ঙসি ভারত রেলৱেগী পুৱারি ওইরবা নুমিৎ অমা ওইনা প্রধান মন্ত্রী শ্রী নরেন্দ্র মোদীনা ভোপালগী রানি কমলাপতি স্তেসন্দা অনৌবা বন্দে ভারত এক্সপ্রেস ত্রেন ৫ লমথাখ্রে। থৌরম অদুদা মধ্য প্রদেসকী রাজ্যপাল শ্রী মঙ্গুভাই পতেল, মধ্য প্রদেসকী চীফ মিনিস্তর শ্রী সিবরাজ সিংহ চৌহান, রেলৱেজ, কম্মুনিকেসন্স অমসুং ইলেক্ত্রোনিক্স অমসুং ইনফোর্মেসন তেক্নোলোজিগী য়ুনিয়ন মিনিস্তর শ্রী অশ্বিনি বৈষ্ণব, মীয়ামগী মীহুৎশিং অমসুং অখন্নবা মীওইশিং শরুক য়াখি।

নুংঙাইনা ত্রেন্দা চৎথোক-চৎশিন তৌবগী অনৌবা পন্দুব অমা হৌদোক্লদুনা, অনৌবা বন্দে ভারত এক্সপ্রেস ত্রেন মঙা অসিনা রানি কমলাপতি- জবলপুর, রানি কমলাপতি-ইন্দোর, গৱা(মদগাউন)-মুম্বাই, রাঞ্চি-পাতনা অমসুং ধরৱার-বেঙ্গালুরুগী মরক্তা চেনগনি। ঙসি লমথাখিবা বন্দে ভারত ত্রেনশিং অসিনা রাজ্যগী কোনুংশিং অমসুং অতোপ্পা সহরশিংগী মরক্তা চৎথোক-চৎশিন হেন্নবা ফগৎহল্লগনি অমসুং চৎপগী মতম হন্থহল্লগনি অমসুং চৎপগী নুংঙাইবা হেনগৎহল্লগনি। হায়রিবা বন্দে ভারত ত্রেনশিং অসিনা অনৌবা ভারত অমা- ভিকসিত ভারতকী পাউজেল অমা লৈবাক্কী কাচিন-কোয়া খুদিংমক্তা চেল্লি।

রানি কমলাপতি-জবলপুর বন্দে ভারত এক্সপ্রেস

রানি কমলাপতি-জবলপুর বন্দে ভারত এক্সপ্রেস রানি কমলাপতি রেলৱে স্তেসন্দগী খোঙশানগনি অমসুং নুমিৎ অদু মক্তদা জবলপুর স্তেসন্দা থুংগনি অমসুং নরসিংহপুর, পিপারিয়া অমসুং নর্মাদাপুরম রেলৱে স্তেসনশিংদা লেপকনি।

বন্দে ভারত ত্রেন চেনবা হৌবদগী, মধ্য প্রদেসকী নাৎকী কোনুং জবলপুর, মধ্য প্রদেসকী কোনুং ভোপাল অমসুং অনকপদা লৈবা লাইনিংগী মফমশিং অমসুং লমকোয়ফমশিংগা শম্নবা হেনগৎহল্লগনি অমসুং লমদম অসি হিরম খুদিংমক্তা চাউখৎপশু হেনগৎলগনি।

রানি কমলাপতি- ইন্দোর বন্দে ভারত এক্সপ্রেস

ভোপাল রেলৱে স্তেসন্দগী রানি কমলাপতি- ইন্দোর বন্দে ভারত এক্সপ্রেস খোঙশানগনি অমসুং উজ্জেন রেলৱে স্তেসন্দা খাম্লবা মতুংদা নুমিৎ অদুদা ইন্দোরদা থুংগনি। রানি কমলাপতি অমসুং ইন্দোরগী মরক্তা বন্দে ভারত এক্সপ্রেস চেনবা অসিনা লাইনা অমসুং য়াংনা চৎথোক-চৎশিনবা ঙম্লগনি অমসুং হায়রিবা লমদম অসিগী নাৎ, তুরিজম অমসুং লাইফমশিং শম্ননবা মরুওইবা পাম্বৈ অমা ওইরগনি। বন্দে ভারত এক্সপ্রেসনা হেন্না নুংঙাইনা রেলদা চৎথোক-চৎশিনগী খুদোংচাবা অমসু পীরগনি।

