ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

মহারাস্ত্রগী মীয়াম্না য়াবা মুখ্য মন্ত্রী, শ্রী একনাথ শিন্দে, কেন্দ্র মন্ত্রী মন্দলগী ঐহাক্কী খোঙলোই, শ্রী অনুরাগ থাকুর, ভারতী পাৱার, নিশিথ প্রমানিক, মহারাস্ত্রগী উপ-মুখ্য মন্ত্রী, দেবেন্দ্র ফদনাবিস, অজিত পাৱারজী, সরকার অসিগী অতোপ্পা মন্ত্রী, অতোপ্পা মীথুংলেন অমদি ঐহাক্কী নহা ওইরবা মরুপশিং!

ঙসিগী নুমিৎ অসিদি য়াম্না নুংঙাইবা নুমিৎ অমনি। মীখা পোল্লিঙৈ মতমদা ভারত্তা অনৌবা থাজবা অমসুং ইনর্জী হাপীরম্বা শক্নাইরবা মীওই অদুগী মফমদা ঙসিগী নুমিৎ অসি কত্থোক্লবনি। স্বামী বিবেকানন্দ কৌবা মহাক্কুম্বা মীওই অসিগী মপোক কুমওন্দা ঐহাক্না নাশিক্তা অদোম নহা মরুপশিংগা লৈমিন্নবা ফংবসি ঐহাক্কী লাইবক ফবনি। নেস্নেল য়ুথ ফেস্তিবেল অসিগীদমক্তা ঐহাক্না পুম্নমক্কী মফমদা য়াইফ পাউজেল পীজরি। ঙসি অসি, ভারতকী নারিশক্তীগী খুদম অমা ওইরিবা রাজমাতা জিজাবাইগী মপোক কুমওন্সু তারি। রাজমাতা জিজাবাইগী মপোক কুমওন অসিদা ঐহাক্না মহারাস্ত্রগী থৌনা লৈরবা লমদম অসিদা লাকপা ফংবা অসিসু ঐহাক্না য়াম্না নুংঙাইজৈ। ঐহাক্না পুম্নমকপু কোতি-কোতি থাগৎচরি।

মরুপশিং,

মহারাস্ত্রগী লমদম অসিনা শক্নাইরবা মীওই কয়া ঙসি ফাওবদা পুথোক্তুনা লাক্লিবা অসি শুপ্নগী তান চান্নবা নত্তে, মসিদি মগুন লৈবা অমসুং থৌনা লৈবা লৈহাও অসিনা ওইহনবনি। রাজমাতা জিজাবাইগুম্বী শক্নাইরবী মীওইশিংগী খুত্থাংদগী লমদম অসিনা ছত্রপতি শিবাজী পুথোকখি, দেবী অহিলয়া হোলকর অমসুং রামাবাই অম্বেদকরগুম্বী নুপী লুচিংবী পুথোকখি, অদুগা লোকমানয়া তিলক, বীর সাবর্কর, অনন্ত কানহেরে, দাদাসাহেব পোতনিস অমসুং চাপেকার বন্ধুগুম্বা অতোপ্পা অথোইবা মীওই কয়াসু পুথোকখিবনি। ভগ্বান শ্রী রাম্না নাশিক্কী পঞ্চবতী লমদমদা শাংলবা মতম কয়া লেনখি। হন্দক্কী চহিগী জনুৱারী 22গী মমাংদা, ভারতকী লাইনীংফমশিংদা লু-নানবগী কেম্পেন অমা চত্থসি হায়না ঐহাক্না হায়জখিবনি। ঙসিদি ঐহাক্না নাশিক্কী শ্রী কালারাম লাইশঙদা দর্শন অমসুং পুজা তৌজবগী খুদোংচাবা ফংজখ্রে। লৈবাক্কী লাইনীংফম কয়াদা লু-নানবগী কেম্পেন চত্থবগী তঙাই ফদবা য়াম্না লৈ অমসুং অথুবা মতমদা শঙ্গারগদবা শ্রী রাম লাইশঙবু মীয়ামদা খুৎশিন্নদ্রিঙৈগী মমাংদা থবকশিং অসি পাংথোকসি।

