এক্সিলেন্সীশিং,

অহুমশুবা এফ.আই.পি.আই.সি. সম্মিৎতা ময়ামবু তরাম্না ওকচরি! প্রধান মন্ত্রী জেমস মারাপেনা ঐহাক্কা লোয়ননা সম্মিৎ অসিদা পুন্না ময়াই তাংবল লৌবা ফংজবদা নুংঙাইবা পোকই। মহাক অমসুং মহাক্কী তীমনা পোর্ত মোর্সবীদা সম্মিৎ অসিগীদমক শিনবী লাংবীরম্বগীদমক ঐহাক্না তৌবীমল খঙবা উৎচরি।

এক্সিলেন্সীশিং,

হন্দক্তি ঐখোয়না মতম কুইরবগী তুংদা উন্নরি। মরক অদুদা মালেমনা কোবিদ লাইচৎ অমসুং অতোপ্পা শীংনবা কয়াগী অৱাবা মতম অমা মায়োক্নখি। শীংনবশিং অসিগী শাফু অসি গ্লোবেল সাউথকী লৈবাক অয়াম্বনা থেংনখি।

ক্লাইমেৎ চেঞ্জ, মহৌশাগী খুদোংথিবা, চাবা ফংবা, লায়রবা অমসুং তোঙান-তোঙানবা হকশেলগা মরী লৈনবা শীংনবশিং হন্নদগী লৈখি। হৌজিক অনৌবা সমস্যাশিং থোরক্লি। চীঞ্জাক তাও, হার অমসুং ফার্মাক্যুতিকেল্সকী সপ্লাই চেন্দা অপনবশিং থোরক্লি।

ঐখোয়না থাজখিবা মীওইশিং অদুনা তেংবাং পীগদবা মতমদা ঐখোয়গীদমক লেপ্পীখিদে। অৱাবা মতম অসিগী মনুংদা, অরিবা মতমদগী হায়ন্দুনা লাকখিবা ৱাফম অমা চুম্মি তাকখি: “অৱাবা তারবা মতমদা লেপ্পীবা মরুপ অদু তশেংবা মরুপনি”।

ভারতনা অৱাবা তারবা মতমদা মাগী পেসিফিক আইলেন্দ মরুপশিংগীদমক লেপখিবদা ঐহাক্না নুংঙাইবা পোকই। ভেক্সিন নত্ত্রগা তঙাই ফদবা হীদাক-লাংথকশিং, গেহু নত্ত্রগা চিনি ওইরবসু ভারতনা মাগী মতিক ময়াইগী মতুং ইন্না মপাং ওইরিবা লৈবাক পুম্নমক্তা মতেং পাংলি।

এক্সিলেন্সীশিং,

ঐহাক্না মমাংদা হায়খ্রে ঐহাক্কী ওইনদি নখোয় অপীকপা আইলেন্দ স্তেৎশিং নত্তে অচৌবা ওসিন কন্ত্রীশিংনি। অচৌবা সমুদ্র অসিনা ভারতকা নখোয় পুম্নমক্কা শম্নহল্লি। ভারতকী ফিলোসোফীনা মালেমবু ইমুং অমা ওইনা মতম চুপ্পদা উদুনা লাকখি।

ঐখোয়গী হৌজিক চত্থরিবা চহি অসিগী জি-২০ প্রসিদেন্সীগী থিম অসি ৱাখল্লোন অসিদা য়ুম্ফম ওইরিবা ‘ৱান আর্থ, আন ফেমিলী, ৱান ফ্যুচর’না ওইরি।

চহি অসিগী জনুৱারীদা ঐখোয়না ভোইস ওফ গ্লোবেল সাউথ সম্মিৎ পাঙথোকখি, মসিদা নখোয়গী মীহুৎশিংনা শরুক য়াখি অমসুং মখোয়গী ৱাখল্লোনশিং শিয়র তৌখি। মসিগীদমক ঐহাক্না অদোমবু থাগৎচরি। ভারতনা জি-২০ প্লেৎফোর্মগী খুত্থাংদা মালেমদা গ্লোবেল সাউথকী সমস্যাশিং, অপাম্বা অমসুং অনীংবশিং য়ৌহনবগী থৌদাং লৈ হায়না লৌই।

