ইকায়খুম্ননীংঙাই ওইরবা স্পীকরজী,

ঙসিগী থৌরমসিদি গনতন্ত্রগী অথোইবা চৎনবী অসিগী য়াম্না মরু ওইবা থৌরম্নি। তরাতরেৎশুবা লোক সভানা হৌখিবা চহি মঙাসিদা মশক নাইবা ৱারেপ কয়া লৌদুনা লৈবাক্কীদমক্তা সেবা কয়া তৌখি। শিংনবা কয়াগা মাইয়োক্নদুনা লৈবাকপু অচুম্বা মাইকৈদা পুনবা হোৎনখি। অদুনা ঙসিগী থৌরম অমসুং নুমিৎ অসিদি মদুগুম্বা চহি মঙাগী খোঙচৎ, লৈবাক্কীদমক্তা লেপখিবা ৱারেপ, অমসুং লৈবাক সেবাগী মদুগুম্বা ৱাখল্লোনবু ইকায়খুম্নবগী নুমিৎ অমসু ওইরি। মসিগী চহি মঙা অসিদা রিফোর্ম, পরফোর্ম অমসুং ত্রান্সফোর্মগী তাঙলবা থৌওং কয়া পাংথোকপা ঐখোয়না হকথেংননা উখি অমসুং মসিনা ঐখোয়দা অনৌবা ভারতকী থাজবা অমসু পীখি। লৈবাক অসিনা তরাতরেৎশুবা লোক সভাবু মতম পুম্বদা থৌজাল পীগনি হায়বগী ঐহাক্না থাজৈ। থৌওংশিং অসিদা হাউস্তা ফম্লিবা ইকায়খুম্ননীংঙাই ওইরবা মেম্বরশিংগী অচৌবা থৌদাং কয়া য়াওরি। অদুনা, ঐহাক্না কাঙলুপ অসিগী লুচিংবা অমসুং অদোম পুম্নমক্কী মরুপ অমা ওইনা, ইকায়খুম্ননীংঙাই ওইরবা এম.পি.শিংগী মফমদা ইকায়খুম্নবা উৎচরি।

ইকায়খুম্ননীংঙাই ওইরবা স্পীকরজী,

চহি মঙা অসিগী মনুংদা সুমিত্রাজীনা ফাগী জুগাই কয়া তৌখি। মহাক্কী মাইথোংদা মোমোন মিনোক্না থন্দুনা লৈখিবনি। ফিভম চাদবা মতমদসু অদোমগী মোমোন মিনোক্তি মাঙখিদবনি, লোয়ননা, হাউস অসিবুসু খল ঙাক্না অমসুং মীচঙ মীখায় নাইদবা মওংদা লুচিংদুনা লাকপীখিবনি। ঐহাক্না মসিগীদমক্তা অদোম্বু থাগৎচরি। অদোম্না খাঙবা কনবা অমসুং লৌশিং লৈনা হাউস অসিদা মাইকৈ তাকপীখিবনি।

ইকায়খুম্ননীংঙাই ওইরবা স্পীকরজী,

মসিগী চহি মঙাগী মনুংশিদা মীওইবা খুন্নাই অপুনবনা চহি চা অসিগী খ্বাইদগী চাউবা ইরাং অমা মাইয়োক্নখি। কনা হিংহৌগনি? কনাবু কনবা ঙমগনি? ৱাহং অসিনা মাইকৈ পুম্বা থনখিবনি। মতমশিং অদুদি, য়ুমদগী থোক্লক্তুনা হাউস্তা লাকপা ফাওবা অচৌবা শিংনবা অমা ওইখিবনি। অদুম ওইনমক, অনৌবা পথাপ শিনবগী মথৌ তাখি, মদুমক হাউসনা পাংথোকখি, লৈবাক চলায়বগী থৌওংদা অয়েৎপা লৈহনখিদে। হাউসকী কাঙলোনসু ঙাক্কনি অমসুং লৈবাক্কী তঙাই ফদবা থবকশিংগী খোঙজেলসু ঙাক্তবা য়াখিদে। পুম্নমক অসিবু নীংথিজনা শেন্নদুনা, মালেমগী খুদম অমসু ঐখোয়না মতমদুদা ওইবা ঙমখিবনি।

ইকায়খুম্ননীংঙাই ওইরবা স্পীকরজী,

মতমদুগী লৈবাক্কী তঙাই ফদবশিং খঙলবা মতুংদা, ইকায়খুম্ননীংঙাই ওইরবা এম.পি.শিংনা মখোয়গী সন্সদ নিধী লৌরোই হায়বগী ৱাহৌদোক অমা মেম্বরশিংনা হাউসকী মাঙদা থমখি, অদুগা মিৎকুপ অদুমক্তদা ৱাফম অসিগী য়ানবসু পুরকখি। মসিদা নত্তনা, মখোয়না পাংথোকপা থৌওংশিংনা লৈবাক মীয়ামদা অফবা পাউজেল পীবগা লোয়ননা খুন্নাইদা থাজবা পুরক্নবগীদমক্তা মখোয়না মশাগী থাগী তোলোবতগী চাদা 30 ককপগী ৱাফমসু থমখি। লৈবাক্কীদমক্তা মসিগুম্বা থৌওং অহানবা ওইনা পাংথোকপা মীওই মখোয়না ওইখি, মীয়াম্নসু খঙবীখি।

