মরূপশিং,

তশেংনমক, ময়ামগা ৱারী শানবদা ঐ য়াম্না নুংঙাই‍। লৈবাকসিগী নহা মীরোলনা লৈবাক্কী মাঙদা তাদুনা লৈরিবা শিংনবশিংগী পাম্বৈ পুথোক্নবগীদমক অহিং-নুংথিল নাইদনা হোৎনরি হায়বা খঙবদা ঐ নুংঙাইবা ফাওই‍। মমাঙদা পাঙথোকখিবা হেকাথোনশিংদা ফংখিবা পাম্বৈশিং য়াম্না কান্নবা ওইখ্রে‍। হেকাথোন্দা শরুক য়ারিবা মহৈরোয়শিং অসিনা মখোয় মশাগী স্তার্তঅপশিং লিংখৎচরি‍। হায়রিবা স্তার্তঅপশিং, পাম্বৈশিং অসিনা লৈঙাক অমদি খুন্নাই অনিমক্তা মতেঙ পাংলি‍। ৱাফমসিমক ঙসিগী হেকাথোনসিদা শরুক য়াবিরিবা কাঙলুপ, মহৈরোয় লিশিং কয়াবু পুক্নিং থৌগৎলিবা ৱাফম ওইরিবনি‍।

মরূপশিং,

২১শুবা চহিচাগী ভারতনা ঙসিদি জয় জৱান, জয় কিসান, জয় বিজ্ঞান অমদি জয় অনুসন্ধান হায়রিবা লাইৱাসি পুদুনা মাঙদা চঙশিল্লি‍। করিসু ওইথোক্লরোই, অহোংবা অমত্তা পুরকপা ঙম্লরোই হায়নরম্বা ৱাখল্লোন অদুগী ৱাংমদা ঙসিদি ভারত মচা লেপ্লরি‍। হায়রিবা অনৌবা ৱাখল্লোন অসিদা চত্তুনা, হৌখিবা চহি ১০সিদা ভারতনা মালেমগী শেন্মিৎলোন্দা ১০শুবা মফম কল্লম্বদগী ৫শুবদা কাখৎলক্লি‍। ঙসিদি ভারতকী UPI গী খোঞ্জেল মালেম পুম্বদা নিল্লি‍। কোরোনাগী লাংফমগী মতমদা ভারতন মেদ ইন ইন্দিয়া ভেক্সিন পুথোকখি‍। ভারতনা মাগী মীয়ামদা লেম্না ভেক্সিন ফংহনখি অমদি মালেমগী লৈবাক কয়াদসু ভেক্সিন য়ৌহনখি‍।

মরূপশিং,

ঙসি মফমসিদা নহা ওইরিবা ইনোভেতরশিং অমদি তোঙান তোঙানবা দোমেনগী প্রোফেস্নেলশিং তিল্লরি‍। ময়াম পুম্বসি মতমগী মরুওইবা খঙলবা ঙাক্তনি, লেপখিবা মতমদা পান্দম য়ৌনা চৎপগী ৱাহন্থোক খঙলবা ঙাক্তনি‍। ঙসিদি ঐখোয় মতমগী খোঙলৈগী লংদাই অমদা লেপ্লি, করম্বা লংদাইনো হায়বদা ঐখোয়না হোৎনরিব খুদিংমক্না ভারতকী লাক্কদৌরিবা চহি লিশিং অমগী মরায়বক লেপকদৌরিবা খোঙফমদুনি‍। অদোম্না হায়রিবা তোপ তোপ্পা মতমসিবু খঙবিয়ু‍। মতম অসি তোপ তোপ্পা ওইরিবগী মরমদি ফেক্তর কয়া অমত্তা ওইনা পুনশিল্লরি‍। ঙসি ভারতনা মালেমগী খ্বায়দগী নৌরিবা লৈবাকশিংগী মরক্তা অমা ওইরি‍। ঙসি ভারতনা মালেমগী খ্বায়দগী চাউবা হৈথোই শিংথোইবগী মকোল ওইরি‍। ঙসি ভারত্তা মরা চেৎপ মপাঙ্গল কনবা লৈঙাক অমা লৈরি‍। ঙসি ভারতকী শেন্মিৎলোন রেকোর্দ ওইবা খোঙজেলদা চেনখৎলি‍। ঙসি ভারত্তা সাইন্স অমদি তেক্নোলোজীগী লমদ অহেনবা মীৎয়েঙ চঙলি‍।

মরূপশিং,

হৌজিক অসি তেক্নোলোজীনা ঐখোয়গী পুন্সিগী অচৌবা শরুক য়মা ওইরবা মতমনি‍। ঐখোয় পুম্নমক্কী পুন্সিদা তেক্নোলোজীগী চাউরবা ইথিল অমা লৈরিবসি মমাঙদা অমুক্তা লৈখিদ্রি‍। ওইরিবা ফীভমসিদি ঐখোয়না তেক্নোলোজী অমগী মরমদা মমুৎ তানা খঙবা ফাওবা ঙমদ্রিঙৈদা, মদুগী অপদেত তৌরবা ভর্জন অমা অমুক থোক্লক্কনি‍। মরম অসিনা অদোমগুম্বা নহা ওইরিবা ইনোভেতরশিংগী থৌদাং য়াম্না চাওই‍।

