U Myntri Rangbah Duh, u Narendra Modi u la aiti sha ka ri ia ka Bynta ba nyngkong jong ka India International Convention and Expo Centre - ‘Yashobhoomi’ ha New Delhi mynta ka sngi. Ka ‘Yashobhoomi’ ka don ka Convention Centre, ki Exhibition hall bad kiwei kiwei ki bynta. U la plié paidbah ruh ia ka ‘PM Vishwakarma Skhim’ na ka bynta ki nongshna tiar tynrai ha ka Vishwakarma Jayanti. U Myntri Rangbah Duh u la pyllait paidbah ruh ia ka PM Vishwakarma logo, tagline bad portal. U la pyllait paidbah ruh ia ka customized stamp sheet, ka tool kit e-booklet bad ka video ha kane ka sngi. U Myntri Rangbah Duh u la sam ruh ia ki Vishwakarma Certificate sha 18 ngut ki nongioh jingmyntoi.

Haba u la poi ha kane ka jaka, u Myntri Rangbah Duh u la iaid lyngba ka exhibition - Guru-Shishya Parampara and New Technology. U la peit ruh ia ka 3D Model jong ka Yashobhoomi. Hashuwa kane, u Myntri Rangbah Duh u la plié paidbah ia ka jingpynheh jong ka Delhi Airport Metro Express line na Dwarka Sector 21 sha ka station ‘Yashobhoomi Dwarka Sector 25’ ba thymmai.

Ha ka jingai jingkren jong u, u Myntri Rangbah Duh u la ai khublei ia baroh ha ka Vishwakarma Jayanti bad u la ong ba kane ka dei kaba la aiti sha ki nongshna tiar tynrai. U la ong ba u dap da ka jingsngewthynnad ban ioh lad ban iakren bad ki million ngut ki Vishwakarma na kylleng ka ri. U la ban jur ruh halor ka jingsngewtynnad jong u leit peit ia ka exhibition ha kane ka sngi bad ka jingiakren bad ki nongshna tiar tynrai. U la kyntu ia ki briew jong ka ri ban leit sha kane ka jaka. U myntri Rangbah Duh u la ong ba ia ki lak ngut ki nongshna tiar tynrai bad ki longiing jong ki, ka skhim PM Vishwakarma ka dei ka ba wanrah ia ka jingshngain.

Ha kaba iadei bad ka International Convention and Expo Centre - ‘Yashobhoomi, u Myntri Rangbah Duh u la pdiang ia ka jingnoh synniang jong ki Shramik bad ki Vishwakarma ha ka jingtei ia kane ka jaka. “Mynta ka sngi, nga aiti ia ka 'Yashobhoomi' sha baroh kiba trei ha ka ri, baroh ki Vishwakarma”, u la ong. U la ong ia ki Vishwakarma kiba don jingiadei bad kane ka prokram ba ka 'Yashobhoomi' kan long ka jaka kaba pyniasoh ia ki tiar kiba itynnad jong ki bad ka pyrthei bad ki iew ha kylleng ka pyrthei.

U Myntri Rangbah Duh u la ban jur halor ki jingnohsynniang bad ka jingkordor jong ki Vishwakarma ha ki kam kiba man ka sngi ha ka ri. U la ong ba ki Vishwakarma kin don beit ka bynta kaba heh ha ka imlang sahlang, watla kan don ka jingkiew ha ki teknoloji. U la ong ba ka jingdonkam mynta ka dei ban ai jingithuh bad jingkyrshan ia ki Vishwakarma.

“Ka Sorkar ka la wan shakhmat kum ka nongiatreilang ban kyntiew ia ka burom, pynkhlain ia ka jinglah treikam bad pynkhlain ia ka jingriewspah jong ki Vishwakarma”, la ong u Modi. Ha ka jingbatai shaphang ki 18 tylli ki kam jong ki nongshna tiar, u Myntri Rangbah Duh u la ong ba ki mistiri, ki nongshna nar, ki nongshna ksiar, ki nongshna tiar na ki maw, ki nongshna khiew, ki nongshna juti, ki nongsuh jain, ki nongtrei kam maw, ki nongkhap shniuh, ki nongsait jain bad kiwei kiwei ki hap hapoh ka skhim PM Vishwakarma bad ka jingpynlut pisa kan long T 13,000 klur.