এক্সিলেন্সীশিং,

হৌখিবা নুমিৎ নিনি অসিদা ঐহাক্না জি-৭ আউৎরীচ সম্মিৎতা চপ মান্ননা হোৎনখি। হিস এক্সিলেন্সী মার্ক ব্রাউন্দ, মফম অদুদা পেসিফিক আইলেন্দ ফোরমগী মীহুৎ ওইনা লাকখিবা অসিনসু মসিবু এতেস্ত তৌবা য়াগনি।

এক্সিলেন্সীশিং,

ক্লাইমেৎ চেঞ্জকী সমস্যাশিংদা ভারতনা অচৌবা পান্দমশিং থমখি অমসুং মখোয়গী মাইকৈদা ঐখোয়না খোঙজেল য়াংনা থবক পাইখৎলিবা অসিদা ঐহাক্না নুংঙাইবা পোকই।

মমাং চহিদা ঐহাক্না য়ু.এন. সেক্রেতরী-জেনরেলগা লোয়ননা মিসন লাইফ –লাইফস্তাইল ফোর এনভাইর্নমেন্ত হৌদোকখি। ময়াম্না খোঙজং অসিদা য়াওশিনবা ঐহাক্না পাম্মি।

ভারতনা ইন্তর্নেস্নেল সোলর এলাইন্স অমসুং সি.দি.আর.আই.গুম্বা থৌশিলশিং পাইখৎখি। ঐহাক্না খঙই নখোয় অয়াম্বনা সোলর এলাইন্স য়াওই। নখোয়না সি.দি.আর.আই. প্রোগ্রামসু কান্নৈ হায়বা খঙগনি হায়না ঐহাক্না থাজৈ। থৌরম অসিদা ঐহাক্না পুম্নমকপু থৌশিলশিং অসিদা য়াওশিন্নবা বর্তন তৌজরি।

এক্সিলেন্সীশিং,

ফুদ সেক্যুরিতীদা মরু ওইবা মীৎয়েং চংদুনা ঐখোয়না ন্যুত্রিসন অমসুং এনভাইর্নমেন্তেল কঞ্জর্বেসন্দা মীৎয়েং চংখি। ২০২৩বু য়ু.এন.না ইন্তর্নেস্নেল ইয়র ওফ মিল্লেৎস হায়না লাউথোকখি। ভারতনা সুপরফুদ অসিদা “শ্রী অন্ন” হায়বগী মীংথোন পীখি।

মখোয়বু থাবদা ঈশিং য়াম্না চংদে অমসুং মচি য়াম্না ওই। ঐহাক্না থাজৈ মিল্লেৎনা নখোয়গী লৈবাকশিংদসু সস্তেনেবল ফুদ সেক্যুরিতী লৈহনবদা চাউনা শরুক তম্বা ঙমগনি।

এক্সিলেন্সীশিং,

ভারতনা নখোয়না মরু ওইনা লৌরিবশিংবু ইকাই খুম্নৈ। নখোয়গী চাউখৎ খোঙচৎকী মপাং ওইবা ফংজবদা চাউথোকচবা পোকই। হ্যুমেনিতরিয়ন এসিস্তেন্ত নত্ত্রগা নখোয়গী চাউখৎ-থৌরাং ওইরবসু নখোয়না ভারতপু থাজবা য়াবা মপাং অমা ওইনা লৌবা য়াগনি। ঐখোয়গী ৱাখল্লোন অসি হ্যুমেন ভেল্যুশিংদা য়ুম্ফম ওই।

পালৌদা লৈবা কনভেন্সন সেন্তর; নৌরুদা লৈবা ৱেস্ত মেনেজমেন্ত প্রোজেক্ত, ফিজিদা লৈবা সীদস ফোর সাইক্লোন-এফেক্তেদ ফার্মরস; অমসুং কিরিবাতিগী সোলর লাইৎ প্রোজেক্ত।

পুম্নমক অসি চপ মান্নবা ৱাখল্লোন্দা য়ুম্ফম ওই।

নীংহন্নবা লৈতনা ঐখোয়না অদোমদা ঐখোয়গী কেপাবিলিতিশিং অমসুং এক্সপরিয়েন্সশিং শিয়র তৌনবা শেম-শাদুনা লৈ।

দিজিতেল তেক্নোলোজী নত্ত্রগা স্পেস তেক্নোলোজী ওইরবসু; হেল্থ সেক্যুরিতী নত্ত্রগা ফুদ সেক্যুরিতী ওইরবসু; ক্লাইমেৎ চেঞ্জ নত্ত্রগা এনভাইর্নমেন্তেল কঞ্জর্বেসন ওইরবসু; ঐখোয়না হীরম খুদিংমক্তা নখোয়গীদমক লেপ্পী।