মরূপশিং,

আজাদী কা অমৃৎকাল হায়বদি লাক্কদৌরিবা চহি ২৫ অসি লৈবাক অসিগী ২০৪৭ ফাওবগী খোঙচৎ লোয়ন-লোয়ননা অদোমগী পুন্সিগী খ্বায়দগী মরুওইবা পুন্সিগী খোঙচৎ অনি পুন্না চৎমিন্নরিবা মতম্নি‍। ভারতপু চাওখৎহন্নবগীদমক ঐখোয় পুন্না হোৎনমিন্নবা তাই‍। অদুগা মদুদা ময়ামগী খ্বায়দগী মরুওইবা পান্দমদি – আত্মনিরভর ভারত হায়বসিনা ওইগদবনি‍। ঐখোয়গী ভারত কমদৌনা মরোমদোম লেপচবা ঙমগনি? ভারতনা তেক্নোলোজী ইম্পোর্ত অমত্তা তৌবগী মথৌ তাদনবা, তেক্নোলোজী অমত্তদা ঐখোয়না অতৈদা তাংদুনা লৈতনবা হোৎনবনা অদোমগী পান্দম ওইহনগদবনি‍। দিফেন্স সেক্তরদা য়েংসি‍। ঙসি ভারতন দিফেন্স তেক্নোলোজীদা মরোমদোম লেপচবা ঙম্নবগীদমক থবক পায়খৎলি‍। অদুবু হৌজিকসু দিফেন্স তেক্নোলোজীগা মরী লৈনবা পোৎলম কয়া অমদি ঐখোয়না মপান্দগী পুশিল্লকপা মথৌ তারি‍। মতৌ অসুম্না, ঐখোয়গী মেনুফেকচরিং কেপাসিতী হেনগৎহন্নবগীদমক ঐখোয়না সেমিকন্দক্তর অমদি চিপ তেক্নোলোজীগী লমদা ইরোমদোম লেপচবা ঙম্নবা হোৎনবা তাই‍। ক্বান্তম তেক্নোলোজী অমদি হায়দ্রোজেন ইনর্জীনচিংবা সেক্তরশিংদসু ভারতনা চাউনা মঙ মঙলি‍। লৈঙাক্না অসিগুম্বা সেক্তর পুম্নমক্তা মরুওইবা মীৎয়েঙ চঙলি, ২১শুবা চহিচাগী মতমগা চুনবা ইকোসিস্তেম শেমগৎলি‍। অদুম ওইনমক মসিদা মায় পাকপা হায়বসি নহাশিংগী মায় পাকপগী মখা পোল্লি‍।

মরূপশিং,

ঙসি মালেম পুম্বগী মীৎয়েঙ অদোমগুম্বা নহাশিংগী ৱাখল লৌশিংদা থম্লিবনি‍। মালেম অসিনা ভারত্তা মালেমগী শিংনবশিংগী মমল চঙদবা, মতিক লৈবা, তুং কোইগদবা অমদি পাকথোক চাউথোকহনবা য়াগদবা পাম্বৈশিং ফংগনি হায়না থাজবা থম্লিবনি‍। ঐখোয়গী চন্দ্রয়ান মিসন্না মালেমগী থাজববু শরুক কয়া হেনগৎহল্লে‍। অদোম্না হায়রিবা থাজবশিং অদু মাঙদা থম্লগা, তোঙান তোঙানবা সেক্তরশিংদা অনৌবা তেক্নোলোজীশিং ইনোভেত তৌগদবনি‍। অদোম্না লৈবাকসিগী মতমসিগী ওইবা মথৌ তাবশিং মাঙদা থম্লগা অদোম্না চৎকদবা লম্বী লেপকদবনি‍।

মরূপশিং,

স্মার্ত ইন্দিয়া হেকাথোনগী পান্দমদি, লৈবাক্কী শিংনবশিংগী পাম্বৈ পুথোকপা অমদি পাম্বৈশিংদুনা থবক পীবা, হায়রিবা পরিং অসিদা চঙশিনবদুনি‍। স্মার্ত ইন্দিয়া হেকাথোন অসিদগী লৈবাক্কী নহাকী মতিক্না চাওখৎপা ভারতকী পাম্বৈগী থোক্লক্কদৌরিবনি‍। ঐনা ময়ামগী মফমদা, লৈবাকসিগী নহাশিংগী মতিক্তা চাউনা থাজবা থম্লি‍। অদোম্না ৱাফম অমা হেক্তা উরকপদা, পাম্বৈ অমা হেক্তা থিদোকপদা, ইনোভেসন অমা হেক্তা তৌরকপদা, অদোম্না চাওখৎপা ভারতকী ফিরেপ, মরোমদোম লেপচবা ভারতকী ফিরেপ্পু মতম পুম্নমক্তা নীংশিংগদবনি‍। অদোম্না তৌরিবা থবক খুদিংমক্তা খ্বায়দগী অফবা ওইবিয়ু‍। মালেম পুম্বনা অদোমগী তুং ইনগদবা থবক অদু অদোম্না তৌগদবনি‍। অমুক্কা হন্না ময়াম পুম্নমক্কী মফমদা য়াইফ-পাউজেল পীজরি‍ !

হন্না হন্না থাগৎচরি !

***