ইকায়খুম্ননীংঙাই ওইরবা স্পীকরজী,

এম.পি.শিং অসিনা লৈবাক্কী অৱাবা মতমদা কেন্তীন্দা অদু চাই, অদা চাই হায়না মীদিয়ানা মরাল শিবগী খুদোংচাবা অমসু মখোয়না অনিরক মাইয়োক্নখি। মদুদগী অদোম্না কেন্তীন্দা ফংবা পোৎলম খুদিংমক মীয়ামগা চপ মান্নবা মমলদা ফংহনগদবনি হায়বগী ৱারেপ লৌখিবনি। মসিদা লিলা য়েংবা মীওই খরনা নুংঙাইবা পোক্নখি। অদোমগী মসিগুম্বা খল মান্ননা খনবগী মতৌবুসু ঐহাক্না থাগৎচরি।

ইকায়খুম্ননীংঙাই ওইরবা স্পীকরজী,

ঐখোয়গী লোক সভাগী তরামঙা, তরাতরুক নত্ত্রগা তরামরিশুবা ওইরো, সন্সদকী অনৌবা ভবন অমা লৈফম থোক্লে হায়বসি অচুম্বা ৱাফম অমনি। মসিগী মতাংদা পুম্নমক্না অপুনবা ওইনা খন্নখি, অদুবু তং তাবা ৱারেপ লৌবদি ঙমখিদবনি। অদোম পুম্নমক্কী লুচিং পুরেলনা ৱারেপ অসি লৌখিবনি, থবকশিংগী খোঙজেল হাপখি, সরকারগা লোয়ননা মীখল কয়া ফমখি। মদুগী মহৈদি ঐখোয়না পার্লিয়ামেন্তকী অনৌবা বিলদিং অমা ওইনা মাঙদা উরে।

ইকায়খুম্ননীংঙাই ওইরবা স্পীকরজী,

সন্সদকী অনৌবা ভবন অসিদা ঐখোয়গী পুৱারীগী শরুক অমা ওইনা অমসুং নিংতম্বগী অহানবা মিৎকুপ্পু হিংহন্দুনা থম্নবা ঐখোয়গী লমজিং মৈরা ওইনা মফমসিদা সেঙ্গোল অমা শাবগী থবক অসি অদোমগী মিৎয়েং মখাদা পাংথোকখি। হৌজিক্তি মসিবু চহি খুদিংগী সেলেব্রেত তৌরগনি অমসুং থৌওং অসিনা ঐখোয়গী নিংতম্বগী অহানবা মিৎকুপকা হৌরক্লিবা চারোন-শুরোনশিংগা মতম পুম্বদা মরী লৈনহনগনি। নিংতম্বা ফংবগী অহানবা মিৎকুপ নীংশিংবা মতমদা মসিনা লৈবাকপু চাউখৎ থৌরাংগী মাইকৈদা তুংলমচত্তা পুবদা ঐখোয়গী মফমদা ইথিল পীগনি। মসিগুম্বা য়াইফরবা থবক অসি অদোম্না পাংথোকখি।

ইকায়খুম্ননীংঙাই ওইরবা স্পীকরজী,

হৌজিক্কী মতমসিদা জি-20 লুচিংবগী থৌদাং ঐখোয়না ফংখি, ভারতকী রাজ্য খুদিংনা মশাগী মপাঙ্গল অমসুং মতিকপু মালেমগী মাঙদা উৎখি। অদোমগী লুচিং মখাদা জি-20 পাংথোকখিবগুম্না, পি-20 কনফরেন্স অসিসু পাংথোকখি। মসিদা মালেমগী লৈবাক কয়াগী ৱাঙাংলোইশিং লাকখি, ভারতকী গনতন্ত্রগী মমা ওইবগী চৎনবীবু খুমাং চাউশিন্না পুখি, ঐখোয়না মসিগী গনতন্ত্রগী ৱাখল্লোনগা লোয়ননা মতম পুম্বদা তুংলমচত্তা খোঙথাদুনা লাকখি। পথাপ্তা অহোংবা কয়া লাকপদি য়াই, অদুবু, ভারতকী গনতন্ত্র চৎপগী ৱাখল্লোন্দি মতম পুম্বদা লেঙদনা লৈরি। অদোম্না মসিবু মালেমগী মাঙদা মরিক চুম্না উৎখি অমসুং অদোমগী লুচিং মখাদা ভারতনা গনতন্ত্রগী অফবা পথাপ অমা ওইবগী মায় পাকপা ফংখি।

