প্রধান মন্ত্রী, শ্রী নরেন্দ্র মোদীনা ঙসি ছতিসগরগী রাইগরদা চাউরাকপা লুপা করোর 6350গী রেলৱে সেক্তরগী প্রোজেক্ত কয়া অমা লৈবাক মীয়ামদা ঙসি খুৎশিন্নখ্রে। মহাক্না ছতিসগরগী তোঙান-তোঙানবা জিলা 9দা ফমুং 50 থাবা ‘ক্রিতিকেল কেয়র ব্লোক’শিংগী উরেপ উয়ুংসু তমখিবগা লোয়ননা মরী লৈননা মশক খঙদোক্লবা মীওইশিংগী মফমদা সিক্কল সেল কাউন্সেল্লিং কার্দ লাখ 1 য়েন্থোকখ্রে। রেলৱে প্রোজেক্তশিংগী মনুংদা ছতিসগর ইস্ত রেল প্রোজেক্ত, ফেজ-I, চম্পা অমসুং জামগাগী মরক্কী 3শুবা রেল লম্বী, পেন্দ্রা রোদতগী অনুপ্পুর ফাওবগী মরক্কী 3শুবা রেল লম্বী অমসুং তলাইপল্লী কোল মাইন্দগী NTPC লারা সুপর থর্মেল পাৱর স্তেসন (STPS) শম্নহল্লিবা MGR (মেরী গো রাউন্দ সীস্তেম) য়াওরি।

প্রধান মন্ত্রীনা ঙসি তিনখিবা মীয়ামদা ৱা ঙাঙবদা, ছতিসগরদা লুপা করোর 6400 হেনবগী রেলৱে প্রোজেক্ত কয়াগী মাইখুম হাংদোকপগা লোয়ননা রাজ্যসিনা চাউখৎ থৌরাংগী মাইকৈদা মশক নাইবা খোঙথাং কয়া থাংজিল্লি হায়না ফোংদোকখি। রাজ্যসিগী ইনর্জী পুথোকপা ঙম্বগী মতিক হেনগৎহন্নবা অমসুং হেল্থকেয়র সেক্তরবু মপাঙ্গল হেন্না কনখৎহন্নবগীদমক্তা অনৌবা প্রোজেক্ত কয়া অমা ঙসি হৌদোক্লিবনি হায়না মহাক্না পাউদমখি। সিক্কল সেল কাউন্সেল্লিং কার্দ য়েন্থোকপগী ৱাফম্বুসু মহাক্না থৌরম অসিদা পনখি।

মালেম পুম্বনা লৈবাকসিদা পাংথোক্লিবা মোদর্ন দিভেলপমেন্তকী খোঙজেল অমসুং ভারতকী সোসিএল ৱেলফিয়রগী মোদেলবু উবতা নত্তনা থৌওং অসিবুসু মখোয়না থাগৎনরি হায়না প্রধান মন্ত্রীনা মিৎয়েং চঙখি। নই দিল্লীদা পাংথোকপা G20 সম্মিত মনুংদা ভারতনা মালেমগী লুচিংবশিংগী য়ুম্বু ওইখিববু প্রধান মন্ত্রীনা অমুক্কা হন্না নীংশিংলদুনা ভারতকী মোদর্ন দিভেলপমেন্ত অমসুং সোসিএল ৱেলফিয়রগী মোদেলনা মখোয়গী পুক্নিং শুমহৎখিবনি হায়না পাউদমখি। মালেমগী লুপ কয়ানা ভারতকী মায় পাকপদগী তমজবগী মতাংদা ৱাফম কয়া থম্নরি হায়না মহাক্না মখা তাখি। পুম্নমক অসি সরকারনা লৈবাক্কী রাজ্য অমসুং মফম খুদিংদা চাউখৎ থৌরাংগী মরী লৈনবা চপ মান্নবা মিৎয়েং চঙবদগী ওইথোক্লিবনি হায়না প্রধান মন্ত্রীনা ফোংদোকখি। “ছতিসগর অমসুং রাইগরগী মফম অসিনা ৱাফম অসিগী খুদম অমসু ওইরিবনি”, প্রধান মন্ত্রীনা মখা তারদুনা লৈবাক মীয়াম্বু ঙসিগী প্রোজেক্ত অসিগীদমক্তা থাগৎপা ফোংদোকখি।

