য়োর হায়নেসেস,

এক্সেলেন্সিজ,

ঐনা অমুক্কা হন্না ময়াম পুম্নমক্কী মফমদা তৌবিমল খঙবা উৎচরি‍। ময়াম পুম্নমক্না, পুক্নিংদা অথুপ্পা লৈতনা অদোমগী ৱাফমশিং থম্বিরি, মদুগীদমক ঐনা থম্মোয়নুংদগী তৌবিমল খঙবা উৎচরি‍।

ঐখোয়না, নই দিল্লী দিক্লারেসন্দা হীরম কয়াদা ৱাফম কয়া হৌদোকচখি‍।

ঙসি ঐখোয়না হায়রিবা ৱাফমশিং অদুবু মাঙদা পুখৎনবগীদমক অমুক হন্না ফিরেপ লৌরি‍।

ঐখোয়না চাওখৎপগী এজেন্দাগী মথক্তা, মালেমগী ওইরিবা ফীভম, মালেমগী শেন্মিৎলোন অমদি খুন্নাইগী ওইবা ৱাফমশিংদসু ৱাখল্লোন কয়া ফোঙদোক্নখি‍।

নোংচুপ এসিয়াগী লুরবা ফীভম অসিদা ময়াম পুম্নমক্কী ৱাখল্লোন তারবা মতুংদা ঐনা হায়বা ঙম্মি মদুদি জি-২০দা হীরম কয়াদা য়ানবা পুরক্লে হায়বা‍।

অহানবদা, ঐখোয় পুম্নমক্না তেরোরিজম অমদি হাৎন-শুনববু অকনবা মওংদা য়ানিংদবা ফোঙদোক্লি‍।

তেরোরিজমবু কৈদৌনুংদশু খাঙজিন্দুনা লৈরোইদবনি‍।

অনিসুবদা, ইচম চমজবা অমদি লাঞ্জদ্রবা মীওইশিং, মরুওইনা নুপী অমদি অঙাংশিং হাৎপিবা ঐখোয়না য়াদে‍।

অহুমসুবদা, মীওইবগী খুন্নাইগী ওইবা তেংবাং হেক য়ারিবমখৈ থুনা, মতিং লৈনা অমদি শাফনা য়ৌহনগদবনি‍।

মরিশুবদা, হ্যুমেনিতরিয়ন পোজ হায়বসিদা অমত্তা ওইনা য়ানবা অমদি ফাজিন্দুনা থম্লিবশিং থাদোকপগী পাউবু তরাম্না ওকখি‍।

মঙাশুবদা, ইজ্রেল অমদি পেলিস্তীনগী ৱাফমবু, তু-স্তেত সোলুসনগী খুত্থাঙদা ৱারোইশিন পুরকপা মথৌ তাই‍।

তরুকশুবদা, লম লমগী ওইবা ইং-তপ্পা অমদি মরা চেৎপা ফীভম য়াম্না মরুওই‍।

অদুগা তরেৎশুবদা, দিপ্লোমেসী অমদি ৱারী ৱাতায়খক্তনা মালেমগী লৈরিবা রাজনিতীগী থরুমশিংবু শন্তাইননবগী অমত্তা ঙায়রবা লম্বীনি‍।

মসিদা জি-২০না পাংবা য়াবা মতেঙ পুম্নমক পাংনবা থৌরাং তৌরি‍।

য়োর হায়নেস,

এক্সেলেন্সিজ,

ঐনা অমুক্কা হন্না ঐগী নুংশিরবা মরুপ, অমদি ব্রাজিলগী রাস্ত্রপতী লুলাবু জি-২০গী প্রেসিদেন্সীগীদমক য়াইফ-পাউজেল পীজরি‍।

ব্রাজিলগী প্রেসিদেন্সীদা ঐখোয়না হ্যুমেন-সেন্ত্রিক এপ্রোচকা লোয়ননা মাঙদা চঙশিনবা ঙমগনি হায়না ঐনা থাজৈ‍।

বসুদৈব কুতুম্বকমগী ৱাখল্লোন্না, অমত্তা ওইনা পুনশিন্দুনা মালেমদা ইং-তপ্পা, মরা চেৎপা অমদি চাওখৎপা পুরক্নবগী লম্বী ফংবা ঙমগনি‍।

গ্লোবেল সাউথকী থাজবশিংবুসু থবক্তা ওন্থোক্নবা মখা তানা চঙশিনখিগনি‍।

ঐখোয়না ফুদ সিক্যুরিতী, হেল্থ সিক্যুরিতী, অমদি সস্তেনেবল দিভেলপমেন্ততা মরুওইবা মীৎয়েঙ থমগনি‍।

মল্তিলেতরেল দিভেলপমেন্ত বেঙ্কশিং অমদি গ্লোবেল গভর্নেন্সপু হেন্না ফবা মওংদা শেমদোক্নবগী মায়কৈদা শোয়দনা মাঙদা চঙশিনগনি‍।

ক্লাইমেৎ এক্সনগা লোয়ন-লোয়ননা, থোং মান্নবা, অরায়বা অমদি পু-থাংবা ঙমগদবা ক্লাইমেৎ ফাইনান্স পুরক্নবগী থবক পায়খৎকনি‍।

দেত রিস্ত্রকচর তৌনবগীদমক অরোন অথুপ লৈতনা খোঙথাঙ কয়া পায়খৎকনি‍।

নুপীনা লমজিংবা চাওখৎপা, স্কিল মাইগ্রেসনগী থৌরাং, মীদিয়ম অমদি স্মোল-স্কেল ইন্দস্ত্রীশিং চাওখৎহন্নবা মথৌনা হাপ্তুনা, ত্রোইকাগী লূপ্লোয় অমা ওইনা, ঐখোয়না হৌদোকচখিবা ৱাফমশিংবু মাঙদা পুখৎনবগীদমক ঐখোয়না পায়খৎপা য়াবা খোঙথাঙ খুদিং পায়খৎকনি‍।

ঐনা ব্রাজিলগী মফমদা মখোয়গী জি-২০ প্রেসিদেন্সী মায় পাক্নবগীদমক ভারতনা মপুং ফানা মতেঙ পাংগনি হায়না থাজবা পীজরি‍।

অমুক্কা হন্না, ভারতকী জি-২০ প্রেসিদেন্সীবু মায় পাকহনবদা ময়াম পুম্নমক্না পাংবিখিবা মতেঙগীদমক থাগৎচবা ফোঙদোকচরি‍।

ময়ামবু হন্না হন্না থাগৎচরি !

***