U Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah u la thung ia u dieng ba pynpoi shi klur tylli ki dieng ba thung hapoh ka All-India Tree Plantation Campaign jong ka tnat Kam Pohiing ha ka CRPF Group Center ha Greater Noida, Uttar Pradesh, mynta ka sngi.

U Amit Shah u la plié paidbah ruh ia 15 tylli ki jaka treikam ba dang shu dep shna ha ka jinglut jingsep kaba kot T. 165 klur ha 8 tylli ki jaka treikam jong ka Central Reserve Police Force (CRPF). Kine ki kynthup ia ka jingshna ia 220 tylli ki jaka sah briew ha 102 Rapid Task Force ha ka jinglut jingsep kaba kot sha ka T. 57 klur, ka jingshna ia ka hospital ba don 50 tylli ki jaka thiah nongpang ha Group Center, Raipur ha ka jinglut kaba T. 17 klur, ka jaka treikam, quarter guard bad madan parade ha Recruit Training Center Jodhpur ha ka jinglut kaba T. 16 klur, ka jingshna ia ka jaka sah 240 ngut ki shipai ha Group Center Raipur ha ka jinglut kaba T. 11 klur bad ka jingshna ia ki hospital, ki gym, mess, jaka pynkhuid jaboh, jaka bam bad kiwei kiwei ha ki jaka bapher bapher jong ka ri. Ki heh ki hain kum u Secretary ka tnat Kam Pohiing bad ki Director General jong ka CRPF, CISF, NSG, NDRF, ITBP, SSB, BSF bad Assam Rifles ki la iadon lang ha kane ka sngi.

Ha ka jingai jingkren jong u, u Amit Shah u la ong ba kane ka dei ka sngi kaba kyrpang ia baroh ki Central Armed Police Force (CAPF). U la ong ruh ba lai snem mynshuwa, la rai ba shuwa u Nohprah 2023, ngin thung 5 klur tylli ki dieng, bad shisien ba ki la kham heh, ngin aiti ia ki sha ka pyrthei. U Shah u la ong ba u ngeit skhem ba ka jingthung 5 klur tylli ki dieng shuwa u Nohprah 2023 kan urlong. U la ong ba khnang ban pynurlong ia kane, baroh ki dkhot jong ki CAPF bad ki longiing jong ki ki dei ban pdiang ia kane kum ka thong, ki dei ban khein ba ki dieng ki dei ki paralok jong ki bad ki dei ban ai por ban sumar ia ki. U la ong ba lyngba ka jingthung ia u dieng uba 40 million mynta ka sngi uba long u dieng Peepal, ka pyrthei kan kynmaw ia ka bynta jong ki CAPF ha ka jingpynjyrngam ia ka pyrthei. Kane ka campaign kan wanrah ia ka juk ba thymmai jong ka jingsngewlem ki CAPF na ka bynta ka jingiada ia ka pyrthei bad ka jingpeit ia ka jingkylla ka suinbneng da ka jingshlur. U la ong ba ka thong ban thung 1 klur 50 lak tylli ki dieng mynta u snem ka dang iaid shakhmat, bad ba la thung 4 klur tylli ki dieng haduh mynta ka sngi bad ba ka thong ban thung 5 klur tylli ki dieng shen kan sa urlong.

U Mynti ka tnat Kam Poh Iing u la ong ba kane ka dei ka lyngkhuh sngi kha jong u nongjop khusnam Param Vir Chakra, u Lieutenant Colonel AB Tarapore uba la aiti ia la ka jingim na ka bynta ka jingshngain jong ka ri bad uba la buh ka nuksa kaba bha da kaba ialam lynti ban pynshlur ia baroh. U Shah u la ong ba u Myntri Rangbah Duh, u Narendra Modi u la pynsah jingkynmaw ia u Lieutenant Colonel AB Tarapore da kaba ai kyrteng ia ka dewlynnong ha Andaman-Nicobar kum ka jingkynmaw ia u bad ba un iaisah shirta ha ka mynsiem bad ki jingmut jingpyrkhat jong ki briew.

