প্রধান মন্ত্রী, শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা নেস্নেল রোজগার মেলাদা ৱা ঙাঙখ্রে অমদি তোঙান তোঙানবা লৈঙাক্কী দিপার্তমেন্তশিংদা অমদি ওর্গনাইজেসনশিংদা নৌনা থবক খল্লবা মীওইশিংদা এপোইন্তমেন্ত লেত্তর ৭০,০০০ হেন্না য়েন্থোকখ্রে‍। লৈবাক্কী মফম শিনবা থুংবদগী নৌনা থবক খল্লবা মীওইশিং অসিনা লৈঙাক্কী থবক্তা দিপার্তমেন্ত ওফ রিভিন্যু, ফাইনেন্সিএল সর্ভিসেস, পোস্ত, স্কুল এজুকেসন, হাইয়র এজুকেসন, দিফেন্স, হকশেল অমদি য়াইফ-য়ুম্বাল, সেন্ত্রেল পব্লিক সেক্তর অন্দরতেকিং, ৱাতর রিসোর্সেস, পর্সেনেল এন্দ ত্রেনিং অমদি গৃহ মন্ত্রালয়নচিংবা য়াওনা তোঙান তোঙানবা মন্ত্রালয় অমদি দিপার্তমেন্তশিংদা থবক পুবা হৌরগনি‍। লৈবাক শিনবা থুংবদগী মফম ৪৪দগী মীওইশিংনা মেলা অদুদা প্রধান মন্ত্রীগী ৱারোলদু শরুক য়াখি‍।

তিল্লিবা মীয়ামদা ৱা ঙাঙলদুনা, প্রধান মন্ত্রীনা ঙসি অসি ১৯৪৭দা অহানবা ওইনা কন্সতিতুএন্ত এসেমব্লীনা মচু অহুমগী ফিরালবু হৌজিক লৈরিবা মওংসিদা অহানবা ওইনা য়ানখিবা নুমিৎ ওইবনা নহা ওইরিবা রিক্রুইতশিংগী খক্তা নত্তনা লৈবাকসিগী ওইনা পুৱারী ওইরগদবা নুমিৎ অমনি হায়খি‍। অসিগুম্লবা মরুওইখ্রবা নুমিৎ অসিদা লৈঙাক্কী এপোইন্তমেন্ত লেত্তর ফংলিবা অনৌবা রিক্রুইতশিং অসিগী ওইনদি তশেংনা পুক্নিং থৌগৎনিংঙাইগী মশক্নি হায়রদুনা প্রধান মন্ত্রীনা মখোয়গী মফমদা লৈবাক্কী মিংচৎ হেন্না পুরক্নবা পুক্নিং থৌগৎখি‍। অনৌবা রিক্রুইতশিং অসিগী শুবা নোম্বা কনবা অমদি খোঙফম চেৎপা ফিরেপ্ননি ভারতনা অজাদী কা অমৃৎ মহোৎসব পাঙথোক্লিবা মতমসিদা চাওখৎপা ভারতকী পান্দমদা মখোয়গী থৌদাং য়ানবা তাঞ্জা ফংলিবসি হায়না মহাক্না হায়খি‍। প্রধান মন্ত্রীনা নৌনা থবক খল্লবা মীওইশিং অমদি মখোয়গী ইমুং মনুংগী মফমদা কাউঙম্লরোইদবা মীৎকুপ অসিগীদমক নুংঙাইবা ফোঙদোকখি‍।