U la kren shaphang ki jingshem shimet jong u haba u la iakren bad ki nongshna tiar ha ki por ba u la leit sha kiwei kiwei ki ri bad u la ong ba ka jingdawa ia ki tiar ba shna da ki kti ka la kiew bha. U la ong ba ha kylleng ka pyrthei, ki kompani ba heh ki ai pateng ia ka kam jong ki sha ki jaka treikam ba kham rit. “Ki kam ba ai pateng ki dei ban poi sha ki Vishwakarma jong ngi bad ki dei ban long ka bynta kaba kongsan jong ki lad pynbiang tiar ha baroh kawei ka pyrthei bad ngi dang trei na ka bynta kane. Ka dei namar kane ba kane ka skhim ka dei ka sienjam ban ialam ia ki paralok Vishwakarma jong ngi sha ka juk kaba thymmai,” la ong u Myntri Rangbah Duh.

“Ha kine ki por jong ki jingkylla, ka jingai jinghikai, ka teknoloji bad ki atiar ki long kiba donkam bha na ka bynta ki paralok Vishwakarma jong ngi,” la ong u Myntri Rangbah Duh uba la batai bniah ruh ia ki sienjam ban ai jinghikai ia ki nongshna tiar ba la tbit lypa. U la ong ba ha ka por jong ka jinghikai, yn ai T 500 ha ka shi sngi ia ki nongshna tiar. Kin ioh jingmyntoi kaba T. 15,000 bad ka Sorkar kan ai jingiarap ruh ban pyni, song bad pyniaid iew ia ki tiar. U la kyntu ba kan don ka jingthied ia ki toolkit tang na ki dukan ba don GST bad ban thied tang ia ki tiar kiba hap hapoh ka Made in India.

Ha ka jingkren shaphang ka jingpynbiang pisa ia ki Vishwakarma khlem ka jingbuh bynda, u Myntri Rangbah Duh u la ong ba haba ka don ka jingpan ia ka jingpynshngain, kane ka jingpynshngain kan wan na u Modi. U la ong ba ki Vishwakarma kin ioh shim ram haduh T 3 lak khlem kano kano ka jingbuh bynda bad ha ka sut kaba duna bha.

“Ka Sorkar Pdeng ka peit bniah ia ka jingkyntiew ia kito kiba shem jingeh,” la ong u Myntri Rangbah Duh bad u la kren shaphang ka skhim ‘One District, One Product’ kaba kyntiew ia kawei ka tiar kaba kyrpang na man ka distrik. U la kren ruh shaphang ka jingplie lad ia ki nongdie madan ba kin ioh bynta ha ki kam bank lyngba ka skhim PM Svanidhi bad ka jingplie lad ba kyrpang na ka bynta kito kiba don jingduna ha ki dkhot met. “U Modi u ieng na ka bynta kito ki bym don mano mano ba don jingsngewlem ia ki,” la ong u Myntri Rangbah Duh. U la ong ba u don ban ai ka jingshakri, ai ka jingim kaba don burom bad pynthikna ka jingpynpoi ki jingshakri khlem kano kano ka jingthut. “Kane ka dei ka jingkular jong u Modi,” u la ong.

U Myntri Rangbah duh u la ong ba ka pyrthei ka sakhi ia ka jingjop ka jingiasoh lang ka teknoloji bad ka dustur tynrai ha ka G20 Craft Bazaar. Wat ki jingai sngewbha na ka bynta ki heh ki hain kiba wan kidei ki tiar jong ki paralok Vishwakarma. “Kane ka jingkut jingmut sha ka Vocal for Local kadei ka jingbahkhlieh jong ka ri baroh kawei”, u la ong. ‘Nyngkong ngi dei ban long Vocal for Local bad hadien ngi hap ban rah ia ka Local sha ka Global’ u la bynrap.