U Amit Shah u la ong ba ka 'All India Tree Plantation Campaign' ban thung 5 klur tylli ki dieng ka long kum ka Mahakumbh jong ka jingiada ia ka mariang. U la ong ba ki dkhot jong ki CAPF ki la ieng skhe ban pynthikna ia ka jingshngain hapoh ka ri bad ka jingiada ia u pud u sam da ka jingshlur, ka jinglenlade bad ka jingtrei shitom. Ha ryngkat ka jingpynthikna ia ka jingshngain hapoh ka ri, ka jingpeit ia ki jinglynshop ka mariang, ka jingshngain jong ki jaka khappud bad ka jingpynbiang ia ki jingshakri ia ki paidbah ha ki shnong ba nyngkong kiba don ha ki jaka khap pud, ki CAPF mynta ki la trei ia ki kam ban iada ia ka mariang lyngba ka jingthung ia ki dieng. U la ong ba ha ki jinglynshop ka mariang ne ki khlam kum ka COVID-19, ki CAPF jong ngi ki la pyni ia ka jingskhem jingmut ban iadon lang bad ki briew ha man ka jingeh khlem da artatien ban buh jingma ialade. U Shah u la ong ba lyngba ka Vibrant Village Program, ki CAPF jong ngi ki dang pynthikna ba ki jingshakri ki poi sha ki shnong ba nyngkong kiba don ha ki jaka khap pud. U la ong ba mynta ka la wan pat sa kawei ka bynta ha kaba ki CAPF jong ngi ki la trei borbah na ka bynta ka jingiada ia ka mariang lyngba ka jingthung bad jingsumar ia 4 klur tylli ki dieng bad ba ka jingthung 5 klur tylli ki deing shuwa u Nohprah mynta u snem kan long ka jingnoh synniang kaba kyrpang tam. U la ong ba kane kan dei ka kam kaba kongsan tam jong ki kynhun iada ri na ka bynta ka jingiada ia ka mariang ha kylleng ka pyrthei. U la ong ba baroh ki CAPF ki la thung 4 klur tylli ki dieng, bad ki ophisar jong ka Tnat Kam Pohiing ki la pyniaid ia ka prokram ha ki kyrdan bapher bapher. Baroh ki DG jong ki CAPF ki la pyni ka jingkut jingmut na ka bynta kane ka prokram, bad la pdiang shitrhem ia ka ha ka kynhun ki shipai. Ha bun ki jaka, la buh ia ki jingker bad ki jar nar ban iada ia ki tynrai dieng, bad la tih ia ki nala ban pynthikna ba ki im. U la bynrap ba namar kine ki sienjam baroh, 4 klur tylli ki dieng ki la kham pynjyrngam ia ka mariang mynta.

U Myntri Sorkar Pdeng ba dei khmih ia ki Tnat kam Pohiing bad Cooperation u la ong ba ka jingiada ia ka mariang ka lah ban long tang lyngba ka jingthung ia ki dieng, u dieng uba ngi thung mynta ka sngi un pynbiang oxygen ia ki pateng ban wan. U la bynrap ba namar ka jingkiew ka jingjakhlia, ka ktah ia ka ozone layer, bad kumta, ha ki por ban wan, ki kjat sngi kin ktah ia ka pyrthei, bad namar kane ka pyrthei kan nym long shuh kaba shngain ia ki briew. U la ong ba tang kawei ka lad ban iada ia kum kane ka jinglong jingman kadei lyngba ka jingthung bun dieng katba lah bad pynduna ka jingpynmih carbon dioxide. U Shah u la bynrap ba la peit bniah ia artylli ki bynta haba thung ia ki dieng. Kaba nyngkong kalong ba ki dieng ba la thung kidei ban long kiba neh slem, bad kaba ar, kidei ban lah ban pynbiang pura ia ka oxygen, kum u dieng Peepal, Banyan, Neem, Jamun bad kiwei kiwei. U la ong ba kine ki dieng ki pynmih oxygen kumba 60-100% bad ki nohsynniang sha ka jingpynneh pynsah ia ka pyrthei da ki snem.

