খুরুমজরি, লৈবাক্কী রেলমন্ত্রী শ্রী অশ্বিনী বৈষ্ণবজী, কেন্দ্রগী মন্ত্রী-মন্দলগী অতোপ্পা মেম্বরশিং, তোঙান-তোঙানবা রাজ্যশিংগী রাজ্যপালশিং, মুখ্য মন্ত্রীশিং, রাজ্যগী মন্ত্রী-মন্দলগী মন্ত্রীশিং, মেম্বর ওফ পার্লিয়ামেন্তশিং, লেজিস্লেচরশিং, অতোপ্পা মরু ওইবা মীওইশিং অমসুং ঐগী নুংশিরবা ইচিল-ইনাওশিং!

চাউখৎ-থৌরাংগী পান্দমগী মাইকৈদা চংশিল্লিবা ভারতনা মাগী অমৃত কালগী অহৌবগী তাঙ্কক্তা লৈরি। অনৌবা ইনোৎ, অনৌবা ইথিল অমসুং অনৌবা ফিরেপশিং লৈজরি। তানফম অসিদা ঙসি ইন্দিয়ন রেলৱেজকী পুৱারীদা অনৌবা পন্দুপ অমসু হৌরি। ভারতকী অচৌবা রেলৱে স্তেসন 1300রোমম হৌজিক অমৃত ভারত রেলৱে স্তেসনশিং ওইনা শেমগৎলগনি, মখোয় অমুক হন্না শেমগৎতুনা মতমগা চুনবা ওইহনগনি। মসিগী মনুংদা ঙসি অমৃত ভারত স্তেসন 508 নৌনা শেমগৎপগী থবক হৌরি। অমসুং অমৃত ভারত স্তেসন 508 নৌনা শেমগৎপদা লুপা করোর লিশিং 25 চাদিং তৌগনি। লৈবাক্কী ইনফ্রাস্ত্রকচরগীদমক, রেলৱেজকীদমক অমসুং মরু ওইনা ঐগী লৈবাক্কী মীচম প্রজাশিংগীদমক কেম্পেন অসি কয়াম চাউগনি অদোম্না খন্থদুনা য়েংবীয়ু। লৈবাক্কী রাজ্য পুম্নমক্না মসিগী কান্নবশিং ফংগনি। খুদম ওইনা অমৃত স্তেসন 55 লুপা করোর লিশিং 4.5 চাদিং তৌদুনা UPদা শেমগৎলগনি। রাজস্থানদসু অমৃত ভারত স্তেসন 55 লৈরগনি। MPদা লুপা করোর 1000গী চাদিং তৌদুনা স্তেসন 34 নৌনা শেমগৎকনি। মহারাস্ত্রদা স্তেসন 44 শেমগৎনবগীদমক লুপা করোর লিশিং অমা মখাই চাদিং তৌগনি। তামিল নাদু, কর্নাতকা অমসুং কেরালাদা লৈবা মরু ওইবা স্তেসনশিংসু অমৃত ভারত স্তেসন ওইনা শেমগৎকনি। অমৃত কালগী অহৌবদা পুৱারী ওইরবা কেম্পেন চত্থবগীদমক রেলৱেজ মন্ত্রালয়বু ঐহাক্না থাগৎলি অমসুং ইরৈবাকচা পুম্নমক্তা নুংঙাইবা ফোঙদোকচরি।

