা কাঙলুপ্না চাউখৎলক্লবদি, মখোয়গী শাহগৈগী রাজনীতিগী চৎনবী মুৎখিগনি হায়না মখোয়না পাখৎলি।

মোদীনা গেরেন্তী পীরি, মথংগী চহি ৫তা শোত্থবা কাঙলুপশিং চাউখৎলগনি অমসুং মশাবু ইকায় খুম্নজবা পুন্সি মহিং অমা শোইদনা হিংগনি। অদোম্বু চাউখৎহন্দুনা ঐখোয়না বিকশিৎ ভারতকী মঙলান মঙফাওনহনগনি। অদোম্না মশিং য়াম্না মফমসিদা লাকপীবা অমসুং বিদিও কনফরেন্সকী খুত্থাংদা ঐহাক্না অদোমগা উন্নবা ফংজবা, মসিদগী হেনবা নুংঙাইবা ঐহাক্কী ওইনদি লৈররোই। ঐহাক্না পুম্নমকপু থাগৎচরি।

থাগৎচরি।

***