Hapoh ka Nirbhaya Fund, ka skhim jong ka tnat Women &Child Development kaba long ka skhim na ka bynta ka jingsumar bad ka jingkyrshan ban ioh ka hok jong kiba shah leh beijot bad ki khynnah kynthei kiba hapoh khatphra snem ka rta kiba pun khun ka dei kaba la mang ha ka T.74.10 klur. Ka skhim ka thmu ban ai jaka rieh tngen, ka bam bad ki jingdonkam ba man ka sngi, ka leit ka wan kaba shngain ban leit mih sha iingshari bad ki jingai jingiarap ha ki kam kiba iadei bad ka ain sha ki khynnah kynthei kiba hapoh khatphra snem ka rta kiba la shah kyntait da ka longiing longsem namar ka jingpun khun, namar ka jingshah leh beijot lane kano kano ka daw bad ki bym don ki lad ban kyrshan ialade.

Ha u snem 2021, ka National Crime Records Bureau ka la pynpaw ba la don 51,863 tylli ki case hapoh ka POCSO Act. Na kine, 64% (33,348) na ki case ki dei hapoh ki section 3 bad 5 (penetrative sexual assault bad aggravated penetrative sexual assault).

Ka jingpeit kham bniah ia kine ki jingtip ka pyni ba na baroh 33,348 tylli ki case hapoh ki section 3 bad 5 jong ka Act 99% (33.036) na ki case ki dei kiba la jia ia ki khynnah kynthei. Na bun kine ki case, ki khynnah ki la pun khun bad ki don ki jingktah ha ka met ka phad bad ka koit ka khiah, kiba kham jur shuh shuh haba ki shah kyntait ha ka longiing longsem lane ki long ki khun swet.

Ki jingthmu jong ka skhim ki long:

1. Ban ai ka jingkyrshan bad ka jingiarap ia ki khynnah kynthei ha kawei ka jaka bad
2. Ban plie lad ban ioh ki jingshakri kiba kynthup ki lad sha ka pule puthi, ka jingiarap na ki pulit, ki jingsumar (ba kynthup ia ka jingsumar maternity, neo-natal bad infant), ka jingsyllok bad ka jingkyrshan na ka ain bad ka insurance jong ki khynnah bad ki khyllung ba dang pun ha kawei ka jaka ban plie lad ia ka jingioh jong ka hok bad ka jingkhyllie im biang ia ka jingim jong kine ki khynnah.

Ki jingdonkam ki long:

• Ino ino i khynnah kynthei iba hapoh 18 snem ka rta, iba shah ktah ha ka:

• · Penetrative Sexual Assault - Section 3 jong ka POCSO Act,
• · Aggravated Penetrative Sexual Assault - Section 5 jong ka POCSO Act,
• · Section 376, 376A-E jong ka Indian Penal Code, 1860 (IPC)

• Bad iba la pun khun namar kane i hap hapoh kane ka skhim. Kum kine ki khynnah ki dei ban long kiba:

• Long khun swet ne

• Shah kyntait ha ka longiing longsem ne

• Kim kwah ban sah biang bad kiba haiing

Ka long kaba donkam ia i khynnah ban don ka copy jong ka FIR ban ioh ia ki jingmyntoi hapoh kane ka skhim. Hynrei, kan dei ka kamram jong kiba pyntreikam ia ka skhim ban pynthikna ba ai jingtip sha ki pulit bad ai ka FIR.

Ki rukom treikam ba dei ban bud da ki Child Care Institutions (CCIs) Children’s Home

Ki briew kiba pyniaid ia ka Home lane ka jaka sah kin pynbiang ia ka jaka ba shngain ban sah kine ki khynnah kaba la ka jong namar ki jingdonkam jong ki, ki pher na ki jingdonkam jong kiwei kiwei ki khynnah kiba don ha kitei ki jaka. Ki briew kiba shimti ia ka jingsumar jong kine ki khynnah kin buh ia ki briew ban peit kyrpang ia ka case. Yn pynbiang pisa ia ka jaka sah na ka bynta ka jingsumar bad ka jingiada ia kine ki khynnah.

Hapoh ki kyndon ka Mission Vatsalya yn don ki CCI ba kyrpang na ka bynta ki khynnah kiba shem lanot kiba hap hapoh ka POCSO na ka bynta ka jingkhyllie im biang ia ka jingim bad ka jingkyrshan ia kine ki khynnah.

******