মরুপশিং,

ঙসি মালেম পুম্বনা ভারত্তা মীৎয়েং থম্লি। মালেমগী থাক্তা ভারতকী ক্রেদিবিলিতী হেনগৎলকখি, মালেমনা ভারত্তা থমলমখিবা ৱাখল্লোনদা অহোংবা লাকখি অমসুং মসিগী মরু ওইবা মরম অনি লৈ। অহানবদা, ভারতকী ইরৈবাকচাশিংনা দিকেদ অহুমরোমগী মতুংদা, চহি কুনথ্রাগী মতুংদা অবসোল্যুৎ মেজোরিতীগা লোয়ননা সরকার অমা শেমখি, মসিনা অহানবা মরমনি অমসুং অনিশুবা মরম অসিনা অবসোল্যুৎ মেজোরিতী ফংবগা লোয়ননা সরকার অসিনা ময়েক শেংনা জনাতা জনরধানগী মখোয়গী ৱাখল্লোন ফোঙদোকখি। ইকাই খুম্নবা উৎপগা লোয়ননা অচৌবা ৱারেপশিং লৌরি, শীংনবশিং মতম চুপ্পগী ৱারোইশিন পুরক্নবা লেপ্তনা হোৎনখি। ঙসি ইন্দিয় রেলৱেজ অসি মসিগী খুদম ওইরি। হৌখিবা চহি খরা অসিদা রেলৱেজকী তৌখিবা থবকশিং অসিগী স্তেতিস্তিক্স অমসুং ই-পাউ অসিনমক মীপুম খুদিংমক্তা অপেনবা পোকহনখি লোয়ননা মখোয়দা অঙকপা পোকহনখি। খুদম ওইনা চহি 9 অসিদা ঐখোয়গী লৈবাক্তা শেমখিবা রেল ত্রেকশিংনা মালেমদা লৈরিবা খা অফ্রিকা, য়ুক্রেন, পোলেন্দ, UK অমসুং স্বিদেনগুম্বা লৈবাকশিংগী রেল নেৎৱার্কশিংগী মশিংদগী হেনখি। ভারতনা মমাং চহিদা খক্তা শেমখিবা ত্রেকশিং অসিনা খা কোরিয়া, ন্যু জীলেন্দ অমসুং ওস্ত্রিয়াগুম্বা লৈবাকশিংগী রেল নেৎৱার্ক্তগী হেনখি। ঙসি ভারত্তা মোদর্ন ত্রেনশিংগী মশিং অসি খোঙজেল য়াংনা হেনগৎলক্লি। ঙসি লৈবাক্কী পান্দম অসি পেসেঞ্জর অমসুং প্রজা খুদিংমক্তা রেলৱেগী খুদোংচাবা এক্সেস তৌবা লোয়ননা খোঙচৎ অসি নুংঙাইহনবা অসিনা ওইরি। হৌজিক ত্রেনদগী স্তেসন ফাওবা খ্বাইদগী নুংঙাইবা এক্সপরিয়েন্স ফংহন্নবা খোঙথাং অমা পাইখৎলি। প্লেৎফোর্মশিংদা হেন্না নুংঙাইবা সীৎশিং থারি, নুংঙাইবা ৱেতিং রুমশিং শেম্লি। ঙসি লৈবাক্কী রেলৱে স্তেসন লিশিং কয়াদা ফ্রি WiFi ফেসিলিতী পীরি। ঐখোয়না মসিগী ফ্রি ইন্তর্নেৎ অসিগী খুদোংচাবা নহারোল কয়ানা লৌবা উবা ফংলি, মহৈ তমদুনা মখোয়গী পুন্সিদা মাইপাকপা কয়া পুরকপা উবা ফংলি।

মরুপশিং,

রেলৱেজতা থবক পাইখৎপগী মওং অসি অচৌবা মাইপাকপশিংনি। পি.এম. অমা হেক্তনা মহাক্না ফাওরিবা অদু ওগস্ত 15দা লাল কিলাদগী ফোঙদোকপা পামগনি। অমসুং ওগস্ত 15 নকশিল্লকপা অসিদা ঐহাক্না নুমিৎ অসিদা মসিগী মতাংদা খন্ননবা খৌরাংনা ঙাইজরি। অদুবু ঙসি অচৌবা থৌরম অমা পাঙথোক্লি, লৈবাক্কী কাচিন-কোয়া খুদিংমক্তগী মীয়াম্না য়াওরি। মরম অসিনা ঐহাক্না হৌজিক মসি শন্দোকনা খন্নরি।

মরুপশিং,

রেলৱে অসি ঐখোয়গী লৈবাক্কী লাইফ-লাইন হায়না খঙনৈ। অদুবু মসিগা ইরোইননা ঐখোয়গী সহরশিংগী আইদেন্তিতি অদুসু  সহরদুদা লৈরিবা রেলৱে স্তেসনগা মরী লৈনৈ। মতমগী মতুং ইন্না রেলৱে স্তেসনশিং অসি হৌজিক ‘হর্ত ওফ দি সিতী’ ওইরক্লে। সহরগী মরু ওইবা থবক-থৌরম পুম্নমক রেলৱে স্তেসনশিংগী অকোইবদা তৌরি। মরম অসিনা ঙসি ঐখোয়গী রেলৱে স্তেসনশিং অসি অনৌবা মওংদা ওন্থোকপা তঙাই ফদে, রেলৱে স্পেস য়ারিবা মখৈ শীজিন্নগদবনি।