Haba kren shaphang ki jinglehkmen ki ban wan ha ka ri kum ka Ganesh Chaturthi, ki Dhanteras Deepawali bad kiwei kiwei, u Myntri Rangbah duh u la kyntu ia man u nongshong shnong jong ka ri ban thied ia ki tiar ba shna ha ka ri, khamtam jong kito kiba shna da ki Vishwakarma jong ka ri.

“Ka Viksit Bharat kaba mynta ka saindur ia ka nongrim kaba thymmai jong ka ha man ka kam”, la ong u Myntri Rangbah duh haba kren shaphang ka Bharat Mandapam kaba la long ka phang pdeng jong ka jingiakren ha kylleng ka pyrthei bad ong ba ka Yashobhoomi ka kyntiew shuh shuh ia kane ka dustur tynrai. “Ka khubor na ka Yashobhoomi kalong kaba sawa bad kaba shai. Kano kano ka prokram kaba long hangne kan long kaba jop bad kaba pawnam”, la ban jur u Modi. U la bynrap shuh shuh ba ka Yashobhoomi kan long ka lad na ka bynta ka jingpyni ia ka India ka ban wan.

U la ong khnang ban pyni ia ka jingkhlain ka ioh ka kot jong ka India, kane kalong ka jaka kaba biang bha ha ka nongbah jong ka ri. U la bteng da kaba ong ba ka pyni ia ka jingiasoh kaba bun bynta bad ka PM Gatishakti. U la pynshai ia kane da kaba kren shaphang ka jingiasoh ba la ai sha ka center da ka Metro bad ka jingplie ia ka Metro terminal mynta ka sngi. U la kren ruh shaphang ka Yashobhoomi kaba khmih ia ka leit ka wan, ka jingpyniasoh, ka jingpynbiang jaka sah bad ki jingdonkam ba iadei bad ki kam jngoh kai na ka bynta ki briew.

U Myntri Rangbah duh u la kren shaphang ki kam ba thymmai ba iadei bad ka roi ka par bad ki lad ioh kam ioh jam ba mih katkum ki jingkylla ka por. U la ban jur ba ym don mano mano ba lah ban mutdur ha ki sanphew haduh hynriew phew snem mynshuwa ba ka kam IT kaba heh kat kane ka don ha India. Wat ka social media kalong kaba shu mutdur ha ki laiphew haduh laiphew san snem mynshuwa, u la bynrap. Haba pynshai shaphang ka lawei jong ka conference tourism lane ki kam jngoh kai ba iadei bad ki jingialang kibe heh, u Myntri Rangbah duh u la ong ba ka kam jngoh kai ka don bun ki lad ia ka India bad u la pyntip ba ka shongdor palat T. 25,000 klur. U la ong ba la pynlong palat 32 hajar tylli ki exhibition kiba heh bad ki expo ha kylleng ka pyrthei man ka snem ha kaba ki briew kiba wan ha ki kam jngoh kai na ka bynta ki jingialang ba heh ki kham pynlut bun ka pisa ban ia ki nongjngoh kai kiba man ka por. U Modi u la kdew ruh ia ka bynta jong ka India ha kane ka kam kaba heh kalong tang kumba shi percent bad bun ki kompani kiba heh ha India ki leit sha ki jaka shabar ri man ka snem ban pynlong ia ki prokram jong ki. U la ban ruh ba ka India ka dang pynkhreh ialade na ka bynta ki kam jngoh kai ba iadei bad ki jingialang kiba heh mynta.
 

