പ്രധാനമന്ത്രിയുടെ ഓഫീസ്‌
വാരാണസിയില്‍ വിവിധ പദ്ധതികളുടെ തറക്കല്ലിടല്‍/ഉദ്ഘാടന വേളയില്‍ പ്രധാനമന്ത്രിയുടെ പ്രസംഗം
Posted On:
07 JUL 2023 9:26PM by PIB Thiruvananthpuram
ഭാരത് മാതാ കീ ജയ്, ഭാരത് മാതാ കീ ജയ്, ഭാരത് മാതാ കീ ജയ്, ഹര്‍ ഹര്‍ മഹാദേവ്! മാതാ അന്നപൂര്‍ണ കീ ജയ്! ഗംഗാ മയ്യാ കി ജയ്!
ഉത്തര്‍പ്രദേശ് ഗവര്‍ണര്‍ ആനന്ദിബെന്‍ പട്ടേല്‍, മുഖ്യമന്ത്രി ശ്രീ യോഗി ആദിത്യനാഥ് ജി, കേന്ദ്രമന്ത്രിസഭയിലെ എന്റെ സഹപ്രവര്‍ത്തകര്‍, യുപി ഗവണ്‍മെന്റിലെ മുഴുവന്‍ മന്ത്രിമാര്‍, എംപിമാര്‍, എംഎല്‍എമാര്‍, വിവിധ പദ്ധതികളുടെ ഗുണഭോക്താക്കള്‍, കാശിയിലെ എന്റെ പ്രിയ സഹോദരീസഹോദരന്മാരേ,
സാവന്‍ മാസത്തിന്റെ ആരംഭത്തോടെ ... ബാബ വിശ്വനാഥിന്റെയും ഗംഗാ മാതാവിന്റെയും അനുഗ്രഹത്താലും ബനാറസിലെ ജനങ്ങളുടെ കൂട്ടായ്മയാലും ജീവിതം യഥാര്‍ത്ഥമായും അനുഗ്രഹീതമാകുന്നു. ഇക്കാലത്ത് കാശിയില്‍ ആളുകള്‍ വളരെ തിരക്കിലാണെന്നും കാശിയിലെ തിരക്ക് അനുദിനം വര്‍ദ്ധിച്ചുകൊണ്ടിരിക്കുകയാണെന്നും എനിക്കറിയാം. ബാബയ്ക്ക് ജലം അര്‍പ്പിക്കാന്‍ രാജ്യത്തിന്റെ വിവിധ ഭാഗങ്ങളില്‍ നിന്നും ലോകമെമ്പാടുമുള്ള ആയിരക്കണക്കിന് ശിവഭക്തര്‍ ഇവിടെ എത്തിച്ചേരുന്നു. ഇത്തവണ സാവന്‍ കാലഘട്ടത്തിന്റെ ദൈര്‍ഘ്യം കൂടുതലാണ്. തല്‍ഫലമായി, ബാബയുടെ ദര്‍ശനത്തിനായി അഭൂതപൂര്‍വമായ വിധം ഭക്തജനങ്ങള്‍ എത്തുമെന്ന് ഉറപ്പാണ്. എന്നാല്‍ ഇതിനെല്ലാം പുറമെ ഒരു കാര്യം ഉറപ്പാണ്: ഇനി ബനാറസില്‍ ആരു വന്നാലും അവര്‍ സന്തോഷത്തോടെ മടങ്ങും! ഇത്രയധികം ആളുകള്‍ വരുന്നതിനെക്കുറിച്ചും ബനാറസില്‍ എല്ലാം എങ്ങനെ കൈകാര്യം ചെയ്യുമെന്നതിനെക്കുറിച്ചും എനിക്ക് ആശങ്കയില്ല. കാശിയിലെ ജനങ്ങള്‍ എന്നെ പഠിപ്പിക്കുന്നു; എനിക്ക് അവരെ ഒന്നും പഠിപ്പിക്കാന്‍ കഴിയില്ല. ജി-20 ഉച്ചകോടിക്കിടെ, ലോകമെമ്പാടുമുള്ള നിരവധി ആളുകള്‍ ബനാറസിലെത്തി. കാശിയിലെ ജനങ്ങള്‍ അവര്‍ക്ക് ഗംഭീര സ്വീകരണം നല്‍കുകയും എല്ലാം നന്നായി കൈകാര്യം ചെയ്യുകയും ചെയ്തു, ഇന്ന് നിങ്ങളെയും കാശിയെയും ലോകമെമ്പാടും പ്രശംസിക്കുന്നു. അതുകൊണ്ടാണു കാശിക്കാര്‍ എല്ലാം കൈകാര്യം ചെയ്യുമെന്ന് എനിക്കറിയാവുന്നത്. നിങ്ങള്‍ കാശി വിശ്വനാഥ് ധാമും പരിസരവും വളരെ ഗംഭീരമാക്കിയിരിക്കുന്നു, ഇവിടെ വരുന്ന ഏതൊരാളും ആഹ്ലാദാതിരേകത്തോടെ പോകും. അത് ബാബയുടെ ആഗ്രഹമായിരുന്നു, പൂര്‍ത്തീകരിക്കാന്‍ നമ്മള്‍ സഹായികളായി. ഇത് നമ്മുടെ എല്ലാവരുടെയും ഭാഗ്യമാണ്.
