ପ୍ରଧାନମନ୍ତ୍ରୀ ମାର୍ଚ୍ଚ ୧୨ ରେ ଗୁଜରାଟ ଏବଂ ରାଜସ୍ଥାନ ଗସ୍ତ କରିବେ । ସକାଳ ପ୍ରାୟ ୯ଟା ୧୫ ସମୟରେ ପ୍ରଧାନମନ୍ତ୍ରୀ ଅହମ୍ମଦାବାଦ ଠାରେ ୧,୦୬,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ଉନ୍ନୟନମୂଳକ ପ୍ରକଳ୍ପକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ ଏବଂ ଭିତ୍ତିପ୍ରସ୍ଥର ସ୍ଥାପନ କରିବେ । ଏହା ପରେ , ପୂର୍ବାହ୍ନ ପ୍ରାୟ ୧୦ଟାରେ ପ୍ରଧାନମନ୍ତ୍ରୀ ସାବରମତୀ ଆଶ୍ରମ ପରିଦର୍ଶନ କରିବେ , ଯେଉଁଠାରେ ସେ କୋଚରବ ଆଶ୍ରମର ଉଦଘାଟନ କରିବେ ଏବଂ ଗାନ୍ଧୀ ଆଶ୍ରମ ସ୍ମାରକୀର ମାଷ୍ଟର ପ୍ଲାନର ଶୁଭାରମ୍ଭ କରିବେ । ଏହାପରେ ରାତି ପ୍ରାୟ ୧ଟା ୪୫ମିନିଟରେ ପ୍ରଧାନମନ୍ତ୍ରୀ ରାଜସ୍ଥାନର ପୋଖରାନ ଠାରେ ତ୍ରିସେବା ଲାଇଭ୍ ଫାୟାର ଏବଂ କୌଶଳ ଅଭ୍ୟାସ ଆକାରରେ ସ୍ୱଦେଶୀ ପ୍ରତିରକ୍ଷା ସାମର୍ଥ୍ୟର ସମନ୍ୱିତ ପ୍ରଦର୍ଶନ 'ଭାରତ ଶକ୍ତି'କୁ ଦେଖିବେ ।

ପୋଖରାନରେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ରାଜସ୍ଥାନର ପୋଖରାନ୍ ଠାରେ ତ୍ରିସେବା ଲାଇଭ୍ ଫାୟାର ଏବଂ କୌଶଳ ଅଭ୍ୟାସ ଆକାରରେ ସ୍ୱଦେଶୀ ପ୍ରତିରକ୍ଷା ସାମର୍ଥ୍ୟର ସମନ୍ୱିତ ପ୍ରଦର୍ଶନ ଦେଖିବେ ।

'ଭାରତ ଶକ୍ତି' ଅଭ୍ୟାସରେ ଦେଶର ଆତ୍ମନିର୍ଭରଶୀଳତା ଅଭିଯାନକୁ ଆଧାର କରି ବିଭିନ୍ନ ସ୍ୱଦେଶୀ ଅସ୍ତ୍ରଶସ୍ତ୍ର ବ୍ୟବସ୍ଥା ଏବଂ ପ୍ଲାଟଫର୍ମ ପ୍ରଦର୍ଶିତ ହେବ । ଏହା ସ୍ଥଳ, ଆକାଶ, ସମୁଦ୍ର, ସାଇବର ଏବଂ ମହାକାଶ କ୍ଷେତ୍ରରେ ବିପଦର ମୁକାବିଲା ପାଇଁ ଭାରତୀୟ ସଶସ୍ତ୍ର ବାହିନୀର ସମନ୍ୱିତ ପରିଚାଳନା କ୍ଷମତା ପ୍ରଦର୍ଶନ କରୁଥିବା ବାସ୍ତବବାଦୀ, ସମନ୍ୱିତ, ମଲ୍ଟି ଡୋମେନ୍ ଅପରେସନକୁ ଅନୁକରଣ କରିବ ।

