ಕೇಂದ್ರ ಗೃಹ ಮತ್ತು ಸಹಕಾರ ಸಚಿವ ಶ್ರೀ ಅಮಿತ್ ಶಾ ಅವರು ಇಂದು ಹರಿಯಾಣದ ಗುರುಗ್ರಾಮದಲ್ಲಿ ಎನ್‌ ಎಫ್‌ ಟಿ ಗಳು, ಕೃತಕ ಬುದ್ಧಿಮತ್ತೆ ಮತ್ತು ಮೆಟಾವರ್ಸ್‌ ಯುಗದಲ್ಲಿ ಅಪರಾಧ ಮತ್ತು ಭದ್ರತೆ ಕುರಿತ ಜಿ-20 ಸಮ್ಮೇಳನದ ಉದ್ಘಾಟನಾ ಅಧಿವೇಶನವನ್ನು ಉದ್ದೇಶಿಸಿ ಮಾತನಾಡಿದರು. ಸಮ್ಮೇಳನದ ಉದ್ಘಾಟನಾ ಅಧಿವೇಶನದಲ್ಲಿ ಗೃಹ ವ್ಯವಹಾರಗಳ ರಾಜ್ಯ ಸಚಿವ ಶ್ರೀ ಅಜಯ್ ಕುಮಾರ್ ಮಿಶ್ರಾ, ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ರಾಜ್ಯ ಸಚಿವ ಶ್ರೀ ರಾಜೀವ್ ಚಂದ್ರಶೇಖರ್, ಕೇಂದ್ರ ಗೃಹ ಕಾರ್ಯದರ್ಶಿ ಮತ್ತು ಇತರ ಗಣ್ಯರು ಉಪಸ್ಥಿತರಿದ್ದರು. ಎರಡು ದಿನಗಳ ಸಮ್ಮೇಳನದಲ್ಲಿ ಜಿ-20 ದೇಶಗಳು, 9 ವಿಶೇಷ ಆಹ್ವಾನಿತ ದೇಶಗಳು, ಅಂತಾರಾಷ್ಟ್ರೀಯ ಸಂಸ್ಥೆಗಳು ಮತ್ತು ತಂತ್ರಜ್ಞಾನ ನಾಯಕರು ಮತ್ತು ವಿಷಯ ತಜ್ಞರು ಮತ್ತು ಪ್ರಪಂಚದಾದ್ಯಂತದ 900 ಕ್ಕೂ ಹೆಚ್ಚು ಪ್ರತಿನಿಧಿಗಳು ಭಾಗವಹಿಸುತ್ತಿದ್ದಾರೆ.

ಹೆಚ್ಚುತ್ತಿರುವ ಸಂಪರ್ಕಿತ ಜಗತ್ತಿನಲ್ಲಿ ಸೈಬರ್ ಸ್ಥಿತಿಸ್ಥಾಪಕತ್ವವನ್ನು ನಿರ್ಮಿಸಲು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಹಕಾರದ ತುರ್ತು ಅಗತ್ಯವನ್ನು ಶ್ರೀ ಅಮಿತ್ ಶಾ ಅವರು ತಮ್ಮ ತಮ್ಮ ಭಾಷಣದಲ್ಲಿ ಒತ್ತಿ ಹೇಳಿದರು. ಈ ವರ್ಷ, ಭಾರತವು ಜಿ-20 ರ ಅಧ್ಯಕ್ಷತೆಯನ್ನು ವಹಿಸಿದೆ ಮತ್ತು ಭಾರತದ ಜಿ-20 ಅಧ್ಯಕ್ಷತೆಯ ವಿಷಯ "ವಸುಧೈವ ಕುಟುಂಬಕಂ" ಅಥವಾ "ಒಂದು ಭೂಮಿ-ಒಂದು ಕುಟುಂಬ-ಒಂದು ಭವಿಷ್ಯ", ಇದು ನಮ್ಮ ಸಾಂಸ್ಕೃತಿಕ ಪರಂಪರೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದರು. ಇಂದಿನ 'ಡಿಜಿಟಲ್ ವರ್ಲ್ಡ್' ನಲ್ಲಿ ಈ ವಿಷಯ ಬಹುಶಃ ಅತ್ಯಂತ ಪ್ರಸ್ತುತವಾಗಿದೆ ಎಂದು ಅವರು ಹೇಳಿದರು.

ತಂತ್ರಜ್ಞಾನವು ಎಲ್ಲಾ ಸಾಂಪ್ರದಾಯಿಕ ಭೌಗೋಳಿಕ, ರಾಜಕೀಯ ಮತ್ತು ಆರ್ಥಿಕ ಗಡಿಗಳನ್ನು ಮೀರಿದೆ ಮತ್ತು ಇಂದು ನಾವು ದೊಡ್ಡ ಜಾಗತಿಕ ಡಿಜಿಟಲ್ ಹಳ್ಳಿಯಲ್ಲಿ ವಾಸಿಸುತ್ತಿದ್ದೇವೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಮನುಷ್ಯರು, ಸಮುದಾಯಗಳು ಮತ್ತು ದೇಶಗಳನ್ನು ಹತ್ತಿರಕ್ಕೆ ತರುವಲ್ಲಿ ತಂತ್ರಜ್ಞಾನವು ಸಕಾರಾತ್ಮಕ ಬೆಳವಣಿಗೆಯಾಗಿದ್ದರೂ, ಕೆಲವು ಸಮಾಜ ವಿರೋಧಿ ಶಕ್ತಿಗಳು ಮತ್ತು ಜಾಗತಿಕ ಶಕ್ತಿಗಳು ನಾಗರಿಕರು ಮತ್ತು ಸರ್ಕಾರಗಳಿಗೆ ಆರ್ಥಿಕ ಮತ್ತು ಸಾಮಾಜಿಕ ಹಾನಿಯನ್ನುಂಟುಮಾಡಲು ತಂತ್ರಜ್ಞಾನವನ್ನು ಬಳಸುತ್ತಿದೆ ಎಂದು ಅವರು ಹೇಳಿದರು. ಆದ್ದರಿಂದ, ಈ ಸಮ್ಮೇಳನವು ಹೆಚ್ಚು ಮಹತ್ವದ್ದಾಗಿದೆ, ಏಕೆಂದರೆ ಇದು ಡಿಜಿಟಲ್ ಜಗತ್ತನ್ನು ಎಲ್ಲರಿಗೂ ಸುರಕ್ಷಿತವಾಗಿಸಲು ಸಂಘಟಿತ ಕ್ರಮದ ಕಡೆಗೆ ಪ್ರಮುಖ ಜಾಗತಿಕ ಉಪಕ್ರಮವಾಗಿದೆ ಎಂದು ಅವರು ಹೇಳಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು “ಸೈಬರ್ ಭದ್ರತೆಯು ಇನ್ನು ಮುಂದೆ ಡಿಜಿಟಲ್ ಜಗತ್ತಿಗೆ ಮಾತ್ರ ಸೀಮಿತವಾಗಿರುವುದಿಲ್ಲ ಇದು ರಾಷ್ಟ್ರೀಯ ಭದ್ರತೆಯ ಜಾಗತಿಕ ಭದ್ರತೆಯ ವಿಷಯವಾಗಿದೆ” ಎಂದು ನಂಬಿದ್ದಾರೆ. ತಂತ್ರಜ್ಞಾನದ ಮಾನವೀಯ ಅಂಶಕ್ಕೆ ಪ್ರಧಾನಿ ಮೋದಿ ಒತ್ತು ನೀಡಿದ್ದಾರೆ ಎಂದರು. ತಂತ್ರಜ್ಞಾನದ ಬಳಕೆಯಲ್ಲಿ 'ಸಹಾನುಭೂತಿʼ ಮತ್ತು 'ಸೂಕ್ಷ್ಮತೆ'ಯನ್ನು ಖಚಿತಪಡಿಸಿಕೊಳ್ಳಲು ಮೋದಿಯವರು "ಇಂಟರ್ನೆಟ್ ಆಫ್ ಥಿಂಗ್ಸ್" ಅನ್ನು "ಎಮೋಷನ್ಸ್ ಆಫ್ ಥಿಂಗ್ಸ್" ನೊಂದಿಗೆ ಸಂಯೋಜಿಸಿದ್ದಾರೆ ಎಂದು ಶ್ರೀ ಶಾ ಹೇಳಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ಭಾರತವು ತಳಮಟ್ಟದಲ್ಲಿ ಉದಯೋನ್ಮುಖ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುವಲ್ಲಿ ಮುಂಚೂಣಿಯಲ್ಲಿದೆ ಮತ್ತು ಆಧುನಿಕ ತಂತ್ರಜ್ಞಾನವನ್ನು ಸಮಾಜದ ಎಲ್ಲಾ ವರ್ಗಗಳಿಗೆ ಹೆಚ್ಚು ಸುಲಭವಾಗಿ ಮತ್ತು ಕೈಗೆಟುಕುವಂತೆ ಮಾಡುವ ಗುರಿಯನ್ನು ನಾವು ಹೊಂದಿದ್ದೇವೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಇಂದು, 840 ಮಿಲಿಯನ್ ಭಾರತೀಯರು ಆನ್‌ಲೈನ್ ಸಂಪರ್ಕ ಹೊಂದಿದ್ದಾರೆ ಮತ್ತು 2025 ರ ವೇಳೆಗೆ ಇನ್ನೂ 400 ಮಿಲಿಯನ್ ಭಾರತೀಯರು ಡಿಜಿಟಲ್ ಜಗತ್ತನ್ನು ಪ್ರವೇಶಿಸಲಿದ್ದಾರೆ ಎಂದು ಗೃಹ ಸಚಿವರು ಹೇಳಿದರು. ಕಳೆದ 9 ವರ್ಷಗಳಲ್ಲಿ ಭಾರತದಲ್ಲಿ ಇಂಟರ್ನೆಟ್ ಸಂಪರ್ಕಗಳು ಶೇ.250 ರಷ್ಟು ಹೆಚ್ಚಾಗಿವೆ ಮತ್ತು ಪ್ರತಿ ಜಿಬಿ ಡೇಟಾದ ವೆಚ್ಚವು ಶೇ.96 ರಷ್ಟು ಕಡಿಮೆಯಾಗಿದೆ ಎಂದು ಅವರು ಹೇಳಿದರು. ಪ್ರಧಾನ ಮಂತ್ರಿ ಜನ್-ಧನ್ ಯೋಜನೆ ಅಡಿಯಲ್ಲಿ 500 ಮಿಲಿಯನ್ ಹೊಸ ಬ್ಯಾಂಕ್ ಖಾತೆಗಳನ್ನು ತೆರೆಯಲಾಗಿದೆ ಮತ್ತು 330 ಮಿಲಿಯನ್ ರುಪೇ ಡೆಬಿಟ್ ಕಾರ್ಡ್‌ಗಳನ್ನು ವಿತರಿಸಲಾಗಿದೆ ಎಂದು ಅವರು ಹೇಳಿದರು. 2022 ರಲ್ಲಿ 90 ಮಿಲಿಯನ್ ವಹಿವಾಟುಗಳೊಂದಿಗೆ ಭಾರತವು ಜಾಗತಿಕ ಡಿಜಿಟಲ್ ಪಾವತಿಗಳಲ್ಲಿ ಮುಂಚೂಣಿಯಲ್ಲಿದೆ ಮತ್ತು ಭಾರತದಲ್ಲಿ ಇದುವರೆಗೆ 35 ಟ್ರಿಲಿಯನ್ ರೂ. ಮೌಲ್ಯದ ಯುಪಿಐ ವಹಿವಾಟುಗಳು ನಡೆದಿವೆ ಎಂದು ಶ್ರೀ ಶಾ ಹೇಳಿದರು. ಜಾಗತಿಕ ಡಿಜಿಟಲ್ ಪಾವತಿಗಳಲ್ಲಿ ಶೇ.46 ರಷ್ಟನ್ನು ಭಾರತದಲ್ಲಿ ಮಾಡಲಾಗುತ್ತಿದೆ ಮತ್ತು 2017-18 ರಿಂದ ವಹಿವಾಟಿನ ಪ್ರಮಾಣದಲ್ಲಿ 50 ಪಟ್ಟು ಹೆಚ್ಚಳವಾಗಿದೆ ಎಂದು ಅವರು ಹೇಳಿದರು. ನೇರ ಲಾಭ ವರ್ಗಾವಣೆ (ಡಿಬಿಟಿ) ಮೂಲಕ 52 ಸಚಿವಾಲಯಗಳಾದ್ಯಂತ 300 ಕ್ಕೂ ಹೆಚ್ಚು ಯೋಜನೆಗಳನ್ನು ಒಳಗೊಳ್ಳುವ ಮೂಲಕ, ಫಲಾನುಭವಿಗಳ ಬ್ಯಾಂಕ್ ಖಾತೆಗಳಿಗೆ 300 ಮಿಲಿಯನ್ ರೂ. ಮೊತ್ತವನ್ನು ನೇರವಾಗಿ ವರ್ಗಾಯಿಸಲಾಗಿದೆ ಎಂದು ಶ್ರೀ ಶಾ ಹೇಳಿದರು. ಡಿಜಿಲಾಕರ್ ಸುಮಾರು 6 ಬಿಲಿಯನ್ ದಾಖಲೆಗಳನ್ನು ಸಂಗ್ರಹಿಸಿದೆ ಎಂದು ಅವರು ಹೇಳಿದರು. ಭಾರತ್ ನೆಟ್ ಅಡಿಯಲ್ಲಿ, ದೇಶದಲ್ಲಿ 600,000 ಕಿಲೋಮೀಟರ್ ಆಪ್ಟಿಕಲ್ ಫೈಬರ್ ಕೇಬಲ್ (ಒ ಎಫ್‌ ಸಿ) ಹಾಕಲಾಗಿದೆ. ಹೊಸ ಯುಗದ ಆಡಳಿತಕ್ಕಾಗಿ ಏಕೀಕೃತ ಮೊಬೈಲ್ ಅಪ್ಲಿಕೇಶನ್ ಆದ ಉಮಂಗ್‌ ಆ್ಯಪ್ ಅನ್ನು 53 ಮಿಲಿಯನ್ ನೋಂದಣಿಗಳೊಂದಿಗೆ ಪ್ರಾರಂಭಿಸಲಾಗಿದೆ ಎಂದು ಶ್ರೀ ಶಾ ಹೇಳಿದರು. ಸೇವೆಗಳ ಡಿಜಿಟಲ್ ವಿತರಣೆಯ ಉಪಕ್ರಮಗಳು ಒಂದು ದಶಕದಲ್ಲಿ ಭಾರತವನ್ನು 'ಡಿಜಿಟಲ್ ರಾಷ್ಟ್ರ'ವಾಗಿ ಪರಿವರ್ತಿಸಿವೆ ಎಂದು ಅವರು ಹೇಳಿದರು.