অজাদী কা অমৃৎ কাল অসিদা, মীপুম খুদিংমক্না ভারতপু চাওখৎপা ভারত অমা ওইহন্নবগী ফিরেপ লৌরি হায়না প্রধান মন্ত্রীনা হায়খি‍। লাক্কদৌরিবা চহি ২৫ অসি নৌনা থবক খল্লবা মীওইশিং অমদি লৈবাকসিগীদমক্তা য়াম্না মরুওইবা মতম্নি হায়রদুনা হন্দক চহি খরসিদা মালেম অসিনা ভারত্তা থাজবা থম্লক্লিবা, মরুওইবা মীৎয়েঙ য়েংলক্লিবা অমদি পুক্নিং চিংশিল্লক্লিবা অসিগী কান্নবা মতিক চানা লৌহৌনবা ৱাফম মহাক্না থমখি‍। মাঙজিল থাবা শেন্মিৎলোনশিংগী মরক্তা মালেমগী ওইনা খ্বায়দগী চাউবা শেন্মিৎলোনশিংগী মনুংদা ১০শুবা মফমদা লৈরম্বদগী ভারতনা ৫শুবা মফমদা কাখৎলকখিববু মহাক্না শিংথাখি‍। শেন্মিৎলোনগী মরমদা খঙ-হৈরবা মীওই অয়াম্বনা হায়নবগুম ভারতনা মালেমগী মকোক থোংবা শেন্মিৎলোন ৩গী মরক্তা চল্লক্লগনি হায়বা ৱাফমসু মহাক্না থমখি‍। “মালেমগী মকোক থোংবা শেন্মিৎলোন ৩গী মনুংদা অমা ওইরকপা হায়বসি ভারতকীদমক্তদি য়াম্না মশক থোকপা পন্দোল অমা ওইরগনি”, হায়না হায়রদুনা প্রধান মন্ত্রীনা ফীভম ঐসিনা সেক্তর খুদিংমক্তা থবক্কী খুদোংচাবা কয়া হেনগৎহল্লগনি অমদি মীচম মীয়ামগী শেন্থোক হেনগৎহল্লগনি হায়খি‍। অনৌবা ওফিসরশিং অসিনা অমৃৎ কাল অসিদা লৈবাক্কী থৌগল তৌবগী ফজরবা তাঞ্জা ফংলিবসিনা মরম ওইরগা লৈঙাক্না থবক লৌবগী খ্বায়দগী হেন্না খুদোংচারবা মতম হৌজিক্তগী হেনবা লৈররোই হায়বা ৱাফম মহাক্না থমখি‍। নৌনা থবক খল্লবা মীওইশিংসিগী প্রাইওরিতী লৈবাক মীয়ামগী থৌগলদা অমদি চাওখৎপা ভারতকী পান্দমগা চুশিন্ননা থবক তৌবগা লোয়ননা হিংবদা কোমহন্নবগীদমক মীয়ামগী ইসুশিংগী ৱারোইশিন পুরকপদা মীৎয়েঙ থমগদবনি হায়বা ৱাফমসু মহাক্না থমখি‍। “নখোয়গী অপীকপা থৌওং অমনা কনাগুম্বা অমগী পুন্সিদা চাউনা অহোংবা পুরকপা ঙমগনি”, হায়রদুনা প্রধান মন্ত্রীনা মীয়াম হায়বসি লাইগী মশক্নি অমদি মখোয়গী থৌগল তৌবনা লাইগী থৌগল তৌবগা পাঙ্খক্নি হায়খি‍। নৌনা থবক খল্লবা মীওইশিং অসিনা মখোয়গী খ্বায়দগী চাউবা পেনবগী ইহুল থোরক্নবগীদমক মীয়ামগী থৌগল তৌবা মথৌ তাই হায়বা ৱাখল্লোনসিদা থবক তৌগদবনি হায়না মহাক্না ফোঙদোকখি‍।