“ছতিসগর অসিদি লৈবাক্কী চাউখৎ থৌরাংগী পাৱরহাউস অমনি”, লৈবাক অমনা মশাগী পাৱরহাউসনা লৈজবী পাঙ্গলগা লোয়ননা থবক তৌরবা মতমদা তুংলমচত্তা খোঙদাবা ঙমগনি পল্লদুনা প্রধান মন্ত্রীনা  হায়খি। মমাংগী চহি 9দা, কেন্দ্র সরকারনা ছতিসগরবু হীরম খুদিংদা চাউখৎহন্নবা লেপ্তনা হোৎনখি অমসুং মদুগী পান্দম অমসুং পোলিসীশিংগী মহৈদি মফমসিদা ঙসি উবা ফংলে হায়না প্রধান মন্ত্রীনা হায়খি। কেন্দ্র সরকারনা ছতিসগর রাজ্যদা অচৌবা স্কিম কয়া হীরম খুদিংদা পায়খৎলি অমসুং অনৌবা প্রোজেক্তকী উরেপ উয়ুং কয়াসু তমখ্রে হায়না মহাক্না ফোংদোকখি। প্রধান মন্ত্রীনা জুলাই থাদা রাইপুরদা চত্তুনা বিশাখকাপত্নমদগী রাইপুর ফাওবগী ইকোনোমিক কোরিদোর অমসুং রাইপুরদগী ধনবাদ ফাওবগী ইকোনোমিক কোরিদোর শেমগৎনবা প্রোজেক্তকী উরেপ উয়ুং তমখিবগী থৌওংবু ঙসি অমুক্কা হন্না নীংশিংখি। মরু ওইবা নেস্নেল হাইৱে কয়া রাজ্যসিদা খুদোল তমখিববুসু মহাক্না নীংশিংখি। “ঙসিদি, ছতিসগরগী রেলৱে নেতৱর্ক্কী চাউখৎ থৌরাংদা অনৌবা তাঙ্কক অমা ইবা হৌরবনি”, হেন্না ফগৎলবা রেল নেতৱর্ক অসিনা বিলাস্পুর-মুম্বাই রেল লাইনগী ঝর্সুগুদা বিলাস্পুর সেক্সন্দা য়াম্না চিল্লিবা অসিবু হন্থহল্লগনি হায়বা ৱাফম পল্লদুনা প্রধান মন্ত্রীনা পাউদমখি। মান্নবা থৌওং অমা ওইনা, অতোপ্পা রেল লম্বী কয়াসু শাবা হৌরে অমসুং ছতিসগরগী ইন্দস্ত্রীগী চাউখৎহন্নবা রেল কোরিদোর কয়াসু শেম-শারি হায়না মহাক্না হায়খি। থবক ময়াম অসি লোইশিল্লকপা মতমদা, লম্বীশিং অসিনা ছতিসগরগী মীয়ামদা খুদোংচাহনবগা লোয়ননা লমদম অসিদা থবক অমসুং শেল তানবগী অনৌবা খুদোংচাবা কয়াসু শেম্লগনি হায়না মহাক্না মখা তাখি।

কোয়লা থোকফমদগী পাৱর প্লান্ত ফাওবদা কোয়লা য়ৌহনবগী মতম অমসুং অচঙবা শেলসু য়াম্না হন্থরগনি হায়না প্রধান মন্ত্রীনা মীয়ামগী পুক্নিং চীংশিনখি। অনেম্বা মমলদা ইলেক্ত্রিসিতী চাং খ্বাইদগী য়াম্না পুথোক্নবগীদমক্তা সরকারনা পিত হেদ থর্মেল পাৱর প্লান্ত শারি হায়না প্রধান মন্ত্রীনা পাউদমখি। তলাইপল্লি মাইন শম্নহনগদবা কিলোমীতর 65 শাংবা মেরী-গো-রাউন্দ প্রোজেক্ত শঙ্গাবগী মতাংদসু মহাক্না ৱাফম থমখিবগা লোয়ননা মসিগুম্বা প্রোজেক্তকী মশিং অসি লৈবাক অসিদা হেনগৎলকখিগনি অমসুং ছতিসগরগুম্বা রাজ্যনা তুংগী মতমশিংদা মসিগী কান্নবা খ্বাইদগী হেন্না ফংগনি হায়না মহাক্না হায়খি।