মরুপশিং,

লৈবাক অসিদা অনৌবা মতমগা চুনবা স্তেসন কয়া শারবা মতমদা মসিনা চাউখৎপগী অনৌবা এনভাইর্নমেন্ত অমা শেমলক্কনি। লমকোইবা, দোমেস্তিক নত্ত্রগা ফোরেন অমা হেক্তা ওইরবসু ত্রেনগী খুত্থাংদা মতমগা চুনবা স্তেসনশিং অসিদা থুংবদা রাজ্য অমসুং সহরগী অহানবা পিকচর অদুনা মখোয়বু শোইদনা শুমহৎকনি, কাউঙমদবা ওইগনি। মোদর্ন সর্ভিসেসনা মরম ওইদুনা তুরিজম অসি শাহৌ পীগনি। স্তেসনগী অকোইবদা শেম-শারিবা অসিনা মরম ওইরগা শেন্মীৎলোনগী থবক-থৌরমশিংসু শাহৌ পীরগনি। সরকারনা সহর অমসুং রাজ্যগী আইদেন্তিতী অসি স্তেসনশিংগা লিঙ্ক তৌনবা ‘ৱান স্তেসন, ৱান প্রদক্ত’সু লোঞ্চ তৌখি। মসিনা অপুনবা মফমদা লৈরিবা মীয়াম, শিন্মীশিং অমসুং আর্তিসেনশিং লোয়ননা জিলা অসি ব্রান্দং তৌবদা কান্নবা ফংলগনি।

মরুপশিং,

আজাদী কা অমৃতকালদা লৈবাক অসিনা মাগী হেরিতেজকী চাউথোকচবা পোক্নবা ৱাশক অমসু লৌখি। অমৃত রেলৱে স্তেসন্না মসিগী খুদম অমা ওইরগনি, ঐখোয়দা চাউথোকচবা পোকহল্লগনি। লৈবাক্কী কলচর অমসুং লোকেল হেরিতেজকী মমি অমা স্তেসনশিং অসিদা উবা ফংলগনি। খুদম ওইনা জয়পুর রেলৱে স্তেসন্না হৱামহল, অমের ফোর্তগুম্বা রাজস্থানগী হেরিতেজকী মমি উবা ফংগনি। জম্মু অমসুং কশমীরদা লৈরিবা জম্মু তাৱি রেলৱে স্তেসন অসি মমিং লৈরবা রাঘুনাথ মন্দিরনা ইথিল পীগনি। নাগালেন্দগী দিমাপুর স্তেসন্দা ত্রাইব 16কী লোকেল আর্কিতেকচর উবা ফংগনি। অমৃত স্তেসন অমমমনা সহরগী মোদর্ন এস্পিরেসনশিং অমসুং অরিবা হেরিতেজকী খুদম অমা ওইরগনি। হৌজিক মতম অসিদা লৈবাক্কী পুৱারী ওইরবা মফমশিং অমসুং তীর্থ য়াত্রাগী মফমশিংবু ফাওনহন্নবা লৈবাক অসিদা ভারত গৌরব য়াত্রা ত্রেন, ভারত গৌরব তুরিস্ত ত্রেন চেলহল্লি। মসিসু ফগৎহন্নবা হোৎনরিবা অসি নখোয়না উবা ফংলমগনি।

মরুপশিং,

সিস্তেম অমা হেক্তবু অওনবা পুরক্নবা ঐখোয়না মখোয়গী মতিক-ময়াই মশক খঙবা তঙাই ফদে। ইন্দিয়ন রেলৱেজদা শাহৌ লৈহন্নবা অচৌবা মতিক ময়াই লৈজৈ। ৱাখল্লোন অসিগা লোয়ননা হৌখিবা চহি 9দা ঐখোয়না রেলৱেজতা রেকোর্দ ওইবা মওংদা ইনভেস্তমেন্ত তৌখি। চহি অসিদা রেলৱেজতা লুপা করোর লাখ 2.5 হেনবগী বজেৎ কাইথখি। বজেৎ অসি 2014দগী শরুক মঙা হেল্লি। ঙসি হোলিস্তিক এপ্রোচ অমগা লোয়ননা রেলৱেজকী অপুনবা চাউখৎ-থৌরাংগীদমক থবক পাইখৎলি। চহি 9 অসিদা লোকোমোতিবশিং পুথোকপা শরুক 9 হেনগৎখি। ঙসি HLB কোচশিং মমাংগা য়েংনবদা শরুক 13 হেন্না লৈবাক অসিদা শারি।