ಹಾಗೆಯೇ ಸೈಬರ್ ಬೆದರಿಕೆಗಳ ಸಾಧ್ಯತೆಗಳೂ ಹೆಚ್ಚಿವೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ರಾನ್ಸಮ್ ವೇರ್, ಫಿಶಿಂಗ್, ಆನ್‌ಲೈನ್ ಹಗರಣಗಳು, ಮಕ್ಕಳ ಮೇಲಿನ ಆನ್‌ಲೈನ್ ಲೈಂಗಿಕ ದೌರ್ಜನ್ಯ ಮತ್ತು ಹ್ಯಾಕಿಂಗ್‌ನಂತಹ ಕೆಲವು ಸೈಬರ್‌ ಅಪರಾಧಗಳು ಜಗತ್ತಿನಾದ್ಯಂತ ಗಂಭೀರ ಬೆದರಿಕೆಗಳನ್ನು ಒಡ್ಡುತ್ತಿವೆ ಮತ್ತು ಭವಿಷ್ಯದಲ್ಲಿ ಸೈಬರ್ ಅಪರಾಧಗಳು ಹಲವು ಪಟ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಅವರು 2022 ರ ಇಂಟರ್‌ಪೋಲ್‌ನ 'ಗ್ಲೋಬಲ್ ಟ್ರೆಂಡ್ ಸಾರಾಂಶ ವರದಿ'ಯನ್ನು ಉಲ್ಲೇಖಿಸಿದರು. ಈ ಹಿನ್ನೆಲೆಯಲ್ಲಿ, ಈ ಶೃಂಗಸಭೆಯು ಜಿ-20 ಅಧ್ಯಕ್ಷತೆಯ ಹೊಸ ಮತ್ತು ವಿಶಿಷ್ಟ ಉಪಕ್ರಮವಾಗಿದೆ ಮತ್ತು ಇದು ಜಿ-20 ರಲ್ಲಿ ಸೈಬರ್ ಭದ್ರತೆಯ ಮೊದಲ ಸಮ್ಮೇಳನವಾಗಿದೆ ಎಂದು ಶ್ರೀ ಶಾ ಹೇಳಿದರು. ಜಿ-20 ಇಲ್ಲಿಯವರೆಗೆ ಆರ್ಥಿಕ ದೃಷ್ಟಿಕೋನದಿಂದ ಡಿಜಿಟಲ್ ರೂಪಾಂತರ ಮತ್ತು ಡೇಟಾ ಹರಿವಿನ ಮೇಲೆ ಮಾತ್ರ ಕೇಂದ್ರೀಕರಿಸಿತ್ತು, ಆದರೆ ಈಗ ಅಪರಾಧ ಮತ್ತು ಭದ್ರತೆಯ ಅಂಶಗಳನ್ನು ಅರ್ಥಮಾಡಿಕೊಳ್ಳುವುದು ಮತ್ತು ಪರಿಹಾರವನ್ನು ಕಂಡುಹಿಡಿಯುವುದು ಬಹಳ ಮುಖ್ಯ ಎಂದು ಅವರು ಹೇಳಿದರು. ಹೊಸ ಮತ್ತು ಉದಯೋನ್ಮುಖ ಬೆದರಿಕೆಗಳಿಗೆ ಸಮನ್ವಯ ಮತ್ತು ಸಹಕಾರ ವಿಧಾನದಲ್ಲಿ ಸಮಯೋಚಿತವಾಗಿ ಪ್ರತಿಕ್ರಿಯಿಸುವ ಮೂಲಕ ಎನ್‌ ಎಫ್‌ ಟಿ ಗಳು, ಕೃತಕ ಬುದ್ಧಿಮತ್ತೆ, ಮೆಟಾವರ್ಸ್ ಮತ್ತಿತರ ಹೊಸ ತಂತ್ರಜ್ಞಾನಗಳ ಯುಗದಲ್ಲಿ ಮುಂದುವರಿಯುವುದು ನಮ್ಮ ಪ್ರಯತ್ನವಾಗಿದೆ ಎಂದು ಅವರು ಹೇಳಿದರು.

ಜಿ-20 ವೇದಿಕೆಯಲ್ಲಿ ಸೈಬರ್ ಭದ್ರತೆಗೆ ಹೆಚ್ಚಿನ ಗಮನ ನೀಡುವುದರಿಂದ ನಿರ್ಣಾಯಕ 'ಮಾಹಿತಿ ಮೂಲಸೌಕರ್ಯ' ಮತ್ತು 'ಡಿಜಿಟಲ್ ಸಾರ್ವಜನಿಕ ವೇದಿಕೆಗಳ' ಭದ್ರತೆ ಮತ್ತು ಸಮಗ್ರತೆಯನ್ನು ಖಚಿತಪಡಿಸಿಕೊಳ್ಳಲು ಸಕಾರಾತ್ಮಕ ಕೊಡುಗೆ ನೀಡಬಹುದು ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಜಿ-20 ವೇದಿಕೆಯಲ್ಲಿ ಸೈಬರ್ ಭದ್ರತೆ ಮತ್ತು ಸೈಬರ್ ಅಪರಾಧದ ಕುರಿತ ಚರ್ಚೆಯು 'ಗುಪ್ತಚರ ಮತ್ತು ಮಾಹಿತಿ ಹಂಚಿಕೆ ಜಾಲ' ಅಭಿವೃದ್ಧಿಗೆ ಸಹಾಯ ಮಾಡುತ್ತದೆ ಮತ್ತು ಈ ಕ್ಷೇತ್ರದಲ್ಲಿ 'ಜಾಗತಿಕ ಸಹಕಾರ'ಕ್ಕೆ ಉತ್ತೇಜನ ನೀಡುತ್ತದೆ ಎಂದು ಅವರು ಹೇಳಿದರು. 'ಡಿಜಿಟಲ್ ಸಾರ್ವಜನಿಕ ಸರಕುಗಳು' ಮತ್ತು 'ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ' ಮತ್ತು ತಂತ್ರಜ್ಞಾನದ ಶಕ್ತಿಯನ್ನು ಅತ್ಯುತ್ತಮವಾಗಿ ಬಳಸಿಕೊಳ್ಳುವುದು ಮತ್ತು ಸಬಲೀಕರಣಕ್ಕಾಗಿ ಸುರಕ್ಷಿತ ಮತ್ತು ದಕ್ಷ ಅಂತಾರಾಷ್ಟ್ರೀಯ ಚೌಕಟ್ಟನ್ನು ಉತ್ತೇಜಿಸುವುದು ಈ ಸಮ್ಮೇಳನದ ಉದ್ದೇಶವಾಗಿದೆ ಎಂದು ಶ್ರೀ ಶಾ ಹೇಳಿದರು.

