ପ୍ରଧାନମନ୍ତ୍ରୀ ଆଜି (୨୯-୦୫-୨୦୨୩) ଆସାମର ପ୍ରଥମ ବନ୍ଦେ ଭାରତ ଏକ୍ସପ୍ରେସକୁ ଆଭାସୀ ମାଧ୍ୟମରେ ପତାକା ଦେଖାଇ ଯାତ୍ରାରମ୍ଭ କରିଛନ୍ତି । ବନ୍ଦେ ଭାରତ ଏକ୍ସପ୍ରେସ ଗୌହାଟୀ ସହ ନ୍ୟୁ ଜଳପାଇଗୁଡ଼ିକୁ ଯୋଡ଼ିବ ଓ ଏହାର ଯାତ୍ରା ଅବଧି ସାଢ଼େ ପାଞ୍ଚ ଘଣ୍ଟା ରହିବ । ପ୍ରଧାନମନ୍ତ୍ରୀ ମଧ୍ୟ ୧୮୨ କିଲୋମିଟର ଦୀର୍ଘ ବିଦ୍ୟୁତକରଣ ହୋଇଥିବା ରେଳପଥ ସେକ୍ସନ ଜାତି ଉଦେଶ୍ୟରେ ଉତ୍ସର୍ଗ କରିବା ସହ ଆସାମର ଲାମଡିଙ୍ଗ ଠାରେ ନବନିର୍ମିତ ଡେମୁ/ମେମୁର ମଧ୍ୟ ଉଦଘାଟନ କରିଥିଲେ ।

ସମବେତ ଜନତାଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଆଜି ଉତ୍ତର ପୂର୍ବାଞ୍ଚଳର ସଂଯୋଗୀକରଣ ଦୃଷ୍ଟିରୁ ଏକ ବିରାଟ ଦିନ । କାରଣ ଆଜି ଏକାଠି ତିନିଟି ବିକାଶ ମୂଳକ କାର୍ଯ୍ୟକ୍ରମ ସମାପିତ ହୋଇଛି । ପ୍ରଧାନମନ୍ତ୍ରୀ ବର୍ଣ୍ଣନା କରି କହିଥିଲେ ଯେ ପ୍ରଥମଟି ହେଉଛି ଉତ୍ତର ପୂର୍ବାଞ୍ଚଳ ଏହାର ପ୍ରଥମ ବନ୍ଦେ ଭାରତ ଏକ୍ସପ୍ରେସ ପାଇଛି ଓ ପଶ୍ଚିମବଙ୍ଗକୁ ତୃତୀୟ ବନ୍ଦେ ଭାରତ ଏକ୍ସପ୍ରେସ ସଂଯୋଗ କରୁଛି । ଦ୍ୱିତୀୟତଃ ଆସାମ ଓ ମେଘାଳୟରେ ପ୍ରାୟ ୪୨୫ କିଲୋମିଟର ଦୀର୍ଘ ରେଳପଥର ବିଦ୍ୟୁତକରଣ ସମ୍ପନ୍ନ ହୋଇଛି । ଏବଂ ତୃତୀୟରେ ଆସାମର ଲାମିଡିଙ୍ଗରେ ନୂତନ ଡେମୁ/ମେମୁ ସେଡ୍ ଉଦଘାଟିତ ହୋଇଛି । ଆସାମ, ମେଘାଳୟ ଓ ପଶ୍ଚିମବଙ୍ଗ ସମେତ ସମଗ୍ର ଉତ୍ତର ପୂର୍ବାଞ୍ଚଳବାସୀଙ୍କୁ ପ୍ରଧାନମନ୍ତ୍ରୀ ଏହି ଅପୂର୍ବ କ୍ଷଣ ନିମନ୍ତେ ଅଭିନନ୍ଦନ ଜଣାଇଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଗୌହାଟୀ- ନ୍ୟୁ-ଜଳପାଇଗୁଡ଼ି ବନ୍ଦେ ଭାରତ ଏକ୍ସପ୍ରେସ ଆସାମ ଓ ପଶ୍ଚିମବଙ୍ଗ ମଧ୍ୟରେ ଥିବା ଶହ ଶହ ବର୍ଷର ସମ୍ପର୍କକୁ ଆହୁରି ମଜବୁତ କରିବ । ଏହା ଯାତ୍ରାକାଳୀନ ସୁଗମତା ସହ ଛାତ୍ରଛାତ୍ରୀମାନଙ୍କ ନିମନ୍ତେ ସୁବିଧାଜନକ ହେବ ଓ ପର୍ଯ୍ୟଟନ ଓ ବ୍ୟବସାୟ ଯୋଗୁ ଅଧିକ କର୍ମନିଯୁକ୍ତି ସୁଯୋଗ ସୃଷ୍ଟି କରିବ । ଏହି ବନେ୍ଦ ଭାରତ ଏକ୍ସପ୍ରେସ ମା’ କାମାକ୍ଷା ମନ୍ଦିର, କାଜିରଙ୍ଗା ଓ ମାନସ ଜାତୀୟ ଉଦ୍ୟାନ ଓ ପବିତ୍ର ବନ୍ୟପ୍ରାଣୀ ଅଭୟାରଣ୍ୟ ସହ ସଂଯୋଗ ବୃଦ୍ଧି କରିବ । ଏହାଛଡ଼ା ମେଘାଳୟର ଶିଲଂ, ଚେରାପୁଞ୍ଜି, ଅରୁଣାଚଳ ପ୍ରଦେଶର ତାୱାଙ୍ଗ ଓ ପାସିଘାଟରେ ପର୍ଯ୍ୟଟନର ଅଭିବୃଦ୍ଧି ଘଟାଇବ ।