মরুপশিং,

ঐখোয়গী সরকারনা অৱাং নোংপোক্তা রেলৱেজ পাকথোক চাউথোকহনবদা মীৎয়েং চংখি। খোঙজেল য়াংনা রেলৱে লাইনশিং দব্লিং তৌবা, গেজ কনভর্জন, ইলেক্ত্রিফিকেসন, অনৌবা রুৎশিং শাবগী থবক পাইখৎলি। অৱাং নোংপোক্কী কোনুং খুদিংমক অথুবদা রেলৱে নেৎৱার্ক্কা কন্নেক্ত তৌরগনি। চহি 100গী মতুংদা নাগালেন্দদা অনিশুবা রেলৱে স্তেসন শাখি। অৱাং নোংপোক্তা অনৌবা রেল লাইনশিং কম্মিসন তৌবগী থবক মমাংদগী শরুক অহুম হেন্না হেনগৎতুনা চত্থরি।

মরুপশিং,

হৌখিবা চহি 9দা দেদিকেতেদ ফ্রৈৎ কোরিদোর 2200km শাখ্রে। মসিনা মরম ওইদুনা পোৎ পুবা ত্রেনশিংগী চত্থোক চৎশিন তৌবগী মতমদা চাউনা হন্থহনবা ঙমখি। দিল্লী-NCRদগী ৱেস্তর্ন পোর্তশিং ফাওবা চৎপদা, গুজরাতকী সমুদ্র তোর্বান নত্ত্রগা মহারাস্ত্রগ সমুদ্র তোর্বান ওইরবসু মমাংদা ত্রেন্না পোৎ দেলিবর তৌবদা চাংচৎ ওইনা পুং 72 চংলমখি, ঙসি হায়রিবা লগ্গেজ, গুদ অসি পুং 24দা য়ৌহনবা ঙম্লে। মতৌ অসুম্না অতোপ্পা রুৎশিংদসু চংবা মতম চাদা 40 ফাওবা হন্থহনখি। চত্থোক চৎশিন তৌবগী মতমদা হন্থহনবা হায়বা অসিনা তাক্লি মদুদি পোৎ পুবা ত্রেনশিংগী খোঙজেল হেনগৎলে অমসুং পোৎশিং থুনা য়ৌবা ঙমহল্লি। ঐখোয়গী ওন্তপ্রিনোরশিং, বিজিনেসমেনশিং অমসুং মরু ওইনা ঐখোয়গী লৌমী ইচিল-ইনাওশিংনা মসিদগী চাউনা কান্নবা ফংলি। ঐখোয়গী উহৈ অমসুং মনামশিং অসিনা হৌজিক লৈবাক্কী মফম অমদগী অমদা খোঙজেল য়াংনা চৎপা ঙম্লি। লৈবাক অসিদা অসিগুম্বা মখলগী ত্রান্সপোর্তেসন অসি লৈরবদি ভারতকী পোত্থোকশিং অসি চপ মান্ননা খোঙজেল য়াংনা শাবা ঙম্লগনি। ঐখোয়গী অপীকপা আর্তিসেনশিং, ঐখোয়গী স্মোল স্কেল ইন্দস্ত্রীনা পুথোকপা পোত্থোক অমা হেক্তা ওইরবসু পোৎলমশং অসিনা মালেমগী কৈথেলদা খোঙজেল য়াংনা য়ৌবা ঙম্লগনি।

মরুপশিং,

নখোয় পুম্নমক্না উবা ফংখ্রে মদুদি মমাংদা রেলৱে ওভর ব্রিদজকী অৱাৎপা লৈবনা মরম ওইদুনা সমস্যা কয়া লৈরমখি। 2014 গী মমাংদা লৈবাক অসিদা ওভর ব্রিদজ অমসুং অন্দর ব্রিদজ লিশিং  6তগী তানা লৈরমখি। ঙসি ওভর ব্রিদজ অমসুং অন্দর ব্রিদজকী মশিং অসি লিশিং 10 দগী হেন্না লৈরে। লৈবাক অসিদা ব্রোদ গেজতা অনমেন লেবেল ক্রোসিংশিংগী মশিং সিনোদা লৈবা ঙম্লে। ঙসি রেলৱেজ অমসুং রেলৱে প্লেৎফোর্মশিংদা পেসেঞ্জর ফেসিলিতীশিং পীবদা অহল ওইরবা অমসুং মীমান্নদ্রবা মীওইশিংগী মথৌ তাবদা অখন্নবা মীৎয়েং চংলি।