ঐহাক্কী নহা ওইরিবা মরুপশিং,

ঐখোয়গী লৈবাক্কী ঋশি-মুনিদগী হৌরগা মীচম মীয়াম্না নহাগী পাঙ্গলবু মতম পুম্বদা অৱাংবা থাক্তা থাংগত্তুনা লাকখি। শ্রী ঔরোবিন্দোনা ভারতনা মশাগী পান্দম ফংগে হায়রবদি ভারতকী নহাশিংনা অমত্তা ওইনা তুংলমচত্তা চঙশিনবগী মথৌ তাগনি হায়বীরম্মি। স্বামী বিবেকানন্দনা ভারতকী তুংগী মতম অসিদি লৈবাক্কী নহাশিংগী লিচৎ-শাজৎ অমসুং মখোয়গী তৌবা ঙম্বগী মতিক্কী মখা পোনগনি হায়বীরম্মি। মখোয় অনিগী ৱাখল্লোন অসিনা ঙসি 2024 অসিদদি, নহাশিংগী অচৌবা ইথিল অমা ওইরি। ঙসিদি ভারতনা মালেমগী খ্বাইদগী চাউবা শেন্মিৎলোন মঙাগী মনুং চল্লে, মসিদি ঐখোয়গী নহাশিংগী হোৎনজমন্দগী ওইবা ঙম্লিবনি। লৈবাক্কী নহাশিংগী পাঙ্গলনা মরম ওইরগা ভারতনা স্তার্তঅপকী মকোক থোংবা ইকোসীস্তেম অহুমগী মনুং চল্লিবা, রেকোর্দ ওইরবা পেতেন্ত মশিং লৈবা, অমসুং অচৌবা মেন্যুফেকচরিং হব অমা ওইবা ঙম্লে।