ইকায়খুম্ননীংঙাই ওইরবা স্পীকরজী,

ঐহাক্না অদোম খ্বাই খিবীকপু ৱাফম অমগীদমক্তা অখন্ননা থাগৎচবা পামজৈ। হীরম অসিদা ঐখোয়গী ইকায়খুম্ননীংঙাই ওইরবা সন্সদকী মেম্বর অমসুং মীদিয়াগী মওইশিংগী পুক্নিং চঙদ্রি হায়না ঐনা খল্লি। ঐখোয়গী অরিবা পার্লিয়ামেন্ত, ঐখোয়না কনস্তিত্বেন্ত এসেমব্লী হায়নসু খঙবা মফমসিদা ঐখোয়না শক্নাইরবা মীওইশিংগী মীতম/ফোতোদা লৈ কত্তুনা ইকায়খুম্নবগী চৎনবী অমা লৈরম্মি। মিনিৎ 10গী থৌরমসিদা মশাগী ইকায় খুম্নবা উৎনরগা চৎনখিবা ঙাক্তনি। মখোয়গুম্বা শক্নাইরবা মীওইশিংগী মফমদা ইকায় খুম্নবা উৎপগী লৈবাক্কী ওইবা খোঙথাং অমা ঐখোয়না হৌদোক্লে। শক্নাইরবা মীওই অমগী মপোক কুমওন তাবা নুমিত্তা, অফবা ৱাঙাংলোইশিং, খ্বাইদগী ফজবা এসে ইবা অমসুং রাজ্য খুদিংগী অঙাং অনিনা দিল্লীদা লাক্তুনা লৈবাক্কী লুচিংবা অদুগী মফমদা ৱাফম কয়া থম্বগা লোয়ননা হৈকৎ-লৈকৎসু তম্মি। নুমিৎ চুপ্পা অমা মীওইদুগী মতাংদা ৱারী শান্নৈ। মসিগুম্বা থৌওং অসিবু অদোম্না হৌদোকপীদুনা লৈবাক্কী মহৈরোই কয়াগা অমত্তা ওইবগী খুদোংচাবা পীবিদুনা লাক্লি। মসিগুম্বা চৎনবী অসিদি অদোম্না পাংথোকপা হৌরম্বনি হায়না নীংশিংনহৌরগনি। লাক্কদৌরিবা মতমশিংদা মসিগুম্বা থৌরম অসিবু চাউথোকচবগা লোয়ননা মখা চত্থগনি হায়না ঐহাক্না খল্লি। মসিগীদমক্তা ঐহাক্না অদোম্বু অমুক্কা হন্না থাগৎচরি।

ইকায়খুম্ননীংঙাই ওইরবা স্পীকরজী,

সন্সদকী লাইব্রেরী অসিগী কান্নবা লৌফম থোকই। মসিবুসু অদোম্না মীচম মীয়ামদা শিজিন্নবা য়াহনখ্রে। লৌশিংগী মসিগুম্বা লন-থুম, চৎনবীগী পুৱারী কয়া অসিবু মীচম মীয়ামগীদমক্তা হাংদোকপীদুনা অদোম্না লৈবাক্কী মফমদা অচৌবা সেবা অমা হৌদোক্লিবা অসিগীদমক্তা ঐহাক্না অদোম্বু থাগৎচরি। পেপরলেস পার্লিয়ামেন্ত, দিজিতাইজেসন তৌবা, মতমগা চুনবা তেক্নোলোজীবু ঐখোয়গী পথাপকী মনুং চলহনখি। মসিদা মীওই খরনা অহানবদা য়ানিংলমদে, অদুবু কোন্নদি মসিগী হৈনবী লৈনরকখি। মফমসিদা ফমদুনা লৈবা মতমদা মীপুম খুদিংনা করিনো অমদি অদুম পাংথোক্তুনা লৈনবনি, মসিসু থবক অমনি। অদোম্না মতম চুপ্পদা চৎনগদবা পথাপ অমা শেম্বীরে। মসিগীদমক্তা ঐহাক্না তৌবীমল খঙবা উৎচরি।

ইকায়খুম্ননীংঙাই ওইরবা স্পীকরজী,

অথোইবা এম.পি. কয়াগী মথৌ নীংথিনা পাংথোকপা মতৌ অমসুং লৌশিং লৈদুনা পাংথোকখিবা থবক কয়ানা 17শুবা লোক সভা অসিগী প্রদক্তিবিতীবু চাউরাক্না চাদা 97 য়ৌহনখি। মসিদি চাউথোকচনীংঙাই ওইবা মায় পাকপা অমনি। ঐখোয়না 17শুবা লোক সভাগী অরোইবা মতমদা য়ৌরকপা, অদুগা 18শুবা লোক সভাগী মতমদা চঙশিল্লকপসিদা ঐখোয়গী থবক থৌরমশিংগী প্রদক্তিবিতীবু চাদা 100 ওইহনবা ঙমগনি হায়বগী ঐহাক্না থাজৈ। 17শুবা লোক সভাগী অহানবা সেসন্দা ঐখোয়না বিল 30 পাস তৌখি, মশিং অসিমক রেকোর্দ ওইরিবনি। লোয়ননা, ঐখোয়না অনৌবা বেঞ্চমার্ক অমসু থমখি। মায় পাকপা অসিগীদমক্তা ঐহাক্না পুম্নমকপু থাগৎচরি।

ইকায়খুম্ননীংঙাই ওইরবা স্পীকরজী,

লৈবাক্কী নিংতম্বগী চহি 75 মপুং ফাবগী নুংঙাইবা ফোংদোকপগী থৌরম কয়াদা হাউস অসিনা মরু ওইবা থৌদাং লৌখি। থৌরমশিং অসিবু লৈবাক্কী মফম খুদিংদা পুখি। লৈবাক্কী নিংতম্বগী চহি 75 মপুং ফাবগী নুংঙাইবা ফোংদোকপগী থৌরম অসিবু খুনুং কুহ্মৈ অমা ওইহনবদা থৌদাং য়াখিদবা এম.পি. অমত্তা লৈরম্লোই। মসিনা হায়বদি, লৈবাক পুম্বনা থৌরম অসিদা থৱাই য়াওনা শরুক য়ানখি অমসুং ঐখোয়গী এম.পি.শিংনা মরু ওইবা থৌদাং লৌখি হায়বনি। লৈবাক্কী সংবিধান চৎনবা হৌখিবগী চহি 75 মপুং ফাবগী থৌরমদসু হাউস অসিনা শরুক য়াবগী খুদোংচাবা ফংজখি। মখোয়গী থৌদাং খুদিংমক মফমসিদগী হৌখিবা ঙাক্তনি। মসিমক অচৌবা মায় পাকপা অমসুং লাইবক ফবগী পুঙফম অমনি।