ନଅ ବର୍ଷର ଏନଡିଏ ସରକାର ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ସମୟ ମଧ୍ୟରେ ନବ ଭାରତ ଗଠନ ଦିଗରେ ଅଭୁତପୂର୍ବ ପରିବର୍ତ୍ତନ ହୋଇଛି । ସେ ସ୍ୱାଧୀନ ଭାରତର ଭବ୍ୟ ସଂସଦ ଭବନର ନୂତନ ଭାବେ ଉଦଘାଟନ ଉପରେ ଆଲୋକପାତ କରିବା ସହ ଏହା ହଜାର ବର୍ଷର ଗଣତାନ୍ତ୍ରିକ ଭାରତୀୟ ଇତିହାସ ସହ ଭବିଷ୍ୟତରେ ସମୃଦ୍ଧଶାଳୀ ଗଣତନ୍ତ୍ରକୁ ସଂଯୋଗ କରିବ ବୋଲି କହିଥିଲେ । ପୂର୍ବ ସରକାରଙ୍କ କାର୍ଯ୍ୟକ୍ରମ ଉପରେ ଦୃଷ୍ଟି ନିକ୍ଷେପ କରି ପ୍ରଧାନମନ୍ତ୍ରୀ କହିଥିଲେ ଯେ ୨୦୦୪ ପୂର୍ବରୁ ହେରାଫେରି ସବୁ ରେକର୍ଡ ଭାଙ୍ଗି ଦେଇଥିଲା ଓ ଏହା ଦ୍ୱାରା ଗରିବ ଓ ଅନଗ୍ରସର ହୋଇ ରହି ଯାଇଥିବା ରାଜ୍ୟଗୁଡ଼ିକ ବିକାଶ ଦୃଷ୍ଟିରୁ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଥିଲେ ।