মরুপশিং,

মতম্না মীপুম খুদিংদা মখোয়গী পুন্সিগী মনুংদা তোপ-তোপ্পা খুদোংচাবা অমদি শোইদনা পীবনি। হৌজিক্কী অমৃত কালগী মতমসিদি ভারতকী নহাশিংগী মদুগুম্বা তোপ-তোপ্পা খুদোংচাবগী মতম অদু ওইরি। ঙসিদি, অদোমগী নাক্তা পুৱারীদা ইশাগী মিং হক্তুনা থমহৌবগী খুদোংচাবা অদু লৈরবনি। অমুক্তা নীংশিংবীয়ু, এম বিসবেস্বরাইয়াবু নীংশিংদুনা ঐখোয়না ইঞ্জিনিয়রশিংগী নুমিৎ পাংথোক্লি। মহাক্না 19 অমসুং 20শুবা চহি-চাদা মশাগী ইঞ্জিনিয়রিং স্কিল উৎখিবা অদুগা চাংদম্নীংঙাই ওইবা ঙসি করিমত্তা লৈত্রি। ঙসি ঐখোয়না মেজর ধ্যান চান্দবু নীংশিংলি। মহাক্না হোক্কী স্তিক পায়দুনা উৎখিবা মিত্রংগুম্বা থৌওং অদু ঙসি ফাওবদা কনামত্তনা কাওবা ঙম্নদ্রি। ঐখোয়না ঙসি ভগৎ সিংহ, চন্দ্রসেখর আজাদ, বাতুকেশ্বর দত্তগুম্বা মশিং থীঙমদ্রবা য়াওল্লোইশিংবু নীংশিংলি। মখোয়না ব্রিতিশশিংবু নিকহনখিবনি। ঙসি ঐখোয়না মহারাস্ত্রগী থৌনা লৈরবা লমদম অসিদা লৈরি। খুন্নাইগী মপাঙ্গল হাপ্নবা এজুকেসনবু পাম্বৈ ওইনা শিজিন্নরম্বা মহাত্মা ফুলে, সাবিত্রী বাই ফুলেবু ঐখোয়না ঙসি নীংশিংলি। নিংতম ইহৌগী অহৌবা তাঙ্কক্তা মখোয়গুম্বা থৌনা লৈরবা মীওইশিংনা লৈবাক্কীদমক্তা থবক কয়া অমা তৌখি, মখোয়না লৈবাক্কীদমক্তা হিংখি, মশাগী থৱাইসু লৈবাক্কীদমক্তা থাদোকখি, মঙলান অমা মঙলবসু লৈবাক্কীদমক্তা মঙজখি, লৈবাক্কী মফমদা অনৌবা মাইকৈ তাক্লমখি। মখোয়না পাংথোক্লম্বা থৌদাংশিং অদু ঙসিগী অমৃত কাল অসিদা ঐখোয়না পাংথোকপা তাবনি। অমৃত কালগী মনুংসিদা অদোম্না ভারতপু অনৌবা অৱাংবা থাক অমদা পুদুনা চৎপা তাবনি। মথংগী চহি-চাগী চারোন শুরোনশিংনা অদোম্বু নীংশিংদুনা লৈহৌগদবা থবকশিং ঙসি অদোম্না পাংথোকপীয়ু। অদোমগী মিং অসি ভারত অমসুং মালেমগী পুৱারীদা সনাগী ময়েক্না ইহনবা য়াবনি। ঐহাক্তি 21শুবা চহি চাগী অদোমগুম্লবা চারোন অসি খ্বাইদগী লাইবক ফবনি হায়না খল্লি। থবকশিং অসি অদোম্না শোইদনা পাংথোকপা ঙমগনি হায়বগী থাজবা ঐঙোন্দা লৈ। ভারতকী নহাশিংদা মসিগুম্বা থৌদাং কয়া পাংথোকপগী মতিক লৈবা হায়বা ঐহাক থাজৈ। মাই ভারত লুপসিদা লৈবাক্কী কাচিন কোয়াদগী লাকপা নহা মশিং য়াম্বনা খোঙজেল য়াঙনা মিং চন্নরি। ঐখোয়গী ভারতকী নহাশিংগী মাই ভারত হৌদোক্লবা মতুংদা পাংথোকপা নহাশিংগী থৌরম অসি মসিনা অহানবা ওইরি। লুপ অসি শেমখিবা নুমিৎ 75 ফাওবা মপুং ফাদ্রি, অদুবু লুপ অসিদা নহা করোর 1গা লাক্ষ 10না মসিদা রেজিস্তর তৌনখ্রে। অদোমগী পাঙ্গল অমসুং হৈ-শিংবনা লৈবাকপু অৱাংবা থাক্তা শোইদনা পুগনি হায়বগী থাজবা ঐঙোন্দা লৈজৈ। ঐহাক্না মাই ভারত্তা রেজিস্তর তৌরবা নহা খুদিংবু ইকায় খুম্নজরি। মাই ভারত্তা রেজিস্ত্রেসন তৌবগী মতাংদা ভারতকী নহা নুপা অমসুং নুপীশিংগী মরক্তা য়াম্না কন্না চাংয়েংনবগী মতৌ অমা ঐহাক্না উরি, কনানা হেন্না রেজিস্তর তৌবগে হায়বগী মতাংদা অঙম্বা তান্নরি। নুপানা অমুক মাঙ থাই, অদুদগী নুপীশিংনা অমুক মাঙ থাই। য়াম্না কন্না তান্নরিবজাৎনি।