ইকায়খুম্ননীংঙাই ওইরবা স্পীকরজী,

মতমসিগী মনুংদা গেম চেঞ্জর ওইরবা রিফোর্ম কয়া পাংথোকখি। পুম্নমক অসিদা 21শুবা চহি চাগী অনৌবা ভারত শেম্বগী মপাঙল লৈরবা ফম্বাক অমা ঐখোয়না উবা ফংলি। লৈবাক অসিনা অচৌবা অওনবা অমগী মাইকৈদা খোঙজেল য়াঙনা চঙশিল্লি অমসুং হাউস অসিনা মসিগীদমক্তা লমজিং লমতাক্লি। মসিমক ঐখোয়গী চারোন শুরোনশিংনা ঙাইদুনা লাক্লিবা থৌওংনি হায়না ঐহাক্না থমজনীংই। মসিগুম্বা থবক কয়া 17শুবা লোক সভাগী মতমদা লোইশিনখি, চারোন শুরোনশিংনা মতম শাংনা ঙাইরকপগী মতম লোইশিনহনখি। অদুবু, পুঙফম খুদিংদা সংবিধান্দা অহোবা অমদি উখি। মসিগুম্বা অপনবা অসিনা থৱাই নুংঙাইহন্দে। অদুবু হাউস অসিনা আর্তিকল 370 অমসুং আর্তিকল 310 মুত্থৎখি অমসুং মদুদগী সংবিধানগী তসেংবা মওং-মতৌ মীয়াম মাঙদা থোক্লকখি। ঐখোয়গী সংবিধান শেমখিবগী চহি 75 মপুং ফারকপা অসিদা মসিবু শেম্বীরম্বা অথোইবা মীওইশিংগী থৱাইনা থৌজাল পীরমগনি হায়না ঐহাক্না খল্লি। মখোয়না নীংজরম্বা থবক ঐখোয়না পাংথোকপা ঙম্লে। জম্মু অমসুং কশ্মিরগী মীয়াম্না সোসিএল জস্তিস ফংলমদে। অদুবু ঙসিদি, ঐখোয়না জম্মু অমসুং কশ্মিরগী ইচিল ইনাওশিংগী মফমদা তঙাই ফদ্রবা সোসিএল জস্তিস ফংহল্লে।

ইকায়খুম্ননীংঙাই ওইরবা স্পীকরজী,

তেরোরিজম্না ঐখোয়দা শিংনবা কয়া পীদুনা ঐখোয়গী থবাক্তা লেপ্তনা নোংমৈ কাপশিন্দুনা লাকখি। ইমা ভারতকী লৈহাওবু ঈখেংনা থলহনখি। লৈবাক্কী থৌনা ফরবা মীওই কয়াগী পুন্সিবু তেরোরিজম্না মাঙহনখি। ঐখোয়না তেরোরিজমগী মাইয়োক্তা অহকপা আইন কয়া শেমখি। হাউস অসিনা শেমখি। মসিগুবা শিংনবা কয়া মাইয়োক্নদুনা লাকপা মীওইশিংনা অনৌবা পাঙ্গল অমা ফংলে হায়না ঐহাক্না থাজৈ। মশাদা থাজবগী চাংসু হেনগৎলে। ভারতনা তেরোরিজমদগী মপুং ফানা নিংতম্লগনি হায়বগী ৱাখল্লোন অমসু লৈরে। মঙলান অসি শোইদনা মঙফাওনগনি। ঐখোয়না ব্রিতিশনা শেম্লম্বা আইন চৎনদুনা চহি 75 হিংলকখি। অদুবু, লাক্কদৌরিবা চারোন শুরোনশিংনা অনৌবা আইনগী মখাদা হিংলগনি, ৱাফম অসি অদোম্না ইশাগী চারোন শুরোনশিংদা চাউথোকচনা পাউদমগনি। মসিনি গনতন্ত্রগী অশেংনা পাঙ্গল।

ইকায়খুম্ননীংঙাই ওইরবা স্পীকরজী,

অনৌবা হাউস অসিগী তোঙানবা নীংথিজবা মতৌ লৈজরিবা মসিদা ঐহাক্না অদোম্বু থাগৎচরি। অদুবু অহেনবা মতৌ অমনা, ঐখোয়না অনৌবা হাউস অসিবু লৈবাক্কী ফন্দামেন্তেল ভেল্যুগী মপাঙ্গল হাপকদবা থৌওং অমগা লোয়ননা হৌদোকখি। থৌওং অদুদি নারী শক্তি বন্দন এক্ত অসিনি। হাউস অসিগী মতাংদা ৱারী শাবা খুদিংদা নারি শক্তি বন্দন এক্তকী মতাংদা শোইদনা পন্নগনি। অহানবা সেসন অদু য়াম্না তেনখি, অদুবু মরু ওইবদি য়াম্না লৈখি, অচৌবা ৱারেপ কয়া লৌখি। ঐখোয়গী ইমা, ইচে ইচল মশিং য়াম্বনা হাউস অসিদা ফম্লগনি খঙবা মতমদা হাউস অসিগী মগুন হেনগৎখি। লৈবাক্না মখোয়গীদমক্তা চাউথোকচবা ফাওগনি। ঐখোয়গী মুস্লিম ইচে-ইচলশিংনা তলাক অহুমগী শিংনবা অসিনা য়াম্না ৱাহন্দুনা লাকখি। 17শুবা লোক সভানা মখোয়বু তম্থীরবা চৎনবী অসিদগী মনিং তমহনখি অমসুং নুপীগী পাঙ্গলবু ইকায় খুম্নখি। ইকায়খুম্ননীংঙাই ওইরবা এম.পি.শিংগী মশাগী তোঙানবা ৱাখল্লোন লৈরম্বা য়াই, অদুবু ঐখোয়গী ইচানুপীশিংদা অচুম্বা ৱায়েল পীবগী মতাংদা মখোয়না অমত্তা ওইনা লেপখিবনি। চহি কয়াদগী মাইয়োক্নদুনা লাক্লবা ফত্তবা থৌওং কয়া ঐখোয়না ভারতকী নুপীশিংগীদমক্তা লোইশিনখি, মসিগীদমক্তা মখোয়না ঐখোয়বু থৌজানবীরি।

