প্রধানমন্ত্রীগী লোইশঙ
পি.এম.না নেস্নেল রোজগার মেলাদা ৱা ঙাংখ্রে
তোঙান-তোঙানবা সরকারগী বিভাগ অমসুং সংস্থানশিংদা নৌনা থবক খল্লবশিংদা এপোইন্তমেন্ত লেত্তর ৭১,০০০ য়েন্থোকখ্রে
“রোজগার মেলাশিংনা নহাশিংগীদমক সরকারগী ফিরেপ অদু তাক্লি”
“হৌখিবা চহি ৯দা সরকারনা থবক লৌবগী থৌওং খোঙজেল য়াংশিনহন্দুনা, মনুং মপান ফাওনা উহন্দুনা অমসুং খেন্নবা থমদনা মীৎয়েং চংখি”
“থবক্কী ওইথোকপা য়াবশিং য়েংলগা সরকারনা পোলিসীশিং শেমখি”
“হৌখিবা চহি ৯দা কেপিতেল এক্সপেন্দিচরদা সরকারনা লুপা করোর লাখ ৩৪ চাদিং তৌখি অমসুং চহি অসিদা কেপিতেল এক্সপেন্দিচরগীদমক লুপা করোর লাখ ১০ এল্লোকেৎ তৌখি”
“আত্মনির্ভর ভারত কেম্পেন অসি লৈবাক অসিদা মেন্যুফেকচর তৌবগী খুত্থাংদা থবক ফংহনবদা য়ুম্ফম ওইখি”
Posted On:
16 MAY 2023 11:54AM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সকী থোংদা নেস্নেল রোজগার মেলাদা ৱা ঙাংখ্রে অমসুং তোঙান-তোঙানবা সরকারগী বিভাগ অমসুং সংস্থানশিংদা নৌনা থবক খল্লবশিংদা এপোইন্তমেন্ত লেত্তর ৭১,০০০ য়েন্থোকখ্রে।
থৌরম অসিদা ৱা ঙাংলদুনা প্রধান মন্ত্রীনা নৌনা থবক খল্লবশিং অমসুং মখোয়গী ইমুং-মনুংশিংদা য়াইফ মঙ্গোল পীখি। মহাক্না গুজরাতকুম্বা রাজ্যশিংদা রোজগার মেলাশিং হন্দক্তা পাঙথোকখিবা অমসুং অসামদা পাঙথোক্কদৌরিবা অসি নীংশিংখি। মহাক্না হায়খি কেন্দ্র অমসুং বি.জে.পি.না পানবা রাজ্যশিংদা মেলাশিং পাঙথোক্লিবা অসিনা নহাশিংগীদমক সরকারগী ফিরেপ অদু উৎলি।
হৌখিবা চহি ৯ অসিদা প্রধান মন্ত্রীনা হায়খি মদুদি সরকারনা থবক লৌবগী থৌওং খোঙজেল য়াংশিনহন্দুনা, মনুং মপান ফাওনা উহন্দুনা অমসুং খেন্নবা থমদনা মীৎয়েং চংখি। থবক লৌবগী থৌওংদা মায়োক্নখিবা খুদোংচাদবশিংগী মতাংদা নীংশিংলদুনা প্রধান মন্ত্রীনা হায়ি স্তাফ সেলেক্সন বোর্দনা অনৌবা রিক্রুৎশিং লৌনবা হোৎনবদা থা ১৫-১৮ চংখি অদুবু ঙসিদি মসি শুপ্নগী থা ৬-৮ খক্তমক চংলে। মহাক্না হায়খি এপ্লিকেসন ফোর্ম লৌবদগী হৌরগা পোস্তকী খুত্থাংদা থাজিনবগী মমাংদা লৈরম্বা থবক লৌবগী থৌওং অদু ওনলাইন ওইহন্দুনা চে-চাংশিং সেল্ফ-এতেস্তেসন তৌবা হৌদোকখিবা অসিনা হৌজিক্তি লাইথোকহল্লে। প্রধান মন্ত্রীনা হায়খি গ্রুপ সি অমসুং গ্রুপ দিগী ইন্তর্ভ্যুশিং মুত্থৎখ্রে। প্রধান মন্ত্রীনা হায় মসিগী খ্বাইদগী চাউবা কান্নবা অসি অপুনবা থৌওং অসিদগী নেপোতিজম মাংহনবা অসিনা ওইরি।