സഹോദരീ സഹോദരന്മാരേ,
ഇന്ന് കാശി ഉള്‍പ്പെടെ ഉത്തര്‍പ്രദേശിന് ഏകദേശം 12,000 കോടി രൂപയുടെ പദ്ധതികളാണ് സമ്മാനിച്ചിരിക്കുന്നത്. കാശിയുടെ ആത്മാവ് നിലനിര്‍ത്തിക്കൊണ്ട് സമ്പൂര്‍ണ പരിവര്‍ത്തനത്തിനായി ഞങ്ങള്‍ എടുത്ത ദൃഢനിശ്ചയത്തിന്റെ വിപുലീകരണമാണിത്. റെയില്‍വേ, റോഡുകള്‍, ജലം, വിദ്യാഭ്യാസം, വിനോദസഞ്ചാരം എന്നിവയുമായി ബന്ധപ്പെട്ട പദ്ധതികളും ഘാട്ടുകളുടെ (നദീതീര പടികള്‍) പുനര്‍വികസനവുമായി ബന്ധപ്പെട്ട പദ്ധതികളും അവയില്‍ ഉള്‍പ്പെടുന്നു. ഈ വികസന പ്രവര്‍ത്തനങ്ങള്‍ക്ക് എല്ലാവര്‍ക്കും അഭിനന്ദനങ്ങള്‍.
സുഹൃത്തുക്കളേ,
കുറച്ച് മുമ്പ്, പ്രധാനമന്ത്രി ആവാസ് യോജനയുടെയും ആയുഷ്മാന്‍ ഭാരത് യോജനയുടെയും ഗുണഭോക്താക്കളുമായി ഞാന്‍ ഒരു സംഭാഷണം നടത്തിയിരുന്നു. എയര്‍കണ്ടീഷന്‍ ചെയ്ത മുറികളില്‍ ഇരുന്നുകൊണ്ട് പദ്ധതികള്‍ തയ്യാറാക്കി എന്നതായിരുന്നു മുന്‍ ഗവണ്‍മെന്റുകളോട് ജനങ്ങള്‍ക്കുണ്ടായിരുന്ന ഏറ്റവും വലിയ പരാതി. ഈ പദ്ധതികള്‍ മണ്ണില്‍ ചെലുത്തുന്ന സ്വാധീനം അന്നത്തെ ഗവണ്‍മെന്റുകള്‍ക്ക് അറിയില്ലായിരുന്നു. എന്നിരുന്നാലും, ബിജെപി ഗവണ്‍മെന്റ് ഗുണഭോക്താക്കളുമായി സംവാദങ്ങളിലും ആശയവിനിമയങ്ങളിലും കൂടിക്കാഴ്ചകളിലും ഏര്‍പ്പെട്ടിരിക്കുകയാണ്, ഒരു പുതിയ പാരമ്പര്യത്തിന് തുടക്കമിട്ടിരിക്കുകയാണ്. ആനുകൂല്യങ്ങള്‍ ഇപ്പോള്‍ ഗുണഭോക്താക്കള്‍ക്കു നേരിട്ട് നല്‍കുന്നു, കൂടാതെ അവരുടെ പ്രതികരണവും നേരിട്ട് ലഭിക്കും. ഓരോ ഗവണ്‍മെന്റ് വകുപ്പും ഉദ്യോഗസ്ഥരും തങ്ങളുടെ ചുമതലകള്‍ മനസ്സിലാക്കിത്തുടങ്ങിയതാണ് ഇതിന്റെ നേട്ടം. ഇപ്പോള്‍, പരിശോധനയില്‍ നിന്ന് ആര്‍ക്കും രക്ഷപ്പെടാന്‍ അവസരമില്ല.
