বনক্কম, বল্লালর হায়নসু খঙনবা ঐখোয়গী অথোইবা শ্রী রামালিঙ্গ স্বামীগী চনি শুবা মপোক কুমওন শক্তাক্লিবা থৌরমদা ৱাফম খরা থমজবা ফংজবসি তসেংনা ঐহাক্কী লাইবক ফবনি। থৌরম অসি বল্লালর মহাক্কা য়াম্না নক্নবা মরী লৈনবা মফম অমা ওইরিবা বদালুরদা পাংথোকপা অসিনা থৌরম অসিবু অমুক্কা অখন্নবা ওইহল্লি। বল্লালর অসিদি ঐখোয়গী খ্বাইদগী ইকায় খুম্নবা সন্ত অমনি। মহাক্না মালেমসিদা 19শুবা চহি চাদা হিংলম্মি, অদুবু মহাক্কী স্পিরিচুএল ওইবা ৱাখল্লোন্না ঙসি ফাওবদা মীওই মিলিয়ন কয়াদা ইথিল পীরি। মহাক্কী শাফুদি মালেম শিনবা থুংই। মহাক্কী ৱাখল্লোন অমসুং থৌওংশিংদা থবক তৌবা লুপ কয়া ঙসি লৈরি।

মরুপশিং,

ঐখোয়না বল্লালরবু নীংশিংলুবা মতমদা ঐখোয়না মহাক্কী সেবা অমসুং মীনুংশি খঙবগী ইথিলবু নীংশিংই। মহাক্না মীওইবা খুন্নাইবু নুংশিবগী মতৌ ওইরিবা জীব-কারুন্যমদা য়ুমফ ওইবা পুন্সি মহিং অমা হিংই। মহাক্কী খ্বাইদগী মশক নাইবা থৌদাংদি চরা হেনবা লৈহন্দনবা মহাক্না খোঙফম চেৎখিবা অদুনি। অহাঙবা চাকখাওগা লোয়ননা তুম্বা চঙ্খিবা অদুবুনি মহাক্না খ্বাইদগী নুংঙাইজদবা। চাবা থকপা ফংজদবা মীওই অমগা য়েন্নদুনা চাক চামিন্নবনা থৌজাল খঙবগী খ্বাইদগী ৱাংবা থৌওংনি হায়না মহাক্না থাজৈ। মহাক্না হায়রম্মি, ৱাদিয় পইরই কন্দা পোদেল্লাম, ৱাদি নেন। মসিনা হায়বদি, ঐহাক্না মহৈ-মরোং অমা উইথবা, কংবা উবা খুদিংগী, ঐহাকসু উইথৈ, কংই হায়বনি। মসিগী ৱাফম অসিক্তনি ঐখোয়না খোঙফম চেৎনা লেপ্লিবা। চহি চাম্মদা অমুকখক থোকপা কোবিদ-19গী লাইচৎ থোকখিবা মতমদা, ভারত মচা করোর 80না লেম্না রেসন ফংখিবা অদোম্না ঙসিসু নীংশিংলমগনি। মসিদি লুরবা তাঞ্জা অদুদা পাংখিবা অচৌবা মতেং অমনি।

মরুপশিং,

মহৈ তম্বগী শক্তিদা বল্লালরনা থাজরম্মি। গুরু অমা ওইনা, মহাক্না মতম পুম্বদা মহাক্কী থোঙ হাংদুনা থম্লম্মি। মহাক্না মশিং থীঙমদবা মীওই কয়াগী মতেং পাংখি। কুরালবু মীয়াম্না হেন্না পাম্ননবা মহাক্না হোৎনখিবা অসিবু মীয়াম পুম্নমক্না খঙনরি। মহাক্না মোদর্ন করিকলমদা পাংলম্বা মতেং অদুসু চপ মান্ননা মরু ওই। হৌখিবা চহি 9দা ভারতকী এজুকেসনগী ইনফ্রাস্ত্রকচরদা অচৌবা অহোংবা অমা উবা ফংখি। শাংলবা দিকেদ 3গী মতুংদা, ভারতনা নেস্নেল এজুকেসন পোলিসী অমা ফংখি। পোলিসী অসিনা এজুকেসনগী থৌওং পুম্নমক্তা অওনবা পুরক্লে। ইন্নোভেসন, রিসর্চ অমসুং দিভেলপমেন্ততা মিৎয়েং হোংজিল্লে। হৌখিবা চহি 9দা লিংখৎখিবা য়ুনিভর্সিতী, ইঞ্জিনিয়রিং অমসুং মেদিকেল কোলেজকী মশিংনা রেকোর্দ ওইবা মশিং য়ৌরে। হৌজিক্তি, নহাশিংনা মশাগী লোকেল লোলদা মহৈ তমদুনা দাক্তর, ইঞ্জিনিয়র ওইবা য়ারে। মসিনা নহাশিংগী মফমদা অচৌবা অমসুং অনৌবা খুদোংচাবা কয়া অমসু ফংহল্লে।  

