ஜார்க்கண்ட் மாநிலம், ஹசாரிபாகில் இன்று நடைபெற்ற எல்லைப் பாதுகாப்புப் படையின் 59-வது அமைப்பு தின விழாவில் மத்திய உள்துறை அமைச்சரும், கூட்டுறவுத் துறை அமைச்சருமான திரு. அமித் ஷா,  சிறப்பு விருந்தினராகக் கலந்து கொண்டு உரையாற்றினார். பி.எஸ்.எஃப்-இன் வருடாந்திர இதழான 'பார்டர்மேன்' இதழையும் திரு அமித் ஷா வெளியிட்டார். இந்த நிகழ்வில் எல்லைப் பாதுகாப்புப் படை தலைமை  இயக்குநர் உள்ளிட்ட பல முக்கியப் பிரமுகர்கள் கலந்து கொண்டனர்.

"மரணம் வரை கடமை" என்பது எல்லைப் பாதுகாப்புப் படையின் முழக்கம் மட்டுமல்ல, இன்று வரை 1,900-க்கும் மேற்பட்ட எல்லைப் பாதுகாப்புப் படையினர் தங்கள் வாழ்க்கையின் உயர்ந்த தியாகங்களைச் செய்ததன் மூலம் இந்த முழக்கத்திற்கு உதாரணமாகத் திகழ்ந்துள்ளனர் என்று திரு அமித் ஷா தமது உரையில் குறிப்பிட்டார். லட்சக்கணக்கான எல்லைப்பாதுகாப்புப் படையினர் தங்கள் வாழ்க்கையின் பொற்காலத்தைக் கடினமான சூழ்நிலைகளில் தங்கள் குடும்பங்களிலிருந்து விலகி வாழ்ந்து வருவதாக அவர் கூறினார். நாட்டின் எல்லைகளைப் பாதுகாப்பதில் முதல் வரிசையாக, நாட்டின் அணுக முடியாத எல்லைகளை பி.எஸ்.எஃப் பாதுகாக்கும் விதத்தால், எல்லைப் பாதுகாப்புப் படையின்  துணிச்சலான வீரர்களைப் பற்றி நாடு பெருமிதம் கொள்கிறது என்று அவர் குறிப்பிட்டார்.

முன்னாள் பிரதமர் அடல் பிஹாரி வாஜ்பாய் ஒரு எல்லையில் ஒரு பாதுகாப்புப் படையை நிறுத்துவது என்ற முக்கியமான முடிவை எடுத்தார் என்று கூறிய திரு அமித் ஷா, இந்த முடிவின் கீழ், பாகிஸ்தான் மற்றும் பங்களாதேஷின் அணுக முடியாத எல்லைகளைப் பாதுகாக்கும் பொறுப்பு எல்லைப் பாதுகாப்புப் படையிடம் ஒப்படைக்கப்பட்டதாகவும், எல்லைப் பாதுகாப்புப் படை இந்தப் பொறுப்பை மிகச் சிறப்பாக நிறைவேற்றியுள்ளதாகவும்  கூறினார்.

ஜம்மு-காஷ்மீரின் பனிமலைப் பகுதிகள், வடகிழக்கின் மலைப்பகுதிகள், குஜராத் மற்றும் ராஜஸ்தானின் பாலைவனங்கள், குஜராத்தின் சதுப்பு நிலங்கள் அல்லது சுந்தரவனம் மற்றும் ஜார்க்கண்டின் அடர்ந்த காடுகள் என எதுவாக இருந்தாலும், எல்லைப் பாதுகாப்புப் படை எப்போதும் விழிப்புடன் இருந்து எதிரிகளின் தீய நோக்கங்களை முறியடித்துள்ளது என்று அவர் கூறினார். ஐக்கிய நாடுகள் சபையின் அமைதி காக்கும் பணிகளில் கூட சர்வதேச அளவில் துணிச்சலான சேவை தரங்களை எல்லைப் பாதுகாப்புப் படை மேற்கொண்டது என்றும் திரு ஷா கூறினார்.

பிரதமர் திரு. நரேந்திர மோடி தலைமையின் கீழ், இந்தியா அனைத்து துறைகளிலும் முன்னேற்றம் கண்டுள்ளது என்றும், நமது துணிச்சலான வீரர்களின் தியாகம், அர்ப்பணிப்பு மற்றும் வீரத்தால் நமது எல்லைகள் பாதுகாக்கப்படும்போது மட்டுமே இது சாத்தியமாகும் என்றும் திரு அமித் ஷா கூறினார். நாட்டின் எல்லைகளைப் பாதுகாக்கும் துணிச்சலான வீரர்கள் நாட்டின் வளர்ச்சிக்கு அடித்தளம் என்று அவர் கூறினார். எல்லைப் பாதுகாப்புப் படை வீரர்கள் எல்லைகளைப் பாதுகாப்பது மட்டுமல்லாமல், நாட்டின் இளைஞர்களுக்கு ஒழுக்கத்தின் செய்தியையும் வழங்குகிறார்கள் என்று திரு ஷா கூறினார். மொத்தம் 23 வீரர்களுக்கு வீரதீர பதக்கங்களும், 5 வீரர்களுக்கு மரணத்திற்குப் பிறகு பதக்கங்களும் இன்று வழங்கப்பட்டுள்ளன என்றார். இந்த 23 வீரர்களில் 11 பேருக்கு வீரதீர செயலுக்கான போலீஸ் பதக்கமும், ஒரு ராணுவ வீரருக்கு ஜீவன் ரக்ஷா பதக் விருதும், 11 ராணுவ வீரர்களுக்கு சிறப்பான சேவைக்காக குடியரசுத் தலைவரின் காவல் பதக்கமும் வழங்கப்பட்டுள்ளது. மரணத்திற்குப் பிறகு பதக்கங்களைப் பெற்ற ஐந்து தியாகிகளின் குடும்பத்தினரிடம் பேசிய திரு ஷா, அவர்களின் இழப்பை யாராலும் ஈடுசெய்ய முடியாது, ஆனால் நாட்டின் 130 கோடி மக்களும் இந்தத் தியாகிகளின் தியாகத்தைப் பற்றி எப்போதும் பெருமிதம் கொள்வார்கள் என்று கூறினார்.  1 மகாவீர் சக்ரா, 4 கீர்த்தி சக்ரா, 13 வீர் சக்ரா, 13 சவுர்ய சக்ரா உள்ளிட்ட பல பதக்கங்களையும் விருதுகளையும் பிஎஸ்எஃப் பெற்றுள்ளது என்று அவர் கூறினார்.

***

ANU/SMB/BS/AG/KPG