സുഹൃത്തുക്കളേ,
ഗുണഭോക്താക്കളുടെ പേരു കേട്ടാല്‍ ഞെട്ടിയിരിക്കുകയാണ് പണ്ട് അഴിമതിക്കാരും കാര്യക്ഷമത ഇല്ലാത്തതുമായ ഗവണ്‍മെന്റുകളെ നയിച്ച പാര്‍ട്ടികള്‍. സ്വാതന്ത്ര്യം ലഭിച്ച് ഇത്രയും വര്‍ഷങ്ങള്‍ക്ക് ശേഷം, ജനാധിപത്യത്തിന്റെ യഥാര്‍ത്ഥ നേട്ടങ്ങള്‍ ഇപ്പോള്‍ യഥാര്‍ത്ഥ ഗുണഭോക്താക്കള്‍ക്ക് ശരിയായ രീതിയില്‍ ലഭ്യമാണ്; നേരത്തെ ജനാധിപത്യത്തിന്റെ പേരില്‍, കുറച്ച് ആളുകളുടെ താല്‍പ്പര്യങ്ങള്‍ മാത്രം സേവിക്കുകയും പാവപ്പെട്ടവരെ അവഗണിക്കുകയും ചെയ്തു. ബിജെപി ഗവണ്‍മെന്റില്‍ യഥാര്‍ത്ഥ സാമൂഹ്യനീതിയുടെയും യഥാര്‍ത്ഥ മതേതരത്വത്തിന്റെയും ഉദാഹരണമായി ഗുണഭോക്തൃ വര്‍ഗ്ഗം മാറി. ഓരോ സ്‌കീമിന്റെയും യഥാര്‍ത്ഥ ഗുണഭോക്താക്കളെ കണ്ടെത്തുന്നതിനും അവരിലേക്ക് എത്തിച്ചേരുന്നതിനും എല്ലാ സ്‌കീമുകളുടെയും ആനുകൂല്യങ്ങള്‍ അവര്‍ക്ക് ലഭിക്കുന്നുണ്ടെന്ന് ഉറപ്പാക്കുന്നതിനും ഞങ്ങള്‍ എല്ലാ ശ്രമങ്ങളും നടത്തുന്നു. ഇതിന്റെ ഏറ്റവും വലിയ ഗുണം എന്താണെന്ന് അറിയാമോ? ഗവണ്‍മെന്റു തന്നെ ജനങ്ങളിലേക്ക് എത്തുമ്പോള്‍ എന്ത് സംഭവിക്കും? കമ്മീഷന്‍ വാങ്ങിയിരുന്നവരുടെ കടകള്‍ ഇപ്പോള്‍ അടഞ്ഞുകിടക്കുകയാണ്. ഇടനിലക്കാരുടെ കടകള്‍ അടഞ്ഞുകിടക്കുന്നു. അഴിമതി നടത്തിയിരുന്നവരുടെ കടകള്‍ അടഞ്ഞുകിടക്കുകയാണ്. മറ്റൊരു വിധത്തില്‍ പറഞ്ഞാല്‍, വിവേചനമോ അഴിമതിയോ ഇല്ല.
സുഹൃത്തുക്കളേ,
കഴിഞ്ഞ ഒമ്പത് വര്‍ഷമായി, ഞങ്ങള്‍ ഒരു കുടുംബത്തിനോ ഒരു തലമുറയ്ക്കോ വേണ്ടിയുള്ള പദ്ധതികള്‍ ആവിഷ്‌കരിച്ചിട്ടില്ല, മറിച്ച് ഭാവി തലമുറകളെ മനസ്സില്‍ കണ്ട് അവരുടെ ഭാവി സാധ്യതകള്‍ മെച്ചപ്പെടുത്താനും ഞങ്ങള്‍ പ്രവര്‍ത്തിച്ചു. ഉദാഹരണത്തിന്, പാവപ്പെട്ടവര്‍ക്കായി ഒരു ഭവന പദ്ധതിയുണ്ട്. പ്രധാനമന്ത്രി ആവാസ് യോജനയ്ക്ക് കീഴില്‍ ഇതുവരെ രാജ്യത്തെ നാല് കോടിയിലധികം കുടുംബങ്ങള്‍ക്ക് അടച്ചുറപ്പുള്ള വീടുകള്‍ ലഭിച്ചിട്ടുണ്ട്. ഇന്നും ഉത്തര്‍പ്രദേശില്‍ 4.5 ലക്ഷത്തോളം പാവപ്പെട്ട കുടുംബങ്ങള്‍ക്ക് സ്ഥിരം വീടുകള്‍ നല്‍കി. സാവന്‍ മാസത്തില്‍ മഹാദേവനില്‍ നിന്നുള്ള മഹത്തായ അനുഗ്രഹമാണിത്.