গৱা (মদগাউন)-মুম্বাই বন্দে ভারত এক্সপ্রেস

ছত্রপতি শীবজী তর্মিনস স্তেসন্দগী গৱা (মদগাউন)-মুম্বাই বন্দে ভারত এক্সপ্রেস খোঙশানগনি অমসুং দাদার, থানে, পানভেল, খের, রত্নগিরি, কনকাবালি অমসুং থিবিম রেলৱে স্তেসনশিংদা খাম্লবা মতুংদা নুমিৎ অদুদা মদগাউন স্তেসন্দা থুংগনি। অনৌবা বন্দে ভারত এক্সপ্রেস অসিনা কোনকান লমদমদা মীয়াম্না য়াংনা অমসুং নুংঙাইনা চৎথোক-চৎশিন তৌনবগী খুদোংচাবা ফংলগনি। মসিনা লমদম অসিদা তুরিজম চাউখৎহনগনি। লম্বী অসিদা অনৌবা বন্দে ভারত এক্সপ্রেস ত্রেন চেনবা অসিনা লমকোয়বা মীওইশিংদা অনৌবা খুদোংচাবশিং পীরগনি হায়না থাজনরি।

রাঞ্চি-পতনা বন্দে ভারত এক্সপ্রেস

রাঞ্চি-পতনা বন্দে ভারত এক্সপ্রেস ত্রেন পাতনাদগী খোঙশানগনি অমসুং নুমিৎ অদুদা রাঞ্চি স্তেসন্দা থুংগনি অমসুং  মরক্তা গয়া, কোদারমা, হাজারিবাগ, বারকাকানা অমসুং  মেশরা রেলৱে স্তেসনশিংদা খামগনি।

মিনরেল মরাং কাইনা ফংদুনা, রাঞ্চি অসি মিনরেলদা য়ুম্ফম ওইবা উদোগশিংগী চপ চারবা মফম অমনি। মফম অদুগী ললোনবশিং পাতনাগা য়াংনা শম্নবদা ত্রেন অসিনা খুদোংচাবা পীরগনি।

ধারৱার-বেঙ্গালুরু বন্দে ভারত এক্সপ্রেস

ধারৱার-বেঙ্গালুরু বন্দে ভারত এক্সপ্রেস ত্রেন কে.এস.আর বেঙ্গালুরু সিতিদগী খোঙশানগনি অমসুং য়েসভন্তপুর, দাভাঙ্গিরি অমসুং হুবলি রেলৱে স্তেসনশিংদা খাম্লবা মতুংদা নুমিৎ অদু মক্তদা ধারৱার স্তেসন্দা থুংগনি।

কর্নাতকাদা, ধারৱার-বেঙ্গালুরু বন্দে ভারত ত্রেন্না বিদ্যা কাসি ধারৱার, ভনিজ্যা নাগরি, হুবলি অমসুং বেঙ্গালুরু শম্নহনগনি। বন্দে ভারত ত্রেন অসিনা অৱাং কর্নাতকা অমসুং খা কর্নাতকা শম্নহনগনি।

বন্দে ভারত এক্সপ্রেস ত্রেনশিংনা পেসেঞ্জরশিংদা মালেম থাক্কী চৎথোক-চৎশিনগী নুংঙাইবা অমসুং অৱাংবা থাক্কী অশোই-অঙাম থোক্তনবা কভচ তেক্নোলোজি য়াওনা খুদোংচাবা কয়া পীগনি। ত্রেন অমদা পুং অমদা কিলোমিতর ১৬০ য়াংনা চেনবা য়ারবা সস্পেন্দেদ ত্রেকশিং মোতোরশিং য়াওরবা বোগিশিং হাপ্লে। অৱাংবা থাক্কী সস্পেন্সন সিস্তেম অসিনা পেসেঞ্জরশিংদা নুংঙাইনা অমসুং অশোই-অঙাম থোক্তনা চৎপা ঙমহল্লগনি।

ভারত রেলৱেগী ‘গ্রিন ফুতপ্রিন্ত’ হেনগৎহন্নবা ত্রেনশিং অসি দিজাইন তৌবনি অমসুং অৱাংবা থাক্কী রিজেনেরেতিপ ব্রেক্কিং সিস্তেম শীজিন্নদুনা ইলেক্ত্রিক চাদা ৩০ কনবা ঙম্লে।

***