ಎರಡು ದಿನಗಳ ಸಮ್ಮೇಳನದ ಆರು ಅಧಿವೇಶನಗಳಲ್ಲಿ, ಈ ಕೆಳಕಂಡ ವಿಷಯಗಳಲ್ಲಿ ಅಂತಾರಾಷ್ಟ್ರೀಯ ಸಹಕಾರ ಚೌಕಟ್ಟಿನ ಬಗ್ಗೆ ಅರ್ಥಪೂರ್ಣ ಚರ್ಚೆ ನಡೆಯಲಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು.

• ಇಂಟರ್ನೆಟ್ ಆಡಳಿತ
• ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯದ ಭದ್ರತೆ
• ಡಿಜಿಟಲ್ ಮಾಲೀಕತ್ವಕ್ಕೆ ಸಂಬಂಧಿಸಿದ ಕಾನೂನು ಮತ್ತು ನಿಯಂತ್ರಕ ಸಮಸ್ಯೆಗಳು
• ಡಾರ್ಕ್ ನೆಟ್‌ಗಾಗಿ ಕೃತಕ ಬುದ್ಧಿಮತ್ತೆ ಮತ್ತು ಅಂತಾರಾಷ್ಟ್ರೀಯ ಸಹಕಾರ ಚೌಕಟ್ಟಿನ ಜವಾಬ್ದಾರಿಯುತ ಬಳಕೆ

ಅಂತಾರಾಷ್ಟ್ರೀಯ ಸಮುದಾಯವು ಈ ಸಮ್ಮೇಳನವನ್ನು ಹೃತ್ಪೂರ್ವಕವಾಗಿ ಬೆಂಬಲಿಸಿದೆ ಎಂದು ಶ್ರೀ ಶಾ ಸಂತಸ ವ್ಯಕ್ತಪಡಿಸಿದರು. ಈ ಸಮ್ಮೇಳನದಲ್ಲಿ ಜಿ-20 ಸದಸ್ಯರಲ್ಲದೆ 9 ಅತಿಥಿ ರಾಷ್ಟ್ರಗಳು ಮತ್ತು 2 ಪ್ರಮುಖ ಅಂತಾರಾಷ್ಟ್ರೀಯ ಸಂಸ್ಥೆಗಳಾದ ಇಂಟರ್‌ ಪೋಲ್ ಮತ್ತು ಯು ಎನ್‌ ಒ ಡಿ ಸಿ ಹಾಗೂ ವಿವಿಧ ಅಂತಾರಾಷ್ಟ್ರೀಯ ಭಾಷಣಕಾರರು ಭಾಗವಹಿಸುತ್ತಿದ್ದಾರೆ ಎಂದರು.

ಈ ಡಿಜಿಟಲ್ ಯುಗದ ಹಿನ್ನೆಲೆಯಲ್ಲಿ ಸೈಬರ್ ಭದ್ರತೆಯು ಜಾಗತಿಕ ಭದ್ರತೆಯ ಅತ್ಯಗತ್ಯ ಅಂಶವಾಗಿದೆ, ಅದರ ಆರ್ಥಿಕ ಮತ್ತು ಭೌಗೋಳಿಕ-ರಾಜಕೀಯ ಪರಿಣಾಮಗಳ ಬಗ್ಗೆ ಸಾಕಷ್ಟು ಗಮನ ಹರಿಸುವ ಅಗತ್ಯವಿದೆ ಎಂದು ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಹೇಳಿದರು. ಭಯೋತ್ಪಾದನೆ, ಭಯೋತ್ಪಾದನೆಗೆ ಹಣಕಾಸು, ಮೂಲಭೂತವಾದ, ಮಾದಕವಸ್ತು, ಮಾದಕವಸ್ತು-ಭಯೋತ್ಪಾದನೆ ಸಂಬಂಧಗಳು ಮತ್ತು ತಪ್ಪು ಮಾಹಿತಿಗಳಂತಹ ಹೊಸ ಮತ್ತು ಉದಯೋನ್ಮುಖ, ಸಾಂಪ್ರದಾಯಿಕ ಮತ್ತು ಅಸಾಂಪ್ರದಾಯಿಕ ಸವಾಲುಗಳನ್ನು ಎದುರಿಸಲು ರಾಷ್ಟ್ರಗಳು ಮತ್ತು ಅಂತಾರಾಷ್ಟ್ರೀಯ ಸಂಸ್ಥೆಗಳ ಸಾಮರ್ಥ್ಯವನ್ನು ಬಲಪಡಿಸುವುದು ಅತ್ಯಗತ್ಯ ಎಂದು ಅವರು ಹೇಳಿದರು. ನಮ್ಮ ಭದ್ರತಾ ಸವಾಲುಗಳನ್ನು 'ಡೈನಮೈಟ್‌ನಿಂದ ಮೆಟಾವರ್ಸ್‌ಗೆ ಪರಿವರ್ತಿಸುವುದು ಮತ್ತು 'ಹವಾಲಾವನ್ನು ಕ್ರಿಪ್ಟೋ ಕರೆನ್ಸಿ'ಗೆ ಪರಿವರ್ತಿಸುವುದು ಪ್ರಪಂಚದ ದೇಶಗಳಿಗೆ ಕಾಳಜಿಯ ವಿಷಯವಾಗಿದೆ ಮತ್ತು ನಾವೆಲ್ಲರೂ ಒಟ್ಟಾಗಿ ಅದರ ವಿರುದ್ಧ ಒಂದು ಸಾಮಾನ್ಯ ಕಾರ್ಯತಂತ್ರವನ್ನು ರೂಪಿಸಬೇಕಾಗಿದೆ ಎಂದು ಶ್ರೀ ಶಾ ಹೇಳಿದರು. ಭಯೋತ್ಪಾದಕರು ಹಿಂಸಾಚಾರವನ್ನು ನಡೆಸಲು, ಯುವಕರನ್ನು ಉಗ್ರವಾದಿಗಳನ್ನಾಗಿ ಮಾಡಲು ಮತ್ತು ಆರ್ಥಿಕ ಸಂಪನ್ಮೂಲಗಳನ್ನು ಹೆಚ್ಚಿಸಿಕೊಳ್ಳಲು ಹೊಸ ಮಾರ್ಗಗಳನ್ನು ಕಂಡುಕೊಳ್ಳುತ್ತಿದ್ದಾರೆ ಮತ್ತು ಭಯೋತ್ಪಾದಕರು ಹಣಕಾಸಿನ ವಹಿವಾಟುಗಳಿಗೆ ವರ್ಚುವಲ್‌ ಆಸ್ತಿಗಳ ರೂಪದಲ್ಲಿ ಹೊಸ ವಿಧಾನಗಳನ್ನು ಬಳಸುತ್ತಿದ್ದಾರೆ ಎಂದು ಶ್ರೀ ಶಾ ಹೇಳಿದರು. ಉಗ್ರರು ತಮ್ಮ ಗುರುತನ್ನು ಮರೆಮಾಚಲು ಮತ್ತು ಉಗ್ರವಾದವನ್ನು ಹರಡಲು ಡಾರ್ಕ್ ನೆಟ್ ಬಳಸುತ್ತಿದ್ದಾರೆ ಎಂದು ಅವರು ಹೇಳಿದರು. ಡಾರ್ಕ್-ನೆಟ್‌ನಲ್ಲಿ ನಡೆಯುವ ಈ ಚಟುವಟಿಕೆಗಳ ಮಾದರಿಯನ್ನು ನಾವು ಅರ್ಥಮಾಡಿಕೊಳ್ಳಬೇಕು ಮತ್ತು ಅದಕ್ಕೆ ಪರಿಹಾರಗಳನ್ನು ಕಂಡುಕೊಳ್ಳಬೇಕು ಎಂದು ಶ್ರೀ ಶಾ ಹೇಳಿದರು. "ದೃಢವಾದ ಮತ್ತು ದಕ್ಷ ಕಾರ್ಯಾಚರಣೆಯ ವ್ಯವಸ್ಥೆಯನ್ನು ರಚಿಸಲು, ವಿವಿಧ ವರ್ಚುವಲ್ ಸ್ವತ್ತುಗಳ ಬಳಕೆಯನ್ನು ಭೇದಿಸಲು ನಾವು ಸಮಂಜಸವಾಗಿ ಯೋಚಿಸಬೇಕಾಗಿದೆ ಎಂದು ಅವರು ಹೇಳಿದರು.

