Ka tnat Information and Broadcasting mynta ka sngi ka la ai jingmut ia kito kiba iadon bynta, ba kynthup ruh ia ki media, ki nongpynmih jingpynbna online, bad ki rynsan social media ba kin ym pynmih ia ki jingpynbna/ ka jingpynshlur ia ka jingiathong pisa / jingkhalai. Ka la ong ba ka jingleh lait ia kane ka lah ban wanrah ia ki sienjam na ka liang jong ka Sorkar India hapoh ki ain bapher bapher.

Ka tnat ka la kdew sha ki sienjam ba dang shen da ka Sorkar India pyrshah ia ka rynsan jong ki agent kiba la lum pisa na ki nongpyndonkam ia ki app khalai bad kiba la rah pat ia ka pisa shabar India ban pyni kumno kine ki jingpynbna shaphang ki kam khalai / ki rynsan iathong pisa ki buh jingma ia ka ioh ka kot bad ka imlang sahlang jong ki nongpyndonkam, khamtam ki samla bad ki khynnah. Ka la ong ruh ba ka rukom treikam ka don jingiadei bad ki rynsan pynkit pisa bad ba kane ka ktah ia ka jingshngain jong ka ioh ka kot jong ka ri.

Ka tnat ka la ong ba ha ryngkat kine ki kam beain, ka lah ban long ruh ba ka pisa ka bym khuid ka dei kaba la pyndonkam ban siew ia ka jingpynmih ia kine ki jingpynbna. Namar kane, ka tnat ka la ong ba ki don katto katne ki media kiba kynthup ki nongpynmih jingpynbna bad ki rynsan social media ki la shah ia ka jingpynmih ia ki jingpynbna shaphang ki rynsan iathong pisa bad khalai ha ki por jong ki lympung ialehkai kiba kynthup ia ki lympung ialehkai cricket. Ka la kdew ruh ba kawei na ki lympung ialehkai hapdeng ki ri kan sa sdang ha kine ki sngi ban wan.

Ka tnat ka la ai jingpynbna ban mana ia ki media ba kin pynsaphriang khubor shaphang ki rynsan khalai rynsan iathong pisa. La bthah ruh ia ki nongpynmih jingpynbna ba kin ym shim ia kum kine ki jingpynbna ban pyni sha ki briew ka India. Ki jingai jingmut jong ka tnat ha ka 13.06.2022, 03.10.2022 bad 06.04.2023 ki la dei halor kane kajuh ka kam. Kine ki jingai jingmut ki la ong ba ka jingthong pisa bad ka kam khalai ki dei kiba beain bad kumta ki jingpynbna / jingpynshlur ia kum kine ki jait kam ha kano kano ka rukom ki pynkhein ia ki ain bapher bapher kum ka Consumer Protection Act, 2019, ka Press Council Act 1978 bad kiwei kiwei.

Shuh shuh, ka rule 3 (1) (b) kaba dang shu pynkylla jong ka Information Technology (Intermediary Guidelines and Digital Media Ethics Code) Rules, 2021 ka ong ba ki nongpynmih jingpynbna ki dei ban leh ia kaba donkam bad kim dei ban phah ia ki nongpyndonkam ia ki rynsan computer jong ki ban pyni, upload, pynkylla, pynmih, pynsngew, buh, update ne iasam ia kano kano ka jingtip kaba “long kum ka jingialehkai online ka bym pat pynshisha ba ka dei ka jingialehkai online kaba la ioh jingbit; (x) ka long kum ka jingpynbna lane ka jingpynshlur ia ka jingialehkai online ka bym dei ka jingialehkai online ba la ioh jingbit, lane kano kano ka rynsan ialehkai online kaba plie lad ban ialehkai ia ka jingialehkai online;”

Ka jingai jingmut ha ryngkat ki jingai jingmut ba rim ki dei kiba lah ban ioh ha kane ka link harum.
https://mib.gov.in/sites/default/files/Advisory%20dated%2025.08.2023%20with%20enclosures.pdf

*****