কম্মর্স অমদি ইন্দস্ত্রী মন্ত্রালয়গী মখাদা লৈবা দিপার্তমেন্ত ওফ প্রমোসন ওফ ইন্দস্ত্রী এন্দ ইন্তর্নেল ত্রেদ (দি.পি.আই.আই.তি.)না ২০২০দা নেস্নেল স্তার্তঅপ এৱার্দ্স (এন.এস.এ.) হৌদোকখি‍। নেস্নেল স্তার্তঅপ এৱার্দ্স ২০২৩গী এপ্লিকেসন এপ্রিল ১, ২০২৩দগী থাবা হৌখি অমদি দেদলাইন হৌজিক জুন ১৫, ২০২৩ ফাওবা শাংদোকখ্রে‍।

নেস্নেল স্তার্তঅপ এৱার্দ্স ২০২৩গী এপ্লিকেসন দেদলাইন শাংদোকপনা মচিন তুমখৎলক্লিবা ওন্ত্রপ্রিন্যুরশিং অমদি ইনেব্লরশিংবু মখোয়গী ইনোভেতিব ওইবা স,লুসনশিং অমদি মদুনা খুন্নাইদা পীরিবা ইথিল উত্থোকচনবা অহেনবা মতম পীরি‍।

নেস্নেল স্তার্তঅপ এৱার্দ্স ২০২৩না লৈবাকসিগী কাচিন কোয়া শিনবা থুংবদগী ইনোবেসনশিংবু, মরুওইবা হীরমশিংদা অমৃৎ কালগী ৱাখল্লোন্না থৌদুনা ভারতপু চাওখৎপা শেন্মিৎলোন অমদা অওনবা পুরক্নবগী লম্বী য়াৎলিবা ‘ভিজন ইন্দিয়া @২০৪৭’গী মঙলানশিংগা চুননা কোমেকোরেৎ তৌগনি‍।

দি.পি.আই.আই.তি.না কাঙলুপ খুদিংদা মায় পাক্লবা স্তার্তঅপ অমমমদা লুপা লাখ ১০গী শেলগী মনা পীগনি‍। মখা তানা, নেস্নেল স্তার্তঅপ এৱার্দ্স ২০২৩দা মায় পাক্লবা অমদি ফাইনেলিস্তশিংনা ইনভেস্তর অমদি লৈঙাক্কী নেতৱর্ক, মেন্তরসিপ প্রোগ্রাম, মালেমগী কৈথেলগী এক্সপোজর, কোর্পোরেৎ অমদি য়ুনিকোর্নশিংগা মরী শম্নবা, অমদি অতৈ তোঙান তোঙানবা মমল য়াম্লবা রিসোর্সশিং য়াওনা এক্সক্লুজিব ওইবা ঙাক্লৌশিংসু ফংগনি‍।

মায় পাক্লবা ইদিসন অহুমগী খুত্থাঙদা, হায়রিবা লেমজনিংঙাই ওইরবা মনাশিং অসিনা ভারতকী স্তার্তঅপ ইকোসিস্তেমদা অনৌবা য়াওল পুরক্লিবা মীৎয়েঙ শানবা মীওইশিংনা য়ারিবা মমল নাইদ্রবা থৌদাংশিংবু মশক তাক্কনি‍। এন.এস.এ. অসি তোপ তোপ্পা স্তার্তঅপ অমদি স্তার্তঅপ ইকোসিস্তেমদা লৈরিবা ইনেব্লরশিংবু শকখঙদুনা মনা মথুম পীননবগী পান্দমদা হৌদোকখিবনি‍। হায়রিবা এন্তিতীশিং অসি ইনোবেসন পুরকপদা, অনৌবা পোত্থোকশিং শেমগৎপদা, অমদি মমল নাইদ্রবা খুন্নাইদা পীবা ইথিল উত্থোকপদা য়াম্না মরুওইবা থৌদাং লৌরি‍।

ইন্তরেস্ত লৈবা মীওইশিংবু নেস্নেল স্তার্তঅপ এৱার্দ্সকী ৱেবসাইত্তা চঙদুনা নৌনা শেমদোক্লবা জুন ১৫, ২০২৩গী দেদলাইন মাঙওইননা মখোয়গী এপ্লিকেসন থাজিন্নবা পুক্নিং থৌগৎলি‍।

অহেনবা অকুপ্পা ৱারোলগীদমক, https://www.startupindia.gov.in/ দা চঙবিয়ু‍।

***