U Vice President, u Jagdeep Dhankhar mynta ka sngi u la ong ba ka pule puthi kalong ka atiar kaba biang tam bad ka lad wanrah jingkylla ban wanrah ia ka jinglong shai, jinglong ryntih bad jingkiew shaphrang ka imlang sahlang. “Ym don ba lah ban pynkylla ia ki jinglong jingman ha ka imlang sahlang lait na ka jingnang jingstad jong ki briew,” u la ong.

Ha ka jingai jingkren ha ka jingpynkup burom kaba 21 jong ka skul bah Dibrugarh ha Assam mynta ka sngi, u Vice President u la kyntu ia ki samla pule ban long ki “nongpynsaphriang ia ka jingkylla’ bad trei na ka bynta ban wanrah ki jingkylla kiba bha ha ka imlang sahlang. “Phi dei ki nongthaw bad ki shipai jong ka Bharat ha u 2047 haba ka ri kan rakhe ia ka jingdap shispah snem ka jingioh jinglaitluid jong ka”, u la ong ia ki.

Da kaba ong ba ka jingiakhun kadei ka Nonghikai kaba bha tam, bad ka jingsheptieng kadei ka nongshun kaba sniew, u Dhankhar u la kyntu ia ki samla pule ban don ki jingthmu kiba heh bad ban kiar na ka jingkhuslai jingmut. “Don ia ka jingangnud hynrei ym dei ban shu phohsniew, da leh ia ka kam,” u la ong ia ki.

Haba iaroh ia ki phra tylli ki Jylla ka thain shatei lammihngi kum ki “Ashta Laxmi” jong ka ri, u Vice President u la ong khlem ka jingkiew bad ka jingnohsynniang jong ki, ka jingkiew shaphrang jong ka ri kan nym long kaba pura. U la iaroh ruh ia ka skul bah Dibrugarh na ka bynta ka kam jong ka ban pynneh pynsah ia ka jingiar ki ktien bad ki jingthoh jong ka thain. Ka jingpynneh pynsah ia ki ktien jong ngi kalong kaba kongsan bha namar ki la kylla ha ki hajar snem, u la ong.

Haba pynpaw ka jingkmen halor ka jingkynthup ia ka thain shatei lammihngi ha ka jinglong jingman jong baroh kawei ka ri ha ka Amrit Kaal, u Vice President u la iaroh ia ka NCERT bad ka Indian Council of Historical Research (ICHR) kaba la pyni ia ka jingnohsynniang ki riewshlur bym shym la paw jong ka thain shatei lammihngi, ha ka histori jong ngi bad ka jingiakhun jinglaitluid.

Da kaba iaroh ia ka jingphaikhmat jong ka sorkar ban kyntiew ia ka jinglong jingman, ka imlang sahlang bad ki jingdon jingem ha ki kam digital ha ka thain, u Dhankhar u la ong ba ka thain shatei lammihngi ka sdang long kum ka jaka ba bun ki lad. U la kren shaphang ki projek bapher bapher kum ka jingkieng Bogibeel rain-cum road, 375 tylli ki projek ba iadei bad ki surok, ka jingkiew ka jingdon ki kad liengsuin na ka 9 sha ka 17 tylli bad ka jingplie 190 tylli ki jaka pule ba thymmai ha ka thain shatei lammihngi, u la ban ba ki lad ki lynti ba thymmai ki don na ka bynta ki samla mynta ban pyni ia ka bor jong ki.

Da kaba ong ba ka khana jingkiew shaphrang jong ka ri kum kaba ‘ym lah ban pynsangeh’, u Vice President u la pynpaw ka jingsngewskhem ba ha kaba kut jong kane ka phew snem, ngin long ka ri kaba lai kaba khlain ha ka ioh ka kot ha pyrthei. Haba kren shaphang ki jingjop kiba bun kum ka jingai ia ki digital ID (AADHAR) sha 99.9% ki briew jong ka ri, ka JAM trinity, MUDRA bad ka PM Kisan Samman Nidhi, u la ong ba wat ka IMF ka la iaroh ia ki jingdon jingem digital jong ka India na ka bynta u paidbah bad ka la ong ba kane ka dei ka nuksa ia kiwei kiwei ki ri kiba dang pynkylla sha ki kam digital.

Da kaba khot ia ka India kum ka Kmie jong ka Synshar Paidbah bad ka synshar paidbah kaba phyrnai tam ha pyrthei, u Vice President u la buh jingkylli balei katto katne na ngi, ngi bein ia ka synshar paidbah jong ngi hapoh bad shabar ka ri. U la ong ruh ba ka jinglong laitluid ban pynsngew ia la ki jingsngew kam dei kaba la tehlakam ha India.

Da kaba khot ia ka Parliament kum ka iing mane jong ka synshar paidbah jong ngi, u Vice President u la ban ba kalong ka rynsan ha kaba la iatai ia ki jingeh ba iadei bad ka bha ka miat jong u paidbah, iamir jingmut bad shim ia ki rai, hynrei ka jingbteng ki jingthut, u la bynrap, ka pyntlot ia ka burom bad ka jingskhem jingmut ba ki briew ki buh ha ki iing dorbar thaw ain. Kumta, u la kyntu ban wanrah ia ka jinglong jingman khnang ba ki MP jong ngi kin lah ban leh ia kaba donkam katkum ki jingthmu jong ki riewkhraw ba la wanrah ia ka Riti Synshar jong ngi.

Haba ai khublei ia ki samla pule kiba la pass, u Dhankhar u la kyntu ia ki ban nym klet ia la ki nonghikai bad ka jaka pule jong ki. “Kum ki samla pule barim jong kane ka skul bah, phi dei ban nohsynniang na ka bynta ka bha ka miat jong ka jaka pule jong phi ha kano kano ka rukom kaba phi lah,” u la ong. 

Ha kane ka jingialang, u Vice President u la pynkup burom kyrdan D.Sc bad D. Litt (Honoris Causa) sha ki riewpawkhmat jong ka jylla Assam. U la thung ruh u tynrai dieng ha phyllaw jong kane ka skul bah.

U Gulab Chand Kataria, Lat ka jylla Assam & Chancellor jong ka skul bah Dibrugarh, u Dr. Himanta Biswa Sharma, Myntri Rangbah ka jylla Assam, u Rameswar Teli, Myntri khynnah ka sorkar pdeng ba dei khmih ia ka tnat Petroleum and Natural Gas and Labour and Employment, u Dr. Ranoj Pegu, Myntri ka Tnat Pule Puthi, Sorkar Assam, Prof. Jiten Hazarika, Vice-Chancellor, skul bah Dibrugarh, ki dkhot jong ka board, Director, ki nonghikai, ki samla pule bad kiba haiing jong ki samla kiba la pyndep ia ka graduation ki la iadonlang ha kane ka jingialang.