U Myntri Rangbah duh ka ri, u Narendra Modi, ha ka jingai jingkren na Red Fort ha ka lyngkhuh dap 77 snem ka jingioh jinglaitluid ka ri mynta ka sngi, u la pynkynmaw ba ka India ka la kiew ha ka kyrdan jong ka ha ka pyrthei na ka jingdon ha ka kyrdan ba 10 kum ka ioh ka kot kaba heh tam ha u 2014 sha ka jingdon ha ka kyrdan ba 5 ha u 2023 mynta. U Myntri Rangbah duh u la ong ba kane ka jingkiew ka jia namar ka jingiakhun pyrshah ia ka jingbamsap, ka jingpynsangeh ia ka jingjah haba pynpoi ia ki jingmyntoi jong ki skhim sorkar bad ka jingwanrah ia ka ioh ka kot kaba khlain bad ka jingpynlut ia ka pisa paidbah na ka bynta ka bha ka miat jong ki briew kiba duk. “Mynta, nga kwah ban iathuh ia ki briew jong ka ri ba lada ka ri ka kiew ha ka ioh ka kot, ym tangba ka pyndap ia ki jingdon jingem, ka tei ruh ia ki briew bad ia ka ri. Lada ka don ka sorkar kaba bam smai ban pynlut hok ia kane na ka bynta ka bha ka miat jong ki nongshong shnong jong ka, dei tang haba kumta ba ngi ioh ki jingjop kiba kyrpang.”

Ka jingphah pisa na ka sorkar pdeng sha ki jylla ka la kiew na ka T. 30 lak klur sha ka T. 100 lak klur

Haba ai jingtip shaphang ka jingiaid shaphrang ha ki 10 snem ba la leit, u Myntri Rangbah duh u la ong ba kane ka la kylla mynta. Da kaba ong ba ka jingkylla kalong kaba heh bad ka dak jong ka jinglah treikam ka ri, u Myntri Rangbah duh u la ong ba 10 snem mynshuwa, 30 lak klur tyngka la phah sha ki jylla na ka Sorkar India. Ha ki 9 snem ba la leit, kane ka la kot 100 lak klur, la ong u Modi. “Mynshuwa, 70 hajar klur tyngka la pynlut na ka treasury jong ka Sorkar India na ka bynta ka jingkyntiew ia ki kynhun ha ki shnong ki thaw, mynta kane ka la long palat 3 lak klur tyngka.

Ka jingkiew kaba saw shah ha ka jingpynioh iing ia kiba duk, T. 10 lak klur ka subsidy urea na ka bynta ki nongrep

U Myntri Rangbah duh u la iathuh ia ki briew jong ka ri ba mynshuwa, 90 hajar klur tyngka la pynlut ban shna ia ki iing na ka bynta kiba duk, mynta kane ka la kiew 4 shah bad palat 4 lak klur la pynlut ban shna iing ia kiba duk. U Myntri Rangbah duh u la pyntip ba “ki borni urea kidei kiba die ha ka dor T. 3000 ha ki iew bapher bapher ha kylleng ka pyrthei, ki nongrep jong ngi ki ioh ia ka urea ha ka dor T. 300 bad ka sorkar ka ai subsidy kaba T. 10 lak klur na ka bynta u urea sha ki nongrep jong ngi.”

Ka MUDRA Yojana ka la iarap jan 10 klur ki nongshong shnong ban long ki nongseng kam

U Myntri Rangbah duh u la batai ba ka MUDRA Yojana ka la iarap ia ki klur ngut ki nongshong shnong ban long ki nongseng kam lajong bad ban long ruh ki nongai kam ia kiwei. “Ka Mudra Yojana, kaba don ka mang tyngka kaba palat 20 lak klur tyngka, ka la plie lad na ka bynta ka jingseng kam lajong bad ki kam na ka bynta ki samla jong ka ri. Kumba phra klur ki briew ki la sdang ia ki kam ba thymmai, bad kam dei tang phra klur ngut ki briew kiba sdang ia ki kam jong ki; man u nongseng kam lajong u plie ka lad ioh kam ia uwei ne ar ngut ki briew. Ka jinglah ban ai kam thymmai ia 8-10 klur ngut ki briew ka la urlong lyngba ka Mudra Yojana ba ki phra klur ki briew ki la ioh. U Myntri Rangbah duh u la bynrap ruh ba la ai jingkyrshan ia ki kam khaii pateng ha ka por jong ka khlam COVID-19, ha kaba la ai jingkyrshan ia ki MSME jan 3.5 lak klur tyngka, ban iada ia ki na ka jingngam bad ai bor ia ki.

U Myntri Rangbah duh u la pynkynmaw ruh kumno ka sienjam "One Rank One Pension" ka la wanrah jingmyntoi kaba 70,000 klur tyngka na ka treasury jong ka ri sha ki shipai jong ngi, kum ka jingburom ia ki. Kiba haiing jong ki shipai jong ngi kiba la shongthait ki la ioh ia kane ka pisa, u la ong.

U Myntri Rangbah duh u la kdew ba kine kilong tang katto katne ki nuksa bad ki dang don bun ki sienjam kiba la nohsynniang sha ka roi ka par jong ka ri, kiba la plie lad ioh kam ha ki bynta bapher bapher jong ka ri. U Myntri Rangbah duh u la pynkynmaw ia ka ri haba ianujor bad ki snem ba la leit, ka mang tyngka jong ka ri ka la kiew bun shah ha ki bynta bapher bapher.

“13.5 klur ngut ki briew ki la lait na ka jingduk”

U Myntri Rangbah duh ka ri u la pyntip ba namar kine ki sienjam baroh, 13.5 klur ngut ki briew ki la lait na ka jingduk bad sdang ia ka jingim kaba pdeng ka ioh ka kot, ha ka shi samoi jong ka san snem jong ka sorkar. U Myntri Rangbah duh u la iathuh ba kam don kawei pat ka jingsngewhun ha ka jingim ban ia kane. U la bynrap ba ki skhim bapher bapher naduh ki skhim shna iing, ka jingai 50,000 klur tyngka sha ki nongdie jingdie harud surok lyngba ka skhim PM SVANidhi, bad shibun kiwei kiwei ki skhim kiba kum kine ki la iarap ia kine ki 13.5 klur ki briew ban kiew hapdeng ki jingeh na ka jingban ka jingduk.

***