ଏହି ଅଭ୍ୟାସରେ ଅଂଶଗ୍ରହଣ କରୁଥିବା ପ୍ରମୁଖ ଉପକରଣ ଏବଂ ଅସ୍ତ୍ରପ୍ରଣାଳୀ ମଧ୍ୟରେ ଟି-୯୦ (ଆଇଏମ୍‌) ଟ୍ୟାଙ୍କ, ଧନୁଷ ଏବଂ ସାରଙ୍ଗ ଗନ୍ ସିଷ୍ଟମ୍‌, ଆକାଶ ଅସ୍ତ୍ର ଶସ୍ତ୍ର ବ୍ୟବସ୍ଥା, ଲଜିଷ୍ଟିକ୍ ଡ୍ରୋନ୍‌, ରୋବୋଟିକ୍ ମ୍ୟୁଲ୍ସ, ଆଧୁନିକ ହାଲୁକା ହେଲିକପ୍ଟର (ଏଏଲ୍‌ଏଚ୍‌) ଏବଂ ମାନବବିହୀନ ଆକାଶ ଯାନର ଏକ ସାରଣୀ ଅନ୍ତର୍ଭୁକ୍ତ, ଯାହା ଅତ୍ୟାଧୁନିକ ସ୍ଥଳ ଯୁଦ୍ଧ ଏବଂ ଆକାଶମାର୍ଗରୁ ନିରୀକ୍ଷଣ କ୍ଷମତା ପ୍ରଦର୍ଶନ କରିଥାଏ ।

ଭାରତୀୟ ନୌସେନା ପକ୍ଷରୁ ନୌସେନାର ଜାହାଜ ନିରୋଧୀ କ୍ଷେପଣାସ୍ତ୍ର, ସ୍ୱୟଂଶାସିତ ମାଲ୍ ବହନକାରୀ ଆକାଶ ଯାନ ଏବଂ ବ୍ୟୟବହୁଳ ଆକାଶ ମାର୍ଗ ପ୍ରଦର୍ଶିତ କରାଯିବ, ଯେଉଁଥିରେ ସାମୁଦ୍ରିକ ଶକ୍ତି ଏବଂ ବୈଷୟିକ ଜ୍ଞାନକୌଶଳ ଉପରେ ଆଲୋକପାତ କରାଯିବ । ଭାରତୀୟ ବାୟୁସେନା ସ୍ୱଦେଶୀ ଜ୍ଞାନକୌଶଳରେ ନିର୍ମିତ ହାଲୁକା ଲଢୁଆ ବିମାନ ତେଜସ, ଲାଇଟ୍ ୟୁଟିଲିଟି ହେଲିକପ୍ଟର ଏବଂ ଆଧୁନିକ ହାଲୁକା  ହେଲିକପ୍ଟର ମୁତୟନ କରିବ, ଯାହା କି ଆକାଶ ମାର୍ଗରେ ଚଳାଚଳରେ ଶ୍ରେଷ୍ଠତା ଏବଂ ବହୁମୁଖୀତା ପ୍ରଦର୍ଶନ କରିବ ।

ଘରୋଇ ସମାଧାନ ସହିତ ସମସାମୟିକ ଏବଂ ଭବିଷ୍ୟତର ଆହ୍ୱାନର ମୁକାବିଲା ଏବଂ ସାମନା କରିବା ପାଇଁ ଭାରତର ପ୍ରସ୍ତୁତିର ଏକ ସ୍ପଷ୍ଟ ସଙ୍କେତ ସ୍ୱରୂପ, ଭାରତ ଶକ୍ତି ବିଶ୍ୱ ସ୍ତରରେ ଭାରତର ଘରୋଇ ପ୍ରତିରକ୍ଷା ସାମର୍ଥ୍ୟର ସ୍ଥିରତା, ଅଭିନବତା ଏବଂ ଶକ୍ତି ଉପରେ ଆଲୋକପାତ କରିଛି । ଏହି କାର୍ଯ୍ୟକ୍ରମ ଭାରତୀୟ ସଶସ୍ତ୍ର ବାହିନୀର ଶକ୍ତି ଏବଂ ପରିଚାଳନା ଦକ୍ଷତା ଏବଂ ସ୍ୱଦେଶୀ ପ୍ରତିରକ୍ଷା ଶିଳ୍ପର କୌଶଳ ଏବଂ ପ୍ରତିବଦ୍ଧତାକୁ ପ୍ରଦର୍ଶନ କରି ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରତା ଦିଗରେ ଦେଶର ଦୃଢ଼ ଅଗ୍ରଗତିର ଉଦାହରଣ ।