സുഹൃത്തുക്കളേ,
പാവപ്പെട്ടവര്‍ക്ക് ഈ വീടുകള്‍ നല്‍കുമ്പോള്‍, അവരുടെ പ്രധാന ആശങ്കകള്‍ അവസാനിക്കുകയും സുരക്ഷിതത്വബോധം അവരില്‍ ഉയര്‍ന്നുവരുകയും ചെയ്യുന്നു. ഈ വീടുകള്‍ സ്വീകരിക്കുന്നവര്‍ക്ക് അഭിമാനവും ഊര്‍ജ്ജവും പുതിയതായി അനുഭവപ്പെടുന്നു. അത്തരമൊരു വീട്ടില്‍ ഒരു കുട്ടി വളരുമ്പോള്‍, അവന്റെ / അവളുടെ ആഗ്രഹങ്ങളും വ്യത്യസ്തമാണ്.
പ്രധാനമന്ത്രി ആവാസ് യോജനയ്ക്ക് കീഴിലുള്ള ഭൂരിഭാഗം വീടുകളും സ്ത്രീകളുടെ പേരിലാണ് രജിസ്റ്റര്‍ ചെയ്തിരിക്കുന്നത് എന്ന് ഞാന്‍ നിങ്ങളെ ആവര്‍ത്തിച്ച് ഓര്‍മ്മിപ്പിക്കട്ടെ. ഇന്ന് ലക്ഷക്കണക്കിന് രൂപയാണ് ഈ വീടുകളുടെ മൂല്യം. കോടിക്കണക്കിന് സഹോദരിമാരുണ്ട്, അവരുടെ പേരില്‍ ആദ്യമായി ഒരു സ്വത്ത് രജിസ്റ്റര്‍ ചെയ്തവരായി. ഈ ദരിദ്ര കുടുംബങ്ങളിലെ സഹോദരിമാര്‍ തങ്ങള്‍ക്ക് ലഭിച്ച സാമ്പത്തിക സുരക്ഷിതത്വത്തിന്റെ ഉറപ്പ് ശരിക്കും മനസ്സിലാക്കുന്നു.
സുഹൃത്തുക്കളേ,
ആയുഷ്മാന്‍ ഭാരത് യോജന 5 ലക്ഷം രൂപ വരെ സൗജന്യ ചികിത്സ നല്‍കുന്നതില്‍ മാത്രം ഒതുങ്ങുന്നില്ല. അതിന്റെ ഗുണഫലം നിരവധി തലമുറകളിലേക്ക് വ്യാപിക്കുന്നു. ഒരു ദരിദ്ര കുടുംബത്തിന് ഗുരുതരമായ രോഗം വന്നാല്‍, ഒരാളുടെ വിദ്യാഭ്യാസം ബാധിക്കപ്പെടുമ്പോള്‍, ആരെങ്കിലും ചെറുപ്പത്തില്‍ തന്നെ ജോലി ചെയ്യാന്‍ തുടങ്ങണം, കൂടാതെ ഭാര്യയും ഉപജീവനത്തിനായി പുറത്തുപോകേണ്ടിവരും. അസുഖം മൂലം സാമ്പത്തിക സ്ഥിതി വഷളാകുന്നതിനാല്‍, ഗുരുതരമായ രോഗത്തിന്റെ ഭാരം കുട്ടികള്‍ക്ക് വിവാഹം കഴിക്കാന്‍ കഴിയാതെ വര്‍ഷങ്ങള്‍ കടന്നുപോകാന്‍ ഇടയാക്കും. പാവപ്പെട്ടവര്‍ക്ക് മുന്നില്‍ രണ്ട് വഴികള്‍ മാത്രമാണ് ഉണ്ടായിരുന്നത്. ഒന്നുകില്‍ തങ്ങളുടെ പ്രിയപ്പെട്ട ആള്‍ കണ്‍മുമ്പില്‍ ജീവനുവേണ്ടി മല്ലിടുന്നത് കാണേണ്ടിവരും; അല്ലെങ്കില്‍ ചികിത്സയ്ക്കായി ആരുടെയെങ്കിലും കയ്യില്‍ നിന്ന് വായ്പയെടുക്കാന്‍ തങ്ങളുടെ വസ്തുവും സ്ഥലവും വില്‍ക്കുന്നു. വസ്തുവകകള്‍ വില്‍ക്കുമ്പോള്‍, കടബാധ്യത വര്‍ദ്ധിക്കുന്നത് വരും തലമുറകളെ ബാധിക്കും. ആയുഷ്മാന്‍ ഭാരത് യോജന ഇന്ന് പാവപ്പെട്ടവരെ ഈ പ്രതിസന്ധിയില്‍ നിന്ന് രഒരു ദൗത്യമായിത്തന്നെ ഗുണഭോക്താക്കളില്‍ എത്തുന്നു എന്ന് ഉറപ്പാക്കാന്‍ ഞാന്‍ കഠിനമായി ശ്രമിക്കുന്നത്. ഇന്നും ഇവിടെ നിന്ന് ഒരു കോടി അറുപത് ലക്ഷം ഗുണഭോക്താക്കള്‍ക്കുള്ള ആയുഷ്മാന്‍ ഭാരത് കാര്‍ഡുകളുടെ വിതരണം ആരംഭിച്ചു.