“ଆମ ସରକାର ଗରୀବ କଲ୍ୟାଣକୁ ପ୍ରାଥମିକତା ଦେଉଛି” ବୋଲି କହି ପ୍ରଧାନମନ୍ତ୍ରୀ ଘର, ଶୌଚାଳୟ, ଟ୍ୟାପ ଯୋଗେ ପାଣି, ବିଦ୍ୟୁତ, ଗ୍ୟାସ ପାଇପ ଲାଇନ, ଏମ୍ସର ବିକାଶ, ସଡ଼କ, ରେଳପଥ, ବିମାନପଥ, ଜଳପଥ, ବନ୍ଦର ଓ ମୋବାଇଲ ସଂଯୋଗ ଇତ୍ୟାଦିର ଉଦାହରଣ ଦେଇଥିଲେ । ଏହି ସବୁ ଲକ୍ଷ୍ୟ ହାସଲ ପାଇଁ ସରକାର ପୂରା ଦମରେ କାର୍ଯ୍ୟ କରିଛନ୍ତି । ଭିତ୍ତିଭୂମିର ବିକାଶ ଯୋଗୁ ଜନସାଧାରଣଙ୍କ ଜୀବନଧାରଣ ସହଜ ହେବା ସହ ଏହା ନିଯୁକ୍ତି ସୁଯୋଗ ସୃଷ୍ଟି କରି ବିକାଶର ମୂଳଦୁଆ ସ୍ଥାପନ କରିଛି । ଭାରତର ଭିତ୍ତିଭୂମି ବିକାଶର ଗତି ଆଜି ବୈଶ୍ୱିକ ଚର୍ଚ୍ଚାର ବିଷୟ ପାଲଟିଛି ବୋଲି ଶ୍ରୀ ମୋଦୀ କହିଥିଲେ । ଏହି ଭିତ୍ତିଭୂମି ବିକାଶ ଗରୀବ ଓ ଅନଗ୍ରସରଙ୍କୁ ସଶକ୍ତ କରିବା ସହ ଦଳିତ, ଆଦିବାସୀ ଓ ସମାଜର ଅନ୍ୟାନ୍ୟ ବଂଚିତ ଜନସାଧାରଣଙ୍କୁ ମଧ୍ୟ ସଶକ୍ତ କରିଛି । “ଭିତ୍ତିଭୂମି ସମସ୍ତଙ୍କ ପାଇଁ, ଏଥିରେ କୌଣସି ବାଛ ବିଚାର ନାହିଁ” ବୋଲି ପ୍ରଧାନମନ୍ତ୍ରୀ କହିବା ସହ ଏହା ହିଁ ପ୍ରକୃତ ସାମାଜିକ ନ୍ୟାୟ ଓ ଧର୍ମନିରପେକ୍ଷତା ବୋଲି କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଏହି ଭିତ୍ତିଭୂମି ବିକାଶର ସବୁଠାରୁ ଅଧିକ ସୁବିଧା ପାଇଛନ୍ତି ଭରାତ ପୂର୍ବାଞ୍ଚଳ ଓ ଉତ୍ତର ପୂର୍ବାଞ୍ଚଳର ଜନସାଧାରଣ । ଉତ୍ତର ପୂର୍ବାଞ୍ଚଳର ଜନସାଧାରଣ ଦଶନ୍ଧି ଦଶନ୍ଧି ଧରି ଏପରିକି ମୌଳିକ ଆବଶ୍ୟକତାରୁ ମଧ୍ୟ ବଞ୍ଚôତ ଥିଲେ । ଅନେକ ଗ୍ରାମ ଓ ପରିବାର ନିକଟରେ ବିଦ୍ୟୁତ, ଟେଲିଫୋନ ଓ ସଡ଼କ ଓ ବିମାନ ଯୋଗାଯୋଗ ନଅ ବର୍ଷ ଆଗରୁ ନ ଥିଲା ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ ସେ ଅଞ୍ଚଳରେ ରେଳ ସଂଯୋଗ ଏକ ସେବା ମନୋଭାବର ଉଦାହରଣ ସୃଷ୍ଟି କରାଇଲେ । ଉତ୍ତର ପୂର୍ବାଞ୍ଚଳରେ ରେଳ ସଂଯୋଗୀକରଣ ସରକାରଙ୍କ ଦ୍ରୁତ ଗତି, ଅଭିପ୍ରାୟର ଏକ ପ୍ରମାଣ ବୋଲି ସେ କହିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଏପରିକି ଉପନିବେଶ କାଳରେ ମଧ୍ୟ ଆସାମ, ତ୍ରିପୁରା ଓ ବଙ୍ଗଳାକୁ ରେଳ ସଂଯୋଗ ପ୍ରାକୃତିକ ସମ୍ପଦ ଲୁଟ୍ ପାଇଁ ଥିଲା । ମାତ୍ର ସ୍ୱାଧୀନତା ପରେ ଏ ଅଞ୍ଚଳରେ ରେଳ ସମ୍ପ୍ରସାରଣକୁ ଉପେକ୍ଷା କରାଗଲା ଓ ୨୦୧୪ ପରେ ଏ ସରକାରଙ୍କ ଉପରେ ଏହା ନ୍ୟସ୍ତ ହେଲା । ଶ୍ରୀ ମୋଦୀ କହିଥିଲେ ଯେ ସେ ଉତ୍ତର ପୂର୍ବାଞ୍ଚଳ ଜନସାଧାରଣଙ୍କ ସମ୍ବେଦନଶୀଳତା ଓ ସୁବିଧାକୁ ସବୁବେଳେ ଅଗ୍ରାଧିକାର ଦେଇଥାନ୍ତି । ଏହି ପରିବର୍ତ୍ତନ ସବୁଆଡ଼େ ଅନୁଭୂତ ହୋଇଛି । ସେ କହିଥିଲେ ଯେ ୨୦୧୪ ପୂର୍ବରୁ ଉତ୍ତର ପୂର୍ବାଞ୍ଚଳ ନିମନ୍ତେ ହାରାହାରି ରେଳ ବଜେଟ ପରିମାଣ ୨୫୦୦ କୋଟି ଥିବାବେଳେ ଚଳିତ ବର୍ଷ ଏହା ଦଶ ହଜାର କୋଟି ଟଙ୍କାକୁ ବୃଦ୍ଧି ପାଇଛି । ବର୍ତ୍ତମାନ ମଣିପୁର, ମିଜୋରାମ, ନାଗାଲାଣ୍ଡ ଓ ସିକିମ ଅବଶିଷ୍ଟ ଭାରତ ସହ ସଂଯୋଗ ହୋଇ ପାରିଛି । “ଖୁବଶୀଘ୍ର ଉତ୍ତର-ପୂର୍ବାଞ୍ଚଳର ଅନ୍ୟାନ୍ୟ ରାଜଧାନୀଗୁଡ଼ିକ ଓସାରିଆ ରେଳପଥ ଦ୍ୱାରା ସଂଯୁକ୍ତ ହେବ” ବୋଲି ସେ କହିଥିଲେ । “ଏହିସବୁ ପ୍ରକଳ୍ପ ନିମନ୍ତେ ଏକ ଲକ୍ଷ କୋଟି ଟଙ୍କା ଖର୍ଚ୍ଚ ହେଉଛି ।”