ইকায়খুম্ননীংঙাই ওইরবা স্পীকরজী,

মথংগী চহি 25 অসিদি ঐখোয়গী লৈবাক্কী য়াম্না মরু ওইবা মতম্নি। রাজনীতিসু মশাগী মফমদা মথৌ তৌজরি। রাজনীতি তৌবা মীওইশিংসু মশাগী থৌদাং পাংথোকচরি। অদুবু, লৈবাক্না করি পাম্বগে হায়বগী ৱারেপ লৌখ্রে, ঐখোয়না মসিগী মহৈসু চহি 25কী মতুংদা উরগনি। মহাত্মা গান্ধীনা ইং 1930দা দান্দীদা চৎখিবা, থুমগী সত্যগ্রহ লাউথোকখিবা, স্বদেশি ইহৌ হৌদোকখিবা মতমদা মসিনা করি ইহৌ পুরকপা ঙমগনি হায়বা খঙলমদে। লাউথোকপা মতমদুদা থবকশিং অসিগী স্কোপ য়াম্না পীক্না উরম্বসু য়াই। অদুবু ইং 1947, মদুগী চহি 25গী মতমদুনা ঐখোয় অসি নিংতম্না হিংগদবনি হায়বগী ইথিল পোকহনখি। মদুগুম্বা ইথিল অদুমক ঙসি ঐখোয়গী লৈবাক অসিদা অমুক লৈরকপগী মতৌ ঐহাক্না উরে। লৈরক খুল্লক অমসুং মফম অমদা হেক্তা লৈবা অঙাং ফাওবনা ঐখোয়দি ইং 2047 ফাওবদা চাউখৎপা ভারত্তা হিংলগনি হায়বগী ৱাফম ফোংদোক্নরি। অদুনা, মসিগী চহি 25 অসিদি ঐখোয়গীদমক্তা য়াম্না মরু ওইবা মতম্নি। চাউখৎপা ভারত অমা পামদবা মীওই অমত্তা লৈরোই। মীপুম খুদিংগী মঙলান লৈনৈ, থেংনা লৌবা ওইরবসু মশাগী ৱারেপ লৈনরে। ঐখোয়না অমত্তা ওইনা পুন্দুনা ঐখোয়গী পান্দম অসি শোইদনা ফংমিন্ননবা হোৎনগনি অমসুং শোইদনা ফংগনি হায়না ঐহাক্না থাজরি।

ইকায়খুম্ননীংঙাই ওইরবা স্পীকরজী,

হৌখিবা চহি 5 অসিনা নহাশিংগীদমক্তা পুৱারী ওইরবা আইন কয়া পুরকখ্রে। পথাপ মনুংদা নুং-পান ফাওনা উহন্দুনা নহাশিংগী অনৌবা খুদোংচাবা কয়া শেমখ্রে। পরিক্ষাগী পেপর লীক ওইবগী থৌওংনা ঐখোয়গী নহাশিংদা অৱাবা কয়া পীরম্মি। মখোয়না অশাওবা ফাওরিবা চৎনবী অসিদা অকনবা মিৎয়েং চঙনবা ঐখোয়গী ইকায়খুম্ননীংঙাই ওইরবা এম.পি.শিংনা খোঙফম চেৎখি। ৱাফম অসি মমুৎ তানা খন্নরবা তুংদা মশক থোকপা ৱারেপ অমা লৌখি।

ইকায়খুম্ননীংঙাই ওইরবা স্পীকরজী,

রিসর্চ য়াওদনা মীওইবা খুন্নাইনা চাউখৎপা ঙম্লোই হায়বসি অচুম্বনি। মতমগী মতুং ইন্না চৎপদা রিসর্চকী মরু য়াম্না ওই। মীওইবা খুন্নাইগী চহি লিশিং কয়াগী পুৱারীনা মতম খুদিংদা রিসর্চ পাংথোক্তুনা লাকখি হায়বগী খুদম ওইরি। লিগেল সীস্তেম অমা শেমদুনা রিসর্চপু চাউখৎহনবদা হাউস অসিনা অচৌবা থৌদাং লৌখি। 17শুবা লোক সভানা মীপুম খুদিংনা শীংথানরিবা নেস্নেল রিসর্চ ফাউন্দেসন শেম্বগী অয়াবা পীখি। ঐহাক্না লৈবাক্কী নহাগী পাঙ্গলদা অচেৎপা থাজবা থম্মি। অমসুং ঐহাক্না পনখ্রিবা পথাপ অসিনা মরম ওইরগা ঐখোয়না মালেমগী রিসর্চ হব অমা ওইবা ঙমগদৌরিবনি। ঐখোয়গী নহাশিংগী তেলেন্ত কয়া য়াম্না লৈবগে হায়ববু, ঙসিসু ভারতকী কম্পেনী কয়া অমদা ঐখোয়গী নহাশিংনা ইন্নোভেসন কয়া লেপ্তনা পাংথোক্লি। মসিমক্না ঐখোয়বু অচৌবা হব অমা ওইহনগনি। ঐহাক্না মসিদা য়াম্না চেৎনা থাজবা থম্লি।