মরুপশিং,

ঐখোয়না ইন্দিয়ন রেলৱেজ মতমগা চুনবা লোয়ননা অকোইবদা অকাইবা পীদবা ওইহনবদা মীৎয়েং চংলি। অথুবদা ভারতকী রেল ত্রেক্কী চাদা 100 ইলেক্ত্রিফাইদ তৌরগনি। হায়বদি চহি খরা অসিদা ভারতকী ত্রেন পুম্নমক ইলেক্ত্রিসিতীনা চেলহল্লগনি। মসিদা অকোইবদা কয়া য়াম্না কান্নবা পীরগনি অদোমনা খন্থদুনা য়েংবীয়ু। চহি 9 অসিদা সোলর পেনেলদগী ইলেক্ত্রিসিতী পুথোক্লিবা রেলৱে স্তেসনশিংগী মশিং 1200 হেন্না হেনখ্রে। ঐখোয়গী পান্দমদি লাক্কদৌরিবা তুংলমচৎ অসিদা স্তেসন পুম্নমক গ্রীন ইনর্জী ওইহনবনি। ঐখোয়গী ত্রেনশিংদা দব্বা 70000 অমসুং কোচ 7000দা LED লাইৎশিং ইনস্তোল তৌখ্রে। 2014গা চাংদম্নবদা ত্রেনশিংদা লৈরিবা বাইওতোইলেৎশিংগী মশিং অসি শরুক 28 হেনখৎখি। শাগদৌরিবা অমৃত স্তেসনশিং  অসি গ্রীন বিল্দিংশিংগী স্তেন্দর্দশিং থুংহনগনি। 2030 ফাওবদা ভারতনা রেলৱেশিং নেৎ জিরো ইমিসনদা চেল্লিবা লৈবাক অমা ওইবা ঙম্লগনি।

মরুপশিং,

রেলৱেজনা ঐখোয়গী অনকপা অমসুং ইমুং মনুংগা উন্নহন্নবা অচৌবা কেম্পেন অমা চত্থখি, দিকেদ কয়া লৈবাক অসি ফাওননবা থবক তৌদুনা লাকখি। হৌজিক রেলবু হেন্না ফবা শক্তাক অমসুং মোদর্ন ফ্যুচরগা কন্নেক্ত তৌনবা থৌদাং ঐখোয়গীনি। অমসুং প্রজা অমা ওইনা ঐখোয়না রেলৱেজ ঙাকশেন্নবা, সিস্তেমশিং ঙাকশেন্নবা, ফেসিলিতীশিং ঙাকশেন্নবা, লুনান্না থম্নবা ঙাকশেন্নবা থৌদাং পাঙথোক্কদবনি। অমৃতকালগী মতম অসি থৌদাং পাঙথোক্নবা মতমসু ওইরি। অদুবু মরুপশিং ঐখোয়না করিগুম্বা থৌদোক খরা উবদা ঐখোয়গী থমোয় কাইরি। লাইবক থীবদি ঐখোয়গী লৈবাক্কী বিরোধিগী শরুক অমনা হৌজিকসু অরিবা মওং মতৌ অদু ঙাক্না চৎলি। ঙসিসু মখোয়না করিগুম্বা অমত্তা তৌরোই অমসুং কনাগুম্বা অমদসু তৌহল্লোই। মখোয়না ‘থবক তৌগনু অদুগা তৌহনগনু’ হায়বা ৱাখল্লোন অদুদা চপ য়ুংনা লেপ্পি। ঙসি অমদি তুংলমচৎকীদমক লৈবাক্কী মথৌ তাবশিং অদু খঙনা পার্লিয়ামেন্তগী অনৌবা বিল্দিং শাখি। পার্লিয়ামেন্ত অসি লৈবাক্কী দেমোক্রেসীগী খুদমনি, মসিদা দল অমসুং বিরোধি পুম্নমক্না রিপ্রজেন্ত তৌরি। অদুবু বিরোধিগী শরুক অসিনা পার্লিয়ামেন্তগী অনৌবা বিল্দিংবু য়ানীংদবা উৎলি। ঐখোয়না কর্তব্য পথ শেমগৎপদা মসিসু য়ানীংদবা উৎখি। মীওইশিং অসিনা চহি 70দা লৈবাক্কী অথৌবশিংগীদমক ৱার মেমোরিএল অমা ফাওবা শারমখিদে। ঐখোয়না নেস্নেল ৱার মেমোরিএল শাবা মতমদা মসিবু মীমাংদা য়ানীংদবা উৎপদা মখোয়না ইকাইবা পোকখিদে। সরদার বল্লভভাউ পতেলগী স্তেচু ওফ য়ুনিতী অসিনা ঙসি মালেমগী খ্বাইদগী চাউবা মীতম ওইরি। ভারত মচা খুদিংমক্না চাউথোকচবা পোকই। অমসুং রাজনিতী দল খরনা মীখলগী মতমদা সরদার সাহেববু নীংশিংলি। অদুবু ঙসি ফাওবা মখোয়গী অচৌবা লুচিংবা অমত্তনা স্তেচু ওফ য়ুনিতীদা চৎখিদে অমসুং ইকাই খুম্নবা উৎখিদে।