মরুপশিং,

ঐখোয়গী সরকারনা হৌজিক চহি 10 মপুং ফারক্কদৌরে। হায়রিবা চহি 10 অসিদা ঐখোয়না নহাশিংগী মফমদা অতিয়াগুম্না পাক চাউরবা খুদোংচাবশিং পীনবা হোৎনদুনা লাক্লি, মখোয়গী শিংনবা খুদিংবু লৌথোক্লি। ঙসিদি, এজুকেসন ওইরো, ওন্তোপ্রিনর্শিপ নত্ত্রগা ইমর্জিং সেক্তর ওইরো, স্তার্তঅপ ওইরো, স্কিল নত্ত্রগা স্পোর্ত ওইরো, লৈবাক্কী নহাশিংবু শৌগৎনবগীদমক্তা সেক্তর খুদিংগী দাইনামিক ওইবা ইকোসীস্তেম শেমগৎলি। অদোমগী মফমদা 21শুবা চহি-চাগা চুনবা এজুকেসন ফংহন্নবগীদমক্তা অনৌবা এজুকেসন পোলিসী শেমখি, চৎনবসু হৌখ্রে। লৈবাক অসিদা নহাশিংগী ওইবা মতমগা চুনবা স্কিলিং ইকোসীস্তেম অমা শেম্বগী থবক পায়খৎলি। খুৎ-শা হৈবগী মহৈনা অঙকপা থবক কয়া পাংথোকপা ঙম্বা নহাশিংগীদমক্তা পি.এম. বিশ্বকর্মা য়োজনা হৌদোকখ্রে। পি.এম. কৌশল বিকাস য়োজনাগী মতেংদগী নহা কয়াবু স্কিলগা মরী লৈনহল্লে। লৈবাক অসিদা অনৌবা IIT, NIT কয়া লেপ্তনা হাংদোক্লি। মালেম্না ঙসিদি ভারতপু স্কিল হৈবা অনৌবা ৱর্কফোর্স অমা ওইনা উনরি। মীরম লৈবাক্তা ভারতকী নহাশিংনা মখোয়গী স্কিল উৎপা ঙমহন্নবগীদমক্তা সরকারনা মীরমদা চৎকদৌবা নহাশিংগী স্কিল ত্রেনিং পীরি। ফ্রান্স, জর্মনী, য়ু.কে., ওস্ত্রেলিয়া, ইতালীগুম্বা য়াম্লবা লৈবাকশিংগী মরক্তা সরকারনা পুরকখিবা মোবিলিতীগী য়ানবশিংদগী ঐখোয়গী নহাশিংনা খুদোংচাবা কয়া ফংলগনি।

মরুপশিং,

ঙসিদি, খুদোংচাবগী অনৌবা ইপাক অমা নহাশিংগীদমক্তা হাংদোক্লে অমসুং সরকারনা মশাগী লৈজবা পাঙ্গলগা লোয়ননা মসিগীদমক্তা থবক পায়খৎলি। লৈবাক্কী দ্রোন সেক্তরগী ওইবা কাঙলোনশিং লাইথোকহল্লে। সরকারনা ঙসি এনিমেসন, গেমিং, কোমিক, ভিজুএল ইফেক্ত, এতোমিক, স্পেস অমসুং মেপ্পিংগুম্বা সেক্তরশিংবুসু খুমাং চাউশিনহল্লি। ঙসিদি, মমাংগী সরকারগা চাংদম্নবদা, সেক্তর খুদিংদা শরুক অনি-অহুম হেনবা খোঙজেলদা থবক পায়খৎলি। চাউর-চাউরবা হাইৱে শারিবশিং অসি কনাগীদমক্তনো? অদোমগীদমক্তনি। ভারতকী নহাশিংগীদমক্তনি। বন্দে ভারতকী অনৌবা ত্রেন কয়া চেনবা হৌহল্লিবসি কনাগীদমক্তনো” অদোম নহাশিংগীদমক্তনি। ভারতকী নহাশিংনা মীরমদা চৎপা মতমদা, মফমদুগী হিথাংফম, এয়রপোর্ত উবদা মসিগুম্বা চাউখৎপা থৌওংশিং অসি ভারত্তা করম্বা মতমদা ওইথোক্লক্কনি হায়না খন্নরম্মিবনি। ঙসিদি, ভারতকী এয়রপোর্তশিংনা মালেমগী অচৌবা এয়রপোর্ত কয়াগা চাংদম্নবা ঙম্লে। কোরোনাগী মতমদা ভেক্সিন কাপ্পগী সর্তিফিকেত অসি মীরমদদি চেদা নমদুনা পীনবনি। ভেক্সিন কাপ্লবা মতুংদা দিজিতেল সর্তিফিকেত পীবসি ভারত লৈবাক অসিনি। মসিদি অদোম্না শোইদনা উরম্লগনি। মালেমগী খ্বাইদগী চাউখৎপা লৈবাকশিংদা ইন্তর্নেত শিজিন্নবা মতমদা দেতাগী মমল খল্লুবদা অনিরক অহুম্লক খন্নরিবনি। অদুগা দেতা মমল হোঙনা শিজিন্নবদি অদোম ভারতকী নহাশিংনি। মসিমক মালেমগী মীয়াম্না অঙকপা অমা ওইনা লৌনরিবনি। মখোয়না খনবা ঙম্বগী ৱাংমদা লৈরিবনি।

