ସାଥିମାନେ,

ମୁଁ ଆପଣ ସମସ୍ତଙ୍କ ସହ କଥା ବାର୍ତ୍ତା କରି  ପ୍ରକୃତରେ ବହୁତ ଆନନ୍ଦିତ ହେଲି | ମୁଁ ଖୁସି ଯେ ଦେଶର ଯୁବପିଢ଼ି ଦେଶର ସାମ୍ପ୍ରତିକ ଆହ୍ୱାନର ସମାଧାନ ପାଇଁ ଦିନ ରାତି କାମ କରୁଛନ୍ତି । ଅତୀତର ହ୍ୟାକାଥନରୁ ମିଳିଥିବା ସୂଚନା ଅନୁଯାୟୀ ସମାଧାନ ବହୁତ ପ୍ରଭାବଶାଳୀ ହୋଇଥିଲା । ହ୍ୟାକାଥନରେ ଭାଗ ନେଇଥିବା ଅନେକ ଛାତ୍ରଛାତ୍ରୀ ନିଜର ଷ୍ଟାର୍ଟଅପ୍ ମଧ୍ୟ ଆରମ୍ଭ କରିଛନ୍ତି। ଏହି ଷ୍ଟାର୍ଟଅପ୍ ଏବଂ ସମାଧାନ ଉଭୟ ସରକାର ଏବଂ ସମାଜକୁ ସାହାଯ୍ୟ କରୁଛି । ଆଜି ଏହି ହ୍ୟାକାଥନରେ ଅଂଶଗ୍ରହଣ କରୁଥିବା ଦଳ ହଜାର ହଜାର ଛାତ୍ରଛାତ୍ରୀଙ୍କ ପାଇଁ ପ୍ରେରଣା ପାଲଟିଛନ୍ତି।

ସାଥିମାନେ,

ଏକବିଂଶ ଶତାବ୍ଦୀର ଭାରତ 'ଜୟ ଯବାନ, ଜୟ କିଷାନ, ଜୟ ବିଜ୍ଞାନ ଏବଂ ଜୟ ଅନୁସନ୍ଧାନ'ର ମନ୍ତ୍ର ନେଇ ଆଗକୁ ବଢ଼ୁଛି। ପ୍ରତ୍ୟେକ ଭାରତୀୟ ଏହି ମାନସିକତାରୁ ବାହାରି ଆସିଛନ୍ତି ଯେ କିଛି ହୋଇପାରିବ ନାହିଁ ଏବଂ ଦେଶ ବଦଳିପାରିବ ନାହିଁ । ଏହି ନୂତନ ଆଭିମୁଖ୍ୟ ଯୋଗୁଁ ଭାରତ ଗତ ୧୦ ବର୍ଷ ମଧ୍ୟରେ ଦଶମ ବୃହତ୍ତମ ଅର୍ଥନୀତିରୁ ପଞ୍ଚମ ବୃହତ୍ତମ ଅର୍ଥନୀତିରେ ପରିଣତ ହୋଇପାରିଛି। ଆଜି ସାରା ବିଶ୍ୱରେ ଭାରତର ୟୁପିଆଇ ଚର୍ଚ୍ଚାର ବିଷୟ ପାଲଟିଛି । କରୋନା ମହାମାରୀର ସଙ୍କଟ ସମୟରେ ଭାରତ ମେଡ୍ ଇନ୍ ଇଣ୍ଡିଆ ଟିକା ଉଦଭାବନ କରିଥିଲା। ଭାରତ କେବଳ ନିଜ ନାଗରିକଙ୍କୁ ମାଗଣା ଟିକା ଦେଇନାହିଁ ବରଂ ବିଶ୍ୱର ଅନେକ ଦେଶକୁ ଟିକା ମଧ୍ୟ ଯୋଗାଇଦେଇଛି ।