ঙসিগী থৌরমদা নৌনা থবক খল্লবা মীশিং য়াম্না য়াওরিবা বেঙ্কিং সেক্তরগী মতাঙদা ৱা ঙাঙলদুনা, প্রধান মন্ত্রীনা শেন্মিৎলোন পাকথোক চাউথোকহনবদা বেঙ্কিং সেক্তরনা লৌরিবা থৌদাংগী মতাঙদা ৱাফম কয়া থমখি‍। “ঙসি ভারত অসি মালেমগী খ্বায়দগী মপাঙ্গল কনবা বেঙ্কিং সেক্তরশিংনি হায়না খন্নবা লৈবাকশিংগী মনুং চল্লে”, হায়না শ্রী মোদীনা হৌখিবা চহি মাপলগী খোঙচৎপু নিংশিংলদুনা ফোঙদোকখি‍। মহাক্না মমাঙথক্তা সেক্তর অসিদা রাজনিতীগী মশাগীতা খনবা মচৎনা শোকহনখিবশিংগী মতাঙদা ৱাফম কয়া থমখি‍। শক্তি লৈবা মীওইশিংনা ফোন তৌরক্লগা লোনশিং পীরম্বা মমাঙথক্কী ‘ফোন বেঙ্কিং’গী মতাঙদা মহাক্না পনখি‍। হায়রিবা লোনশিং অসি কৈদৌঙৈদা শিংলকখিদে হায়না মহাক্না হায়খি‍। হায়রিবা স্কামশিং অসিনা লৈবাকসিগী বেঙ্কিং সেক্তরগী য়াংলেন শরুবু থুদেকখি হায়না মহাক্না ফোঙদোকখি‍। হায়রিবা ফীভমসিদগী থোরক্নবগীদমক ২০১৪গী মতুংদগী পায়খৎখিবা থৌরাংশিং মহাক্না পুথোক্তুনা থমখি‍। মহাক্না লৈঙাক্কী বেঙ্কশিংগী মেনেজমেন্ত মপাঙ্গল কনখৎহনবগী ৱাফমশিং পনখি, বেঙ্ক মচাশিংবু অচৌবা বেঙ্কশিংদা পুনশিনবগী অমদি প্রোফেস্নেলিজমগী মতাঙদা ৱাফম কয়া থমখি‍। লুপা লাখ ৫ ফাওবগী দিপোজিৎ ইন্স্যুর তৌহন্দুনা বেঙ্কিং সিস্তেমদা অনৌবা থাজবা অমা পুরক্তুনা দিপোজিৎ চাদা ৯৯দি শাফহল্লে‍ হায়না শ্রী মোদীনা হায়খি‍। বেঙ্করপ্তসী কোদগুম্বা এক্তশিংগী মতেঙনা বেঙ্কশিংবু অমাঙবদগী ঙাকথোক্লে‍। মখা তানা, লৈঙাক্কী লনথুম লুত তৌরিবা মীওইশিংদা মখোয়গী লনথুম ফাজিন্দুনা য়াচন লাক্তুনা, অমাঙবা অমদি এন.পি.এ.গীদমক খঙনরম্বা বেঙ্কশিং হৌজিক্তি মখোয়গী রেকোর্দ ওইবা শে্দোংগীদমক খন্নরক্লে‍।

প্রধান মন্ত্রীনা বেঙ্কিং সেক্তরদা লৈরিবা শিন্মীশিংগী শুবা নোম্বা কনবা মতৌদা চাউথোকচবা পোকই হায়খি‍। “বেঙ্কিং সেক্তরদা লৈরিবা মীওইশিংনা ঐবু নৎত্রগা ঐগী মঙলানশিংবু কৈদৌনুংদা নীংহন্নবা পোকহনখিদ্রি”, হায়না মহাক্না হায়খি‍। জন ধন একাউন্ত করোর ৫০ হাংদোক্তুনা জন ধন একাউন্ত স্কীমবু চাউনা মায় পাকহনখিবগীদমক প্রধান মন্ত্রীনা বেঙ্কিং সেক্তরনা হোৎনখিববু থাগৎখি‍। মসিনা লাইচৎ মনুংদা নুপী করোর কয়াগী একাউন্ততা শেল থাজিনবদা চাউনা মতেঙ ওইখি‍।

এম.এস.এম.ই. সেক্তর ফগৎহন্নবা পায়খৎলিবা থৌরাংশিংগী মতাঙদা ঙাঙলদুনা, প্রধান মন্ত্রীনা এন্তরপ্রাইজিং ওইবা নহাশিংদা কোলেতরেল য়াওদবা লোনশিং পীরিবা মুদ্রা য়োজনাগী মতাঙদা পনখি‍। স্কীম অসিবু মায় পাকহনবগীদমক মহাক্না বেঙ্কিং সেক্তরবু থাগৎখি‍। মতৌ অসুম্না, লৈঙাক্না নুপী সেল্ফ হেল্প গ্রুপশিংগী লোনগী শেনফম শরুক অনি হেনগৎহনখিবা অমদি লোন পীদুনা এম.এস.এম.ই. সেক্তরতা তেংবাংদুনা অপীকপা এন্তরপ্রাইজেজশিংবু ঙাকথোক্তুনা থবক করোর ১.৫ কনখিবদা বেঙ্কিং সেক্তরনা অচৌবা থৌদাং লৌখি‍ হায়না মহাক্না হায়খি‍। মহাক্না বেঙ্ককী শিন্মীশিংবু পি.এম. কিসান সম্মান নিধী মায় পাকহনবগীদমক থাগৎখি‍। লম্বী মতাইদা পোৎ য়োনবা মীওই লাখ ৫০ হেনববু স্বানিধি স্কীম্না মতেঙ পীখি‍। “নখোয়গী এপোইন্তমেন্ত লেত্তরদুনা লায়রবশিং মপাঙ্গল কলহন্নবা বেঙ্কিংবু খুৎলায় অমা ওইনা শীজিন্ননবা নখোয়না রিজোলুসন লেত্তর অমা পায়গনি হায়না ঐনা থাজৈ”, হায়না মহাক্না হায়খি‍।