ଅହମ୍ମଦାବାଦରେ ପ୍ରଧାନମନ୍ତ୍ରୀ

ରେଳ ଭିତ୍ତିଭୂମି, ଯୋଗାଯୋଗ ଏବଂ ପେଟ୍ରୋକେମିକାଲ୍ସ କ୍ଷେତ୍ରକୁ ପ୍ରୋତ୍ସାହନ ଦେବା ପାଇଁ ପ୍ରଧାନମନ୍ତ୍ରୀ ଅହମ୍ମଦାବାଦରେ ଥିବା ଡିଏଫସିର ପରିଚାଳନା ନିୟନ୍ତ୍ରଣ କେନ୍ଦ୍ର ପରିଦର୍ଶନ କରି ୧,୦୬,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ରେଳ ଓ ପେଟ୍ରୋକେମିକାଲ୍ସ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ ।

ପ୍ରଧାନମନ୍ତ୍ରୀ ରେଳ କର୍ମଶାଳା, ଲୋକୋ ସେଡ୍‌, ପିଟ୍ ଲାଇନ୍‌ / କୋଚିଂ ଡିପୋ ; ଫାଲ୍ଟନ୍ - ବାରାମତୀ ନୂଆ ଲାଇନ୍ ; ଇଲେକ୍ଟ୍ରିକ୍ ଟ୍ରାକ୍ସନ୍ ସିଷ୍ଟମ୍ ଉନ୍ନୟନ କାର୍ଯ୍ୟ ପ୍ରକଳ୍ପର ଭିତ୍ତିପ୍ରସ୍ଥର ସ୍ଥାପନ କରିବେ ଏବଂ ପୂର୍ବ ଡିଏଫସିର ନ୍ୟୁ ଖୁର୍ଜାରୁ ସାହାନେୱାଲ (୪୦୧ ରୁଟ୍ କିଲୋମିଟର) ସେକ୍ସନ ଏବଂ ପଶ୍ଚିମ ଡିଏଫସିର ନ୍ୟୁ ମକରପୁରାରୁ ନ୍ୟୁ ଘୋଲୱାଡ ସେକ୍ସନ (୨୪୪ ରୁଟ୍ କିଲୋମିଟର) ମଧ୍ୟରେ ଉତ୍ସର୍ଗୀକୃତ ମାଲ ପରିବହନ କରିଡରର ଦୁଇଟି ନୂତନ ବିଭାଗ ; ଅହମ୍ମଦାବାଦସ୍ଥିତ ପଶ୍ଚିମ ଡିଏଫସିର ପରିଚାଳନା ନିୟନ୍ତ୍ରଣ କେନ୍ଦ୍ର (ଓସିସି)  କୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ ।

ଅହମ୍ମଦାବାଦ - ମୁମ୍ବାଇ ସେଣ୍ଟ୍ରାଲ, ସିକନ୍ଦରାବାଦ - ବିଶାଖାପାଟଣା, ମଇସୁରୁ – ଡିଆର୍ ଏମଜିଆର ସେଣ୍ଟ୍ରାଲ (ଚେନ୍ନାଇ), ପାଟନା - ଲକ୍ଷ୍ନୌ, ନ୍ୟୁ ଜଳପାଇଗୁଡି - ପାଟନା, ପୁରୀ - ବିଶାଖାପାଟଣା, ଲକ୍ଷ୍ନୌ - ଡେରାଡୁନ୍‌, କଲବୁର୍ଗି - ସାର୍ ଏମ୍ ବିଶ୍ୱେଶ୍ୱରୟା ଟର୍ମିନାଲ ବେଙ୍ଗାଲୁରୁ, ରାଞ୍ଚି- ବାରଣାସୀ, ଖଜୁରାହୋ - ଦିଲ୍ଲୀ (ନିଜାମୁଦ୍ଦିନ)କୁ ପ୍ରଧାନମନ୍ତ୍ରୀ ପତାକା ଦେଖାଇ ଶୁଭାରମ୍ଭ କରିବେ ।

