প্রধান মন্ত্রী শ্রী নরেন্দ্র মোদী জুন ২৭, ২০২৩দা মধ্য প্রদেশতা চৎকনি‍।

অয়ুক পুং ১০:৩০ রোম তারকপদা প্রধান মন্ত্রীনা রানী কমলাপতী রেলৱে স্তেসন্দা থুংগনি অমদি বন্দে ভারত এক্সপ্রেস মঙা লমথাগনি‍। প্রধান মন্ত্রীনা সাহদোলদা নুংথিল পুং ৩ লোম তারকপদা মীয়ামগী থৌরম অমা শরুক য়াগনি অমদি মফমদুদা মহাক্না রানী দুর্গাবতীগী মফমদা ইকায়খুম্নবা উৎকনি, সিক্কল সেল এনেমিয়া ইলিমিনেসন মিসন হৌদোক্কনি অমদি অয়ুস্মান কার্দশিং য়েন্থোকপা হৌদোক্কনি‍। প্রধান মন্ত্রীনা সাহদোল দিস্ত্রিক্তা লৈবা পকারিয়া খুঙ্গংদসু চৎকনি‍।

ভোপালদা প্রধান মন্ত্রী

প্রধান মন্ত্রীনা ভোপালগী রানী কমলাপতী রেলৱে স্তেসন্দা পাঙথোকপা মীয়ামগী থৌরম অমদা বন্দে ভারত এক্সপ্রেস মঙা লমথাগনি‍। বন্দে ভারত এক্সপ্রেস মঙা অদুদি: রানী কমলাপতী-জবলপুর বন্দে ভারত এক্সপ্রেস; খজুরাহো-ভোপাল-ইন্দোর বন্দে ভারত এক্সপ্রেস; মদগাউ (গোৱা)-মুম্বাই বন্দে ভারত এক্সপ্রেস; ধরৱার-বেঙ্গলুরু বন্দে ভারত এক্সপ্রেস; অমদি হতিয়া-পত্না বন্দে ভারত এক্সপ্রেসনি‍।

রানী কমলাপতী-জবলপুর বন্দে ভারত এক্সপ্রেসনা মহাকৌশাল রীজন (জবলপুর) বু মধ্য প্রদেশগী সেন্ত্রেল রীজন (ভোপাল)গা শম্নহনগনি‍। অদুগা, ভেরাঘাৎ, পচমারহী, সাতপুরানচিংবা লমকোয় মফমশিংসু কন্নেক্তিবিতী ফগৎহল্লিবা অসিনা কান্নহনগনি‍। ত্রেন অসি লম্বী অসিদা হান্না চেল্লিবা খ্বায়দগী য়াঙবা ত্রেনগা চাংদম্নবদা মিনৎ কুন্থ্রা হেন্না য়াঙগনি‍।

খজুরাহো-ভোপাল-ইন্দোর বন্দে ভারত এক্সপ্রেসনা মালৱা রীজন (ইন্দোর) অমদি বুন্দেলখন্দ রীজন (খজুরাহো)গা সেন্ত্রেল রীজন (ভোপাল)গগী মরক্তা কন্নেক্তিবিতী ফগৎহনগনি‍। মসিনা মহাকালেস্বর, মন্দু, মহেস্বর, খজুরাহো, পন্নানচিংবা মরুওইবা লমকোয় মফমশিংদা কান্নবা পীগনি‍। ত্রেন অসি লম্বী অসিদা চেল্লিবা খ্বায়দগী য়াঙবা ত্রেন্দগী পুং অনি মখায় হেন্না য়াঙগনি‍।

মদগাউ (গোৱা)-মুম্বাই বন্দে ভারত এক্সপ্রেসনা ভোৱাগী অহানবা বন্দে ভারত এক্সপ্রেস ওইগনি‍। মসিনা মুম্বাইগী ছত্রপতী সিবাজী এক্সপ্রেস তর্মিনস অমদি গোৱাগী মদগাউ স্তেসন অনিগী মরক্তা চেনগনি‍। মসিনা মফম অনিসিগী মরক্তা হৌজিক চেল্লিবা খ্বায়দগী য়াঙবা ত্রেনগী খোঙচত্তগী পুং অমরোমগী মতম তেনশিনহনগনি‍।

ধরৱার-বেঙ্গলুরু বন্দে ভারত এক্সপ্রেসনা কর্নাতকাগী মরুওসবা ময়োল্লমশিং – ধরৱার, হুবলী অমদি দবাঙ্গেরেগা স্তেতকী কোনুং বেঙ্গলুরুগা শম্নহনগনি‍। মসিনা লমদম অসিগী লম কোয়বা মীওইশিং, মহৈরোয়শিং, ইন্দস্ত্রিএলিস্তনচিংবশিংদা চাউনা কান্নবা পীগনি‍। ত্রেন অসি লম্বী অসিদা হান্না চেল্লিবা খ্বায়দগী য়াঙবা ত্রেনগা চাংদম্নবদা মিনৎ কুন্থ্রারোম হেন্না য়াঙগনি‍।

হতিয়া-পত্না বন্দে ভারত এক্সপ্রেস অসিনা ঝার্খন্দ অমদি বিহারগী অহানবা বন্দে ভারত ওইগনি‍। পত্না অমদি রাঞ্চীগী মরক্তা কন্নেক্তিবিতী ফগৎহন্দুনা, ত্রেন অসিনা লম কোয়বা, মহৈরোয় অমদি বিজিনেসমেনশিংগী য়াইফবা ওইগনি‍। মসিনা মফম অনিসিগী মরক্তা হান্না চেল্লিবা খ্বায়দগী য়াঙদা ত্রেনগা চাংদম্নবগা খোঙচৎকী মতম পুং অমগা মিনৎ কুনমঙারোম তেনশিলহনগনি‍।