ইকায়খুম্ননীংঙাই ওইরবা স্পীকরজী,

21শুবা চহি অসিদা ঐখোয়গী তঙাই ফদবশিংসু লেপ্তনা হোংলক্লি। ঐখোয়না ঙরাং ফাওবদা মিৎয়েং কয়া চঙলমদবা হীরম্না ঙসিদি মমল নাইদ্রবা পোৎলম ওইরে। খুদম ওইনা হায়রবদা, দেতা। দেতাগী পাঙ্গল অসি তসেংনা করিনো হায়না মালেম পুম্বদা নৈনরি। ঐখোয়না দেতা প্রোতেক্সন বিল পুরক্তুনা তুংগী চারোন শুরোনবু ঙাক শেনখ্রে। মসিনা মখোয়গী মফমদা খুৎলায় অমা পীরগনি, মসিগী য়ুম্ফম ওইদুনা মখোয়না মশাগী তুংগী মতম শেম্বা ঙম্লগনি। দিজিতেল পর্সনেল দেতা প্রোতেক্সন এক্ত অসিগী মাইকৈ অসিদা ঐখোয়গী 21শুবা চহি চাগী চারোন শুরোনশিংনা য়াম্না থৱাই য়াওনা লৌনরি। মালেমগী লৈবাকশিংনা মসিবু নৈনরি। মীপুম খুদিংনা অনৌবা পথাপ অসি হৈননা হোৎনরি। দেতা করম্না শিজিন্নগদগে হায়বগী কাঙলোন লৈরে। সনাগী খোনী, অনৌবা থাউনি খন্নরিবা দেতাবু ঙাক শেনবগী মপুং ফাবা থৌওং লৈরবা মতুংদা মসিগী তসেংবা পাঙ্গল খঙবা ঙমগনি। ভারত অসিদি তোঙানবা মতৌনা থনবনা মরম ওইরগা, হায়রিবা শক্তি অসি শিজিন্নবা ঙমগনি হায়না ঐহাক্না থাজৈ। ঐখোয়গী নাক্তা লৈরিবা ই-পাউ অমসুং ঐখোয়গা মরী লৈননা পুথোক্লিবা দেতাশিং অসি মালেমগী রিসর্চকী চাউরবা হীরম অমা ওইবা য়াই। খুদম ওইনা হায়রবদা, ঐখোয়গী রেলৱে পেসেঞ্জরশিংগী দেতা। ঐখোয়না মসিগী পাঙ্গল মশক খঙলে অমসুং মসিবু আইনগী মনুং চলহন্দুনা ঙাক শেনবগী থবকসু পায়খৎলে।

ইকায়খুম্ননীংঙাই ওইরবা স্পীকরজী,

ঈশিং, কংফাল অমসুং নোংথক্কী মতাংদদি ঐখোয়না মতম কয়াদগী খঙদুনা অমসুং নৈনদুনা লাক্লি। অদুবু হৌজিক্তি, সমুদ্র পাঙ্গল, স্পেসকী পাঙ্গল অমসুং সাইবরগী পাঙ্গল হায়বা অনৌবা তঙাই ফদবা কয়া লৈরক্লে। মালেম্না মসিগী মতাংদা মখল কয়াগী ৱাখল্লোন থম্নরবসু, ঐখোয়সু হীরমশিং অসিদি পাঙ্গল শিজিন্নদুনা য়েক্নবগী মাইয়োক্তগী ঙাকথোকচবা ঙমজরে। মসিগীদমক্তা, স্পেসকা মরী লৈনবা রিফোর্মগী মথৌ য়াম্না তাখি অমসুং মসিমক ঐখোয়না অশানবা মিৎয়েংগা লোয়ননা পাংথোকখি।

ইকায়খুম্ননীংঙাই ওইরবা স্পীকরজী,

লৈবাক অসিনা পায়খৎখিবা শেন্মিৎলোনগী রিফোর্মশিংদা 17শুবা লোক সভাগী ইকায়খুম্ননীংঙাই ওইরবা এম.পি.শিংগী অচৌবা থৌদাং য়াওখি। কান্নদবা কমপ্লাইএন্স কয়ানা ঐখোয়বু চহি কয়া চমম্নহন্দুনা লাকখি। মসিগুম্বা অশোইবা গবর্নেন্সকী থৌওংবু ঐখোয়না লৌথোকখি অমসুং মসিগীদমক্তা ঐহাক্না হাউস অসিবু থাগৎচরি। তৌবীমল খঙবা উৎচরি। মসিগুম্বা কমপ্লাইএন্সশিং অসিনা মীচম মীয়ামদা পোৎলুম ওইহনবনি। অদুগা ঐহাক্না লাল কিলাগী ফম্বাক্তসু মিনিমক গবর্নমেন্ত, মেক্সিমম গবর্নেন্সকী মতাংদা হায়খিবা লৈখ্রবনি। মীয়ামগী পুন্সিদগী সরকারনা য়াম্না থুনা থোকপা ঙম্লিবমখৈ, গনতন্ত্রগী পাঙ্গল হেনগৎকনি হায়না ঐহাক্না থম্মোইদগী হায়জরি। নোংমগী পুন্সিগী হীরমশিংদা সরকারনা করিগীদমক্তা য়েৎকদৌরিবনো? হোই, তঙাই ফদবশিংগীদমক্তা সরকারনা মতম পুম্বদা লৈগনি। অদুবু, সরকারনা মীচম মীয়ামগী পুন্সিদা অকায়বা পীরবদি গনতন্ত্রগী করি ৱাহন্থোক লৈগনি? সরকারগা তঙাই ফদবা মরী লৈনরগসু, মীচম মীয়ামগী নোংমগী পুন্সিদা সরকারনা য়ারিবমখৈ অয়েৎপা পীদবা মদুগুম্বা নীংথিরবা গনতন্ত্রগী পথাপ অদুবু খুমাং চাউশিলহনবা হায়বসি ঐখোয়গী পান্দম্নি। মসিমকসু ঐখোয়না পাংথোক্কনি।