U Myntri Rangbah duh u la ong ba ka Conference tourism ruh kan kiew tang lada ki don ki jingdon jingem ba donkam na ka bynta ki prokram, ki jingialang bad ki exhibition, kumta ka Bharat Mandapan bad ka Yashobhoomi Center mynta kin pynlong ia ka nongbah Delhi ka jaka pdeng ba kongsan jong ki kam jngoh kai ba iadei bad ki jingialang kibe heh. Kane kan plie ki lad ioh kam ia ki lak ngut ki samla. Ha ki por wan, “Ka Yashobhoomi kan long ka jaka ha kaba ki briew na ki ri kylleng ka pyrthei kin wan na ka bynta ki international conference, ki jingialang bad ki exhibition”, la bynrap u Modi.

U Myntri Rangbah duh u la khot sngewbha ia kito kiba don bynta bad ka Yashobhoomi. U la ong, “Mynta nga khot sngewbha ia ki briew ba don bynta bad ka Exhibition bad ki kam pynlong prokram na kylleng ki ri ka pyrthei ban wan sha Delhi. Ngan khot sngewbha ia kito kiba don kti ha ki kam shna phlim bad kam pynmih prokram ha ka TV jong man ka thain jong ka ri, Mihngi-Sepngi-lam shatei- shathie. Pynlong ia ki jingialang sam khusnam jong phi, ki film festival hangne, pynlong ka jingpyni ia ka phlim ba nyngkong hangne. Nga khot sngewbha ia ki briew ba iadon bynta bad ki kompani kiba pynlong prokram ha ki ri bapher bapher, bad kito kiba trei ha ki kam pynlong Exhibition ban iasoh bad ka Bharat Mandapam bad Yashobhoomi.”

U Myntri Rangbah duh u la pynpaw ka jingngeit skhem ba ka Bharat Mandapam bad ka Yashobhoomi kin long ki dak jong ka jingpdiang briew ka India, ka jinglong kyrpang bad ka jingitynnad. “Ka Bharat Mandapam bad ka Yashobhoomi kilong ka jingiatyllilang ka deiriti jong ka India bad ki jingdon jingem katkum ka juk mynta, bad kine ki pyni ia ka khana jong ka nongrim kaba khraw jong ka India hakhmat ka pyrthei”, la ong u Myntri Rangbah duh. U la ong ba ka pyni ruh ia ki jingangnud jong ka India kaba thymmai kaba kwah ban don ki jingdon jingem kiba biang tam. “Kynmaw ia ki kyntien jong nga”, ong u Modi ba “ka India kan nym sangeh mynta”, haba u kyntu ia ki nongshong shnong ban iai bteng ban iaid shaphrang, wanrah ia ki thong ba thymmai, kut jingmut ban pynurlong ia ki bad pynkylla ia ka India sha ka ri kaba la kiew hashuwa u 2047. Haba pynkut ia ka jingkren jong u, u Myntri Rangbah duh u la ban jur ia ka jingdonkam jong baroh ki nongshong shnong ban trei shitom bad ban iatreilang. “Ki paralok Vishwakarma jong ngi kilong ka burom jong ka Make in India bad kane ka International Convention Center kan long ka lad ban pyni ia kane ka burom sha ka pyrthei,” la pynkut u Modi.

Ka Myntri Sorkar Pdeng ba dei khmih ia ka Tnat kam Pla tyngka, ka Nirmala Sitharaman, u Myntri sorkar pdeng ba dei khmih ia ka Tnat Commerce and Industry, u Piyush Goyal, Myntri sorkar pdeng ba dei khmih ia ka Tnat Education, Skill Development and Entrepreneurship, u Dharmendra Pradhan, Myntri sorkar pdeng ba dei khmih ia ka Tnat Micro, Small and Medium Enterprises, u Narayan Rane, bad Myntri Khynnah jong ka sorkar pdeng ba dei khmih ia ka tnat Micro, Small and Medium Enterprises, u Bhanu Pratap Singh Verma ki la iadonlang ha kane ka jingialang lem bad kiwei kiwei.

