ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ହୋଟେଲ ତାଜ ପ୍ୟାଲେସ ଠାରେ ଇଟି ନାଓ ବିଶ୍ୱସ୍ତରୀୟ ବ୍ୟାବସାୟିକ ଶିଖର ସମ୍ମିଳନୀ ୨୦୨୪କୁ ସମ୍ବୋଧିତ କରିଛନ୍ତି ।

ପ୍ରଧାନମନ୍ତ୍ରୀ ତାଙ୍କ ଅଭିଭାଷଣ ଆରମ୍ଭ କରି ‘ବିଶ୍ୱସ୍ତରୀୟ ବ୍ୟାବସାୟିକ ଶିଖର ସମ୍ମିଳନୀ ୨୦୨୪ ଦ୍ୱାରା ସ୍ଥିରୀକୃତ ବିଷୟବସ୍ତୁ ଶୀର୍ଷକ ‘ବ୍ୟାଘାତ, ବିକାଶ ଏବଂ ବିବିଧକରଣ' ର ମହତ୍ତ୍ୱ ଉପରେ ଆଲୋକପାତ କରିଥିଲେ । ବିଶ୍ୱରେ ଭାରତ ପ୍ରତି ବୃଦ୍ଧି ପାଉଥିବା ବିଶ୍ୱାସକୁ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, "ଯେତେବେଳେ ବ୍ୟାଘାତ, ବିକାଶ ଏବଂ ବିବିଧକରଣ କଥା ଆସେ, ସମସ୍ତେ ଏକମତ ହୋଇ ପାରିବେ ଯେ , ଏହା ହେଉଛି ଭାରତର ସମୟ" । ଡାଭୋସ୍‌ରେ ଭାରତ ପ୍ରତି ଅଭୂତପୂର୍ବ ଉତ୍ସାହ ବିଷୟରେ କହିବା ଅବସରରେ , ପ୍ରଧାନମନ୍ତ୍ରୀ ଭାରତକୁ ଏକ ଅଭୂତପୂର୍ବ ଅର୍ଥନୈତିକ ସଫଳତାର କାହାଣୀ ବୋଲି କହିବା, ଏହାର ଡିଜିଟାଲ ଏବଂ ଭୌତିକ ଭିତ୍ତିଭୂମି ନୂତନ ଉଚ୍ଚତାକୁ ବୃଦ୍ଧି ପାଇବା ଏବଂ ବିଶ୍ୱର ପ୍ରତ୍ୟେକ କ୍ଷେତ୍ରରେ ଭାରତର ଆଧିପତ୍ୟ ବିଷୟରେ ଆଲୋଚନାକୁ ମନେ ପକାଇଥିଲେ ।  ପ୍ରଧାନମନ୍ତ୍ରୀ ମୋଦୀ ଜଣେ ବରିଷ୍ଠ ଅଧିକାରୀଙ୍କୁ ମଧ୍ୟ ମନେ ପକାଇଥିଲେ ଯେ ଭାରତର ସାମର୍ଥ୍ୟକୁ ଏକ 'ଉଗ୍ର ଷଣ୍ଢ' ସହିତ ତୁଳନା କରୁଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ବିଗତ ୧୦ ବର୍ଷ ମଧ୍ୟରେ ଭାରତର ପରିବର୍ତ୍ତନ ଉପରେ ଆଲୋଚନା କରୁଥିବା ବିଶ୍ୱର ବିକାଶ ବିଶେଷଜ୍ଞ ଗୋଷ୍ଠୀ ଆଜି ଭାରତ ପ୍ରତି ବିଶ୍ୱର ବୃଦ୍ଧି ପାଉଥିବା ବିଶ୍ୱାସକୁ ଦର୍ଶାଉଛନ୍ତି । ଲାଲ୍ କିଲ୍ଲାରୁ ତାଙ୍କ ଅଭିଭାଷଣକୁ ମନେ ପକାଇ ଶ୍ରୀ ମୋଦୀ କହିଥିଲେ, "ବିଶ୍ୱରେ ଭାରତର ସାମର୍ଥ୍ୟ ଏବଂ ସଫଳତାକୁ ନେଇ ଆମେ ପୂର୍ବରୁ କେବେ ବି ଏଭଳି ସକାରାତ୍ମକ ଭାବନା ଦେଖିନଥିଲୁ" ।