অদুবু মরুপশিং,

ঐখোয়না পোজিতিব পোলিতিক্সকা লোয়ননা লৈবাক্কী চাউখৎ-থৌরাং মাংদা পুনবা ৱারেপ লৌখি অমসুং মসিনা মরম ওইদুনা মিসন অমা ওইনা নেগাতিব পোলিতিক্স নাথৈরগা পোজিতিব পোলিতিক্সকী লম্বীদা চংশিল্লি। করম্বা রাজ্যদা করি সরকার লৈ, কদাইদা কনাগী ভোৎ বেঙ্ক লৈ, পুম্নমক অসি থাদোক্লগা ঐখোয়না লৈবাক পুম্বগী চাউখৎ থৌরাংদা মরু ওইবা মীৎয়েং চংলি। সবকা সাথ, সবকা বিকাস অসি মঙফাওনবা ঙম্নবা ঐখোয়না কন্না হোৎনরি।

মরুপশিং,

হৌখিবা চহিশিংদা রেলৱেজনা নহাশিংদা থবক পীরিবা খ্বাইদগী মরু ওইবা পাম্বৈসু ওইখি। রেলৱেজ খক্তদা নহা লাখ 1.5 হেনবনা থবক ফংখি। মতৌ অসুম্না ইনফ্রাস্ত্রকচরদা লুপা করোর লাখ কয়া ইনভেস্ত তৌখিবা অসিনা নহা লাখ কয়াদা থবক পীরি। হৌজিক্কী ওইনা কেন্দ্র সরকারনা নহা লাখ 10দা থবক পীনবা কেম্পেন চত্থরি। রোজগার মেলদা নহাশিংনা লেপ্তনা এপোইন্তমেন্ত লেত্তরশিং ফংলি। মসি অওনবা লাক্লিবা ভারতকী মমিনি, মসিদা নহাদা অনৌবা খুদোংচাবশিং পীরি অমসুং নহাশিংনা চাউখৎ-থৌরাংদা অনৌবা ইনোৎ হাপ্পি।

মরুপশিং,

ঙসি ঐখোয়বু থৌজাল পীনবা থৌরম অসিদা নীংতম লান্মী কয়া য়াওরি। পদ্ম এৱার্দী কয়ানা থৌরম অসিদা লেংশিল্লি। ওগস্ত অসি ভারত মচা খুদিংমক্কী য়াম্না অখন্নবা থানি। থা অসি য়াওল হৌবগী থানি, তৌবীমল খঙবা উৎপগী থানি, থৌদাং লৈ হায়বা খঙবগী থানি। ভারতকী পুৱারীদা অনৌবা মায়োল তাক্লিবা পুৱারী ওইরবা নুমিৎ কয়া ওগস্ততা তারি অমসুং ঙসিসু মসিনা ঐখোয়দা ইথিল পীরি। হয়েং ওগস্ত 7তা লৈবাক পুম্বনা নেস্নেল হেল্দুলুম দে পালন তৌগনি মসি স্বাদেসি মুফমেন্তনা ইথিল পীখিবনি। ওগস্ত 7 অসি ভোকেল ফোর লোকেলগী ফিরেপ নৌনা লৌনবা নুমিৎনি। নুমিৎ খরনিগী মতুংদা গনেশ চতুর্থি হৌরগনি। ঐখোয়না হৌজিক্তগী হৌরগা ইকো-ফ্রেন্দলী ওইবা গনেশ চতুর্থি শাবা হৌরসি। গনপতি বাপ্পাগী মীতম অসি ইকো-ফ্রেন্দলী ওইবা পোৎনা শারসনি। মসিগী কুহ্মৈ অসিনা ঐখোয়গী লোকেল আর্তিসেনশিং, ঐখোয়গী হেন্দিক্রাফমেনশিং অমসুং ঐখোয়গী অপীকপা ওন্তপ্রিনোরশিংনা শাবা প্রদক্তশিং লৈনবা ইথিল পীখি।