প্রধান মন্ত্রীনা অমৃত কালগী মথংগী চহি 25কী মনুংদা ভারতপু চাউখৎপা লৈবাক অমা ওইহনবগী ৱারেপকী মতাংদা পল্লদুনা, চাউখৎ থৌরাংগী মাইকৈদা মীয়াম খুদিংনা চপ মান্ননা শরুক য়ামিন্নবগী তঙাই ফদবা লৈরিবা অসিদা মহাক্না মীয়ামগী পুক্নিং চীংশিনখি। মহাক্না অকোয়বগী ফিভম ঙাক শেন্না-শেন্না লৈবাক্কী ইনর্জীগী তঙাই ফদবশিং ফংহনবগী মতাংদা মিৎয়েং চঙখি, অমসুং ইকো-তুরিজমগী শরুক অমা ওইনা শেমগৎখিবা অদুবু হৌজিক্তি থিংজিনখ্রবা সুরজপুর জিলাদা লৈবা কোয়লাগী খোনীগী মতাংদা পনখি। মসিগা মান্নবা ইকো-পার্ক অমসু কোর্ৱাদা শেমগৎপগী থবক চত্থরি হায়না মহাক্না পাউদমখি। লমদম অসিগী ত্রাইবেল মীয়াম্না ফংগদবা কান্নবশিংগী মতাংদা হায়রদুনা, প্রধান মন্ত্রীনা মাইন্দগী থাদোরকপা ঈশিংগী মতেংদগী মীওই লিশিং কয়াদা ইরিগেসন অমসুং থক্নবা ঈশিংগী খুদোংচাবা কয়া পীরিবা অসিদসু মীয়ামগী পুক্নিং চীংশিনখি।

সরকারনা উমং অমসুং লম ঙাক শেন্নবা ৱারেপ লৌবগা লোয়ননা উমংগী লনগী খুত্থাংদা নুংঙাই য়াইফবা পুরকপগী অনৌবা খুদোংচাবা কয়াসু হাংদোক্লি হায়না প্রধান মন্ত্রীনা হায়খি। শ্রী মোদীনা বনধন বিকাস য়োজনাগী খুদম পীরদুনা, ত্রাইবেল নহারোল লাখ কয়া অমনা স্কিম অসিগী কান্নবা ফংলি হায়না ফোংদোকখি। মালেম্না মিল্লেতকী চহি হায়না পালন তৌরিবা অসিগী মতাংদা মহাক্না পনবগা লোয়ননা, শ্রী অন্না নত্ত্রগা মিল্লেতকী মার্কেতনা মথংগী চহি খরদা পাকথোক চাউথোকপগী মতিক লৈরিবা অসিদসু মিৎয়েং চঙখি। লৈবাক্কী ত্রাইবেলগী চৎনবীনা অনৌবা শক্তাক অমা নাকল অমদা ফংলি, অদুগা অতোপ্পা নাকল অমদনা, চাউখৎপগী লম্বী অমসু মশা মথন্নতনা শেমজরক্লি হায়না মহাক্না হায়খি।

সিক্কল সেল এনেমিয়ানা ত্রাইবেল মীয়ামদা পীবা চৈথেংগী মতাংদা প্রধান মন্ত্রীনা পাউদম্লদুনা, সিক্কল সেল কাউন্সেল্লিং কার্দ য়েন্থোকপগী খোঙথাং অসিদি ত্রাইবেল খুন্নাইগী ওইবা অচৌবা খোঙথাং অমনি হায়খি। মসিনা লাইনা অসিবু লাকশিনবদা তেংবাংবা ঙম্বা ই-পাউ শন্দোক্লি। প্রধান মন্ত্রীনা মহাক্কী ৱারোল লোইশিনবা ওইনা, ‘সবকা সাথ, সবকা বিকাস’কী ৱারেপকা লোয়ননা তুংলমচত্তা খোঙদাবগী তঙাই ফদবদা মিৎয়েং চঙলদুনা ছতিসগরনা চাউখৎ থৌরাংগী অনৌবা থাক য়ৌবা ঙমগনি হায়বগী থাজবা লৈ হায়না ফোংদোকখি।

ত্রাইবেল এফিয়র্সকী কেন্দ্র মন্ত্রী, শ্রীমতি রেনুকা সিংহ সরুতা অমসুং ছতিসগরগী উপ-মুখ্য মন্ত্রী, শ্রী তি.এস. সিংহদেওসু অতোপ্পা মীথুংলেন কয়াগা লোয়ননা ঙসিগী থৌরমদা শরুক য়াখি।

বেকগ্রাউন্দ

রাইপুরদা পাংথোকপা থৌরম অমদা প্রধান মন্ত্রীনা লুপা করোর ৬,৩৫০ রোমগী মরুওইবা রেল সেক্তর প্রোজেকশিং মীয়ামদা কৎথোকখ্রে। প্রোজেকশিংগী মনুংদা ছতিসগর ইস্ত রেল প্রোজেক ফেজ-১, চম্পা অমসুং জামগাগী মরক্তা ৩শুবা রেল লাইন, পেন্দ্র রোদ অমসুং অনপুরগী মরক্তা ৩শুবা রেল লাইন অমসুং তালাইপাল্লি কোএল মাইনদগী এন.তি.পি.সি লারা সুপর থর্মেল পৱার স্তেসন য়ৌবা এম.জি.আর য়াওরি। রেল প্রোজেকশিংনা লমদম অসিদা পেসেঞ্জরশিংদা খুদোংচাবা পীদুনা শেন-থুমগী ফিবম ফগৎহনগনি।