କୌଣସି ଦେଶର ବିକାଶ ଯାତ୍ରା ସମୟରେ ଏମିତି ଏକ ସମୟ ଆସିଥାଏ ଯେତେବେଳେ ସବୁ ପରିସ୍ଥିତି ତା’ ସପକ୍ଷରେ ଥାଏ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ସମୟରେ ଦେଶ ଆଗାମୀ ଶହ ଶହ ପର୍ଯ୍ୟନ୍ତ ନିଜକୁ ଶକ୍ତିଶାଳୀ କରିଥାଏ । ଆଜି ମୁଁ ଭାରତ କ୍ଷେତ୍ରରେ ସେହି ସମାନ ସମୟକୁ ଦେଖୁଛି । ଏହି ସମୟ ଅଭୂତପୂର୍ବ । କ୍ରମାଗତ ଭାବେ ବୃଦ୍ଧି ପାଉଥିବା ଅଭିବୃଦ୍ଧି ହାର ଏବଂ ହ୍ରାସ ପାଉଥିବା ବିତ୍ତୀୟ ନିଅଣ୍ଟ, ରପ୍ତାନି ବୃଦ୍ଧି ଓ ଚାଲୁ ଆକାଉଣ୍ଟ ନିଅଣ୍ଟ କମ୍ ରହିବା, ଉତ୍ପାଦନକ୍ଷମ ପୁଞ୍ଜି ନିବେଶ ଫଳରେ ରେକର୍ଡ ଉଚ୍ଚ ଓ ମୁଦ୍ରାସ୍ଫୀତି ନିୟନ୍ତ୍ରଣରେ ରହିବା, ସୁଯୋଗ ଓ ଆୟ ବୃଦ୍ଧି, ଦାରିଦ୍ର‌୍ୟ ହ୍ରାସ, ବଢୁଥିବା ଉପଭୋକ୍ତା ଏବଂ କର୍ପୋରେଟ୍ ଲାଭ ଏବଂ ବ୍ୟାଙ୍କ ଏନପିଏରେ ରେକର୍ଡ ହ୍ରାସ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏକ ପ୍ରକାରର ଦେଖିବାକୁ ଗଲେ ଦେଶର ଗୁଣାତ୍ମକ ଚକ୍ର ଆରମ୍ଭ ହୋଇଛି । ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଉତ୍ପାଦନ ଏବଂ ଉତ୍ପାଦକତା ଉଭୟ ବୃଦ୍ଧି ପାଉଛି ।

ଚଳିତ ବର୍ଷର ଅନ୍ତରୀଣ ବଜେଟକୁ ଲୋକପ୍ରିୟ ବଜେଟ୍ ନୁହେଁ ବୋଲି କହି ଅର୍ଥନୈତିକ ବିଶେଷଜ୍ଞ ଓ ସାମ୍ବାଦିକମାନେ ଯେଉଁ ପ୍ରଶଂସା କରିଛନ୍ତି ସେଥିରେ ଖୁସି ବ୍ୟକ୍ତ କରି ପ୍ରଧାନମନ୍ତ୍ରୀ ସେମାନଙ୍କ ସମୀକ୍ଷା ପାଇଁ ସେମାନଙ୍କୁ ଧନ୍ୟବାଦ ଜଣାଇବା ସହ ବଜେଟର 'ପ୍ରଥମ ନୀତି' କିମ୍ବା ସାମଗ୍ରିକ ନୀତି ନିର୍ଦ୍ଧାରଣ ପ୍ରତି ମଧ୍ୟ ଦୃଷ୍ଟି ଆକର୍ଷଣ କରିଥିଲେ । ଏହି ବଜେଟ୍ ଏହି ନୀତିଗୁଡ଼ିକର ସମ୍ପ୍ରସାରଣ ବୋଲି ପ୍ରଧାନମନ୍ତ୍ରୀ ମୋଦୀ କହିବା ସହିତ  "ସେହି ପ୍ରଥମ ନୀତିଗୁଡ଼ିକ ହେଉଛି - ସ୍ଥିରତା, ନିରବଚ୍ଛିନ୍ନତା ଏବଂ ନିରନ୍ତରତା" ବୋଲି ଉଲ୍ଲେଖ କରିଛନ୍ତି ।

