Na ka bynta ban pynurlong ia ka jingthmu ‘Sahkar Se Samridhi’ jong u Myntri Rangbah Duh, u Narendra Modi, ka Sorkar India ka la shim sa san tylli ki rai ba kongsan. Ia kine ki rai la shim ha ka jingialang hapdeng u Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah bad u Myntri Sorkar Pdeng ba dei khmih ia ka tnat Chemicals and Fertilizers, u Mansukh S. Mandaviya ha New Delhi. Ki ophisar na ka tnat Cooperation bad ka tnat Fertilizers ki la iadon lang ha kane ka jingialang.

Kine harum ki dei ki san tylli ki rai ba donkam ba la shim ha kane ka jingialang -

1. Ki don kumba 1 lak tylli ki Primary Agricultural Credit Cooperative Society ha baroh kawei ka ri. Ha kaba iadei bad ka mapping, yn wad ia ki Primary Agricultural Credit Society (PACS) ki bym shym treikam kum ki nongdie dawai sboh bad yn pynshlur ia ki ba kin trei kum ki nongdie dawai sboh katkum ka jinglah treikam bad ha ka rukom treikam kaba don da ki bynta bapher bapher.

2. Ia ki PACS ki bym trei kum ki Pradhan Mantri Kisan Samridhi Kendra (PMKSK) yn wanrah hapoh ka jingpeit ka PMKSK.

3. Ia ki PACS yn pyniasoh bad ka jingpyniaid iew ia ki dawai sboh, khamtam ka Fermented Organic Manure (FoM) / Liquid Fermented Organic Manure (LFOM) / Phosphate Enriched Organic Manure (PROM).

4. Hapoh ka skhim Market Development Assistance (MDA) jong ka tnat Fertilizers, ki kompani dawai sboh kin long ki aggregator na ka bynta ki nongpynmih mar bio-organic bad kin pyniaid iew ia ki mar ba shna na kine, ha kane ka kam yn kynthup ruh ia ki PACS kum ki nongdie lang ne nongdie khutia.

5. Lah ruh ban shim ia ki PACS kum ki nongseng kam lajong ha ki kam drone ban synreit ia ki dawai sboh bad ki dawai pyniap khnang. Lah ruh ban pyndonkam ia ki drone ban peit thuh ia ki jaka ki puta.

Ki jingmyntoi na kine ki rai : Kine ki rai kin kyntiew ia ka jingkamai jong ki Primary Agricultural Credit Society, kin plie lad ioh kam ha ki jaka nongkyndong bad ki nongrep kin ioh ia ki dawai sboh, ki dawai pyniap khniang, ki symbai bad ki kor ha ki thain jong ki.

***