U Myntri Rangbah Duh, u Narendra Modi u la ai jingkren ha ka National Rozgar Mela lyngba ka video conferencing mynta ka sngi bad u la sam ia kumba 71,000 tylli ki shithi ai kam sha kito kiba dang rung kam thymmai ha ki tnat Sorkar bad ki kynhun bapher bapher.

Ha ka jingai jingkren jong u, u Myntri Rangbah Duh u la ai khublei ia kine kiba dang rung kam thymmai bad ruh ia ki longiing jong ki. U la kren shaphang ki Rozgar Mela ba la dep pynlong dang shen ha ki jylla kum ka Gujarat bad ka Mela ka ban dang long ha Assam. U la ong ba kine ki Mela ha ka nongbah jong ka ri bad ha ki jylla ba synshar da ka BJP ki pyni ia ka jingkut jingmut ka Sorkar na ka bynta ki samla.

Ha kine ki 9 snem ba la dep, u Myntri Rangbah Duh u la ong ba ka Sorkar ka la niewkor ia ka jingthung kam da kaba pynlong ia ka, ka kam kaba sted, kaba shai ba kaba lait na ka jingiashah shiliang. U la kren shaphang ki jingeh ba ki briew ki iashem ha ka jingwad kam bad u la ong ba ka Staff Selection Board ka la shim kumba 15-18 bnai ban ai kam ia ki nongwad kam katba mynta ka pyndep ia kane ka kam ha tang 6-8 bnai. U la ong ba ka jingrung kam kaba mynshuwa ka dei kaba la pynsuk mynta naduh ka jingshim ia ki phom bad ka jingphah ia kine, bad kane ka la urlong namar ka jingpyndonkam ia ki lad online ha kaba lah ban sakhi hi dalade ruh ia ki kot ki sla. U Myntri Rangbah Duh u la ong ruh ba ki interview na ka bynta ka Group C bad Group D ki dei kiba la pynduh noh mynta. U Myntri Rangbah Duh u la ong ba ka jingmyntoi kaba heh tam na kane ka dei ka jingweng ia ka jingiashah shiliang ha kane ka kam thung kam.

U Myntri Rangbah Duh u la ong ba kane ka dei ka tarik kaba kyrpang namar 9 snem mynshuwa, ha kane ka juh ka sngi kaba long ka 16 tarik u Jymmang, la pynbna ia ki resol jong ka elekshon Lok Sabha. U la kynmaw ia ki jingkyrmen ha kato ka sngi bad u la ong ba ka jingiaid lynti kaba la sdang da ka jingngeit ha ka Sabka Saath, Sabka Vikas, ka trei na ka bynta ka Viksit Bharat. U la ong ruh ba kane ka dei ka sngi jong ka jingioh ia ka jylla Sikkim.

U Myntri Rangbah Duh u la ong ba ha kine ki 9 snem, la saindur ia ki polisi Sorkar da kaba kynmaw ia ki lad ioh kam. Ki sienjam ha ki kam jingdon jingem katkum ka juk mynta, ka jingtur sha ki jaka nongkyndong bad ka jingpyniar ia ki jingdonkam ha ka jingim, baroh ki polisi jong ka Sorkar India ki dei na ka bynta ka jingplie lad ioh kam ia ki samla.

U Myntri Rangbah Duh u la ong ba ha kine ki 9 snem ba la dep, ka Sorkar ka la pynlut kumba T 34 lak klur na ka bynta ki jingdon jingem. Ha ka mang tyngka mynta u snem ruh, la mang T 10 lak klur na ka bynta ki jinglut jingsep. Kane ka la wanrah ia ki jingdon jingem katkum ka juk mynta kum ki surok bah ba thymmai, ki kad liengsuin ba thymmai, ki lynti rel ba thymmai, ki jingkieng bad kiwei kiwei. Kine baroh ki la plie ia ki lad ioh kam ha kylleng ka ri, u la ong.

U Myntri Rangbah Duh u la ong ba mynta, ka jingsted bad ka jingiar kam ka India ka dei ka bym pat ju iohi ha ka histori jong ka India kaba la ioh jinglaitluid. U la ong ba ha kine ki 9 snem ba la dep, la pynkylla bording elektrik ia 40 hajar km ki lynti rel haba ianujor bad 20 hajar km ha ki 70 snem shuwa kane. U la kren shaphang ka rynsan lynti metro ha ka ri ha kaba u la ong ba tang 600 meter ki lynti metro ki dei kiba la pyndep shuwa u snem 2014 katba mynta, kumba 6 km ki lynti metro ki dei kiba dang shna.

