খুরুমজরি চেন্নাই!

তামিল নাদুগী গভর্নর, শ্রী আর.এন. রবী জী, মুখ্য মন্ত্রী শ্রী এম.কে. স্তেলিন জী, ঐগী কেন্দ্রগী মন্ত্রী মন্দলগী মরূপ, অনুরাগ থাকুর, এল. মুরুগন অমদি নিসিথ প্রমানিক, তামিল নাদু লৈঙাক্কী মন্ত্রী, উধয়ানিধী স্তেলিন, অমদি ভারতক মফম খুদিংদগী মফমসিদা লেঙবিরক্লিবা ঐগী নহা ওইরিবা মরূপশিং‍।

ঐনা ময়াম পুম্নমকপু ১৩শুবা খেলো ইন্দিয়া গেম্স অসিদা তরাম্না ওকচরি‍। ভারতকী শা্ন-খোৎনবগী ওইনা মসি ২০২৪ হৌদোক্নবগী নীংথিরবা লম্বী অমনি‍। মফমসিদা তিনবিরিবা ঐগী নহা ওইরিবা মরুপশিংনা নহা ওইবা ভারত, অনৌবা ভারত অমগী মশক তাক্লি‍। নখোয়গী পাঙ্গল অমদি ইখৌ লাংবনা ইরৈবাক অসিবু শান্ন-খোৎনবগী তাইবংদা অনৌবা পন্দোল তম্না পুদুনা চৎলি‍। লৈবাকসিগী মফম খুদিংদগী চেন্নাইদা লেঙবিরক্লিবা শান্নরোয় অমদি শান্ন-খোৎনববু পামজবা ময়াম পুম্নক্কী মফমদা ঐনা য়াইফ-পাউজেল পীজরি‍। নখোয় মহাক্না পুন্দুনা এক ভারত শ্রেস্থ ভারতকী অশেংবা ৱাখল্লোন উৎলিবনি‍। তামিনল নাদুগী মীকৌ মীরম ফবা মীওইশিং, নীংথিরবা তামিল লোন, নাৎ অমদি চীঞ্জাক্না ময়ামবু য়ুমদা লৈবগী ইহুও শোয়দনা ফাওহনগনি‍। মখোয়গী মীওক মীচান্না ময়ামগী থম্মোয়বু খুদুম চনবা ঙমগনি হায়না ঐনা খল্লি‍। খেলো ইন্দিয়া য়ুথ গেম্স অসিনা ময়ামগী মফমদা অদোমগী হৈশিংবশিং উত্থোক্নবা তাঞ্জা অমা শোয়দনা পীগনি‍। অদুগা, মসিনা অদোমগী মফমদা পুন্সি চুপ্পা চৎকদবা অনৌবা মরুপশিং শেম্বদসু মতেঙ পাংগনি‍।

মরূপশিং,

ঙসি, দুরদর্শন অমদি ওল ইন্দিয়া রেদিওগী তোঙান তোঙানবা প্রোজেক্তশিং মফমসিদা শঙ্গারি অমদি উরেপ উয়ুংসু তম্লি‍। ইং ১৯৭৫দা শন্দোকপা হৌখিবা চেন্নাই দুরদর্শন কেন্দ্রনা ঙসিদগী হৌদুনা অনৌবা খোঙচৎ অমদা খোঙশাল্লি‍। দিদি তামিল চেনেলসু অনৌবা শক্লোন অমদা হৌদোক্লে‍। স্তেত ৮দা অনৌবা এফ.এম. ত্রান্সমিত্তর ১২ হৌদোক্লিবা অসিনা মীওই করোর ১.৫ রোমদা কান্নবা পীরগন‍ি‍। ঙসি, অনৌবা এফ.এম. ত্রান্সমিত্তর প্রোজেক্ত ২৬কী উরেপ উয়ুংসু তম্লি‍। হায়রিবা মায় পাকপশিং অসিগীদমক ঐনা তামিল নাদু অমদি লৈবাক পুম্বগী মীয়ামগী মফমদা নুংঙাইবা ফোঙদোকচরি‍।