Ka Nongrim

Yashobhoomi

Ka thong jong u Myntri Rangbah duh ban don ia ki jingdon jingem kiba katkum ka juk mynta ban pynlong ia ki jingialang, ki conference bad ki exhibition ha ka ri yn pynkhlain lyngba ka jingpyntreikam ia ka ‘Yashobhoomi’ ha Dwarka. Lyngba ka jaka jong ka projek kaba palat 8.9 lak square meter bad ka jaka ba la dep shna jingshna kaba palat 1.8 lak square meter, ka ‘Yashobhoomi’ kan long kawei na ki jaka MICE (Meetings, Incentives, Conferences and Exhibitions) kiba heh tam ha ka pyrthei.

La shna ha ka jinglut kaba kumba T. 5400 klur, ka ‘Yashobhoomi’ ka don ka Convention Centre, ki Exhibition hall ba bun bad kiwei kiwei ki jingdonkam. Ia ka Convention Center la shna ha ka jaka kaba palat 73  hajar square meter, ba kynthup 14 tylli ki kamra pynlong jingialang kynthup ka Main Auditorium, ka Grand ballroom bad 13 tylli ki kamra pynlong jingialang ba lah ban rung haduh 11,000 ngut ki delegate. Ka Convention Center ka don ka kawei na ki jaka ba pynshai da ki LED kaba heh tam ha ka ri. Ka plenary hall ha ka Convention Center kadei kaba la biang ki jaka shong jong kumba 6,000 ngut ki nongshah khot sngewbha. Ka auditorium ka don ki jaka shong kaba kyrpang ha kaba lah ban pynkylla ia ka madan kaba lah ban long kaba ryntih lane kaba lah ban long kum ka auditorium katkum ki jingdonkam bapher bapher. Ka Grand Ballroom, ka don ka sat kaba kham phylla, bad lah ban rung kumba 2,500 ngut ki nongshah khot sngewbha. Ka don ruh ka jaka kaba heh ba lah ban shong haduh 500 ngut ki briew. Ki 13 tylli ki kamra pynlong jingialang ba don haduh phra mala la saindur ban pynlong ia ki jingialang bapher bapher.

Ka ‘Yashobhoomi’ ka don ruh kawei na ki Exhibition hall ba heh tam ha pyrthei. Ia kine ki Exhibition hall lane ki kamra pynlong Exhibition la shna ha ka jaka kaba palat 1.07 lak square meter, bad yn pyndonkam ban pynlong ia ki exhibition, ki trade fair bad ki jingialang na ka bynta ki kam business bad la pyniasoh bad ka jaka ba la saindur kyrpang ha kaba ka sad ka dei kaba shna da ka copper kaba wanrah ia ka jingshai ha kane ka jaka lyngba ki jingkhangiit kiba don. Kane ka jaka ka don ia ki jaka treikam bapher bapher kum ki karma na ka bynta ki kam pathai khubor, ki jaka kyrpang na ka bynta ki VVIP, ki jaka buh jain, ki jaka ai jingtip ia kito kiba wan hangne, bad ki jaka ai ticket ha ryngkat kiwei kiwei.

La saindur ia baroh ki jaka paidbah ha ‘Yashobhoomi’ ha kata ka rukom ba ki don jingiasoh bad ki jaka shabar jong ka convention centre. La shna da ki tiar kiba katkum ka deiriti jong ka India ha ka dur jong ki madan ha kaba pyndonkam da ka rynnong kaba don ki dur jong ki rangoli, ki nar kiba who nalor kiba pynduna ia ki jingsawa bad ki dur ha ki kynroh kiba lah ban pynshai da ki sharak.

Ka ‘Yashobhoomi’ ka pyni ruh ia ka jingkut jingmut kaba khlain ba iadei bad ka jingiaineh namar ki don ki lad pynkhuid ia ki um jaboh ha kaba lah ban pyndonkam biang ia kane ka um, ki don ki lad lum um slap bad kane ka jaka ka la ioh ia ka Platinum certification na ka Indian Green Building Council (IGBC) jong ka CII.

Ka ‘Yashobhoomi’ kadei ruh kaba la biang ki jingpynshngain da kaba pyndonkam ia ka teknoloji ban pynthikna ka jingshngain jong ki nongwan. Ka jaka buh kali sha khrum kaba rung palat 3,000 tylli ki kali kadei kaba la bit la biang bad don palat 100 tylli ki electric charging point.