ସାଥିମାନେ,

ଆଜି ଏଠାରେ ବିଭିନ୍ନ କ୍ଷେତ୍ରର ଯୁବ ଉଦ୍ଭାବକ ଓ ପ୍ରଫେସନାଲ ଅଛନ୍ତି। ଆପଣମାନେ ସମସ୍ତେ ସମୟର ମହତ୍ତ୍ୱ ବୁଝିଛନ୍ତି ଏବଂ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଲକ୍ଷ୍ୟରେ ପହଞ୍ଚିବାର ଅର୍ଥ କ'ଣ । ଆଜି ଆମେ ଏମିତି ଏକ ଟର୍ଣ୍ଣିଂ ପଏଣ୍ଟରେ ପହଞ୍ଚିଛୁ ଯେଉଁଠି ଆମର ପ୍ରତ୍ୟେକ ପ୍ରୟାସ ଆଗାମୀ ହଜାରେ ବର୍ଷ ପାଇଁ ଭାରତର ଭିତ୍ତିଭୂମିକୁ ସୁଦୃଢ଼ କରିବ । ଏହି ଅନନ୍ୟ ସମୟର ମହତ୍ତ୍ୱକୁ ଆପଣ ଅନୁଭବ କରିବା ଉଚିତ୍ । ଏହା ଅନନ୍ୟ କାରଣ ଅନେକ କାରଣ ଏକାଠି ହେଉଛି । ଆଜି ଭାରତ ବିଶ୍ୱର ସବୁଠାରୁ କନିଷ୍ଠ ଦେଶ ମାନଙ୍କ ମଧ୍ୟରୁ ଅନ୍ୟତମ । ଆଜି ଭାରତରେ ବିଶ୍ୱର ସବୁଠାରୁ ବଡ଼ ପ୍ରତିଭା ପୁଲ୍ ରହିଛି। ଆଜି ଭାରତରେ ଏକ ସ୍ଥିର ଓ ଶକ୍ତିଶାଳୀ ସରକାର ରହିଛି। ଆଜି ଭାରତର ଅର୍ଥନୀତି ରେକର୍ଡ ଗତିରେ ଅଭିବୃଦ୍ଧି ହାସଲ କରୁଛି। ଆଜି ଭାରତରେ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଉପରେ ଅଭୂତପୂର୍ବ ଗୁରୁତ୍ୱ ଦିଆଯାଉଛି ।

ସାଥିମାନେ,

ଏହି ସମୟ ହେଉଛି ଯେତେବେଳେ ଟେକ୍ନୋଲୋଜି ଆମ ଜୀବନର ଏକ ଗୁରୁତ୍ୱପୂର୍ଣ୍ଣ ଅଂଶ ପାଲଟିଯାଇଛି । ଆଜି ଆମ ଜୀବନରେ ଟେକ୍ନୋଲୋଜିର ପ୍ରଭାବ ଅତୁଳନୀୟ ଯାହା ଅତୀତରେ କେବେ ନଥିଲା । ପରିସ୍ଥିତି ଏପରି ହୋଇଛି ଯେ ଆମେ ଗୋଟିଏ ଟେକ୍ନୋଲୋଜି ରେ ଆରାମଦାୟକ ହେବା ପୂର୍ବରୁ ଏକ ଉନ୍ନତ ସଂସ୍କରଣ ଆସିଥାଏ । ତେଣୁ ଆପଣଙ୍କ ଭଳି ଯୁବ ଉଦ୍ଭାବକଙ୍କ ଭୂମିକା ଗୁରୁତ୍ୱପୂର୍ଣ୍ଣ।