মরূপশিংও,

ভারত্তা শান্ন-খোৎনবা চাওখৎহনবদা তামিল নাদুনা অখন্নবা মফম অমা কন্দুনা লৈরি‍। মফমসিদা চেম্পিয়নশিং পুথোকপা লমদম্নি‍। লমদম অসিনা তেন্নিসতা মফম অমা কল্লিবা অমৃৎরাজ মচিন মনাউবু পোকপিখিবনি‍। ভারতনা ওলিম্পিক্সতা সনাগী মেদল ফংলকপদা লুচিংখিবা হোকী কেম্তেন ভাস্করনসু লমদমসিগী লৈহাউদা পোকখিবনি‍। বিস্বানাথন অনন্দ, প্রগজ্ঞনন্ধনচিংবা চেস শান্নরোয়শিং, অমদি পেরালিম্পিক চেম্পিয়ন মরিয়াপ্পনসু তামিল নাদুগী খুদোলনি‍। অসিগুম্বা শান্নরোয় কয়া লমদম অসিদগী থোক্লক্তুনা মশান্না খুদিংযদা মাঙজিল থানা চৎলি‍। ময়াম পুম্নমক্না তামিল নাদুগী লমদম অসিদগী পুক্নিং থৌগৎনিংঙাই ওইবা মচাক হেন্না ফংগনি হায়না ঐনা থাজৈ‍।

মরূপশিং,

ঐখোয় পুম্নমক্না ভারতপু মালেমগী শান্ন-খোৎনবগী লমদা মকোক থোংবা লৈবাকশিংগী মরক্তা উবা পাম্মি‍। মসিগীদমক, লৈবাকসিদা চাং নাইবা অচৌবা থাক্কী শান্ন-খোৎনবগী থৌরমশিং পাঙথোক্তুনা শান্নরোয়শিংগী এক্সপিরিএন্স হেনগৎহনবা, অমদি অচৌবা মশান্নশিংদা শরুক য়াহন্নবা গ্রাসরুৎ থাক্তগী শান্নরোয়শিং খনগৎপা মথৌ তাই‍। খেলো ইন্দিয়া অভিয়ান্না ঙসি হায়রিবা থৌদাং অসি লৌরি‍। ২০১৮দগী হৌরগা, খেলো ইন্দিয়া গেম্সকী ইদিসন ১২রক পাঙথোকখ্রে‍। খেলো ইন্দিয়া য়ুথ গেম্স, খেলো ইন্দিয়া য়ুনিভর্সিতী গেম্স, খেলো ইন্দিয়া ৱিন্তর গেম্স, অমদি খেলো ইন্দিয়া পেরা গেম্সনা শান্ননবা অমদি অনৌবা হৈথোই শিংথোইবা শান্নরোয়শিং মাঙদা পুখৎলক্নবগী খুদোংচাবশিং পীরি‍। অমুক্কা হন্না, খেলো ইন্দিয়া য়ুথ গেম্স হৌদোক্ল‍ি‍। তামিল নাদুগী চেন্নাই, ত্রিচী, মদুরাই, অমদি কোইম্বেতোরগুম্বা নীংথিরবা ময়োল্লমশিংনা চেম্পিয়নশিংবু তরাম্না ওক্নবা শেম শাদুনা লৈরি‍।