কুইদ্রিবা নিতি রিপোর্তনা হৌখিবা চহি ৫ অসিদা ভারত মচা করোর ১৩বু লায়রবগী পনখৈগী মথক্তা পুখৎলকখ্রে হায়না পাউদম্লি হায়না প্রধান মন্ত্রীনা হায়খি‍। মসিদা লৈঙাক্কী শিন্মীশিংনা পাঙথোকখিবা থৌদাংশিংবু মহাক্না শকখঙখি অমদি পক্কাগী য়ুম, তোইলেৎ অমদি ইলেক্ত্রিসিতী কন্নেক্সন পীবগী মতাঙদসু মহাক্না পনখি‍। “হায়রিবা স্কীমশিং অসিনা লায়রবশিংগী মনাক্তা য়ৌরকপদা, মখোয়গী পুক্নিংগী পাঙ্গলসু হাপকৎলকই‍। মায় পাকবা অসি করিগুম্বা ঐখোয়না হেন্না কন্না হোৎনদুনা ভারত্তগী লায়রবা মুত্থৎপা ঙম্লবদি, ভারত্তগী লায়রবা মপুং ফানা কোকহনবা ঙমগনি হায়বা ৱাফমসিগী খুদম অমা ওইরি‍। অদুগা, মসিদা লৈবাক অসিগী লৈঙাক্কী শিন্মী খুদিংমক্কী থৌদাং চাউনা লৈ”, হায়না প্রধান মন্ত্রীনা হায়খি‍।

প্রধান মন্ত্রীনা নিও-মিদ্দল ক্লাস হেন্না পাকথোক চাউথোরক্তুনা অনৌবা থবক্কী খুদোংচাবশিং শেমগৎলিবা, লৈবাকসিদা লায়রবা মশিং হন্থহল্লক্লিবা অতোপ্পা মরম অমবুসু পনখি‍।  নিও-মিদ্দল ক্লাসকী হেনগৎলক্লিবা দিমান্দ অমদি এস্পিরেসন্না মেনুফেকচরিংদা হেনগৎহল্লি‍। ভারতকী ফেক্তরী অমদি ইন্দস্ত্রীশিংদা পোত্থোক পুথোকপা হেনগৎলকপনা খ্বায়দগী হেন্না কান্নহল্লিবসি লৈবাকসিগী নহাশিংবুনি হায়বা ৱাফম মহাক্না থমখি‍। মোবাইল ফোন মপান্দা থাদোকপদা ভারতনা কমদৌনা নুমিৎ খুদিংগী অনৌবা রেকোর্দ থম্লিবগে, ২০২৩গী অহানবা থা ৬তা য়োনখিবা গারী মশিং, অমদি ইলেক্ত্রি গারী য়োনবগী রেকোর্দকী মতাঙদা মহাক্না পনখি‍। “অসিগুম্বা থৌওং পুম্নমক্না লৈবাকসিদা এমপ্লোইমেন্ত অমদি এমপ্লোইমেন্তকী খুদোংচাবশিং হেনগৎহল্লি”, হায়না মহাক্না মখা তাখি‍।

“মালেম পুম্বনা ভারতকী হৈথোই শিংথোইবদা মীৎয়েঙ থম্লি”, হায়রদুনা প্রধান মন্ত্রীনা মালেমগী চাওখৎলবা শেন্মিৎলোনশিংগী মীশিংগী চহি চাংচৎ ৱাংখৎলকপনা মরম ওইরগা থবক শুবা মীশিং হন্থরকপগী ৱাফম পুথোক্তুনা নৈনখি‍। মরম অদুনা, হৌজিক অসি ভারতকী নহাশিংগী কন্না হোৎননবা অমদি মখোয়গী হৈশিংবা অমদি মতিংবু হেনগৎহন্নবা হোৎনবা মতম্নি হায়না প্রধান মন্ত্রীনা হায়খি‍। ভারতকী আই.তি.গী হৈশিংবা, দোক্তর অমদি নর্সশিংগী লৈরিবা অচৌবা দিমান্দকী মতাঙদা পল্লদুনা, প্রধান মন্ত্রীনা ভারতকী হৈশিংবু ইকায় খুম্নবগী চাং লৈবাক খুদিংদা সেক্তর খুদিংদা লেপ্পা লৈতনা হেনগৎলক্লি হায়খি‍। হৌখিবা চহি ৯ অসিদা, লৈঙাক অসিনা স্কিল দিভেলপমেন্ততা মীৎয়েঙ থমদুনা পি.এম. কৌসল বিকাস য়োজনাগী মখাদা নহা করোর ১.৫ ত্রেন তৌখ্রে হায়খি‍। নহাশিংবু মালেমগী খুদোংচাবশিংগীদমক শেম শাহৌনবগীদমক স্কিল ইন্দিয়া ইন্তরনেস্নেল সেন্তর ৩০ লিংখৎখিবগী মতাঙদসু মহাক্না পনখি‍। প্রধান মন্ত্রীনা লৈবাক শিনবা থুংনা অনৌবা কলেজ, আই.তি.আই., আই.আই.তি. অমদি তেক্নিকেল ইন্সতিত্যুৎশিং লিংখৎখিবগী মতাঙদসু পনখি অমদি ২০১৪ ফাওবদা, লৈবাকসিদা মেদিকেল কলেজ ৩৮০খক লৈরম্মি অদুগা হায়রিবা মশিং অসি হৌখিবা চহি ৯ অসিদা ৭০০তগী হেল্লে হায়খি‍। মহাক্না নর্সিং কলেজ মশিং হায়নিংঙাই লৈতনা হেনগৎলক্লিববুসু পনখি‍। “মালেমগী দিমান্দশিং পীবা ঙমগদবা স্কিলশিংনা ভারতকী নহাশিংগীদমক অনৌবা খুদোংচাবা লাখ কয়া শেম্লক্কনি”, হায়না শ্রী মোদীনা মখা তাখি‍।

মহাক্কী ৱারোল লোইশিল্লকপদা, প্রধান মন্ত্রীনা নৌনা থবক খল্লবা মীওইশিং অসিনা য়াম্না পোজিতিব ওইবা এনভাইরনমেন্ত অমদা লৈঙাক্কী থবক চঙলক্লি অমদি হায়রিবা অফবা ৱাখল্লোন অসিবু মাঙদা পুখৎনবগী থৌদাং মখোয়গী মথক্তা তারবনি হায়খি‍। প্রধান মন্ত্রীনা মখোয়গী মফমশিংদা তম্বা লেপ্তনবা অমদি মশাবু ফগৎহনবা লেপ্তনবা ৱাফম থমখি অমদি লৈঙাক্না শেম্বা ওনলাইন লর্নিং প্লেৎফোর্ম অমা ওইরিবা আইগোৎ কর্ময়োগীগী খুদোংচাবা মতিক চানা লৌননবা ৱাফমসু থমখি‍।

বেকগ্রাউন্দ

রোজগার মেলা অসি থবক পীবদা প্রধান মন্ত্রীনা খ্বায়দগী চাউবা খোঙফম য়েৎলিবা খোঙফম অসিবু মঙফাওনহন্নবগী মায়কৈদা থাংজিনবা খোঙথাঙ অমনি‍। রোজগার মেলা অসিনা মখা তানা থবক পীবদা মরুওইবা থৌদাং লৌগনি অমদি লৈবাক্কী চাওখৎহনবদা নহাশিং মপাঙ্গল হাপ্নবা অমদি শরুক য়াহন্নবা ৱাহন্থোক লৈবা খুদোংচাবশিং পীনবদা মতেঙ ওইগনি‍।

নৌনা থবক খল্লবা মীওইশিং অসিনা, ‘মফম অমা হেক্তদা দিভাইস অমা হেক্তদা’ তম্বগী ফোর্মেত্তা ফংহল্লিবা ই-লর্নিং কোর্স ৪০০ হেন্না য়াওরিবা আইগোৎ কর্ময়োগী পোর্তেলদা য়াওরিবা ওনলাইন মোদ্যুল অমা ওইরিবা কর্ময়োগী প্রারম্ভগী খুত্থাঙদা মশাবু ত্রেন তৌজনবগী তাঞ্জা অমসু ফংলি‍।

Rozgar Mela is an attempt to empower the youth and encourage their active engagement in the nation's progress. https://t.co/SIcjs5DlkB

— Narendra Modi (@narendramodi) July 22, 2023

आज जिन लोगों को नियुक्ति पत्र मिल रहे हैं, उनके लिए यादगार दिन है और देश के लिए भी बहुत ऐतिहासिक दिन है: PM @narendramodi pic.twitter.com/gthYAono5L

— PMO India (@PMOIndia) July 22, 2023

*****