Shuwa u snem 2014, ki la don duna ia ka 4 lak km ki surok ha ki jaka nongkyndong kaba kane ka la kiew sha ka 7.25 lak km mynta. Ka jingdon ki kad liengsuin ka la kiew na ka 74 ha u 2014 sha jan 150 tylli mynta. Kumjuh, ki 4 klur tylli ki iing ba la shna na ka bynta kiba duk ba suk ha kine ki 9 snem ba la dep ki la plie ia ki lad ioh kam. Ki 5 lak tylli ki common service center ha ki jaka nongkyndong ki la plie lad ioh kam ha ki jaka nongkyndong. Palat 30 hajar tylli ki Panchayat Bhawan ki dei kiba la dep shna ha ki jaka nongkyndong bad 9 klur tylli ki longiing ki dei kiba ioh um kor. Baroh kine ki la plie ia ki lad ioh kam, la ong u Myntri Rangbah Duh. La ka dei ka jingbei tyngka shabar ri ne ka bor shalan mar shabar ri ka India, u Myntri Rangbah Duh u la ong ba kane ka la plie ia ki lad ioh kam bad ki lad seng kam lajong ha ka ri.

U Myntri Rangbah Duh u la ong ba ha kine ki 9 snem ba la dep, ka jinglong jong ki kam ka la kylla bha ha kaba ki kam kiba thymmai ki la mih na ka bynta ki samla jong ka ri. U Myntri Rangbah Duh u la ong ba ka Sorkar Pdeng ka bteng ban ai jingkyrshan ia kine ki kam bad u la kren ruh shaphang ka jingkylla lyngba ki kam stratum ba ka ri ka la shem. U la ong ba ka jingdon ki startup ha ka ri ka la kiew na ki 100 tylli shuwa u snem 2014 sha palat 1 lak mynta kaba la plie lad ioh kam ia palat 10 lak ngut ki samla.

U la kren shaphang ki jingkylla ha ka teknoloji kiba la wanrah jingsuk ha ka jingim jong ki briew bad u la ai nuksa ia kane da ki kam shim taksi da ki app kaba la kylla sha u budlum jong ka leit ka wan ha ki nongbah, ki kam pynpoi mar kiba iaid beit iaid ryntih kiba la plie lad ioh kam, ki jingkyntiew ia ki kam drone kiba la iarap ban synreit dawai bad ka jingpynpoi ia ki dawai, ka jingpyniar ia ka jingpynpoi ia ka gas kaba la kiew na ka 60 sha ka 600 tylli ki nongbah.

U Myntri Rangbah Duh u la pynbna ba ha kine ki 9 snem ba la dep, ka Sorkar ka la pyllait ia ki jingai ram kiba kot sha palat T 23 lak klur hapoh ka Mudra Yojna kaba la iarap ia ki briew ba kin seng kam thymmai, ba kin thied ia ki taksi lane pyniar ia ki kam jong ki ba la don lypa. U Myntri Rangbah Duh u la pyntip ruh ba kumba 8-9 klur ngut ki briew ki dei ki nongseng kam lajong ba thymmai hadien ba ki la shim ram hapoh ka Mudra Yojana. “Ka Atmanirbhar Bharat campaign ka don nongrim ha ka jingplie lad ioh kam lyngba ka jingpynmih tiar ha ka ri,” la ong u Myntri Rangbah Duh katba u la batai ruh ba ka Sorkar Pdeng ka ai jingiarap kumba T 2 lak klur na ka bynta ki kam pynmih mar hapoh ka skhim PLI.

U Myntri Rangbah Duh u la ong ba ki jaka ai jinghikai higher education bad ki jaka ai jinghikai kyntiew sap ki dei kiba dang tei wut wut ha ka ri. U Myntri Rangbah Duh u la pyntip ba hapdeng u 2014 bad 2022, ka la don ka IIT bad IIM ba thymmai man u snem. U la ong ba la plie paidbah ia kawei ka skul bah man ka taiew bad ar tylli ki kolej ki dei kiba la sdang treikam man ka sngi haba iakhein lang ia baroh ha kine ki 9 snem ba la dep. U Myntri Rangbah Duh u la ong ba ki la don 720 tylli ki skul bah ha ka ri shuwa u 2014 katba kane ka la kiew sha palat 1100 tylli mynta. U la kren shaphang ka jingai jinghikai ha ki kam ai jingsumar ha ka ri ha kaba u la ong ba la shna tang 7 tylli ki AIIMS ha ka ri ha ki 70 snem ba la dep katba ha kine ki 9 snem ba la dep, ka Sorkar ka la tei 15 tylli ki AIIMS ba thymmai. U la ong ruh ba ka jingdon ki medical kolej ha ka ri ka la kiew na ka 400 sha ka 700 ha kaba ka jingdon ki seat MBBS bad MD ka la kiew na kumba 80 hajar sha palat 1 lak 70 hajar.