এক্সিলেন্সীশিং,

নখোয়না মলতিলেতরেলিজমদা থাজবা থম্মিবা অদু ঐখোয়নসু থম্মি। ঐখোয়না ফ্রী, ওপন অমসুং ইনক্লুসিন ইন্দো-পেসিফিক অমা ওইহন্নবা সপ্পোর্ত তৌই। ঐখোয়না লৈবাক পুম্নমক্কী সোবরেন্তী অমসুং ইন্তিগ্রিতীবু ইকাই খুম্নৈ।

গ্লোবেল সাউথকী ভোইস অসি য়ু.এন. সেক্যুরিতী কাউন্সিলদা খঙহনগদবনি। মসিগীদমক ইন্তর্নেস্নেল ইন্সতিত্যুসনশিংদা রিফোর্ম পুরকপা অসি – ঐখোয়গী অপুনবা থৌদাং ওইগদবনি।

ঐহাক্না ক্বাদকী শরুক ওইনা ওস্ত্রেলিয়া, য়ুনাইতেদ স্তেৎস, অমসুং জপানগা খন্ন-নৈনখি। দাইলোগ অসিনা ইন্দো-পেসিফিক রিজন্দা অখন্ননা মীৎয়েং চংখি। ক্বাদ মীফমদা ঐখোয়না পালৌদা রেদিও এক্সেস নেৎৱার্ক (আর.এ.এন.) লিংখৎনবা ৱারেপ লৌখি। প্লুরিলেতরেল ফোর্মেৎ অমদা ঐখোয়না পেসিফিক আইলেন্দ লৈবাকশিংগা লোয়ননা পার্তনরশিপ ফগৎহনগনি।

এক্সিলেন্সীশিং,

ফিজিগী য়ুনিভর্সিতী ওফ সি সাউথ পেসিফিক্তা সস্তেনেবল কোস্তেল এন্দ ওসীন রিসর্চ ইন্সতিত্যুত (এস.সি.ও.আর.আই.) লিংখৎলে তাবদা ঐহাক্না নুংঙাইবা পোকই। ইন্সতিত্যুত অসিনা পেসিফিক আইলেন্দ লৈবাকশিংগী বিজনগা লোয়ননা সস্তেনেবল দিবেলপমেন্তদা ভারতকী এক্সপরিয়েন্সশিংগা কন্নেক্ত তৌরগনি।

রিসর্চ অমসুং দিবেলপমেন্তগী মথক্তা মসিনা ক্লাইমেৎ চেঞ্জকী শীংনবশিং কোকহনবদসু কান্নগনি। ঙসি এস.সি.ও.আর.আই. অসি লৈবাক ১৪গী প্রজাশিংগী য়াইফনবা, খুমাং চাউশিন্নবা অমসুং চাউখৎনবা কত্থোকপদা ঐহাক্না নুংঙাইবা পোকই।

মতৌ অসুম্না, নেস্নেল অমসুং হ্যুমেন দিবেলপমেন্তগীদমক স্পেস তেক্নোলোজীগী ৱেবসাইৎ লোঞ্চ তৌরিবা অসিদা ঐহাক্না নুংঙাইবা পোকই। মসিগী খুত্থাংদা অদোম্না ইন্দিয়ন সেতলাইৎ নেৎৱার্ক্তগী নখোয়গী লৈবাক্কী রিমোৎ সেন্সিং দেতা দাউনলোদ তৌদুনা মদুবু নখোয় নশাগী লৈবাক্কী চাউখৎ-থৌরাংগী পোরমশিং য়াৎপদা শীজিন্নবা য়াগনি।

এক্সিলেন্সীশিং,

নখোয়গী ৱাখল্লোনশিং তানবা ঐহাক্না হৌজিক খৌরাংনা ঙাইজরি। অমুক হন্না ঐহাক্না ঙসিগী সম্মিৎ অসিদা শরুক য়ারিবা পুম্নমকপু হন্না-হন্না থাগৎচরি।

খঙহঞ্জবা – মসি প্রধান মন্ত্রীগী ৱারোলগী চাউরাকপা ৱাহন্থোকনি। তশেংবা ৱারোলদা হিন্দীদা পীখি।

****