ପ୍ରଧାନମନ୍ତ୍ରୀ ୪ଟି ବନ୍ଦେ ଭାରତ ଟ୍ରେନ୍‌ର  ସମ୍ପ୍ରସାରଣକୁ ମଧ୍ୟ ପତାକା ଦେଖାଇ ଶୁଭାରମ୍ଭ କରିବେ, ଯାହା ମଧ୍ୟରେ ରହିଛି  ଅହମ୍ମଦାବାଦ - ଜାମନଗର ବନ୍ଦେ ଭାରତକୁ ଦ୍ୱାରକା  ପର୍ଯ୍ୟନ୍ତ ବୃଦ୍ଧି , ଆଜମେର - ଦିଲ୍ଲୀ ସରାଇ ରୋହିଲ୍ଲା ବନ୍ଦେ ଭାରତକୁ ଚଣ୍ଡିଗଡ଼ ପର୍ଯ୍ୟନ୍ତ ବୃଦ୍ଧି କରାଯାଉଛି, ଗୋରଖପୁର - ଲକ୍ଷ୍ନୌ ବନ୍ଦେ ଭାରତକୁ ପ୍ରୟାଗରାଜ ଏବଂ ତିରୁବନନ୍ତପୁରମ ପର୍ଯ୍ୟନ୍ତ ବୃଦ୍ଧି କରାଯାଉଛି- କାସରଗୋଡ ବନ୍ଦେ ଭାରତକୁ ମାଙ୍ଗାଲୁରୁ ପର୍ଯ୍ୟନ୍ତ ବୃଦ୍ଧି କରାଯାଉଛି; ଏବଂ ଆସାନସୋଲ ଏବଂ ହଟିଆ ଏବଂ ତିରୁପତି ଏବଂ କୋଲ୍ଲାମ ଷ୍ଟେସନ ମଧ୍ୟରେ ଦୁଇଟି ନୂତନ ଯାତ୍ରୀବାହୀ ଟ୍ରେନ୍ ରହିଛି ।

ପ୍ରଧାନମନ୍ତ୍ରୀ ବିଭିନ୍ନ ସ୍ଥାନ- ନ୍ୟୁ ଖୁର୍ଜା ଜଙ୍କସନ୍‌, ସାହାନେୱାଲ, ନ୍ୟୁ ରେୱାରି, ନ୍ୟୁ କିଶନଗଡ଼, ନ୍ୟୁ ଘୋଲୱାଡ ଏବଂ ନ୍ୟୁ ମକରପୁରାରୁ ଉତ୍ସର୍ଗୀକୃତ ମାଲବାହୀ କରିଡରରେ ମାଲବାହୀ ଟ୍ରେନଗୁଡ଼ିକୁ ପତାକା ଦେଖାଇ ଶୁଭାରମ୍ଭ କରିବେ ।

ପ୍ରଧାନମନ୍ତ୍ରୀ ରେଳ ଷ୍ଟେସନରେ ୫୦ଟି ପ୍ରଧାନମନ୍ତ୍ରୀ ଭାରତୀୟ ଜନଔଷଧି କେନ୍ଦ୍ରକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହି ଜନ ଔଷଧି କେନ୍ଦ୍ରଗୁଡ଼ିକ ଲୋକଙ୍କୁ ସୁଲଭ ଏବଂ ଗୁଣାତ୍ମକ ଜେନେରିକ ଔଷଧ ପ୍ରଦାନ କରିବ ।