സഹോദരീ സഹോദരന്മാരേ,
ദരിദ്രര്‍ക്കും പാര്‍ശ്വവല്‍കരിക്കപ്പെട്ടവര്‍ക്കും രാജ്യത്തിന്റെ വിഭവങ്ങളില്‍ ഏറ്റവും വലിയ അവകാശമുണ്ട്. മുമ്പ്, ബാങ്കുകളിലേക്കുള്ള പ്രവേശനം സമ്പന്നര്‍ക്ക് മാത്രമായിരുന്നു. പാവപ്പെട്ടവര്‍ക്ക് പണമില്ലെങ്കില്‍ ബാങ്ക് അക്കൗണ്ട് കൊണ്ട് എന്ത് ചെയ്യും എന്നായിരുന്നു വിശ്വാസം. ഒരു ഗ്യാരണ്ടിയും ഇല്ലെങ്കില്‍ എങ്ങനെ ഒരു ബാങ്ക് വായ്പ സുരക്ഷിതമാക്കാന്‍ കഴിയുമെന്ന് ചിലര്‍ ചിന്തിച്ചിരുന്നു. കഴിഞ്ഞ ഒമ്പത് വര്‍ഷം കൊണ്ട് ബിജെപി ഗവണ്‍മെന്റ് ഈ ചിന്താഗതിയിലും മാറ്റം വരുത്തി. എല്ലാവര്‍ക്കുമായി ഞങ്ങള്‍ ബാങ്കുകളുടെ വാതിലുകള്‍ തുറന്നിട്ടുണ്ട്. ഏകദേശം 50 കോടി ജന്‍ധന്‍ ബാങ്ക് അക്കൗണ്ടുകള്‍ ഞങ്ങള്‍ തുറന്നു. മുദ്ര യോജനയ്ക്ക് കീഴില്‍ 50,000 മുതല്‍ 10 ലക്ഷം രൂപ വരെ ഈട് കൂടാതെ വായ്പ നല്‍കിയിട്ടുണ്ട്. ഇവിടെ ഉത്തര്‍പ്രദേശില്‍ പോലും കോടിക്കണക്കിന് ഗുണഭോക്താക്കള്‍ മുദ്ര യോജനയുടെ ആനുകൂല്യങ്ങള്‍ പ്രയോജനപ്പെടുത്തി തങ്ങളുടെ സംരംഭം ആരംഭിച്ചിട്ടുണ്ട്. ദരിദ്രര്‍, ദലിതര്‍, പിന്നാക്ക സമുദായങ്ങള്‍, ആദിവാസി വിഭാഗങ്ങള്‍, ന്യൂനപക്ഷ കുടുംബങ്ങള്‍, വനിതാ സംരംഭകര്‍ എന്നിവര്‍ക്കാണ് കൂടുതല്‍ പ്രയോജനം ലഭിച്ചത്. ഇതാണ് ബിജെപി ഗവണ്‍മെന്റ് ഉറപ്പുനല്‍കുന്ന സാമൂഹ്യനീതി.
സുഹൃത്തുക്കളേ,
വണ്ടികളിലും തട്ടുകടകളിലും ഫുട്പാത്തിലും ചെറുകിട കച്ചവടം നടത്തുന്ന നമ്മുടെ സുഹൃത്തുക്കളില്‍ ഭൂരിഭാഗവും അധഃകൃത സമൂഹത്തില്‍ പെട്ടവരാണ്. എന്നാല്‍ മുന്‍ ഗവണ്‍മെന്റുകള്‍ അവരെ അവഗണിക്കുകയും അവഹേളനത്തിനും പീഡനത്തിനും ഇരയാക്കുകയും ചെയ്തു. വണ്ടികളിലും തട്ടുകടകളിലും ഫുട്പാത്തിലും ചെറുകിട കച്ചവടം നടത്തുന്നവരെ ആരെങ്കിലും ചീത്ത പറയുകയും ശകാരിക്കുകയും ചെയ്യുന്നു. പക്ഷേ, ഒരു പാവപ്പെട്ട അമ്മയുടെ മകനായ മോദിക്ക് ഈ അപമാനം സഹിക്കാനാവില്ല. അതുകൊണ്ട് വഴിയോരക്കച്ചവടക്കാര്‍ക്കായി ഞാന്‍ പ്രധാനമന്ത്രി-സ്വനിധി പദ്ധതി ആരംഭിച്ചു. ഞങ്ങള്‍ അവര്‍ക്ക് ബഹുമാനം നല്‍കുകയും പിഎം-സ്വനിധി പദ്ധതി പ്രകാരം അവരെ പിന്തുണയ്ക്കാന്‍ ബാങ്കുകളോട് അഭ്യര്‍ത്ഥിക്കുകയും ചെയ്തിട്ടുണ്ട്. നടപ്പാത കച്ചവടക്കാര്‍ക്ക് നല്‍കുന്ന വായ്പയുടെ ഗ്യാരണ്ടി സര്‍ക്കാര്‍ തന്നെയാണ് നല്‍കുന്നത്. ഇതുവരെ 35 ലക്ഷത്തിലധികം