মরুপশিং,

খুন্নাইবু শেমদোকপগী মতাংদা বল্লালরনা মহাক্কী মতমদগী য়াম্না হেন্না খুমাং চাউশিনখিরম্মি। বল্লালরনা য়েংলিবা ইশ্বরগী শক্তম অসিদি ধর্মা, কাস্ত অমসুং ক্রীদতগী য়াম্না হেন্দোক্না য়েংলম্মি। মহাক্না য়ুনিভর্স অসিগী এতম খুদিংমক উরম্মি। মসিগুম্বা লাইগুম্লবা মরী অসিবু মীওই খুন্নাইনা উনবা হোৎনৌ হায়না মহাক্না হায়রম্মি। ঐহাক্না মহাক্কী মফমদা ইকায় খুম্নবা উৎপা মতমদা, ঐহাক্না সবকা সাথ, সবকা বিকাস, সবকা বিশ্বাস, সবকা প্রয়াস্তা থাজরিবা অসিসু য়াম্না হেনগৎলে। লেজিস্লেতিব বোদীশিংদা নুপীশিংগী ফম খাক্লিবা নারি শক্তী বন্দন আধিনিয়মগী অয়াবা পীরিবা অসিবু মহাক্নসু থৌজাল পীরমগনি হায়না ঐহাক্না খল্লি। বল্লালরগী থবকশিং অসিদি পাবদা য়াম্না লাই অমসুং ভাব তাবসু য়াম্না লাই। মরম অদুনা, মহাক্তি লুরবা স্পিরিচুএল লৌশিং কয়াবু অচম্বা লোলদা ফোংদোকপা ঙম্লম্মি। ঐখোয়গী কলচরগী লৌশিংনা মতম কয়াগী মনুংদা তোঙানবা মগুন চেন্দুনা লাক্লিবা অসিদি এক ভারত শ্রেস্থ ভারতকী ঐখোয়গী অপুনবা ৱাখল্লোন্দা পাঙ্গল হাপ্লিবা অথোইবা সন্তশিংগী পাউতাকশিংগী অমত্তা ওইবা ইচেলনা শমজিন্নরিবনি।

ঙসিগী য়াইফরবা থৌরম অসিদা, মহাক্কী ৱাখল্লোনবু মঙফাওনহন্নবা ঐখোয়না অমুক্কা হন্না খোঙফম চেৎমিন্নরসি। মহাক্কী নুংশিবা, থৌজাল লৈবা অমসুং অচুম্বা ৱায়েল পীবগী পাউজেলবু ঐখোয়না অমুক্কা হন্না শন্দোকমিন্নরসি। মহাক্কী থম্মোইগা নক্নবা হীরমশিংদা ঐখোয়না লেপ্তনা থবক তৌবা ঙম্বা ওইরসি। কনা অমত্তা চরা হেন্দুনা তুম্বা চঙহল্লরোইসি। অঙাং খুদিংনা ক্বালিতী এজুকেসন শোইদনা ফংহল্লসি। মহাক্কুম্বা অথোইবা সন্তকী মফমদা, অমসুং মহাক্কী চনিশুবা মপোক কুমওন অসিদা ঐহাক্না অমুক্কা হন্না ইকায় খুম্নবা উৎচরি।

থাগৎচরি।

***