সাহদোলদা প্রধান মন্ত্রী

সাহদোলদা পাঙথোক্কদবা মীয়ামগী থৌরম অমদা, প্রধান মন্ত্রীনা নেস্নেল সিক্কল সেল এনেমিয়া ইলিমিনেসন মিসন হৌদোক্কনি‍। মহাক্না বেনিফিসরীশিংদা সিক্কল সেল জিনেতিক স্তেতস কার্দশিংসু য়েন্থোক্কনি‍।

মিসন অসিগী পান্দমদি মরুওইনা ত্রাইবেল মীয়াম মরক্তা সিক্কল সেল লায়নানা পীরিবা হকশেলগী শিংনবশিং কোকহনবনি‍। হৌদোক্কদৌরিবা অসিনা ইং ২০৪৭ ফাওবগী মনুংদা পব্লিক হেল্থ প্রোগ্রাম অমা ওইনা সিক্কল সেল লায়না মুত্থৎনবা হৌজিক লৈঙাক্না পায়খৎলিবা থৌরাংশিংগী মরুওইবা পন্দোল অমা ওইরগনি‍। নেস্নেল সিক্কল সেল এনেমিয়া ইলিমিনেসন মিসন অসি কেন্দ্রগী বজেৎ ২০২৩দা লাউথোকখিবনি‍। মসি গুজরাত, মহারাস্ত্র, রাজস্থান, মধ্য প্রদেশ, ঝার্খন্দ, ছত্তিসগর, ৱেস্ত বেঙ্গল, ওরিসা, তামিল নাদু, তেলঙ্গনা, অন্ধ্র প্রদেশ, কর্নাতকা, অসাম, উত্তর প্রদেশ, কেরলা, বিহার, অমদি উত্তরাখন্দ হায়রিবা লৈবাকসিগী হায় ফোকস স্তেত ১৭ অসিগী দিস্ত্রিক্ত ২৭৮দা পায়খৎকদবনি‍।

প্রধান মন্ত্রীনা মধ্য প্রদেশদা অয়ুস্মান ভারত প্রধান মন্ত্রী জন আরোগ্য য়োজনা (এ.বি.-পি.এম.জে.এ.ৱাই.)গী কার্দ করোর ৩.৫৭রোম য়েন্থোকপা হৌদোক্কনি‍। অয়ুস্মান কার্দ য়েন্থোকপগী থৌরম অসি অর্বান বোদীশিং, গ্রাম পঞ্চায়তশিং অমদি দিভেলপমেন্ত ব্লোকশিংনা শিন্দুনা স্তেত শিনবা থুংনা পাঙথোক্কদবনি‍। অয়ুস্মান কার্দ য়েন্থোকপগী কেম্পেন অসি ৱেলফ্যার স্কীমশিং চাদা ১০০ সেচুরেসন ফংনবগীদমক বেনিফিসরী খুদিংমক্কী মফমদা য়ৌহন্নবা প্রধান মন্ত্রীগী মঙলানবু মঙফাওনহন্নবগী মায়কৈদা থাংজিনবা খোঙথাঙ অমনি‍।

থৌরম অদুগী মনুং চন্না, প্রধান মন্ত্রীনা ‘রানী দুর্গাবতী গৌরব য়াত্রা’ লোইশিনবগী থৌরমদা রানী দুর্গাবতীগী মফমদা ইকায়খুম্নবা উৎকনি‍। য়াত্রা অসি রানী দুর্গাবতীগী থৌনা অমদি কত্থোকপবু মীয়ামদা পাক শন্না খঙহন্নবগীদমক মধ্য প্রদেশ লৈঙাক্না পাঙথোকপনি‍। রানী দুর্গাবতী, ১৬শুবা চহিচাগী ময়ায় চনবা শরুক্তা গোন্দৱানাগী লৈমরেল ওইনা পাল্লম্বনি‍। মহাকপু মুগলশিংগী মায়োক্তা নীংতম লান্থেংনরম্বী মথৌনা ফবা, কিবা লৈতবা অমদি মরিংজেল লৈবী লান্মী অমা ওইনা নীংশিংনৈ‍।

পকারিয়া খুঙ্গংদা প্রধান মন্ত্রী

তোপ তোপ্পা থৌরাং অমদা, প্রধান মন্ত্রীনা সাহদোল দিস্ত্রিক্তকী পকারিয়া খুঙ্গংদা চৎকনি অমদি ত্রাইবেল ফুরূপকী লুচিংবশিং, সেল্ফ-হেল্প গ্রুপশিং, পি.ই.এস.এ. (পঞ্চায়ত (এক্সতেন্সন তু সেদ্যুল্দ এরিয়াজ) এক্ত, ১৯৯৬) কম্মিতীগী লুচিংবশিং অমদি ভিলেজ ফুতবোল ক্লবশিংগী কেপ্তেনশিংগা ৱারী ৱাতায় শানগনি‍। খুঙ্গং অদুদা প্রধান মন্ত্রীনা ত্রাইবেল অমদি ফোল্ক আর্তিস্তশিংগী নাৎকী থৌরম মীৎয়েঙ তাগনি অমদি নুমিদাংগী চাক্লেনসু চাগনি‍।

***