ಒಂದು ಕಾಲದಲ್ಲಿ ವೈಜ್ಞಾನಿಕ ಕಾಲ್ಪನಿಕ ಕಲ್ಪನೆಯಾಗಿದ್ದ ಮೆಟಾವರ್ಸ್ ಈಗ ನೈಜ ಜಗತ್ತಿಗೆ ಕಾಲಿಟ್ಟಿದೆ ಮತ್ತು ಇದು ಭಯೋತ್ಪಾದಕ ಸಂಘಟನೆಗಳಿಗೆ ಪ್ರಾಥಮಿಕವಾಗಿ ಪ್ರಚಾರ, ನೇಮಕಾತಿ ಮತ್ತು ತರಬೇತಿಗಾಗಿ ಹೊಸ ಅವಕಾಶಗಳನ್ನು ಸೃಷ್ಟಿಸಬಹುದು ಎಂದು ಶ್ರೀ ಅಮಿತ್ ಶಾ ಹೇಳಿದರು. ಇದು ಭಯೋತ್ಪಾದಕ ಸಂಘಟನೆಗಳಿಗೆ ದುರ್ಬಲ ಜನರನ್ನು ಆಯ್ಕೆ ಮಾಡಲು ಮತ್ತು ಗುರಿಯಾಗಿಸಲು ಮತ್ತು ಅವರ ದುರ್ಬಲತೆಗೆ ಅನುಗುಣವಾಗಿ ವಿಷಯಗಳನ್ನು ಸಿದ್ಧಪಡಿಸಲು ಸುಲಭವಾಗುತ್ತದೆ ಎಂದು ಅವರು ಹೇಳಿದರು. "ಡೀಪ್-ಫೇಕ್" ಎಂದು ಕರೆಯಲ್ಪಡುವ ಬಳಕೆದಾರರ ಗುರುತಿನ ನಿಜವಾದ ಅನುಕರಣೆಗಾಗಿ ಮೆಟಾವರ್ಸ್ ಅವಕಾಶಗಳನ್ನು ಸೃಷ್ಟಿಸುತ್ತದೆ ಮತ್ತು ವ್ಯಕ್ತಿಗಳ ಬಗ್ಗೆ ಉತ್ತಮ ಬಯೋಮೆಟ್ರಿಕ್ ಮಾಹಿತಿಯನ್ನು ಬಳಸುವುದರಿಂದ, ಅಪರಾಧಿಗಳು ಬಳಕೆದಾರರ ಸೋಗು ಹಾಕಲು ಮತ್ತು ಅವರ ಗುರುತನ್ನು ಕದಿಯಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು. ಸುಲಿಗೆಯ ದಾಳಿಗಳು, ನಿರ್ಣಾಯಕ ವೈಯಕ್ತಿಕ ಡೇಟಾದ ಮಾರಾಟ, ಆನ್‌ಲೈನ್ ಕಿರುಕುಳ ಮತ್ತು ಮಕ್ಕಳ ಮೇಲಿನ ದೌರ್ಜನ್ಯದಿಂದ ಹಿಡಿದು ನಕಲಿ ಸುದ್ದಿ ಮತ್ತು 'ಟೂಲ್‌ಕಿಟ್‌ಗಳ' ಸುಳ್ಳು ಮಾಹಿತಿ ಪ್ರಚಾರದವರೆಗಿನ ಘಟನೆಗಳನ್ನು ಸೈಬರ್ ಅಪರಾಧಿಗಳು ನಡೆಸುತ್ತಿದ್ದಾರೆ ಎಂದು ಶ್ರೀ ಶಾ ಹೇಳಿದರು. ಅದೇ ಸಮಯದಲ್ಲಿ, ನಿರ್ಣಾಯಕ ಮಾಹಿತಿ ಮತ್ತು ಹಣಕಾಸು ವ್ಯವಸ್ಥೆಗಳನ್ನು ಕಾರ್ಯತಂತ್ರವಾಗಿ ಗುರಿಪಡಿಸುವ ಪ್ರವೃತ್ತಿಯೂ ಬೆಳೆಯುತ್ತಿದೆ ಎಂದು ಅವರು ಹೇಳಿದರು. ಅಂತಹ ಚಟುವಟಿಕೆಗಳು ರಾಷ್ಟ್ರೀಯ ಕಾಳಜಿಯ ವಿಷಯವಾಗಿವೆ, ಏಕೆಂದರೆ ಅವರ ಚಟುವಟಿಕೆಗಳು ರಾಷ್ಟ್ರೀಯ ಭದ್ರತೆ, ಕಾನೂನು ಮತ್ತು ಸುವ್ಯವಸ್ಥೆ ಮತ್ತು ಆರ್ಥಿಕತೆಯ ಮೇಲೆ ನೇರ ಪರಿಣಾಮ ಬೀರುತ್ತವೆ. ಅಂತಹ ಅಪರಾಧಗಳು ಮತ್ತು ಅಪರಾಧಿಗಳನ್ನು ತಡೆಯಬೇಕಾದರೆ, ಸಾಂಪ್ರದಾಯಿಕ ಭೌಗೋಳಿಕ ಗಡಿಗಳನ್ನು ಮೀರಿ ನಾವು ಯೋಚಿಸಬೇಕು ಮತ್ತು ಕಾರ್ಯನಿರ್ವಹಿಸಬೇಕು ಎಂದು ಅವರು ಒತ್ತಿ ಹೇಳಿದರು. ಡಿಜಿಟಲ್ ಯುದ್ಧದ ಗುರಿಗಳು ನಮ್ಮ ಭೌತಿಕ ಸಂಪನ್ಮೂಲಗಳಾಗಿರುವುದಿಲ್ಲ, ಬದಲಿಗೆ ಆನ್‌ ಲೈನ್‌ನಲ್ಲಿ ಕಾರ್ಯನಿರ್ವಹಿಸುವ ನಮ್ಮ ಸಾಮರ್ಥ್ಯ ಮತ್ತು ಆನ್‌ ಲೈನ್ ನೆಟ್‌ವರ್ಕ್ ಅನ್ನು ಕೆಲವು ನಿಮಿಷಗಳವರೆಗೆ ಅಡ್ಡಿಪಡಿಸುವುದು ಮಾರಕವಾಗಬಹುದು ಎಂದು ಶ್ರೀ ಶಾ ತಿಳಿಸಿದರು.