“ସରକାରଙ୍କ ବିକାଶମୂଳକ କାର୍ଯ୍ୟର ଆକାର ଓ ଗତି ବୃଦ୍ଧି ଅସ୍ୱାଭାବିକ”ହୋଇଥିବା ବେଳେ ଆଗ ଅପେକ୍ଷା ଉତ୍ତର ପୂର୍ବାଞ୍ଚଳରେ ନୂତନ ରେଳପଥ ବିସ୍ତାର ତିନିଗୁଣ ଅଧିକ ହୋଇଛି । ଓସାରିଆ ରେଳପଥ ବିସ୍ତାର ନଅଗୁଣ ବୃଦ୍ଧି ପାଇଛି । ଗତ ନଅ ବର୍ଷ ମଧ୍ୟରେ ରେଳପଥ ଦୋହରୀକରଣ ଗତି ଆରମ୍ଭ ହୋଇଥିବା ବେଳେ ସରକାର ଦ୍ରୁତ ଗତିରେ ଏହା ସମ୍ପୂର୍ଣ୍ଣ କରିବାକୁ ଲାକ୍ଷ୍ୟ ରଖିଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ ।

ଉତ୍ତର ପୂର୍ବାଞ୍ଚଳର ଅନେକ ଦୂରଦୂରାନ୍ତ ଅଞ୍ଚଳରେ ସଂଯୋଗ ଦ୍ରୁତ ଗତିରେ ରେଳ ବିକାଶ ଯୋଗୁ ସମ୍ଭବ ହୋଇଛି । ପ୍ରାୟ ଶହେ ବର୍ଷ ପରେ ନାଗାଲାଣ୍ଡ ଏହାର ଦ୍ୱିତୀୟ ରେଳପଥ ପାଇଛି । ବର୍ତ୍ତମାନ ବନେ୍ଦ ଭାରତ ସେମି ହାଇସ୍ପିଡ୍ ଟ୍ରେନ ଓ ତେଜସ ଏକ୍ସପ୍ରେସ ସେ ରାସ୍ତାରେ ଗତି କରୁଛି ଯେଉଁଠି ଆଗରୁ କେବଳ କମ୍ ଗତିରେ ଯାତ୍ରା କରିପାରୁଥିବା ଅଣଓସାର ରେଳପଥ ଥିଲା । ପର୍ଯ୍ୟଟକମାନଙ୍କ ନିମନ୍ତେ ରେଳବାଇର ଭିଷ୍ଟା ଡୋମ କୋଚ ଏବେ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି ବୋଲି ଶ୍ରୀ ମୋଦୀ କହିଥିଲେ ।

“ଭାରତୀୟ ରେଳବାଇ ବର୍ତ୍ତମାନ ଗତି ସହ ଜନମାନସର ହୃଦୟ, ସମାଜ ଓ ସୁଯୋଗକୁ ସଂଯୋଗ କରିବାର ମାଧ୍ୟମ ପାଲଟିଛି । ଗୌହାଟୀ ରେଳ ଷ୍ଟେସନରେ ପ୍ରଥମ ଉଭୟଲିଙ୍ଗ ଚା’ଷ୍ଟଲ ଆରମ୍ଭ ହୋଇଥିବା ସେ କହିଥିଲେ। ଯେଉଁମାନେ ସମାଜରୁ ସମ୍ମାନ ଓ ଭଲ ବ୍ୟବହାର ଆଶା କରିଥାନ୍ତି ସେମାନଙ୍କୁ ଏହି ସମ୍ମାନ ଦେବାକୁ ଚେଷ୍ଟା କରାଯାଉଛି” ବୋଲି ସେ କହିଥିଲେ । ‘ୱାନ ଷ୍ଟେସନ, ୱାନ ପ୍ରଡକ୍ଟ’ ଯୋଜନାରେ ଉତ୍ତର ପୂର୍ବାଞ୍ଚଳ ରେଳ ଷ୍ଟେସନରେ ଷ୍ଟଲମାନ ସ୍ଥାପନ କରାଯିବା ଯୋଗୁ ସ୍ଥାନୀୟ ଜନସାଧାରଣ ସ୍ଥାନୀୟ ସାମଗ୍ରୀ ବିକ୍ରି କରିବାର ସୁଯୋଗ ପାଉଛନ୍ତି । “କେବଳ ଗତି ଓ ସମ୍ବେଦନଶୀଳତା ଜରିଆରେ ଉତ୍ତର ପୂର୍ବାଞ୍ଚଳ ପ୍ରଗତି ପଥରେ ଅଗ୍ରସର ହୋଇ ଏକ ବିକଶିତ ଭାରତର ରାସ୍ତା କାଢ଼ିପାରିବ” ବୋଲି ସେ କହିଥିଲେ ।

ପୃଷ୍ଠଭୂମି:-

ଅତ୍ୟାଧୁନିକ ବନ୍ଦେ ଭାରତ ଏକ୍ସପ୍ରେସ ସେ ଅଞ୍ଚଳର ଜନସାଧାରଣଙ୍କୁ ଦ୍ରୁତ ଓ ଆରାମଦାୟକ ସୁବିଧା ଦେଇପାରିବ । ଏହା ମଧ୍ୟ ଆଞ୍ଚଳିକ ପର୍ଯ୍ୟଟନକୁ ପ୍ରୋତ୍ସାହନ ଦେବ । ଗୌହାଟୀରୁ ନ୍ୟୁ-ଜଳପାଇଗୁଡ଼ି ସଂଯୋଗ ଫଳରେ ଯାତ୍ରା ଅବଧି ଏକ ଘଣ୍ଟା ହ୍ରାସ ପାଇବ । ବର୍ତ୍ତମାନ ଦ୍ରୁତଗାମୀ ଟ୍ରେନରେ ଏହା ସାଢ଼େ ଛଅ ଘଣ୍ଟା ଲାଗୁଥିବା ବେଳେ, ବନ୍ଦେ ଭାରତ ଏକ୍ସପ୍ରେସରେ ସାଢ଼େ ପାଞ୍ଚ ଘଣ୍ଟା ଲାଗିବ ।

ପ୍ରଧାନମନ୍ତ୍ରୀ ମଧ୍ୟ ୧୮୨ କିଲୋମିଟର ଦୀର୍ଘ ନୂତନ ବିଦ୍ୟୁତକରଣ ରେଳପଥକୁ ଜାତି ଉଦେଶ୍ୟରେ ଉତ୍ସର୍ଗ କରିଥିଲେ। ଏହା ଦ୍ୱାରା ଟ୍ରେନ ଦ୍ରୁତ ଗତିରେ ଯାତ୍ରା କରିବା ସହ ପ୍ରଦୂଷଣମୁକ୍ତ ରହିବ ଓ ଯାତ୍ରାର ଅବଧି ହ୍ରାସ ପାଇବ । ଏହା ଫଳରେ ଟ୍ରେନ ମେଘାଳୟକୁ ଯାତ୍ରା କରିବା ସୁଗମ ହେବ ।

ପ୍ରଧାନମନ୍ତ୍ରୀ ମଧ୍ୟ ନୂତନ ସଡ଼କ ନିର୍ମିତ ଡେମୁ/ମେମୁ ସେତକୁ ଆସାମର ଲାମଡିଙ୍ଗ ଠାରେ ଉଦଘାଟନ କରିଛନ୍ତି । ଏହି ନୂତନ ସୁବିଧା ଡେମୁ ରେଳ ରକ୍ଷଣାବେକ୍ଷଣ ଦିଗରେ ସହାୟକ ହେବ ।

SM/MB