ഗുണഭോക്താക്കള്‍ക്ക് പ്രധാനമന്ത്രി-സ്വനിധി പദ്ധതി പ്രകാരം ധനസഹായം അനുവദിച്ചിട്ടുണ്ട്. ബനാറസില്‍ പോലും 1.25-ലധികം ഗുണഭോക്താക്കള്‍ക്ക് ഈ പദ്ധതി പ്രകാരം ഇന്ന് വായ്പ നല്‍കിയിട്ടുണ്ട്. ഈ വായ്പയിലൂടെ അവര്‍ക്ക് ജോലിയില്‍ പുരോഗതി കൈവരിക്കാനും ബിസിനസ്സ് വിപുലീകരിക്കാനും കഴിയും. അവരെ അപമാനിക്കാനോ നിന്ദിക്കാനോ ഇനി ആരും ധൈര്യപ്പെടില്ല. പാവപ്പെട്ടവര്‍ക്ക് അന്തസ്സ് ഉറപ്പാക്കുക എന്നത് മോദിയുടെ ഉറപ്പാണ്.
സുഹൃത്തുക്കള്‍,
പതിറ്റാണ്ടുകളായി രാജ്യം ഭരിച്ച സര്‍ക്കാരുകളുടെ ഭരണത്തില്‍ അഴിമതി വേരൂന്നിയിരുന്നു. ഇത് സംഭവിക്കുമ്പോള്‍, എത്ര പണം അനുവദിച്ചാലും അത് കുറയുന്നു. 2014-ന് മുമ്പ് മുന്‍ സര്‍ക്കാരുകളുടെ കാലത്ത് അഴിമതിയും സ്വജനപക്ഷപാതവും തഴച്ചുവളര്‍ന്നു. ബജറ്റ് വരുമ്പോഴെല്ലാം കമ്മിയുടെയും നഷ്ടത്തിന്റെയും ഒഴികഴിവ് മാത്രമേ ഉണ്ടായിരുന്നുള്ളൂ. പാവപ്പെട്ടവരുടെ ക്ഷേമമായാലും അടിസ്ഥാന സൗകര്യ വികസനമായാലും ഇന്ന് ബജറ്റിന് ഒരു കുറവുമില്ല. നികുതിദായകര്‍ ഒന്നുതന്നെയാണ്, സംവിധാനവും ഒന്നുതന്നെയാണ്. എന്നാല്‍ സര്‍ക്കാര്‍ മാറി, ഉദ്ദേശ്യങ്ങള്‍ മാറി, ഫലങ്ങള്‍ ദൃശ്യമാണ്. മുമ്പ്, പത്രങ്ങള്‍ അഴിമതിയുടെയും അഴിമതിയുടെയും റിപ്പോര്‍ട്ടുകള്‍ കൊണ്ട് നിറഞ്ഞിരുന്നു. ഇപ്പോള്‍, പുതിയ പദ്ധതികളുടെ ഉദ്ഘാടനവും അനാച്ഛാദനവുമാണ് തലക്കെട്ടുകളില്‍ ആധിപത്യം പുലര്‍ത്തുന്നത്. കഴിഞ്ഞ ഒമ്പത് വര്‍ഷത്തെ പരിവര്‍ത്തനത്തിന്റെ ഏറ്റവും വലിയ ഉദാഹരണമാണ് ഇന്ത്യന്‍ റെയില്‍വേ. ഈസ്റ്റേണ്‍ ഡെഡിക്കേറ്റഡ് ചരക്ക് ഇടനാഴി, ചരക്ക് ഗതാഗതത്തിന് പ്രത്യേക ട്രാക്കുകള്‍ എന്നിവയ്ക്ക് 2006-ല്‍ പദ്ധതിയിട്ടിരുന്നു. എന്നാല്‍ 2014 വരെ ഒരു കിലോമീറ്റര്‍ ട്രാക്ക് പോലും സ്ഥാപിച്ചിട്ടില്ല. ഒരു കിലോമീറ്റര്‍ പോലുമില്ല. ഈ പദ്ധതിയുടെ ഒരു പ്രധാന ഭാഗം കഴിഞ്ഞ ഒമ്പത് വര്‍ഷത്തിനുള്ളില്‍ പൂര്‍ത്തിയാക്കി. ഈ ട്രാക്കുകളില്‍ ഇതിനകം ഗുഡ്സ് ട്രെയിനുകള്‍ ഓടുന്നുണ്ട്. ഇന്നും ദീന്‍ ദയാല്‍ ഉപാധ്യായ ജങ്ഷനില്‍ നിന്നുള്ള പുതിയ സോണ്‍ നഗര്‍ സെക്ഷന്‍ ഉദ്ഘാടനം ചെയ്തു. ഇത് ചരക്ക് ട്രെയിനുകളുടെ വേഗത വര്‍ദ്ധിപ്പിക്കുക മാത്രമല്ല, പൂര്‍വാഞ്ചലിലും കിഴക്കന്‍ ഇന്ത്യയിലും നിരവധി തൊഴിലവസരങ്ങള്‍ സൃഷ്ടിക്കുകയും ചെയ്യും.