ಇಂದು ವಿಶ್ವದ ಎಲ್ಲಾ ಸರ್ಕಾರಗಳು ಆಡಳಿತ ಮತ್ತು ಸಾರ್ವಜನಿಕ ಕಲ್ಯಾಣದಲ್ಲಿ ಡಿಜಿಟಲ್ ವಿಧಾನಗಳನ್ನು ಉತ್ತೇಜಿಸುತ್ತಿವೆ ಮತ್ತು ಈ ದಿಶೆಯಲ್ಲಿ ನಾಗರಿಕರು ಡಿಜಿಟಲ್ ವೇದಿಕೆಗಳಲ್ಲಿ ನಂಬಿಕೆ ಇಡುವುದು ಅವಶ್ಯಕವಾಗಿದೆ ಎಂದು ಕೇಂದ್ರ ಗೃಹ ಸಚಿವರು ಹೇಳಿದರು. ಡಿಜಿಟಲ್ ಕ್ಷೇತ್ರದಲ್ಲಿನ ಅಭದ್ರತೆ ರಾಷ್ಟ್ರ-ರಾಜ್ಯದ ನ್ಯಾಯಸಮ್ಮತತೆ ಮತ್ತು ಸಾರ್ವಭೌಮತ್ವದ ಬಗ್ಗೆಯೂ ಪ್ರಶ್ನೆಗಳನ್ನು ಹುಟ್ಟುಹಾಕುತ್ತದೆ ಎಂದು ಅವರು ಹೇಳಿದರು. ನಮ್ಮ ಅಂತರ್ಜಾಲ ದೃಷ್ಟಿಯು ನಮ್ಮ ರಾಷ್ಟ್ರಗಳ ಅಸ್ತಿತ್ವಕ್ಕೆ ಧಕ್ಕೆ ತರುವ ಮಿತಿಮೀರಿದ ಸ್ವಾತಂತ್ರ್ಯವಾಗಿರಬಾರದು ಅಥವಾ ಡಿಜಿಟಲ್ ಫೈರ್‌ವಾಲ್‌ಗಳಂತಹ ಪ್ರತ್ಯೇಕತಾವಾದಿ ರಚನೆಗಳಾಗಬಾರದು ಎಂದು ಶ್ರೀ ಶಾ ಹೇಳಿದರು. ಭಾರತವು ಕೆಲವು 'ಮುಕ್ತ-ಪ್ರವೇಶ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ' ಮಾದರಿಗಳನ್ನು ಸ್ಥಾಪಿಸಿದೆ, ಅದು ಇಂದು ಜಗತ್ತಿಗೆ ಮಾದರಿಯಾಗಿದೆ ಎಂದು ಅವರು ಹೇಳಿದರು. ಭಾರತವು ಡಿಜಿಟಲ್ ಗುರುತಿಗಾಗಿ ಆಧಾರ್ ಮಾದರಿಯನ್ನು ಅಭಿವೃದ್ಧಿಪಡಿಸಿದೆ, ನೈಜ-ಸಮಯದ ವೇಗದ ಪಾವತಿಯ ಯುಪಿಐ ಮಾದರಿ, ಡಿಜಿಟಲ್ ವಾಣಿಜ್ಯಕ್ಕಾಗಿ ಮುಕ್ತ ನೆಟ್‌ವರ್ಕ್ (ಒ ಎನ್‌ ಡಿ ಸಿ) ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ಮುಕ್ತ ಆರೋಗ್ಯ ಸೇವಾ ಜಾಲ ಅಂತಹುಗಳಲ್ಲಿ ಸೇರಿವೆ ಎಂದು ಅವರು ಹೇಳಿದರು. ಮಾಹಿತಿ ಮತ್ತು ಹಣಕಾಸಿನ ಹರಿವನ್ನು ಸುಲಭಗೊಳಿಸಲು ಜಗತ್ತಿಗೆ ಇಂದು ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ ಮಾದರಿಯ ಅಗತ್ಯವಿದೆ ಎಂದು ಶ್ರೀ ಶಾ ಹೇಳಿದರು ಮತ್ತು ಇದು ಪ್ರಪಂಚದ ದೇಶಗಳು ತಮ್ಮ ನಾಗರಿಕರನ್ನು ಡಿಜಿಟಲ್ ಆಗಿ ಸಶಕ್ತಗೊಳಿಸಲು ಅನುಕೂಲವಾಗುತ್ತದೆ ಎಂದು ಅವರು ಹೇಳಿದರು.

ವಿಶ್ವದ ಹಲವು ದೇಶಗಳು ಸೈಬರ್ ದಾಳಿಗೆ ಬಲಿಯಾಗಿವೆ ಮತ್ತು ಈ ಬೆದರಿಕೆ ವಿಶ್ವದ ಎಲ್ಲಾ ಪ್ರಮುಖ ಆರ್ಥಿಕತೆಗಳ ಮೇಲೆ ಸುಳಿದಾಡುತ್ತಿದೆ ಎಂದು ಶ್ರೀ ಅಮಿತ್ ಶಾ ಹೇಳಿದರು. ವಿಶ್ವಬ್ಯಾಂಕ್ ಅಂದಾಜಿನ ಪ್ರಕಾರ, ಸೈಬರ್ ದಾಳಿಗಳು 2019-2023ರ ಅವಧಿಯಲ್ಲಿ ಜಗತ್ತಿಗೆ ಸುಮಾರು 5.2 ಟ್ರಿಲಿಯನ್ ಡಾಲರ್‌ ನಷ್ಟವನ್ನು ಉಂಟುಮಾಡಬಹುದು ಎಂದು ಅವರು ಹೇಳಿದ್ದಾರೆ. ದುರುದ್ದೇಶಪೂರಿತ ಬೆದರಿಕೆಗಳ ಕ್ರಿಪ್ಟೋ ಕರೆನ್ಸಿಯ ಬಳಕೆಯು ಅದರ ಪತ್ತೆ ಮತ್ತು ತಡೆಗಟ್ಟುವಿಕೆಯನ್ನು ಇನ್ನಷ್ಟು ಸಂಕೀರ್ಣಗೊಳಿಸುತ್ತದೆ. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ಭಾರತ ಸರ್ಕಾರವು ಏಕರೂಪದ ಸೈಬರ್ ಕಾರ್ಯತಂತ್ರ, ಸೈಬರ್ ಅಪರಾಧಗಳ ನೈಜ-ಸಮಯದ ವರದಿ, ಕಾನೂನು ಜಾರಿ ಸಂಸ್ಥೆಗಳ ಸಾಮರ್ಥ್ಯ ವರ್ಧನೆ, ವಿಶ್ಲೇಷಣಾತ್ಮಕ ಸಾಧನಗಳನ್ನು ವಿನ್ಯಾಸಗೊಳಿಸಲು ಮತ್ತು ಸ್ಥಾಪಿಸಲು, ವಿಧಿವಿಜ್ಞಾನ ಪ್ರಯೋಗಾಲಯಗಳ ರಾಷ್ಟ್ರೀಯ ಜಾಲ, ಸೈಬರ್ ನೈರ್ಮಲ್ಯವನ್ನು ಖಾತ್ರಿಪಡಿಸುವುದು ಮತ್ತು ಪ್ರತಿ ನಾಗರಿಕರಿಗೆ ಸೈಬರ್ ಜಾಗೃತಿಯನ್ನು ಹರಡುವುದು ಮುಂತಾದ ಕೆಲಸ ಮಾಡಿದೆ ಎಂದು ಶ್ರೀ ಶಾ ಹೇಳಿದರು. ದೇಶದ ಎಲ್ಲಾ ಪೊಲೀಸ್ ಠಾಣೆಗಳಲ್ಲಿ ಅಪರಾಧ ಮತ್ತು ಅಪರಾಧ ಪತ್ತೆ ಜಾಲ ಮತ್ತು ವ್ಯವಸ್ಥೆ (CCTNS) ಅಳವಡಿಸಲಾಗಿದೆ ಎಂದು ಶ್ರೀ ಶಾ ಹೇಳಿದರು. ಸೈಬರ್ ಅಪರಾಧದ ವಿರುದ್ಧ ಸಮಗ್ರ ಪ್ರತಿಕ್ರಿಯೆಯನ್ನು ಖಚಿತಪಡಿಸಿಕೊಳ್ಳಲು ಭಾರತ ಸರ್ಕಾರವು ಭಾರತೀಯ ಸೈಬರ್-ಕ್ರೈಮ್ ಕೋಆರ್ಡಿನೇಷನ್ ಸೆಂಟರ್ (I-4C) ಅನ್ನು ಸ್ಥಾಪಿಸಿದೆ ಎಂದು ಅವರು ಹೇಳಿದರು. ಭಾರತ ಸರ್ಕಾರವು 'CyTrain' ಪೋರ್ಟಲ್ ಎಂಬ ಬೃಹತ್ ಮುಕ್ತ ಆನ್‌ಲೈನ್ ಕೋರ್ಸ್‌ಗಳ ವೇದಿಕೆಯನ್ನು ಸಹ ರಚಿಸಿದೆ, ಇದು ಬಹುಶಃ ಸೈಬರ್ ಭದ್ರತೆಯ ಕ್ಷೇತ್ರದಲ್ಲಿ ವಿಶ್ವದ ಅತಿದೊಡ್ಡ ತರಬೇತಿ ಕಾರ್ಯಕ್ರಮವಾಗಿದೆ ಎಂದು ಅವರು ಹೇಳಿದರು.