ପ୍ରଧାନମନ୍ତ୍ରୀ ୫୧ଟି ଗତି ଶକ୍ତି ମଲ୍ଟି ମୋଡାଲ କାର୍ଗୋ ଟର୍ମିନାଲକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହି ଟର୍ମିନାଲଗୁଡ଼ିକ ପରିବହନର ବିଭିନ୍ନ ମାଧ୍ୟମ ମଧ୍ୟରେ ମାଲ୍‌ର ନିରବଚ୍ଛିନ୍ନ ପରିବହନକୁ ପ୍ରୋତ୍ସାହିତ କରିବ ।

ପ୍ରଧାନମନ୍ତ୍ରୀ ୮୦ଟି ବିଭାଗରେ ୧୦୪୫ ରୁଟ୍ କିଲୋମିଟର ସ୍ୱୟଂଚାଳିତ ସିଗନାଲିଂକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହି ଉନ୍ନତିକରଣ ଦ୍ୱାରା ଟ୍ରେନ୍ ଚଳାଚଳର ନିରାପତ୍ତା ଏବଂ ଦକ୍ଷତା ବୃଦ୍ଧି ପାଇବ । ପ୍ରଧାନମନ୍ତ୍ରୀ ୨୬୪୬ ଟି ଷ୍ଟେସନରେ ରେଳ ଷ୍ଟେସନର ଡିଜିଟାଲ ନିୟନ୍ତ୍ରଣକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହା ଦ୍ୱାରା ଟ୍ରେନର ପରିଚାଳନା ଦକ୍ଷତା ଏବଂ ନିରାପତ୍ତାରେ ଉନ୍ନତି ଆସିବ ।

ପ୍ରଧାନମନ୍ତ୍ରୀ ୩୫ଟି ରେଳ କୋଚ୍ ରେଷ୍ଟୁରାଣ୍ଟକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ରେଳ କୋଚ୍ ରେଷ୍ଟୁରାଣ୍ଟର ଲକ୍ଷ୍ୟ ରେଳବାଇ ପାଇଁ ଅଣ ଭଡ଼ା ରାଜସ୍ୱ ସୃଷ୍ଟି କରିବା ସହିତ ଯାତ୍ରୀ ଏବଂ ଜନସାଧାରଣଙ୍କ ଆବଶ୍ୟକତା ପୂରଣ କରିବା ।

ପ୍ରଧାନମନ୍ତ୍ରୀ ୧୫୦୦ରୁ ଅଧିକ ଗୋଟିଏ ଷ୍ଟେସନ ୱାନ୍ ପ୍ରଡକ୍ଟ ଷ୍ଟଲକୁ ଦେଶବ୍ୟାପୀ ସମର୍ପିତ କରିବେ । ଏହି ଷ୍ଟଲଗୁଡ଼ିକ ସ୍ଥାନୀୟ ଉତ୍ପାଦକୁ ପ୍ରୋତ୍ସାହିତ କରିବା ସହ ସ୍ଥାନୀୟ କାରିଗରମାଦଙ୍କ ପାଇଁ  ଏବଂ ବ୍ୟବସାୟ ନିମନ୍ତେ ରୋଜଗାର ସୃଷ୍ଟି କରିବ ।

ପ୍ରଧାନମନ୍ତ୍ରୀ ୯୭୫ଟି ସ୍ଥାନରେ ସୌର ଶକ୍ତି ଚାଳିତ ଷ୍ଟେସନ / କୋଠାକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ଏହି ପଦକ୍ଷେପ ଭାରତର ନବୀକରଣୀୟ  ଶକ୍ତି ଲକ୍ଷ୍ୟ ପୂରଣ ଦିଗରେ ସହାୟକ ହେବ ଏବଂ ରେଳବାଇର କାର୍ବନ ଫୁଟପ୍ରିଣ୍ଟକୁ ହ୍ରାସ କରିବ ।