U Amit Shah u la ong ba u Myntri Rangbah duh, u Narendra Modi u la trei na ka bynta ban kyntiew bad pynlong Aatmnirbhar ia ka India ha ki kam bapher bapher, bad kumta kane ka pynkhlain ia ka kyrdan jong ka ri ha ka pyrthei. U la bynrap ba ka jinghiar pateng bad ka deiriti jong ngi ka ju iai kyntiew ia ka jingiada ia ka mariang, bad lyngba ki jingsngew bad ki kam jong ngi, ngi la iai pynthikna ka jingpynneh pynsah ia ka mariang. U la ban ruh ba u Myntri Rangbah duh, u Narendra Modi u la pynlong ia ka India ka nongialam ha ka jingiakhun pyrshah ia ka jingkylla ka suin bneng bad ka jingkiew jingkhluit ka pyrthei lyngba ka jingkhuid. U Shah u la ong namar kane, la pdiang ia ka "Vasudhaiva Kutumbakam"- Kawei ka Pyrthei, Kawei ka Longiing, Kawei ka Lawei kum ka mission statement jong ka G-20. U la bynrap ba ka India, ryngkat bad ka France, ki la sdang ia ka International Solar Alliance, ka projek kaba thmu ban seng ‘Kawei ka Sngi, Kawei ka Pyrthei, Kawei ka Grid. Bun ki ri mynta ki iashim bynta bad nohsynniang sha kane ka jingiatreilang. Kalong ka jingjop kaba khraw ia ka sorkar pdeng hapoh ka jingialam jong u Myntri Rangbah duh u Narendra Modi. U Myntri Kam Pohiing u la ong ba lyngba ka sienjam Lifestyle Style for Environment (LiFE), u Myntri Rangbah duh, u Modi u la buh hakhmat ia ka rukom im tynrai jong ngi sha kiwei kiwei ri kum ki lad ban iada ia ka Pyrthei. U la bynrap ba ki ri ka pyrthei mynta ki bud ia kine ki sienjam, bad dei namar kine ki sienjam ba ka United Nations ka pynkup burom ia u Myntri Rangbah duh, u Narendra Modi da ka khusnam ‘Champions of Earth’, kaba ithuh ia ka jingkut jingmut jong u na ka bynta ka roi ka par kaba lah ban iaineh.
 

U Myntri sorkar pdeng ba dei khmih ia ka Tnat Kam Pohiing u la ong ba ka India ka la peit ruh sha ki rukom kiba thymmai ban pynduna ka jingpyndonkam ia ki plastic. U la bynrap ba lyngba ka Swachh Bharat Abhiyan, u Myntri Rangbah duh, u Narendra Modi u la shim ia ka sienjam kaba kongsan na ka bynta ka jingiada ia ka mariang. U la ong ba nyngkong, tang 39% ki longiing ha ka ri ki don ia ki painkhana, hynrei mynta, 99.9% ki longiing ki don ia ki painkhana, kaba long ka jingjop kaba khraw ha ki sienjam jong ngi na ka bynta ka jingpynneh pynsah ia ka mariang. U Shah u la ong ba ki sienjam kum ka Net-Zero Carbon Emission, International Solar Alliance, 20% Ethanol Blending, ka jingshna 12 tylli ki refinery katkum ka juk mynta ban pynkylla ia ka bio-gas sha ka biofuel, bad ka Green Hydrogen Mission kidei kiba ka pyrthei ka dang peit bad pynbud. U la bynrap ba u Myntri Rangbah duh, u Narendra Modi u la pyni ia ka jingkut jingmut ka India ban iada ia ka mariang lyngba ki phra tylli ki mission ba kongsan: National Solar Mission, National Mission for Enhanced Energy Efficiency, National Mission on Sustainable Habitat, National Water Mission, National Mission for a Green India, National Mission for Sustaining the Himalayan Ecosystem, National Mission for Sustainable Agriculture, bad National Mission on Strategic Knowledge for Climate Change. Kine ki sienjam ki la pynthymmai biang ia ka deiriti kaba rim ban iada ia ka mariang ha ka ri jong ngi.
 

U Shah u la ong ba ki CAPF jong ngi ki la thung saw klur tylli ki dieng kum shi bynta jong kane ka campaign thung dieng. Haba ngin poi sha ka thong jong ka jingthung san klur tylli ki dieng, da ka jingsarong ngin pyni ka jingsngewlem jong ngi sha ka ri baroh kawei namar ki CAPF ym tangba ki iada ia ki nongshong shnong hynrei ki trei shitom ruh ban iada ia ka mariang. U la bynrap ba mynta, ki CAPF jong ngi ki la jop ia kaei kaba ym lah ban mutdur ba kan urlong. U Myntri Kam pohiing u la ngeit skhem ba kumba ka jingshngain bad ka jingshlur kadei ka nongrim jong ki CAPF, kin pdiang ruh ia ka jingthung dieng kum ka nongrim jong ki.

*****