মরুপশিং,

ঙসিদি, লৈবাক্কী মওং-মতৌ পুম্নমক নহাগী মওং-মতৌমক্কা মান্নরে। অদুগা নহা ওইবশিংদি মনিং হন্দুনা কৈদৌনুংদা চত্তবনি, লম্বী য়াত্তুনা লুচিংদুনা চৎপনি। মরম অদুনা, ভারতনা তেক্নোলোজীগী হীরমদা লুচিংবা অমা ওইরক্লিবনি। চন্দ্রয়ান 3 অমসুং অদিত্য L1 মিসনগী মায় পাকপগী ৱারী ঐখোয়গী মাঙদা লৈরে। ‘ভারত্তা শাবা’ INS বিক্রান্তনা সমুদ্রগী ইপাক্তা থৌদখিবদা ঐখোয় পুম্নমক্না চাউথোকচরিবনি। নিংতম্বা নুমিত্তা লাল কিলাদগী লৈবাক অসিদা শাজবা তোপ কাপ্লকপা মতমদা লৈবাক অসিদা অনৌবা ইথিলনা পুম্থন থল্লিবনি। ভারত্তা শাবা তেজস ফাইতর প্লেন্না অতিয়া শেগাইদুনা পাইবা মতমদা ঐখোয়না নুংঙাইবগী মপান নাইবা নত্তে। লৈবাক্কী অপীকপা দুকানশিংদগী হৌরগা খ্বাইদগী চাউরবা শোপ্পিং মোলশিংদা UPI পাক্তক্ননা শিজিন্নরি অমসুং মসিদসু মালেম্না ঙক্না য়েংনরি। অমৃত কাল লাকপনা ভারতপু চাউথোকচহল্লে। লৈবাক্কী নহাশিংনা ভারতপু অমৃত কাল মনুংদা ‘বিকশিৎ ভারত’ অমা ওইহন্নবা তুংলমচত্তা পুবা তাবনি।

মরুপশিং,

হৌজিক্কী মতমসিদি অদোম নহাশিংনা ইশাগী মঙলানবু মশা পালহনবগী মতম্নি। ঐখোয়না হৌজিক শিংনবা কয়াগী ৱারোইশিন পুরকপা খক্তা নত্তনা, ইশাগী ওইবা অনৌবা অচৌবা পান্দম কয়া থমফম থোক্লি। ঐখোয়না ত্রিলিয়ন দোল্লর 5কী শেন্মিৎলোন অমা ওইবা হায়বা পান্দম মাঙদা থম্লে। আত্মানির্ভর ভারত অভিয়ানগী মঙলান ঐখোয়না মঙফাওহনবা তাবনি। সর্ভিস অমসুং IT সেক্তরদা তৌবগুম্না, ভারতপু মালেমগী মেন্যুফেকচরিং হব অমা ওইহনবা তাবনি। মসিগুম্বা পান্দমশিং অসিগা লোয়ননা তুংগী মতমগা মরী লৈননা ঐখোয়গী থৌদাং কয়া অমা লৈ। ক্লাইমেত চেঞ্জ থোকহন্দনবা থবক তৌবা অমসুং নেচরেল ফার্মিংবু খুমাং চাউশিলহনবা হায়বা অনৌবা পান্দমগী মতাংদসু ঐখোয়না কন্না হোৎনবা তাবনি।