প্রধান মন্ত্রীনা ঙসিগী তাং অসি মরু ওই হায়না ফোঙদোকখি, চহি ৯গী মমাংদা তাং অসিদা, মে ১৬তা লোক সভা মীখলগী ফলশিং লাউথোকখি। নুমিৎ অদুদা হরাও-নুংঙাইখিবা অদু নীংশিংলদুনা প্রধান মন্ত্রীনা হায়খি সবকা সাথ, সবকা বিকাসকী ৱাখল্লোনগা লোয়ননা হৌখিবা খোঙচৎ অসিনা বিক্ষিৎ ভারত অমগীদমক থবক তৌরি। প্রধান মন্ত্রীনা হায়খি ঙসি অসি সিক্কিম শেমখিবা নুমিৎসু তারি।
প্রধান মন্ত্রীনা হায়খি চহি ৯ অসিদা থবক পীবগী ওইথোকপা য়াবশিং য়েংলগা সরকারগী পোলিসীশিং শেমখি। মোদর্ন ইনফ্রাস্ত্রকচরগী লমশিংদা পাইখৎলিবা থৌশিলশিং, খুঙ্গং চাউখৎহনবা নত্ত্রগা পুন্সিগী তঙাই ফদবা মথৌ তাবশিং ফংহনবা, ভারত সরকারগী পোলিসী খুদিংমক্না নহাশিংগীদমক অনৌবা খুদোংচাবশিং পীরি।
প্রধান মন্ত্রীনা হায়খি হৌখিবা চহি ৯দা সরকারনা কেপিতেল এক্সপেন্দিচর অমসুং তঙাই ফদবা খুদোংচাবশিংদা লুপা করোর লাখ ৩৪ চাদিং তৌখি। চহি অসিগী বজেৎতসু কেপিতেল এক্সপেন্দিচরগীদমক লুপা করোর লাখ ১০ এলোকেৎ তৌখি। শেনফম অসিনা অনৌবা হায়ৱেশিং, অনৌবা এয়রপোর্তশিং, অনৌবা রেল রুৎশিং, থোংনচিংবা মোদর্ন ইনফ্রাস্ত্রকচর শেমগৎপা ঙমহল্লি। মসিনা লৈবাক অসিদা অনৌবা থবক কয়া পীরি হায়না মহাক্না ফোঙদোকখি।
প্রধান মন্ত্রীনা হায়খি ঙসি নীংতম্বা ফংলবা ভারতকী পুৱারীদা ভারতকী খোঙজেল অমসুং স্কেল অসি অমুক্তা উখিদ্রি। মহাক্না হায় মমাংগী দিকেদ ৭তা কিমি লিশিং ২০ ইলেক্ত্রিফাইদ তৌখিবা অদুগা চাংদম্নবদা হৌখিবা চহি ৯ অসিদা রেল লাইন কিমি লিশিং ৪০ ইলেক্ত্রিফাইদ তৌবা ঙমখি। লৈবাক্কী মেত্রো রেল নেৎৱার্ক্কী মতাংদা পল্লদুনা প্রধান মন্ত্রীনা হায়খি ২০১৪গী মমাংদা মেত্রো লাইন শুপ্নগী মিতর ৬০০ শেমখি অদুবু ঙসিদি মেত্রো রেল লাইন চাউরাক্না কিমি ৬ শেমখ্রে।
২০১৪গী মমাংদা খুঙ্গংগী লম্বী কিমি লাখ ৪দগী তানা লৈরমখি ঙসিদি মসিগী অশাংবা অসি কিমি লাখ ৭.২৫ য়ৌরে। ২০১৪দা এয়রপোর্তশিংগী মশিং ৭৪ ওইরম্বদগী ঙসিদি ১৫০গী ময়াদা শুরে। মতৌ অসুম্না হৌখিবা চহি ৯দা লায়রবশিংগীদমক য়ুম করোর ৪ শাদুনা থবক চাউনা পীখি। খুঙ্গংশিংদা কম্মন সর্ভিস সেন্তর লাখ ৫না খুঙ্গংগী মফমশিংদা থবকশিং পীরি। খুঙ্গংশিংদা পঞ্চায়ৎ ভাবন লিশিং ৩০ হেন্না শাখ্রে অমসুং য়ুমথোং করোর ৯দা তোতি ঈশিংগী কন্নেক্সন পীবা ঙমখ্রে। পুম্নমক অসিনা থবক চাউনা পীরি হায়না প্রধান মন্ত্রীনা ফোঙদোকখি। ফোরেন ইনভেস্তমেন্ত নত্ত্রগা ভারতকী এক্সপোর্তকী মতিক-ময়াই ওইরবসু মসিনা লৈবাক অসিদা থবক পীনবা অমসুং মশানা মশাদা থবক পীজনবা খুদোংচাবা কয়ামরুম পীরি হায়না প্রধান মন্ত্রীনা ফোঙদোকখ্রে।