ପ୍ରଧାନମନ୍ତ୍ରୀ ଗୁଜରାଟର ଦହେଜ ଠାରେ ୨୦,୬୦୦ କୋଟି ଟଙ୍କାରୁ ଅଧିକ ମୂଲ୍ୟର ପେଟ୍ରୋନେଟ୍ ଏଲଏନଜିର ପେଟ୍ରୋକେମିକାଲ୍ସ କମ୍ପେ୍ଲକ୍ସର ଭିତ୍ତିପ୍ରସ୍ତର ସ୍ଥାପନ କରିବେ । ବର୍ତ୍ତମାନର ଏଲ୍‌ଏନ୍‌ଜି ରିଗ୍ୟାସିଫିକେସନ୍ ଟର୍ମିନାଲ ନିକଟରେ ପେଟ୍ରୋକେମିକାଲ୍ସ କମ୍ପେ୍ଲକ୍ସ ସ୍ଥାପନ ଫଳରେ ପ୍ରକଳ୍ପର କ୍ୟାପେକ୍ସ ଏବଂ ଓପେକ୍ସ ଖର୍ଚ୍ଚରେ ଯଥେଷ୍ଟ ସଞ୍ଚୟ ହେବ ।

ଏହି ପ୍ରକଳ୍ପ କାର୍ଯ୍ୟନ୍ୱୟନ ରୁ ନିଷ୍ପାଦନ ପର୍ଯ୍ୟାୟ ମଧ୍ୟରେ ୫୦ ହଜାର ଲୋକଙ୍କୁ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ମିଳିବା ସହ କାର୍ଯ୍ୟକ୍ଷମ ପର୍ଯ୍ୟାୟରେ ୨୦ ହଜାରରୁ ଅଧିକ ଲୋକଙ୍କୁ ନିଯୁକ୍ତି ସୁଯୋଗ ମିଳିବା ସହ ଏହି ଅଞ୍ଚଳରେ ବ୍ୟାପକ ସାମାଜିକ - ଅର୍ଥନୈତିକ ଲାଭ ହେବାର ସମ୍ଭାବନା ରହିଛି ।

ପ୍ରଧାନମନ୍ତ୍ରୀ ମଧ୍ୟ ଦୁଇ ରାଜ୍ୟରେ ଏକତା ମଲ୍‌ର ଭିତ୍ତିପ୍ରସ୍ଥର ସ୍ଥାପନ କରିବେ । ଗୁଜରାଟ ଓ ମହାରାଷ୍ଟ୍ରରେ ପ୍ରାୟ ୪୦୦ କୋଟି ଟଙ୍କାର ସମ୍ପତ୍ତି ରହିଛି ।

ଏକତା ମଲ୍ ଭାରତୀୟ ହସ୍ତତନ୍ତ, ହସ୍ତକଳା, ପାରମ୍ପରିକ ଉତ୍ପାଦ ଏବଂ ଓଡିଓପି ଉତ୍ପାଦର ସମୃଦ୍ଧ ଏବଂ ବିବିଧ ଐତିହ୍ୟକୁ ପାଳନ ଏବଂ ସମର୍ଥନ କରେ । ଏକତା ମଲ୍ ହେଉଛି ଭାରତର ଏକତା ଏବଂ ବିବିଧତାର ପ୍ରତୀକ ଏବଂ ଆମର ପାରମ୍ପରିକ ଦକ୍ଷତା ଏବଂ କ୍ଷେତ୍ରର ବିକାଶ ଏବଂ ସଶକ୍ତିକରଣ ପାଇଁ ଏକ ଉତ୍‌ପ୍ରେରକ ।

ନୂତନ ବିଦ୍ୟୁତିକରଣ ବିଭାଗ ଗୁଡ଼ିକର ଲୋକାର୍ପଣ, ଟ୍ରାକ୍‌ର ଦୋହରୀକରଣ / ମଲ୍ଟି ଟ୍ରାକିଂ, ରେଳ ସାମଗ୍ରୀ ସେଡ୍‌, କର୍ମଶାଳା, ଲୋକୋ ସେଡ୍‌, ପିଟ୍ ଲାଇନ୍ / କୋଚିଂ ଡିପୋ ଆଦି ବିଭିନ୍ନ ପ୍ରକଳ୍ପକୁ ପ୍ରଧାନମନ୍ତ୍ରୀ ଏହି କାର୍ଯ୍ୟକ୍ରମରେ ଉତ୍ସର୍ଗ କରିବେ । ଏହି ପ୍ରକଳ୍ପଗୁଡ଼ିକ ଏକ ଆଧୁନିକ ଏବଂ ସୁଦୃଢ଼ ରେଳ ନେଟୱାର୍କ ନିର୍ମାଣ ପାଇଁ ସରକାରଙ୍କ ପ୍ରତିବଦ୍ଧତାର ପ୍ରମାଣ । ଏହି ନିବେଶ କେବଳ ଯୋଗାଯୋଗରେ ଉନ୍ନତି ଆଣିବ ନାହିଁ ବରଂ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ ଏବଂ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ ।

ସାବରମତୀରେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ପୁନଃବିକଶିତ କୋଚରବ ଆଶ୍ରମକୁ ଉଦଘାଟନ କରିବେ । ୧୯୧୫ ମସିହାରେ ଦକ୍ଷିଣ ଆଫ୍ରିକାରୁ ଭାରତ ଆସିବା ପରେ ମହାତ୍ମା ଗାନ୍ଧିଙ୍କ ଦ୍ୱାରା ସ୍ଥାପିତ ଏହା ପ୍ରଥମ ଆଶ୍ରମ ଥିଲା । ଗୁଜରାଟ ବିଦ୍ୟାପୀଠ ଦ୍ୱାରା ଏହାକୁ ଏକ ସ୍ମାରକୀ ଏବଂ ପର୍ଯ୍ୟଟନ ସ୍ଥଳ ଭାବରେ ସଂରକ୍ଷିତ ରଖାଯାଇଛି । ପ୍ରଧାନମନ୍ତ୍ରୀ ଗାନ୍ଧୀ ଆଶ୍ରମ ସ୍ମାରକୀର ମାଷ୍ଟର ପ୍ଲାନ ମଧ୍ୟ ଉନ୍ମୋଚନ କରିବେ ।

ମହାତ୍ମା ଗାନ୍ଧି ଯେଉଁ ଆଦର୍ଶକୁ ନେଇ ଦୃଢ଼ତା ପ୍ରଦର୍ଶନ କରିଥିଲେ, ତାହାକୁ ବଜାୟ ରଖିବା ଏବଂ ତାଙ୍କ ଆଦର୍ଶକୁ ପ୍ରଦର୍ଶିତ କରିବା ଏବଂ ତାଙ୍କୁ ଲୋକଙ୍କ ନିକଟତର କରାଇବା ପାଇଁ ପ୍ରଧାନମନ୍ତ୍ରୀଙ୍କ ନିରନ୍ତର ପ୍ରୟାସ ରହିଆସିଛି । ଏହି ପ୍ରୟାସରେ ଗାନ୍ଧି ଆଶ୍ରମ ସ୍ମାରକୀ ପ୍ରକଳ୍ପ ମହାତ୍ମା ଗାନ୍ଧୀଙ୍କ ଶିକ୍ଷା ଓ ଦର୍ଶନକୁ ବର୍ତ୍ତମାନ ଓ ଭବିଷ୍ୟତ ପିଢ଼ି ପାଇଁ ପୁନର୍ଜୀବିତ କରିବାରେ ସହାୟକ ହେବ । ଏହି ମାଷ୍ଟରପ୍ଲାନ୍ ଅଧୀନରେ ଆଶ୍ରମର ବର୍ତ୍ତମାନର ୫ ଏକର ଜମିକୁ ୫୫ ଏକରକୁ ବୃଦ୍ଧି କରାଯିବ । ୩୬ଟି ବିଦ୍ୟମାନ କୋଠାର ପୁନରୁଦ୍ଧାର କରାଯିବ, ସେଥିମଧ୍ୟରୁ ଗାନ୍ଧୀଙ୍କ ବାସଭବନ ଭାବେ କାର୍ଯ୍ୟ କରୁଥିବା 'ହୃଦୟ କୁଞ୍ଜ' ସମେତ ୨୦ଟି କୋଠାର ସଂରକ୍ଷଣ କରାଯିବ, ୧୩ଟିର ପୁନରୁଦ୍ଧାର କରାଯିବ ଏବଂ ୩ଟି ପୁନଃନିର୍ମାଣ କରାଯିବ ।