କରୋନା ମହାମାରୀ ଉପରେ ନଜର ପକାଇ ପ୍ରଧାନମନ୍ତ୍ରୀ ମନେ ପକାଇଥିଲେ ଯେ , କିପରି ତାହା ପରବର୍ତ୍ତୀ ସମୟରେ ସମଗ୍ର ବିଶ୍ୱର ସରକାରମାନଙ୍କ ପାଇଁ ଏକ ବିରାଟ ଆହ୍ୱାନ ପାଲଟିଥିଲା , ଯେଉଁଠାରେ ସ୍ୱାସ୍ଥ୍ୟ ଏବଂ ଅର୍ଥନୀତି ଭଳି ଦୁଇଟି ଆହ୍ୱାନର ମୁକାବିଲା କରିବା ବିଷୟରେ କାହାର କୌଣସି ଧାରଣା ନଥିଲା । ଏହି ସମୟରେ ଭାରତ ଜୀବନ ବଞ୍ଚାଇବାକୁ ପ୍ରାଥମିକତା ଦେଇଛି ବୋଲି ସେ ଗୁରୁତ୍ୱାରୋପ କରିଥିଲେ । ଜୀବନ ରକ୍ଷାକାରୀ ସମ୍ବଳ ସଂଗ୍ରହ କରିବା ଏବଂ ଲୋକଙ୍କୁ ବିପଦ ବିଷୟରେ ସଚେତନ କରାଇବା ପାଇଁ ସରକାରଙ୍କ ପ୍ରୟାସ ଉପରେ ଆଲୋକପାତ କରି ସେ କହିଥିଲେ, "ଯଦି ଜୀବନ ଅଛି, ତେବେ ସବୁକିଛି ଅଛି" । ଗରିବଙ୍କ ପାଇଁ ମାଗଣା ରାସନ ଯୋଗାଇଦେବା, ଭାରତରେ ପ୍ରସ୍ତୁତ ଟିକା ଉପରେ ଗୁରୁତ୍ୱ ଦେବା ଏବଂ ଶୀଘ୍ର ଟିକା ଉପଲବ୍ଧତା ସୁନିଶ୍ଚିତ କରିବାକୁ ମଧ୍ୟ ସରକାର ନିଷ୍ପତ୍ତି ନେଇଥିଲେ । ମହିଳାଙ୍କ ଆକାଉଣ୍ଟକୁ ସିଧାସଳଖ ଲାଭ ହସ୍ତାନ୍ତର, ରାସ୍ତାକଡ଼ ଦୋକାନୀ ଓ କ୍ଷୁଦ୍ର ଉଦ୍ୟୋଗୀଙ୍କୁ ଆର୍ଥିକ ସହାୟତା ଏବଂ କୃଷି ସମ୍ବନ୍ଧୀୟ ସମସ୍ୟାର ମୁକାବିଲା ପାଇଁ ପଦକ୍ଷେପ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ସରକାର ଉଭୟ ସ୍ୱାସ୍ଥ୍ୟ ଏବଂ ଜୀବିକା ଦାବି ପୂରଣ କରିଛନ୍ତି । ବିପର୍ଯ୍ୟୟକୁ ସୁଯୋଗରେ ପରିଣତ କରିବା ପାଇଁ ସରକାର ସଂକଳ୍ପ ନେଇଛନ୍ତି ବୋଲି ସେ କହିଛନ୍ତି ।

ଚାହିଦା ବଢ଼ାଇବା ଏବଂ ବଡ଼ ବଡ଼ ବ୍ୟବସାୟୀଙ୍କୁ ସାହାଯ୍ୟ କରିବା ପାଇଁ ଅଧିକ ଟଙ୍କା ଛାପିବା ପାଇଁ ସେ ସମୟରେ ବିଶେଷଜ୍ଞମାନଙ୍କ ମତାମତକୁ ମନେ ପକାଇ ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ ବିଶ୍ୱର ଅନେକ ସରକାର ଗ୍ରହଣ କରିଥିବା ଏହି ଆଭିମୁଖ୍ୟ ଯୋଗୁଁ ମୁଦ୍ରାସ୍ଫୀତି ସ୍ତର ବୃଦ୍ଧି ପାଇଛି । "ଆମ ଉପରେ ଚାପ ପକାଇବା ପାଇଁ ମଧ୍ୟ ଅନେକ ପ୍ରୟାସ କରାଯାଇଥିଲା" ବୋଲି ପ୍ରଧାନମନ୍ତ୍ରୀ କହିବା ସହିତ ଆହୁରି ମଧ୍ୟ ଉଲ୍ଲେଖ କରିଥିଲେ ଯେ, "କିନ୍ତୁ ଆମେ ବାସ୍ତବତା ଜାଣିଥିଲୁ ଏବଂ ଏହାକୁ ବୁଝିଥିଲୁ । ଆମେ ଆମର ଅଭିଜ୍ଞତା ଏବଂ ବିବେକ ଆଧାରରେ ଆଗକୁ ବଢ଼ିଛୁ । ପ୍ରଧାନମନ୍ତ୍ରୀ ମୋଦୀ ଭାରତର ନୀତିକୁ ଶ୍ରେୟ ଦେଇଛନ୍ତି, ଯାହା ଉପରେ ଏକଦା ପ୍ରଶ୍ନ କରାଯାଉଥିଲା , କିନ୍ତୁ ଆଜି ଅର୍ଥନୀତିର ସୁଦୃଢ଼ ସ୍ଥିତି ପାଇଁ ଏହା ଉପଯୁକ୍ତ ପ୍ରମାଣିତ ହୋଇଛି ।