ಸುರಕ್ಷಿತ ಮತ್ತು ಅಭೇದ್ಯವಾದ ಸೈಬರ್‌ಸ್ಪೇಸ್ ಅನ್ನು ಖಚಿತಪಡಿಸಿಕೊಳ್ಳುವ ಕೆಲವು ಅಂಶಗಳತ್ತ ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರು ಭಾಗವಹಿಸುವವರ ಗಮನವನ್ನು ಸೆಳೆದರು. ಡಿಜಿಟಲ್ ಅಪರಾಧಗಳನ್ನು ಎದುರಿಸಲು ಮಾಡಿದ ಎಲ್ಲಾ ದೇಶಗಳ ಕಾನೂನುಗಳಲ್ಲಿ ಏಕರೂಪತೆಯನ್ನು ತರಲು ಪ್ರಯತ್ನಿಸಬೇಕು ಎಂದು ಅವರು ಹೇಳಿದರು. ಸೈಬರ್ ಅಪರಾಧಗಳ ಗಡಿರಹಿತ ಸ್ವಭಾವವನ್ನು ಗಮನದಲ್ಲಿಟ್ಟುಕೊಂಡು, ನಾವು ದೇಶಗಳ ವಿವಿಧ ಕಾನೂನುಗಳ ಅಡಿಯಲ್ಲಿ ಪ್ರತಿಕ್ರಿಯೆ ಕಾರ್ಯವಿಧಾನವನ್ನು ಸ್ಥಾಪಿಸಬೇಕು. ಈ ಪ್ರದೇಶದಲ್ಲಿ ಜಾಗತಿಕ ಸಹಕಾರವು ಸೈಬರ್ ಭದ್ರತಾ ಮಾನದಂಡಗಳು, ಉತ್ತಮ ಅಭ್ಯಾಸಗಳು ಮತ್ತು ನಿಬಂಧನೆಗಳನ್ನು ಸಮನ್ವಯಗೊಳಿಸಲು ಸಹಾಯ ಮಾಡುತ್ತದೆ. ಈ ದಿಸೆಯಲ್ಲಿ ಈ ಸಮಾವೇಶವು ಒಂದು ದೃಢವಾದ ಕ್ರಿಯಾ ಯೋಜನೆಯನ್ನು ಒದಗಿಸುತ್ತದೆ ಎಂದು ಶ್ರೀ ಶಾ ಭರವಸೆ ವ್ಯಕ್ತಪಡಿಸಿದರು. ಸೈಬರ್ ಭದ್ರತಾ ನೀತಿಗಳಿಗೆ ಸಂಯೋಜಿತ ಮತ್ತು ಸ್ಥಿರವಾದ ವಿಧಾನವು ಪರಸ್ಪರ ಕಾರ್ಯಸಾಧ್ಯತೆಯನ್ನು ಸುಗಮಗೊಳಿಸುತ್ತದೆ, ಮಾಹಿತಿ ಹಂಚಿಕೆಯಲ್ಲಿ ನಂಬಿಕೆಯನ್ನು ಹೆಚ್ಚಿಸುತ್ತದೆ ಮತ್ತು ಏಜೆನ್ಸಿ ಪ್ರೋಟೋಕಾಲ್‌ಗಳು ಮತ್ತು ಸಂಪನ್ಮೂಲಗಳ ಅಂತರವನ್ನು ಕಡಿಮೆ ಮಾಡುತ್ತದೆ ಎಂದು ಅವರು ಹೇಳಿದರು. ರಾಷ್ಟ್ರದ ನಿರ್ಣಾಯಕ ಮೂಲಸೌಕರ್ಯವನ್ನು ಸುರಕ್ಷಿತವಾಗಿರಿಸಲು ಉದ್ಯಮ ಮತ್ತು ಶೈಕ್ಷಣಿಕ ವಲಯಗಳಿಂದ ಸಕ್ರಿಯ ಬೆಂಬಲದೊಂದಿಗೆ ಸದಸ್ಯ ರಾಷ್ಟ್ರಗಳ ನಡುವೆ 'ನೈಜ-ಸಮಯದ ಸೈಬರ್ ಬೆದರಿಕೆ ಗುಪ್ತಚರ'ವನ್ನು ಹಂಚಿಕೊಳ್ಳುವುದು ಇಂದಿನ ಅಗತ್ಯವಾಗಿದೆ ಎಂದು ಅವರು ಹೇಳಿದರು. ಸೈಬರ್ ಘಟನೆಗಳ ವರದಿ ಮತ್ತು ಕ್ರಮದಲ್ಲಿ ಎಲ್ಲಾ ದೇಶಗಳ ಸೈಬರ್ ಏಜೆನ್ಸಿಗಳ ನಡುವೆ ಹೆಚ್ಚಿನ ಸಮನ್ವಯತೆ ಇರಬೇಕು. 'ಶಾಂತಿಯುತ, ಸುರಕ್ಷಿತ ಮತ್ತು ಮುಕ್ತ' ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನ ಪರಿಸರವನ್ನು ನಿರ್ಮಿಸುವ ಜಂಟಿ ಪ್ರಯತ್ನಗಳ ಮೂಲಕ ಗಡಿಯಾಚೆಗಿನ ಸೈಬರ್ ಅಪರಾಧಗಳ ತನಿಖೆಯಲ್ಲಿ ಸಹಕಾರ ಇಂದು ಅತ್ಯಂತ ಅವಶ್ಯಕವಾಗಿದೆ. ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನದ ಕ್ರಿಮಿನಲ್ ಬಳಕೆಯ ವಿಶ್ವಸಂಸ್ಥೆಯ ಒಪ್ಪಂದಕ್ಕೆ ಅನುಗುಣವಾಗಿ, ತ್ವರಿತ ಸಂರಕ್ಷಣೆ, ತನಿಖೆ ಮತ್ತು ಸಾಕ್ಷ್ಯಗಳ ಸಮನ್ವಯವು ಅತ್ಯಗತ್ಯವಾಗಿದೆ. ಉದಯೋನ್ಮುಖ ತಂತ್ರಜ್ಞಾನಗಳಿಂದಾಗಿ ಹೊಸ ಬೆದರಿಕೆಗಳನ್ನು ಎದುರಿಸಲು ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡಗಳನ್ನು (CERT) ಬಲಪಡಿಸಬೇಕು. ಪರಿಣಾಮಕಾರಿ 'ಮುನ್ಸೂಚಕ - ತಡೆಗಟ್ಟುವ - ರಕ್ಷಣಾತ್ಮಕ ಮತ್ತು ಚೇತರಿಕೆ' ಕ್ರಿಯೆಗಾಗಿ 24x7 ಸೈಬರ್ ಭದ್ರತಾ ಕಾರ್ಯವಿಧಾನವಿರಬೇಕು. ಸೈಬರ್ ಬೆದರಿಕೆಯ ಸ್ವರೂಪವು ರಾಷ್ಟ್ರೀಯ ಗಡಿಗಳನ್ನು ಮೀರಿ ಹರಡಿದೆ, ಸೈಬರ್ ಅಪರಾಧಗಳನ್ನು ಪರಿಣಾಮಕಾರಿಯಾಗಿ ಎದುರಿಸಲು ರಾಷ್ಟ್ರಗಳು, ಸಂಸ್ಥೆಗಳು ಮತ್ತು ಭಾಗೀದಾರರಿಂದ ಸಹಕಾರ ಮತ್ತು ಮಾಹಿತಿಯನ್ನು ಹಂಚಿಕೊಳ್ಳುವುದು ಅಗತ್ಯವಾಗಿದೆ. ಜವಾಬ್ದಾರಿಯುತ ಬಳಕೆಯನ್ನು ಖಚಿತಪಡಿಸಿಕೊಳ್ಳಲು 'ಪಾರದರ್ಶಕ ಮತ್ತು ಜವಾಬ್ದಾರಿಯುತ ಕೃತಕ ಬುದ್ಧಿಮತ್ತೆ ಮತ್ತು ಉದಯೋನ್ಮುಖ ತಂತ್ರಜ್ಞಾನಗಳ ಆಡಳಿತ ಚೌಕಟ್ಟನ್ನು' ನಿರ್ಮಿಸುವ ಸಮಯ ಬಂದಿದೆ. ಡಿಜಿಟಲ್ ಕರೆನ್ಸಿಯನ್ನು ಒಳಗೊಂಡಿರುವ ಸೈಬರ್ ಅಪರಾಧ ಹೆಚ್ಚಳವನ್ನು ಗಮನಿಸಿದರೆ, ಅಂತಹ ಹಣಕಾಸಿನ ಅಕ್ರಮಗಳನ್ನು ತಡೆಗಟ್ಟಲು ರಾಷ್ಟ್ರಗಳ ನಡುವೆ 'ಪ್ರತ್ಯೇಕವಾದ ಸಾಮಾನ್ಯ ವ್ಯವಸ್ಥೆ' ಯ ಅಗತ್ಯವಿದೆ. ಎನ್‌ ಎಫ್‌ ಟಿ ಪ್ಲಾಟ್‌ಫಾರ್ಮ್‌ಗಳ ಮೂರನೇ ವ್ಯಕ್ತಿಯ ಪರಿಶೀಲನೆಯು ನಂಬಿಕೆಯನ್ನು ಹೆಚ್ಚಿಸುತ್ತದೆ ಮತ್ತು ಅಪರಾಧ ಚಟುವಟಿಕೆಗಳನ್ನು ನಿಗ್ರಹಿಸುತ್ತದೆ ಎಂದು ಅವರು ಹೇಳಿದರು.

ಸೈಬರ್ ಬೆದರಿಕೆಗಳನ್ನು ಏಕಾಂಗಿಯಾಗಿ ಎದುರಿಸಲು ಯಾವುದೇ ಒಂದು ದೇಶ ಅಥವಾ ಸಂಸ್ಥೆಗೆ ಸಾಧ್ಯವಿಲ್ಲ ಎಂದು ಅವರು ಮತ್ತೊಮ್ಮೆ ಒತ್ತಿಹೇಳಿದರು. ಅದಕ್ಕೆ ಒಂದು ಸಂಯುಕ್ತ ರಂಗದ ಅಗತ್ಯವಿದೆ. 'ತಂತ್ರಜ್ಞಾನವನ್ನು ಸೂಕ್ಷ್ಮತೆಯೊಂದಿಗೆ ಬಳಸುವುದು' ಮತ್ತು 'ಸಾರ್ವಜನಿಕ ಸುರಕ್ಷತೆ ಮತ್ತು ಭದ್ರತೆಯನ್ನು ಖಾತ್ರಿಪಡಿಸುವುದು' ಎಂಬ ನಮ್ಮ ಬದ್ಧತೆಯಲ್ಲಿ ದೃಢವಾಗಿರಲು ನಮ್ಮ ಭವಿಷ್ಯವು ನಮಗೆ ಅವಕಾಶವನ್ನು ನೀಡಿದೆ ಮತ್ತು ಈ ಕಾರ್ಯವನ್ನು ಸರ್ಕಾರಗಳು ಮಾತ್ರ ನಿಭಾಯಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದರು. ನಾವು ‘ಯಶಸ್ವಿ ಸೈಬರ್ ಜಗತ್ತು’ ಸೃಷ್ಟಿಸುವ ಗುರಿ ಹೊಂದಿದ್ದೇವೆಯೇ ಹೊರತು ‘ವಿಫಲ ಸೈಬರ್ ಜಗತ್ತು’ ಅಲ್ಲ ಎಂದು ಶ್ರೀ ಶಾ ಹೇಳಿದರು. ಎಲ್ಲರಿಗೂ 'ಸುರಕ್ಷಿತ ಮತ್ತು ಸಮೃದ್ಧ ಡಿಜಿಟಲ್ ಭವಿಷ್ಯ'ವನ್ನು ಖಾತ್ರಿಪಡಿಸಿಕೊಳ್ಳಲು ನಾವು ಒಟ್ಟಾಗಿ ಈ ತಂತ್ರಜ್ಞಾನಗಳ ಸಾಮರ್ಥ್ಯವನ್ನು ಬಳಸಿಕೊಳ್ಳಬಹುದು ಎಂದು ಅವರು ಹೇಳಿದ ಅವರು ತಮ್ಮ ಭಾಷಣವನ್ನು ಮುಕ್ತಾಯಗೊಳಿಸಿದರು.

****