U Myntri Rangbah Duh u la kren ruh shaphang ka bynta jong ki IIT. “Ha kine ki 9 snem ba la dep, la tei ia kawei ka IIT man ka sngi.” U la ong ba la sdang ia ki jingpule ba thymmai ha 15 hajar tylli ki IIT katkum ki jingdonkam jong ka ri bad ba palat 1.25 klur ngut ki samla ki dei kiba la ioh jinghikai hapoh ka skhim PM Kaushal Vikas. U la ai nuksa da ka EPFO, ha kaba u la ong ba hadien ka 2018-19 4.5 klur tylli ki kam kiba thymmai ki la mih katkum ka EPFO Net Payroll kaba dei ka dak jong ka jingkiew ki kam kiba skhem. Ki lad seng kam lajong ruh ki dang bun katba dang mih ki sngi.

U Myntri Rangbah Duh u la ong ba ka don ka jingkyrmen kaba bha ha ki kam ka India bad ka jingbei tyngka ha kiwei kiwei ki ri. U la kren shaphang ka jingialang jong u ba dang shen bad u CEO ka Walmart bad u la ong ba u CEO u ngeit skhem ha ka jinglah ka India ban shalan mar kiba kot dor lang haduh T 80 hajar klur. Kane ka dei ka khubor kaba bha ia ki samla kiba don ha ki kam logistic bad pynbiang mar, u la ong. U la kren ruh shaphang ka jingialang jong u bad u CEO ka CISCO kaba thmu ban shalan mar kiba kot sha ka 8 hajar klur na India bad u CEO ka Apple uba ngeit skhem ha ka kam pynmih mobile ka India. Ki heh ki hain jong ka kompani semiconductor ka NXP ruh ki ngeit ha ka jinglah ka India ban trei ha ki kam pynmih semiconductor. Ka Foxconn ruh ka la sdang ban bei tyngka da ki hajar klur, u la ong. U Myntri Rangbah Duh u la pyntip ruh shaphang ki jingialang ba un dang don bad ki CEO jong ki kompani baheh baheh jong ka pyrthei ha une u taiew ban wan bad u la ong ba baroh kine ki khmih lynti ban wan sha India. U la ong ba kine ki sienjam ki dei ki dak jong ki lad ioh kam kiba la wanrah ha ki kam bapher bapher ha India.

U Myntri Rangbah Duh u la pynkut ia ka jingkren jong u ia kito kiba dang rung kam thymmai da kaba kdew sha ka bynta jong ki ha kane ka Mahayagya jong ka roi ka par kaba dang jia ha ka ri ha kaba ka jingkut jingmut ba ka India kan long kaba la kiew shaphrang ka dei ban urlong ha kine ki 25 snem ban wan. U Myntri Rangbah Duh u la kyntu ia kito kiba dang rung kam thymmai ba kin pyndonkam ia kane ka kabu bad u la kdew ruh ia ka jingpeit bniah ka Sorkar ia ka jingkyntiew ia ki sap jong ki briew lyngba ka iGoT Karmayogi module, kaba dei ka rynsan ioh jinghikai online.

Ka Nongrim

Ka Rozgar Mela ka dei kaba la long ha 45 tylli ki jaka jong ka ri ha kaba la don ka jingpynrung kam ha ki tnat Sorkar Pdeng bapher bapher bad ruh ha ki Sorkar Jylla kiba ai jingkyrshan ia kane ka sienjam. Kito kiba rung kam thymmai kiba la shah jied na kylleng ka ri kin rung ha ki kam Gramin Dak Sevaks, Inspector of Posts, Commercial-cum-Ticket Clerk, Junior clerk-cum-Typist, Junior Accounts Clerk, Track Maintainer, Assistant Section Officer, Lower Division Clerk, Sub Divisional Officer, Tax Assistants, Assistant Enforcement Officer, Inspectors, Nursing Officers, Assistant Security Officers, Fireman, Assistant Accounts officer, Assistant Audit officer, Divisional Accountant, Auditor, Constable, Head Constable, Assistant Commandant, Principal, Trained Graduate Teacher, Assistant Registrar, Assistant Professor bad kiwei kiwei.

Ka Rozgar Mela ka dei kawei na ki sienjam ban pynurlong ia ka jingkut jingmut u Myntri Rangbah Duh ban peit bniah ia ka jingplie lad ioh kam. La kyrmen ba ka Rozgar Mela kan plie shuh shuh ki lad ioh kam na ka bynta ka jingpynkupbor bad ka jingiashim bynta ki samla ha ka jingtei ia ka ri.

Kito kiba dang rung kam thymmai kin ioh ruh ia ka lad ban kyntiew ialade lyngba ka Karmayogi Prarambh, ka rynsan online na ka bynta jong kiba rung kam thymmai ha ki tnat Sorkar bapher bapher.

*****