মরুপশিং,

ঙসিগী অমৃত কালগী নহা ওইরিবা চারোন শুরোনশিংদা ঐহাক্না থাজবা চাউনা থম্বগী মরম অমা লৈ। মতমসিগী মনুংদা, মীখা পোনবগী পোৎলুম অমসুং ইথিলদগী মপুং ফানা নিংতম্লবা অনৌবা চারোন শুরোন অমা লৈবাক অসিদা শেম শারি। হৌজিক্কী চারোন শুরোনগী নহাশিংনা মশাদা থাজবগা লোয়ননা চাউখৎপা পুরক্লসি অমসুং হেরিতেজপুসু ঙাক শেল্লসি হায়বা ৱাফম অমসু থম্লি। ঐখোয়গী লৈবাক্কী য়োগ অমসুং অয়ুর্বেদবু মালেম্না ঐখোয়গী শক্তাক ওইনা লৌনরি। অদুবু, নিংতম্বা মতুংদা মসিবু মতম খরা কাওনরুরে। ঙসিদি মালেম্না য়োগ অমসুং অয়ুর্বেদগী মগুন খঙলক্লে অমসুং ভারতকী নহাশিংনা য়োগ অমসুং অয়ুর্বেদগী ব্রান্দ এম্বেসেদরসু ওইনরি।

মরুপশিং,

অদোম নহাশিংনা অদোমগী মপু-মধৌশিংদা মখোয়গী মতমদা চাকখুমদা থোংনরম্বা বাজ্রাগী তল, কোরো-কুতকী, রাগী-জোৱারগী মতাংদা হংবীয়ু। মসিগুম্বা চিঞ্জাক্কা লাইরবগা মরী লৈনহল্লম্লিবা অসিদি মীখা পোনবগী ৱাখল্লোন অদুননি অমসুং মখোয়বু চাকখুমদগী লাপথোকহনখ্রে। অদুবু সরকার অসিনা মিল্লেত অমসুং অপৌবা হৱাই-চেংৱাইবু সুপরফুদ হায়বা অনৌবা শক্তাক অমা পীরে অমসুং মখোয়না শ্রী অন্না হায়রদুনা ভারতকী ইমুংশিংদা অমুক হঞ্জিল্লক্লে। হৌজিক্তি অদোম্না মসিগুম্বা শ্রী অন্না অসিগী ব্রান্দ এম্বেসেদর ওইগদবনি। মসিদগী অদোমগী হকশেলসু ফগৎলগনি অমসুং মসিদগী লৈবাক্কী অপীকপা লৌমীশিংসু কান্নবা য়াম্না ফংনরগনি।

