লৈবাক শিনবা থুংনা লৈরিবা, লৈঙাক্তা, রাজনিতিদা, অমদি খুন্নাইগী থবক থৌরমশিংদা শরুক য়াবিরিবা মীয়ামশিংনা ‘বিক্সিত ভারত সংকল্প য়াত্রা’ অসিবু মায় পাকহন্নবগীদমক মখোয়গী মমল য়াম্লবা মতম কাইথোকপিরি‍। মরম অদুনা, পার্লিয়ামেন্তকী মেম্বর অমা ওইনা, থৌরম অসিগীদমক মতম কাইথোকপা হায়বসিসু ঐগী থৌদাংনি‍। মরম অসিনা, ঙসি ঐনা পার্লিয়ামেন্তকী মেম্বর অমা ওইনা অমদি অদোমগী পাউখোল্লোয় অমা ওইনা, অদোমগুম্না থৌরম অসিদা শরুক য়ানবা লাক্লিবনি‍।

লৈবাকসিদা, লৈঙাক কয়া লাক্কনি অমদি চৎখিনি, মশিং য়াম্লবা স্কীম কয়া শেমখ্রে, খন্ন-নৈনবা কয়া লৈখ্রে, অমদি অচৌবা ৱাশক কয়াসু শক্নখ্রে‍। অদুম ওইনমক, ঐনা থেংনরকপদা অমদি অসুম য়েংজবদা পুক্নিং চঙবা খ্বায়দগী মরুওইবা ৱাফমদি লৈঙাক্কী খুজিল থৌরাংশিং অসি অপনবা অমত্তা লৈতনা পান্দম থম্লিবা বেনিফিসরীশিংগী মফমদা য়ৌহনবা হায়বসিনি‍। ‘প্রধান মন্ত্রী অৱাস য়োজনা’ হায়বসিদা, খাঙপোকশঙ অমদি পাকখনশিংদা লৈরিবা মীওইশিংগী ময়ুম মকৈ শাবিগদৌরিবনি‍। মসিগীদমক মহাক্না লৈঙাক্কী লোয়শঙশিংদা কোইচৎ চৎলুবগী মথৌ তাহল্লোইদবনি‍। মদুগী মহুত্তা লৈঙাক্না মাগী মনাক্তা চৎকদবনি‍। অদোম্না হায়রিবা থৌদাং অসি ঐগী ইফমদা শিন্নবিবগা লোয়ননা, ইমুং করোর মরিরোম্না পক্কাগী য়ুমদা লৈবা ফংলে‍। অদুম ওইনমক, কনাগুম্বা মীওই খরদি অদুমক লৈঙাক্কী কান্নবশিং অসি ফংবা ঙমদনা লৈবা ঐনা থেংনরি‍। মরম অদুনা, লৈঙাক্কী স্কীমশিংগী মতাঙদা মীয়ামগী ৱাখল্লোন তাথোক্নবা, মখোয়না ফংফম থোকপা কান্নবশিং ফংলিবরা নৎত্রগা ফংদ্রিবরা হায়বা খঙদোক্নব, অমদি থৌরাংশিং অসি শেঞ্জা থুমজা য়াওদনা মীপুক খুদিংদা য়ৌহন্নবগীদমক অমুক হন্না লৈবাক কোয়না চৎননবা ঐনা ফিরেপ লৌরে‍। ঐখোয়না অমুক্কা হন্না কোয়না চত্তুনা য়েংলবদি তশেং তশেংবা মশক অদু উবা ফংগনি‍। মরম অদুনা, ‘বিক্সিত ভারত সংকল্প য়াত্রা’ অসি, মওং অমদা, ঐগী ইশাগী ওইবা চাংয়েং অমগুম্বনি‍। ঐনা মঙখিবা মঙলান অমদি ঐনা তৌখিবা থবকশিং অদু তশেং তশেংবা ফীভমগা চানরিবরা অমদি য়ৌফম থোকপা মফমশিংদা য়ৌবা ঙম্লিবরা হায়বা খঙননবা ঐনা অদোমগী অমদি লৈবাক পুম্বগী মীয়ামগী ৱাফম তাবা পাম্মি‍। ‍