প্রধান মন্ত্রীনা মখা তারদুনা হায়খি হৌখিবা চহি ৯ অসিদা লৈবাক অসিদা নহারোলশিংগীদমক অনৌবা সেক্তরশিং থোরক্তুনা থবক্কী মওং-মতৌশিংদা চাউনা অহোংবশিং লাকখি। প্রধান মন্ত্রীনা নৌহৌননা ফোঙদোকখি মদুদি কেন্দ্র সরকারনা অনৌবা সেক্তরশিং অসিদা লেপ্পা লৈতনা তেংবাং পীরি অমসুং লৈবাক অসিনা উবা ফংলিবা স্তার্তঅপ রিভোল্যুসনগী মতাংদা ফোঙদোকখি। মহাক্না হায়খি লৈবাক অসিদা ২০১৪দা স্তার্তঅপশিংগী মশিং অসি ১০০ ওইরম্বদগী ঙসিদি লাখ ১ হেন্দুনা নহারোল লাখ ১০ হেনবদা থবক পীরি।
তেক্নোলোজীগী লমদা চাউখৎলকপনা মরম ওইদুনা মীয়ামগী পুন্সিশিংবু মমাংদগী হেন্না নুংঙাইহল্লি হায়না ফোঙদোক্লদুনা প্রধান মন্ত্রীনা এপ-বেজ তেক্সি সর্ভিসশিংনা সহরশিংগী লাইফলাইন ওইরকপা, অফবা ওনলাইন দেলিবরী সিস্তেমশিংনা থবক পীবা হেনগৎলকপা, দ্রোন সেক্তরদা শাহৌ পীবনা তিল হীদাক চাইবদগী হীদাক লাংথকশিং দেলিবরী তৌবদা মতেং পাংবা, সিতী গ্যাস দিস্ত্রিব্যুসন সিস্তেমগী কবরেজ অসি সহর ৬০দগী ৬০০তা হেনগৎলকপা অসি খুদম ওইনা পীখি।
প্রধান মন্ত্রী হায়খি হৌখিবা চহি ৯দা সরকার অসিনা মুদ্রা য়োজনাগী মখাদা লুপা করোর লাখ ২৩ হেনবগী লোনশিং পীথখি হায়রিবা অসিনা প্রজাশিংবু অনৌবা ললোন-ইতিক তৌবা, তেক্সি লৈবা নত্ত্রগা মখোয়না হৌজিক তৌরিবা অদু পাকথোক চাউথোকহনবদা মতেং পাংখি। প্রধান মন্ত্রীনা হায়খি চাউরাক্না প্রজা করোর ৮-৯না মুদ্রা য়োজনাগী মখাদা লোন ফংলবা মতুংদা অহানবা ওইনা ওন্তপ্রিনোরশিং ওইবা ঙমখি। কেন্দ্র সরকারনা পি.এল.আই. স্কিমগী মখাদা মেন্যুফেকচরিংগীদমক লুপা করোর লাখ ২ রোমগী তেংবাং পীরি হায়না ফোঙদোক্লদুনা প্রধান মন্ত্রীনা হায়খি, “আত্মনির্ভর ভারত কেম্পেন অসি লৈবাক অসিদা মেন্যুফেকচরিংগী খুত্থাংদা থবক পীবদা য়ুম্ফম ওই”।
প্রধান মন্ত্রীনা হায়খি হায়র এজুকেসন ইন্সতিত্যুতশিং অমসুং স্কিল দিবেলপমেন্ত ইন্সতিত্যুতশিং লৈবাক অসিদা খোঙজেল য়াংনা চাউখৎহল্লি। ২০১৪ অমসুং ২০২২গী মরক্তা অনৌবা আই.আই.তি অমসুং অনৌবা আই.আই.এম.