ବନ୍ଧୁଗଣ,

ସ୍ୱାଧୀନତାର 'ଅମୃତ କାଳ' ଅର୍ଥାତ୍ ଆଗାମୀ ୨୫ ବର୍ଷ କେବଳ ୨୦୪୭ ମସିହା ଆଡ଼କୁ ଦେଶର ଯାତ୍ରା ନୁହେଁ ବରଂ ଆପଣଙ୍କ ଜୀବନର ଗୁରୁତ୍ୱପୂର୍ଣ୍ଣ ବର୍ଷଗୁଡ଼ିକୁ ମଧ୍ୟ ଦର୍ଶାଉଛି। ଉଭୟ ଯାତ୍ରା ଏକାସାଙ୍ଗରେ ଚାଲିଛି। 'ବିକଶିତ ଭାରତ' ଗଠନ ପାଇଁ ଆମ ସମସ୍ତଙ୍କୁ ମିଳିମିଶି କାମ କରିବାକୁ ପଡ଼ିବ। ଏବଂ ଆପଣଙ୍କର ସବୁଠାରୁ ବଡ ଲକ୍ଷ୍ୟ ହେଉଛି ଭାରତର ଆତ୍ମନିର୍ଭରଶୀଳତା । ଆମ ଭାରତ କିପରି ଆତ୍ମନିର୍ଭରଶୀଳ ହୋଇପାରିବ? ଆପଣଙ୍କର ଲକ୍ଷ୍ୟ ହେବା ଉଚିତ ଯେ ଭାରତକୁ କୌଣସି ଟେକ୍ନୋଲୋଜି ଆମଦାନୀ କରିବାକୁ ପଡିବ ନାହିଁ ଏବଂ କୌଣସି ଟେକ୍ନୋଲୋଜି ପାଇଁ ଅନ୍ୟ ଉପରେ ନିର୍ଭର କରିବାକୁ ପଡିବ ନାହିଁ । ମୁଁ ଆପଣଙ୍କୁ ପ୍ରତିରକ୍ଷା କ୍ଷେତ୍ରର ଏକ ଉଦାହରଣ ଦେବାକୁ ଚାହୁଁଛି । ବର୍ତ୍ତମାନ ଭାରତ ପ୍ରତିରକ୍ଷା ଜ୍ଞାନକୌଶଳରେ ଆତ୍ମନିର୍ଭରଶୀଳ ଦିଗରେ କାମ କରୁଛି । ତଥାପି ପ୍ରତିରକ୍ଷା ଜ୍ଞାନକୌଶଳର ଅନେକ ଦିଗ ରହିଛି ଯାହାଆମକୁ ଆମଦାନୀ କରିବାକୁ ପଡ଼ିବ। ସେହିପରି ଉତ୍ପାଦନ କ୍ଷମତା ବୃଦ୍ଧି ପାଇଁ ସେମିକଣ୍ଡକ୍ଟର ଓ ଚିପ୍ ଟେକ୍ନୋଲୋଜିରେ ଆତ୍ମନିର୍ଭରଶୀଳ ହେବା ର ଆବଶ୍ୟକତା ରହିଛି। କ୍ୱାଣ୍ଟମ ଟେକ୍ନୋଲୋଜି ଏବଂ ହାଇଡ୍ରୋଜେନ ଶକ୍ତି ଭଳି କ୍ଷେତ୍ରରେ ଭାରତର ଉଚ୍ଚ ଆକାଂକ୍ଷା ରହିଛି । ଏକବିଂଶ ଶତାବ୍ଦୀ ପାଇଁ ଏକ ଆଧୁନିକ ଇକୋସିଷ୍ଟମ ସୃଷ୍ଟି କରି ସରକାର ଏହି ସବୁ କ୍ଷେତ୍ର ଉପରେ ଗୁରୁତ୍ୱ ଦେଉଛନ୍ତି । କିନ୍ତୁ ଏହାର ସଫଳତା ଆପଣଙ୍କ ଭଳି ଯୁବ ମନର ସଫଳତା ଉପରେ ନିର୍ଭର କରେ ।