ଭାରତ ଏକ କଲ୍ୟାଣକାରୀ ରାଷ୍ଟ୍ର । ସାଧାରଣ ନାଗରିକଙ୍କ ଜୀବନକୁ ସହଜ କରିବା ଏବଂ ଜୀବନଧାରଣର ମାନରେ ଉନ୍ନତି ଆଣିବା ସରକାରଙ୍କ ପ୍ରାଥମିକତା ବୋଲି ପ୍ରଧାନମନ୍ତ୍ରୀ କହିଥିଲେ । ଗୋଟିଏ ପଟେ ନୂଆ ନୂଆ ଯୋଜନା ପ୍ରସ୍ତୁତ ହେଉଥିବା ବେଳେ ଅନ୍ୟପଟେ ସରକାର ଏହାର ଲାଭ ପ୍ରତ୍ୟେକ ଯୋଗ୍ୟ ହିତାଧିକାରୀଙ୍କ ପାଖରେ ପହଞ୍ଚାଇଛନ୍ତି ବୋଲି ସେ କହିଛନ୍ତି । ଆମେ କେବଳ ବର୍ତ୍ତମାନରେ ନୁହେଁ , ବରଂ ଦେଶର ଭବିଷ୍ୟତରେ ବି ନିବେଶ କରିଛୁ ବୋଲି ସେ କହିଛନ୍ତି ।

ପ୍ରଧାନମନ୍ତ୍ରୀ ପ୍ରତ୍ୟେକ ବଜେଟ୍‌ରେ ମୁଖ୍ୟତଃ ୪ଟି ବିଷୟ ଉପରେ ଆଲୋକପାତ କରିଥିଲେ ଏବଂ  ରେକର୍ଡ ଉତ୍ପାଦନକ୍ଷମ ବ୍ୟୟ ଆକାରରେ ପୁଞ୍ଜି ବ୍ୟୟ, କଲ୍ୟାଣକାରୀ ଯୋଜନାରେ ଅଭୂତପୂର୍ବ ନିବେଶ, ଅଯଥା ବ୍ୟୟ ଉପରେ ନିୟନ୍ତ୍ରଣ ଏବଂ ଆର୍ôଥକ ଶୃଙ୍ଖଳା ଆକାରରେ ବିଷୟରେ ଉଲ୍ଲେଖ କରିଥିଲେ । ସନ୍ତୁଳନ ବଜାୟ ରଖାଯାଇଛି ଏବଂ ଚାରୋଟି ବିଷୟରେ ଧାର୍ଯ୍ୟ ଲକ୍ଷ୍ୟ ହାସଲ କରାଯାଇଛି ବୋଲି ସେ ଗୁରୁତ୍ୱାରୋପ କରିଛନ୍ତି । ଇଚ୍ଛିତ ଲକ୍ଷ୍ୟ ହାସଲ କରିବାରେ 'ସଞ୍ଚୟ ହୋଇଥିବା ଟଙ୍କା ହିଁ ଅର୍ଥ' ମନ୍ତ୍ରକୁ ଶ୍ରେୟ ଦେଇ ପ୍ରଧାନମନ୍ତ୍ରୀ ପ୍ରକଳ୍ପ ଗୁଡ଼ିକୁ ନିର୍ଦ୍ଧାରିତ ସମୟ ମଧ୍ୟରେ ଶେଷ କରିବା ବିଷୟରେ ଉଲ୍ଲେଖ କରିଥିଲେ । ବିଳମ୍ବ ହେବା କାରଣରୁ ପ୍ରକଳ୍ପ ଖର୍ଚ୍ଚ ବୃଦ୍ଧି ପାଉଥିବା କଥା ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ ୨୦୦୮ରେ ଆରମ୍ଭ ହୋଇଥିବା ପୂର୍ବାଂଚଳ ଉତ୍ସର୍ଗୀକୃତ ମାଲ୍ ପରିବହନ କରିଡର ପ୍ରକଳ୍ପର ଉଦାହରଣ ଦେଇ ସୂଚନା ଦେଇଥିଲେ ଯେ ଗତ ବର୍ଷ ଶେଷ ହେବା ପରେ ଏହି ପ୍ରକଳ୍ପ ଖର୍ଚ୍ଚ ୧୬,୫୦୦ କୋଟି ଟଙ୍କାରୁ ୫୦,୦୦୦ କୋଟି ଟଙ୍କାକୁ ବୃଦ୍ଧି ପାଇଛି । ୧୯୯୮ରେ ଆରମ୍ଭ ହୋଇଥିବା ଆସାମର ବୋଗିବିଲ ସେତୁ ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ , ଯାହାର ପ୍ରକଳ୍ପ ଖର୍ଚ୍ଚ ୨୦୧୮ରେ ଶେଷ ହେବା ପରେ ନିର୍ଦ୍ଧାରିତ ୧୧୦୦ କୋଟି ଟଙ୍କାରୁ ୫୦୦୦ କୋଟି ଟଙ୍କାକୁ ବୃଦ୍ଧି ପାଇଛି ।

ବ୍ୟବସ୍ଥାରେ ସ୍ୱଚ୍ଛତା ଆଣିବା ଏବଂ ଟେକ୍ନୋଲୋଜି ବ୍ୟବହାର କରି ଦେଶର ଅର୍ଥ ସଞ୍ଚୟ କରିବା ଉପରେ ମଧ୍ୟ ପ୍ରଧାନମନ୍ତ୍ରୀ ମୋଦୀ ସ୍ପର୍ଶ କରିଥିଲେ । କେବଳ କାଗଜପତ୍ରରେ ଥିବା ୧୦ କୋଟି ନକଲି ହିତାଧିକାରୀଙ୍କୁ ମୁକ୍ତ କରିବା, ପ୍ରତ୍ୟେକ୍ଷ ଲାଭ ହସ୍ତାନ୍ତର ମାଧ୍ୟମରେ ପାଣ୍ଠି ଯୋଗାଣରେ ରହୁଥିବା ଫାଟକୁ ବନ୍ଦ କରିବା ଦ୍ୱାରା ୩.୨୫ ଲକ୍ଷ କୋଟି ଟଙ୍କା ଭୁଲ ହାତକୁ ଆସିବାରୁ ବଞ୍ଚାଇବାରେ ସାହାଯ୍ୟ କରିବା, ସରକାରୀ ସାମଗ୍ରୀ କିଣିବା ପାଇଁ ଜିଇଏମ୍ ପୋର୍ଟାଲ ବ୍ୟବହାର କରିବା, ଯାହା ଦ୍ୱାରା ୬୫,୦୦୦ କୋଟି ଟଙ୍କା ସଞ୍ଚୟ ଏବଂ ତୈଳ କ୍ରୟରେ ବିବିଧତା ଆଣିବା ପାଇଁ ୨୫,୦୦୦ କୋଟି ଟଙ୍କା ସଞ୍ଚୟ କରିବା ସମ୍ପର୍କରେ ସେ ଉଲ୍ଲେଖ କରିଥିଲେ । ଗତ ବର୍ଷ , ଆମେ କେବଳ ପେଟ୍ରୋଲରେ ଇଥାନଲ ମିଶାଇ ୨୪,୦୦୦ କୋଟି ଟଙ୍କା ସଞ୍ଚୟ କରିଥିଲୁ ବୋଲି ସେ କହିଥିଲେ । ସେ ସ୍ୱଚ୍ଛତା ଅଭିଯାନ ବିଷୟରେ ମଧ୍ୟ ଉଲ୍ଲେଖ କରିଥିଲେ , ଯେଉଁଠାରେ ସରକାରୀ କୋଠାରେ ପଡ଼ିଥିବା କାର୍ଯ୍ୟାଳୟ ଗୁଡିକର ଅଦରକାରୀ ସାମଗ୍ରୀ ବିକ୍ରି କରି ସରକାର ୧୧୦୦ କୋଟି ଟଙ୍କା ରୋଜଗାର କରିଥିଲେ ।

ନାଗରିକମାନେ ଯେପରି ଟଙ୍କା ସଞ୍ଚୟ କରିପାରିବେ ସେଭଳି ସରକାରୀ ଯୋଜନା ସୃଷ୍ଟି କରାଯାଇଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ ଜଳ ଜୀବନ ମିଶନ ବିଷୟରେ ସ୍ପର୍ଶ କରିଥିଲେ ଯେଉଁଠାରେ ଗରିବଙ୍କ ପାଇଁ ବିଶୁଦ୍ଧ ପାନୀୟ ଜଳ ସୁନିଶ୍ଚିତ କରାଯାଇଥିଲା, ଯାହା ଦ୍ୱାରା ଜଳବାହିତ ରୋଗ ଦ୍ୱାରା ହେଉଥିବା ରୋଗ ଉପରେ ସେମାନଙ୍କର ଖର୍ଚ୍ଚ ହ୍ରାସ ପାଇଥିଲା । ଆୟୁଷ୍ମାନ ଭାରତ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ , ଏହା ଦେଶର ଗରିବ ଲୋକଙ୍କୁ ୧ ଲକ୍ଷ କୋଟି ଟଙ୍କା ଖର୍ଚ୍ଚ କରିବାରୁ ବଞ୍ଚାଇଛି ଏବଂ ପ୍ରଧାନମନ୍ତ୍ରୀ ଜନ ଔଷଧି କେନ୍ଦ୍ର ଗୁଡ଼ିକରେ ୮୦% ଶସ୍ତା ଔଷଧ ମାଧ୍ୟମରେ ୩୦,୦୦୦ କୋଟି ଟଙ୍କା ସଞ୍ଚୟ କରାଯାଇଛି ।

କେବଳ ବର୍ତ୍ତମାନର ପିଢ଼ି ନୁହେଁ , ବରଂ ଅନେକ ଭବିଷ୍ୟତ ପିଢ଼ି ପ୍ରତି ସେ ଉତ୍ତରଦାୟୀ ବୋଲି ଶ୍ରୀ ମୋଦୀ ଦୋହରାଇ ଥିଲେ । ତେଣୁ , ନୀତି ଓ ନିଷ୍ପତିରେ ଆର୍ଥିକ ପରିଚାଳନାକୁ ପ୍ରାଥମିକତା ଦିଆଯାଉଛି ।

ବିଦ୍ୟୁତ୍‌ର ଉଦାହରଣ ଦେଇ ପ୍ରଧାନମନ୍ତ୍ରୀ ଏକ କୋଟି ଘର ପାଇଁ ରୁଫ୍ ଟପ୍ ସୋଲାର ସ୍କିମ୍ (ଛାତ ଉପରେ ସୌରୀକରଣ ଯୋଜନା) ବିଷୟରେ ଉଲ୍ଲେଖ କରିଥିଲେ ଯେଉଁଠାରେ ଲୋକମାନେ ବିଦ୍ୟୁତ  ଉତ୍ପାଦନ କରି ସେମାନଙ୍କର ବିଦ୍ୟୁତ ୍ ବିଲ୍‌କୁ ଶୂନକୁ ହ୍ରାସ କରିପାରିବେ ଏବଂ ଅତିରିକ୍ତ ବିଦ୍ୟୁତ୍ ବିକ୍ରି କରି ଅର୍ଥ ରୋଜଗାର କରି ପାରିବେ ବୋଲି କହିଥିଲେ । ସେ ଉଜାଲା ଯୋଜନାରେ ପ୍ରଦାନ କରାଯାଇଥିବା ଏଲ୍‌ଇଡି ବଲ୍‌ବ ବିଷୟରେ ମଧ୍ୟ ଉଲ୍ଲେଖ କରିଥିଲେ , ଯାହା ବିଦ୍ୟୁତ ବିଲ୍‌ରେ ୨୦,୦୦୦ କୋଟି ଟଙ୍କା ସଞ୍ଚୟ କରିବାରେ ସାହାଯ୍ୟ କରିଥିଲା ।

ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ , ଗତ ସାତ ଦଶନ୍ଧି ଧରି ଦେଶରେ ଦାରିଦ୍ର‌୍ୟ ଦୂରୀକରଣ ପାଇଁ ଅନେକ ସ୍ଲୋଗାନ ଦିଆ ଯାଇଥିଲେ ମଧ୍ୟ ତାହା ପ୍ରଭାବ ପକାଇବାରେ ବିଫଳ ହୋଇଛି ଏବଂ ଯେଉଁମାନେ ଏୟାର କଣ୍ଡିସନ୍ କୋଠରୀରୁ ବସି ପରାମର୍ଶ ଦେଉଛନ୍ତି ସେମାନେ କୋଟିପତି ହୋଇଥିବା ବେଳେ ଗରିବ ମାନେ ଗରିବ ହୋଇ ରହିଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ , ୨୦୧୪ ପରେ ସର୍ବାଙ୍ଗୀନ କାର୍ଯ୍ୟ ଆରମ୍ଭ ହୋଇଛି, ଯାହା ଫଳରେ ଗତ ୧୦ ବର୍ଷ ମଧ୍ୟରେ ୨୫ କୋଟି ଲୋକ ଦାରିଦ୍ର‌୍ୟରୁ ମୁକୁଳିଛନ୍ତି । ଏଥିପାଇଁ ସେ ଆମ ସରକାରଙ୍କ ନୀତିକୁ ଶ୍ରେୟ ଦେଇଛନ୍ତି । "ମୁଁ ଦାରିଦ୍ର‌୍ୟତାରୁ ଏଠାକୁ ଆସିଛି , ତେଣୁ ମୁଁ ଜାଣେ କିପରି ଦାରିଦ୍ର‌୍ୟ ସହ ଲଢ଼ିବାକୁ ହେବ । ଏହି ଦିଗରେ ଆଗକୁ ବଢ଼ିଲେ ଆମେ ଦେଶର ଦାରିଦ୍ର‌୍ୟ ହ୍ରାସ କରିପାରିବା ଏବଂ ଆମ ଦେଶକୁ ବିକଶିତ କରିପାରିବା ବୋଲି ଶ୍ରୀ ମୋଦୀ କହିଥିଲେ ।

"ଭାରତର ଶାସନ ମଡେଲ ଏକାସାଙ୍ଗରେ ଦୁଇଟି ଧାରାରେ ଆଗକୁ ବଢୁଛି" ବୋଲି ପ୍ରଧାନମନ୍ତ୍ରୀ କହିଥିଲେ । ଗୋଟିଏ ପଟେ ବିଂଶ ଶତାବ୍ଦୀର ଆହ୍ୱାନର ସମାଧାନ କରାଯାଉଥିବା ବେଳେ ଅନ୍ୟପଟେ ଏକବିଂଶ ଶତାବ୍ଦୀର ଆକାଂକ୍ଷା ପୂରଣ ପାଇଁ ସରକାର ପ୍ରୟାସ ଜାରି ରଖିଛନ୍ତି । ବିକାଶ ମାପଦଣ୍ଡର ତୁଳନା କରି ପ୍ରଧାନମନ୍ତ୍ରୀ ୧୧ କୋଟି ଶୌଚାଳୟ ନିର୍ମାଣ ଏବଂ ମହାକାଶ କ୍ଷେତ୍ରରେ ନୂତନ ସମ୍ଭାବନା ସୃଷ୍ଟି କରିବା, ୧୦,୦୦୦ ରୁ ଅଧିକ ଅଟଳ ଟିଙ୍କରିଂ ଲ୍ୟାବ୍ ବିକଶିତ କରିବା ସହିତ ଗରିବଙ୍କୁ ୪ କୋଟି ଘର ଯୋଗାଇଦେବା, ମାଲ ପରିବହନ କରିଡର ଏବଂ ପ୍ରତିରକ୍ଷା କରିଡର କାର୍ଯ୍ୟ ଶେଷ କରିବା ସମୟରେ ୩୦୦ରୁ ଅଧିକ ମେଡିକାଲ କଲେଜ ପ୍ରତିଷ୍ଠା, ବନ୍ଦେ ଭାରତ ଟ୍ରେନ୍ ଏବଂ ଦିଲ୍ଲୀ ସମେତ ଅନେକ ସହରରେ ପ୍ରାୟ ୧୦,୦୦୦ ଇଲେକ୍ଟ୍ରିକ୍ ବସ୍ ଚଳାଇବା ବିଷୟରେ ଉଲ୍ଲେଖ କରିଥିଲେ । କୋଟି କୋଟି ଭାରତୀୟଙ୍କୁ ବ୍ୟାଙ୍କିଙ୍ଗ  କ୍ଷେତ୍ର ସହ ଯୋଡ଼ିବା ଏବଂ ଡିଜିଟାଲ୍ ଇଣ୍ଡିଆ ଏବଂ ଫିନ୍‌ଟେକ୍ ମାଧ୍ୟମରେ ଏକାଧିକ ସୁବିଧା ସୁଯୋଗ ସୃଷ୍ଟି କରିବା ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ ।

ବୃଦ୍ଧିଶୀଳ ଚିନ୍ତାଧାରାର ଅଭିଶାପକୁ ସ୍ପର୍ଶ କରି , ପ୍ରଧାନମନ୍ତ୍ରୀ ବୁଝାଇଥିଲେ ଯେ ଏହା ଏକ ସୀମା ସୃଷ୍ଟି କରେ ଏବଂ କାହାକୁ ନିଜ ଗତିରେ ଆଗକୁ ବଢ଼ିବାକୁ ଦିଏ ନାହିଁ । ସେ ଦର୍ଶାଇଛନ୍ତି ଯେ , ବର୍ତ୍ତମାନର ସରକାର କ୍ଷମତାକୁ ଆସିବା ପରେ ଅମଲାତନ୍ତ୍ରରେ ମଧ୍ୟ ସମାନ ସମସ୍ୟା ରହିଥିଲା । ପ୍ରଧାନମନ୍ତ୍ରୀ କହିଥିଲେ ଯେ ପରିବର୍ତ୍ତନ ଆଣିବା ପାଇଁ ସେ ପୂର୍ବ ସରକାରମାନଙ୍କ ତୁଳନାରେ ବହୁତ ବଡ଼ ଧରଣର ଏବଂ ଅଧିକ ଗତିରେ କାମ କରିବାକୁ ନିଷ୍ପତ୍ତି ନେଇଛନ୍ତି ।

୨୦୧୪ ପର୍ଯ୍ୟନ୍ତ ହୋଇଥିବା କାର୍ଯ୍ୟ ସହିତ ଗତ ୧୦ ବର୍ଷର କାର୍ଯ୍ୟର ତୁଳନା ଉପରେ ଆଲୋକପାତ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ , ରେଳ ଲାଇନର ବିଦ୍ୟୁତୀକରଣ ପ୍ରାୟ ୨୦,୦୦୦ କିଲୋମିଟରରୁ ୪୦,୦୦୦ କିଲୋମିଟରକୁ ବୃଦ୍ଧି ପାଇଛି, ଚାରି ଲେନ୍ ଜାତୀୟ ରାଜପଥ ନିର୍ମାଣ ୧୮,୦୦୦ କିଲୋମିଟରରୁ ପ୍ରାୟ ୩୦,୦୦୦ କିଲୋମିଟରକୁ ବୃଦ୍ଧି ପାଇଛି, ମେଟ୍ରୋ ରେଳ ନେଟୱାର୍କକୁ ୨୫୦ କିଲୋମିଟରରୁ ୬୫୦ କିଲୋମିଟରକୁ ବୃଦ୍ଧି କରାଯାଇଛି । ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ ୨୦୧୯ ରୁ ଜଳ ଜୀବନ ମିଶନ ଅଧୀନରେ କେବଳ ଗତ ୫ ବର୍ଷ ମଧ୍ୟରେ ଗ୍ରାମାଞ୍ଚଳରେ ୧୦ କୋଟି ଘରେ ନଳ ମାଧ୍ୟମରେ ଜଳ ସଂଯୋଗ ହୋଇଥିବା ବେଳେ ୨୦୧୪ ପର୍ଯ୍ୟନ୍ତ ୭ ଦଶନ୍ଧି ମଧ୍ୟରେ ଭାରତରେ ୩.୫ କୋଟି ନଳ ମାଧ୍ୟମରେ ଜଳ ସଂଯୋଗ ହୋଇଥିଲା ।

୨୦୧୪ ମସିହାର ପୂର୍ବ ୧୦ ବର୍ଷ ମଧ୍ୟରେ ଦେଶ ଯେଉଁ ନୀତି ଗ୍ରହଣ କରିଥିଲା ତାହା ପ୍ରକୃତରେ ଦେଶକୁ ଦାରିଦ୍ର‌୍ୟ ପଥରେ ନେଉଥିଲା ବୋଲି ପ୍ରଧାନମନ୍ତ୍ରୀ ଦର୍ଶାଇଥିଲେ ଏବଂ ଏ ସଂକ୍ରାନ୍ତରେ ସଂସଦର ବଜେଟ୍ ଅଧିବେଶନରେ ଉପସ୍ଥାପିତ ଶ୍ୱେତପତ୍ର ମଧ୍ୟ ସଂସଦର ଏହି ଅଧିବେଶନରେ ଉପସ୍ଥାପିତ ହୋଇଛି ବୋଲି ଉଲ୍ଲେଖ କରିଥିଲେ । ଦୁର୍ନୀତି ଓ ନୀତିଗତ ପକ୍ଷାଘାତ କାରଣରୁ ସାରା ବିଶ୍ୱର ନିବେଶକଙ୍କ ମଧ୍ୟରେ ଘୋର ନିରାଶା ଦେଖାଦେଇଥିବାରୁ ନିବେଶକ ଆତ୍ମବିଶ୍ୱାସ ହରାଇବାର ଆଶଙ୍କା ରହିଛି ବୋଲି ସେ ଦର୍ଶାଇଥିଲେ । ଏବେ ଭାରତର ଅର୍ଥନୀତି ସୁଦୃଢ଼ ସ୍ଥିତିରେ ଥିବା ବେଳେ ସରକାର ଶ୍ୱେତପତ୍ର ଆକାରରେ ସମଗ୍ର ସତ୍ୟକୁ ଦେଶ ସମ୍ମୁଖରେ ଉପସ୍ଥାପନ କରିଛନ୍ତି ।

"ଭାରତ ପ୍ରଗତିର ନୂତନ ଉଚ୍ଚତାକୁ ଉନ୍ନୀତ ହେଉଛି" ବୋଲି ପ୍ରଧାନମନ୍ତ୍ରୀ ସମସ୍ତଙ୍କୁ ଆଶ୍ୱାସନା ଦେଇ କହିଥିଲେ ଯେ , ଦେଶ ବିଶ୍ୱର ତୃତୀୟ ବୃହତ୍ତମ ଅର୍ଥନୀତି ହେବା ପଥରେ ଗତି କରୁଛି । ବର୍ତ୍ତମାନର ସରକାରଙ୍କ ତୃତୀୟ ପାଳିରେ ବିରାଟ ନିଷ୍ପତ୍ତି ନିଆଯିବ ଏବଂ ଭାରତର ବିକାଶକୁ ଏକ ନୂତନ ପ୍ରୋତ୍ସାହନ ଦେବା ସହିତ ଦାରିଦ୍ର‌୍ୟ ଦୂରୀକରଣ ପାଇଁ ନୂତନ ଯୋଜନା ପାଇଁ ପ୍ରସ୍ତୁତି ଚାଲିଛି ବୋଲି ସେ ବିଶ୍ୱାସ ବ୍ୟକ୍ତ କରିଛନ୍ତି । ୧୫ ଲକ୍ଷରୁ ଅଧିକ ଲୋକଙ୍କ ପରାମର୍ଶକୁ ବିଚାରକୁ ନିଆଯାଇଛି ବୋଲି ସେ ସୂଚନା ଦେଇଛନ୍ତି । ବକ୍ତବ୍ୟ ଶେଷ କରି ପ୍ରଧାନମନ୍ତ୍ରୀ କହିଥିଲେ, ନୂଆ ଭାରତ ଦ୍ରୁତ ଗତିରେ କାମ କରିବ । ଏହା ହେଉଛି ମୋଦିଙ୍କ ଗ୍ୟାରେଣ୍ଟି ।’

*****

SSP