ইকায়খুম্ননীংঙাই ওইরবা স্পীকরজী,

ঐখোয়না কম্পেনী এক্ত, লিমিতেদ লাইএবিলিতী পার্ত্নরশিপ এক্তনচিংবা কান্নদবা আইন হুম্ফু মুত্থৎখ্রে। লৈবাক অসিনা তুংলমচত্তা চঙশিনবা পাম্বনিনা ইজ ওফ দুইগ বিজনেস হায়বসিগী মরু ওইবা হেনগৎলক্লি। ঐখোয়না শিংনবা কয়াগী ৱারোইশিন পুরকপগী মথৌ তারি। করিশু নত্তবা মরমগীদমক্তা মমাংদদি কৈশুমশঙ ফাওবা চঙবা য়ারম্মি। ফেক্তরী অমগী তোইলেতশিংবু থা তরুক্কী মনুংদা অমুক্লক হ্বাইত ৱাশ তৌদ্রবদি কৈশুমশঙদা চঙবা ফাওবা য়ারম্মি। কম্পেনীগী মপু নত্ত্রগা অচৌবা মী ওইরবসু থাদোকপা নৎলমদে। খুন্নাই অমসুং লৈঙাক্তা মীয়ামগী থাজবা হেনগৎকদবা থবক কয়া 17শুবা লোক সভানা পাংথোকখি। ঐখোয়না থৌওং 180বু দিক্রিমিনেলাইজ তৌদুনা, ঐখোয়না মীয়ামগী মখুত্তা শক্তি শিন্নখি। মসিমক ঐখোয়গী হাউস অমসুং ইকায়খুম্ননীংঙাই ওইরবা এম.পি.শিংনা পাংথোকখিবনি। কোর্ত্তা অরেম্বদা মতম মাঙবা হন্থহনবা, আর্ব্রিত্রেসনগী মাইয়োক্তা মশক থোকপা থবক পাংথোকখিবা, পুম্নমক অসিদা ঐখোয়গী এম.পি.শিংগী অচৌবা থৌদাং য়াওখি। মমাংদা হন্না য়েংবীরমদবা মীওইশিংগী মফমদা মখোয়বু য়েংশিন্নবা সরকার লৈরি হায়বগী ৱাখল্লোন লৈহনখি। কোবিদকী মতমদা মখোয়গী মফমদা ইঞ্জেক্সন য়ৌহন্দুনা মখোয়গী পুন্সি কনখি। মীচম মীয়ামগী পুন্সিদা তেংবাং লৈতবদগী তৌফম খঙদনা লৈবগী থৌওং লৈহন্দনবা ঐখোয়না হোৎনখি।

ঐখোয়গী 17শুবা লোক সভাগী এম.পি.শিংনা ত্রান্সজেন্দরশিংগী ৱাখল্লোন খঙদুনা মখোয়বু অমুক হন্না তাথী তাওই তৌহন্দনবা কাঙলোন শেমখি। ত্রান্সজেন্দরশিংগীদমক্তা ভারতনা লৌখিবা ৱারেপ কয়াগী মতাংদা ঙসিদি মালেম্না খন্ন-নৈনরি। চাজেনবীগী চয়োল 26 ফাওবগী থবক্তগী ছুতী পীবগী ৱারেপ অসিদা মালেম্না অঙকপা ফাওনখি। মসিনা হায়বদি, চাউখৎ থৌরাং পুরক্কদবা ৱারেপ কয়া ঐখোয়না লৌখি হায়বনি। হৌজিক ফাওবগী ওইনা, ঐখোয়না ত্রান্সজেন্দরশিংদা শক্তাক পীরে, ঙসি ফাওবদা ত্রান্সজেন্দর লিশিং 16-17দা মশাগী পুন্সি মহিং হেন্না নুংঙাইহন্নবা শক্তাক চে পীখ্রে। মখোয়না মুদ্র য়োজনাগী মখাদগী লোন লৌদুনা মশাগী পুন্সি মহিং তানবা ঙমহনখ্রে। মশাবু ইকায়খুম্নজবা মওংদা পুন্সি হিংবগীদমক্তা ত্রান্সজেন্দরগী মফমদা ঐখোয়না পদ্ম এৱার্দ পীখ্রে। মখোয়না সরকারগী স্কিমগী কান্নবা ফংলিবমখৈ, মশাগী ইকায়খুম্না পুন্সি হিংবা ঙমজরে।