মরুপশিং,

ওগস্ত 7গী মতুংদা 9 লাক্লগনি। ওগস্ত 9 অসি পুৱারী ওইরবা ক্বিৎ ইন্দিয়া মুফমেন্ত হৌখিবা তাং অদুনি। মহাত্মা গান্ধীনা মন্ত্র তাকপীদুনা ক্বিৎ ইন্দিয়া মুফমেন্তনা নীংতম্বা ফংনবা মাইকৈদা চংশিল্লিবা ভারতকী খোঙথাংশিংদা অনৌবা ইথিল পীখি। মসিনা ইথিল পীদুনা ঙসি লৈবাক পুম্বনা ফত্তবা খুদিংমক্তা হায়রি – ক্বিৎ ইন্দিয়া। মফম খুদিংমক্তা খোন্থাং অমা খক্তনা নীনখি। শেঞ্জা-থুমজা – ক্বিৎ ইন্দিয়া হায়বদি শেঞ্জা থুমজা ভারত থাদোকখ্রো। দাইনাস্তী ক্বিৎ ইন্দিয়া হায়বদি ফেমিলিজমনা ভারত থাদোকখ্রো। এপীজমেন্ত ক্বিৎ ইন্দিয়া।

মরুপশিং,

ওগস্ত 14 অসি পার্তিসন রিমেমব্রেন্স দে তারি, মসিদা ইমা ভারতপু শরুক অনি থোক্না থুগাইখি, মসিগী নুমিৎ অসিনা ভারত মচা খুদিংমক্কী মমিৎতা পিরাং ইহৌহনখি। ভারতকী পার্তিসন অসিদা চৈথেং ফংখ্রবা মশিং লাকঙমদ্রবা মীওইশিংবু নুমিৎ অসিনা লাকপদা নীংশিংলি। পুম্নমক মাংদুনা চৎখ্রবা অমসুং ইমা ভারতকী মীনুংশিং পুদুনা পুন্সি অমুক হৌনা থৌনা ফনা লান্থেনখিবা ইমুংশিংদা অৱাবা ফোঙদোকপা অদু উৎলি। ঙসি মখোয়না মখোয়গী ইমুং মনুংগী অমসুং লৈবাক্কী য়াইফনবা লৈবাক্কী চাউখৎ-থৌরাংদা চাউনা শরুক তম্মি। অমসুং মরুপশিং ওগস্ত 14, পার্তিসনগী নুমিৎ, ইমা ভারত মচেৎ তাখিবা নুমিৎ অসিনা তুংলমচৎতা ইমা ভারতকী অপুনবগী শক্তম ঙাক্নবা ঐখোয়দা থৌদাংসু পীরি। হৌজিক হীরম অমত্তদা লৈবাক অসিদা অকাইবা পীবা লৈহল্লোই হায়না ওগস্ত 14, পার্তিসন দে অসিদা ফিরেপ লৌবগী মতমসু ওইরে।

মরুপশিং,

লৈবাক অসিদা লৈরিবা অঙাং, অহল, মীপুম খুদিংমক্না ওগস্ত 15 ঙসিদুনা লৈরি। অমসুং ঐখোয়গী ওগস্ত 15, ঐখোয়গী নীংতম নুমিৎ অসি ঐখোয়গী মচু অহুমগী ফিরাল অমদি ঐখোয়গী লৈবাক্না খুমাং চাউশিন্নবা ঐখোয়গী ফিরেপ অদু নৌনা লৌবা মতমনি। মমাং চহিগুম্না হন্দকসু য়ুম খুদিংমক্তা মচু অহুমগী ফিরাল চীংখৎসি। য়ুম খুদিংদা তিরঙ্গা, থমোয় খুদিংদা তিরঙ্গা, ৱাখল খুদিংদা তিরঙ্গা, খোঙথাং খুদিংদা তিরঙ্গা, মঙলান খুদিংদা তিরঙ্গা, ফিরেপ খুদিংদা তিরঙ্গা। ঐহাক্না উবা ফংই মদুদি মরুপ কয়ানা মখোয়গী সোসিএল মেদিয়াগী DPদা তিরঙ্গং থম্মি। য়ুমদা তিরঙ্গা চীংখৎপগা লোয়ননা ফ্লেগ মার্চশিংসু চৎসি। ঙসি ঐহাক্না ইরৈবাকচা খুদিংমক্তা মরু ওইনা নহারোলশিংদা তিরঙ্গা চীংখৎপদা য়াওনবা অমসুং মসিগী পাউজেল শন্দোক্নবা হায়জরি।