শিং চহি খুদিংগী হাংদোকখি হায়না প্রধান মন্ত্রীনা ফোঙদোকখি। মহাক্না মখা তারদুনা হায়খি হৌখিবা চহি ৯ অসিদা চাংচৎ ওইনা চয়োল খুদিংগী য়ুনিভর্সিতী অমা শঙ্গাখি অমসুং নুমিৎ খুদিংগী কোলেজ অসি ফঙ্কস্নেল ওইহনখি। প্রধান মন্ত্রীনা হায়খি ২০১৪গী মমাংদা লৈবাক অসিদা য়ুনিভর্সিতী ৭২০রোম লৈরমখি অদুবু ঙসিসি ১১০০ হেন্না লৈরে। লৈবাক্কী মেদিকেল এজুকেসনগী মতাংদা পল্লদুনা প্রধান মন্ত্রীনা হায়খি দিকেদ ৭ অসিদা লৈবাক অসিদা এম্স ৭ খক্তমক শারমখি অদুবু হৌখিবা চহি ৯ অসিদা সরকারনা অনৌবা এম্স ১৫ শেমগৎখি। মহাক্না মখা তারদুনা হায়খি লৈবাক্কী মেদিকেল কোলেজশিংগী মশিং অসি ৪০০দগী ৭০০তা হেনগৎলকখি অমরোমদা এম.বি.বি.এস. অমসুং এম.দি.গী সীৎশিংগী মশীং অসি লিশিং ৮০ ওইরম্বদগী লাখ ১গা লিশিং ৭০দা হেনগৎহনখি।
প্রধান মন্ত্রীনা হায়খি চাউখৎ-থৌরাংদা আই.তি.আই.শিংগী থৌদাং লৈ। “হৌখিবা চহি ৯দা নুমিৎ খুদিংগী আই.তি.আই. অমা লিংখৎখি”। মহাক্না হায়খি অনৌবা কোর্সশিং লৈবাক্কী মথৌ তাবশিংগী মতুং ইন্না আই.তি.আই. লিশিং ৫০দা হৌদোকখি অমসুং নহারোল করোর ১.২৫ হেনবনা পি.এম. কৌশাল বিকাস য়োজনাগী মখাদা স্কিল লৈবা ঙমখি। ই.পি.এফ.ও.গী খুদম পীরিদুনা প্রধান মন্ত্রীনা হায়খি ২০১৮-১৯গী মতুংদা অনৌবা ফোর্মেল জোব করোর ৪.৫ পীখি, ই.পি.এফ.ও. নেৎ পেরোলগী মতুং ইন্না ফোর্মেল জোবশিংদা লেপ্পা লৈতনা গ্রোথ লৈরি। মশানা মশাবু থবক পীজবগী খুদোংচাবশিং লেপ্পা লৈতনা হেনগৎলক্লি।
প্রধান মন্ত্রীনা হায়খি মালেমগী থাক্তা ভারতকী ইন্দস্ত্রী অমসুং ইনভেস্তমেন্ততা অমুক্তা ওইখিদ্রিবা মওংদা পোজিতিবিতী লৈবা উবা ফংখি। মহাক্না হন্দক্তা ৱালমার্তকী সি.ই.ও.গা উন্নখিবা অদু নীংশিংলদুনা প্রধান মন্ত্রীনা হায়খি সি.ই.ও.না ভারত্তগী লুপা করোর লিশিং ৮০ ফাওবগী পোৎলমশিং এক্সপোর্ত তৌগনি হায়না থাজবা থমখি। মসি লোজিস্তিক্স অমসুং সপ্লাই চেনগী সেক্তরশিংদা লৈরিবা নহারোলশিংগীদমক নুংঙাইবা পাউ অমনি। সিস্কোগী সি.ই.ও.গা মহাক্কা উন্নখিবা অদু নীংশিংলদুনা হায় মখোয়গী পান্দম অসি ভারত্তগী লুপা করোর লিশিং ৮গী পোৎলম এক্সপোর্ত তৌবনি অমসুং এপলগী সি.ই.ও.না ভারতকী মোবাইল মেন্যুফেকচরিং ইন্দস্ত্রীদা থাজবা থম্মি হায়না ফোঙদোকখি, সেমিকন্দক্তর কম্পনী এন.এক্স.পি.গী তোপ একজিক্যুতিবনা সেমিকন্দক্তর ইকোসিস্তেম অমা শেম্নবা ভারতকী মতিক-ময়াইদা থাজবা থম্মি উৎখি, হায়না মহাক্না ফোঙদোকখি। ফোক্সকোন্না লুপা করোর লিশিং কয়াগী ইনভেস্তমেন্তশিং তৌবা হৌখ্রে হায়না মহাক্না ফোঙদোকখি। প্রধান মন্ত্রীনা হায়খি মথংগী চবোলদা মহাক্না মালেমগী মাংজিল থারিবা কম্পনীশিংগী সি.ই.ও.শিংগা লোয়ননা উনগনি অমসুং মখোয়না ভারত্তা ইনভেস্ত তৌবদা চাউনা থৱায় য়াওরি। মহাক্না হায়খি অসিগুম্বা খোঙথাংশিং অসিনা ভারতকী তোঙান-তোঙানবা সেক্তরশিংদা অনৌবা থবক্কী খুদোংচাবশিং পীরি।