মরূপশিং,

অদোম শান্নরোয় অমা নৎত্রগা অয়েঙবা মীওই অমা ওইরবসু, চেন্নাইগী ফজরবা সমুদ্র খোঙবালগী পুক্নিং হুরবা শক্তম্না মীপুম খুদিংমকপু মাগী মনাক্তা চিংশিংগনি হায়না ঐনা চপ চানা থাজৈ‍। অদোম্না মদুরাইগী তোপ তোপ্লবা লাইশঙশিংদা লাইগী ওইবা ইহুল অমা ফাওগনি‍। ত্রিচীগী লাইশঙশিং অমদি মফমসিগী কলা অমদি খুৎশা হৈবগী পোত্থোকশিংনা অদোমগী পুক্নিংবু শুমহৎকনি‍। অদুগা কোইম্বেতোরগী শু-নোম্বা কনবা ওন্ত্রপ্রিন্যুরশিংনা অদোমবু তরাম তরাম্না ওক্কনি‍। তামিল নাদুগী হায়রিবা ময়োল্লমসিদা অদোম্না কাউঙম্লরোইদবা লাইগী ওইবা ইহুল অমা শোয়দনা ফাওগনি‍।

মরূপশিং

স্তেত ৩৬কী শান্নরোয়শিংনা খেলো ইন্দিয়া য়ুথ গেম্স মনুংদা মখোয়গী হৈ-শিংবা অমদি পুক্নিং লুপ্পা মতৌ উৎকনি‍। নহা ওইরিবা শান্নরোয় ৫০০০ হেনবনা মখোয়গী পুক্নিং লুপচবা অমদি ইখৌ লাংবগা লোয়ননা শান্নবুংদা থোরকপা মতমদা ওইগদবা ফীভম অদু ঐনা ৱাখলনা লামশিনবা ঙম্মি‍। ঐখোয়না ঐখোয়বু নুংঙাইহনগদবা তেন কাপ্পা, লমজেল, অমদি বেদমিন্তন্নচিংবা মশান্নশিংদা অথোই অহেন তান্নবা য়েংনবা ঙাইরি‍। ঐখোয়না খেলো ইন্দিয়া য়ুথ গেম্সতা অহানবা ওইনা হাপচিল্লিবা স্কাসতা মতিং ফুদোক্নববু ঙাইরি‍। ঐখোয়না তামিল নাদুগী অরিবা মিংচৎ অমদি পারী পুরীগী লনগী থাক ৱাংখৎহনগদবা মশান্না অমা ওইরিবা সিলম্বমদা মতিং ফুদোক্নবা উগনি খল্লি‍। তোঙান তোঙানবা স্তেতশিংগী অমদি তেঙান তোঙানবা মশান্নশিংগী শান্নরোয়শিংনা অমত্তা ওইবা ফিরেপ, খোঙফম, অমদি ৱাখল্লোন্দা মফমসিদা পুল্লরগনি‍। অদোম্না শান্ন-খোৎনবদা পুক্নিং লুপ্লিবা, অদোম্না ইশাদা থম্লিবা থাজবা, শিংনবশিং মায়োক্ননবগী থৌনা, অমদি তোপ তোপ্পা মতৌ উৎননবগী পুক্নিংদা লেপ্লিবশিং অদু লৈবাক পুম্বনা উবা ফংগনি‍।

মরূপশিং,

তামিল নাদু অসি অথোইবা লম্বোইবা থিরুবল্লুবরগী শেংলবা পোক্নফম লমদম্নি‍। লম্বোইবা থিরুবল্লুবরনা মহাক্না ইরম্বাশিংদা নহাশিংগী মফমদা অনৌবা লম্বী তাকপিরম্মি অমদি মখোয়বু মাঙদা চঙশিন্নবা পুক্নিং থৌগৎপিরম্মি‍। খেলো ইন্দিয়া য়ুথ গেম্সকী লোগো অসিদসু অথোইবা থিরুবল্লুবরগী শক্তম য়াওরি‍। লম্বোইবা থিরুবল্লুবরনা ইবিরম্মি ‘অরুমাই উদৈথ্থথু ইন্নদ্রু অসবমাই ভেন্দুম, পেরুমাই মুয়ার্চি থরুম পার্থথু’ হায়বদি ঐখোয়না শিংনবা কয়া থেংনবদা শোন্থরোইদবনি, ঐখোয়না খুদোংথিবা মায়োক্নবদা লৈদুনা চেল্লোইদবনি হায়বনি‍। ঐখোয়না ঐখোয়গী পুক্নিং মপাঙ্গল কনখৎহনগদবনি অমদি ঐখোয়গী পান্দম ফংনবা হোৎনগদবনি‍। মসি শান্নরোয় অমগীদমক্তা য়াম্না চাউনা পুক্নিং থৌগৎনিংঙাইনি‍। হন্দক, খেলো ইন্দিয়া য়ুথ গেম্সকী মাস্কোত অসি ভীরা মঙ্গাই ভেলু নাচিয়রগী শক্তমদা শেম্লিবসিদা ঐ তশেংনা অপেনবা পোক‍ই‍। তশেংবা মীশক অমবু মাস্কোত ওইনা খনবা অসি মমাঙদা অমুক্তা থোকখিদ্রিবনি‍। ভীরা মঙ্গাই ভেলু নাচিয়র অসি নুপীগী মতিক্কী খুদম অমনি‍। মহাক্কী মওং মতৌ ঙসি লৈঙাক্কী ফিরেপ কয়াদা মমি তারি‍। মহাক্কী ফিদম্না লৈঙাক অসিবু লেপ্পা লৈতনা শান্ন-খোৎনবদা নুপীশিংগী মপাঙ্গল হাপ্নবা থবক পায়খৎহল্লিবনি‍। খেলো ইন্দিয়া কেম্পেনগী মখাদা, মশান্ন ২০দা নুপীশিংগী লীগশিং পাঙথোকখ্রে‍। থৌরাং অসিদা নুপী শান্নরোয় ৫০,০০০ হেনবনা শরুক য়াখি‍। ‘দস কা দম’ থৌরাং অসিনসু নুপী শান্নরোয় লাখ ১ হেনবদা মখোয়গী হৈশিংবা উত্থোক্নবা খুদোংচাবা অমা পীরি‍।

মরূপশিং,

মী ময়াম অমনা ২০১৪দগী হৌরগা ঐখোয়গী শান্নরোয়শিংগী পর্ফোর্মেন্স কমদৌনা অশুক থুনা ফগৎলক্লিবনো হায়না ঙক্নরি‍। ভারতনা মাগী খ্বায়দগী ফজবা পর্ফোর্মেন্স তোকিও ওলিম্পিক্স অমদি পেরালিম্পিক গেম্সতা উৎখিবা ময়াম্না উখ্রে‍। ভারতনা এসিয়ন গেম্স অমদি পেরা এসিয়ন গেম্সতসু পুৱারী শেমখি‍। লৈবাকসিনা য়ুনিভর্সিতী গেম্সতসু অনৌবা রেকোর্দ অমা থমখ্রে‍। হোংলক্লিবা অসি অহিং অমদা ওইখিবা নত্তে‍। শান্নরোয়শিংনা কন্না হোৎনবা অমদি পুক্নিং লুপচবদি মতম পুম্বদা লৈগনি‍। অদুম ওইনমক, হৌখিবা চহি ১০সিদা, মখোয়দা অনৌবা মশাবু থাজজবা অমা ফংখি, অমদি লৈঙাক্কী মতেঙসু খোঙথাঙ খুদিংদা লৈখি‍। মমাঙদা লৈরম্বা শান্ন-খোৎনবগী ফীভম খেন্নরম্মি, অমদি ঐখোয়না অদুগুম্বা মখলগী গেম্সশিং অদু থুপচিনখ্রে‍। হৌখিবা চহি ১০সিদা, লৈঙাক্না অওনবা পুরকপা হৌখি, শান্নরোয়শিংনসু তোপ তোপ্পা মওংদা শান্নখি, অমদি শান্ন-খোৎনবগী সিস্তেম পুম্বা অহোংবা পুরকখি‍। ঙসিদি, লৈবাকসিগী শান্নরোয় লিশিং কয়ানা খেলো ইন্দিয়া কেম্পেনগী খুত্থাঙদা থা খুদিংগী লুপা ৫০,০০০ হেনবগী শেলগী মতেঙ ফংলি‍। ২০১৪দা, ঐখোয়না তোপ্স (তার্গেৎ ওলিম্পি পোদিয়ম স্কীম) হৌদোক্তুনা মকোক থোংবা শান্নরোয়শিংবু ত্রেনিং, মালেমগী এক্সপোজর, অমদি অচৌবা শান্ন-খোৎনবগী থৌরমশিংদা শরুক য়াবা ফংহল্লি‍। হৌজিক্তি ঐখোয়গী মীৎয়েঙ অসি ২০২৪গী পেরিস ওলিম্পিক্স অমদি ২০২৮গী লোস এঞ্জেলেস ওলিম্পিক্সতা থম্লি‍। তোপ্সকী মখাদা শান্নরোয়শিংদা পাংবা য়াবা মতেঙ খুদিংমক পাংলি‍।

মরূপশিং,

ঙসিদি, ঐখোয়না নহাশিংবু শান্ন-খোৎনবদা চঙলকপা ঙাইদ্রে; ঐখোয়না শান্ন-খোৎনববু নহাশিংগী মফমদা পুদুনা চৎলি!

মরূপশিং,

খেলো ইন্দিয়াগুম্বা কেম্পেনশিংনা খুঙ্গং, ত্রাইবেল, অমদি লৱর-মিদ্দল-ক্লাস ইমুংশিংগী নহাশিংগী মঙলানশিংবু মঙফাওনহল্লি‍। ঙসি ঐখোয়না ‘ভোকেল ফোর লোকেল ‘গী মরমদা ৱারী শাবা মতমদা, মসিদা শান্ন-খোৎনবগী হৈশিংবসু য়াওরিবনি‍। ঙসি, ঐখোয়না শান্নরোয়শিংগীদমক হেন্না ফবা ফেসিলিতীশিং ফংহল্লি অমদি লোকেলগী থাক্তা অফবা অথোই অহেন তান্নবগী থৌরমশিং পাঙথোক্লি‍। মসিনা মখোয়বু মালেমগী থাক্তা পুথোক্লি‍। হৌখিবা চহি ১০সিদা, ঐখোয়না ভারত্তা অহানবা ওইনা মশিং য়াম্লবা মালেমগী থাক্কী তুর্নামেন্তশিং পাঙথোক্লি‍। লৈবাকসিদা চাউ শাংলবা সমুদ্র খোঙবালগী পরিং অমদি সমুদ্র মপালশিং লৈরিবসি পুক্নিংদা চিংশিনবিয়ু‍। অদুবু হৌজিক্তি, অহানবা ওইনা, ঐখোয়না ইথৎশিংদা বীচ গেম্স পাঙথোক্লি‍। গেম্সশিং অসিদা মশান্ন ৮গা লোয়ননা মল্লখম্বগুম্বা ভারতকী হান্নদগী লৈরক্লবা মশান্নশিং য়াওরি‍। হায়রিবা গেম্সশিং অসিদা লৈবাক শিনবা থুংবদগী শান্নরোয় ১৬০০ লোম্না শরুক য়ারি‍। মসিনা ভার্তা বীচ গেম্স অমদি স্পোর্তস তুরিজমগী অনৌবা পন্দুপ অমা হাংদোক্তুনা ঐখোয়গী সমুদ্র খোঙবাল পরিংগী ময়োল্লমশিংদা কান্নবা কয়া পীরি‍।

মরূপশিং,

ঐখোয়না ঐখোয়গী নহা ওইরিবা শান্নরোয়শিংদা মালেমগী থাক্কী এক্সপোজরশিং ফংহন্নবগী অমদি মালেমগী শান্ন-খোৎনবগী ইকোসিস্তেমদা ভারতপু মরুওইবা মফম অমা ওইহন্নবগীদমক খোঙফম চেৎনা লেপ্লি‍। মরম অদুনা, ঐখোয়না ২০২৯গী য়ুথ ওলিম্পিক্স অমদি ২০৩৬কী ওলিম্পিক গেম্স ভারত্তা পাঙথোক্নবা লেপ্তনা থবক পায়খৎলি‍। ময়াম্নসু খঙবিরিবদুনি, শান্ন-খোৎনবা হায়বসি শান্নবুংখক্তদা লোইবা নত্তে‍। শান্ন-খোৎনবা হায়বসি, মশানা মশক থোকপা শেন্মিৎলোন অমা ওইদুনা, নহাশিংগী মফমদা মশিং য়াম্লবা থবক্কী খুদোংচাবশিংসু পীরি‍। ঐনা ভারতপু লাক্কদৌরিবা চহি মঙাসিদা মালেমগী অহুমশুবা খ্বায়দগী চাউবা শেন্মিৎলোন ওইহন্নবা থাজবা অমা পীখি‍। পীরিবা থাজবা অসিদা শেন্মিৎলোন্দা শান্ন-খোৎনবনা শরুক য়াবগী চাং হেনগৎহনবা য়াওর‍ি, অমদি মায়কৈ অদুদা ঐখোয়না থবক পায়খৎলি‍। মরম অদুনা, ঐখোয়না হৌখিবা চহি ১০সিদা শান্ন-খোৎনবগা মরী লৈনবা সেক্তরশিংসু শুমগৎলি‍।

ঙসি, শান্ন-খোৎনবগা মরী লৈনবা হীরমশিংদা প্রোফেস্নেলশিং ত্রেন তৌননবা স্কিল দিভেলপমেন্ততা অকনবা মীৎয়েঙ থম্লি‍। মায়কৈ অমরোমদা, ঐখোয়না শান্ন-খোৎনবগী মচাক মথুম পুথোকপা অমদি সর্ভিসেসকা মরী লৈনবা ইকোসিস্তেম অমসু শেমগৎলি‍। ঐখোয়না স্পোর্তস সাইন্স, ইনোভেসন, মেনুফেকচরিং, স্পোর্তস কোচিং, স্পোর্তস সাইকোলোজী, অমদি স্পোর্ত ন্যুত্রিসন্দা লৈরিবা প্রোফেস্নেলশিংদা ফম্পাক অমা পীরি‍। মতম কুইদ্রিঙৈদা, লৈবাকসিদা অহানবা নেস্নেল স্পোর্তস য়ুনিভর্সিতী লিংখৎখি‍। খেলো ইন্দিয়া কেম্পেনগী মখাদা হৌজিক ঐখোয়গী মমিং লৈরবা একাদমী ৩০০ হেন্না, অমদি খেলো ইন্দিয়া সেন্তর লিশিং অমা হেন্না, অমদি সেন্তর ওফ এক্সেলেন্স ৩০ হেন্না লৈবাক শিনবা থুংনা লৈরে‍। অনৌবা নেস্নেল এজুকেসন পোলিসীদা, শান্ন-খোৎনববু মেন করিকুলমদা হাপচিন্দুনা, অঙাং ওইরিঙৈদগী হৌনা শান্ন-খোৎনববু করিয়র অমা ওইনা খনবগী মতাঙদা খঙহল্লি‍।

মরূপশিং,

চাউরাক্না পাবদা, ভারতকী শান্ন-খোৎনবগী ইন্দস্ত্রী অসি মথঙগী চহি খরসিদা লুপা করোর লাখ অমগী ময়া য়ৌরগনি‍। মসিনা ঐখোয়গী নহা মরূপশিংদা হকথেংননা কান্নবা পীগনি‍। চহি খরসিদা শান্ন-খোৎনবগী মরমদা খঙবা হেনগৎলক্লিবা অসিনা ব্রোদকাস্তিং, স্পোর্তসকী পোৎলম, স্পোর্তস তুরিজম, অমদি স্পোর্তসকী ফিরোলনচিংবা বিজিনেসশিংদা খোঙলৈ থুনা চাওখৎপা পুরক্লি‍। ঐখোয়না ভারতপু শান্ন-খোৎনবগী মচাক মথুম পুথোকপগী লমদা মরোমদোম লেপচবা ঙমহন্নবা হোৎনরি‍। হৌজিক্কী ওইনা, ঐখোয়না শান্ন-খোৎনবগী মচাক মথুম মখল ৩০০ পুথোক্লি‍। ঐখোয়না লৈবাকসিগী তোঙান তোঙানবা মফমশিংদা ইন্দস্ত্রী অসিগা মরী লৈনবা ক্লস্তরশিং শেমগৎনবা পান্দম থম্লি‍।