ସାଥିମାନେ,,

ଆଜି ସମଗ୍ର ବିଶ୍ୱର ନଜର ଆପଣଙ୍କ ଭଳି ଯୁବକମାନଙ୍କ ମନ ଉପରେ ରହିଛି । ବିଶ୍ୱ ବିଶ୍ୱାସ କରୁଛି ଯେ ଭାରତ ବିଶ୍ୱସ୍ତରୀୟ ଆହ୍ୱାନଗୁଡିକର ସ୍ୱଳ୍ପ ମୂଲ୍ୟରେ, ଗୁଣବତ୍ତା, ସ୍ଥାୟୀ ଏବଂ ସ୍କେଲେବଲ୍ ସମାଧାନ ପ୍ରଦାନ କରିବ । ଆମର ଚନ୍ଦ୍ରଯାନ ଅଭିଯାନ ବିଶ୍ୱର ଆଶାକୁ ବହୁତ ବଢାଇଦେଇଛି । ଏହି ଆଶାକୁ ଦୃଷ୍ଟିରେ ରଖି ଆପଣଙ୍କୁ ବିଭିନ୍ନ କ୍ଷେତ୍ରରେ ନୂତନ ଜ୍ଞାନକୌଶଳ ର ଉଦ୍ଭାବନ କରିବାକୁ ପଡିବ । ଦେଶର ଆଧୁନିକ ଆବଶ୍ୟକତାକୁ ଦୃଷ୍ଟିରେ ରଖି ଆପଣଙ୍କୁ ନିଜର ଗତିପଥ ନିର୍ଦ୍ଧାରଣ କରିବାକୁ ପଡିବ ।

ସାଥିମାନେ,

ସ୍ମାର୍ଟ ଇଣ୍ଡିଆ ହ୍ୟାକାଥନ୍ ର ଲକ୍ଷ୍ୟ ହେଉଛି ଦେଶର ସମସ୍ୟାର ସମାଧାନ କରିବା ଏବଂ ସମାଧାନ ମାଧ୍ୟମରେ ରୋଜଗାର ସୃଷ୍ଟି କରିବା । ହ୍ୟାକାଥନ୍ ସମାଧାନର ଏକ ଶୃଙ୍ଖଳା ଚଳାଇଛି। ସ୍ମାର୍ଟ ଇଣ୍ଡିଆ ହାକାଥନରୁ ଦେଶର ଯୁବପିଢ଼ି 'ବିକଶିତ ଭାରତ'ର ସମାଧାନର ବାଟ ବାହାର କରୁଛନ୍ତି। ଆପଣ ମାନଙ୍କ ଉପରେ, ଦେଶର ଯୁବପିଢିଙ୍କ ଉପରେ ମୋର ଅତୁଟ ବିଶ୍ୱାସ ରହିଛି । ଯେତେବେଳେ ବି ଆପଣ କୌଣସି ସମସ୍ୟାର ସମାଧାନ ଖୋଜିବାକୁ ଚେଷ୍ଟା କରନ୍ତି ଏବଂ ନୂତନତା ବାହାର କରନ୍ତି, ସେତେବେଳେ ଆପଣ ସର୍ବଦା 'ବିକଶିତ ଭାରତ' ଏବଂ 'ଆତ୍ମନିର୍ଭର ଭାରତ'ର ସମାଧାନ କୁ ଧ୍ୟାନରେ ରଖିବା ଉଚିତ୍ । ଆପଣ ଯାହା ବି କରନ୍ତୁ, ତାହା ଶ୍ରେଷ୍ଠ ହେବା ଉଚିତ୍ । ତୁମକୁ ଏପରି ଭାବରେ କାମ କରିବାକୁ ପଡିବ ଯେ ଦୁନିଆ ତୁମକୁ ଅନୁସରଣ କରେ | ପୁଣି ଥରେ ଆପଣ ସମସ୍ତଙ୍କୁ ଶୁଭେଚ୍ଛା !

ଆପଣମାନଙ୍କୁ ବହୁତ ବହୁତ ଧନ୍ୟବାଦ!

ଅସ୍ୱୀକାର: ଏହା ହେଉଛି ପ୍ରଧାନମନ୍ତ୍ରୀଙ୍କ ଭାଷଣର ଆନୁମାନିକ ଅନୁବାଦ । ମୂଳ ଭାଷଣ ହିନ୍ଦୀରେ ଦିଆଯାଇଥିଲା।

*****

NS/SLP