ଏହି ମାଷ୍ଟରପ୍ଲାନରେ ନୂତନ କୋଠା ଠାରୁ ଆରମ୍ଭ କରି ପ୍ରଶାସନିକ ସୁବିଧା, ଓରିଏଣ୍ଟେସନ ସେଣ୍ଟର ଭଳି ପର୍ଯ୍ୟଟକ ସୁବିଧା, ଚରଖା ବୁଣା ଉପରେ ଭାବବିନିମୟ କର୍ମଶାଳା, ହାତ ତିଆରି କାଗଜ, କପା ବୁଣା ଓ ଚମଡ଼ା କାମ ଏବଂ ଜନସେବା ସୁବିଧା ରହିଛି । ଏହି କୋଠା ଗୁଡ଼ିକରେ ଗାନ୍ଧିଜୀଙ୍କ ଜୀବନର ଦିଗ ତଥା ଆଶ୍ରମର ପରମ୍ପରାକୁ ପ୍ରଦର୍ଶିତ କରିବା ପାଇଁ ଆକର୍ଷଣୀୟ ପ୍ରଦର୍ଶନୀ ଏବଂ କାର୍ଯ୍ୟକଳାପ ରହିବ ।

ଗାନ୍ଧିଜୀଙ୍କ ବିଚାରର ସଂରକ୍ଷଣ, ସୁରକ୍ଷା ଏବଂ ପ୍ରସାର ପାଇଁ ଏକ ପାଠାଗାର ଏବଂ ଅଭିଲେଖାଗାର କୋଠା ନିର୍ମାଣ କରିବାକୁ ମଧ୍ୟ ମାଷ୍ଟରପ୍ଲାନ୍‌ରେ ପରିକଳ୍ପନା କରାଯାଇଛି । ଏହା ଦ୍ୱାରା ଆଶ୍ରମର ପାଠାଗାର ଓ ଅଭିଲେଖାଗାରକୁ ବ୍ୟବହାର କରିବା ପାଇଁ ବୁଲିବାକୁ ଆସିଥିବା ବିଦ୍ୱାନ ମାନଙ୍କ ପାଇଁ ସୁବିଧା ମଧ୍ୟ ସୃଷ୍ଟି ହେବ । ଏହି ପ୍ରକଳ୍ପ ଏକ ବ୍ୟାଖ୍ୟା କେନ୍ଦ୍ର ନିର୍ମାଣ କରିବାରେ ସକ୍ଷମ ହେବ ଯାହା ପର୍ଯ୍ୟଟକମାନଙ୍କୁ ବିଭିନ୍ନ ଆଶା ଏବଂ ଏକାଧିକ ଭାଷାରେ ମାର୍ଗଦର୍ଶନ କରିପାରିବ ଏବଂ ସେମାନଙ୍କ ଅନୁଭୂତିକୁ ସାଂସ୍କୃତିକ ଏବଂ ବୌଦ୍ଧିକ ଭାବରେ ଅଧିକ ଉତ୍ସାହଜନକ ଏବଂ ସମୃଦ୍ଧ କରିପାରିବ ।

ଏହି ସ୍ମାରକୀ ଭବିଷ୍ୟତ ପିଢ଼ି ପାଇଁ ପ୍ରେରଣା ଭାବରେ କାର୍ଯ୍ୟ କରିବ, ଗାନ୍ଧୀବାଦୀ ଚିନ୍ତାଧାରାକୁ ପ୍ରୋତ୍ସାହିତ କରିବ ଏବଂ ଟ୍ରଷ୍ଟିସିପ୍ ସିଦ୍ଧାନ୍ତ ଦ୍ୱାରା ଅବଗତ ପ୍ରକ୍ରିୟା ମାଧ୍ୟମରେ ଗାନ୍ଧୀବାଦୀ ମୂଲ୍ୟବୋଧର ସାରକୁ ଜୀବନ୍ତ କରିବ ।

***

SSP