মরূপশিং,

খেলো ইন্দিয়া কেম্পেনগী মখাদা, লৈবাক শিনবা থুংনা শেমগৎলিবা শান্ন-খোৎনবগী ইনফ্রাস্ত্রকচর অসিনা থবক পীবগী মশক থোকপা পাম্বৈ ওইরক্লি‍। তোঙান তোঙানবা মশান্নশিংগা মরী লৈনবা তোঙান তোঙানবা স্পোর্তস লীগশিং খোঙজেল য়াঙনা চাউখৎলক্তুনা, অনৌবা থবক্কী খুদোংচাবা চা কয়া শেমগৎলি‍। মসিনা তাক্লিবদি, মহৈশঙ অমদি কলেজশিংদা লৈরিবা, শান্ন-খোৎনবগা মরী লৈনবা সেক্তরশিংদা করিয়র শেমগৎপা পাম্লিবা, ঙসিগী নহাশিংগী মফমদা হেন্না ফবা তুংলমচৎ অমা শোয়দনা লৈরগনি হায়বসিনি‍। মসিসু মোদীগী ৱাশক্নি‍।

মরূপশিং,

ঙসি, ভারতনা শান্ন-খোৎনবখক নত্তনা সেক্তর খুদিংদা মাঙজিল থারক্লি‍। অনৌবা ভারত অসিনা অরিবা রেকোর্দশিং থুগাইরি, অনৌবা মায় পাকপশিং ফংলি, অমদি অনৌবা পন্দোলশিং শেম্লি‍। ঐনা ঐখোয়গী নহাশিংগী পাঙ্গলদা, মখোয়গী মায় পাক্নিংবগী ইখৌ লাংবদা থাজৈ‍। ঐনা অদোমগী হনবা লৈত্রবা ফিরেপ অমদি পুক্নিংগী পাঙ্গলদা থাজবা থম্লি‍। ঙসিগী ভারত অসিদা অচৌবা মঙলানগী পান্দমশিং থম্নবা অমদি মখোয়গী ফংননবগী মতিং লৈরে‍। ঐখোয়গী মাঙদা রেকোর্দ অমত্তা খুগাইবা ঙম্লোইদবা মওংদা অচৌবা ওইদে‍। চহি অসিদা, ঐখোয়না অনৌবা রেকোর্দশিং শেমগনি, ঐখোয় ইশাগী ওইবা অনৌবা লৈইশিং চিংগনি, অমদি মালেমগী মফমদা মুত্থৎপা ঙম্লরোইদবা মমি অমা থম্লমগনি‍। ভারতনা অদোমগা লোয়ননা মাঙদা চঙশিল্লক্লিবা অসিগা লোয়ননা অদোমসু মাঙদা চঙশিনগদবনি‍। খুৎশম্নন চৎমিন্নসি, নখোয় নশাগীদমক মায় পাকউ, অমদি লৈবাক্কীদমক মায় পাকউ‍। অমুক্কা হন্না শান্নরোয় খুদিংমক্কী মফমদা ঐনা য়াইফ-পাউজেল পীজরি‍।

থাগৎচরি‍।

ঐনা খেলো ইন্দিয়া য়ুথ গেম্স ২০২৩ অসি  হৌদোক্লে হায়না লাউথোকচরি‍।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেঙবা ৱারোলদি হিন্দীদা পীখিবনি‍।

****