পি.এম-গাতিশক্তি-নেসনেল মাস্তর প্লানগী মখাদা ছতিসগর ইস্ত রেল প্রোজেক ফেজ-১ পায়খৎপনি অমসুং খারসিয়াদগী ধর্মাজয়গর ফাওবগী কিমি ১২৪.৮গী রেল লাইন অমা য়াওরি, ছাল, বারাউদ, দুরগাপুর অমসুং অতোপ্পা কোএল মাইনশিং শম্নবা ফিদর লাইন ৩ য়াওরি। লুপা করোর ৩,০৫৫ রোম চঙনা শেমগৎপা রেল লাইন অসিদা মৈ ফংলবা ব্রোদগেজ লেভেল ক্রোসিংশিং অমসুং ফ্রি পার্ত দবল লাইনশিং য়াওরি।মসিনা মন্দ-রাইগর কোয়লা ফিল্দশিংদগী কোয়লা পুথোকপা ঙমহনগনি।

পেন্দ্রা রোদতগী অনুপুর ফাওবগী অহুমশুবা রেল লাইন অসি কিমি ৫০ শাংবনি অমসুং মসি লুপা করোর ৫১৬ চঙনা শেমগৎপনি। কিমি ৯৮ শাংবা চম্পা অমসুং জামগা মরক্কী ৩শুবা রেল লাইন অসি লুপা করোর ৭৯৬ চঙনা শেমগৎপনি। অনৌবা রেল লাইনশিংনা লমদম অসিদা তুরিজম চাউখৎহনগনি অমসুং থবক ফংবা হেনগৎহনগনি।

কিমি ৬৫ শাংবা মৈ ফংলবা এম.জি.আর সিস্তেম অসিনা তালাইপালি কোয়লা খনিদগী অফবা মখলগী কোয়লা মেগাৱাত ১৬০০গী এন.তি.পি.সি লারা সুপর থর্মেল পৱার স্তেসন্দা ফংহনগনি। মসিনা এন.তি.পি.সি লারাদগী মমল হোঙবা অমসুং অফবা মৈ পুথোকপা হেনগৎহনগনি। এম.জি.আর সিস্তেম অসি লুপা করোর ২০৭০ হেন্না চঙনা শেমগৎপনি।

থৌরম মনুংদা প্রধান মন্ত্রীনা ছতিসগরগী জিলা ৯দা ‘ক্রিতিকেল কিয়ার ব্লোকশিং’ উরেপ-উয়ুং তমখ্রে। ‘ক্রিতিকেল কিয়ার ব্লোকশিং অদু প্রধান মন্ত্রী-অয়ুস্মান ভারত হেল্থ ইনফ্রাস্ত্রকচর মিসনগী মখাদা দুর্গ, কোন্দাগাউন, রাজনন্দাগাউন, গারিয়াবন্দ, জাসপুর, সুরাজপুর, সুরগুজা, বাস্তার অমসুং রাইগর জিলাশিংদা লুপা করোর ২১০ চঙনা পায়খৎপনি।

থৌরম অদুদা প্রধান মন্ত্রীনা সিকল সেল কাউন্সেল্লিং কার্দ লাখ ১ য়েন্থোকখ্রে। প্রধান মন্ত্রীনা জুলাই ২০২৩দা মধ্য প্রদেসকী সাহদোলদা হৌদোকখিবা নেসনেল সিকল সেল এনেমিয়া ইলিমিনেসন মিসনগী মখাদা সিকল সেল কাউন্সেল্লিং কার্দশিং য়েন্থোকপনি।

The railway and healthcare projects being launched in Chhattisgarh will give impetus to the state's socioeconomic development. https://t.co/EE8eIg9HQN

— Narendra Modi (@narendramodi) September 14, 2023

आधुनिक विकास की तेज रफ्तार के साथ ही गरीब कल्याण में भी तेज रफ्तार का भारतीय मॉडल आज पूरी दुनिया देख रही है, उसकी सराहना कर रही है। pic.twitter.com/oWp5T1jSJS

— PMO India (@PMOIndia) September 14, 2023

आज विकास में देश के हर राज्य को, हर इलाके को बराबर प्राथमिकता मिल रही है। pic.twitter.com/ShaA1zKOFf

— PMO India (@PMOIndia) September 14, 2023

बीते 9 वर्षों में हमने छत्तीसगढ़ के बहुमुखी विकास के लिए निरंतर काम किया है। pic.twitter.com/3VrChiUn49

— PMO India (@PMOIndia) September 14, 2023

***