ইকায়খুম্ননীংঙাই ওইরবা স্পীকরজী,

কোবিদনা চহি অনিগা মখায়গী অৱাবা পোৎলুম কয়া থমখিবনা মরম ওইরগা ঐখোয়না শিংনবনা থল্লবা মতম অমা লেনখি। মদু ওইরবসু, 17শুবা লোক সভানা লৈবাক্কীদমক্তা কান্নবা থবক কয়া পাংথোকপা ঙমখি। ঐখোয়না মতমসিদা চানরবা মরুপ কয়া অমা মাঙজখি। করিগুম্বা মখোয়না ঙসি ফাওবা হিংলম্লবদি, মখোয়সু ঙসিগী নুংশিনা কাইনবগী থৌরম অসিদা শরুক য়ারমগনি। কোবিদনা মরম ওইরগা মাঙজখিবা অথোইবা মরুপশিংবু ঐখোয়না মতম পুম্বদা নীংশিংগনি।

ইকায়খুম্ননীংঙাই ওইরবা স্পীকরজী,

ঙসিগী পুঙফম অসিদি 17শুবা লোক সভাগী খ্বাইদগী অরোইবা সেসন অমসুং মিৎকুপ অমনি হায়না খনবা য়ারে। গনতন্ত্র অমসুং ভারত ইমাগী খোঙচৎ অসিদি লোইবা নাইরোই। লৈবাক অসিনা মীওইবা খুন্নাইগী য়াইফ নুংঙাইবগী পান্দমগা লোয়ননা হিংলিবনি। মিৎয়েং অসিমক ঐখোয়গী স্বামী বিবেকানন্দসু য়েংলম্বনি। মখোয়গী মিৎয়েং অসিগী মপাঙ্গল কয়া য়াম্বগে হায়বা ঐখোয়না ঙসিদি খঙলে, উরে। মালেম্না ঐখোয়গী মতিকপু মশক খঙলক্লিবা, ঐখোয়দা থাজবগা লোয়ননা য়েংনরক্লিবা অসিগা লোয়ননা ঐখোয়না খোঙচৎ অসিবু অহেনবা পাঙ্গলগা লোয়ননা মখা চত্থবা তাবনি।

ইকায়খুম্ননীংঙাই ওইরবা স্পীকরজী,

মীখলসু পংলাপ লাপ্ত্রে। মীওই খরদি পাখৎপা য়াওনরমগনি, মসিমক গনতন্ত্রগী মহৌশাগী মতৌনি। ঐখোয়দি মসিবু চাউথোকচবগা লোয়ননা লৌজরি। ঐখোয়গী মীখল অসিদি ঐখোয়গী লৈবাক অমসুং গনতন্ত্রগী চৎনবীবু হেন্না মশক নাইহনবা থৌওং অমনি হায়না ঐহাক্না লৌজৈ অমসুং মালেম্বু মসিনা অঙকপা ফাওহনগনি হায়না ঐহাক্না থাজৈ।

ইকায়খুম্ননীংঙাই ওইরবা স্পীকরজী,

ঐখোয়গী ইকায়খুম্ননীংঙাই ওইরবা এম.পি.শিংদগী ফংখিবা তেংবাং, লৌখিবা ৱারেপ, মাইয়োক্নখিবা লান্দা কয়ানা ঐখোয়গী পাঙ্গলদা অনৌবা ইনোৎ হাপখি হায়না ঐহাক্না লৌই। ঐহাক্তি শিংনবা লাকপদা নুংঙাইবা ফাওই, ঈশ্বরনা মসিগুম্বা থৌজাল অমা ঐঙোন্দা পীবিরকই। ঐখোয়না শিংনবা মাইয়োক্নবা খুদিংদা, ইশাদা থাজবা অমসুং চেকশিন্না মাঙ থাই। হাউস অসিনা শ্রী রাম মন্দিরগা মরী লৈননা লৌখিবা ৱারেপ অসিনা লৈবাক্কী চারোন শুরোনশিংদা লৈবাক্কী সংবিধানগী ভেল্যুদা লৈরিবা পাঙ্গলবু থাগৎপগী মরম অমা পীগনি। শিংনবগী মাইয়োক্তা মীপুম খুদিংনা থৌনা ফনা লেপ্পগী মথৌনা লৈতে, লানফম থাদোক্লগা চেন্নৈ হায়বা ৱাফম অসিসু অচুম্বনি। অদুবু, তুংগী মতমগী রেকোর্দ য়েংলুবা মতমদা, ঙসি থম্নখিবা ৱাফম কয়া, মসিদা মীয়ামগী পুক্নিং খঙবগী মতৌ, ৱারেপ, অমসুং সবকা সাথ সবকা বিকাসকী মন্ত্রগী হীরমসু য়াওখি হায়না উনগনি। ঐখোয়না অৱাবা মতম কয়া মাইয়োক্নখিবা ওইরবসু, ঐখোয়না লৈবাক্কী তুংগী চারোন শুরোনগীদমক্তা অফবা থৌদাং কয়া পাংথোকখিগনি। ভারতকী তুংগী চারোন শুরোনশিংগী অনীংবা অপাম্বা থুংহনবা ঙম্নবা হাউস অসিনা ইথিল পীগনি অমসুং ঐখোয়না পান্দমগীদমক্তা পুন্না হোৎনমিন্নগনি হায়বসি ঐহাক্না অখন্ননা থমজবা পাম্মি।

মসিগুম্বা থাজবা অসিগা লোয়ননা, ঐহাক্না ইকায়খুম্ননীংঙাই ওইরবা এম.পি.শিংবু অমুক্কা হন্না থাগৎপগা লোয়ননা তৌবীমল খঙবা উৎচরি।

থাগৎচরি।

***