സുഹൃത്തുക്കളേ,
ഉദ്ദേശം വ്യക്തമാകുമ്പോള്‍ അത് എങ്ങനെ പ്രവര്‍ത്തിക്കുന്നു എന്നതിന് മറ്റൊരു ഉദാഹരണം ഞാന്‍ നല്‍കാം. അതിവേഗ ട്രെയിനുകളാണ് രാജ്യം എപ്പോഴും ആഗ്രഹിക്കുന്നത്. 50 വര്‍ഷം മുമ്പാണ് രാജധാനി എക്സ്പ്രസ് ആദ്യമായി രാജ്യത്ത് അവതരിപ്പിച്ചത്. രാജധാനി എക്സ്പ്രസ് ഓടിത്തുടങ്ങി. എന്നിരുന്നാലും, വര്‍ഷങ്ങള്‍ക്ക് ശേഷവും ഈ രാജധാനി എക്സ്പ്രസ് ട്രെയിനുകള്‍ 16 റൂട്ടുകളില്‍ മാത്രമേ സര്‍വീസ് നടത്തിയിട്ടുള്ളൂ. അതുപോലെ, ഏകദേശം 30-35 വര്‍ഷം മുമ്പ്, ശതാബ്ദി എക്സ്പ്രസ് ആരംഭിച്ചു, എന്നാല്‍ ഇത്രയും വര്‍ഷങ്ങള്‍ക്ക് ശേഷവും ഇത് 19 റൂട്ടുകളില്‍ മാത്രമേ സര്‍വീസ് നടത്തുന്നുള്ളൂ. ഈ ട്രെയിനുകള്‍ക്കിടയില്‍, ഒരു വന്ദേ ഭാരത് എക്സ്പ്രസ് ഉണ്ട്, രാജ്യത്തെ ആദ്യത്തെ വന്ദേ ഭാരത് ഉള്ളതില്‍ ബനാറസിന് അഭിമാനമുണ്ട്. നാല് വര്‍ഷത്തിനുള്ളില്‍ 25 റൂട്ടുകളില്‍ ഈ ട്രെയിന്‍ സര്‍വീസ് ആരംഭിച്ചു. ഇന്ന് തന്നെ, രണ്ട് പുതിയ വന്ദേ ഭാരത് എക്സ്പ്രസ് ട്രെയിനുകള്‍ ഗോരഖ്പൂരില്‍ നിന്ന് ഫ്‌ലാഗ് ഓഫ് ചെയ്തു-ഒരു ട്രെയിന്‍ ഗോരഖ്പൂരില്‍ നിന്ന് ലഖ്നൗവിലേക്കും മറ്റൊന്ന് അഹമ്മദാബാദില്‍ നിന്ന് ജോധ്പൂരിലേക്കും. ഈ വന്ദേ ഭാരത് എക്സ്പ്രസ് ട്രെയിന്‍ രാജ്യത്തെ ഇടത്തരക്കാര്‍ക്കിടയില്‍ അവിശ്വസനീയമാംവിധം ജനപ്രിയമായിത്തീര്‍ന്നു, അതിനുള്ള ആവശ്യങ്ങള്‍ എല്ലാ കോണുകളില്‍ നിന്നും ഒഴുകുന്നു. വന്ദേ ഭാരത് രാജ്യത്തിന്റെ മുക്കിലും മൂലയിലും ബന്ധിപ്പിക്കുന്ന ദിവസം വിദൂരമല്ല.
