ঙসি ৱার্ল্দ মেন্তেল হেল্থ দে ২০২৩ থৌরমগা মরী লৈননা পাংথোকপা মেন্তেল হেল্থ কনক্লেপতা য়ুনিয়ন হেল্থ মিনিস্তর দোক্তর মনসুখ মন্দাবিয়ানা হায়খি মেন্তেল হেল্থ অসি মালেমগী মীওইবগী হক অমনি। মহাক্না ভর্চুএল ওইনা নিমহান্সকী অনৌবা খুদোংচাবশিং শঙ্গাখ্রে অমসুং তেলি-মনাসকী অনৌবা লোগো হৌদোকখ্রে। থৌরম অদুদা নিতি অয়োগকী মেম্বর ভি.কে পাউল শরুক য়াখি। 

থৌরম অদুদা য়ুনিয়ন হেল্থ মিনিস্তরনা হায়খি লৈবাক অসিগী মনুং হুঞ্জিনবা মফমশিংদা লৈরিবা মীয়ামদা মেন্তেল হেল্থ কিয়ারগী খুদোংচাবশিং ফংহন্নবা পায়খৎলিবা থবকশিং অসি থাগৎনিঙাইনি। ২০১৫-১৬দা নেসনেল মেন্তেল হেল্থ সর্ভে পাংথোক্তুনা লৈবাক অসিগী অপুনবা মীশিংগী চাদা ১০ মেন্তেল হেল্থগী খুদোংচাদবা কয়া মায়োক্নরে হায়বা খঙবা ঙমখি অমসুং মসিনা মীওই কয়া, খুন্নাই অমসুং শেন্মিৎলোন্দা অকায়বা থোকহনখ্রে। মেন্তেল হেল্থতা দিজিতেল তেক্নোলোজি শীজিন্নবা অসি থৌনা হাপ্পা অমনি। হৌজিক ফাওবদা তেলি-মনাসনা মীওই ৩,৫০,০০ হেন্না কাউন্সেল্লিং পীখ্রে অমসুং তেলি মনাস সেল ৪৪গী খুৎথাংদা হৌজিক মীওই ২০০০ হেন্না কাউন্সেল্লিং পীরি। নোংমদা হেল্পলাইন অসিদা কোল ১০০০ হেন্না লাক্লি।

য়ুনিয়ন হেল্থ মিনিস্তরনা তেলি-মনাসগী লোগো হৌদোকখি অমসুং নেসনেল ইন্সতিতুৎ ওফ মেন্তেল হেল্থ এন্দ নিউরো সাইন্সেস, বেঙ্গালুরুগী প্লাতিনম জুব্লি ওদিতোরিয়ম অমসুং একাদেমিক ফেসিলিতি, নিমহান্সতা অনৌবা এদমিনিস্ত্রেতিপ ওফিস কমপ্লেক্স , সেন্তর ফোর ব্রেন এন্দ চাইল্দ শঙ্গাখি।

য়ুনিয়ন হেল্থ মিনিস্তরনা হায়খি মেন্তেল হেল্থ, নিউরোলোজিকেল দিসওর্দরশিং অমসুং সবস্তেন্স য়ুজ দিসওর্দরশিংগী মরুওইবা থবকশিং পায়খৎনবা অয়ুস্মান ভারত হেল্থ অমসুং ৱেলনেস সেন্তরশিংদা মরুওইবা হকশেলগী থবকশিংগা মেন্তেল হেল্থকী থবকশিং পুনশিল্লে। দিস্ত্রিক্ত হোস্পিতালদা লৈরিবা অখন্নবা দিস্ত্রিক মেন্তেল হেল্থ ইন্তরভেন্সন তিম্না জিলা থাক্কী থবকশিং পাংথোক্লে। মসিগী মথক্তা কম্মুনিতি হেল্থ সেন্তর অমসুং প্রাইমারি হেল্থ সেন্তরগী থাক্তা মেন্তেল হেল্থগা মরী লৈনবা অনাবশিংগী ও.পি.দি, কাউন্সেল্লিং, লায়য়েং অমসুং মেদিকেলগী মতেং পীবগী খুদোংচাবা পীরে। লৈবাক শীনবা থুংনা লৈরিবা অয়ুস্মান ভারত হেল্থ এন্দ ৱেলনেস সেন্তর লাখ ১.৬গী মখাদা হায়রিবা খুদোংচাবশিং অসি ফংহল্লে। প্রধান মন্ত্রী-জন অরোগ্যা য়োজনাগী মখাদা মেন্তেল হেল্থসু কোনশিল্লে।

য়ুনিয়ন মিনিস্তরনা মখা তানা হায়খি পুক্নিং-ৱাখলগী অনাবশিং লায়য়েংগী খুদোংচাবা মীওই খুদিংমক ফংবা হেনগৎহন্নবা রাজ্য/য়ু.তি ৩৬গী জিলা ৭৪৩দা নেসনেল মেন্তেল হেল্থ প্রোগ্রামগী মখাদা জিলা থাক্কী থবকশিং শৌগৎলে। বেঙ্গালুরু, রাঞ্চি অমসুং তেজাসপুরদা লৈরিবা সেন্ত্রেল মেন্তেল হেল্থ ইন্সতিতুসন অহুম অসি য়াওনা লৈবাক অসিদা অৱাংবা থাক্কী সরকারগী মেন্তেল হোস্পিতাল পুন্না ৪৭ লৈরে। অতোপ্পা সেন্ত্রেল অমসুং রাজ্য সরকারগী হোস্পিতালশিংদা সাইকিয়াত্রি দিপার্তমেন্তশিং লৈরে। মসিগী মথক্তা নৌনা হাংদোক্লবা ওল ইন্দিয়া ইন্সতিতুৎ ওফ মেদিকেল সাইন্সেস(এ আই আই এম এস)শিংদা সাইকিয়াত্রি দিপার্তমেন্তশিং লৈরে।