মরুপশিং,

ঐহাক্না লোইশিল্লকপা ওইনা, রাজনীতিগী মিৎয়েংদগী লৈবাক সেবা তৌবগী ৱাফম অমা থমজনীংই। ঐহাক্না মালেমগী লুচিংবা নত্ত্রগা ইনভেস্তরশিংগা উন্নবা খুদিংদা, ঐহাক্কী ইফমদা তোঙানবা অমসুং অনৌবা থাজবা অমা লাকই। মসিগী থাজবা অসিগী মরম অমা লৈ, মদুদি ভারত অসি গনতন্ত্রগী মমা ওইবগীনি। নহাশিংনা গনতন্ত্রগী থৌরমশিংদা মশিং য়াম্না শরুক য়াবা হেল্লিবমখৈ, লৈবাক অসিগী তুংগী মতম্না য়াইফবা হেনগদৌরিবনি। অদোম্না রাজনীতিদা শরুক য়ারকপা মতমদা, শাগৈগী রাজনীতিগী চৎনবী থুগাইবা ঙমগনি। শাগৈগী রাজনীতিনা লৈবাক অসিদা কয়া য়াম্না শোকহল্লি হায়বা অদোমসু খঙলম্লগনি। লোকতন্ত্রদা শরুক য়াবগী অতোপ্পা পাম্বৈ অমদি ইশাগী অপাম্ববু ভোত থাদদুনা ফোংদোকপা অসিনি। অদোমগী মরক্তা অহানবা ওইনা ভোত থাদগদৌরিবা মীওই কয়া অমা য়াওরমগনি। অহানবা ওইবা ভোত থাদবা মীওইশিংনা ঐখোয়গী গনতন্ত্রদা অনৌবা পাঙ্গল অমসুং ইথিল পীগনি। অদুনা ভোত থাদবা য়ানবগীদমক্তা তঙাই ফদবা থবক খুদিংমক পাংথোকপীহৌরো। অদোমগী রাজনীতিগী ৱাখল্লোন ফোংদোকপদগী হেন্না মরু ওইবা থৌওং অমদি লৈবাক্কী য়াইফবা তুংগী মতম অমগীদমক্তা ইশাগী ভোত থাদবা অসিনি। মসিনা অদোম্বু অপুনবা পথাপ অসিগী শরুক ওইহল্লি।

মরুপশিং,

অমৃত কালগী মথংগী চহি 25 অসিদি অদোমগী ইশাগী থৌদাং পাংথোকপগী মতম্নি। অদোম্না ইশাগী থৌদাংনা খ্বাইদগী মরু ওইনা অমসুং ৱাংনা থম্লবা মতমদা, খুন্নাই অমসুং লৈবাক্না চাউখৎলক্কনি। অদুগা অদোম্না মতম পুম্বদা নীংশিংগদবা ৱাফম খরা অমুক লৈরি। য়ারিবমখৈ লোকেল পোত্থোক শিজিন্নবীয়ু, ভারত্তা শাবা পোত্থোকখক শিজিন্নবীয়ু, নিশাদগী লাপথোক্না লৈবীয়ু, অমসুং ইমা, ইচে, ইচলগী মিং পন্দুনা ঙাঙবা অকাম্পেৎকী মাইয়োক্তা লেপ্পীয়ু অমসুং মসিগুম্বা ফত্তশিংবু লোইশিনবীয়ু।

মরুপশিং,

ঐখোয়গী লৈবাক্কী নহা খুদিংনা মশাগী থৌদাং খুদিংমক থম্মোই শেংনা পাংথোক্কনি হায়বগী ঐহাক্না থাজবা থম্মি। মপাঙ্গল লৈবা, মতিক লৈবা অমসুং মথৌনা লৈবা ভারত অমা শেম্নবা ঐখোয়না থানগদৌরিবা থাউমৈ অসিনা শিবা নাইদবা য়ুগ অসিদা মালেমগীদমক্তা থানবা মুৎপা নাইদ্রবা থাউমৈ অমা ওইগনি। মসিগুম্বা ৱাখল্লোন অমসুং থাজবা অসিগা লোয়ননা অদোম খুদিংবু অমুক্কা হন্না থাগৎচরি।

ভারত ইমানা য়াইফরে। খুদুম চেৎনা তাশিন্দুনা অদোম্না ইশাগী লৈজবী পাঙ্গলগা লোয়ননা ইশাগী রাজ্যদগী মফমসিদা লাক্লি, মফম অদু ফাওবা য়ৌনবা হৌনা অমুক্তং লাওমিন্নসি।

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

বন্দে মাতরম,

বন্দে মাতরম,

বন্দে মাতরম,

বন্দে মাতরম,

বন্দে মাতরম,

বন্দে মাতরম,

বন্দে মাতরম,

বন্দে মাতরম,

বন্দে মাতরম।

থাগৎচরি।

***