Yn pyniasoh ia ka ‘Yashobhoomi’ bad ka Delhi Airport Metro Express line lyngba ka jingplie ia ka metro station ba thymmai ka ‘Yashobhoomi Dwarka Sector 25’. Ka Metro Station ba thymmai kin don lai tylli ki subway – ka subway kaba 735 m ka jingjrong ka pyniasoh ia ka station bad ki Exhibition hall, convention center, bad Central Arena; sa kawei ka pyniasoh bad ka jaka rung/ jaka mih ha Dwarka Expressway; katba kaba lai ka pyniasoh ia ka Metro Station bad ka hall jong ki Exhibition hall ban sa shna jong ka ‘Yashobhoomi’.

Ka PM Vishwakarma

Ka la long ka jingphaikhmat kaba man ka por jong u Myntri Rangbah duh ban ai jingkyrshan ia ki briew kiba trei ha ki kam kiba iadei bad ki jingshna tiar tynrai. Kane ka jingphaikhmat kadei ka jingkut jingmut ym tang ban ai jingiarap pisa ia ki nongshna tiar hynrei ban pynneh bad pynkhie im ruh ia ka dustur tynrai, ka deiriti bad ka pateng kaba iar lyngba ki tiar tynrai.

Ia ka PM Vishwakarma yn bei tyngka pura da ka Sorkar Pdeng ha ka jingmang pisa kaba T. 13,000 klur. Hapoh kane ka skhim, yn pynrung kyrteng ia ki Vishwakarma khlem kano kano ka jingsiew pisa lyngba ki Common Services Centre lyngba ka PM Vishwakarma certificate bad ka ID card, ka jingpyntbit ia ka sap treikam ba kynthup ka jingai jinghikai ba sdang bad kaba kham bniah, ka jingai jingmyntoi kaba T. 15,000, ka jingioh shim ram khlem da buh bynda haduh T. 1 lak (ka bynta ba nyngkong) bad T. 2 lak (ka bynta ba ar) ha ka sut kaba duna kaba 5%, ka jingmyntoi na ki jingsiew digital bad ka jingiarap ban pyniaid iew ia ki tiar.

Ka Skhim ka thmu ban pynkhlain bad kyntiew ia ka Guru-Shishya parampara lane ka jingpyndonkam ki longiing ia ki sap tynrai da ki Vishwakarma kiba trei da ki kti bad ki tiar jong ki. Ka jingphaikhmat ba kongsan jong ka PM Vishwakarma kalong ban kyntiew ia ka jingbha kumjuh ruh ka jingpoi ki tiar bad ki jingshakri jong ki nongshna tiar bad ban pynthikna ka jingiasoh bad ki lad kiba don ha ka ri bad shabar ri ban pynbha ia ki tiar.

Ka Skhim kan ai jingkyrshan ia ki nongshna tiar na ki jaka nongkyndong bad ki jaka sor ha kylleng ka ri. Khatphra tylli ki jingshna tynrai yn kynthup hapoh ka PM Vishwakarma. Kine kilong (i) Misteri; (ii) Nongshna lieng; (iii) Nongshna tiar ialeh thma; (iv) Nongshoh nar; (V) Nongshna tyrnem bad ki tiar; (vi) Nongshna tala; (vii) Nongshna ksiar; (viii) Nongshna khiew; (ix) Nongshna tiar da ki maw, nong pynpait maw; (x) Nongsuh juti; (xi) misteri maw (Rajmistri); (xii) Nongshna shang/ carpet/synsar/ nongthain tyllai; (xiii) Nongshna khunbynriew & jinglehkai (tynrai); (xiv) Nongkhap shniuh; (xv) Nongshna jingdeng da ki syntiew; (xvi) Nongsait jain; (xvii) Nongsuhjain; bad (xviii) Nongshna jar tong dohkha.

***