মরুপশিং,

মতম শাংনা লৈবাক অসিগী মীয়াম্না মখোয়না পীরিবা তেক্স অসি করিগুম্বা অমত্তা কান্নদে হায়না খল্লম্মি। মখোয়না ৱানা তানজবা শেনফম অসি করপ্সন্দা চৎখ্রগনি হায়না খল্লম্মি। অদু ঐখোয়গী সরকারনা মসিগী ৱাখল্লোন অসি হোংদোকহনখ্রে। ঙসি মীয়াম্না মখোয়গী শেল খুদিংমক লৈবাক অসি শেমগৎ-শাগৎপদা শিজিন্নরে হায়না খল্লে। খুদোংচাবশিং হেনগৎলক্লি, পুন্সি মহিং ফগৎলক্লি। অদোম্না থেংনরকপা অৱাবশিং অদু থেংনদনবা অহিং ননুংথিল খাক্তনা থবক পাইখৎলি। মসিনা মরম ওইদুনা তেক্স থিবা মীওইশিংনা চাউখৎ থৌরাংদা থাজবা থম্লি অমসুং মসিনা মরম ওইদুনা তেক্স থীরিবা মীশিংসু হেনগৎলক্লি। লুপা লাখ 2 গী ইনকম ফাওবদা তেক্স লৌরম্বা মতম অমা লৈরম্মি। ঙসিদি মোদীগী গরেন্তীগী মতুং ইন্না লুপা লাখ 7 ফাওবা তেক্স লৌদ্রে। মসি ফাওবদা লৈবাক অসিদা ইনকম থীরকপগী শেনফম অসি লেপ্পা লৈতনা হেনগৎলক্লি। মসি চাউখৎ থৌরাংগী ওইনা য়াম্না কান্নবা অমা ওইরি। মসিনা ময়েক শেংনা লৈবাক অসিদা মিদ্দল ক্লাসকী স্কোপ অসি লেপ্পা লৈতনা হেনগৎলক্লি হায়বা তাক্লি। নুমিৎ মঙানিগী মমাংদা ইনকম তেক্স ফাইল তৌবগী অরোইবা নুমিৎ লেপখি। চৎলিবা চহি অসিদা ইনকম তেক্স ফাইল তৌবা মীশিং অসি চাদা 16% হেনগৎলকপা থেংনরে। মসিনা মীয়াম্না সরকার অসিদা, লৈবাক অসিদা পাইখৎলিবা ইনোবেসন্দা অমসুং লৈবাক অসি চাউখৎপা মথৌ হায়বসিদা থাজবা কয়া য়াম্না হেনগৎলকপগে হায়বদু তাক্লি।  ঙসিদি মীয়াম্না রেলৱেজ অসি করম্না নৌনা শেমগৎপগে, মেত্রো করম্না চাউথোকপগে হায়বদু উবা ফংলি। ঙসিদি লৈবাক অসিদা এক্সপ্রেসৱে অমগী মথংদা অঅমা করম্না শাবগে হায়বদু মীয়াম্না উবা ফংলে। ঙসি মীয়াম্না অনৌবা এয়রপোর্ত অনৌবা হোস্পিতাল, অনৌবা স্কুল কয়াম থুনা শাবগে হায়বদু উবা ফংলে। মীয়াম্না মসিগী অহোংবশিং অসি উবা ফংবা মতমদা লৈবাক অসি মখোয়গী শেলদগী শেমগৎলে হায়না ৱাকলদা কল্লি। মসিনা নখোয়গী অঙাংশিংগী অফবা তুংলমচৎ অমা পীবা ঙম্লগনি। মসিগী থাজবা অসি ঐখোয়না নোংম-নোংমগী মপাঙ্গল কলহনগদবনি।

অদুগা ইচিল ইনাওশিং,

করিগুম্বা মসিগী রেলৱে স্তেসন 508 অসি মতম চুনবা মওংদা শেমগৎপা মতমদা মসিসু হায়রিবা মাইকৈ অসিদা লৌখৎপা খোঙথাং অমা ওইরোইদ্রা। অমৃত ভারত স্তেসনশিং অসিনা ভারতকী রেৱেজকী নৌনা শেমগৎপা অসিদা অনৌবা পনখৈ অমা পীবা ঙম্লগনি অমসুং মসিগী নীতম ইহৌগী থা অসিদা ঐখোয় ভারত মচা খুদিংমক্না 2047দা 100শুবা নীতম্বা নুমিৎ পালন তৌবা নুমিত্তা ভারত অসি চাউখৎলবা লৈবাক অমা ওইহন্নবা অনৌবা ৱারেপশিং লৌরসি। ঐহাক্না মেম্বর অমা ওইনা লৌগদবা থৌদাং খুদিংমক ঐহাক্না পাংথোক্কনি। মসিগী ৱারেপ অসিগা লোয়ননা পুম্নমকপু থাগৎপা ফোঙদোকচরি! হন্না হন্না থাগৎচরি।

***