নেসনেল তেলি মেন্তেল হেল্থ প্রোগ্রামদা কোল মশিং খ্বাইদগী য়াম্না ফংবা রাজ্যশিং/য়ু.তিশিংদা য়ুনিয়ন হেল্থ মিনিস্তরনা থাগৎপগী সর্তিফিকেদ অমসুং মেমেন্তো পীদুনা ইকায়খুম্নবা উৎখি। অহানবদগী অহুমশুবা ফাওবগী রেঙ্কিংদা, অচৌবা রাজ্যশিংগী কাংলুপতা তমিল নাদু, মহারাস্ত্রা অমসুং উত্তর প্রদেসতা মনা পীখি। অপীকপা রাজ্যশিংগী কাংলুপতা তেলঙ্গানা, ঝারখন্দ অমসুং কেরলাদা মনা পীখি। অৱাং-নোংপোক রাজ্যশিংগী কাংলুপতা অসাম, মিজোরম অমসুং মনিপুর মনা ফংখি। য়ুনিয়ন তেরিতোরিশিংগী কাংলুপ্তা জম্মু অমসুং কাস্মির, দিল্লি, দাদ্রা অমসুং নাগর হাভেলি অমসুং দমন অমসুং দিয়ু মনা ফংখি।

মনুং হুঞ্জিনবা মফমশিংদা ফাওবা অনা-লায়য়েংগী খুদোংচাবশিং ফংহন্নবা অমসুং মীয়াম ৱাখল তাবা হেনগৎহন্নবা সরকারনা পায়খৎলিবা থবকশিং শন্দোক্না তাক্লদুনা, দোক্তর মন্দাবিয়ানা হায়খি তেলি-মনাসগী মথক্তা, নেসনেল চাইল্দ হেল্থ প্রোগ্রাম, নেসনেল এদোলেসেন্ত হেল্থ প্রোগ্রাম অমসুং আর.সি.ঐচ প্রোগ্রামগী মখাদা অঙাংশিং অমসুং নুপীশিংগী পুক্নিং-ৱাখলগী হকশেলগা মরী লৈনবশিং য়েংশিন্নবা সরকারনা থবক কয়া পায়খৎলে। পুন্সি শাংবা হেনগৎলকপগা লোয়ননা, অহলশিংগী পুক্নিং-ৱাখলগী হকশেলতা মীৎয়েং চঙলে। পুক্নিং-ৱাখলগী হকশেলগা মরী লৈনবা খুদোংচাবশিং ফংনবা মীয়াম্না দিজিতেল তেক্নোলোজি শীজিন্নগদবনি অমসুং দ্রগ শীজিন্নবা অমসুং থবক মফমদা লাংতক্নবা অসিনা পুক্নিং-ৱাখলগী হকশেলদা অচৌবা অকায়বা থোকহল্লি।

পুক্নিং-ৱাখলগী হকশেলগী মরুওইবা অমসুং মসিনা পীরিবা চৈথেংগী মতাংদা দোক্তর পাউলনা হায়খি পুক্নিং-ৱাখলগী হকশেলগী ফিবম অসি উবা ঙমদবা মরম্নবা ঐখোয়না লনাই মীওইশিং অমসুং ইমুং-মনুংশিংগা পাউ-ফাওনবা ঙমদে অমসুং পুক্নিং-ৱাখলগী হকশেল ফবা অসিগা লৈবাক অমগী নুংঙাই-য়াইফবা অমসুং মান্নবা খুন্নাই অমগা অচেৎপা মরী লৈনৈ হায়বসি করিগুম্বা মতমদা ঐখোয়না কাউথোক্লোইদবনি। পুক্নিং-ৱাখলগী অনাবা লৈরিবা মীওইশিংদা মতেং পাংবদা মীয়াম হুপ্না শরুক য়াবা থৌরাংনা কান্নবা পীগনি।

থৌরম অদুদা ইম্পৱারমেন্ত ওফ পর্সন ৱিথ দিসএবিলিতি দিপার্তমেন্তগী সেক্রেতরি শ্রী রাজেস অগরৱাল, স্কুল ইজুকেসন অমসুং লিতেরেসি দিপার্তমেন্তগী সেক্রেতরি শ্রী সঞ্জয় কুমার, নেসনেল হুমেন রাইতস কম্মিসন, ইন্দিয়াগী সেক্রেতরি জেনেরেল দোক্তর ভারত লাল, হেল্থ অমসুং ফেমিলি ৱেলিফিয়ার মিনিস্ত্রিগী এম.দি(এন ঐচ এম) এল.এস চাংসেন , হেল্থ অমসুং ফেমিলি ৱেলিফিয়ার মিনিস্ত্রিগী ইকোনোমিক এদভাইজর ইন্দ্রনি কাউসাল, নেসনেল মেদিকেল কাউন্সিলগী দিরেক্তর দোক্তর বি.এন গঙ্গধার, নেসনেল ইন্সতিতুৎ ওফ মেন্তেল হেল্থ অমসুং নিউরো সাইন্সেসকী দিরেক্তর দোক্তর প্রতিমা মুর্তি, লেপ্তনেন্ত জেনেরেল দালজিত সিংহ, ৱার্ল্দ হেল্থ ওর্গনাইজেসনগী ভারত্তা লৈবা মীহুৎ দোক্তর রোদেরিকো ঐচ ওফ্রিন, এম.এস শ্বামীনাথন রিছার্স ফাউন্দেসনগী দোক্তর সৌময়া শ্বামীনাথন ভর্চুএল ওইনা শরুক য়াখি।

*****