পাঙথোক্কদবা থবকশিং অদু তশেংনা পাঙথোক্লিবরা হায়বসি য়েংশিনবা মরু ওই‍। ইকুই কুইদ্রিঙৈদা অরুবা অনাবা লায়েংবদা অয়ুস্মান কার্দ শীজিন্নখিবা মীওই খরা ঐনা উনখি‍। মীওই অমা এক্সিদেন্ত অমদা শাথিনা শোকখি, অদুগা কার্দ অসি শীজিন্নরবা মতুংদা, মহাক্না মখৌ তাবা ওপরেসন তৌবা ঙমখি, অমদি হৌজিক মহাক নীংথিনা ফগৎলক্লে‍। ঐনা মঙোন্দা হংলুবা মতমদা, “ঐনা লায়েং অসিবু কমদৌনা পুবা ঙমগদৌরিবনো? হৌজিক্তি অয়ুস্মান কার্দ অসি লৈরবনিনা, ঐ থৌনা পুম্বা তাশিন খোমজিল্লগা ওপরেসন অদু তৌখিবনি‍। হৌজিক্তি ঐ করিসু তৌদ্রে”, হায়না মহাক্না হায়রকখি‍। অসিগুম্বা ৱারীশিং অসি ঐগীদমক্তদি থৌজালগী মশক্নি‍।

অফবা স্কীমশিং শেম্লিবা, চে-চাংগী থবকশিং খোঙজেল য়াঙখৎহল্লিবা অমদি ফন্দ থাদোক থাজিন তৌরিবা ব্যুরোক্রেতশিংসু ফন্দ অসি ফংফম থোকপা মীওই ৫০ নৎত্রগা ১০০দা ফংহনখিবদা মখোয়দসু অপেনবা ফাওজরি‍। খুঙ্গং লিশিং অমগী ওইগদবা ফন্দ থাদোকখ্রে‍। অদুবু মখোয়না তৌরিবা থবক্তুদা মখোয়না তশেংনা পেঞ্জরিবদি মখোয়গী থবক্তুনা কনাগুম্বা অমগী পুন্সিদা হকথেংননা অফবা ইথিল পীরুবগী পাউ তাবা মতমদুদনি‍। মখোয়না তৌখিবা থবক্কী অফবা মহৈ উবা মতমদা মখোয়দা লৈরম্বা মথুম মরাং হৌবা অদু হেনগৎলকই‍। মখোয়দা পেঞ্জবা পোক্লি‍। মরম অদুনা, ‘বিক্সিত ভারত সংকল্প য়াত্রা’না লৈঙাক্কী ওফিসরশিংদা অফবা ইথিল পীরি‍। মসিনা মখোয়বু মথৌ পাঙথোকপদা, মরুওইনা কান্নবশিং মীয়ামদা য়ৌবা উবদা মখোয়গী পুক্নিংদা হৈনিংবা হেনগৎহল্লি‍। “ঐনা অফবা থৌরাং ঐমা য়াৎখিবনি, ঐনা ফাইল অমা শেমখিবনি, অমদি পান্দম থম্লিবা বেনিফিসরীশিংদুনা কান্নবা অদু ফংলে”, হায়রদুনা ওফিসরশিংনা অপেনবা ফোঙদোক্নরি‍। জীবন জ্যোতী স্কীমগী মখাদা লায়রবা লুখ্রাবী অমগী মফমদা শেল য়ৌখ্রে অমদি মদুনা মখোয়গী অৱাবা তারবা মতমদা চাউনা মতেঙ ওইখ্রে হায়বা খঙবদা, মখোয়না অফবা থবক অমা তৌখ্রে হায়বা মখোয়না খঙজৈ‍। লৈঙাক্কী ওফিসর অমনা অসিগুম্বা ৱারীশিং তাবা মতমদা, মখোয়দা অপেনবা ফাওজৈ‍।

‘ভিক্সিত ভারত সংকল্প য়াত্রা’গী মতিক অমদি ইথিল মমুৎ তানা খঙবা মীওই মশিং য়ামদে‍। ব্যুরোক্রেত সর্কলগা মরী শম্নবা ফংলবা মীয়াম্না মসিগী মতাঙদা ৱারী শান্নবা তারুবা মতমদা, মখোয়গী অপেনবা ফোঙদোক্নরকপা মতমদা, খোঞ্জেলশিংদুগী খোন্থাংনা ঐগী ইফমদা নিল্লি‍। কনাগুম্বনা মপুরোইবা লৈখিদ্রবা মতুংদা ইখঙ খঙহৌদনা লুপা লাখ ২ ফংখিবগী ৱারী ঐনা তাখি, অমদি ইচে অমখক্না মহাক্কী য়ুমদা গ্যাস য়ৌরকপনা মহাক্কী পুন্সিদা লাখিবা অওনবগী মরমদা পাউদম্লকখি‍। ময়ামসিগী মরক্তা খ্বায়দগী মরুওইবা ৱাফমদি কনাগুম্বনা লায়রবা অমদি ইনাক খুনবগী মরক্তা লৈরম্বা লৈই অদু মুৎখ্রে হায়না হায়রকপা মীৎকুপ্তুনি‍। ‘লাইরবা মুত্থৎসি’ হায়না খোল্লাও লাঊবসিনা তোঙানবা ৱাফম অমনি, অদুগা তশেংবা অহোংবদুদি, “ঐগী য়ুমদা গ্যাস স্তোব হেক য়ৌরকপগা, লায়রবা অমদি ইনাক খুনবগী মরক্তা লৈরম্বা খেন্নবা অদু মমি শামখ্রে” হায়না হারকপা মীৎকুপ্তুদা ওইগদৌরিবনি‍।

“ঐ মওং মরিল নাইবা য়ুম অমদা লৈরে” হায়বা ৱাহৈসি কনাগুম্বা মীওই অমনা মশাদা থাজবগা লোয়ননা ফোঙদোক্লকপা মীৎকুপ্তু তশেংনা অঙকপা ফংনা নুংঙাইবা ফাওই‍। মদুদা ফাউরিবা ইথিল অদু য়াম্না চাউই, মীওইদুখক নত্তনা মাগী অঙাংশিংদসু ফাওগদৌরিবনি‍। মমাঙদদি, পাকখন অমা খল্লবা লৈবদা, অঙাংশিংনা ইকায়বা ফাওই অমদি মশানা মশাদা থাজবা ৱাৎলকই‍। হৌজিক্তি, মওং মরিল নাইবা য়ুম অমা লৈবা ফংলবদা, মখোয়গী পুন্সিদা মশাবু মপুং ফানা থাজবা ঙম্লকই‍। তশেংবা অহোংবশিং অসি বেনিফিসরীশিংগী মচিন্দগী তাবা ফংলকপা মতমদা মীৎমাঙদা চোংথোরক্কদৌরিবনি‍। মতমদুদা পুন্সি অমা তশেংনা অহোংবা পুরকপা ঙম্লে হায়না অদোক্না খঙগদৌরিবনি‍।

মখোয়গী পুন্সিদা লাক্লিবা অফবা অহোংবশিংগী মরমদা লেপ্পা লৈতনা পাউদম্লিবা গুপ্তা জীগুম্বা মীওই উবা ফংবা তশেংনা নুংঙাই‍। মীয়াম্না কান্নবশিং অদু হকথেংননা ফংবা মতমদা, বেঙ্কতগী নৎত্রগা অতৈ শেলগী তেঙবাং ওইনা লুপা ১০,০০০ বু ওইরবসু, মখোয়দা থাজবদুদি হেনগৎলক্কদৌরিবনি‍। করিগুমবা মখোয়না শেন্দোয় চাবা মীওই অমদগী শেল অদু পুরুবা থোক্লবদি মখোয় শাথিনা অৱাবা মায়োক্নগদৌরিবনি‍। মীপুম খুদিংমক্না বেঙ্ক, রেলৱেজ, লায়েংশঙ, অমদি লৈঙাক্কী ওফিসনচিংবা লোয়শঙশিংদা মশাগী মরলনি হায়বা ৱাখল্লোন ফাওদুনা চাউথোকচবা পোকহনবা হায়বসি মরুওই‍। হায়রিবা মপু ওইবগী ৱাখল্লোন অসি ফাওহল্লবা মতমদা, লৈবাক্কীদমক থৌদাং য়ানিংবগী অপাম্বা অদু পোক্লক্কদৌরিবনি‍। হোৎনরিবশিং অসি মরূ হুন্বগুম্বনি‍। মরূশিং অসিনা ঐখোয়গী ইমা ইপানা মায়োক্নরিবা খুদোংথিবশিং, ঐখোয়না থেংনরিবা শিংনবশিংবু তাক্লিবনি, অদুবু ঐখোয়না ঐখোয়গী অঙাংশিংদদি অৱাবশিং অসি থেংনহন্নিংদে‍। মমা মপা ওইবা অমত্তনা মখোয়গী মচাশিংদা মখোয়না থেংনরকপা অৱা অনাশিং থেংনহনবা পামদে‍। মখোয়না মহৈ মশিং তম্বা ফংলকত্রবসু নৎত্রগা অৱা অনা কয়া মায়োক্নজরক্লবসু, মমা মপা ওইবশিংনা মখোয়গী অঙাংশিং লাইরিক তমহন্দনা থম্বা নৎত্রগা অৱা অনাশিংদু থেংনহনবা পামদে‍। মীওই অমনা লৈঙাক্কী স্কীমশিংগী মরমদা ঈ-পাউ ফংবা ঙম্লবা মতমদা, হৌজিক অসি থবক পায়খৎপা য়ারবা মতম্নি হায়না মহাক্না খঙলক্কনি‍। অসিগুম্বা ৱাখল্লোন অসিমা মীওই বিলিয়ন ১.৪গী থম্মোয়নুংদা চঙখ্রবা মতমদা, লৈবাক অসি চিংনবা লৈতনা মাঙদা চঙশিনবা ঙমগদৌরি‍বনি‍।

লৈবাক অসিনা নীংতম্বা ফংখ্রিবসি লৈবাক শিনবা থুংনা লিংজেল মান্নবা ৱাখল্লোন অমদা চঙশিনমিন্নখিবদুননি‍। কনাগুম্বনা লং নাইগনি, অদুগা করিগীনো হংলুবা মতমদা, “নীংতম্বা ফংনবগীদমক্তনি” হায়না মখোয়না খুম্লক্কনি‍। কনাগুম্বনা মহৈ মশিং তম্বা তোক্লগা “ভারত ইমানা য়াইফরে” হায়না লাউরুগনি‍। মখোয়না পুলিসকী লীচৈ চাগনি, অদুগা মখোয়না কত্থোক্লিবদুগী মরম হংলুরবদি “লৈবাক নীং তম্বা ফংনবগীদমক্তনি” হায়না মখোয়না লাউরক্কনি‍। কনাগুম্বনা অহলশিংগী থৌগল তৌগনি অদুগা “নহাক্না করি তৌরিবনো” হংলুরগদি “নীং তম্নবগীদমক থবক তৌরিবনি” হায়না মখোয়না খুম্নলক্কনি‍। কনাগুম্বনা খাদীগী ফিরোল শেৎকনি অদুগা “নহাক্না মদু করিগীদমক তৌরিবনো” হংলুরবদি, “নীংতম্নবনি” হায়না মখোয়গী পাউখুম পীরক্কনি‍। হিন্দুস্তান্দা লৈবা মীপুম খুদিংমক্না “ঐহাক নীংতম্বা ফংনবগীদমক থবক তৌরিবনি”হায়নবা হৌরকখিবনি‍। চরা হেল্লবসু নৎত্রগা থবক কন্না শু-নোম্লবসু, অঙাংশিং মহৈ মশিং তম্বিরবসু, শিৎ-শেংবগী থবক তৌরবসু, নৎত্রগা রিক্সো থৌরবসু, পুম্নমক নীং তম্নবগীদমক তৌখিবনি‍। লৈবাকসিদা নীংতম্বা পাম্বগী অচৌবা ইহুল অমনা শিনবা থুংনা শন্দোকখিদুনা মীপুম খুদিংগী থম্মোয়নুংদা মশাদা থাজবা পোকহন্দুনা ব্রিতিসশিং থাদোক্তুনা চৎহনখি‍।

লৈবাক অসিনা মচিন তুমখৎলক্লে‍। ভারত মচা করোর ১৪০ পুম্বদা হায়রিবা ৱাখল্লোন অসি চেল্লবদি, ঐখোয়না লৈবাক অসিবু মাঙদা পুখৎপা ঙমগনি; ঐখোয় মতৌ অসুম্না মতম পুম্বদা লৈবা য়ারোই‍। পুন্সি খুদিংমক হোংবা নাইগদবনি, মীপুম খুদিংমক্কী মতিকপু ইকায় খুম্নগদবনি, অমদি মতিক অদু লৈবাক অসিবু মাঙদা পুখৎপদা শীজিন্নগদবনি‍। হায়রিবা মরূ অসি মীপুম খুদিংমক্কী পুক্নিং ৱাখলদা অমুক হুনখ্রবদি, নুংঙাই য়াইফবা ভারত অমা ২০৪৭ ফাওবগী মনুংদা শেমগৎপা ঙমগদৌরিবনি‍। অদোমগী অঙাংশিংনা মদুগী মহৈ চাবা ফংলক্লগনি‍। অসিগুম্লবা উপাল অসিগী উরুমদা অদোমগী অঙাংশিংনা শান্নবা ফংগদৌরিবনি‍, হায়বসিদা লৈবাক মীয়াম পুম্বনা ৱাখল্লোন অসি, ফিরেপ অসি লৈগদবনি, অমদি ৱাখল্লোন অসি শাগৎলবদি, পন্থুংদি লাপ্লরোই‍।

‘বিক্সিত ভারত সংকল্প য়াত্রা’ অসি রাজনিতী পার্তী অমত্তগী থবক থৌরম নত্তে‍। মসিদা শরুক য়ারিবা মীওইশিং অসি শেংলবা থবক অমা তৌরিবনি‍। মসিদা শরুক য়াহৌদবা হায়বসি ফজরবা তাঞ্জা অ্রমা মখোয়না নান্থোক্লবনি হায়বা মখোয়না খঙগদবনি‍। ঐনা লৈবাকসিগী প্রধান মন্ত্রী ওইজরবসু, ঙসি ময়ামগী মরক্তা তিনবা ফংজবদা ঐ য়াম্না হরাওই, ঙসি ‘বিক্সিত ভারত সংকল্প য়াত্রা’ অসিগী শরুক অমা ওইবা ফংজবসিদা ঐ য়াম্না নুংঙাই‍। ঐনা থবক অসি পায়খৎপদা ঐঙোন্দা অপেনবা পোকই‍। ময়ামসু মসি শোয়দনা তৌবিয়ু‍। খোঙচৎ অসিনা মথঙগী খুঙ্গং নৎত্রগা ময়োল্লম অমদা য়ৌরকপা মতমদা তরাম্না ওকপিগদবনি‍। মীপুম খুদিংমক থোরক্তুনা, বেনিফিসরীশিংগী ৱাফম তাগদবনি, মীপুম খুদিংমক্না থৌরাং অসিদগী কান্নবা লৌননবা থোরক্কদবনি, অমদি থৌরাংশিং অসিদগী কান্নবা ফংখ্রবশিংনা মখোয়গী মায় পাকখিবশিংদু চিংনবা লৈতনা ময়ামদা পাউদমবিগদবনি‍। অফবা নুংঙাইবা ৱারীশিং তম্বনসু অফবা ফীভম অমা শেমগৎকদৌরিবনি‍। মরম অসিননি ঐনা ‘বিক্সিত ভারত সংকল্প য়াত্রা অসি অচৌবা মঙলান, অচৌবা ফিরেপ অমা ওইহন্নিংলিবা, অদুগা হায়রিবা পান্দমশিং অসি ঐখোয়না কন্না হোৎনদুনা ফংহনগদবনি‍।

ময়ামগা উনদুনা ময়ামগী ৱাফমশিং তাননবগী তাঞ্জা ফংবদা ঐ নুংঙাইবা ফাওই‍। মীপুম খুদিংমক্না খোঙচৎ অসিবু হেন্না মায় পাহন্নবা থবক পায়খৎপিয়ু‍। ঐখোয়না ৱাখল্লোন অমদি থাজবা অসি লৈবাক মীয়ামগী পুক্নিংদা ফাওহনগদবনি‍। য়ুমদা শেল লৈরক্তবা মতমদা, তৌনিংবা কয়া অমা তৌবা ঙমদবা ঐখোয়না উদুনা লাক্লে‍। কনাগুম্বনা মচাশিংগী ফজবা ফুরিৎশিং লৈনিংবা ফাওই, অদুবু লৈবদি ঙমদে, মরমদি মঙোন্দা মদু কোন্ননবা শেনফম লৈতে‍। য়ুমদা থোক্লিবা অসিগুম্না লৈবাক অমদসু থোক্লিববনি‍। লৈবাকসিগীসু শেল লৈবা মথৌ তাই‍। করিগুম্বা শেল লৈরবদি লৈবাক মীয়াম খুদিংমক্কী অনিংবশিং থুংহনবা ঙমগদৌরিবনি‍। মীওই করোর মরিরোম্না য়ুম ফংখ্রে, অদুগা ৱাৎহৌরিবশিংগী মফমদসু তুংদা মখোয়গীসু য়ুম ফংগনি হায়না মোদীনা থাজবা পীজরি‍। অয়ুস্মান কার্দ পায়রবা মীওইশিংনা হিদাক লেম্না ফংলি‍। গ্যাস স্তোব মথৌ তাবা মীওইশিংনা লৈঙাক্কী মফমদগী ফংলি‍। লৈঙাক্না গ্যাস স্তোব অদুগী সবসিদীশিং পীরি‍। করিগী? মরমদি, লৈঙাক্কী মফমদা হৌজিক অদোমগী মফমদা পীননবগী মতিক লৈরে‍। চহি ২৫সিগী মনুংদা ভারতনা চাওখৎপা লৈবাক ওইরক্লবা মতমদা, হায়রিবা খুদোংচাদবশিং অসি লৈররোই, অমদি ঐখোয় অৱা অনাশিংদগী নীং তম্লগনি‍।

অদুগা হায়রিবা অৱা অনাশিংদগী নীং তম্নবগী লম্বী অদুদি ‘বিক্সিত ভারত’ অমগী পান্দম ফংহনবা অসিনি‍। মরম অদুনা, ঐনা কাসিগী মীয়ামগী মফমদা অদোমগী পাউখোল্লোয় অমা ওইনা, অদোমগী পার্লিয়ামেন্তকী মেম্বর অমা ওইনা, ঐনা লেপ্তনা থবক তৌখিগনি হায়না থাজবা পীজরি‍। মহাদেবকী থৌজালগা লোয়ননা, ঐনা লৈবাক্কী থবক তৌবদা কৈদৌঙৈদসু লৈথদুনা লৈহৌরোই‍। মহাদেবকী থৌজাল ঐখোয় পুম্নমক্কী মফমদা পীনবিবা ওইসনু, অমদি ঐখোয়গী কাসিদা খোঙচৎ অসি চাউনা মায় পাকপা ওইহনবিসনু‍। তন্থবা, পন্থবা অমত্তা লৈহল্লোইদবনি‍। ইমুং ইমুংগী মীপুম খুদিংমক্না মসিদা শরুক য়াবিয়ু‍। খোঙচৎ অসিদা কনাগুম্বা অমত্তা চিত্থহনবিগনু‍। পুং অমা নৎত্রগা অনিখক্তং ওইরবসু, থৌরমসিদদি শরুক য়াবিয়ু‍। মসিগীদমক ঐনা ময়ামগী মফমদা ‘ভিক্সিত ভারত’ অমগী ফিরেপ্তা মতেঙ পাংবিয়ু অমদি মসিবু মপাঙ্গল কনখৎহনবিয়ু হায়না হায়জরি‍। ময়ামবু হন্না হন্না থাগৎচরি‍।

খুরুমজরি !

দিসক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেংবা ৱারোলদি হিন্দীদা থমখিবনি‍।

***