സഹോദരീ സഹോദരന്മാരേ,
കഴിഞ്ഞ ഒമ്പത് വര്‍ഷത്തിനിടയില്‍, കാശിയുടെ ഗതാഗത സൗകര്യം വര്‍ദ്ധിപ്പിക്കുന്നതിന് അവിശ്വസനീയമായ പ്രവര്‍ത്തനങ്ങള്‍ നടത്തി. ഇവിടെയുള്ള വികസന പദ്ധതികള്‍ നിരവധി പുതിയ തൊഴിലവസരങ്ങളും സൃഷ്ടിക്കുന്നുണ്ട്. ഉദാഹരണത്തിന്, കഴിഞ്ഞ വര്‍ഷം 70 ദശലക്ഷത്തിലധികം വിനോദസഞ്ചാരികളും തീര്‍ഥാടകരും കാശി സന്ദര്‍ശിച്ചു. ഒരു വര്‍ഷത്തിനുള്ളില്‍ കാശിയിലെത്തുന്ന സഞ്ചാരികളുടെ എണ്ണത്തില്‍ 12 മടങ്ങ് വര്‍ധനവുണ്ടായി. വിനോദസഞ്ചാരികളുടെ വരവ് 12 മടങ്ങ് വര്‍ധിച്ചതോടെ, റിക്ഷാ വലിക്കുന്നവരും കടയുടമകളും ചെറിയ ഭക്ഷണശാലകളും ഹോട്ടലുകളും നടത്തുന്നവരുമായി. ഇതിന്റെ നേരിട്ടുള്ള ഗുണഭോക്താക്കള്‍. നിങ്ങള്‍ ബനാറസി സാരിയുടെയോ ബനാറസി പാന്റെയോ ബിസിനസില്‍ ഏര്‍പ്പെട്ടിരിക്കുകയാണെങ്കിലും, എന്റെ സഹോദരന്മാരേ, എല്ലാവര്‍ക്കും ഇതില്‍ നിന്ന് വളരെയധികം പ്രയോജനം ലഭിക്കുന്നു. ടൂറിസത്തിന്റെ വര്‍ധന നമ്മുടെ ബോട്ടുകാര്‍ക്ക് കാര്യമായ നേട്ടമാണ്. വൈകുന്നേരത്തെ ഗംഗാ ആരതി (പ്രാര്‍ത്ഥനാ ചടങ്ങ്) സമയത്ത് പോലും ബോട്ടുകളില്‍ വലിയ ജനക്കൂട്ടം കാണുമ്പോള്‍ ഞാന്‍ അത്ഭുതപ്പെടുന്നു. ബനാറസിനെ ഇതേ രീതിയില്‍ പരിപാലിക്കുന്നത് തുടരുക.
സുഹൃത്തുക്കളേ,
ബാബയുടെ (ശിവന്‍) അനുഗ്രഹത്തോടെ വാരണാസിയുടെ ദ്രുതഗതിയിലുള്ള വികസനത്തിന്റെ യാത്ര തുടരും. കാശിയിലെ ജനങ്ങള്‍ക്ക് എന്റെ ഹൃദയംഗമമായ നന്ദി അറിയിക്കാന്‍ ഞാന്‍ ആഗ്രഹിക്കുന്നു. അടുത്തിടെ കാശിയില്‍ മുനിസിപ്പല്‍ തിരഞ്ഞെടുപ്പ് നടന്നിരുന്നു. നിങ്ങള്‍ എല്ലാവരും വികസനത്തിന്റെ യാത്രയെ പിന്തുണച്ചു, വികസനത്തില്‍ വിശ്വസിക്കുന്നവരുടെ വിജയം ഉറപ്പാക്കി, കാശിയില്‍ സദ്ഭരണം സ്ഥാപിക്കുന്നതിന് നിങ്ങള്‍ സംഭാവന നല്‍കി. പാര്‍ലമെന്റിലെ നിങ്ങളുടെ പ്രതിനിധി എന്ന നിലയില്‍, നിങ്ങളുടെ പിന്തുണയ്ക്ക് ഞാന്‍ നന്ദിയുള്ളവനാണ്. ഒരിക്കല്‍ കൂടി, വികസന പ്രവര്‍ത്തനങ്ങളില്‍ കൈവരിച്ച പുരോഗതിക്ക് എന്റെ ഹൃദയംഗമമായ അഭിനന്ദനങ്ങള്‍ ഞാന്‍ അറിയിക്കുന്നു, കൂടാതെ വിശുദ്ധ മാസമായ സാവന്‍ മാസത്തില്‍, നിങ്ങള്‍ക്കെല്ലാവര്‍ക്കും എന്റെ ആശംസകള്‍ അറിയിക്കുന്നു. ഹര്‍ ഹര്‍ മഹാദേവ്!
ND
(Release ID: 1938161)
Visitor Counter : 134
Read this release in:
English
,
Urdu
,
Marathi
,
Hindi
,
Manipuri
,
Bengali
,
Assamese
,
Punjabi
,
Gujarati
,
Odia
,
Tamil
,
Kannada