ৱারোল পীবা লোইশিংনবদা প্রধান মন্ত্রীনা নৌনা থবক খল্লবশিংদা মহাক্না ৱা হায়খি অমসুং মথংগী চহি ২৫দা চাউখৎপা ভারত অমগী ফোরেপ থুংহন্নবা লৈবাক অসিদা পাইখৎলিবা চাউখৎ-থৌরাংগী মহায়জ্ঞা অসিদা মখোয়গী থৌদাংগী মতাংদা ফোঙদোকখি। প্রধান মন্ত্রীনা থবক খল্লবশিংদা মসিগী খুদোংচাবা মপুং ফানা শীজিন্ননবা হায়খি অমসুং সরকারনা আই.জি.ও.তি. কর্ময়োগী মোদ্যুল, ওনলাইন লর্নিং প্লেৎফোর্ম অসিগী খুত্থাংদা মাগী কর্মচারীশিংগী স্কিল দিবেলপমেন্ত তৌবদা মীৎয়েং চংলি হায়না ফোঙদোকখি।
বেকগ্রাউন্দ
রোজগার মেলা অসি কেন্দ্র সরকারগী বিভাগশিং অমসুং রাজ্য সরকারশিং/য়ু.তি.শিংনা থৌশিল অসিবু শৌগৎলদুনা থবক লৌবগা লোয়ননা লৈবাক্কী মফম ৪৫দা পাঙথোকখি। লৈবাক শিনবা থুংবদগী নৌনা থবক খল্লবশিইংনা গ্রামিন দাক সেবকশিং, ইন্সপেক্তর ওফ পোস্তস, কম্মর্সিএল-কম-তিকেৎ ক্লর্ক, জুনিয়র ক্লর্ক-কম-তাইপিস্ত, জুনিয়র একাউন্ত ক্লর্ক, ত্রেক মেন্তেনর, এসিস্তেন্ত সেক্সন ওফিসর, লোবর দিবিজন ক্লর্ক, সব দিবিজনেল ওফিসর, তেক্স এসিস্তেন্ত, এসিস্তেন্ত এনফোর্মেন্ত ওফিসর, ইন্সপেক্তর, নর্সিং ওফিসর, এসিস্তেন্ত সেক্যুরিতী ওফিসর, ফায়রমেন, এসিস্তেন্ত একাউন্ত ওফিসর, এসিস্তেন্ত ওদিৎ ওফিসর, দিবিজনেল একাউন্তেন্ত, ওদিতর, কোন্সতেবল, হেদ কোন্সতেবল, এসিস্তেন্ত কম্মান্দেন্ত, প্রিন্সিপল, ত্রেন্দ গ্রেজ্যুএৎ তীচর, এসিস্তেন্ত রেজিসতার, এসিস্তরেন্ত প্রোফেসরগুম্বা তোঙান-তোঙানবা ফমশিং য়াওরি।
রোজগার মেলা অসি থবক পীবদা চাউনা মীৎয়েং থমখিবা প্রধান মন্ত্রীগী ফিরেপ অদু থুংহন্নবা মাইকৈদা চংশিনবা খোঙথাং অমনি। রোজগার মেলানা থবক পীবদা অমসুং নহারোলশিংবু মখোয়গী এম্পাৱরমেন্তগীদমক মখোয়দা অফবা খুদোংচাবশিং পীবদা অমসুং লৈবাক্কী চাউখৎ-থৌরাংদা শরুক য়াবদা কেতলিস্ত অমা ওইখি।
নৌনা খনখ্ররবা এপোইন্তীশিংনা ওনলাইন ওরিয়েন্তেসন কোর্স অমা ওইরিবা কর্ময়োগী প্রারম্ভগী খুত্থাংদা তোঙান-তোঙানবা সরকারগী বিভাগশিংদা নৌনা খল্লবা এপোইন্তী পুম্নমক্না মখোয় মশাবু ত্রেন তৌনবা খুদোংচাবা অমসু ফংগনি।
*****
(Release ID: 1925743)
Visitor Counter : 131
Read this release in:
Khasi
,
English
,
Urdu
,
Marathi
,
Hindi
,
Nepali
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam