শেলথুম অমদি কোর্পোরেৎ এফ্যার্সকী কেন্দ্র মন্ত্রী, শ্রীমতী নির্মলা সিতরমন্না ঙসি বিজ্ঞান ভবনগী প্লেনরী হোলদা পাঙথোকখিবা নেস্নেল কনক্লেব ওন ৯-ইয়র্স ওফ দী গভর্নমেন্তকী লোইশিনবগী থৌরমদা অথোইবা মীথুং ওইনা শরুক য়াখ্রে‍। ঙসি ঙল্লিঙৈদা রেলৱেজকী কেন্দ্র মন্ত্রী শ্রী অস্বিনি বৈষ্ণবনা হৌদোকখিবা থৌরমদুদা থীমেতিক সেসন অহুম পাঙথোক্তুনা তোঙান তোঙানবা লমশিংদগী পেনেলিস্তশিংনা মখোয়গী ৱাখল্লোনশিং ফোঙদোক্নখি অমদি ‘য়ুবা শক্তি’গা ৱারী ৱাতায় শানখি‍।

লোইশিনবগী থৌরমদুদা ইনফোর্মেসন অমদি ব্রোদকাস্তিংগী কেন্দ্র মন্ত্রী শ্রী অনুরাগ থাকুর, ইনফোর্মেসন অমদি ব্রোদকাস্তিংগী কেন্দ্রগী রাজ্য মন্ত্রী দোক্তর এল মুরুগন, আই.বি. মন্ত্রালয়গী সেক্রেতরী শ্রী অপুর্ব চন্দ্র অমদি প্রসার ভারতী সি.ই.ও. শ্রী গৌরব দ্বিবেদীসু শরুক য়াখি‍।

অথোইবা মীথুং অমদি অতৈ শরুক য়াখিবশিংবু তরাম্না ওক্লদুনা, শ্রী অনুরাগ থাকুরনা ভারতকী শক্তম হৌখিবা দেকেদ অসিদা অওন্বা লাক্লি হায়খি‍। নহাশিংনা মখোয়গী তুংগী লম্বী উবা ঙম্লিবসি মতিং লৈবা লুচিংবা অমদি লৈঙাক্কী অফবা খুজিল থৌরাংগী ফিরেপশিংনা ঙমহনবনি হায়না মহাক্না হায়খি‍। মহাক্না লৈবাকসিনা চহি ৯গী মমাঙদা থেংনখিবা শিংনবশিংগী মতাঙদা মীপুম খুদিংমক্কী পুক্নিং চিংশিনখি‍। “অদুবু চহি ৯গী মতুংদা, ভারত তুরোই ঙাম্লোই চৎপা শেন্মিৎলোন ওইদ্রে অমদি খ্বা্য়দগী খোঙজেল য়াঙনা চেনখৎলক্লিবা শেন্মিৎলোন ওইরক্তুনা ব্রিতিস ইকনমীবুসু তুংওইনরম্লগা ৫শুবা খ্বায়দগী চাউবা শেন্মিৎলোন ওইরে,” হায়না মহাক্না মখা তাখি‍।

মন্ত্রীনা মতৌ কমদৌনা প্রধান মন্ত্রীগী খোল্লাউ ‘জান হে তো জহান হে’ অমদি ‘জান ভি, জহান ভি’ পরিংদা কোবিদ-১৯ লাইচৎপু কেন্দ্র লৈঙাক্না থেংনখিবগে হায়বগী মতাংদা নৌহৌননা নীংশিংখি‍। “কোবিদ ভেক্সিন পুথোক্নবা সাইন্তিস্তশিং এঙ্গেজ তৌখি‍। অমখক্তা নত্তনা কোবিদ ভেক্সিন অনি শেমখি অমদি কোবিদ ভেক্সিন দোজ কর,র ২২০লোম মীয়ামদা লেম্না ফংহনখি,” হায়বা ৱাফম মহাক্না থমখি‍।

মরুওইনা কোবিদ-১৯ লাইচৎকী মতমদা লৈঙাক অসিনা ফুদ সিক্যুরিতী লৈহন্নবা হোৎনখিবশিং পল্লদুনা, মন্ত্রীনা মীওই করোর ৮০দা থা ২৮ চুপ্না চাননবা চেঙ হৱায় লেম্না ফংহনখি অমদি হীরম অসিদা লৈঙাক্না লুপা করোর লাখ ৪রোম চাদিং তৌখি হায়খি‍। লাইচৎ মনুংদা বিজিনেসশিংনা থেংনখিবা শিংনবশিং থেংননবগীদমক, ইমর্জেন্সী ক্রেদিৎ লাইন গরেন্তীনচিংবা তোঙান তোঙানবা স্কীমশিং হৌদোক্তুনা বিজিনেসশিং হিংহনবখক নত্তনা হৌজিক মপুং মরৈ ফানা লৈবা ঙম্লি‍। লৈঙাক অসিনা স্তার্তঅপ ইকোসিস্তেমদা পীরিবা মরুওইবা মীৎয়েঙগী মরমদা পল্লদুনা, লৈবাকসিদা য়ুনিকোর্ন ১০০ য়াওনা স্তার্তঅপ লাখ ১ লৈদুনা ভারতনা মালেমগী ৩শুবা খ্বায়দগী চাউবা স্তার্তঅপ ইকোসিস্তেম লৈদুনা চাউথোক্না লেপ্লি হায়না মহাক্না মখা তাখি‍।

শ্রী অনুরাগ থাকুরনা হৌখিবা চহি ৯ সিদা লৈঙাক্না রেকোর্দ ওইনা ফংবা ঙমখ্রবশিং পুথোকখি অমদি লৈঙাক অসিনা দিজিতেল তেক্নোলোজীগী খুত্থাঙদা ত্রান্সপেরেন্সী অমদি একাউন্তেবিলিতী লৈহনবতা নত্তনা বিনিফিসরী করোর ৩.৫দা পক্কাগী য়ুম ফংহল্লি, তোইলেৎ করোর ১২ শাখি, য়ুমথোঙ করোর ১১.৭দা তোতিগী ঈশিং ফংহনখি, নুমী করোর ৯.৬তা উজ্বলা গ্যাস কন্নেক্সন পীখি, এল.ই.দি. বল্ব করোর ১০০ হেন্না য়েন্থোকখি, হৌখিবা চহি ৯সিদা লম্বী শেম্বগী খোঙজেল শরুক মরি হেনগৎহনখি অমদি খুঙ্গং খুদিংমক্তা মৈ ফংহনখি হায়না মহাক্না হায়খি‍। পি.এম. গতী শক্তিনা ভারত্তা ফাউন্দেস্নেল ইনফ্রাস্ত্রকচর পীদুনা ‘গতী’ অমদি ‘প্রগতী’ অনিমক লৈহল্লি হায়না মহাক্না মখা তাখি‍।

মন্ত্রীনা শান্ন-খোৎনবগী বজেৎকী চাকথুং হৌখিবা চহি ৯ অসিদা লুপা করোর ৮৬৪ দগী লুপা করোর ২৭০০দা শরুক অহুম হেন্না হেনগৎলে হায়খি‍। খেলো ইন্দিয়ানচিংবা স্কীমশিংগী খুত্থাঙদা য়ুথ গেম্স, য়ুনিভর্সিতী গেম্স অমদি ৱিন্তর গেম্স পাঙথোক্তুনা শান্নরোয় ১৫,০০০ হেনবনা শরুক য়াদুনা লাক্লি‍। চহি অসিগী খেলো ইন্দিয়া গেম্সতা, অনৌবা নেস্নেল রেকোর্দ ২৫ শেমখি, মখোয়গী মনুংদা ২১দি ভারতকী মমোমশিংনা শেমখিবনি হায়না মহাক্না হায়খি‍।

শ্রী অনুরাগ থাকুরনা ভারতকী দিজিতেল পেমেন্ত ইনফ্রাস্ত্রকচরগী মতিক ময়াইবু পুথোকখি অমদি মসিবু গুগল সি.ই.ও. সুন্দর পিচাই য়াওনা মালেম পুম্বনা শিংথানখিববুসু নৌহৌননা নীংশিংখি‍। হায়রিবা চাউরবা দিজিতেল ইনফ্রাস্ত্রকচর অসিখক্তনা মরম ওইরগা নুপী করোর ২১গী বেঙ্ক একাউন্তশিংদা লুপা করোর ৩১,০০০ ত্রান্সফর তৌখ্রে হায়না মন্ত্রীনা পাউদমখি‍।

“পক্কাগী য়ুম শাবিখ্রবা য়ুমথোঙ করোর ৩.৫গী মনুংদা, ৭৫%দি নুপীশিংগী মমিংদা পানবনি,” হায়না মন্ত্রীনা মখা তাখি‍। লৈঙাক অসিনা হৱাই চপ্পল তোংবা মীসু হৱাই জহাজ তোংদুনা চৎহল্লে‍। লম্বী শেম্বদা খোঙজেল য়াংশিনবনা মরম ওইরগা তোঙান তোঙানবা ময়োল্লমশিংগী মরক্তা লৈনরিবা অরাপ্পা অমদি চৎপদা চঙবা মতম হায়নিংঙাই লৈতনা তেনশিল্লে হায়না মহাক্না ফোঙদোকখি‍।

মালেম অসিনা ভারত্তা থাজবা থম্লি অমদি লৈঙাক্কী থৌরাংগা লোয়ননা, ভারতনা ২০৪৭গী মাঙওইননা চাওখৎপা ভারত অমা ওইবগী পান্দম থংনবগী লম্বীদা চঙশিল্লি হায়বা ৱাফম ফোঙদোক্তুনা মন্ত্রীগী ৱারোল লোইশিনখি‍।

শেলথুম মন্ত্রীনা মহাক্কী ৱারোল লৈঙাক অসিনা সেবা, সুসাসন অমদি গরীব কল্য়ানগী খুত্থাঙদা পায়খৎনিংলিবা থৌরাংশিং পুথোক্লদুনা হৌদোকখি‍। প্রধান মন্ত্রী শ্রী নরেন্দ্র মোদীগী লুচিংগী মতাঙদা পল্লদুনা, শ্রীমতী সিতরমন্না, প্রধান মন্ত্রীনা হোৎনবা কনবখক্তনা মীয়ামগী থাজবা ফংবা ঙমখিবনি অমদি হায়রিবা অসিমক মীয়াম্না মহাকপু য়ারিবা অসিদা মমি তাবা ফংই হায়খি অমদি মীয়ামগী মীৎয়েঙসু হোংলে হায়না মখা তাখি‍।

মহাক্কা প্রধান মন্ত্রীনা খন্নখিবগী মতাঙদা পাউদম্লদুনা, শেলথুম মন্ত্রীনা হায়খি, “কোবিদ লাইচৎকী মিংদা ঐনৌবা তেক্স অমত্তা পুথোক্তনবা মহাক্না পাউতাক পীখি অমদি ঐখোয়না মীয়ামদগী ভেক্সিন কাপ্পদগী হৌরগা চাননবা চেঙ হৱায় য়েন্থোকপা ফাওবদা শেল অমত্তা লৌখিদে‍। মদুদা নত্তনা কোবিদ-১৯ লাইচৎ মতুংদসু তেক্স হেনগৎখিদে‍।”

রিফোর্ম্সকী মতাঙদা ৱা ঙাংলদুনা, প্রধান মন্ত্রীনা অরিবা মতমগা চুনদ্রবা লো ১,৫০০ লৌথোক্তুনা রিফোর্মশিং লেপ্তনা পুরক্নবা পুক্নিং থৌগৎখি অমদি অসিগুম্বা লোশিং অসিনা মীয়ামদা ওৎনবা অমদি শেঞ্জা থুমজা তৌনবগী খুৎলায় ওইহন্দবা পাউতাক পীখি হায়না শ্রীমতি সিতরমন্না হায়খি‍।

গুদ্স এন্দ সর্ভিস তেক্স (জি.এস.তি.) রেজিমগী মখাদা লৈরিবা ৱন নেসন, ৱন তেক্সকী খুদম পীরদুনা, লৈঙাক অসিনা স্তেত পুম্নমক য়াওহন্দুনা অচৌবা লেজিসলেসন পুরকপখক নত্তনা মীচম অমদি বিজিনেসশিংদা ইজ ওফ লিভিং ফংহন্নবগীদমক মপাঙ্গল কনবা জি.এস.তি.গী সিস্তেম অমসু শেমখি হায়না শেলথুম মন্ত্রীনা হায়খি‍।

নুপীশিংগী শাফবগী মতাঙদা পল্লদুনা, প্রধান মন্ত্রীনা মহাক্কী নীংতম নুমিৎকী ৱারোলদা লাল কিলাদগী নুপীশিং শাফনা থম্বগী মতাঙদা ৱা ঙাংখি হায়না শেলথুম মন্ত্রীন হায়খি‍। “প্রধান মন্ত্রীনা নুপীমচা কয়ানা সেনিতরী পেদ ৱাৎপনা মরম ওইরগা মশাদা ফরোইদবা থৌওং কয়া চত্থবগী মতাঙদখক নত্তনা, মহাক্না হায়রিবা পোৎলমশিং অদু অহোঙবা মমলদা লুপা ১গী চাংদা ফংহন্নবা ৱাফমসু থমখি‍। হায়রিবশিং অসি মীৎয়েঙ হোংবগী অপীকপা ৱাফম নত্তে,” হায়ন শেলথুম মন্ত্রীনা হায়খি‍।

স্তার্ত-অপ ইকোসিস্তেমগী মতাঙদা পল্লদুনা, শ্রীমতী সিতরমন্না মমাঙদদি চীং লেম্না বিজিনেস থুপচিনবসি খুন্নাইনা হন্থনা য়েংবিরম্মি অদুবু ইনসোলভেন্সী এন্দ বেঙ্করপ্তসী কোদ (আই.বি.সি.) পুথোরকপদগী নহাশিংনা বিজিনেস অমা হৌজবা য়ারে, অদুগা মায় পাকপা ঙমদ্রবদি, চীং লেম্না থুপচিঞ্জবা য়ারে হায়খি‍।

আর্ম্দ ফোর্সেসতা চাউনা অহোংবা পুরক্লিবসিগী মতাঙদা ৱা ঙাংলদুনা, শ্রীমতী সিতরমন্না মমাঙদদি পর্মেনেন্ত কক্মিসন নুপাশিংখক্তদা ফংহলম্মি অদুবু প্রধান মন্ত্রীনা পাউতাক মতুং ইন্না সেক্তর অসি নুপীশিংগীদমক্তসু হাংদোক্লে; মতৌ অসুম্না আর্মী, নেভী, এয়র ফোর্স অমদি কোস্ত গার্দ ফাওবদা ফ্রন্ত লাইন্দা পর্মেনেন্ত কম্মিসন ফংনবগী মখোয়গী অপাম্বশিং ফংহল্লে হায়খি‍।

হায়রিবা খুদম পুম্নমকসিনা চাউনা অহোংবা পুরকপা তাক্লি, হায়না হায়রদুনা শ্রীমতী সিতরমন্না হায়খি “হায়রিবা অহোংবশিং অসি লুচিংবনা স্তেকহোল্দর পুম্নমক্কা লোয়ননা মখোয়গী মীৎয়েঙ হোংননবা থবক তৌরকপদগী ওইথোক্লিবনি‍। ভারত য়াম্না লুবা লৈবাক্নি অমদি ফিরেপ লৌবসি তোঙান তোঙানবা মরোল অমদি থাকশিং লান্দুনা চৎলি‍।”

য়ুক্রেন, য়িমেন অমদি সুদান্দা পন্দুনা লৈবা মহৈরোয়শিং হোন্দোরকপগী খুদম পীরদুনা, শ্রীমতী সিতরমন্না হায়খিবদা লৈঙাক অসিনা ভারতকী মপান্দা লৈরিবা মীয়ামগী মীৎয়েঙদা অহোংবা পুরক্লি, ভারতকী ইন্তরেস্তপু মাঙদা পুখৎপা ফিরেপ চেৎপা অমদি কত্থোক্লবা লৈঙাক অমগী শক্লোন উৎলি‍। “মসিনা উৎলি মদুদি প্রধান মন্ত্রীনা মীপুম খুদিংবু লূম্না লৌই; মীপুম খুদিংমক্কী ৱা তায় অমদি মীপুম খুদিংমক্কী পাউখুম পী,” হায়না শেলথুম মন্ত্রীনা মখা তাখি‍।

****